الجزء 19 - الحب أقوى من أي إتفاق

 

في الحب والحرب كل شيء مباح صباح يوم جديد ...يوم جلسة المحكمة ... ضربتها الفيقة صباح بكري ناضت عرقانة وقلبها مقبوط ..تقادا في الجلسة وخلات عقلها ياخدها لجهة الجلسة والطلاق وان اليوم اخر نهار ليها مع مراد حسات براسها تخنقات وهي تجمع الوقفة لشرجم تستنشق الهواء ويضربها داك البرد النقي ل كيكون مع الصباح باش يرجع ليها النفس ويهدنها شوية ،داكشي ل كان بقات واقفة وكتشتنشق وتفكر واش تاخد شي خطوة لقدام وتمشي عندو وتكون مبادرة منها ولا تريح الارض ... حتى كتزعم وكترجع على الفكرة بحجة كرامتها متسمحش ليها وان كبريائها فوق من كلشي ....وعلاش تنازل هي مالو ما يتنازل هو حتى كتلقى راسها راه هي لمعطاتوش فرصة يدافع ويبرر ويناقشو امورهم وهنا كترجع لنقطة الصفر .... نفخت بيأس ماعرفت مادير كانت فحيرة من أمرها وقرارها بقات هاكاك حتى طلعت الشمس وعتادلت لبست حوايجها لكانو عبارة عن كسوة قصيرة فوق الركبة ومخلطة بالوان صيفية ممزيراش بزاف عليها كانت بحزامها لي مزين وسطها جات مع فورمتها و بينت اناقتها وجمال خصرها .... اكتفت بمكياج خفيف باش حتى الا بكات وبقي فيها الحال مايتجخلطش ليها هادشي لي قاليها عقلها ....طلقت شعرها رشات ريحتها ولبست صندالة عالية عاد هبطت ...كانو مزال ناعسين استغلت الفرصة وخرجت بدون ما يشوفوها ركبت طوموبيل ديالها وانطلقت والووجهة "البحر " اول حاجة كانت باغا ترجع تفكرر وتصفي ذهنها مزيان حيث هاد الخطوة غادي تكون كبيرة في مجرى حياتها وخاص تفكر فيها..دقائق قليلة وكانت قدام لمواج لي صوتهم كيرض الروح ...نزلت من الطموبيل وربعت ايدها قدام صدرها وبرد البحر لقوي كيضرب فيها ...كتحس بيه بحال كيصرفق ويفيق فيها وعقلها خدام يفتي عليها وقلبها خلاص كان كيغوت وسط ديك المعركة الداخلية ... لعقل كيقول ~ كون كان باغيك غادي يبقى متمسك بيك لاخر نفس في الحياة ،ولكن هو بزربة تخلى وخانك قدام عينك وكذب في وجهك وقاليك صديقة واش غادي ترضاي بهاد الذل وقلة القيمة واش غادي تطيحي من راسك وتمشي لعندو... لا لا كوني مرا قوية ولي يعطيك النخال بيعي بابا نتي گاع .. كيسكت عقلها وينوض قلبها يدافع ويقزل~ واش كون مكان باغيك كان غادي يصبر على فراق عامين... كون طلقك في الشهر اللول وسمح فيك ، ماشي يطيح كرامتو على قبلك واخا انتي مدرتي فيها ما يصلاح مشيتي وخاليتيه وراك مجروح ... سمحتي فيه بدون مترددي نتي لغالطة وخاصك تعتارفي!! نتي ل منك لافوت وخاصك تحركي خلاص قبل ما يطير من بين ايدك وتبقاي تبكي علينا وديك ساع مكينفعش الندم ...غتكوني بيدك قدميه فطبق من ذهب للي كيضورو بيه.. خبطت رجلها مع الارض ونطقت بغضب ~ والله لا كان ليها ولا داتو ... ركبت في طموبيلتها من بعد ماكانت مقررة اشنو غادي دير وهذا المرة كانت الوجهة لدار عند مراد بن زين لكن قبل قضات شي حاجة على السريع نص ساعة ديال الطريق وكانت قدام دار مراد ركنت طوموبيل ونزلت بعد تردد كبير...الزعامة حسات بيها غادية وكتلاشى شويا بشويا كتقدم خطوة وتراجع خطوة بعد عناء كبير قدرات تدخل وتوقف قدام الباب الحيرة لي جاتها باش تدق ما حرتهاش ملي كانت باغة تسني على عقد تاع الزواج ،واقفة وكتشوف وصراع كبير بين ذق وكتزعم ولا تراجع مدة طويلة عاد خدات قرارها وفعلا وركت على الصونيط تاع الباب وقلبها كيضرب كون غير مادرتهاش ديك ردة فعل ديالو هي ل مخوفاها وكيفاش غادي تكون ..شويا ديال الضغظ النفسي بين تمشي وتبقى حتى كيتفتح الباب كان مراد يالاه فايق من نعاس عريان لابس غير شورط قصير وخير ربي باين ومعزول حل عينه فيها صدماتو اخر حاجة كان متوقعها ان نادية مروك قدامو ...حك عينيه مزيان وهي توضاح ليه الصورة ،اما هي حشمات وحناكها تزنكو بدات غير كتقلب وتشقلب في عينها باش متشوفش فيه ، حس بالفرحة بنسبة ليه غير مجيتها هنا راه خطوة إجابية في حد ذاتها ...تعوج في الوقفة ضروري ما خاصو يتعفر عليها ... عوج سيفتو فيها وطلعها وهبطها شاف صيگانها العريانين وصبيعات رجليها المصبوغين والمقادين بعناية وهو يخنزر فيها عاد نطق بعصبية وكرز على سنانو~ الالة المحامية تغالط ليك باب المحكمة مع باب داري ولا شنو .؟؟ طلعت حاجب وهبطت لاخور حطات ايدها على خصرها عاد نطقت بستغراب~ اشنوووو ؟؟ بشوفات غير راضين على حوايجها خصوصا صيكانها اما صبيعات رجليها خلاص حمقوه ،تكلم بجدية ~ استاذة !! اشنو كاين على الصباح سىطات القمعة وجوبت بشويا ~ غادي نهضرو هنا قدام الباب شاف فيها في عينها ونطق بسم ~ اه غادي نوقفو هنا الا عندك شي حاجة قوليها دغيا !! مقدرتش تزيد تاخد في لقميع من عندو ، حدرت راسها وتمات راجعة غادية فحالها تبعها شدها من ايدها ونطق بزربة ~ اجي لهنا فين غادية . جوباتو قالبة وجها كاعية ~ غادية فحالي ! جرها من ايدها ودخلها لداخل...أول حاجة دارت رمات عينها في الدار وكتشوف فيها كانت منظمة وهي هاديك حتى كتشوف اميمة خارجة من البيت عريانة كثر من مستورة ...نادية الصدمة شلات ليها فمها حيدات ايدها من ايد مراد بنترة وزعاف دار شاف فيها لقاها كتشوف فيه بالانكسار ووعينها عامرين اسئلة حدر راسو مقدرش يشوف فيها ومشا يلبس عليه ، منظر كان صعيب على نادية بزاف متوقعاتش حتى لهاد الدرجة تلقاها في دارها في نفس البلاصة مع راجلها كانت صعيبة عليها بزااف ولكن كبريائها خلاها واقفة كالجبال الشامخة خدات نفس عميق وبردت على راسها نار الغيرة وضعف الانكسار .. جات عندها اميمة بابتسامة مصبحة عليها ~ صباح الخير ، نادية مجوبتهاش ضربت فيها وزادت تبعت مراد للبيت كيف دخلت خبطات عليه لباب ونطقت بالغوات ~ اشنووووووووو هااااااااااادشيييييي ؟؟ متقبلتهاش معاه في نفس الدار وواخدة راحتها ومعرية كثر ما مغطية وهو كثر منها ...بحالها بحال اي وحدة فينا غتشوف لي كتبغي مع شي وحدة فنفس المنظر مغتقبلوش عسااك راجلهاا ...تبعاتو للبيت تجري وكيف دخلت خبطات عليه الباب ونطقت بالغوات~. اشنووو. هادشييييي ؟؟ جوبها وهو كيلبس في حوايجو ~ بلاما تفهمي غلط هاديك غير صديقتي ما بيني وبينها والوو ،وزيدون انا ماشي مجبر نشرح ليك... عام وزيادة وانتي غابرة جي سولي قبل ما نعرفها ماشي حتى نعرفها واخا !! صدمها بجوابو ومرضاتش ،قربت لعندوو كاعية دفعاتو حتى تخبط مع البلاكار حتى عصباتوو ..هضرت وهي كترعد ممتحماش فراسها~ مجبرررر تشرح ليا مجبررر !! حيث انتا راجلي وسميتك مزال مرتابطة مع سميتي... معندكش لحق تشوف في حتى وحدة اخرا كتسمع !! جاوبها بنفس نبرة لغوات حتى عروقو بانو~ عنننننننندي الحق نشوووف فيمن بغيت ونتي ماشي شغلك حيث هاد الحق لي جاايا تدوي عليه ..نعت فيها بيدو وقال...نتي لتنازلتي عليه بكامل إرادتك ومبقى عندك ما تساليني نتصاحب ،ننعس ،ندير ل بغيت ونشوف فينما بغيت ونسَكّن معايا ل بغيت مزال شي حاجة اخرا .. عارفة كل كلمة عندو فيها الحق وهي سباب حتى كبرات الفجوة بيناتهم وخلات منين يدخل هادشي كامل... قربت لعندو حتى حس بأنفاسها كضرب في صدرو العاري ...حاولت تحكم في أعصابها بزز عليها...حيت عارفة عندها جزء كبير فهادشي ولكن نار الغيرة شنو دير فيها ..جمعت الهضرة في فمها عاد نطقت ~ هادشي مكيعطيكش الحق دير هادشي راك راجل مزوج حتى طلق وديك ساع دير لي بغيتي ... خنزر فيها تخنزيرة حارة عاد تكلم وهو معصب ~ مكندييييير والو ، من نهار تزوجت بيك مدرت شي خرية ...وماشي حيت رجل مخلص وداك لخوا لخاوي لااا ..حط سبابتو على صدرها وبدا كيضرب بشوية ..حيت مبقيت باغي تا وحدة من غييرك نزل يدو لخصرها دفعها منو جهتو حتى لصقت عليه وحطات ايدها على صدرو كتشووف فيه ~ واش لهاد درجة مكنبانش ليك ..واش محاساش بيا گاع نزلت عينيها الارض شادة راسها بزز قلبها كان كيضرب في العالي ورجليها حاسة بيهم خواو بيها لدرجة يطلق منها تطيح ليه تماا حسات بقبضة يدو هزات ليها ذقنها وبعينيه محمرين فيها ~. هزي راسك وشوفي فيا رااني داوي معاك ...بدات كتشوفيه وشفايفها كيترعدو حط صبعوكيدوز عليهم قبل مينزل عليهم بشفايفو كيبوس فيها رفعها لعندو وهي مشات معاه وكانت باغاه دورت رجليها عليه و ايدها على عنقو ،دخلو في قبلة عنيفة مجموع فيها اشتياق وعتاب وغربة عامين نزلها فوق الناموسية مكمل على شنو بدا كان كيبوس فيها وايديه باغا تملك جسمها ، طلع لودنها وهمس فيها ~ بغيتك تكوني مرتي ماشي غير في الوراق بغيتك انادية ..صد مها بطلبو حست براسها تكوانسات وهي تحط ايدها على صدرو مبعداه ~ ولكن امراد مخلهاش تكمل كلامها جمع الوقفة من فوق منها ونطق بسخط ~ عمرك ما غتبدلي بغيتك غير تقولي اه بدون ما تفكري ...معاك انا مكنضرب حسبة لاي حد دايرك نتي لولة ولكن انا عندك مكلاصي لخر... غرضي كان ماشي هو النعاس حيت ل صبر عامين قادر يصبر ولكن جربتك وبرافو عليك في كل مرة كتخيبي املي فيك....بان ليا الطلاق هو الحل الانسب ليا وليك باش نرتاح من هاد العذاب.. هز تريكوه لبسو وخبط الباب وخرج عضت على فمها بنذم وغمضت عينها بيأس جات تكحلها عماتها عارفة عزة الرجل في هادشي شحال سمعت بيه وخصوصا في قضايا لدوزات ...الرجل بطبعو هكاك مكيبغيش لترفضو خصوصا في مسائل الجنسية كيكونو حساسين فيه بزاف ..قدات حوايجها وصدرها وشعرها عاد خرجت لعندهم لقات مراد واقف في الكوزينة حدا اميمة كيكمي بزعاف وباين فيه طلوع الدم وهي واقفة كتسخن في الخبز وكتهضر معاه باغا تعرف مالو أميمة ~. شنو كااين واش دويتو نار الغيرة رجعت سيطرت عليها وكلمة طلاق في وذنيها كتردد خلاتها متسكعش شنو كتقول اميمة تشوف غير ايدها لي محطوطة على كتف مراد ...ردو ليها البال هز عينو فيها وهو يخرج خاوي ليها لبلاصة گاع ضرب فيها وزاد وخلاها متبعة ليه لعين أميمة قربات منها ~. ممكن ندوي معاك نادية طلعت فيها وهبطت ~ ما عندي فاش ندوي معاك غادة فحالي !! اميمة جراتها من يديها حتى جات عينيها في عين نادية لي كانو قرطاس وحارين فيها محاملاهاش تقيسها ~ سمعي اختي نوريك حيت بنتي ليا تالفة ، وركات على كلامها ...مراد راه بحال خويا كتسمعي ، كون كانت شي حاجة بيناتنا ميخليكش على ذمتو عامين حيت تا انا كثر منك مكنبغيش الحاجة المشروكة نادية قاطعت كلامها ~ هانتي قلتيها بحال خوك ماشي خوك ، انا راه راجلي هادا حقي طبيعي نغير عليه وانا كنشوف معاه .." بنص شوفة .... وحدة فقلب دارو ... اميمة بدات تضحك باستهزاء ~ متشديش فيا انا وخليك فتصرفاتك حيت انا نقدر نبات منصبح ولكن تا حاجة مغتغير الا مغيرتيش راسك ...بتنبيه ...غلطتي و بزاااف في حقو ومزال مبغاش توووبي ... فيقي لراسك هادشي ديالك غيخرج عليك غير انتي وهاني قلتها ليييك ، والا كنت انا مابيني وبينو والو راه غتجي لي طيرو ليك قدام عينيك حيت ممنوش زوج اوك ... مهم هادي اخر هضرة غتجمع بيني وبينك وكون ما مكان هو كيبغيك وكنشوفو ممرتاحش بلا بيك منقولهاش ليك .. خرجت اميمة مخلياها بوحدها تضور الهضرة فراسها ، كانت حاطة ايدها على حنكها وكتخمم شنو دير ، لي عطا الله عطاه والمحكمة مبقى ليها والو كيف دير تقنعو وشنو تقوليه وهي ممستعداش تجلس حاليا معاه ومها مفخبارها والو وممهداش ليها الموضوع وفنفس الوقت ممتقبلاش فكرة الطلاق .. خاصها الوقت وهو لي مكاينش ملقات قدامها تا خيار من غير داكشي لي كانت جايا عليه .. بلاما تحس جبدت المنوم لي شرات في طريقها من صاكها دارتو في العصير وحتى القهوة وكلست كترعد ماشعرتش براسها حتى دارت لدارت بقات نابتة بلاصتها وأميمة تمشي وتجي عليها كتوجد فطبلة لفطور فقلب الصالون ،بزز منها صبرات على منظر وحدة مرجعة راسها مولات دار ولكن مكانش خاصها تمشي حتى تأكد بلي شربو العصير ولا القهوى....كملات اميمة لحطان وقالت ليها ~ اجي تفطري معانا....ضحكات ضحكة صفرة وخرجات تابعاها لقاتها جالسة بوحدها ومراد مكاينش أميمة ~ قهوى ولا عصير نادية بدات تضور في عينيها وطلبت قهوة بعدا الطاس مغطي مغيبانش واش شربت ولا لا ~ كبيي ليا قهوة عفاك هزات ليها راسها بالايجاب وكباتو ليها ومداتو تشكراتها وبقات تدور في وجهها تسنى فيه يخرج بان ليها مطول وهي تقول بتلحليح باغا حاجتها ~. عفاك قوليه يخرج يفطر مكلا والو اميمة جرات الكرسي وناضت ~. واخا انا نحاول ، الله يهديكم وصافي على بعض دخلات لعندو كان جالس فطرف الناموسية كيكمي ~ نوض تفطر مراد هز راسو فيها وقال بتساؤل ~. مشاات ؟؟ اميمة حركات راسها بنفي ~. لا مزال برا وكتسنى فيك تخرج تفطر معانا ، شوف نعل شيطان ونوض كون مكتبغيك متجيش تال هنا مراد بانفعال ~ ديك الهضرة مكتقضيش معايا اميمة جراتو من ايدو وقالت ~. واصافي نوض دويت معاك طفى لگارو وتم جاي معاها خارج عاقدهم... بطرف عينيها كتشوف واش خرج تا بان ليها عاد رتاحت مدوا ولا تكلم جلس في راس طابلة راجل ومضور بيه زوج عيالات بداو يفطرو كب ليه قهوى وأميمة لراسها عصير اما هي مرة مرة تهز داك الكاس ودير راسها كتشرب منو حتى صونا تليفونها هو لي نقذها ...جبدتو من صاك كانت نمرة جديدة جوبت ديك ساع بلاما تردد ولا تفكر كثر .. نادية حاطة يديها ورا عنقها وكتدوي عاطياهم بظهرها ~ الو - الو أستاذة نادية !! نادية باهتمام ~ وي شكون معايا - معاك محامي جديد لموسيو بلخليفي قاطعاتو قايلة ~. علاش فين هو احمد غير نطقت هاد سمية مراد نفخ نيوفو وتكا على داك الكاس تاع القهوى - استاذ احمد جرا عليه موسيو زيدان وانا لي تعينت بلاصتو محسات براسها حتى بدات تضحك ملي قاليها جرا عليه حيت كون مدارهاش تعجب ليه ~ امم ايوا وشنو بغيتي مني ومتقولش ليا نتلاقاو - جاوبها بحدة ~ مكنخيركش ااستاذة مجبورة نتلاقاو ولا نقلب ليكم كلشي على ظهركم راكم كتعطلو سيرورة الشركة وهادشي موقف خدمة شحال من واحد من خلال جوابو القاصح عرفات راسها مع محامي مسااهلش تاهيا مكانتش من العاگزين جوابها على نابها قالت بصوت حاد ~. بغيتي لمحكمة ولا نوريك طريقها ، واخر مرة تهز وتحط عليا ولا نوريك نيت طلوع والهبوط على حقو وطريقو قطعت تليفون وخبطت الطبلة وهو ينطق مراد لي وذنو عندها غا سالات ~ علاش تخبطي علينا طوابل غنوض نخبطك معامن !! نادية رمات وجهها لكاسو بان ليها علاين يكملو وأميمة فاتت النص وهي تخنزر فيه قالت ~ ماشي شغلك ديها غاا فضيافك اما انا لهلا يقلب معابا هزات صاكها بنترة وناضت خارجة مخلياه وراها كان غيشدها من شعرها كونما اميمة وقفات في طريقو ...نازلة فدروج ووكتدوز نمرة مريام...كانت حاطا تليفون على وذنها كتسنى فيها تجاوبها غير سمعت الو وهي تجاوبها بلهفة ~ مريام فينك مريام كانت صايگة ~. لقيتيني غادا لشركة علاش نادية حلات طوموبيلتها وطلعات ~ مزيان داكشي لاش معيطة ليك انا واصلة عليك غادا شادا طريق لتيم لخليفي مخدمة موسيقى غربية كتصنط ليها ، دازت على طريقها من مدرسة لي بنسبة ليه نقطة بداية لهادشي كامل لفيه دابا ، غير شافتها تفكرات اول نهار واول لقاء ليها معاه.... تنهدات وقلبات وجهها مركزة مع طريق مبغاتش تزيد تغوص في تفكير وخسر خاطرها...بقات هاكداك حتى وصلات ..بلاصات طوموبيلتها وخرجات كانت لابسة كلاس سروال دجين وقميجة بالبيض وفوق منهم فيست نواغ مع صندالة عالية نواغ في ايديها صاك كبير تا هو فلكحل شعرها جامعاه ذيل حصان ماكياجها كان نهاري عادي جدا وروايحها كيف ديما تعطعط من بعيد ...خدات المصعد بعد مقدمو ليها التحية لي فشركة حيت كلهم ولا كيعرفو شكون هي مدام مريام قصدات بيروه نيشان ومخلاتش لسكرتيرتو الفرصة فين تعلمو ...دقات الباب ودخلات ،كان منزل راسو على وراق قدامو لابس نظاظرو مخبي بيهم التعب لي واضح من عينيه ....جايا تقرقب بطالونها عليه حتى وصلات حداه حطات صاكها في الارض وجلساات في الكرسي قبالتو ونطقات وهي كتشوف في بيروه لكبير ولي اطلالتو غزالة عجبها وعمر ليها لعين ~. من ليوم غنولي نجي لشركة بحالي بحالك داكشي علاش خاصني شي بيرو يكون بحال هادا ولا حسن گاع حتى نتوصلو لحل ...كيخصني نوقف على شغلي وشغل ولديييي بيدي وقف داير يدو فجيبو وراسم ابتسامة جانبية ..ردات ليه لبال كان لابس كيف ديماا سروال توب هاد المرة فلزرق مع قميجة بيضة بلا كرافاط حال صدايفها لوالا مخلي زغب شعرو يبان شعرو كان مرتب بطريقة رجولية ..جا حتال قدامها وجلس على الكرسي مقابل معاها وتحنى شوية جهتها مايل ودار يدو على ركابيه وقال بطنز ~. مبغيتيش يكون فيك شي مرايا وبلاكار تحطي فيه حوايجك وتخربيق لي كتحطي فوجهك مريام بنظرة تحدي ~. لي تشهات خاطرك معنديش مشكيل لمهم نقابل خدمتي لي هي فالاصل هواية عندي وكتعجبني ونزيدك واخدة فيها ديبلوم وتدربت وزدت تعلمت على يد احسن استااذ هز فيها راسو كيستناها تقول الاسم وهي تنطق~ موسيو جيمس سر هذا الخراب الذي بداخلي لم يولد معي ،هو نتيجة لقائك المدبر ، حبك الوهمي وقلبي المرهف .. بسببك اصبحت انا ما عليه اليوم بغات تلعب معاه قرر يسايرها بنسبة ليه بنت تسعينات مغاديش تشطحو وتخليه يرضخ ليها زيداان دوا بجدية ومن اللخر ~ غنجيك من اللخر امدام مريام حيت بنتي ليا كتشوفي شوفات بعاد ، الشركة انا مخارجش منها بغيتي مرحبا مبغيتيش مرحبتين مريام ببرود عكسو ناوية تصفيها ليه ~. تا انا بحالك ، الشركة منتخلاش عليها ...بدات تهز فيدها كتشرح ليه ...ناوية نخدم ونستثمر اللهم فيها بلاما نبدا من جديد قطع حديثهم سكرتيرة لي دخلات تعلم زيدان بوصول المحامي ديالو حرك ليها راسو وخبرها تقوليه يدخل.... على عكس أستاذ احمد لي مرعود مع راسو ولي ضطر زيدان يوضفو باش يسد بلاصة نادية...هدا من شكلو ووجهو وحدة ملامحو باينة فيه ممعاهش اللعب جاي لابس كلاص كأغلبية المحامين شكارتو فيدو الضحكة مليهاش الاثر في وجهو ،عينيه مكمشين لكن شكلو انيق في سن كان اصغر من زيدان تقريبا نفس سن مريام او اكثر بشوية ..رمى سلام وجلس بعدما سلم بالايدين مع لخليفي اما مريام كتفى يهز ليها راسو ... رجع زيدان بلاصتو وهما بزوج جالسين قدامو عرف عن نفسو لمريام بلاما يحتاج زيدان يدوي - معاك استاذ فراس محامي جديد لموسيو زيدان كنظن نتي مدام مريام ، من شوية عيطت لمحامية ديالك بانت ليا مزال مجات ؟؟ تسرسب عليها في الهضرة مخلاش ليها الفرصة لا تقول متشرفين ولا تستفسر ..هزات فيه حواجبها وجوباتو ب ~ جايا في طريق !! وقف مشا لجهة طاولة العمل وهو غادا في طريقو كان كيقول ~. نتمنى متعطلش باش نطرقو هاد المسمار حيت خدا كثر من حجمو وضيع وقت كثير مجات فين توصل القهوة حتى وصلات نادية وجايا تاهيا ناوية على خزيت ..رمات سلام ودخلات عينيها نيشان مشاو للمحامي الجديد طلعتو ونزلتو وهو كان كثر منها جلسات على الكرسي كتدوي مع مريام بالهمس وهما يسمعوه قال فراس ~ واقلة نبداو هز ليه زيدان راسو كموافقة وهو ينطق ~ مدام بلحاج مريام باعتراض ~. مدام جيمس عفاك قال رافع من صوتو شوية ~ مدام بلحاج ولا مدام جيمس ولا الاستاذة مريام كيبقى الاسم غا شكلي ومغنوحلوش فيه على عكس الشراكة لي غنوعرو فيها تكات نادية على الكرسي مشابكة يديها مخلياه يعبر كيف حلا ليه ~. باش نجيوك من الاخير انا ليل كلو وكنقرا اتفاق لي كان بين موسيو بلخليفي وبين موسيو جيمس لقيت بلي زوج ديالك كان شريك بالفلوس فقط نادية ضحكات باستهزاء ~ وكاينة شي حاجة ما حسن من لفلوس فهاد الاتفاق علاه كون ماهو غتوقف هاد شركة فراس ميل راسو عندها ~ شركة وقفات بخدمة ليل والنهار بشحال من عام دتمارة ديال موسيو زيدان ولفلوس لي ساهم بيهم موسيو جيمس رجعو ليه مضوبلين نادية ~ هادشي ااستاذ كيبقى هضرة حنا كنشوفو لوراق زيدان تدخل ~ غنحاول هاد الموضوع ميطولش بزاف ..كيف ذكرت للاستاذة قبل متجي ..كان كيدوي مع نادية ....قلت ليها بلي شركة مغاديش نخليها ليها مريام ~ وتا انا جاوبتك وقلت مغاديش نخليها ليك فراس ~ دونك غادين تكملو فهاد الشراكة لي كانت قبل وتا حد ميخلي ولا يشري حصة واحد تاني شنو قلتو ؟؟ نادية مطمرة ~ مكتسناش منا تلقى لجواب دابا ، بنسبة ليا انا نلوحها في محكمة وهانية فراس حافظ صواريه ~ وديك ساع نحلف ليك نتوما لخاسرين ، مد ليها كارت فيزيت ديالو وقال ...سولي على هاد سمية مزيان قبل متنصحي موكلتك وقف زيدان وقف وراه محاميه كيدويو مبعدين فراس ~ كيف قلت ليك اموسيو زيدان ، نعس على جنب الراحة وكمل على خدمتك هما لخاسرين زيدان ~ تا انا خدمتي راني مكمل عليها بغاو غا زكير انا مولاه لعب لعيالات معنديش معاه ..مد ليه يديه وقال ~ منعطلكش على خدمتك فراس بشكر ~. تهلى فراسك ونهارك مبروك بيناتنا تليفون رجع لبلاصتو كانت مريام كتهز صاكهاا ~. نفكر في العرض وإلا راق ليا غدا تلقاني هنا الا كان العكس غتلقاني عوتاني هنا توجد ليا لبيرو لقلت ليك عليه بنما سالات دعوة زيدان ببرود ~ غنستنااك !! ميقت فيه وعطاتو بظهرها تبعتها نادية ل كان قلبها كيضرب واخا حضرات معاهم وتجاوبات ولكن لخلعة شاداها والوجع فيها خايفة تصفيها ليهم وتكمل عمرها في الحبس ..تبعت مريام هاد الاخيرة كتدوي معاها وتسول فيها شنو دير وهي مكيناش هناا مريام بنفاخة ~. اويلي اصحبتي راني كندوي معاك فين سرحتي ؟؟ نادية بتوثر ~ هاا لا راه غير ضارني راسي ومفاطراش مريام ضيقت فيها عينيها بتشكيك ~ اجي بعدا فين كنتي على صباح نادية ضغطات على رقم الارضي ~ مشيت نشوف برطمة لي ختاريت وشنو خاص راك عارفة خاصني نرصي أموري مريام متيقاتش ~. ايوا والجلسة لي كانت عندك نادية ~. اشمن جلسة ؟؟ مريام علات فيها حاجبها وهي كتقيس جبهتها ~ بسم الله عليك جلسة الطلاق نادية بلعات ريقها ~. لا لا مجاش مراد وتأجلات تحل سانسور وخرجو ، فرحت ملي عرفاتو مجاش وحساس ببصيص امل فعلاقتهم ~. ايوا نتمنى ليكم خير نادية هربانة من اسئلتها ~ مهم عندي شلا منقضي نتلاقاو من بعد بسلامة مريام ~ اهيا فين غادا ومخلياني نادية ببوسة في لهوا ~ لخدمة لخدمة بيناتنا تليفون هربات من حداها لطوموبيلتها طلعت ليها ايدها كيترعدو هزات تليفونها قابلاتو معاها ليصوني وديمارات طوموبيل فين معرفتش ضرباتو الفايقة ناض دايخ وراسو عاطيه الصداع مقدرش يحل عينيه بقى مدة كيحاول يحل فيهم ويرجع يسدهم عاد قدر يقاوم داك النعاس ليكان فيه رمى عينو في لبلاصة ل هو فيها كان صالون وناعس فوق الفوتاي واميمة حداه في جهة الاخرى ناعسة ...هز تلفونو شاف ساعة لقاها 4 تاع العشية تصدم وبقى يركز ويرجع في داكرتو عاد تفكر انو نادية جات لعندو وكانت عندهم الجلسة ليوم شويا جاه نعاس ونعس سرى معاه القالب وان حطات ليهم شي حاجة في الماكلة حتى نعسو بلاما يحسو ولا حتى يشكو خدمتها صحيحة وهادشي كامل باش مايمشيوش للمحكمة ويطلقو ساط بسخط على تفكيرها الاجرامي كون شي واحد فيهم صدق ميت فين كانت غتولي هادشي كامل كانت تختصرو ف جملة وحدة بغيتك وما بغيتش نطلقو وكان غادي يسمح ليها ديك ساع ولكن صعيب تخرجها حيث كبريائها منعها وعزة نفسها كيف ديما طاغية عليها بزاف ساط ساخط وهو كيفكر فهادشي ..ناض لعند اميمة كيقيس فيها لقى نفسها منتاظم، فيقها بزز ناضت مدوخة والشقيقة شاداها مدة عاد استوعبت الامر طلع ليها الزعف من هذا التصرف ماعجبهاش الحال وبدات كتعاير ~هادا تصرف ماشي ديال واحدة بعقلها اشنو معنيت هاد تخربيق حولها كتقوليا قزلي لمراد يخرج يفطر وكتدوي بتلحوين ... كانت كتغوات ومراد غير ساكت مخنز ومعصب حتى هو معجبوش الحال لموقف ل بانت فيه كان خايب بزاف ماشي ديال وحدة بعقلها ،زعف وطلع ليه دم جمع الوقفة هز سوراتو وبورطابلو وخرج خلاها وراه شاعلة تم نازل في الدروج ودوز ليها الخط .. عند نادية لجالسة على اعصابها وثوثر باين ليها في وجهها بعد مديمارات طوموبيل ملقات غير دارهم تخبي خلعتها فبها مسات ليها وتخشات في بيتها متغدات ولا جاها الجوع كانت غير كطرطق في صباعها وعينيها على تلفون الا صونا ولا وصل مساج كتقفز وكتقول هو...جمعت الوقفة وحرقها راسها من قوة التفكير قررت دير ليها قهوة تبرد بيها بعدا ولا تهدنها مهم تلاهى فيها وجدتها وهزت كاس في ايدها حتى صونا تليفون لي كان في جيب غير خداتو وطلعت ليها نمرتو وهي تلوح الكاس من ايدها بقوة الخلعة ل سرات معاها .عضت على قنانفها برعب وقلبها كيضرب معرفت اشنو دير ..صونا عليها مرة لولة وثانية وثالثة ورابعة والخامسة ومني عرفها مغاديش تجاوب صيفط مساج " كنقسم ليك بالله وماتجوبي حتى نجي لداركم " خلعها بكلامو خلاها كترعد وتعض في صباعها مدة قليلة وصلها مساج اخر فيه "خرجي انا قدام داركم " غير قرات لميساج وهي تبدا تصفار وتخضار عرفت راسها كاع داك تخراج لعينين لفيها هنا غادي يتحد ليها اش تقول ليه ولا اش تجوبو ولا حتى لمبرر ل تعطيه تافه غسلت وجهها بزربة دوزت ايدها على عنقها كتهدن في راسها خدات نفس عميق وهي تخرج كانت لابسة بيجامة بيتية وهازة شعرها لفوق... اول مرة تكون جامعاه وفي رجلها بانطوفة ،خارجة كترعد في لمشيا غير تقابلت معاه وبان ليها متكي على الطموبيل وايدو فيها الكارو وهي تفافا كانت باغة ترجع بحالها مقدرتش تكمل لعندو ..ولكن شافها ولي عكا الله عطاه غير دور وجهو وقشعها وهو يتم جاي لعندها بخطوات ثقالبدات ترجع بشويا بشويا هو يغوات عليها ~ وقققققققققفيي وقفي !! الخلعة جمدت ليها الرجلين وهي توقف في بلاصتها متحركتش... وقف عليها وتقابل مع وجها اما هي مقدرتش طلع العين فيه... حك عنقو كيسوووط بسخط وانفااسو لقوية كضرب في وجههاا عرفاتو شاااعل بدات تلعب بايدها حتى شدها من فكها وزير عليها عاد نطق بعصبية~ اشنووووو داكشي درررتي هضرررري كنتي باغة تصفيها لشي واحد ولا اش قال ليك داك العقل عندك ؟؟ تأوهت بالم من حر الشدة لي دار ليها ولكن مبغاتش تبين طلعت عينيها فيه ببراءة وشدات ليه ايدو بغاتو يبعد عليها وقالت ~ بعد مني امراد ،رد ليها لبال تقصحات رغم انها كتبين لعكس وهو يبعد ايدو عليها حاول يكالمي راسو عاد هضر ~ سمعي انقول ليك مبغيتش نغلط معاك ونتصرف معاك شي تصرف خايب ابنت الناس ولكن هاد المرة راك عيقتي وبزاااف واش انا مزوج بمراهقة ولا اشنو .؟؟..جوباتو وهي كتشوف في الارض~ حتارام راسك .صدماتو بتخراح العينين ومزال زايدة فيه ...جرها من ايدها لعندو حتى شهقت بخوف تيسحابو باغي يضربها خشا ايدو من ورا عنقها وجرها غير بشويا وهضر بصرامة~ طلاق غادي نطلقو حيث فعلا عييت من الانانية لي فيك وعييت من تصرفاتك انادية بزاف على عزة النفس وبزاف على حب الذات اشنو فيها الا قلتي كلمة زوينة اشنو فيها الا تنازلتي واحد شويا غبرتي عامين وصبرت حملتيني ذنب معندي فيه دخل وصبرت رجعتي ودرت محاولة نرجعو وتنازلت على نفسي وكرامتي و استفزيتي رجولتي وصبرت ليك ولكن تيقي بيا مبقيتش قادر نحارب على ودك بردت من جهتك وبزاف وهاد التصرف لدرتي معجبنيش وغير صغرتي براسك عندك يبان ليك راك حاربتي على ودي بهاد الطريقة بلعكس زدتي اكدتي ليا انا عزة نفسك عندك اهم مني اما باش ضعافي قدامي وطلبي مني سماحة جاتك صعيبة وكنبان ليك انسان ماكنستحقش تنازلي ليه زعمة برافو عليك عرفت قيمتي مزيان عندددك . كلامو نزل كيف السم على قلبها حسات بظيم طاح عليها في ديك اللحظة شحال صعيبة تسمع هاد لكلام من شخص كتبغيه بزاف ولأصعب انه راجلك وحبيبك هو لي يقولو ليك و كلامو كولو صح لاول مرة كتحس بلسانها تعقد ومقدرت لا تجوب ولا دافع على راسها اكتفت تهبط راسها لتحت وتهرب عينها منو مجوباتوش بقاو مدة غير ساكتين كأنو لكلام هرب منهم بزوج لا هي قدرت دير شي حاجة وهو كيساين في ردة فعلها تبرر ولا دافع على راسها ..كان جوابها هو السكوت ...كسر هاد الصمت غير هو ملي بعد عليها وايديه تحيدت من على عنقها وخصرها في ديك لحظة حسات بروحها لغادية كتخرج ماشي ايديه حسات بشي حاجة كدفع فيها وخاصها دير خطوة للامام ،بعد عليها وعطاها بظهرو خاتمها بجملة وحدة~ الله يعاونك ، شفايفها بداو كيترعدو بغات تنطق ولكن مقدراتش بدون شعور نطقت اسمو بصوت عالي وتبعاتو شاداه من ايدو~ مرررررررراد دار لعندها شاف فيها بقات شادة ليه في ايدو وكتشوف فيه باغة تنطق وتقول شي حاجة ولكن فمها مطوعهاش بقات غير كتشوف فيه وساكتة حتى ضار فيها ~ غادي تهضري ولا غادي تبقاي غير تشوفي ..فشلها بردة الفعل وهي تبلع كلشي وجمعاتو في كلمة واحدة ~ لا معنديش . جا يجاوبها وهو يصوني ليه تلفون كانت اميمة حيث تعطل عليها وخافت عليه لا يدير ليها شي حاجة سيغتو خرج معصب....جبد تلفون جوبها تحت انظار نادية لشدتها الغيرة فور ما سمعاتو نطق اسمها بهدوء ~وي اميمة ،وي وي سافا اكي انا جاي غير وجدي الحوايج اليوم نشدو الطريق . قطع معاها وحيد ايدو من ايد نادية وزاد مخليها واقفة بحال التمثال داز من حدا رجليها مكسيري مخلي غير ذخاخن وراه تبعاتو بعينيها حتى اختفى من قدامها .. حسات براسها فعلا الغلط لي دارت كبير و بزاف وبانت برهوشة قداموو و الفكرة باش ترجعو ليها تبخرات .. دخلت لدار و طاحت فوق الفوطوي على وقفتها الرعدة شاداها و كلمة وحدة لي تشدت ليها في فمها ..." ضااااع منك " هبطات راسهااا شاداه و صوت نخصتهااا غير مزاد كيترفع نادية ... انا شنو درت و كيفاش فكرت هكا "تضرب راسها " علاش مشديتوش علاش مطلبتش السماحة علاش محاربتش عليه علاش خليتو ضاع منييي لا لا منقدرش حتى نتنفس بلا بيييه منقدرش ...بقات تبكي حتى تفشي عاد ناضت لحمام غسلت وجهها والقران ديال عقلها كيملي عليها شنو دير ~ بغيتي غير الطلاق والله لا كان ليك اراجلي لعزيز دبا نشوفو هاد الزعامة كاملة باقي معارفنيش مزيان.. داخل فيلا بلخليفي ...لي واخا كبيرة وزوينة ومخاصها خير كانت باهتة ومغيم عليها الحزن ...كانت جالسة لالة امينة هي وهناء لي حاطة عليها ركبتها ..كتشكي وتبكي ملات وراسها عمر و خاطرها تقهر من جهة نصر الدين لي من نهار خرج من الباب مبقى رجع .. ولات طالبة غا وجهو تشوفو وتعرف راسها واش من لمطلقيين ولا من لمزوجين من نهار غبر عليهم مبقاو سمعو عليه شي حاجة قلبها نفر منوو وولات تقول الله ينعل بو الحب وما يجي منو ...ويلعن الحب المذلول لي خلاها صابرة عليه ورافدة ليه هبالو -هناء هزات راسها كتمسح دموعها عينيها منفوخين وحمرين ~... واش اخالتي هادشي بان ليك عادي عامين و الصرف وهو غابر ممعروف واش مات ولا باقي حي ولا هاجر و لا يمكن باقي في البلاد .. بنتو كبرت وقريبة دخل لمدرسة دور دور و تسولني على باباها ،بيا يكون دار مرا وولاد اخرين وخلاني مرهونة هناا ..عييت منكذب على دارنا ونخلق اعذار وجهي مبقيت عارفة اش جهة نصد بيه -امينة قلبها مضيوم وحالها عالم بيه الله ~ اش غنقوليك ا بنيتي راه انا الأم و قلبي مشوي ومكوي على كبدتي من زوج جهات ...غا واحد عطاني بظهرو وغبر عليا وجهو متليتش شفتو، وواحد ممحسوبش على صحاب الدار.. حالتو غادا راجعة اللور ولا لبراني يشوفو كثر منا هزات كفوفها لسما تناجي الله ~. يااربي شوف من حال وليداتي وجبر خاطري من جهتهم راه هما لي نكساب تمات جايا اية تجري حداهم تنقز وتلعب مرة تلاح على ماماها مرة على جداها كبرات ودارت رجيلات وتسرح ليها اللسان وولات تعرف ~. ميما ميما قولي لماما تولد ليا ، بغيت خويا ولا ختي يلعب معايا أمينة كتمسح على شعرها ~. ها انا نلعب معاك وماماك تاهيا هزات ليهم كتافها بطفولية ودلات قنانفها ودوات فگعانة ~. لااءح علاش صحابي لي معايا فليكول عندهم بزاف خوتهم وانا لا هء هء تانا بغيت خويا ولا ختي -امينة شافت في السقف مهربة عينيها منها وجاوبتها ~ ... ايوا الغالي الله ابنيتي ~~~~ عند مريام لي كان عندها الجو ناشط و بارد تغني و تشطح وتلعب مع ولدها لي كانت ملبساه ومقادا ليه وحاطاه فوق الناموسية على متوجد هي ...دير لكحل وتمشي تبوسو ، تمشط شعرها وتعنقو..مرة تشبشبو مرة تحير عليه لي شافها ميقولش والداه ولات صغر من سنها زادت ضعافت ووجها نور ..كملات لبسها الكاجوال وهزات أرون بين ايديها وصااكو على كتفها لي مجهزاه بشنو غيحتاج ونزلات لتحت فين كاينة عائشة ونزهة كيستناوها ليومة مقررة تغديهم على برااا مريام بابتسامة جات وسطهم ~ لايدييز واجدين عائشة ~ كي جيناك ؟؟ مريام بمرح ~. نشدكم نهرب بيكم ، بغيت غا نعرف نادية اش عندها علاش مجاتش عائشة غادا سابقاهم وكتدوي ~ عيطات ليا ابنتي وقالت ليا غتسافر عندها شي خدمة مريام هزات حواجبها مستغربة حيت مفخبارها والو ~. صافي حتى نزلو ونعيط ليها ... سدو لباب وقصدو طوموبيلتها سبقتهم كتقاد ارون بلاصتو وتدوي معاه ~ مامي اووغااا غغغ ...مامي قول قول مامي - ااغغغغغ م مم هههه نزهة بعداتها ~ صافي غا ركبي ابنتي انا نجلس حداه منتيق گاع بهاد لعجب عائشة ركبات جنب مريام ~ جربتي لكبدة لمعاودة اختي شتي شحال صعيبة ...تنهدات بحزن ملي طاح فبالها نادية بنتها وسعدها لي مشبهش خوتها ..عقووبة نشووف وليدات بنيتي تانا مريام برونشات تليفون مبدلة لهضرة ~ شنو بغيتي لعلوة ولا لهيت ولا لعونيات عايشة عزيز عليها نشاط ولقصاير وجماعة الزينة ~ ديري لينا واديري علاش ترجعي يالي تايقة في الراجل مريام ديمارات طوموبيل وميقت فيها ~. راجل واحد كان عندك وراه في روضة عايشة ~. هادي نسمعها ليكم باش تحفظوها وتعلقوها في وذنيكم واطلقيني وتاهيا مكانتش من العاگزين طلقتها وزادت في الڤولون وتحركوو يمشيو يتغداو غادا عايشة وتصفق بيديها وسرتلة ذهوبات مزينة يديها ،عينيها مكحلين والفم ديما مسوكاه اما جلالب مكاين غا الله يعطيك صحيحتك بصوت عائشة ~ واكولي الحوت البوري وخلي باش ضوري وهادا "قلزات قدامها " عطيه لراجل ..