الجزء 27 - الحب أقوى من أي إتفاق

 سكتت كتشوفيها وكتقول بينها وبين راسها تدوي ولا تضرب طم وتبدل ساعة بوحدة تانية تخليها حتى تبرد وتمهد ليها الموضوع شافت تاعيات وقالت لي ليها ليها ،مسحت كفوف يديها في سروال وتنهدات قايلة~ سمعيني اماما راك قلتي بفمك انا ماشي بنت صغيرة وعاد انا ممولفاش نخبي عليك شي حاجة ونديرها ورا ظهرك اولا ؟؟ قاطعتها عايشة بصرامة وبصوت حاد قايلة ~ كنتي مطتخبيش اما دابا وليتي تخبي وانا حاسة بشي حاجة ماهياش واحساسي عمرو خيبني ، داك قوة الخدمة تاع ليل وسفر وسير هنا ولهيه مكانتش ليك شحال هادي ،كنتي تليفون ابنتي تدخلي دار تفوت تمنية لي عيط ليك على خدمة تقطعي عليه وتقوليه سالا وقتها دابا... كنتي تدوي قدامي ماشي لقاك بتخبية كتضحكي تحت منك بلاما ندويو على سهيان لي وليتي تسهاي نكون ندوي معاك تا تسافري بعقلك لقنت اخور ....هزات حاجب ليمن بتساؤل وقالت مكشرة ملامح وجهها....مالك شنو عندك ليتاما لولد مع لبنت ولا هرب عليك راجل ولا ملاقيا متاكلي وناعسة في زنقة .. قولي شنو كاين نسمع منك ماشي من واحد اخور ،كتعرفي شي حد ؟؟ حسن من هاد الفرصة مغتلقاش خدات نفس عميق وتشجعات وقالت ~ في حياتي كاملة عرفت زوج رجال لول عارفاه وتا تاني عايشة بصوت عالي حبست ليها الهضرة في الحلقة ~. شماتة لول متحسبيهش على الرجال اما تاني محيه من عقلك وديري راسك متلاقيتيش بيه بلاشعور وبردة فعل كتدخل الشك جوبات~ علاش اماما مراد شنو دار ليك وقفت بالغوات كشاكشها خارجين ~ سميتو منسمعهاش الا مدارش هو خوه وصاحبو ماخلا ما دار واش داكشي لي وقع مع بنت خالتك قليل ، كلشي عرفها هربت معاه وفي لخر تكرفص عليها وجاي لايحها عند رجلينا بحال جفاف نادية بانفعال ~ اماما هاداك زيدان ومراد اش ليه فهادشي راه علاقتو قطعها بيه فداك الوقت عائشة بتشكيك ~ هادا مكانش كلامك شحال هادي هاا ؟؟ شنو تبدل تا وليتي دافعي عليه دابا نادية ~ حيت ضلمناه وهو مدار والو ، مراد نيتو كانت زوينة بغاني وجا عندك وتزوجنا على سنة الله ورسولو عائشة برد فعل قوي ~ وطلقتو ونبينا عليه السلام !! حيت انا كنعرف الراجل هو لي يدير لمرا وعائلتها شرفو وعرضو ،هو من لول كان عارف نية صاحبو وخلاه ضحك على ختك كيف بغى، حتى باها مات بالفقصة ومها لي هازاه في قلبها العالي بوحدو لي عارفو غير ملقات جهد تغوت وتعارض... گمدتها وتكوات في قلبها ،ترزات في راجلها وترملات مفرحت ببنتها كيف لعيالات ومربات حفايدهاا كيف بغات ، واش عند بالك هاداك زواج تزوجات، خدات واحد كبر منها نصراني ولا ملتو معرت منين ولدات داك لولد لي معرفنا كيف دارت ليه راه كلشي كيقول خداتو قد باها على فلوسو ومات وخلاها صغيرة متشوفات كيف لبنات ما عاشت حياتها كيف بغات وهادشي كلو سبابو قصوحية راسها ومعارضة والديها كون سمعات كلام سي كمال الله يرحمو وتزوجات راجل لي جاب ليها كوراها دابا لالة لعيالات داكشي علاش لي دارتو هي وداك لعقل لي تبعاتو ولي سكتات عليه ختي منخليكش طيحي فيه انا مصلحتك نعرفها كثر منك ودابا بلا قوة الهضرة وهاد هيئة دفاع لي دايرة ليا على هاد مراد غنجيك نيشان واش مزال كتلاقاي بيه وكتخرجي معاه دوي ؟؟ نادية بغصة ~ تلاقيت بيه و باغي يجي عندك ويرجع يطلبني منك وقفت على طولتها خابطة الطابلة ~ هاااااا لي قلت وقفت على طولتها خابطة الطابلة وخرجت عينيها فيها ~ هااا لي قلت مزال عاد بديت نشك شكي طلع صحيح نادية بترجي ~ ماما غا سمعيني السيد راه ضلمناااه هو راه عايشة وقفت ليها على وجهاا ~...هاه هاه هاه سمعي نقوليييك انا هذاك هو لي مغيعتبش باب داري ومنتناسبش معاه بلاما تبقاي دافعي عليك كتسمعييي گاع لي تجي من جيهة داك الويل مخصنيش بييهااا ... نموووووت ونحيااا وميدوووزش ليا انا بغيت گاع فقصتي نحطها بالية و يهزوها جديدة نادية بترجي كتحاول تفهمها ~ اماما يهديك الله ونتي باش عرفتي بلي مراد كاان عارف اش غيدير لاخر و خلاه حتى يغرق مع مريام هااا قولي باش عرفتي عايشة ~ الصحاب كيكونو بحال الخوت بلا متبقاي تخرجي عليا في عينيك نادية ~واش عند بالك لي صحاب بحال الموت غيتفارقو في نفس النهار لي طرا المشكيل وغيتخاصمو و يضاربووو گاع وواحد فيهم زاد خوا البلاد ... ولي قصدووو شريف راه كيقصد الباب و مراد قصد رضااااك و الحلال ماشي هرب بيا كيف دار غيرو و زيدووون مغنبقاوش نعطيو الامثلة بمريام، الى هي و مهااا دوزوها ونساو شكون نتي لي تبقاي حاقدة على الدري عايشة حطت ايديها على جناابها ~ جيني من الاخر عينك فييييه و باغااااه نادية تشجعت و خرجتها من فمها ~... باغاااه وعمري نسيتو عايشة هزات راسها من فوق لتحت وقالت منخصة ~اذا غتنسااايني عليك و متعاوديش طوفي بخيالي هو الاخر نادية بغات تشد ليها ايدها وهي تنترها ليها وهي تقول بصوت باكي ~ ماماا اش تتقولي عايشة خنزرت فيها ~جمعييييهاااا عليا كلامي سمعتييييه ابنت كرشي وماشي انا لي نعاود الهضرة بغيتيه الباب و طريقو راك تعرفيهم غا هو طريقي ضربييي عليها حيت من اليوم ومن هاد الساعة و الدقيقة مانتي بنتي ما انا نعرفك ... متقبلت بنتها خرجت من تحت يديها وتعارض كلامها قالت هضرتها اللخرة وتمات غادا طالعة لبيتها وهي تنطق قبل ميغبر اثرها...~و من غدا هاد الخربة غنخويها ليك جيبيه سكني فيها نتي وياه حيت نتي لي خدمتي وعرگتي عليها انا غاا ساكنة معاك ...نتفت نواضرها وقالت رامية عارها ~ و انا مقلداااااك وها لعار نهار نمووووت متجي لگنازتي ولا تعري وجهييي .. " مشات وخلات نادية طايحة على طولتها تبكي و مخرجة عينيها حست براسها بصح خسرت مهاا و كلمت ماما ولا اش خبارك ابنتي عمرهااا تسمعها ولا تنطقهاااا مزال... ناضت هزت صاكها وخرجت ركبت في طموبيلتها صايگة و تفكر وتفكر ودموعها على عينيها ... عقلها قرب يخرج حاسة براسها كتمشى على قلبها غادية برجليها للمجهول تقدر تخرج القضية طريفة وتقدر لا محدها كتقرب وكتزيد تضغط على دراع زيدان لي كان عادي ممسوقش باغي امتى يهنيها فخطرة من فريع الراس...دخلو لكافي وكيف حطو رجليهم تلقا ليهم راجل لاابس كحل في كحل وبابتسامة عريضة قال مسولهم ~ موسيو زيدان ،مدام مريام هز ليه زيدان راسو بالايجاب وهو يشير ليهم لدروج ~تفضلو .. الخوف لي حسات بيه عمرو كان ،حسات بمشيتها تقالت و غير زيدان لي جارها احساسها احساس شخص موضر فغابة و ليل و غير صوت موكا و عوا لي مسموع و معارفاش شنو يقدر يخرج ليها ... صوت دقات قلبها كتسمعهم فحلقها بغات هادشي يسالي و ترتاح و لكن بلا ما تشوفهم و لا يشوفوها ديما صورة جيمس وهو مرمي قدامها بدماياتو كتخطر على بالها الموت ديالو خلا صدمة بالنسبة ليها ونفسيتها حاسة بيها مرضات هاهي غادة عند لي قتلوه برجليها... وصلهم سرباي للفوق و لطبلة لي ميزوها بوجود جاك جالس معاهم و كيتحاورو شوفة فيهم خلاو مريام تنهد و زادت تخشا فزيدان بلا ما تشعر بصح مبقاتش كتحس برجليها على الأرض واش هدا كلو خوف ولا شي حاجة اخرى الله أعلم وزادتها القهوة لي كانت كتصفر مفيهاش حس لبشار دايرين شغل المافيات ...زيدان بتخنزيرتو و ملامحو القاصحين مخداو منو لا حق ولا باطل جر لمريام الكرسي و جلسات و جر حتى هو الكرسي و جلس حداها مريام بزز هزات عينيها مغتشوف غير خو جيمس الكبير و هادشي كان واضح من الشبه الكبير لي بيناتهم لابس كوستيم بيض و شابو فنفس اللون لحيتو بيضة وملامحو مكمشين بين صباعو سيجار باين عليه غاالي غير من ريحتو الغريبة و زيدان مقابلة معاه مرا في الخمسينات شعر صفر حد لودنين و كسوة فلحمر سميطات فيها فتحة من صدر ل باين جلسو بلا حتى كلمة فقط نظرات كانت كفيلة تبين لكل اش هاز فخاطرو المحامي الشخص المحايد للطرفين عرفهم على بعض ..." اوري "غير كيبخ عليهم و عينيه على مريام كانو شوفاتو ممفهومينش كره ممزوج بغضب على وحدة كانت سباب فموت خوه الوحيد اما "رانيت" الاخت ديالو كان شوفاتها نارية بنسبة ليها لي قدامها عدوتها تقدر تنوض تقتلها بدم بارد...حط اوري سيجار على جنب و هضر بصوت غليض ..~ فينو ولدنا ؟؟ نظرات مخيفة ، جو مشحون ومكهرب نطق اوري بصوت غليض وبلغتو الام ~فين آرون ا مدام مرياام ؟؟؟ .. " ضغط على سميتها " .. سؤال خلا مريام كتشوف في المحامي و زيدان و تستنجدهم بنظرات باش يدخلو و يوضحو ليه حيت باينة مكيرحمش .. حسات بطراف صباع يديها تجمدو و كتسخن فيهم تحت طبلة جاك "حل لمنيط ديالو و كلامو موجه ليه " ..... كنت بغيتك تشوف هاد الوراق قبل من هاد لقاء ، بالحق كنتي مشغول مهم هادي امانة من موسيو جيمس قاليا الا مات توصل ليكم لبس نظاراتو ديال شوف بشوية عليه و بدا يقرا بتمعن و مرة مرة يهز فيهم عينيه و نصف ابتسامة رسمها على وجهو معرفوش شنو معناه بقا كيقرا ورقة ورا ختها وملي سالا مد لوراق لحتو بنظرة باردة ،ملامح وجهها بداو يتزيرو وتبان عليهم الصدمة لاحت لوراق فوق الطبلة قبل متكمل لقرايا وسبات باسلوب منحط على شوية وكان زيدان غيقلب عليها طبلة ، خبط على باب جهدو ورد عليها بنفس الأسلوب كون ما مريام لي وقفاتو من تحت الطبلة كون كبرهاا .. اوري شاف في ختو مخنزر فيها ~ سكتي ولا خرجي برا بشمتة قالت ~. واش قريتي هاد زبل ، ملي ماشي ولدو باشمن حق ياخد فلوسو ،شافت في مريام مخنزرة ....ولكن كلشي منها ضحكات على خوياا ،غراتو بصغرها وزينهااا ولعبت عليه وخلاتو يفكر يبعد على ديانتو هي لي كان خاص تموت مريام خرجت عينيها من شنو كتسمع كتعتارف ببساطة وعندها لقتيل ساهل رمشت بزربة وقالت ون شعور مرضاتش ~ مغريتو بزيني ومخديتوش على فلوس وانا من دابا كنتنازل على كلشي بضحكة ساخرة قالت ليها ~ كتعرفي تجسدي دور البراءة بغات تدوي د لقات زيدان سبقها وتكلم بعدوانية خلا كلشي يسمع وكلامو كان موجه لذكر حيت بزاف عليه شيم الرجال ~. كلامها سمعتيه و الوراق و قريتوهم بلا زيادة ولا نقصان ارون او كمال ولدييييييب ومن صلبي...كمل كيدوي تحت سنانو ولي فكر يقرب ليه ولا ليها حسابو معايا انا شخصيا ننهيه من دنيا لمصحتكم حنا هنا اما تهديدكم الخاوي ميدوزش عليا اولا شنو ا اوري سرر ...نكقها زيدان باستفزاز وتكى على الكرسي كيلعب بشي حاجة فيديه لي تارت انتباه اوري وخلاتو يخرج عينيه مصدوم ويعرف الشخص لي قدامو مساهلش كان زيدان متكي على الكرسي وكيدوي بثقة فنفس ل ستفزات عائلة جيمس ، كان هاز فيديه قلادة كتحمل رمز يهودي ستراوس خلات اوري يخرج عينيه بصدمة ويتحرك مفافي من فوق الكرسي عرف الشخص لي قدامو مساهلش وحجرتو ثقيلة ،طفى سيگار وتقاد في الجلسة بغات تدوي ختو وهو ينهض فيها وغوت مجري عليها من تماا ~. سبقيني لطوموبيل !! وقفت بنثرة معاجبها حال دفعات لكرسي طيحاتو وخرجات كتسوط اما هو شابك يدو تحت نظرات زيدان الساخرة ومريام المتفحصة اوري ~ موسيو زيدان ممكن نتكلمو بوحدناا !! زيدان شاف في مريام وقال محافظ على نفس النظرة والملامح ~. يمكن ليك تدوي قدامها بحالي بحالها جاك فهم راسو وناض ~ انا على برا غندوي في تليفون حرك ليك زيدان راسو بالايجاب ستاذن منهم ومشى وبقى شي كيشوف فشي ، مريام قلبها كيضرب وكطلب فخاطرها دوز الامور هي هاديك ،زيدان مبرد وعرف راسو لوا ليه يدو اما اوري اليهودي لي كان عند بالو متحكم في زمام الامور وكيشكل خطر ولا هو لي حاس بيه وكيتبادر لذهن ديالو مية سؤال وسؤاال منهم.. شنو عرف عليا ومنين جاوه المعلومات #فلاش_باك جالس في البيرو كيشرب في قهوتو ويشوف في الاوراق لي قدامو تا سمع صوت دقان في الباب ،هز راسو يشوف شكون لقاه فراس فراس ~ مساء الخير سي زيدان نتمنى منكونش قاطعتك زيدان جمع الوراق لي قدامو واشار ليه ~كنتسناك غير نتا دخل ... اومئ ليه براسو و تم داخل بشموخ وافتخار بنفسوو كيمشي هاز مناخرو لفوق عاجبو راسو... جر الكرسي لي قدامو وجلس قبل ميتكلم سبقو زيدان لي دخل فالموضوع نيشان ~ ... بغيتك تخدمي ليا دوك تحرميات لي كتعرف وتجيب ليا شي معلومات قوس عينيه ورسم ملامح الجدية على وجهو ~ علامن هاد المعلومات تكى زيدان ظهرو على الكرسي وقال ~ اوري سر ،اخو جيمس بغيت لقى عليه شي حاجة لي نوعتو منها ، كان قاليا جيمس خدمتو ماشي فسليم وبغيت نعرفها بالضبط ومنلقاش من غيرك نتا لي غتجبد ليا هاد الخزز حل لمجر وجبد منو جوا فيه لفلوس مدهم ليه ...هادي نص حلاوتك وملي تجيب لي بغيت عندي ليك فحالها وملي كيحضرو لفلوس لمستحيل كيولي يبان ليك سهل منو مكان...فراس من نوع لي عزيز عليه الحبة ،غير كمدهم ليه وراق ودماغو يخدمو معاك ،خشى جوا في جيب لافيست ونطق ~ كون هاني عطيني يومين نعرف ليك شادة والفادة عليه زيدان ~ مغنفوتش ليك يومين ومتنساش توجد ليا معاك وراق على ود الشركة الوهمية بلش نوريهم لمريام ونقنعها نسافرو جمع فراس الوقفة ~ كلشي غيكون عندك في الوقت تهلى نمشي نبدا الخدمة قبل من الوقت لي تافقو عليه جاا فراس لشركة الضحكة فالتة ليه وسنانو سابقينو دخل عند زيدان لي كان غارق في خدمتو كيف ديما وغير شافو وسمع شنو جاب ليه تقادات ليه الگانة فراس ~اروي معروف بالبراكاج و السرقة و السطو و القتل العمد مع سابق الاصرار و الترصد لقب ديالو الستراوس ... وكتكون عندو دائما قلادة عبارة عن رمز يهودي ولي معناه التوضيح "ستراوس " زيدان كان حاط ايديه على ذقنو وكيسمع عليه خلاه حتى سالا وقال ~ مزياان ...مد يديه ... عطيني داك الملف لي جبتي وقوليا فين نقدر لقى القلادة فراس مكانش من العاگزين جبدها من جيبو وقال ~ ها هي كادو مني ليييك و من مقر الخدمة ديالو ... هاد المعلومة كانت مصدر قوة لزيدان مشى مسلح بيها شيء لي خلاه طول سفر كيطمن فمريام حيت عارف راسو شنو شاد عليه كسر زيدان الصمت وقال ~ كنظن الأمور واضحة ليك وفهمتيني مزياان اموسيو سر اولا ؟؟ ماشي من نوع لي كيعلن هزيمتو بسهولة ولكن فهاد الحالة معندو ميدير حيت معلومات بحال هادي تا حد معارفها برا العائلة كيفاش وصلات ليد زيدان دماغو تشوش وحس براسو الخطر كيضور حداه ،هز راسو من لفوق لتحت وقال بصوت بالكاد مسموع ~ اكيد فهمتك ،كنا فاهمين موضوع من اللول غلط عند بالنا ارون ولد خويا ودمنا واحد داكشي علاش ضغطنا على مدان مريام باش نربيوه حناا زيدان قاطعو ~ اعتقادكم طلع خاطئ ، شد في يد مريام وشابك صباعهم بزوج .مريام كانت غتكون مرتي وقبل متجي هنا وتعرف على جيمس وقع بينا خلاف ونسبات ولدي لواحد اخور ...والوراق لي قدامك خير دليل ودابا من بعد ما الامور توضحات ..بحدة كمل ...اسلوب المافيا وكل مرة جاي واحد فشكل معرض ليها ولا فيديو يوصلها بغيتو يحبس هناا ...كمل كلامو وغمزو اروي فهم المغزى ~ سوء تفاهم وتحل و مبقاش مشكيل لكن فلوس لي كتب خويا لولدك ... _مريام كانت غير كضور عينيها فيهم وكتصنط غير سمعاتو اش قال وهي تجاوب ~ انا مستعدة نرجعهم ليكم ،ولدي ممحتاج تا ريال ماشي ديالو النصيب لي كتب ليه جيمس غنتنازل ليكم عليه بصفتي المسؤولة عليه قول لجاك يقاد لوراق ويصيفطهم ليا نوقع عليهمونساليو هادشي فمرة مد يدو ليها بغى يسلم عليها وهو يخطفها من عندو زيدان سلم عليه مزير عليه ...حرك ليه فراسو وقال بقلة حيلة ~ تشرفت بيك موسيو زيدان زيدان بطنز ~ وانا اكثر اروي ~ مدام مريام كنعتاذرو الا برزطنا راحتك دوات بعينيها وطمرت ممتيقاش بلي كابوس حياتها قرب يسالي وقف خاشي يدو في جيابو وعاد بانت بنيتو العالية والعريضة ،بقى زيدان بلاصتو معاها كيشوفو فيه بابتسامة صفرة مغادر من القهوة ساخط ،داز على جاك لي غير شافو قاصدو مخنزر صفار وكرم فبلاصتو ~تسنى مكالمة ديالي قالها وركب طوموبيل فين كتسناه ختو كانت على اعصابها وغير شافت ملامح وجهو عرفات القضية ماهياش بغات تدوي هز يدو موقفها ~ الموضوع غيسالي هنا ، وغتنساوها الولد لي كان هامنا ماشي ولدنا وفلوس لي خدا غيرجعو لينا سدي الموضووع خبط على كتف الشيفور باش يتحرك وشاف قدازو قاضب حواجبو فدار الخليفي واقفة مو و مرت خووه لابسين و واجدين باش يمشيو لعند نصر الدين المصحة يشوفوه و يطمأنو عليه داو معاهم حتى بنتو حيت شحاال مشافتو ... نصر الدين حالتو ولات مستقرة بعض الشيء بدا حصص العلاج من الادمان ولكن جسمو للأسف ميتجاوبش مع طريطمو مكاينش تحسن من نهار دخل غير حال عينيه ميتكلم مكيهضر عايش بدوا ومهدنات هما راس مالو ..وصلو لكلينيك دنيا عااامرة كيبان ليك ناس في قاعة الانتظار جايين يتعالجو من الإدمان كل واحد و نوع البلية لي جاي يتهنا منها ولكن حالتهم تشفي لعدا دازو من حداهم متمين ليهم الشفاء و طلعو يشوفو نصر و هما على أمل يلقاوه بخير... طلعو لعندو و صادفو فطريقو طبيب المشرف على حالتو و وقفاتو هناء تسولو قبل ما يدخلو يشوفوه و حداها حماتها كتسمع هناء ...... دكتور قولي عفاك كيف بقا نصر الدين ؟؟؟ دكتور كان هاز دوسيي ديالو ~. حالتو بين وبين مكيناش شي أزمة كتجيه من نهار دخل و هادشي كيبشر بالخير خاص غير الوقت والرغبة هناء تنهدات و شكراتو ~ شكرا دكتور غندخلو نشوفو و نطمأنو عليه طبيب تمنى ليه شفاء و مشا المكتب ديالو هناء حلات لباب بشوية و دخلو عندو لقاوه محسنين ليه لحيتو و ناقصين ليه شعر ولكن باقي تحت عينيه كحل و حناكو داخلين تشوفو يبقا فيه كان كيتفرج في التلفازة و بمعنى أصح غير حال فيها عينيه و خلاص نتابه لوجودهم و عقد فيهم حواجبو آية طلقات من مها و مشات تجري عنقاتو بقا مسمر و مستغرب حيد يدين لبنت بشوية و هضر .... نصر الدين كيشمر نيفو و يحك فراسو ~....... اشك كديرو هنا ؟؟؟ شكون نتوما!!! محيلتهم للبلية ولا لذاكرة لي محاتهم ،هناء متصورااتش نهائيا حالتو تكون واصلة لهاد الدرجة عقداتها فقلبها و بتاسمات على وجه مو و بنتو و قلباتها ضحك ... انا مراتك و هادي الحاجة ماماك صافي نسيتينا نصر الدين زاد استغرب كيفاش يكونو هادو عائلتو و معاقلش عليهم ناض وقف كيشوف فيهم و يحقق ملقاش ليهم صورة فذاكرتو .. مينة تحرق قلبها على ولدها و تحصرات على حالتو مقدراتش تحبس دمعتها لي نزلات كتبين على ان القلب مقدرش يتحمل قربات منو و دموعها سايلين ~ ووولدي انا ميمتك نسيتيني ... واقف بلا رد فعل غير كيشوف كدوز يديها على وجهو عالله يتفكر لمستها ووولدي انا ميمتك نسيتيني نصر واقف بلا رد فعل غير كيشوف كدوز يديها على وجهو عالله يتفكر لمساتها وصغرو لي دوزو بين يديها ..ولكن لعقل تمسح بقا غير كيشوف فيهم حالتو ولات مضطربة خرجهم عليه صدعوه فراسو مينة خرجات و جلسات على الكرسي تكمل بكاها على خاطرها حداها مرت ولدها و حفيدتها مخلينها تبكي على حالها و حال ولدها لي كتشوفو كيضيع قدام عينيها و مقادرا دير ليه والو كتشوف كيف كان طولة و جهد وكيف ولا ،كيف كان يخرج بلبسةة وغير يدخل يلبس وحدة اخرا ،لبس كيف داير وروايح على الاشكال و الانواع وكتشوفو دابا كيف ولا مطوي على جوج و حوايج سبيطار هما ل لابسينو ولكن نصر الدين دارها لراسو مدارها ليه حد تبع زهو ولالة و مالي و تقرقيب سطالي حتى خرجو عليه و رضوه فهاد الحالة كان الشيطان راكب ليه على راسو حتى قرب يصيفطو لقبر لولا ربي جا من جهتو ... صعييييب تشوفي واحد كان مدوز جهد و زين و العز و فلخر يولي تصوط عليه يطيح و حتى الهضرة تقالت عندو يمكن هدا درس غيتعلم منو بزااااف واولهم لفلوس لي كان داير عليهم قيااامة مع خوه فلخر منفعووه فوالو ....تموت وتعرف ولدها اش وقع معاه وشنو جرا ليه اش سبتبو تا تلاح هاد اللوحة تا مبقيتي تعرفيه بالحق شكون يجاوبها الا كان برلسو معاقل تا على سميتو فدماغو منقوش غا لگارو وماء لحياة لي خرجات على اجيال واجيال وقفتها هناء كتصبر فيها واخا هي خاص من يصبرها وخرجو على براا يرجعو لدار وباينة طريق سبيطار طويل غتولفهم ويولفوهاا ~~~~ قلبها كان كيضرب وهاد المرة بالفرحة كتحل عينها وتسدها وكتقول واش بصح تهنيت ولا غا ناعسة وكنتخايل ،حسات بجبل كان على كتافها ونزاحت حسات براسها فرحانة وباغا تنقز من بلاصتها ، حسات براسها وصلات لشي حاجة عيات عليها ودمرات ،تولدات من جديد ولا تفوقات لهاد الدرجة كان منغصين حياتها وسارقين سعادتها ،شافت زيدان وقف حداها كيسد في مونطوه وهي تشوفيه بنظرة كلها امتنان وتفكرات وعد لي قطع ليه نهار قال كيف طيحتك في هاد الحفرة غنخرجك منها ،فديك اللحظة نسااات كلشي ونسات شكون قدامها محسات براسها حتى وقفات مقابلة معاه وعنقاتو خلاتو مشوووكيي كانت لحظة عفوية منها الفرحة خلاتها تلاح عليه تعنقو متناسية كلشي راسها وفين هيا وشكون قدامها ،محسات براسها تا دورات ايدها على ظهرو وتخشات فيه كتشكرو...هو مكانش هنا ايديه جمدو على الحركة بقى مفيكسيهم ومزير عليهم وعينيه كيشوفو نيشان ومزير على فمو معارفاش شنو دارت فيه بهاد العناق ...شوكاتو وفكراتو فمريام تاع شحال هادي لي توحش، لي كانت تجي تخشى فيه وتراما عليه سوا باكية ولا ضاكحة رجعاتو لايام تعارفهم وفيقات فيه احاسيس مباغيش يعتارف بيهم مجا فين يستوعب راسو ويحط ايديه على ظهرها وهي تحس براسها وبعدات عليه مكرهاتش تخشي راسها في الارض...بدات تلوم في نفسها شنو دارت وعلاش متحكمتش في نفسها تلفت مبقات عارفة تزيد ولا ترجع تجلس بدات تلعب في شعرها وغيرات الموضوع ~ حم شفت خو جيمس فلحظة تغيرو تصرفات ديالو مفهمت والو واش كيعرفك ولا بيناتكم شي حاجة فايت دويتو قبل ؟؟ زيدان كيقاد في الكول تاع المونطو ~ متشغليش نتي بالك بهادشي الاهم هو عمرو مزال يطوف بيك مريام تنهدات هادشي لي كتمنى ~ ان شاء الله عطاها طريق تمشى قدامو ،هبطو ولقاو جاك على برا فمو ناشف سلمات عليه وقالت ~ وجد ليا لوراق بغيت نتنازل على فلوس ديال ارون نعطيهم ليهم باش متبقى تربطني بيهم حتى حاجة جاك ~ لي بغيتي غيكون امدام زيدان مد ليه ايدو سلم عليه برجولية ~ نبقاو على تواصل جاك بابتسامة ~ كان ليا الشرف بلقاء ديالك اموسيو زيدان ابتسامة جانية وحرك ليه راسو ومشى لطوموبيل ووراه مريام غادا قلبها كيضرب وتولول على شنو دارت ،خافت تضرب صبر ومعاناة عامين في زيرو وتبدا تاني من لول ،ركبات حداه و انفاسها تخربقو ليها عقلها خدام و عشرلاف فكرة كضرب فيه معرفت كيفاش فهم رد الفعل لي صدر منها بلا ما تفكر واش صافي نسات مدوز عليها و قلبها حن ليه و مكدبوش لي قالو ما الحب الا للحبيب الاول أحاسيسها تخربقو عليها واش تعاملو خلا مريام لقديمة ترجع فلحظة و تنسا لي فات ساست راسها وهادشي لي مغيكونش ليه ، تقدر تكون تسرعات وعنقاتو ولكن في الداخل ديالها تصرفات عادي اي واحد اخور كان بلاصتو تقدر دير ليه هاكدا ماشي بشرط زيدان ،طول طريق وهي ملفتة وجهها عليه مبغاش تشوف فيه و هو مقلش عليها في التفكير حس بمشاعر رجعات حيات و كان كيكدبها هادي شحاال بلا ما يحس بدا يلوم فنفسو من جديد هو سباب فلي جرا و لي كيجرا لحد ساعة ...زيدان مكرهش يطوي صفحة الماضي و يصلح لي فات قلبو حن و ندم و معتارف بغلطو لي مكاانش ساهل بغرورو و انتقامو حطم انسانة مليها ذنب و لكن هاهو ليوم مخلي عائلتو و خدمتو و دنيا وراه و جاي باش يكون واقف فوجه اي واحد يحاول يمس شعرة منها ..كان مخرج مرفقو من شرجم وحاط ايدو على ذقنو كيخمم طريقو ليها مزال طويلة وعاد قطع منها شوية وباقي بزاف وعارف ماشي يساهل غيكسب ثقتها من جديد حيت كون شي وحدة اخرة تقدر متجلسش حداه هاد الجلسة ،كسر الصمت وقال ~ تبغي تشووفي لمدينة شوية ؟؟ بلا متشوف فيه قالت ~ جيت ليها من قبل انا وجيمس وزيدون توحشت ولدي عمري تفرقت عليه هاد المدة كاملة ،الا مبقى عندنا منقضيو هنا نرجعو لمغرب حرك ليه راسو بالايجاب بلاما يتكلم و رجعو الاوطيل ،غير دخلو مع الباب دخلات لبيتها وطرقات كانت كتحيد حوايجها بنفس ضيقة باغا تنسى اش دارت هزات تلفون هضرات مع مها و سمعاات صوت ولدها وهي مرتااحة صاافي واخيرا رتاحت من كابوس كان يهدد حياتها و حياة ولدها قطعات معاهم و ناضت جبدات حوايجها و دخلات دوش كيف هبط لما عليها غمضات عينيها كتبان ليها صورة زيدان لي كان شهم معاها و مخلاهاش معرفاتش فين تصنف تصرفو معاها واش رجولة منو ولا تكفير عن ذنب ...اما زيدان دخل لغرفتو محاملش راسو كيشوف سيرة جيمس باقا كتجبد واخا ميت، ناس يغيرو من الحيين وهو يغير من الميتين الله يستر كلمة جوج تجبد ليه سيرتو تشعلو وترجع اللور الهضرة كان واقف شرجم متكي عليه بجنبو و لكارو شادو بين صباعو يجبد و يعطي لصدرو كارو تابع خوه حتى قرب يكمل البكية كيشوف بلي أجمل أوقاتها كانو مع جيمس ماشي هو و هادشي لي كيزيد يحرقو كتر من دخان لي كيدخل لريتو واقفة بطموبيلتها قدام لبحر، لبلاصة الوحيدة لي اي واحد كيهرب ليها سوا فرحان و لا كاعي.. عرفت راسها خاصها تاخد قرار وماشي اي قرار ، اي واحد فيهم غتختار مغيخليهاش فرحانة... بكات بحرقة رافعة راسها و يديها لله سبحانه يوقف معاها ... بقات تمااا ما يقارب لساعة ونص شافت في تليفونهاا لقات الساعة السبعة رجعت ركبت في طموبيلتهااا و شدت طريق محبوب قلبهااا وسباب عذابها ، غير وقفات قدام الدار قدات وجها في المراية و مسحت دموعهااا لي نزلو فور ما طلعت تنهيدة قدات شوية المكياج في وجها باش تبان عادية و هزت صاكها و خرجات ... وصلت الباب حلاتو ورسمات على وجها ابتسامة خافية بيها جرحها و الامهااا ... كيف خطات الخطوة الاولى سمعات الضحك و الهضرة جاية من الصالون داتها رجليها حتى ليه ... حتى كتفاجئ بمراد جالس و مقابلة معاه أميمة و قدامهم بيتزا و كوكا و عاطيينها غير الضحك سيد هاني و مرتاح صوت ضحكتو واصلة حتى حتال برا ،كيف غيكون معجبهاش الحال ومرضاتش ،شنو غيقولو جيران واشمن صفة غيعطيوها وحدة مرتو وتانية خليلتو .... هرموناتها لعبو عليييها و لي زاد فيض ليها الكاس فاش ضرب مراد على ركبت اميمة بضحك مراضش لبال لنادية لي قربات تاكل راسها .. هزات صاكها و خبطاتو مع الحيط و تمت غادا للبيت ... اما هو معرف باش تبلى شاف في اميمة لي غمضات عينيها و قالت ليه ~ سير عندها أكيد تقلقات ... تبعها اما اميمة هزات صاكها و فضلات تخلي جوج مزوجين يفكو مشكلتهم راسهم ...دخل عليها لقاها غادة جاية فيه و ووجها حمر و غيطرطق اما هو معجبوش لحال وكيفاش تعاملات مع ضيفتو وهانتها قدامو مراد وقف قدامها مطلع فيها حواجبو ~... الشريفة ياك لباس اش هاد التصرفات ديال البراهش كديري نادية خرجت عينيها ~ ياك اسيدي تصرفات براهش ، كيفاش بغيتيني نتصرف وانا كنشوف راجلي حال فموو بالضحك مع وحدة اخرى بقلب دارنا مراد معصب ~موضوع اميمة هضرنا فيه راه ختي هاظيك فهميها شوية نادية بلاما تشعر ~وتا انا غنقوليك يا اميمة اختك ولا انا وحدة فينا غتكون في حياتك ... " قالت كلامها ليه وخلاتو غير حال فمو صدماتو معرف ميقوليها... اما هي كانت غير جيب يا فم وقووول كترث المشاكل و هرمونات الحمل لعبو عليها ،و بغات غير فيمن تشد و تبرد العافية لي فيهااا كيف هي ختارتو على مها تا هو حطات في اختيار بينها وبين اميمة هز دجاكيط ديالو وقال بقلة نفس ،كاره راسو وزواج بلي فيه ~ نتي ماشي هي نادية لي طنت كنعرف شحال هادي ولي خلاتني نبغي وليتي مقابلة غا غوات كنعيشو نهار مزيان وسيمانة لا ،راجعي راسك وراجعي تصرفاتك هادشي مبقاش مسلكني لاح ليها الهضرة وخرج خلاها مخرجة عينيهاا فيه وفي طريق لي داتو ...ضحكات باستهزاء وقالت مع راسها ~ متستاهلش لي كندير عليك حبها ليه اناني بغاتو ليها راسها وتا وحظة متشاركها فيه واخا تكون جامعاهم غا صديقة ،هادي هي نادية كتغير على اقل حاجة وكتضخم الامور على والو جالسين على طبلة لعشا راس فراس غير صوت لفراشط ولكيسان لي كيتسمع ، مهربة وجهها عليه وهو ملايحش راسو عليها مرة مرة يقول شي كلمة تجاوبو على قدها وتطمر ،معقلتش كيفاش حتى سالات عشاها لي معقلتش عليه صيفطاتو بلا مديغ ،جمعت الوقفة وقالت ~ تصبح على خير عيانة انا غنطلع !! مجاوبهاش خلاها على خاطرها كمل عشاه وناض نزل لنايت كلوب ديال اوطيل ،جلس كيف ديما معزول بوحدو عاصر على كاس شامبانيا ثقيل مرة فشحال يجغم جغمة ويرجع يتكى على الفوطوي ويتنغم بشنو طالقين ،ها لي تغمزو من هنا ها لي تجي تلوي فخصرها قدامو وهو عقلو فبلاصة اخرا وخاطيه هادشي ، لبلاصة والاجواء فكروه في الايام لولة لي كانو ليه مع مريام فكروه فصاحبو مراد فكروه في اوقات زوينة ضيعهم من بين يديه ، هز يدو يشوف شحال ساعة لقى لحال فات وشمس قربت تبان ...طلع لسويت حل ودخل كان شوية ضلام وبزاف سكات،حتى كيجي لمسامع ديالو صوت خارج من بيتها.... طلعت لسويت باغا غير تحط راسها و تسالي خلاص هاد نهار لي كان طوييييل و و كتمنى من الله عمرها تشوف فحالو ... دوشات و خرجات جارة رجليها لابسة بيجامة في الباج و هازة فوطة صغيرة كتنشف فشعرها جلسات قدام لمرايا ذهنات وجهها بكريم ليلي و بدات تمشط شعرها من بعد ما ذهناتو بسيروم كتمشط و كتفكر فزيدان كيف كانت كتموت فحبو و الا طلب روحها تعطيه بلا ما تفكر و كيف كانت نظرتو تخلي دقات قلبها تزيد ... و دابا مبقاش كيهز فيها شعرة واش الكره و لا ليام لي نساتها فيه .. خلات شعرها مطلوق و ناضت طفات ضو و قصدات سريرها تنعس غير حطات راسها على المخدة نعساات من لعياا لي شافت ليوم...ساعات دازو و هي غارقة فنومها و العرق كيبري فجبهتها انينها المسموع و حركاتها كيبينو بلي ممرتاحاش فنعاسها وكيراودها حلم نغص عليها راحتها...شافت راسها داخل المسجد بلباس محتشم وصبنية على راسها ووجه خالي من ماكياج تقامت صلاة والصف لي وقفات فيه باش تصلي مع الجماعة كيهربو منها و يمشيو للصف آخر و غير تبعهم يرجعو يبعدو عليها واقفة و مفهماتش تصرفاتهم و ملي تبغي تمشي تسول اي أخت من الاخوات المتواجدات في المسجد علاش كيبعدو كيشوفو فيها و ميجاوبوش و في الاخير صلات بوحدها و فكل سجدة تبكي و تضرع لله سبحانه و تعالى فاقت من كابوسها على يد زيدان لي دار شرع ايدو ودخل كيف سمعها كتنين و تبكي دخل بلا ما يستأذن حلات عينيها و نفس مقطوعة فيها مفهماتش اش واقع زيدان كيسول و هي مزااال مرفوعة حتى كرر سؤالو شحال من مرة عاد نتبهات ليه واقف و عاقد غوابشو .. زيدان ....~ مرياام واش شي حلمة خايبة ؟؟!! مريام ريقها ناشف ~ ...... اا اه يمكن !! زيدان ~ قولي لي اش كاين ؟؟ شنو شفتي مريام ~~م ماشي شي حاجة غير سير تنعس شاف حتى عيا و خلاها على راحتها و مشا ينعس اما مريام طار عليها نعاس و قلبها تزير بسبب الحلمة لي شافت فنامها مشات لحمام رشات على وجهها لما و طلعات راسها شافت فلمرايا لقاتو صفر و عينيها حمرين و غير ترمش كتبان ليها شي لقطة من الكابوس لي شافت رجعات لبلاصتها و هزات تلفون كتقلب على شي تفسير يخليها ترتااح بقات تقلب تقلب و حتى حاجة مقنعاتها ..دازت لفيسبوك كتصادف صفحة الشيخ *** دخلات ليها و صيفطات ليه رسالة في الخاص تحكيليه على هاد الحلم لي ولا كيراودها مؤخرا خلات ليه مساج وطفات تليفون بحكم مكانش داخل .. بقات كتستغفر وناضت بقلب كيضرب دخلت توضات وخرجات تصلي ،ولاول مرة كتصلي من قلبها ..مريام بحالها بحال بزاف بنات مرة تصلي مرة تقطع مرة لا مرة تنطح الارض وتنوض ولكن دابا لا سجدات وتخشعات وتضرعات ودعات ربي يوقف معاها واعدات راسها بلي غتولي تصلي حيت هي الوسيلة باش تقرب من الله ويكون معاها نادية بقات كتمشي و تجي فداك البيت تغدد بغات تااكل جنابها من تصرفو لي فكل مرة تجي تلقا أميمة واااخدة راحتها معاه فدارها وهي مكينااش تقول ملكها... هاد المرة الهرمونات و الوحم لعبو عليها و نفاجرات فوجهم بجوج و مرعااتش لحتى واحد فيهم كانت مولفة تميك و متهضرش... شافتو مداير ليها حسااب وقيمة و هاهو دابا تبعها و خلاها بوحدها بلا ما يشوف مالها ولا يحاول ياخد بخاطرها المفرووض يحزر مراتو و حبيبتو ولكن هو خلاها و مشا تبع أميمة...وكمل بكلامو نادية تاع شحال هادي ماشي هي تاع دابا ... تشوكاات متوقعااتش هاكا يكون رد فعلو وجوابو واش هادا هو مراد لي وقفات فوجه مها كدافع عليه و تقلب على العذر و تشكر فيه و تزينو فعينها و متبقاش هازة من جيهتو هدا لي قبلات تاخد سخط على ودو .. كانت باغا تفرط فلي ولداتها و كبراتها و سهرت على راحتها على قبل واحد عرفاتو لبارح و بغااتو و جا ليوم ضرب كاع لي كان بيناتهم و دوزووه فزيرو ... خرجاات من دار و خبطات لباب حتى تزعزعو لحيوط مشات واخدة فكرة بلي كاااع رجاال فحال فحال... ركبات طموبيلتها معرفت فين تمشي ولا تجي حساات بدنيا ضاارت تفكرات حياتها كيف كاانت ناجحة ...و طامحة تكبر خدمتها و تزيييد لقدام و هاهي دابا كتشووف كاااع داكشي لي بناتو كيريب قدام عينيها شوية بشوية ... ولا همها و حياتها كتمحور على شخص سميتو مراد . نااري مراد متاصلش ؟؟؟ ويلي مراد غيتقلق ؟؟ معامن كيدوي ؟؟ فين كيمشي ؟؟ جاها لحنين لناديا لقديمة لي كتافات من الحب ومايجي منو وسداات على قلبها وكرسات حياتها لخدمتها وتجلس مع مها ،كانت ساعة كحلة نهار تعرفات عليه وخانها قلبها ودق ليه اش لطبينها وبين شي بغو شنو فيها الا بقات تاع راسها تخرج فين حلا ليها وتشري راحتها وسعادتها كانت الا بغات دير الحاجة مكتفكرش زوج مرات كتلبس لي بغات ودير لي جا على بالها ودابا كضرب ليه لحساب غطي صدرك نقصي لعكر مدويش مع هادا متضحكيش لهادا وهو داير ما بغى ومدوزها ضحك وزهو بحجة هادي ختي لا بنت عمتي.. بقات شانطي يخرجها في درب في حي معارفة فين غادا وفين صادة تا تلفت وبراكات على ليمن شدت الارض خانوها دموعها وبدات تبكي فين غتمشي ؟؟ تعفط على كرامتها وترجع لعندو وهو مدارش ليها اعتبار ولا لعند ماماها ل فضلتها على الحب شافت تاهيا وديمارات لعند عايشة ميمتها غتمضغها ومتسرطهاش تحل عليها لباب وتدخل وشنو مبغات دير دير اللهم هي ولا لبراني واقفة قدام باب دار مترددة تحل ولا دق ...تدخل ولا تمشي تقلب فين تبات...دوزات ايديها على وجها لي كان غيطرطق بسخونية ،حاسة بأسفل عنقها مشدود ليها بالاعصاب وبراسها غيتفرگع ، شافت حتى عيات ودخلات اللهم قطران مها ولا واحد اخور دورات الساروت ودخلات كتقلب براسها عليها فين جالسة ،كانت فبلاصتها كيف ديما كتفرج ولكن وجهاا كاسيه الحزن حسات بنادية دخلات ومبيناتش قالت بينها وبين راسها راجعة تجمع حوايجها ولا نسات شي كلمات جايا تقولهم ولا تاا جايا تبات كتبقى هادي دارها ومعند عايشة حق فيها داكشي علاش طفات تلفازة وناضت كتلبس في صندالتها باس طلع لبيتها ،كانت نادية واقفة قريبة ليها مقاداش تدوي ولا تقول ليها كلمة ماشي جهدها مسالي وانما ملاقية متقول كيف لمحت عايشة غتعطيها بظهر وتزيد وتخليها وهي تبعها كتجري عنقاتها من ظهرها وبدات تبكي وتشهق وتخرج لي فقلبها ~منقدرش على فراقك اماما ،يمشي راجل يجي عشرة ولكن الا خطيتيني نتي مكاين لي يعوضك هء هء عمري خرجت عن طوعك ولا كنت باغا نخالف كلامك كنت قبل منبغي ندير اي خاجة كنفكر فيك نتي لولة واش غتعجبك ولا لا... بصح انا بغيت مراد وكنتعذب وانا بعيدة عليه ومن نهار تفارقنا مبقات حالية ليا تا حاجة من غيرو ولكن هاكدا غتكون حالتي وكثر الا ختاريتو وفضلتو عليك نقدر نموت فيها انا ممولفاش نبعد عليك ونقطع هضرتك ولا نتخاصم معاك هء هء سمحي ليا اماما ولي بغيتيها هي لي غتكون كانت كتدوي ومزيرة على عايشة بيديها بزوج معنقاها من لور وحاطا راسها على ظهرها وكتبكي ...لي دارو مراد ليوم وكيفاش تصرف بنسبة ليها كانت علامة وراتها طريق صحيح والغلط لي كانت غدير ..خلاتها عايشة على خاطرها تبكي وتفش قلبها حتى حسات بيها سكتات وعاد دارت لعندها ودوزات ايد حنينة على راسها وشعرها ومسحات دموعها قبل متاخدها في حضنهاا كيف كانت كدير ليها ملي كانت صغيرة الا بكات ،ومكاين ما حسن من حضن الام يغنيك عن الدنيا ومافيها ،الام هي لوحيدة لي تعطيك ومتسناش المقابل ،تفضل راسها عليك تاكلي نتي وتبقى هي بلاش الا كانت سعادة غا عندها متكرهش تعطيها ليك تبدل دموعك ضحكة ومرضك صحة ما اروع الام وما اعظهاا ..تعنيقة عايشة لنادية كانت برد وسلام على قلبها وطمأنينة وسعادة ، قبلت عائشة جبين بنتها وتمات غادة لكوزينة مخبية دموعها مبغاش تبينهم ~ حم وجهك صفر ابنتي انا نحط ليك تاكلي وطلعي رتاحي حركات ليها راسها بالايجاب ومشات جلسات فطبلة دالماكلة حاضياها كيف كتحرك وكتقاد ودموع صامتين نازلين من عينيها ...تسربات قدامها الماكلة كلات ومحشماتش حاسة براسها فيها جوع وقلبها سخف وانفوا كملات طلعات هي وعايشة معانقين وقبل مدخل نادية لبيتها باست ايدين مها وقالت ~ سمحي ليا اما ورضاي عليا وبقاي دعي معايا عائشة بابتسامة رضى ~ الله يرضي عليك ابنتي ويهني قلبك ويريحو تنهدات بصوت مسموع وقالت ~ اميييييين مريام حسات براسها نعست مرتاحة من بعد ما صلات ... صبح صباح كتحل عينيها و ترجع تسدهم مبرزطة من ضو شمس لي داخل من لبالكون ...فاقت كتفوه و تجبد فيديها كطرد لعكز ليوم رحلتها هي وزيدان واخيرا راجعة لمغرب لعند ولدها لي توحشاتو وميمتها لي فتاقدات.. حيدات عليها لغطا و ناضت مشات لحمام قضات حاجتها و غسلات وجهها و هزات مقبط جمعت شعرها و خرجاات تبدل وجدات اش غتلبس و قادات لي بقا فباليزتها باش متنسا حتى حاجة .. لبسات دجين زرق و تريكو خفيف فلبيض و مونطو كحل كلااس كتافت بمكياج خفيف و جمعت شعرها ذيل الحصان رشات ريحتها توجهت لكوافوز هزات تلفونها تشوف ساعة و انتابهت بلي الشيخ جاوب على رسالتها لي صيفطات ليه لبارح حلات رسالة و بدات تقرا و مركزة مع كل حرف كتب السلام عليكم و رحمة الله ابنتي فوضوح الجواب على هذا السؤال، أنك قمت بعمل مخالف للدين الإسلامي و ابتعاد الاخوات عنك في المسجد يكون بغرض تصحيح الخطأ لأنهم لم يقومو بطردك من بيت الله .. راجعي نفسك قبل فوات الآن فهذه رسالة من الله عز وجل للرجوع عن كل ما هو منافي للشريعة الإسلامية و الله أعلم .. مريام قرات الجواب و قلبها تقبض عليها بدات كضور فعينيها و ترعد فحوايجها كانت شهيتها مفتوحة و دابا تسداات ليها غرغرو عينيها و هزات راسها لسما كدعي و طلب الله يوقف معاها ....دقاان في الباب و هي مرفوووعة مسمعاتش دخل زيدان غوت باسمها حتى قفزت من بلاصتها و شدات فقلبها زيدان كيشوف فيها و معارفش مالها و لا شنو شاغل بالها المشكل لي كان مبرزطها و مقلل راحتها تفكات منو اش غيكون عندها مزال ~غتهبطي تفطري قبل ما نمشيو ؟؟ مريام بارتباك ~اا اه وو واخا غيير نقاد شي حاجة و نهبط "محكرش كيف عادتو رجع سد الباب و مشا.. مرياام قلبها تقبط على صبااح خداات نفس عمييييق هزات صاكها و هبطات راسمة ملامح عادية مخبية بيها حالتها من الداخل ربي سبحانو لي عالم بيه لقاتو هاز جورنال كيقرا فيه و عاصر على قهوة كحلة طلبات فطور و حتى واحد فيهم متكلم تحط قدامها الفطور كتنقب منو وهاد الوقت خدمة الغرف هبطو ليهم حوايجهم حطوهم ليهم فكوفر طاكسي لي غيوصلهم لمطار شربات العصير جاها ساهل يدوز و ناضت متاجهين للطاكسي لي كيتسنا فيهم تا حاجة متعوض لعائلة ودفاها والام والكبدة ،مريام الايام لي دوزات في تسافيرة دازو على قلبها ثقال ...بغات امتى ترجع لبلادها تخشي ولدها في حضنها وتشوف مها تاج راسها... اول محطات رجليها في المطار حسات بالفرحة سرات معاها ..كانت طوموبيل زيدان تماا بغى يوصلها عكسات ولكن بسباب قصوحية راسو قبلات وانفوا وصلات لقدام دارها مبقات عقلات عليه ...مقدتها لا بوسة ولا تعنيقة في ولدها كون كان يتكال كون كلاتو توحشاتو وتاهو شافها وعرفها وعطاها لضحك ،وجهها كان كيبان مرتاح وبالها كان تهنى ومبقات تا حاجة غتنغص عليها فرحتها معاهم بعدما حلات أكبر مشكل رون حياتها و نساها فطعم نعاس ...دازو يومين على مجيتها فاقت صباح ليوم لول ناشطة حدا ولدها كتعنكش فيه بااش يفيق ولكن كماال حداها رتااح و شبع نعااس بقات متكيا جنبو و البال نسبيا مرتاح مبقات هازة هم لا لتهديد ولا لشي حد غيفرع عليها لباب وياخد منها ولدهاا ... سولات على نادية واحوالها بتلفون مباغة تخرج ولا تشوف زنقة دابا بغات غير ترتاح و تعطي وقتها لمها و ولدها لي توحشتهم و راحتها كتكمل غير وهي معاهم وبلا بيهم كتكون ناقصة و شي حاجة خاصها كلشي كان هو هاداك وفصورة زوينة واخيرا قالت الدنيا بدات تضحك ليا وتتقاد وقلب رتاح والبال هنا وهي تصبح نهار تاني مع اذان لفجر على حلم لي بنسبة ليها ولا كابوس مرافقها هاد ليام نفس الحلمة كتعاود في نعاسها . مريام واضبات على صلاتها عرفت راسها راه كانت مقصرة فحق الله سبحان و تعالى و حتى كلام الشيخ و نصيحتو كان ليه تأثير انها تشد طريق المستقيم و عطات وعد لله و لنفسها عمرها تخلي فرضها مهما يكون ... قبل ما تنعس كتوضا و تقرا أذكار النوم ولكن الكوابيس مزال كيخليوها تفيق من عز نومها ... فاقت شادا جهة قلبها لي غيسكت من كثرة ما كيضرب هاد المرة الحلم كااان غيييير حلمت راسها وسط بحر هي و جييمس كان شاد فيديها و كيغرقو بزوج و فلحظة حساتو طلق منها و داه البحر و مبقاش كيبان ليه .. بقات تعاافر مع الموجة و تابعة ضو بيض حتى خرجات سخفانة.. مريام خلعتها الحلمة و قلبها ضرها ديال بصح و دموعها دارو طريق على خدودها و حاطة يديها على فمها كاتمة صوتها خايفة تفيق ولدها ،ناضت توضات وصلات ورجعت تخشات في فراشها جالسة متكية على كادر دناموسية كتقرا فصورة نور وكتعاود حتى حسات براحة ورجعات نعسات مفاقت غير على صوت تليفون كان وصل وقت لي دايرة فيه مع نادية