-فين هو لحطب اعويشة لي مشيتي تجيبي ...
عويشة جلسات حداها كتنفض فبيجامتها: ما قدرتش نجمعو تا يجي عبدالقادر و نطلبو يحطب ليا...
عفرأء شافت فجنابها و قربات لختها : عنداك تزوجي بداك شارف راه خايب و مزوينش ونتي زوينة بزااف...
عويشة : ولا وافق با...
عفراء: ومالكي نتي ما عندكش فمك قوليه مابغيتش مالو ايزوجك بزز...
عويشة بتنهيدة: واش كتصحابي اعفراء كلشي بحالك انا راه لعين ما نقدر نهزهم فبا ماشي بحالك كتضلي تقابحي نتي وياه...
عفراء عوجات فمها : سيري سيري انا لامضحكت و قشبت مع با معامن انقشب بقاي تحشمي تا يديك داك شارف سنانو مهدومين و لحمو ناشف....
سمعو دقان فالباب وهي تخرج لطوف كتمسح فيديها حلات لباب لقات زهور و جمعة و فتيحة كينهجو صخفانين خلعوها...
-ياك لباس اش واقع ....
جمعة دفعاتها و سدو لباب وراهم: نوضي عريساتك يجمعو بيت ضياف دغيا راه شي ناس من المدينة كيسولو عليكم وحنا جينا من جنان جريا وحدة خلينا معاهم لكبيرة توريهم دار وراني رسلت ولدي يعيط على راجلك و ولادك من لواد...
لطوف بدون فهم: شكون هاد ناس حنا ماعندنا حد من المدينة ....
فتيحة: الله و علم اختي معرفناهمش ولكن نعاهم دري لي حضر فعرس بنت زهور وقال بغى عويشة لزواج ....
لطوف و عريساتها و عويشة جمدو فبلاصتهم و صدمة بانت على ملامحهم من غير عفراء لي تبسمات فرحانة و نطقات وسط منهم...
-خالد جا...
لطوف :نتي فين كتعرفيه...
عفراء : وراه انا لي قلت لبا بغى عويشة لزواج....
جمعة: واش وقت تسوال هدا الطوف ناس جايين من لبعيد تحزمي و قولي لينا باش نعاونوك ورسلي عويشة تلبس شي قفطان باش دخل بيه عند ناس هادو راه ناس لمدينة ماشي بحالنا هما كيبغيو لعروسة دخل عليهم بصينية اتاي و تجلس وسط عائلتو و تعارف بيهم ...
لطوف داخت لا هي لا بنتها بقاو غير كيدورو فبلاصتهم تالفين من غير لعيالات لي دارو يديهم و دخلو لكوزينة كيتعاونو هما وعريسات لطوف و يجبدو ماعن جداد من فيترينة...
جرات لطوف عويشة دخلاتها لبيت وتوجهات لماريو كتقلب ضايخة مدات ليها بيجامة طويلة مطرزة وص
قبل ماتشدها عويشة قلعاتها ليها عفراء مخنزرة فمها...
-مالها عندها سبوع امي راه ايجيو يخطبو ختي عطيها ديك لفراشة لي خيطتي راسك وعندها خيط كتزير على لكرش و صدر وديك بلغة صم غادي تجيها زوينة ....
لطوف:عفراء نتي مزال صغيرة مكتفهميش لهادشي حنا بناتنا كيلبسو غير لبيجامات من كيجيو يخطبوهم ناس ..
عفراء : على هاد لحساب بنتك اتبقى حداك امي...
لطوف:عفراء خرجي راكي عصبتيني ممسالياش لهبالك هاد ساعة....
عفراء:والله ما نخرج تا تعطي عويشة داكشي لي قلت ليك نتي مالكي مكتفرجيش فتلفازة كيف دايرين هادوك بلبس وشنو كيلبسو من يجيوهم لخطاب مالكي نتي تلبسي ليا ختي ديك بيجامة قد لخنشة ماباين لور من لقدام ...
لطوف حيدات صندالة بغات تشير عليها معصبة دخلات غير عويشة كتبدر سوق...
-صافي امي ديري ليها خاطرها هاد نهار ....
لطوف معصبة :ما شفتيش كيف ولات ما بقات تحتارم حد وجالسة تراد معايا كلمة بكلمة وهي مزال لاصقة فالارض اما نهار تكبر علم الله شمن شيب اتخرجو فيا ...
عفراء هزات كتافها منفخة ..وكتشوف فيهم بنص عين وحاضية مع ختها شافتها اتلبس لفراشة وهي تحبسها...
-غسلي وجهك بعدا وحكي رجليك و بدلي دوك لحوايج لتحتانين ديري هدوك ديال بونج لي كيكبرو ليك صدرك وداك سواك لي عطاتك مي غير حيديه ايخسر ليك غير فمك...
بقاو غير كيشوفو فيها مصدومين ومعرفو ما يقولو و لطوف مع تلفة زادت عصباتها عفراء بغات تفرسها وهي كتهرب ليها من قنت لقنت مكتحشمش و بغات يديرو داكشي لي عندها فراسها مبغاتش تشوف ختها لا علاقة وهي شافت كريم شحال زوين و ختها تبان قدامو شارفة ..
لكن شكون يعرف اش فعقلها لي مزال صغير ولكن داكشي لي جمعاه و عارفة ليه علم الله منين جابتو واش تلفازة لي ضل قدامها نهار و مطال وتعلمات منهم ولا داكشي فطرة زاد معاها ...
وكيف قالت عفراء دارت عويشة لي ما كتبغي تخسر خاطر لختها صغيرة ..حكات رجليها تارجعو حمرين و وجها صافي وملامحها واضحين...لبسات ملابس داخلية مع دوني و شورط ديالو ودارت فوقها فراشة وتوجهات مع لمراية كتشوف فراسها عاجبها الحال ولفراشة مفرقة من جناب كيبانو سيقانها بويض كيلمعو و يديها صغيورين ..تبسمات لراسها فرحانة و عفراء تقدمات ليها هازة زيت لياسمين....
عفراء:هاكي دهني هادي بيها يديك باش من يسلم عليك خالد يلقى يديك رطبة و تبقى ريحة لاصقة فيدو ..
عويشة مدات يديها و حجبانها مجموعين: عفراء منين تعلمتي هدشي كامل...
عفراء: تفرجت فيه فواحد لفيلم هندي غير ديك لعروسة دارت زيت اخر ماشي بحال هذا ولكن تا هدا ريحتو زوينة ....
عويشة تبسمات وبطاعة دهنات يديها وشافت فلفراشة: كاع ما عندي زيف بحال هاد لون ما عرفت ما ندير...
عفراء: نتي شعرك زوين علاش اتغطيه رجعيه غير لجنب و دخلي عندهم...
عويشة حركات راسها بزربة: لا لا اختي حنا ما كنعريوش شعرنا...
عفراء: نتي اصلا مديراش الحجاب وهادو ناس لمدينة عقلهم ماشي بحال هادو لي عندنا هنا ..غير من يعيط عليك با دخلي عندهم هكذا بشعرك ولا هضرو معاك انقول ليهم انا ....
خلات ختها و مشات هي كتلبس كسوتها و تقاد حالتها.. كيعجبها راسها تكون زوينة و ديما حوايج نقين و ريحتها فنة..صغيرة ولكن مطورة و مجبدة تشك فعمرها...
سمعو لهضرة قوات برا دليل علي ناس جاو..بدا قلب عويشة كيخبط بجهد و صخفة شداتها ...دخلات بشرى وكلثوم حابسين ضحكة سدو لباب و تقدمو عند عويشة...
-نااري واشمن زهر هادا عندك اعويشة عرفتي لولد لي باغيك شحال زوين كيحمق يا ختي...
عفراء: بعدا جبت لختي راجل كيحمق ماشي بحالك نتي جايبة ليها شارف...
بشرى:سكتي..سكتي المنحوسة تمشي تنحسي ختك تاني مع هاد وجه لخير لي جا عندها...
عفراء خرجات هازة راسها لسما خلات ختها مع عيالات خوتها هما يعرفو يتبتوها اما هي صوقها خاوي فداكشي...دارت راسها ماشافتش مها لي كتشير ليها مدخلش عند ناس..وبإبتسامتها المعهودة دخلات عليهم..شافها باها و تبسم كتبقى فيه بزاف...
العربي:اجي ابنتي سلمي على ناس.."هضر مع اب خالد لي جالس حداه"..هادي الحاج بنتي صغيرة عفراء....
تبسم لحاج كيف تبسمات كل عائلة خالد لي عاود ليهم مادارت فيه ..
الحاج:تبارك الله لا يصلح اسي لعربي ....
خالد جالس حاط يد فوق لمخدة و يد لخرا على ركبتو .. تبسم و شار ليها تجي عندو...
-اجي ازوينة جبت ليك معايا حلوى اتعجبك ...
عفراء بقات واقفة فبلاصتها كدور فكسوتها عاجبها الحال :بصح انا زوينة....
الحاجة لي دخلات.ليها عفراء لخاطرها وحيت عارفة قصتها زادت عزازت عليها : زوييينة ابنتي مكاين لي يفوتك بزينك مشالله ...
عفراء ببراءة:وخا مكنعرف ندير والو بحال لبنات مزال كنبان زوينة....
سعيدة"اخت خالد": مزاال زوينة ابنتي ولي يبغيك يبغيك كيف ما نتي....
خالد هز يدو: اوا هانتي الالة عفراء شكون بحالك...
عفراء عاحبها الحال و كدور فراسها : ولا كانت شي وحدة زوينة عليا بزاااف ...
الحاجة كضحك:لا لا ابنتي لحق يتقال ماعمري شفت بحالك نتي لالاهم فزين كاملين ...
عفراء رمشات بطفولية : ولكن كاين ما حسن مني بزااااف تشوفها ما تقديش تهبطي عينيك منها ....
سعيدة كمشات حجبانها: وشكون هادي لي فايتا زينة لبنات لالة عفراء ....
عفراء تبسمات من نيتها: ختي عائشة زوينة مني بزااف وضريفة و كتحشم ماشي بحالي و كتعرف دير كاع شغل دار ومكترضش على با لهضرة بحالي وكلشي فدوار عزيزة عليهم و سكوتية تحطيها.على جرح يبرا وغزالة كتحمق...
جالسة كتعبر و تشكر فختها و تعليها فمقامها و تقرانها بيها باش تبان ختها.هي زوينة وكلشي غير ساكتين و كيشوفو فيها بإبتسامة ..وخا خالد عاود ليهم لكن متيقوش ديرها بيه بنت ست سنين ولكن دابا من شافوها كيف جبدات الموضوع باش تجبد اسم ختها و تشكرها قدامهم عرفوها شيطانة و مطورة بزااف...
شاف خالد فالحاجة كيضحك وهضر ليها فودنيها : اش قلت ليك ياك متيقتينيش و سمعي دابا على ودنيك...
الحاجة: تبارك الله عليها والله تا فجأتني بكلامها...
خالد: اوا هي لزربتي و هضري نتي ولواليد دغيا ....
مكان حد يتوقع ديك لي خافو ناس يخطبوها بسباب نحس ختها وخا زينها عاطي وشخصيتها ما تلقى بحالها و ليوم كيشوفو لبراني جا ياخدها و يطلب يديها تولي مراتو و حلالو..شحال من واحد من ولاد دوار من سمع عويشة جاوها لخطاب تنهدو بلا خاطر و لعنو ختها لي لصقات فيها نحسها وهما لي كانو باغينها لراسهم و لكن كتاب عفراء تكون عكس فطريقها....
ولكن تا حد ما عارف هادي لي قالو عليها نحس هي لي لعباتها وجابت لختها راجل مقامو ما يتشرا لا بمال و لا جاه...راجل بمعنى لكلمة و اخلاقو واضحين من الكلمة لي عطا و ما نكرها...
تجمعو كل الحباب من العائلة و جيران فرحانين و يعاونو من نيتهم وكل مرة يغمزو لطوف تحضي المنحوسة ديال بنتها لا تخسر سعد ختها كيف عوايدها...
خرجات كتنفض فكسيوتها عاجبها الحال حسات بيد قاصحة جراتها وهي تكمش ملامحها بألم..
عفراء: مالكي امي جراني هاد جرة كاملة بغيتي تحيدي ليا يدي...
لطوف مخنزرة: ياك قلت ليك مدخليش عندهم مالكي غير كتزبقي كيف زواق...
عفراء : وامي راه غير خطاب ختي واش بغيتيني منشوفهمش ومنهزهمش و نحطهم نشوف واش ناس مزيانين ولا لا ..علاه انا ختي شايطة عليا نعطيها لمن بغى...
حيدات لطوف يديها متفاجئة : علاه نتي وصلتي ابنتي تهزي ناس و تحطيهم و تعرفي اش يسواو...
عفراء من نيتها: انا بانو ليا ناس مزيانين غير لا بغيتو تخسرو لختي سعدها مع هاد خالد ...
لطوف حطات يد فوق يد هازة حاجب و مهبطة لخر..
-ياك ابنتي و صلتي تعيطي عليه بسميتو حرفية نيشن...
عفراء تبسمات تا بان دروسها كاملين : غادي يعجبك امي و الله تا زوين ايجي مع ختي هو هداك...
لطوف بقات غير كتشوف بصمت وهي غادة قدامها كتنقز مبغياش توسخ حوايجها ...وصلات لكشينة كطل عليهم من جنب لباب وعيالات خوتها مشغولين ...صغرات عنيها و نطقات بشوي...
عفراء: داك بلاطو ديال لحلوى لي جابو لخطاب متحلوهش و تحطوه ليهم غادي نبانو ليهم جيعانين حظو ليهم غير لحلوى لي كتصاوب ختي.."شافت فـ بشرى"..وعنداك تحطي ليهم ديك كيكة لي كديري غادي غير توحل ليهم فلحلق ...
بشرى هزات صندالة كتهضر من تحت سنانها: واش غادي تبعدي عليا و للا ..خلي هاد نهار يدوز بلا صداع بلا ما نفرجو فينا ناس...
كلثوم حابسة ضحكة: راه قالت ليك اختي الحق ديك كيكة لي كديري ما ياكلوها تا فسبيل الله....
عفراء قربات حدا كلتوم كضحك: حطي داك تمر لي معمر فطبسل طوس لحمر و عمريه بزااف و داك لحليب عنداك تحطيه بكرطونتو ..جبدو كيسان لي مزوقين من فيتيرينة و عمرو فيه لحليب و دوروهم على ناس بحال لي شفنا فعرس بنت الحاج مول جنان. .. سمعتهم صاوبو داكشي من لمدينة...
بشرى مفقوضة: هاكي اختي صاوبي نتي نيت اما انا شهمتيني بفهامتك الخاوية ....
عفراء خسرات سيفتها: اودي اش يعرف لحمار فطيارة ....
خلاتهم قطعو الحس ما عرفو باش يردو عليها ولو بنص كلمة فمها ماضي ما عرفو ليه دوا...جلسات فوق لكرسي كتصاوب تمر فطبسيل و كاتحطو مستف و مقاد كيف شافتو عند مول جنان..داكشي عندها محفوظ فراس مكيتنساش و لفهمات ديالها فايتة لقياس...
شافت جهة ديال لكيسان ولكن بلاطو ديال لميكة خسر ليها ديكور محملاتوش...حطات كلشي من يديها و خرجات كتجري لدار لكبيرة لي فايت شايفة عندها بلاطو ديال نحاس منحوت وعاطي لعين و يجيو مع لكيسان مزوقين لي عندها..
فلكوري ديالهم خدام كيكنس زريبة و يعطي لبهايم ياكلو و تريكو لصق عليه بالعرق و رغم ذالك داير لي فجهدو مكيبغيش مو هي لي دير هاد لخدمة ديال لكوري...سمعها كتعيط عليه وهو يدور عندها بحهد و قلبو كيضرب و وجهو حمر وزاد حمار من شافها جايا عندو ...بزز باش خرجو لحروف ليه مقادين ..
جعفر: غير بقاي تم و قولي ليا اش بغيتي...
عفراء بدون فهم: مغاديش تسمعني خليني نقرب ليك كثر...
دور عينو على الحالة لي هو فيها بخجل حشمان بريحة لي لصقات فيه..بتوتر نطق..
جعفر: لا جيتي اتوصخي حوايجك هنا ..
عفرء حبسات خطواتها : واجى نتا عندي بغيتك تعطيني واحد بلاطو من لكوزينة ما لقيتش خالتي لكبيرة ...
جعفر : دخلي هاني تابعك...
مشات دخلات و هو بزربة رما كلشي لي فيدو و دار من جهة لخرا نيشن لسقاية غسل يدو و وجهو وحالتو كاملة بزربة و داز على نشار لي منشورين فيه حوايجو لبس حوايج ججداد و كيشم فراسو ويتأكد واش ريحتو مزال خانزة ..
من ما لقى والو حس براحة ودخل عندها بإبتسامة ..عطاها داكشي لي بغات وحيت كان تقيل هزو هو وخرج معاه و صلها لدارهم ..حطو ليها فلكوزينة ونطق و عينو فلارض مكانش كيضن يلقى لعيالات مجموعين فلكوزينة...
جعفر: بلاطو تقيل عليها خاص شي واحد كبير يهزو باضكض ميضرهاش فبديها ...
لطوف : وخا اولدي دخل عند رجال جلس معاهم.. لكبيرة مشات غير تصخر هي و زهور و ترجع...
حرك راسو و دخل عند رجال وعفراء تبعاه من لور..خدا ابعد بلاصة من خالد و شار لعفراء تجلس حداه و رغم دالك مدتهاش فتلميحات ديالو و مشات كتنقز لعند خالد هضرات ليه فودنو وهو تبسم فرحان وعاود هضر معاها فودنيها...وهزها جلسها فوق ركبتو كيدوي معاها بشوي وهي فرحانة كترد عليه ...
الحاجة لي جالسة حداهم سمعات لهضرتهم كضحك وخشات راسها معاهم عاجبها عفراء : قولي ليا ابنتي شحال فعمرك...
عفراء : هاد لعام اندخل لمدرسة اخالتي...
الحاجة: تبارك الله مزال صغيرة ولكن هضرتك كبيرة ...
عفرء ببراءة مبتاسمة قالت : بنات دوار لي قدي فلعمر ما كدوي معايا تا وحدة حيت كيخافو مني حيت كيقولو عليا منحوسة هادشي علاش كنتجامع غير مع عيالات كبار و بعد لمرات كندابز معاهم حتا وليت كنفهم كتر من عمري ...
حاجة شافت فيها بحزن بينما خالد بقات فيه بزاف ..باسها فخدها كيضحك..
خالد: شفتي دابا كون كنتي كبيرة كون تزوجت بيك نتي و خليت ختك....
عفراء دورات راسها: امممم كضحك عليا تصحابني ما شفتكش من حطيتي عينيك على ختي ما هزيتيها مكرهتيش تزوجها ديك ساعة وديها معاك ....
خالد ولا وجهو حمر حشماتو قدام لعائلة لي سمعو هضرتها وخوتها لي حاضرين هو وباها ساعة معامن هي ما كتحشم لا من باها ولا خوتها...
كحب خالد بشوي كيبعد لحرج لي تملكو : وخا هكاك كون كنتي كبيرة كنت انشوف فيك نتي ماشي ختك...
عفراء هزات راسها : فات عليك لفوت انا مرشومة من نهار تولدت ..
كلشي تهز بضحك بكلامها جابت ليهم تمام نطقات اخت خالد كتحبس ضحكة بزز...
سعيدة: اوا الالة لبنات شكون هادا لي نتي مرشومة ليه ...
بصوتو لمراهق ولكن بنغمة حادة شوي : انا ...
دارو كاملين جهة جعفر بينما هو جالس بهدوء وعينو فعفراء و كمل كلامو ببساطة...
جعفر: عفراء من اتكبر اتولي ديالي و ديالي بوحدي ...
كان من لهجتو نوع من تملك شي لي خلاهم يكمشو ملامحهم بتساؤل عن عمر هاد طفل لي نطق بهاد لهجة المتملكة لي ما كيوصل ليها الا ورجل احب انثى من اعماق قلبه..
لكن كيف له ان يحب بهذا العمق و هو مجرد مراهق لا يعرف في لغة الحب و العشق شيئاً.....
خالد شاف فباه باش يبدا الهضرة وكيف عادت كل ناس لأب لي يبدا فطليب لبنت لولدو ...نطق لحاج و وجهو مرسومة عليه ابتسامة قنوعة و محترمة ...
الحاج: اوا اسي لعربي كنضن ولدي هضر معاكم من قبل و انا جيت غير نأكد كلامو ..هو عجباتو بنتكم و حنا لي بغاها ولدنا نحطوها فوق راسنا و بين عنينا وما نخفي عليكم ولدي بخدمتو و رزقو ما ترفدو هم لبنتكم تعيش ملكة فدار راجلها و دابا طالبين راغبين فيد بنتكم عائشة لولدي خالد ...
لعربي تبسم و عينو بداو كيلعمو مدمعين حس بغصة خنقاه ولكن الابتسامة محافظ عليها ونطق بشوي..
-تا انا ما نخفي عليكم حاجة بنتي عندي عزيزة بزااف كنت بغيت نزوجها غير من شي ولد من دوار تبقى حدايا و بين عينيا ما كنت معول نعطيها لولد لمدينة و نبعدها عليا..بنتي نقرة صافية ونحاس عمرو يصيبها مأدبة و صوتها ما يتسمعش و كلامي كتحفضو و تطبقو ..ضريفة و ضرافتها هي لي مزينة كل خصايلها..ماشي كنشكر باش نزين ليكم بنتي بل كنقول الحق ان عائشة غلى من ذهب عند باها و انا ما نعطيها الا لي يعرف بقيمت دهب و غلاوتو الحاج ....
خالد عض فمو من لتحت و هضر مع عفراء فودنها وخلاها خرجات عاد نطق و صباعو مشبكين لوسط..
-ما قلتي عيب اسي لعربي و تا انا ما غاديش نشكر ليك راسي وغادي نقول ليك لي كاين ..انا عجباتني عائشة و عجباتني يزااف ونويتها مراتي و حلالي..لكنتي خايف ما نتهلاش فبنتك فكون هاني من هاد ناحية ..عائشة اسي لعربي انديرها فعيني و اغلى ما عندي..انا ما غادي نسول لا على شقاها ولا حداكتها انا بغيت فقط مرا لي تشاركني حياتي اما طياب انا نديرو لمعرفاتش ليه هي ...ولا كنتي خايف تزوجها بعيد منك انا كنواعدك سبت و الأحد ادوزهم عندك باش ما تفكر ولا تخمم عليها تا تأكد من راحتها و غلاوتها عندي ..اما لكنتي كتهضر على لعمر كون هاني من هاد جهة اندير عقلي من عقلها وماغادي نفوتها لا بفهامات ولا بلكلام ..انمشي مع قد عقلها تا تفهمني و نفهمها....
علال و عبدالقادر شافو فباهم مبتاسمين و حركو راسهم ليه في ان واحد...
لعربي بفرحة كتشع من عينو : اولدي ما خليتي لينا ما نقولو ولكن لكلام لخر ديالها انا ما نبزز عليها حاجة ...
خالد :هدا هو لمطلوب اسي لعربي..
الحاجة: اوا اسيادنا وقتاش نشوفو تاحنا عروستنا...
خرج عبدلقاد عند لطوف هضر معاها فودنيها ورجع دخل بينما لطوف مشات عند بنتها ....
لطوف:زيدي ابنتي دخلي ناس بغاو يشوفوك ...
عائشة لي الله لي عارف ما فقلبها و مشاعرها المعقدة و خوفها من هاد اللحظة...حاسة بقلبها كيضرب بجهد و وجها مزنك و سخون بلا قياس..كتخطي خطوة و تحبس و تزيد تخطي خطوة تانية..
متوترة والخجل تغلب عليها ..هزات طبسيل ديال تمر وتنهدات بعمق ونزلات عنيها لطبسيل ودخلات عليهم بزينها وملامحها الجميلة و لباسها الأنيق و شعرها الاسود طويل لي كيتسحر بيه اي واحد شافو ..وعنقها طويل لي مزين بسلسة دهبية ..كانت كلها باهية كيف لبلارة تا حد ما قدر ينزل عينو منها وخا شافو تصاورها لكن ما ضنو ولدهم يلقى بحال هاد زين لي كان مخبي فقبيلة بين جبال الأطلس الكبير...
خالد حل فمو نصف حلة ورجع سدو كيحاول يتمالك تعابيرو ولكن ما قدرش..رغم انه شافها لكن وهي قدامو الان بكل اناقتها تلفاتو و خلات قلبو ينبض كتر من لازم ...