جالسة متبتة حدا لكبيرة لي كتقطع لكيكة كيف وعداتها...عطاتها طرف مع كاس اتاي وعفراء فرحانة بيها وعاجبها الحال...حلات فمها تعض وهي تجي عنيها مع جعفر لي حاني راسو على لكتوبة كيكتب...رجعات سدات فمها و وقفات مشات عندو ..مدات ليه الكيكة لي فيديها و حطات اتاي فوق طبلة ...
كمش حجبانو وقال
جعفر: هادي ديالك معجباتكش...
عفراء جلسات حداه: لا زوينة ولكن كول نتا الاول ...
جعفر برفض: لا مكتعجبنيش الحلوى غير بصحة...
عفراء ببرائة: بصح مكتعجبكش...
جعفر بتاسم بخفة : اه مكتعجبنيش..."رجع ليها كاس اتاي ولعب ليها فراسها "...كولي..
بين عينيه بدات كتالك بفرحة ضاهرة على ملامحها و كتبنن وهو فقط مبتاسم حس براسو شبعان من شاف ابتسامتها و طريقة اكلها ...
هز يدو ولعب ليها فوق راسها بحنية وهي كتزيد تقرب ليه..كتحس بيه بحال خوها او قريب اكثر بحكم كاع خوتها كبار منها مقرابينش ليها عكس جعفر و زيد كيدافع عليها زاد عزاز عندها كثر ....
جعفر حك راسو بخجل و نطق بصوت هامس...
-عفراء من غادي تكبري شنو بغيتي تكوني....
عفراء خرجات شفاها بدلال: بغيت نمشي لمدينة و نشري حوايج بزاااف بحالي كيلبسو فتلفازة و نبان زوييينة باش تا واحد ما يبقى يقولي منحوسة و يعيطو ليا غير زوينة ....
جعفر بحنية : تا دابا نتي زوينة بزاااف...
عفراء بدلع: تا نتا زوين مكتشبهش لولاد لقبيلة و عينيك جاو زوينين بزاف ماشي بحال عيني انا كحلين و نتا ملونين ....
جعفر حرك راسو بطاعة: لا نتي عينيك حسن من دياولي.."نحنح بشوي "...وشنو بغيتي تولي اخر....
عفراء حطات يديها على حنكها كاتفكر : اممم وبغيت نسكن فالمدينة مانسكنش هنا وتولي عندي دار كبيرة بحال مول جنان ونشري بزااف لعودان نخيل بيهم بحال با و يولي عندي طونوبيلات نبقى نسوقهم بوحدي بحال الافلام ....
جعفر بقى كيرمش وبدون وعي نطق : و انا....
عفراء من نيتها : متخافش انديك معايا نتا وخالتي لكبيرة و انسكنكم معايا ....
جعفر دبلات الابتسامة من ملامحو و حدر راسو لكتابو كيكتب وبان وجهو حمر مزير...ميلات عفراء راسها كتشوف فيه وهو كيهرب راسو عليها...
دورات راسها لعند لكبيرة لي غير ساكتة وكتسمع ليهم ..ورجعات عنيها لجعفر وقالت بشوي....
عفراء:جعفر ما بغيتيش تمشي معايا لمدينة ....
جعفر حادر راسو قال: ما بغيتش نسكن معاك بغيتك نتي تسكني معايا ....
عفراء بدون فهم: ولكن انا بغيت نسكن فالمدينة ....
جعفر هز راسو ليها : وانا لي غادي نديك لمدينة وغادي تعيشي فيها معايا وتبقاي ديما حدابا ....
رغم انها مفهماتش قصد كلامو الا انها حركات راسها بطاعة و ابتسامة مزينة ملامحها وقالت..
عفراء: اه انبقى غير معاك بو شرقات شمس و صبح يوم جديد وكيف عادت لكبيرة كتفيق بكري توجد فطور لولدها ...قبل ما تخرج لأرض فيقات ولدها وقالت غير بشوي....
لكبيرة: جعفر من تمشي لمدرسة فيق معاك عفراء وبيديك وصلها لدارهم عنداك تخليها وحدها دابز مع شي واحد....
فور ما نطقات اسم عفراء جمع الوقفة و نعاس طار ليه...توجهات عينو فالبلاصة لي ناعسة فيها عفراء بسلام...خرج برا توضى و تبع مو وصلها لنص طريق و رجع كيجري خايف تفيق عفراء و متلقى تا واحد....
دخل بدل حوايجو وصلى لفجر و قاد كتوباتو فالمحفضة وكلشي كيديرو بسكات و هدوء ... مشا لطبلة كيفطر بانو ليه جوج طروفا ديال الكيكة وحدة ليه ولأخرى ديال عفراء..تبسم و رجعهم لجيه خلاهم ليها بجوج وفطر بلي قسم الله ومشا جلس حداها بصمت وهي ناعسة ما جايبة لدنيا خبار....
حمات شمس عاد حلات عنيها كتكسل حالة عين و سادة عين وجعفر بإبتسامة ...
-فقتي صباح لخير...
عفراء بصوت مبحوح : فين هي خالتي...
جعفر:مشات لجنان نوضي فطري ونديك لداركم ...
هزها بشوي و وجهة لجهة لما غسل ليها يديها و وجها مزيان ومسحهم بلطف و جرها لجهة طبلة تفطر وهي عاجبها الحال ..ماعمر شي واحد فيقها و دار ليها هادشي كان اول واحد هو جعفر شي لي خلاها تفرح بزااف ..تعاملو و كلامو و شخصيتو كيخليوك تبغيه بدون ماتحس....
عفرأء قنطات من شعرها لي كينزل على وجها وهي دور عند جعفر بطلب...
-جعفر مشط ليا شعري عافك و ضفرو انا مكنعرفش...
بقى كيشوف فيها للحضات عاد حرك راسو..جاب المشطة وزيت لي كدهن بيها مو شعرها..جلس وراها على ركابيه و بكل لطف و حنان دهن ليها شعرها و بدا كيمشطو بشوي خايف يقصحها بينما عينو كيبريو فلون شعرها الأشقر و جمال لمعانو و طولتو المتميزة...
كيحرك يدو بكل اعجاب على شعرها و بدا كيضفرو ليها بمهل حتى سالاه كامل وهو فرحان...شبك يدو مع يديها و سد باب دارهم و رجلو على رجليها وصلها تال عند لطوف بحال الامانة عاد كمل طريقو لمدرسة ....
تمشات قدامهم عاجبها راسها و ضفيرتها ...وبنت خوها لي قدها فالعمر تابعها بعنيها...
مينة: شكون جمع ليك شعرك اعفراء...
عفراء : جمعو ليا جعفر علاش كتسولي...
مينة:تا انا انقول ليه يصاوب ليا بحالك ...
عفراء خرجات عنيها : هو مكيصاوبش لبنات كيصاوب ليا غير انا و زيد نتي شعرك حرش ماشي بحال ديالي مغاديش يعجب جعفر...
مينة تنفخات: هو لي ايحكم نتي ماشي صوقك...
عفراء تجعرات : انننن قلتليك ما يصاوبش ليك هي ما ايصاوبش ليك..جعفر ماعزيزش عليه لبنات غير انا بوحدي لي كيهضر معايا ...
مينة : كداابة يجي و نسولو....
عفراء ضربات رجليها مع الارض: دابا تشوفي والله ما نخليه يقيص ليك شعرك البقرة ...
مينة مشات كتجري عند مها كتبكي وعفراء بقات كتنفس من نيفها باين من وجها سم ...
مجموعين فلكوشينة كينقيو زرع و كيغنيو بشلحة اغنية قديمة و بصوتهم رخيم زادت حلات و زيانت ...وعويشة كتعمر فأتاي و دندن معاهم بينما عفراء متكية على لطوف و كتخليهم تا كينقيو و ترجع تخربق ليهم زرع بالعكس لي فيها ولطوف غير صابرة معاها....
نطقات بشرى مرات علال : عفراء جمعي يديك شوي شهاد لبسالة راني غوت عليك غير حيت درتي فالبنت وهي مادارت ليك والو....
عفراء مخنزرة : انا مكنجبدهاش هي لي ديما لاصقة فيا اي حاجة درتها خاص دير بحالها ..داك نهار طلبت من با يشريلي كسوا ومن شافتني لبساها لصقات خويا يشري ليها بحالي ومن ركبت فالعود تا هي لصقات تركب فيه ومن طاحت كيف البقرة منعني با منعاودش نركب فوقو حيت بنتك منونخة غير حالة فمها وتا بعاني...
بشرى : وراه غير حيت نتي خالتها وعزيزة عليها ...
عفراء:شمن خالتها علاه انا شحال كبر منها بسلامة ياك مفاوتين غير بشهرين ....
كلتوم مرات عبد القادر: يا بنتي بغيت غير نعرف هاد الهضرة فين تعلمتيها و نتي غير بنت البارح انا لي مرا ما كنسير كلام بحالك ....
لطوف ضحكات من نيتها:علاش شكون نهار و مطال وهي تعاير مع عيالات لقبيلة تا تعلمات لكلام و المعيور على حقو و طريقو انا و نوحل قدامها ....
عويشة : اوا هما لي كيجبدوها هي ما كدق على حد ولكن لي دق عليها تعطيه علاش يدور ...
عنقات عفراء ختها كضحك و تبوس ليها حنيكاتها بينما بشرى قالت ...
-فكرتوني .. عرفتو عمي لحسن...
لطوف : اممم داك شارف مالو ....
بشرى: هضرات معيا مي هاد لأيام قالك بغاو يزوجو عويشة ليه ...
هزات عويشة راسها بصدمة وعنيها خارجين بينما بشرى كملات كلامها ...
-وراكم عارفين سيد بخيرو و خميرو غير هو بقى وحداني من ولادو كبرو وماتت مراتو ودابا بغى يتزوج و مي فكرات فعويشة ولا قبلتو ايجيو غدا نيشن يطلبو يديها ....
لطوف تأزمو ملامحها بينما عويشة ولات حمرة و دموع تشكلو فعنيها و نطقات بحزن ....
-ما بغيتش نتزوج براجل كبير عليا ...
كلتوم: متقوليش هادشي اعويشة شوفي كاع بنات لقبيلة لي قدك تزوجو بقيتي غير نتي راه تزيدي هاد لعام مايبقى يجي حد يساومك اختي ....
عويشة بغسة خنقاتها حسات براسها تحگرات و تنقص منها..عضات فمها بجهد كتخبي دموع لي فعينيها بينما لطوف شافت فبنتها بحزن و نطقات بأسى...
-يجي باها و يكون خير ...
جمعات لوقفة مزيرة وصوتها خرج كيترعد حابسة لبكية ...
-انطلع لغابة نجيب لحطب"لعواد" لفران مبقاش فين نطيب لخبز ...
خرجات كتمسح دموعها هزات لحبل و توجهات لغابة ملويا زيف كبير على دراعها و كتمسح دموعها بضهر يديها وكتعض فمها بجهد و تقشرو تاتجرح وهي ما حاسة بيه .
فطريق لكبيرة جاين جوج سيارات سوداء...الاولى جالس فيها هو وحداه باه ولور الحاجة و سيارة تانية كاين ختو وراجلها ....
مخرج يدو من شرجم و كيسوق بيد وحدة داير نضارات شمسية ولابس تجاكيط كوير مع سروال تجين ومركز مع طريق باش ميتلفش على دار لي وراها ليه سي لعربي فالوقت لي دارت الهضرة ...
سايق وهو ساهي تا دازت قدامو حانية راسها لتحت وحناكها كيلمعو بدموع و كتمسحهم و يرجعو ينزلو ...وقف سيارة بسرعة فجنب طريق من شافها دخلات لغابة و فيديها حبل ..
خرج من طونوبيل بزربة وسد لباب وشاف فوالديه من شرجم...
خالد: اندخل لغابة و نرجع مجاتش تا نمشي عند ناس عاد نبقى نسول على الحمام ...
فهمو قصدو حركو ليه راسهم وخلاوه يمشي و بقاو هما كيتعاودو ...شار لختو و نسيبو يتسناو تا يرجع و بزربة تبعها كيطير و قلبو كيضرب فحلقو بجهد...
كيشوف فكل جهات و زاد توغل فالغابة كتر وكيدور فراسو حتى بانت ليه بعيدة ومزال غادة طالعة ....تنهد بجهد و تبعها كيجري ..جرها من يديها وهي صرخات باعلى مافصوتها مخلوعة و وجها ولاصفر ...دغيا بعدات منو كترعد و نطقات تحت انفاسها المرهبة ...
-ششش شكون نن نتا اششش بببغيتي عندي ...
هز يدو بجوج من شاف الخوف فعنيها : متخافيش مغادي ندير ليك والو اعويشة...
بعدات منو كتر متيقاش فيه : فين عرفتي سس سميتي .."هبطات عنيها و طلعاتهم فيه"..نتا ماشي ولد هنا ..شش شنو بغيتي عندي وععع علاش تابعني ...
تنهد بجهد و حط يذو على خسرو مفرق رجليه شاف فيها مزيان عاض فمو من لداخل و نطق بشوي...
-دغيا نسيتيني اعويشة ...
عويشة بصدمة نطقات:ما تكدبش انا مكنعرفكش ..بعد مني ولا انغوت نجمع عليك كاع ناس دوار ...
خالد هز كتافو : عيطي شكون منعك نيت يختاصرو عليا طريق....
عويشة بالخوف لي فيها بداو دموع كيهبطو بحال شلال و بصوت مخنوق نطقات...
-عافك سير بحالك ما بغيت صداع مع ناس ولا نزل بوجه والديا فدوار .. الله يرحم ليك ماعز عليك بعد مني ..ديرني بحال ختك عافك ما نقصيني مشاكل ...
خالد شاف فيها بنضرات غير مفهومة ..كتبان مكسورة و مغلوب على امرها كأنها هازة جبل فوق كتافها..تسائل فنفسو كيف بنت فعمر زهور يالله عندها 16 سنة تحمل هاد الهم لي واضح فعيونها ...
نطق بصوت هادئ :علاش كتبكي خايفة مني....
-حركات راسها بلا...
خالد: ضربك شي حد...
-عاود حركات راسها ب لا....
خالد قصح شوفة: تبسل عليك شي واحد ...
عويشة حركات راسها وقالت بصوت باكي: لا تا حاجة ما واقعة ...
خالد بدون فهم: من تا حاجة ما واقعة علاش هاد لبكى كامل ....
عويشة كانت محتاجة لي تفرغ عليه ما فقلبها وحيت هاد دري ماشي ولد هنا نطقات ما بين لسانها وساكتة عليه ...
-بغاو يزوجوني ولكن انا ما بغيتش ....
خالد تصدم ضناً انهم تكلمو ليها عليه ..كمش حجبانو و قال: ما بغيتيش تزوجي بهداك ولا ما بغيتيش تزوجي گاع ...
عويشة حادرة راسها كتمسح دموعها : لا معنديش مشكل نتزوج لكن ما بغيش واحد كبر مني بزاف ...
خالد بدا كيرمش بسرعة و الحرج بان على ملامحو : ولكن هو مكبيرش بزاف تقدري من تشوفيه ايعجبك ...
عويشة : جا عندنا و شفتو ماعجبنيش و كبير بزاف كبر من با وانا صغيرة بزاف ...
خالد حل فمو ورجع سدو وتبسم بجنب براحة من عرفها مكتهضرش عليه ونطق بصوت حنين تجاها ..
-رجعي لداركم اعويشة وكلشي ايتصلح لا مبغيتيش تزوجي بداك شارف مغاديش تزوجي بيه....
عويشة بخجل : خاصني نجمع لعواد ...
نتر ليها لحبل من يديها و عينو فعنيها قال...
-رجعي اعويشة لداركم و تسنانيني ....
عويشة ما فهماتش كلامو حدرات راسها و توجهات لدارهم وهو تابعها من لور و عينو عليها و كيفرنس غير مع راسو ..الحق يتقال عجباتو عويشة كتر من لقياس و مبقاش صابر على نهار لي يديها لدارو و تولي مراتو و حلالو ...