الجزء 15 - الحب أقوى من أي إتفاق

 هادشي لي دارت ميجيش نقطة في بحر شنو صرف فيها هو ....هو لعب عليها اما هي مطالبة غا بحقها ...خرجاات بالمهل من شركة لي شافيها تخنزر فيه سمعات تليفونها كيصوني جبداتو من صاك كانت نادية لي بقى راسها ضارها وخاصها تعرف شنو وقع معاها جوبات وهي غادا قاصدة الباركينغ ~. ضرك راسك ازين !! نادية كانت شادة طريق وحداها عايشة ~. بحال داكشي ، شنو درتي، اش وقع !! مريام حلات طوموبيلتها وطلعات ~. درت لي خاصو يدار ، وقفت عليه بحال قباض رواح گاع لوان دازو في وجهو ...لاحت صاكها لور وقالت بسخرية ...وكيف ديماا لخليفي لواعر لي مكيرضاش ول حاس براسو وديما هازو لفوق متقبلهاش وقال لمحاميه تافق معاها باش ننهيو شراكا نادية عوجات فمها ~. ايوا وشنو بان ليك نتي !! مريام كانت كتدوي ومركزة مع طريق ~ كيفاش شنو بان ليا !! زعمة راه هضرنا ، انا معندي غرض بيه غرضي بشركة بغى يفضي مها هاد شراكة يخرج منها ونعوضو ،سي نو معندنا فاش نتفاهمو نادية ~. ودابا شنو المعمول مريام ~. الهضرة ماشي فتليفون ...بتساؤل ..فينك نتي دابا ؟؟ نادية تنهدات ~. لقيتيني راجعة انا وماما لدارناا مريام متاسفة لحالة بنت خالتها ولاش وصلات بسبابها ولات تجلوق من قنت لقنت وحياتها مبقاتش مرصية ~. رجعتو ايوا مزيان !!... مهم ملي توصلي وترتاحي وتقادي شغلك ، عيطي ليا نتلاقاو وندويو مزيان هاد الهضرة ماشي تاع التليفون نادية حركات راسها بالايجاب وقالت~. ميكون غا خاطرك ازين يالله بوسي ليا أرون قطعات معاها وركزات في طريقهاا ، باغا امتى توصل وغير شوية دالوقت وكانت قدام دارهم لقديمة لجامعة لكاع الذكريات الزوينين والخايبين ليها مع مراد.... حلات باب طوموبيل ونزلات ومقدراتش تزيد خطوة وحدة حدها ركزات شوفتها قدام باب الدار وسهات فيه وتفكرت نهار كان كيوقف ويوصلها لخدمتها ولا غيرتو على لبسها ملي كتخرج لعندو وكيرجعها تبدلو، كلشي رجع ليها وتفكراتو بحالا وقع غير لبارح ابتاسمت بحسرة على راسها وكون رجع بيها الزمان لور مكانتش غادي تغلط وتخلي راجلها يضيع من بين ايدها وهو معندو ذنب غير مشى في رجلين ..نغزتها مها ل حلات باب دار وجرتها باش تحرك وهي واقفة بحال الجثة كلشي عارف وكلشي حاس بحبها الكبير لمراد ولكن كلشي ساكت وحتى واحد معندو الجرأة يهضر ولا يقول شي كلمة ولا حتى يجبدو معاها الموضوع باش مايجرحوهاش اكثر ... هزت رجليها بخطوات ثقال وتمت داخلة حتى كيلفت انتباهها بوات ليتغ محلولة وفيها شلا وراق مشات هزتهم كاملين وغادية داخلة وكتقرا فيهم ... شي ديال ضو والما شي ديال ضريبة شي ديال البنكة بقاو زوج في ايدها ما حلاتهم حتى ذخلت لداخل وجلسات على الفوطوي كانت وحدة منهم استدعاء من المحكمة غير حلتها وهي تصدم ملي قرات "دعوى طلاق من مراد بن زين " فاش قررات تجي لدار كانت منتاظرة وكلها أمل انفوا توصل يعرفها رجعات ويوقف عليها ويطلبها ويرغبها وتدفع عليه كبير من فوق خاطرها كيف ديما ...حيت هادا هو مراد لي عرفات مراد ل مولفة عليه ديما تابعها وكيجري وراها ....جامي توقعات تلقاه مصيفط ليها استدعاء بطلاق ويقرر ينهي زواجهم لي مزال مبداا حسات برجليها خواو عليها وهي شادة لورقة فيدها اما قلبها قرب يخرج من بلاصتو ...بقوة الصدمة فقدت كاع حواسها ..ماماها كانت حداها كتدوي معاها مجوبتهاش فداك الوقت كانت في حوار مع نفسها .. -زعمة باغي يتزوج ولا صافي كلشي سلا ؟؟ واش مبقى والو بيني وبينو هادي هي النهاية ؟؟ مقدرتش تقبل فكرة الطلاق ابدا شدات على سلم تاع الدروج ,بزز باش قدرت تطلع نفسها تخنقت وروحها ضاقت عليها وصلت لبيتها لي كان مهزوز فراشو وغير رمات اولى خطواتها سدت الباب عليها بساروت ولاحت كلشي من ايدها وهبطت على طولتها مع الحيط منهارة ودموعها على حنكها رسمو طريقهم ،حبست شهقاتها بايدها وهي كتنخصص شحال كانت خايفة من هاد النهار يجي وهاهو جا صافي قرر يسالي كلشي حيث مبقاش باغيها, مبقاش باغي يربط اسمو باسمها ،نعست في الارض كتبكي وتشهق مكرهتش تغوت بأعلى صوتها وتقول عيت عيت ومبقيتش قادرة نستحمل و طاقتي سالات مكرهتش تخرج دبا تقلب عليه وتعنقو وتقوليه انا بغيتك احبيبي صافي اجي ونبداو من اللول ...ولكن واش هو مزال باغي ؟؟ ...مدام قرر يطلق الا ان وحدة تانية دخلت بيناتهم وقدرت تنسيه فيها وفي حبها وشحال قدو يستنى فوحدة صداتو ومن ديما حتاقراتو وهي كتبكي نطقت جملة بمرارة كتعبر داكشي ل في قلبها ~ياه يا مراد شنو هاد الحالة ل وصلنا ليها الله ياخد الحق في ل كان سباب الله ياخد الحق في لكان سباب .. مسحات دموعها مصبرة راسها براسهاا حيت كلشي منها، هي لي زرعات وجا وقت لحصاد ~~~ جالس في قهيوة قدام لبحر قدامو طبيلة متولة وعليها فطور كيشهي لي مهزش منو دغمة حدو عاصر على قهوة كحلة ...لابس سروال توب بنواغ مع صباط بنواغ وقميجة بيضة محلولين صدايفها الفوقانيين ، شعرو مرجعو اللور بعشوائية ، ساعة فخمة ذهبية فيديه عاطية للعين ،سنسلة النقرة رجالية غليضة مزينة عنقو ومنساوش خاتم كتوسطو حجرة كحلة كان في سبابتو ...رمى عينيه لساعتو بان ليه وصل لحال ، جبد بزطامو حاسب وخرج بحالو ، باقي هو هو مراد طولة وتجريدة وزين ولعينين لفالتين ..ل دازت من حداه يعبرها بعينيها ويطول فيها الشوفة ، وحدة يغمزها ولخرا يسبل ليها وهاهي غادا ..ركب طموبيلتو وشد طريقو للمطار واقف قدام المطار داير يديه وراه... نضاضرو على عينيه حاجب بيهم الشمس ...كان عاطي لعين البنت لي مشى وجات عليه تحنزز فيه ...دنيا كانت بلان شي كيجري مشات عليه الطيارة و شي حط رحالو في البلاد و معانق مع الحباب ودموع لفرحة هوادة تجري ... مدازش بزاف الوقت وهو كيستنى حتى بانت ليه جايا تزكك بمشيتها وتلاوح بشعرها الطويل لي واصل لخصرها ، بقى شحال حاضيها ومبتاسم وحال ذراعو حتى وصلت حداه و تلاحت عليه بتعنيقة وعينيها لكبار كيبريو بالفرحة ~ مرحبا بيا عندك الحب !! توحشتك بزاااف مراد شادها من خصرها ومقابل وجهو مع وجها ~ اححح وعلى الحب من فمك مباشرة و شحال توحشتهااا ... شدها من يدها كيضور فيها و عاض على فمو وكيصفر ... اش هادشي اسيدي ربي، دابا خاصني معاك الحجر والمرود و يدي يخدمووو بالكروشيات و لي شاف نتقب لمو عينيه ضحكات تا تغمضو عينيها و تنهدات براحة ~ ااااه امراد اااه من نهار مشيتي رجعت حسيت بالغربة من جديد وبسانتوريني خوات عليا فمرة مراد جرها معنقها وتم غادي بيها لجهة طوموبيل ~. وهاحنا تلاقينا ومرحبا بيك فبلادك كتنفس لهوا والضحكة مشبعة وجهها ~. كون منتا موحال نرجع نشم ريحة لبلاد مراد باسها في شعرها ~. عائلتك اناا لي ف مغرب مفاهمين كانو غادين خارجين معانقين مكاينش لي داز من حداهم و مصلاش على النبي جاو مع بعض هو غزال وهي ربي عطاها من كل شي و مخصصها من حتى حاجة .. مراد بتريگيل ~ هانتي لي قلت ليك وتقول واش نتمشى معاك بيخير تانتي مالقيتي ما تلبسي احبي راه المغرب هذا ماشي اليونان .زيرات عليه من خصرو و مكملة على طريقها ~ ...معندي مناش نخاف معايا حبيبي السبع مراد باس ليها يديها وكمل طريقو حتى وصلو الطموبيل ركبها هي الاولى عاد طلع لبلاصتو وقبل ميديماري دار لعندها وقال~ اش بان ليك نمشيو نتغداو عاد نديك ترتاحي - شدات ليه في يديه ~والله احبيبي مكرهت نرتاح كليت في الطيارة شوف ليا غير شي اوطيل نمشي ليه نحط راسي مراد خنزر فيها ~ كيفاش اوطيل داوية بالمعقول ، الالة انا معنديش لمرأة لي تجلس في الأوطيلات نتي غتجلسي معايا في الدار وأصلا مافيا ميبقى بالي مشغول بيك لهما حدايا وقدام عيني - باستو فحنكو بعفوية ~يخليلي عيووونك ماي مراد مراد طلق ليها الاغنية المفضلة ديالها وحل ليها سقف الطموبيل ~... عارفك تموتي على هادشي " طلعات مخرجة يديها و تتشطح و شعرهااا طاير في السما وكلمات جولي نانا على فمهااا ~ااااحححح امراد شم شم هاد الريحة متلقاها حتى فبلاصة اخرو مراد نزلها بيديه وتكلم ~ كيفاش احححح اهياا خاصني نخدم معاك ورقة وستيلو ونقريك الممنوع والمسموح - بدات تضحك ~. دير فيا لي بغيتي ، انا جيت لعندك وعلى قبلك و الوعد لي وعدتك بيه غنوفيه واحد منهم اني نزلت المغرب و الثاني هاحنا خدامين عليه مراد بسرمحة غوت ~ ... ماي ميمو الحب قبل سنة في اليونان وبالضبط ف سانتوريني بعد ميأس مراد ميقلب عليها ويستناها ترد عقلها لبلاصتو ، عيى ومل ونفذ صبرو الشيء لي خلاه يلوح كلشي وراه ويمشي سياحة لهاد البلاد سعيدة جلس فيها ما يقارب تلت اشهر تماا تلاقا بأميمة فواحد من لي نايت ..كانت من اصول مغربية وعايشة فليونان ..علاقتهم في الاول كانت سطحية حتى بداو يتلاقاو نهار مور تاني ولقى راسو كيعاود ليها كلشي عليه حتى من نادية والحب لي كيكن ليها في قلبو ولي مقدرش ينسااه .تطورات علاقتهم و صداقتهم وولا كيعتابرها ختو وقفات معاه وقدرات تخرجو من الحالة لي كان فيهاا والاهم انها ضغطات عليه باش ميتخلاش على لي كيبغي بسهوولة وهذا كان احدى الاسباب لي خلاها تجي عندو للمغرب ~~~ وصلو لدار ، خلاها وخرج يجيب لغداا مجات فين تبدل وتقاد حوايجها حتى رجع ..خرجات لعندو ببيجامة بيتية عوناتو تا حطو الغدا فوق الطبلة وجلسو يتفكرو الايام الخوالي ل دوزوها بزوج حتى قادهم لحديث ليها . أميمة مسحات فمها وحطات رجليها بزوج على الكرسي مشبحة وقالت ~. شنو درتيي !! مراد مزال كياكل ~. رفعت طلاق تكون استدعاء وصلاتها أميمة بتساؤل ~. قلتي ليا مخلية داارها كيف غدير تشوفها مراد دفع كارتونة البيتزا من قدامو وقال وهو داير يديه ورا راسو ~. ليوم رجعات لدارها أميمة بغمزة ~. هاكدا نبغيك عارف اخبارهاا مراد بضيق ~. بزز مني ، بغيت ننساها ومقدرتش ..انا عارف بلي تاهيا كتبغيني ومكرهتنيش حيت كون كان العكس كون طلقات مني شحال هادي انا لي عارفها عفريتةة ولكن شي حاجة مانعاها عليا أميمة هزات حجبانها متاسفة ~. موقفها صعييب ،انا بانليا من هادشي كامل نتوما اكثر زوج متضررين حيت معندكم دخل ، مهم مبدئيا هي الا كتبغيك غدير شي مبادرة على قبلك ملي غتوصلها الورقة مراد بتحذير ~ خايف غا نتبعك وتركب راسها ودير فيها عزة نفسي ولقاها قدامي في المحكمة تخلعني گاع أميمة خرجات عينيها ~ لا لا ميمكنش ، انا كنقول لا ، شوف انا وعدتك شفتي غاا نادية غتكون ليك صافي هنينا مراد جمع الوقفة زاعف كل ما كيفكر فهاد الموضوع ميخسر ليه لمود ~ مهم دار ديالك نعسي ، فيقي نوصي شطحي غا هي تكايسي على سقف لطيحيه على الجيران ، انا خارج أميمة وقفات معاه متأبطة يدو ~. مغتدينيش معاك الخدمة مراد هز سوارتو وتليفونو ~. كنحلو بليل ، نلقاك موجودة يالله تهلاي خرج وخلاها كتسارا في الدار ودور من قنت لقنت تا عيات ودخلات للبيت لي عطاها تنعس فيه خاشية وجهها تحت الما كتغسل فيه وتبرد عليها ..خدات فوطة جديدة مسحاتو وخرجات كتجبد حوايجها من لباليزا ..مافيها لي يخرج ولا يتحرك الورقة فشلاتها ولكن متقدرش تقول لمريام لا ..بدلات عليها وغطات ذبولية وجهها بالماكيااج نزلات لتحت لقات مريام شادة لهضرة مع عائشة وكيدويو وغير لاحت عينيها وشافت فيها عرفات عندها شي حاجة مريام وقفات كتدوي مع خالتها ~ هاحنا مشينا اخالتي نقضيو شغالنا عائشة ~ جلسو ونسوني فلغداا عاد خرجو مريام هزات صاكها وقالت بعذر ~. غا بصحة والراحة تال مرة اخرا ان شاء الله ...اشارت لنادية باش تسبقها ..يالله مشينا حركات ليها راسها ومشات قدامها نيشان لطوموبيل مريام حيت مافيها لي يسوق طول طريق خلاتها على خاطرها مبغاتش تجبد الهضرة حتى تقوليها هي ولكن مدواتش حدها دايرة ايدها على الشرجم وسارحة حتى فاض بيها لكاس وفرانات بجهد جنب طريق ~. شحال وانا كنستناك تقولي ليا مالك وتقولي واش نطقتي ، اي حاجة كتكون عندي ولو بسيطة كتلقايني قبل متبرد في خاطري كنقولها ليك ونتي والو نادية دارت لعندها قافزة نبرة صوتها الحادة خلعتها ~. خلعتيني اصحبتي مالك مريام ضربات على الڤولون ~. نتي لي ماالك عينيك منفوخين باكية حتى مقديتي شنو عندك ومخبياه عليا ومبغاش تقوليه نادية تحكمات في دمعة بزز ~ مكاين والو اصحبتي تحركي حيدي من طريق مريام بحدة ~. والله منتقلع من هنا تا تقولي ليا اش كاين راه ميمكنش نشوفك بهاد الحالة ومندويش يالله انا كنسمع اش كاين ؟؟ عرفات راسها مغتسلمش منها ومغتفاك معاها حتى تقوليها اش كاين داكشي علاش قررات تعاود ليها من اول للاخير مريام مخرجة عينيها ~ يعني نتي ومراد مطلقتوش ؟؟ نادية حركات راسها بلاما تشوف فيها وقالت وهي كتبكي ~. لا غير كذبت عليكم مريام جراتها لعندها معنقاها ~. سمحي ليا اختي كلشي بسبابي انا ..بعدات عليها حاطة يديها على فمها حاسة بلومة...دمرت حياتي وحياة ناس لي معايا ، بسبابي طرا ليكم هادشي نادية كتمسح فدموعها~ مالك نتي !! واش نتي لي قلتي ليا سيري قولي ليه ديك الهضرة ولا تفرقي عليه مريام ~. واخا منقولش ليك انا هما غيقولو انا عارفة ماماك متخليكش مزوجة بيه وعارفة لعائلة كيف دايرة نادية قاطعتها ~. تا انا لقيتها تسلكني كون بغيت نوقف في وجههم نديرها ولكن ركبت راسي وها انا كنخلص ...تنهدات حاسة بقلبها غيطرطق...مقدرتش ننساه امريام ، ممشاش من بالي كنحلم بيه في ليل ونتخايلو بالنهار ، متقبلتش يبغي يتفرق عليها مريام ~ تلاقاي معاه ودويو كلشي عندو حل ولا انا نعيط ليه نادية حطات يدها على الشرجم ~. لا واياك تدوي معاه خليه صافي بعد غدا عندنا المحكمة ونشوفو ديك سااع اش غيوقع ...خدات قرعة الما من صاكها شربتهاا وكبات شوية على وجهها ....تحركي من هنا راه واقفين فطريق مريام ديمارات طوموبيل وقالت بتساؤل ~. فين تبغي نتغداو ؟؟ نادية منزلة لمرايا كتقاد في وجهها ~. فينما بغيتي قصدات ريسطو زوين ومعروف كانت موالفة كتاكل فيه ، تمو داخلين ليه مشادين وكيقرقبو بطالونهم دنيا كانت عامرة بحكم وقت لغدا ، ستقرو في طبلة كاينة في لاطيراس ..هزات مريام صاكها وجبدات منو عكر ومرايا دوزات على فمها معندهاش في البشار لي بغى يشوف عينو عندو .. جات تهز عينيها تعيط على السيرفور باش تطلب ليهم مياكلو لقات فتيلة شاعلة قدام وجهها ورامقها بشوفات نارية مريام عوجات فمها ~. يخخخ بناقص منها جلسة ومنو غداا نادية ضورات وجها كتشوفيها فين كتشوف وقالت بصوت خافت ~. واش زيييداان هذاا !! خارج يتغدا ويكمل شي شغل مع استاذ احمد حتى دخلو قدامو بلاما يردو ليه لبال الحالة كيف ديما مقادة وروايح تعطعط هي جلست وهو عينو لصقت عندها ....عوج فمو باستهزاء وهو كيشوفيها كتعكر اكره حركة عندو هي هادي وغير شافت فيه عگد حواجبو وطرطق عينيه فيها مريام خنزرت وهزت نيفها مرجعة شعرها وراها ~ ...هو وباقي كيفما هو تخنزير عاطيه عشرة لضس تقولي مالك الارض نادية ميقت ~ ...حتى نتي عيشي حياتك وعطيه مشي مريام هزات حاجبها فيها وقالت ~هي الا طاوعتي قلبك و شفتي مول دقاتو فين كاين نادية قالت متلسفة ~ مشى كلشي امريام وانا سباب فيه ،..تنهدات ...بالحق معليش كلشي يتخلص بصبر حطات ايدها على يد نادية مواسياها حيت حاسة بيها وبزااف ماشي ساهلة عليها تهرس زوج المرات ...وقف عليهم المحامي مقاطع حديثهم -مدام مريام جيمس سمحي ليا طفلت عليك برا الخدمة، غير بغيت من عندك موعد باش نهضرو في امور الشراكة مريام صغرات عينيها فيه و تكلمات ~...حاليا راسي خاوي من خدمة وجالسين نتغداو ممسالينش للمواعيد خشات ايدها نادية في صاك وجبدات كارت فيزيت ديالها عليها ارقامها مداتها ليه ~. معاك أستاذة نادية مروك ، محامية أحمد كمل ليها الهضرة ~ محامية الاستاذة مريام عارفك ومتشرف بيك... بناسمت ليك وقالت بلباقة ~. هادي نمرتي عيط ليا ونتافقو على وقت مناسبنا بزوج نتلاقاو فيه وندويو أحمد حط الكارت فيزيت في جيبو وتشكرها ~. شكرا ليك بزااف وبصحة غداكم مسبقا قالها ومشى وهاد الاخد والرد كان تحت انظار الرجل العصبي ل مكرهش ينوض يشدها من دراعها يخوي بيها لمدينة ويعرف اش تحت راسها...رجع المحامي لعندو كولو عرقان من القمعة لي خدا يشرب عليها دوا الفار و متسرطش ليييه ...غير جلس في الكرسي نزل عليه بأسئلتو زيدان شابك يديه بزوج وحاطهم على ذقنو ~ اش قالت ليك أحمد كيمسح على وجهو ~معطاتنيش حتى لفرصة نهضر معاها سكتتني قبل منبدا بالحق خديت نمرة استاذة نادية غنتافق انا وياها زيدان غير سمع كلامو ناض معصب و بلا يشعر قلب طبلة خاوية قدامو ومشا ليها فين جالسة ~....شريفة !! هادشي راه سميتو لعب لبراهش تتسمعي ولا لا... " هز صبعو قدام عينيها كتحذير " ... عرفي راسك اش كديري ولا ميعجبكش لحال مريام متهزت فيها حتى شعرة ولا تعصبت ،تكات على ضهر الكرسي مربعة يديها و نطقات " ...قلتي اش عندك ياك ، يالاه سير خلص داك الكرسي راه بان ليا تهرس وخليني نتغدا زيدان بعصبية ~ ... مريااااااام مريام زفرات باعلى صوت ووقفات لعند وجهو وقالت ضاغطة على سنانها " ...سميتي مدام مريام جيمس حتارم راسك شوية ، انا هنا ماشي خدامة عندك ولا كنقرا باش تهز وتعلي صوتك عليا