عطاوها تيليفون فيكس كترعد معرفات شمن نمرة دوز تخيارر مارحم ليهاا واحد يزيدها على لاخر تفكرات لعصا تجابر وتبورشات وحياة كدالك ...دوزات نمرت اقبال وعينيها مضببين بدموع ...جوبات بلخف ملهوفة على اي اتصاال اما غيتة كانت اتسخف بلخلعة
غيتة:اااا الووو هءن
اقبال:غيتة ؟ غيييتة فيييينك فييينك ...علاش كتبكيي
غيتة: هءهءهءه سمحيليا عفااااك
ك:الباااكوور مغنباتوش هنااا
اقبال:شكوون هداااك
تسل ليها التيليفون من ودنها وجرو جابر لعرق ناازل معاااه وقال بصوت خشن هي سمعاتو فشلات :شكووون معاااك
غيتة(قفزات)ااا اناا فلكوميساارية ههء هءه
جابر(تحلو عينيه على جهدهم )شنو لكوميساارية !! ...
قطعات عليه بلخلعة ولكوميسير كيشوفيهاا مولف اشكالها سنطيحتهم كبر من عمارهم جرها واحد من الامن داهاا رجعها فين كانت وكمل خدمتو مع لخير ...
**
بعد مستوعباات اش واقع شدو طريق لكوميسارية لكبيرة كيسولوو واحد يسيفطهم لواحد توصلو لفين عطاوهم اسمهاا عطاتهم بطاقتها وبطاقت غيتة اما جابر. ميدخلش بقاو واقفين فلكولواار كيشي ويجي ها لي غادين بيه ها لي جايين بييه ومو كتغوت ورااه فجأة خرج بدر من لبيرو باااكي وعينيه حمريين محس برااسو تاتشنق وتردخ مع لحيط من طرف جاابر لي محسش برااسو
جابر:اش درتيي ليهااا الكلب هااا تصرعيت عليك ولالة تصرعيييت (بقا يهز ايديه يعطييه وجروو لبوليسيي واقبال مفاهمة علاش ندافع جيهتوو )هااا بلاتيي برب الجليل تنشتف على ملتك
اقبال:شكوون هدااا اجااابر فهمني اش وااقع
جابر:هاد لبرهووش حصلتو مع غييتة وتصرعييت عليهاا (قلبو كينهج ونفسو كتخرج سخوونة )مسح على وجهو وسكت كيسب........ويغرق فنفسوو
ب:نتي اخت غيتة **
اقبال:هيا انااا
...؛دخلي عند لكوميسير
دخلات وجابر كلس فوق لكرسي كيهزز فرجلوو ....مع هز عينوو بان ليه لبوليسي جايبها صفرة هيا هي قشعاتوو تخباات بلبوليسي من وراه كتبكيي وتحاما بييه اما جابر مناااضش برد ليه لماا تابعها بعينوو تدخلات لقات اقبال كالسة شادة رااسهاا بايديهاا
ك:كلسي كلسيي
لعين متهزاتش فيهاا واخة كلسات حداهاا
ك:كي قلت لييك ... هيا كتقول بلي لولد داها بزز وخلاها تكمي الشيشة بزز ...وهوا كيقول مشات معاه بلخااطر وكماتها بلخااطر ....اربيو ولااادكم !! مزال قاااصر وخرجتو فدنيا لعجب
اقبال:داباا شنو لمطلوب
ك: هدا لي داها لقينا عندو طرف تاع لحشيش فجيب هوا وصحابو ...اما لبناات لاا ...غيدوزو 24 ساعة ديال شكاية لي شكاو بيهم جيراان ونيييت ! يتربااو شوية
غيتة:هءهء والله مدرت شي حاجة
ك(حمر فيها عينيهه) زمي فمك ....هادي تقزيييبة خاارجة بيهااا هااه كرناتك كيوجدو لباااك ونتي تاابعة سلاااكط .....واش عارفة لدي
واش عارفة لديل مك ششناهيا لبلية ولا معارفاااش .....شيشة وجواناات مخفتيش على راااسك ونتي وسط رباعة تاع زواافرية مخشية معاااهم كي لݣراادة ....بباغة تكبري بكرييي ...واليديكم كيخسرو عليكم لفلوووس باش يالله يالله تقرااو وفاللخر ديرو فعلتكم ....حق رب كون كانت عندي شي بنت فحالك ياحتى اانحر مها من لودن تالودن
اقبال: دابا شنو لمعموول
ك:نوضي سيريي ليوم مغتخرجش صباح ونشوفوو...
خرجو غيتة كطلب وتزاوك وتبكي
ك:بغيتي تخليها تزيد ترباا شوية خليهاا ليووم ....بغيتي تخرجيهاا خرجيهاا ...باينة فييك واعية ...ختك راه غادية لواحد طريق خااايبة ...وطريق لبلية صعيييبة ...
تحلل لباب من بعد دقان كان كوميسير هوا نفسو اخ امين
ك:اهلا اهلا مراد ياك ليوم روبوو !
مراد(كلس قبالتو )لا جيت على وديت اقبال
هزات عينيها فيه كتاكد عاد عرفااتو ومسحات على وجهاا عرفات جابر تاصل ب اميين
هوما كيهدروو وهيا عقلهاا مرفووع مكااينااش هناا ودنيها كيصفرو ...تحطات ايد على كتفهاا عاد وعات برااسها وهزات راسهاا
مراد:مديريش فباالك هدشي كيوقع ....هادي تخليكم تردو ليها لبال وتحضيوها السن فاش هيا داباا صعيب ....دابا هي خرجيي شوية ويخرجوها ليكم
اقبال(وقفات مهدودة )شكرا امرااد
خرجات حلقها نااشف باغة طيح كتقلب على جابر بعينيها تخرجات لقاتو واقف عند دروج كيتسناها هي شاافها مشا كيزرب فدرووج تطلع عندهاا
جابر:شنووو داارت ...دويي اقبال مالك صفرة !! اش وقع
اقبال:سهيريي وجراياا معاها مشاا على والوو اجاابر ....ولات كتصااحب وتمشيي تشيش مع دراري وقريتها نساتهاا ....تبخر كلشي معاهاا اجابر ...غيتة قتلات داك لعرق لي كان باقي كيضرب فيااا
جابر فهاد اللحضة تكب عليه لمااا باارد ولعرق لي كان نازل معاه حس بيه تلج طلق من كتاافهاا مصدووم كيرمش . ...كيفاش هوا لي رااجل عمر لحرام طاح فكرشو ولا بين ايديه تجي هيا من و راه ديرهم بعشرة
قرب منهم اميين لي تاصل بيه جابر باش يدخل حيت تلف حاول استفسر على السبب ولكن شكون يعطيه لخباار مصدومين بجوج وحدة كتحسر على ختهاا ...والتاني حس بقلبوو برد من جيهتهاا ...
وقفات طموبيلت شهيد فشارع ومعاه حيااة كان مشا يسول على اقبال تلقاها خارجة خرجو بجوج قطعو طريق وحياة كشاكشها خارجيين
حياة:اش داااارت هااا اش دااارت الكلبةة اش داارت....
امين قشع شهيد وسااط من نيووفوو وشاف ف اقبال لي واقفة حداه وقال:اقباال مديريش فباالك ....بنات لوقت هوما هادوو ضروري من شوية لمشااكيل....
بعد جاابر يضربو لبرد ومشا عندو شهيد وعيينيه على اميين مخنزر وقف مقابل معاهم وعينيه عليهم وهدرتو مع جابر :اش وقع !! اش دارت
جابر(حك جبهتوو ) لقاوهاا مع شي برااهش كيتشيشووو
اقبال وقفات كتعاود لحياة اش وااقع كيتسناو فيها تخرج جابر لرض دايخة بييه وشهيد عينيه غير فاميين لي كل مرة يدور باقبال شاف تعياا ومشاا لجيهتهم
امين:شهيد شنو كدير هناا
شهيد:علا ش كتسول !! يكما دايرينك كارضكور عليااا وانا مفراسيش !
امين؛ حتاارم رااسك لعندك شي مشكيل مع خطيبتك متفرغوش فياا.....
بغا يندافع شهيد جيهتو وحبسوو جابر لي جاا ورااه وقال:هنيونااا شوية
شهيد(بتحدير موجه صبعو جيهت اميين )بقا دوور بيا ا امين برب تاتشوف لي عمرك شفتيييه
يالله بغات تهدر اقبال بانت ليهاا غيتة خاارجة لابسة كويرتهاا او هازة صاكهاا كانت حياة بتمشي ليهاا وحبساتها اقبال بايدهاا
حيااة:لاش حبستينيييي ! خليني نشتف على مهااا
شهيد:حياااة ماشي هكا اتربييهاا !
جابر دور وجهو لجيهة لخراا مكره هيا غير شافتو زيرات على صاكهاا الى مشاو حتى داروها لوسط بتلاتاا ميفكها هي لقبر منهم ....
اقبال (بهدوء )ركبيي نمشي نجيب لكاارط ...
بشهقة حركات رااسهاا يالله بغا تلاح عليهاا حياة لشعرها جرها شهيد ورااه وجابر جر حيااة بنترة معصب وقال:براكة من الشووووهة زيدي قدااامي
حياة:والله لبقات فيييك تالداار وعيطي ليهم يحبسوني عليك ابلاااتي
جرها جابر كتنتر ليه فايدو تكان غيجبدهاا معاهاا عاد رصات موعتها من ايدهاا وقالت :يعطييك لكرض وعتينيي
جابر(بتوعد)اقسم برب الجليل احياااة وتحطي عليها ايدك طريق لي نمشي منهاا اناا ضربي عليهاا
حياة(بلغوات)واش عااجبك هاااد زبل لاش وصلاتنااا
جابر(غزز سنانو)فياااا ميشتف عليهاا هناا ولكن لعصاا مكرااتش فيهااا ...خليها منها لاقبااال صااافي سطاج لعصااا دااااز....ركبييي (بلغوات تقفزهااا)واا ركبيي
حلات لباب كتوعد لغيتة لي ورا شهيد...حتى خرجات اقبال دايرة ايدها فجيب لمونطو كتباان مهرسة وعينيهاا مضلماات بحال شي واحد فقد لامل فدنياا ...شكرات امين بزربة وتوجهات لناحية شهيد وقالت:ركبي يالله
شهيد:خليني نوصلهاا تالدار ا اقبال ...
اقبال:غيتة ....طموبيل
طلقات من شهيد وسلمات امرهاا لله مسات لكرسي اللور وركبات وحياة لقدام توجه ناحيتها جابر مد ليها سوارت طموبيلتو وقال:هاكي تحكو نتوماا
اقبال(مافيها لي يسول )ويالله
جابر:نقضي شي غراض ونجي....
مشات لطموبيل ديمارات وزادت
شهيد:يالله نوصلك معايااا ...وزيد اصااحبيي
جابر:تيسر ....امييين شكرا اخااي شكر ليا خوك
امين:هانيااا اجاابر وااه اقبال مرخيصاش
سرطهاا شهيد كيحرك فعنقوو ويعض فموو وتحررك باش يمشي لطموبيلتو حتى تبعو جابر
سكات فطموبيل فينما تبغي حياة تعرعر تحبسها اقبال بايديهاا وتفكيرهاا ساارح كتنهد ولوور غيتة كتبكيهم دم عارفة لويل لكحل كيتسناها راسها بغا يتشقق بكترت دخان لي دخلات لداتهاا وجوع اتسخف ...
جابر:حطني ابا شهيد غير هناا
شهيد:ايه واخة
وقف طموبيل وهبط جابر مودع شهيد لي كمل طريقو لاخير ايديه فجيب سروال كيتنهد بديق محاملش راسسو بتاتااا عنقوو حاس بيه مزير حيت كتم الغضب كلو لدااخل ...دخل لداارو. شعل الضو كبحيد ف تجاكيط ديالوو وكيحط سبرظيلتو برجلوو دخل لصالون لاح تقلوو على سداري سكااات ...لامن يتلقا ليه فباب دار لا من يسولو كييداز نهارك ....
صونا تيليفونوو وتجنب تجبدوو من سروالوو ورجع تقاد كانت نمرت جداه تبسم وهوا كيقطع عليها ويعاود ليها من عندوو
جابر(يكحك فعينه وصوتو مرخيي) افين الحاااجة
الحاجة:ياتااا فين غابر ياوليدي ...ياو شحال نابيناا ليك(صونينا ليك)
جابر(تاوب)غير مع شغال امي مساليتش ....ياك هانية لوقت
الحاجة:هاااانية ياولدي غاااا لقيت ليك مرااا زييينة ياو طويلة يالله تج معاك هههه
جابر:شكون هادي امي !!
الحاجة: يا كيشتيي ليوم كنت عند عمتك ...ياو وشفت لوستها صغيرة شحااال مشفتها امزيناتهاا ...بياض وزين وداااكة عشقتهاا ليك ...
جابر(حك راسو ولعيا غالبو كل مرة يتااوب)شي 16 تاني امي !
الحاجة:الاااا عندهاا (كتعيط) واااا بدييييعة تي شحال عند الهاام (سكتات )يكاتليك عندهاا 21 اوى هادي هيا ديالك معندك متعيب فيهاا ....اتصويرتها سيفطاتها لييك بديعة فدااك لعجب ديالكم اشتسمووه تسااب
سمع عمتو كضحك وضحك تهوا بتقالة وقال:وااه اميي تسااب مش هواا هههه انا غنشوب
الحاجة:يالله شوفهاا دااااغي (دابا) هاني نتسنااا باش مكان رشمو لبنت راااه جايبة لعين يااوه
قطع مع جدااه وطلق لكونيكسيون ....نسا ميسااج عمتوو ودخل لميسجاتو معااها كانت كضل تسيفط ليه لايمووجي ها لي مخرج لسانو ها لي سنانو رايبيين ولا طلبو على شي حااجة ...ولا غير تسول فييه ويشد معاها جموع بليل هي باشش تونسوو ولا تسيفط ليه شي فيديو كيضحك ولا شي مقطع تاع الشعبيي ولا كصعة تاع كسكوو وتقولييه هدشي لي كيعجبك ...معارفاش بلي هياا لي دات عقلوو ...خرج مسح لكونفيرصاصيون معاها وطلع شاف ميساج عمتو ...كانت مسيفطة ليه تصويرة لبنت مع جداه لبنت زوينة مافيها ميتعاب لحجااب ولبيااض وزين ولفورمة ...خرج من تماا ودور فلحين لجداه لي كانت على لقرص وقالت:هااه ياش كلتي درووك
جابر:سيروو ديرو الاازم وباش مكاان نسالي شي خدمة ونجيي ...نهدرو مع واليديهاا ونديرو مدارت النااس نكتب عليهاا ويكون خير....
هيبة كطل من الشرجم تبانت ليها طموبيلت جابر وقالت:هاهوما جااو
الغالية:معاهم لبرهوشة !
هيبة(سكتات شوية كتشوفهم نازلين )ااه جابوها
الغالية:ابلاتي طلع
دقائق قليلة تكانو وسط الدار حطات اقبال سوارت وشافت فالغالية ودورات عينيهاا
دخلات حياة مكشكشة وخاصها هي معامن مع دخلات غيتة نزلات عليهاا بلعصاا وسط الداار ونتييف والغالية معاوناهاا بسبااط ...اما اقبال مشات نيشان لبييت كتقلب بعينيها تبانت ليها كرطوونة كبيرة شوية فوق لماريو ...دايرين فيها لفرفارة لي كيجبدوها فالصهد
هيبة(بقات فيهاا وكتجر فالغالية)ماما عفااااك برااكة عليهاا حيااااة اتقتليهاا
بدات هيبة كدفع فحيااة لي كتنهج وغيتة رعفاات فلارض او وجها تقمش مبقاتش قدرات تحرك سخفات و جووع
حياة:الله اعطيك مووصيبة الكلبة هاااا بقات لجد مك هي شيشىة وجواناااات درتهم تا انااا (دفلات عليهاا )الله الكيها لييك
الغالية :لا لا هادييي بزااااف شهماااتني اسيدي ربييي
اقبال(بهدوء)هيبة ...اجي معايااا
ناضت لاخيرة تبعات اقبال لبيت لغالية خلات غيتة مجموعة فلقنت منها لضس كتبكيي
هيبة:اقبال شنو كديري !!
اقباا :والوو ...لعصااا مبقاتش كتكر ...لهدرة مكتكرش ....ليوم لكوميسارية غدا تجيب موصيبة كبر !! (كتحيد خيط لبيسي بورطابل لي شراتو ليهاا لعام لفايت وكديرو فلكارطابل ) جهدي درتو مغيبقاش فيا لحاال من بعد ...جمعي هادشي
هيبة:اقباال قتليها عصاا ومديريش هدشي
اقبال(شافت فهيبة كترمش )هزي هدشي ولا خرجي
تنهدات الاخيرة كتهز فلكتوبة وكدير فلكرطوونة تدخلات عليهم حياة وقالت:قطعييي بوهم لاش كتجمعي فييهم . .. بالله لباقي عتبااتها براا.
اقبال مجاوباتش كتجمع وتخوي فدااك لبيروو وقلبها كيحرقهاا ...اي حاجة بغاتها كتحضرها ليها فلحيين بلا حتى كلمة بيسيي بغاتو شراتو ليهاا بغات بيرو شراتو ليهاا ...الصيكان لحوايج بلا عدد ...ومع ذلك ملقاتش فيها لخير
خرجات اقبال هازة شانطة تاع لبيسي لقاتها مزال مركونة فلقنت كدمع وقالت:جبدي تيليفون
غيتة:هءهءهءهء عفااك ا اقبال هءهء (جاتهاا طرشة كملات ما بيهاا من اقبال معاوداتش لهدرة جبداتو شادة حنكهاا لي طاب بلعصاا ومداتو ليهاا
اقبال(شعلاتو)شنو دايرة فلكود
غيتة :هءهءه G
جرباتو اقبال وتحل ورجعات سداتوو وشافت فغيتة: شي حاجة سميتهاا لخروووج نسااااايهاااا .....لقرااية نساااايهااا .....سمعتيني ولا لااا نهار نشووف رجلييك ورا هاد لباب بلااا بياا ولا بمك نهااار اللخر لييك معايااا .....اتكلسي معززة مكرمة فداركم تيجيب لييك الله رزقك . ...لقراية مبااغهااش قوليها لياا ابنت الناس منبقااش نخسر فدم جووفي علييييك ....باغة تزنديق مع سلاااكط خرجييي هااا لباب قدااامك مغاديش نحبسك.....
شافت فلغالية كالسة وشادة رااسهاا وقالت :نهااار دير شي حاجة وراا ضهري وتغطي عليهاا الغاالية هداك هواا نهار اللخر لديك لورقة لي جامعانااا
خرجات هيبة هازة لكرطوونة شافتها اقبال وقالت:اراايها ليا لتحت هبطيهاا
هزات سوارت ونزلات بشانطة تاع لبيسي او لكارطونة تاع لكتوبة دارتهم ليها فلكوفر
حياة قربات لغيتة كلاتهاا وقالت:تقااااودي ضركي كمارتك من حدايااا السلكووطة نووضي
وقفات بزز لارض كدور بيهاا مشات لبيت طاحت ففراشهاا مهدودة كتبكيي محسات تغيباات واشش نعسات ولا سخفات لمهيم تكالكمات بلا غطاا وبحوايجهاا ...
دارتهم فالطموبيل وطلعوو ادراجهم لداار سكاات ...مشاو لبيتهم كل وحدة شدات فراشهاا وكلسات الا اقبال شدات تيليفون غيتة .. دخلات لتصااور اول حاجة كتشوف تصويرة بتصويرة مسحات على وجها بصدمة لاحضوها لبنات لي كالسيين
تناضت حياة تشووف لقات غيتة معنقهاا بدر وشادة تيو ديال الشيشة فمهاا وبايسهاا فعنقهاا
حياة(خبطات جنابها)هاويلي على لبرهووشة عاجبها لحاال ...غداااا نصبحها عند طبيب والله لعلي لعضيم وتكوون حلات رجليها ليييه يتانقتلها تمااا ....اويلي على موصيبة طرت تعيييت وعمري درتها فحيااتيي تجيي برهوشة تزادت هي لباارح دير فينا مبغات
هيبة:عنداك تبلى بيهااا ...وا ش الشيشة كتبليي
اقبال:كتسولي فيا اناا كنت كنكميهاا !! ....دابا هاهيا فداار متخرج فين تنشوفو بلانهاا كي داير
بدات كتمسح فتصاور وهيا كتفااجئ الناس كتقرا وهيا كتصور وتبوزا فليسي بحوايج مكتلبسهمش قدامهم قلبها كيتعصر اضعااف واضعااف وهي كتشوف فهادشي مسحات كلشيي ودازت لفيديوات شطيييح فتيك توك
اقبال:شنو هو تيك توك !
هيبة:يالله ولا هداا بحال سنااب شات كيتلاحو فيه لفيديوات
حياة:اش لايحة فيه تااني
جاو كيشوفو لقاو لفيديوات لعلك ترضا وهوما مساايقين لخباار مرة تشطح على اغنية مرة كيبان هي وجهاا ولماااكياااج كتباان كبر من عمرها الشيء لي كيخلي لبراهش حالين فمهم تالودنيهم
كذلك الانستاغرام و سنابشات السيدة دايرة بؤراات فكلشي فرمشة عين تمسح كلشي انسطا خلاتو ليها كيصفر تيك توك كدالك ولفيس حتى هوا ....طفاتوو وتكات تسنط لرااسهاا توصلها ميساج هزات تيليفون لقاتو شهيد....
شهيد: اقبال كي بقيتو شويااا !! مديريش فبالك
واخة ! ...دابا تكبر ودير عقلهاا
مقدراتش تجاوب حطات تيليفون وتلاحت فبلاصتها ونعاس مزارهم كامليين
صديق (فميساج) صونيت ليك حتى عييت مكتجاوبيش ياك هانية !
هيبة:لا لا بخير ...غير ماما كانت عيانة شوية وصافي
صديق:يكما شي حاجة كغاف ....ديتوها لطبيب !
هيبة:لا غير الطونسيون راك عارف بنادم كيكبر اي حاجة كتاتر فيه
صديق:ولو احبييبة صحة مكنلعبوش معاهاا تحس براسها ماشي نورمال ديريكت لطبيب ...بون احبيبة نهار السبت غنجي انا او خوياا ومراتوو ...
هيبة(بغات تقوليه لا وخافتو يشعل وهيا تسووط )فففف
ففراشهاا حياة:مالك كتسووطي نتيي تمااا
هيبة:صديق قاليك السبت بيجي
اقبال(مغمضة عينيهاا وضو مطفي )مرحبا بييه
هيبة:نقوليه من بعد ويجي!!
اقبال:راه دويت معاك اهيبة !! درنا مع السيد لويكاند يجي مترجعيناش براهش معااه ...شنو كاين باش ميجيش !! ...مدام السيد ناوي لمعقول هدشي معندو علاش يطول السبت مرحبا بيه
حياة:جاي بووحدوو !
هيبة:خوه او مرتوو صافي ...(كتبات ليه )صافي مرحبا بييك
صديق:تعطلتي !! تنادم معاك لحاال ولاا
هيبة:لااا حشومة عليييك ....غير حطيت تيليفون وصاافي لمهيم السبت ونتلقااو
صديق:ان شاء الله بونوي سيري رتااحي سهير خاايب
هيبة:ههه بونويي حتى نتاا....
ضرباتها لفيقة بليل ضرها لبرد لقات راسهاا بقا كيفما نعساات مدات ايدها لضو شعلاتو ملقاتش لغالية وجووع شدهاا بزاف حيدات سبرديلتها وخرجات لكوزينة غير الضو تاع ضواية لي داير الضو وسط الدار
مشات لكوزينة حلات التلاجة هزات لفرماج ولكاشير وسداتو مشات دارتهم فلخبز وهزات كاس تاع لحليب ومشات لبييت كتاكل وتبكي دغمة بدمعة بتنخصيصة تسالاات حطات دوك لحوايج ولبسات بيجامة سخونة ودخلات لفراش مقادراش تجمع شعرهاا لي تعكد بكتررت نتيف وكتافها معضوضين ...غطسات ففراشها
كتبكيي وتنخصص ...اما الغالية نعسات فالصاالون......
لحال باان وصبح مشمش واخة للكز على براا ...لغالية لي منعسات مشافتو ناضت كدير فلفطوور تفاقت اقباال مسخسخة وتبعوها لبنات حتى هوماا
غسلوو وطرفوو وبدلو حوايجهم وكلسوو كيتسناو الغالية تحط اتااي هوا لي كان خاص فالطبلة
حياة:هيبة لمشيتي راه غنتعطل انا شوية قولي ليهم شي سبة
اقبال:سيري لخدمتك انا لي غنديهاا
حياة:اشمن خدمة ...هي كنسلكو بيينما داك زمر سيفط لينا لباكوور نعل جدوو تهواا
هيبة:ولا خرجتي من لخدمة وصدقتي لوراق لزمر
حياة: راه داكشي علاش مخرجتش تنشوفو هاد الشارف و فين حدوو هاد الاضرابات ملقاو امتاا يبانو تبغات حياة تجي
اقبال:صبري شوية راه زربة كيندمو عليها من بعد
الغالية:ياو هادي اش ديرو معاها هاهيا لعطلة جاات ....عام يمشي غا هكاك
اقبال:هدشي تفكر فيه قبل ميجمعوهاا مع لبراهش فلكوميسارية
حباة:نوضيهاا نديهاا لطبيب نوضيهاا
الغالية:لاااش طبيب !!
حياة:نشوفوو لالة بنتك اش دااايرة ....تشياش مع ولاد لقح** وبغيتيها تبقا ب بشوونتهاا !!
الغالية:انا راه قلبتهاا (شافو فيهاا)شكيت فيهاا كتعرف شي حد كاتليا والله اماما مبيناتنا شي حاجة وتاكدت بعيني ...وحلفت عليهاا باش نعاود نقلبها تااني.
حياة(تعصبات)داباا هدشي كااااامل طاري الغاليية وزااامة فمك !! من ايمتا بالسلامة قلبتيها من تشياخت لطبيبة هاااه
هيبة:اويلي على قلبتيهااا اماما واش بعقلك !
اقبال (ضحكات كتحرك راسها بلاحول ولا قوة الا بالله وحطات لكاس )دابا نتي فرااسك هدشيي ومقلباااااهاا من لفووق وحنا مجايبين لدنيا خباار!! لما دايز من تحتنا وحنا فدار غفلووون
الغالية:عقل صغر اويلي ...كلت غمامة ودوووز انا يحساب لياا غتخرج هك
حياة:داباا براكة من لهدرة نوضيهااا تزيد قدامي نشوفو بلانهاا كيداير
هيبة:وتنقول مالها مبقات كتحط والو فلفيس السيدة داااايرة حوايج خراااا حنا معارفينهاش. ..
اقبال:عندك بااش تديها!!
حياة:عندي عندي صافي
هيبة:وانوض انا نمشيي بسلامة ...
.
خرجات هيبة كتحك ايديها مع بعضياتهم تلمحات طموبيلتو وقفات تبسماات برضاا وغادية لجيهتوو حل ليها لباب من لداخل ومشاات
هيبة:صبااحوو
صديق:صباح لخيير زين ....كي صبحتيي (تبادلو لابيز فلحنك فقط وبعد )
هيبة: بخيير الحمد لله
صديق:فطرتيي
هيبة:ديجا فطرت ....خاصني نمشي لخدمة بكريي شوية
صديق؛داكوغ ....مع طناش نجي نديك تشوفي لخااتم !
هيبة:لخاتم !
صديق:وي لخاتم علاه شنو انخطبك هكاك ....هيبة حنا دابا كنعرفو بعضياتناا انديروو خطبة ان شاء الله نتعرف فيها على داركم موراها ندوزو لعقد (شد ايدها باسها )ونديك تعمري دارك
هيبة:ههه زربتي عليااا وحنا ماموجدين والوو
صديق:شنو باغة توجدي !! انا راه مغيجي حد من غير خويا ومرااتو ...عائلتكم كبيرة !!
هيبة: لااا صراحة معندناش شي واحد هناا وعائلة بابا معمرنا عرفناهم ....ولكن ضروري ندير شي كليسة نفرح برااسي
صديق:نهار لعقد ديري لي بغيتيي الزييين ولخصات شي حاجة انا نتكلف
هيبة:لهلا يخطييك (تبسمات ليه وباس ايدهاا )
**
دخلات لغالية لبييت حيدات لغطاا على غيتة بزعفة وقالت:الحااااجة نووضي
غينة (حلات عينها وراسها كيزدح )ماما
الغالية:الله اقطعك ابنت لحرااام ....نوضيي تكلمي لختك تكعدي بدلي حوايجك
غيتة:علاااش فين غادين
الغالية:اتديك لطبيبة ...على فعايلك زييينة ابنت لحرام صاافي مشيتيي لشيشة ابنت لحراام كبرتي
غيتة:والله مدايرة شي حاجة هءهءه متدينيش
الغالية(قرصاتها تغوتات)نووووضي
دفعاتها جيهت لماريو لبساات عليهاا سورفيت ومونطوو كتشهق وتبكي وجمعات شعرها وخرجات عندهم
حياة:لالة لعرووسة صباح لخيير
غيتة(بتنغنيغة)ه،هءءه والله احياة مقااسني شي حد بلاش طبيبة هءهءه والله مباقي نعاود
اقباال(كانت مهبطة راسها فتيليفونها ومعوجة على لمخدة مهزاتش فيها الرااس )دوزي تفطري بلامنووض لييك فهاد صباح اغييتة
معاوداتش معاهاا لهدرة كلسات كتسخن حلقها بكاس اتااي في حين حياة كتبدل عليهاا ....
حياة:تكعدي نتي يالله
وقفات كتمسح فعينيها وقفات حتى اقبال باش توصلهم ...ركبو فطموبيل تاع جابر لي بقات عندهاا
حيياة:سيريي مع طريق نيشاان كايمة واحد طبيبة تماا
اقبال :واخة
مسافة طريق وقفوو فين قالت ليهااا نزلات حياة وغيتة واقبال بقات لتحت كتسناهم مكاين لاش يدخلو بتلاتاا
كانت لكابيني مزال خاوية حيت صباح وطبيبة مزال مدخلات كلسو كيتسناوهاا وغيتة كترعد..
حياة:داباا هي جيني لصرااحة بلا منتشوهوو ليوما فهاد لباطيمة ...نعستي معااه
غيتة:هءهءه والله اختي مقاسني
حياة:وعلاش كترعديي هااا ...تي دويي كتكدبيي القحيبة خرجتي ليها طاي طاي ...ليوووم ابنت لغالية يتحفر قبرك هي بلااتي
جهد نص سااعة باش كلسو تدخلات طبيبة لبيرو عشرات دقايق وعيطو لحياة نوضات غيتة بنتير ودخلو لبيرو
حياة:بغيت ندير واحد سرتافيكا لختي
د:على ود زواج ؟
حياة:الى كتتاب
دك:داكووغ اجي ابنتي
وقفات طبيبة وموراها غبتة كتغزل كاملة داتها لشومبر خرا كتلبس الليكات وقفات حياة بهمس مقربة لشومبر كتسمع....
دك:حطي سروال لكيلوط وطلعيي ....متخافيش دغياا
حركات راسها بااه وهبطات سروال ولكيلوط وطلعات كترجف كاملة ومزيرة على رجليهاا
دك:هييي ترخااي باش منضركش ...اجرااء بسيييط دغياا
حلات ليها رجليهاا وقلباتها بايدها تقالت غيتة:اااي هء ضريتيني
دك:صاافي ساليناا (حيدات ليكات )لبسي عليك
رجعات حياة لبلاصتهاا كتجري تخرجات طبيبة كلساات ونطقات حياة:كلشي مزياان
دك:كلشي مزياان ...غير هيا عندها بكرة قاسحة شوية...تقدر تعدبها فلايلاج...من الاحسسن تجي هيا وزوج ديالهاا ...حيت كاين لي فحالتهاا كيحتاج تدخل طبيي باش ميوقعش شي نزيف ولا
حياة (هدشي كلو مدخلش لرااسها ومسمعاتووش لي همها هوا بااقة بنت )اا صاافي شكراا ادكتورة
خرجو من عندها فايديهاا لورقة خلصوو ونزلوو
خياة:عند جد بووك زهر ...طلعي
اما اقبال هي من وجه حياة عرفات الامور بخير مضطراتش تسول مزال تركبوو ومدات ليها لورقة شداتها قلبااتهاا...مكتوبة فييغج ومطببوعة ...تنهدات شوية وحطاتها جنب لبواط فيتااس
حياة:عندها زهر
غيتة:اللور كتمسح فوجهاا وقلبها مزال كيضرب من خلعة طبيبة
وصلاتهم لدار وكملات لخدمتها مرفووعة لقات جابر واقف ف لمحال مع مهدي كيتسنااهاا هي شافها وقفات مشا عندهاا
لاحت ليه سوارت وكلسات على لكابوو كتنهد :يكما عطلتها علييك !
جابر: فين تعطلتيي ....شنو درتي مع غيتة
اقبال:داكشي لي قلت ليك هوا لي درت ...لكتوبة عندك فلكوفر ...خليهم عندك تنخوي سدة فلمحال (سدة هياا لمحال كتكون فيه بحال طاجيرا لفووق كيدار فيها داكشي لي مكيتحتاجش
جابر:صاافي .... نمشي دابا نتقدا شي سلعة من بعد ونهدروو
خلاتو ومشات لمحال وهز هوا طموبيل خرج من لحومة تنتابه لورقة لي محطوطة تماا هزها وعينيه ف طريق قلبها هي شاف سمية غيتة تبهض وطلق سينيال وقف جنب طريق حلها كيشووف شاف التاريخ هي داباا ...عرفها ديالاشش ولكن كان خاص يتاكد من داكشي لي فيها خصوصا لخط مواضحش بزاف وعاد لفرونسي ديالو عياانة ....جمع فمو كييفكر ...تفكر صااحبو خدام فصيدلية وقصدو ديك الساع كلاكصونا عليه وخرج عندوو
جابر:افيين
..:وهي فالدنيا غبوورات العود ...اش تمااا
كان كيطل عليه من شرجم هز لورقة ومدها ليه :شوف ليا هادي !!...داك لخط مفهمتوش
ضحك لولد وشد لورقة حلها كيقرا وقال:هادي شهاادة العدرية !!
جابر:عرفناهاا اش فيهااا !
...:لي دارتها باقة فييغج ..باقة بنت بنووت ....باغي تزوج هههه
طير ليه لورقة من ايدو. بتنهيدة ارتيااح وقال:الله اعاون
زاد مخلي وراه هداك واقف ساااط وهوا كيرجع لورقة لبلااصتهاا وشد راسوو وقال:خرجتيي على مستقبالك اغيتة.....
دازت تلتيام فيها الامور تهدنات غيتة راها مخشية فلبيت مكتخرج حتى كيخرجو لبنات لا تيليفون لاا بيسي لا خروج لا درووج ليوم السبت ليوم غيجي صديق بليل
الغالية:غيتااااا واا غيتااا
خرجات من لبيت حالتهاا :شنووو
الغالية:يقطعك من دنيااا ....دوزي شطبي داك الصالون انمشيي مع اقبال لسووق نشوف اش خااص ....حق الله ومنلقااك مجفة داار يتاندكدك ملت بوووك
غيتة(بدات كتبكي)سدووو لباب ورااكم تاني راني فحبس هءهءهء
الغالية:باش تعلمي ...بغيتي زنقة خرجي ليهااا دياب يفرسووك
خرجات وسدات لباب وراهاا بسااروت تحت طلب اقبال لي واقفة حدا لباب كتسنا العالية تهبط ...
مشات غيتة لبييت من بعد متاكدات من صالون بلي مشااو ....مشات كطير لبييت دارت كرسي وطلعات لماريو لفووق و را لباليزات كانت مخبية باكية تاع لكارو ...جبدات منها وااحد ورجعات خباتها تااني ومشات لكوزينة هزات لبريكي ومشات لشرجم صالون مخبية بلخامية وبحكم دار لي قبالتهم مساكنها حد ردات هي شرجم شو وكلسات شعلاتو ولاحت راسها على شرجم كتبكيي حسات برااسها غيتفركع عليهااا ...
سلات وااحد ومزال داتها بغات لمزيد متعطلاتش مشات جابت لااخر تهوا كمااتوو ...وكتلووح رماد شرجم لتحت ...عاد حسات بدماغهاا تحل ورجع ليها لمورال شوية...
ناضت بلعكز كتشطب فالصالون بلاصة تشطبها بلاصة تخليهاا ....جابت صاني كروا وجافيل رشات بيه الدار باش تمشي الريحة تاع لكاروو طلقات عود الند فالصالون وجفاات لمرااح وخلات لقناات ...ساعة هي تجفاف بلا تجفاف ...تحت عينيها ولا كحل ودبلات شعرها من يووم لموصيبة مقاستو مامشطاتوو
دخلات الغالية كتنهج ومتقلين بتقدية ريحت صانيكروا وجافيل غطات على ريحة وغيتة دخلات لدوش غسلات سنانها وكتشم فحوايجهاا ودايرة سبة بلي كتحك فدوش
اقبال:مخاص والو !
الغالية:الله اجعل لبراكة
اقبال:انا مشيت
هي خرجات طلات غيتة من دووش ومشات لميكات تاع تقدية كتقلب
غيتة:علاش مجبتوش لحمص او لفوول !!
الغالية:نوضييي نوضي مشطي داك شعكوك وليتي بحالا خارجة من قبر ...وجيي ستفي هاد لخضرة
غيتة(هزات كتافها)مكنعرفش (هزات لحمص لقاتو بين لميكات ومشات كتااكل ولغالية كتنكر عليهااا )ماماا عطيني تيليفيونك !!
الغالية:والله لشديتيييه ....
غيتة:تانا والله منعاونك يالله وليتو شادين ضدد بحالا معرت اش درت يااربي نمووت وتهناااو
تحنات لغالية هزات ماطيشة وسيفطاتها عليهاا جات فلحيط وتفركعات وقالت:سير انا اش بغييت لييييك ....ياااااربييي يعطيك شي سعد يكاد لجد بووك ضلووووع بغيتو يعاود لملتك تربييية احجر جهنم
خرجات كدمع خلات لغالية تسخط وتعاااير وتغوت غا بوحدهاا مشات لشرجم كلسات فييه كتاكل لحمص وتلوح جلوفوو فزنقة وحاطة رجليها فوق لحديد حدا لمحابق ....
Tags:
حكاية أنثى