طلعات قدس هاربة من التحشيمة ... ولوؤي وسلطان كايشوفو مع جود فالتيل حديثهم خاص .. بينما الوخرين شادين فمواضيع الاعمااال ... والنساء على الموضى ...
سلطان : ( كاوريه بيدو فالتتيل ) هادي مجاتش ... ردها للور ... اون طو كا التصميم مزيان .....اتخرج واعرة
لوؤي : اجي نتا اولدي ... . عمي زعما ماردش للبال للكاراج لي شريتي ؟
جود : لا ... خلصتو كاش ماسحبتش من البنك باش يعيق ...
سلطان : هداك كايعيق بالحوت تحت الما واش ت*وا ولا مزال ... مايعيقش ليك بالكاراج
جود : هاوا كاع عاق ... لي فراسي كنديرو ...
يلاه كايهضرو هوما يسمعو واحد الصويييييت غزاااال داخل كايغني كلهم ضحكو ... محبوووبة العائلة جات وفين مامشات كولشي كايتنور ....
قسم : ياا ست الحبااااااايب يا حبيبة .. يا اغلى من روووووحي ودددددمي ( عنقاتها) ياا حنييييينة وكلك طيييييييبة .... ( باستها من خدها ) رربي خليييك ياا امي ... يااااارربي يخلييييك يا امي ياست الحباااااايب يا حبيبة ...( عطاتها البوكي ديال الورد ) الله يخليييكم لبعض يااااارب وماتحرمنيش من ضحكتكم وصوووتكم فالدار ... الله يجعل ايااامكم كلها عيد فعيييد ....
لامار : ( عنقاتها مزيرة عليها ) بووجوودكم ابنتي الحبييييبة ...
باستها فخدها وشافت عند العائلة مجموعة ..وسلتات بعض الوردات من البوكيه وتقدمات لي سلمات عليه كتمد ليه ديالو و جلسات حدا رتاج معنقاها
قسم : مرحباا بيييكم ... الدار كتنووور
سارة : نورات حتى دخلتي احبيبة ديالي
عدنان : قسووم ..كيف داز الفواياج
قسم : في امان الله اعمي ... صراحة الكلسة باقي ناقصها عمو يونس وخالتي اريج ...
حياة : ديما مخليين بلاصتهم ...
عمران : الواحد ملي تايدير الولاد ويدق وتادو فشي بلاصة صعيب عليه يخويها .. خدمتهم كلها تما ...
قسم : ( طلات مع جود اش كايشوف فالتيل ديالو ) مكتعياااااش
جود جاوبها غير بضحيكة .. وهي ضربات جبهتها مع جبهتو كنوع من العناق
قسم : شفت بابا مكاينش ؟
لامار : ها حنا كانتسناو فيه مابغا ينزل
سلطان : عمي عزيز عليه يدير سوسبانس ...
يلاه جبدوه وهي تضربهم ريحتو من بعيييد ... ريحتو المخلطة بالفحولة ... والرجولة .. والشهامة ..
شكون من غيرو .. رب الاسرة .. والاب الروحي للجميع ... الآمر والناهي ... والركيزة لي مشدودين عندها الخيوووط كاملين ... الركيزة لي خصها مهما هبات الريح وطرطق الرعاد تبقى ثااااابتة وشااامخة وقوية باش مايتقطعوش الخيوط لي شاداهم .. وباش مايطفاش الضو على المدينة ... الشخص لي هو الرعب ديالهم فنفس الوقت الامان ... الشخص لي ملي كايجتاجوه صديق كايلقاوه .. ثم اب .. ثم عم .. ثم مرشد .. ثم دكتور ... ثم اخ .. ثم زوج .... الشخص لي مستحيل يتاخدو شي قرار بلا موافقتو .. الحكييييم لي شاد بزمام الامور ... ولي مخلي العائلة مجمووووعة .. ووصلها لهاد الشان لي وصلات ليه .. حتى الجميع كايضرب المثل والقدوة بعائلة الاسماعيلي المخملية لي ولات بحال شي عائلية ملكية كتمشى ببرتوكولات خاصة ... الاضواء ديما مسلطة عليهم كأشهر عائلة فالبلاد ...
دقة الصباط كتسمع فدروج .. بهدااااوة وثقالة .. طق طق طق ... الهبة كون كانت انسان كانت غاتكون هو،.... رجل فأول الستينات ديالو ... بكوستار فغاية الفخامة . باللون الرسمي ديالو .. اللون الاسود .... براسلي انيق فيديه .... وصباطو لماع ... شعر متخللاه الخصلات البيضاء مرجعو للور .. ولحية مرتبة كدالك ...
وكل خصلة شيب فالحيتو وراسو .... كتوحي بتضحياتو ..بتعبو .. بخدمتو وسهيرو ... بتربيتو .. بمبادئو .. لي دوزهم عمرو كامل باش ماتخص عائلتو حتى شي حاجة .. وتاحد فيهم مايتآدى وماتقيسو شعرة ....
عائلة المخملي .... اسد الاسماعيلي .....وقفو لاشبال الصغار يرحبو بعمهم .... وهو ابتسم ... ابتسامة ماتعرفها ضحكة ولا تخنزيرة .... سلم على الجميع وجلس فبلاصتو ....
عمران : الله يجعل ايامكم كلها عيد ....
سفيان : طلعتي وغررقتي ...معندك طاسيلة كالسة كتسناك ...اودي يجينا الخيرررر
اسد : ( ضار عندو ) كنت كنتفرج فالنجوم ... غرقت فالموصيبة لي درتو ... ولفتو كاين لي يصلح موراكم
عدنان : نتا لي راسك قاسح قتليك بيع الباطو فالبحر
اسد : نتا كون جات عليك نبيع كولشي ونمشي نحفر على جماجم القرن 15 ....
قسم : ايه ايبيه اييييه بابا ...والله تاعيييب .... الهضرة على هادشي وسط عيد زواجكم نتا وماما ؟؟؟؟ تااااكلمة زوينة ماااقلتيهاش ليها راني كنشوفك....
لامار : ( منفخة كاتشوف لسما ) ممم خلييييه ... تااايسالي مشاكليو على خااطرو ... لاماررر علااش ... هي اللخرة مسكيييينة
آية : ( الوريدة لي عطاتها قسم دايرها مور ودنيها ) هههه القضية عندك صعيبة اعمي
لامار : يقول ليا غير شحااال كملنا فزواجنا... نسمح ليه تا فالكادو
اسد : ( رجع لور كايحك تحت ذقنو) خمس سنين !!!
لامار : عماين لا ؟؟؟؟
سلطان : هههه غاجبد الكادو مضوبل اعمي وشوف تشوف ...
اسد ضحك عاد جاوبها وعينيه فعينيها كأنه مراهق تعرف عليها لاول مرة .....
اسد : تسعود وعشرين عام ليوم آ مولات الشي ....
لامار : ها ؟ على ماشي 28 عام ؟؟؟
قسم : ماما يهديك الله 28 عام راه العمر ديالي ...
لامار : على نتي ماشي ولدتك فعامي الول
قسم : اوا وداك تسع شهور علامن نحسبوها ؟ ...
اسد : خداتها كريدي هاديك غير تنساها حسن ليها ...
لامار : كاتقولها بوجهك حمر ...
رتاج : ههههههه لهلا يعاود داك تسع شهور على شي مسلم انا لي عارفة بحقها هههههه
اسد : دابا شكون لي عاقل فينا امادام ؟؟
لامار : ( طيحات راسها كتغبن كتبان صغر من ولادها ) مممم نتا ...
اسد : على هاد الحساب انا لي خصني نطلب الكادو مضوبل ياك آولدي ( مخاطب ) سلطان ...
سلطان : وباااركا عليك غير هي ... اجمل كادو اش بغيتي كتر .. عندك مولات شي كااااملة وكتقلب على كادو ....
اسد : ( بنص شوفة فيها طانزر ) الشارفة
لامار : بزااااف عليك .... على شكون شااب فينا ؟ هااا وجاوبني شكون شعرو بيض ...
اسد : واحيت انا مكنصبغوش .... ( غمزة) اولااا !!!
لامار : جوووود نضر مع باك ...
جود : عطيوني تيقار .. نتوما كطلعو جوج دقايق كتصالحو علم الله اشمن سحور كتقراي عليه .. جود كايبقى فالعيب .... بينك وبين راجلك ...
اسد : ( حك تحت ودنو معلي حاجبو ) واحد الكراج بديتي تصبغو ولا مزال
سلطان كان كايشرب الما بزقو كااامل ولوؤي حابس الضحكة وجود بقا كايشوووف فيه شحاال ونطق بهدااااوة .....
جود : الواليد ...
اسد : آولدي العزيز ...
جود : تايعاودو على داك الاف بي آي فيه الفلووووس من داكشي...
اسد : وولدي ...
جود : آلواليد العزيز ....
اسد : حتى داك الديپو .. كايعاودو فيييه السياحة من داااكشي تدوز فيه ليلة فايڤ ستار
جود : احم ( تنحن شاف عندهم ) مانتعشاوش ؟؟؟
اسد : لا غاااانتعشاو ...
جود : ااه ... لا صافي صاااايم ..... بصحتكم ..
ناض خرج واسد متبع بعينو وهوما يطرقو سلطان و لوؤي بضحك .....خرج جود ... وبقاو هوما على الحديث ...وسلطان كايقشب على عادتو .... والضحك ديما وسط طاولتهم .. من غير لوؤي لي جالس بعيد شاد تيليفونو ... وعدنان كايشوف فيه
عدنان : لوؤؤي ؟؟؟
لوؤي طلع عينو شاف فيه .. ورتاج بقات كترمش خافت يدابزو تاني ..
عدنان : راحنا جالسين وسط العائلة كنضن !! التيليفون حطو من يديك .... كاينين لي كايتمناو جلسة بحال هادي ومالقاوهاش ... ونتا عندك وهاملها ...
لوؤي بقا كيشوف فيهم تحرج ملي هضر معاه فالوسط ورتاج كتهضر غير بعينها تهدنو
لوؤي : كبرت على المحاضرات ديال ماديرش لي بيتيز آلواليد .... ( ناض وقف ) امسية سعيدة ....
هز الجاكييت ديالو،واسد متبعو بعينو ولامار تبعااتو ... و سفيان قرب عند عدنان
سفيان : ماشي هاكا تهضر معاه فالوسط
عدنان : الى مگادش معايا راسو غايشوف كتر من هاكا
سفيان : عيقتي على الولد بالله....
لامار تبعاتو شداتو فالباب
لامار : لووؤي .. ولدي ... لا مديرش هاكا ...
لوؤي : مرات عمي عارفة معزتك عندي .. غير خليني نمشي عفاك
لامار : وتخليني فهاد النهار ؟ ماديش على باباك راك عارفو كايبغي غير مصلاحتك ويشوفك مندمج مع الاسرة ديالك ... حيت تاهو كاز واحد النهار بحالك ومابغاش ولدو يطلع بحالو ...
لؤي : معنديش ذنب فشخصيتو لي باغي يصلحها فيا ... انا بشخصيتي .. منحتاجش نبنيها على الاسس لي بغا هو ...
لامار : وصاااافي على وجهي و وجه عمك ... بقا الله ييرضي عليك
جات عنهم تاقسم
قسم : لوووؤي غاتخرج على داك الباب والله منعاود نهضرك ...
لوؤي : ( تنهد ورد شعرو لور ) الله يفرجها ... غانخرج نبدل الجو وندخل ..
لامار : ماتعطلش .. وقول لجود يدخل تاهو راكم زدتو فيه بقا غير تهزو العصا على والديكم ...
مشا لوؤي و لامار وقسم دخلو كايدعيو بالهداية ...عدنان مخنزر مقلوب ليه المود .. واسد مكيبينش مكيرضاوش قدام عمران ..لوؤي بقا كايتمشى فالجردة تادخل لاسطبل للخيول .. هو يلقى جود متكي على واحد الكومة دالقش .. وكايتكيف ...ومشا كلس حداه
جود : ماعطلوكش
لوؤي : بررب الى بدا كايطلع ليا هاد الخرا فكري
جود : ماعندنا مانديرو .. الوالدين هوما هادو ..
لوؤي : شبعو خصااايل فالصغر جاو يربيو راسهم فينا ... راه كل واحد ولاو كتافو كبر من ديال لاخور وقادين براسنا .. مابغاوش يفهمو ان كل واحد خصو يرسم الطريق لي هو ختارها ...
جود : واش غاتغانن مع هاد التريكة ولا تقنعهم .. لي فراسهم راه فراسهم ... عيييت نقنعو انا ... راسو قاسح ... قلت ليه اجي نوريك تانا قسوحية راس
لوؤي : غانبقاو حنا ديما هاكا محاربين
جود: نتا غالط من واحد ناحية .. انا على الاقل باين اش كندير ... نتا فارض عليه قراراتك فنفس الوقت ماعرفيينش اشنو كدير وفين كتسافر وفين كتمشي؟؟ راه تاهو خصو يعرف ...
لوؤي: خدمتي هاكداك دايرة ...
جود : شي عصاابة ؟؟ ( دار فيه لوؤي الشوفة دمنيتك ) وراه هاادشي لي كايبان ليا ..... خدام ولطكن مانقولش فاش خدام .... طنز هذا
لوؤي : ( ساط دخان) دخل سوق كرك
جود : الرضاااا ابنعمي ....
بقاو طالقين رجليهم كاتكيفو وكايبخو الهم ديالهم دخان ... تاشافو شي حد التحق وتلاح على الكومة دالتبن والشعير ديال الخيل ...
جود : (شاف عندو ) شااااااااا .....
سلطان : حااشاك .....آرا لهنا داك لبريكة
جود : ( لاحها ليه ) الى مخفت نكدب راه معارضين ليكم لهيه ماشس عندي .....
لوؤي : ( نفت الدخان ) انا مزال ماعرفتش علاش هاد السواغي ..... كايجمعونا.... باش نرونوها اون پلان پيبليك ....
سلطان : انا مارونتها مع حد ... جبدو حس البيزنيس جيت نتكيف .... فكو حريرتكم غير نتوما انا مرضي الوالدين
طلعو فيه عينيهم
سلطان : لا نوووضو ضربوني حسن !!! ....نوضو منهنا نرجعو ... درناها معيقة ....
جود : ( رجع تكا كايشوف فاللسما ) رجع نتا امرضي الوالدين حنا غي مساخط ....
شوية سمعو شي حد التحق وضارو براسهم ...
قدس : آش كاديرو هنا !!!
جود : كانقيو الزنجلان ....
قدس : ررجعتووو تكميييو !!!!!!
سلطان لاح جوان ديالو لعند جود
سلطان : شد شد الحرام ديالك ...الله يعفو عليكم ( ناض كاينفض سروالو ) دعي معاهم اختي بالهداية دعي ( جود شاد جوانات بجوج كايشوف فيه ) كايضب جوج دقة .. سيري قوليها لباك ينفيه تاني شي شهر مع القرودة يلاه يتربا ... فففففف خنقاتني الريحة
مشا وهوما متبعيتو بعينيهم
لوؤي : وكااااايعاودو على محمد صلاح ....كايبرم جواااانات من داكشي
جود : هداك كايبرم ... وحنا كيطلع معانا .. نوض نقودو ( قدس وسعات عينيها ملي خسر الهضرة ) مافيا لي يدوز شي شهر مع الكوالا ..... ( شاف فقدس ) ونتي كانقوليك عطينا تيساع راه غاتسمعي لي مغايعجبك ....عبك الحال دابا وابلقي فعينيك اش باغا تسمعي عندنا ... الموال دفريد الاطرش
قدس : والله مكتتتحشموو ...
لوؤي : هو لي مكيحشمش ... قلت انا شي حاجة !!!!
قدس : نوضو نوضو ... راه كايتسناوكم للعشا ....
جود : هاحنا جاين ... نوض اولد عممي راه مغادوزش ليهم الى مفتحناش ليهم ااشهية تجمعو على،طاولة العشاء فالجهة الاخرى من الحديقة ...
التحق حتىجود ولوؤي لكراسى ديالهم ... رجاء واقفة عند راسهم والخادمات كايصبو ليهم فالاطباق ... الطاولة كانت مزينة بورود حمرا وشموع كتوحي بليلة حميمية .... تعشاو فجو مضحك .. سلطان دغيا كايقلب ليهم الجو ديال الگلسة ... وضحكة دآية كتسمع كيف شي عصفورة ....
تعشاو فجو ممتع ... وسطو نظرات ماجدة لجود لي ماشافهاش حتى واش گالسة تما ... و نظرات دلوؤي لقدس لي كتاكل وابتسامة على فمها وسارحة،.. مكرهش يدخل لدماغها ويعرف شنو مضحكها ....
سلاو العشا ديالهم فهدوء ... وناضو طميع لواحد الجليسة وسط الجردة كان فيها البوفيه ديال الگاطو دعيد الزواج ... ومحطوطين تما كاع لي كادو لي جابو ليهم .... خداو صور عائلية تذكارية ثم قطعو الحلوة ... وعاد كملو جلستهم على القهوى حتى لمنتصف ليل ... بدا كولشي كيتثائب مولفين نهار السبت كايباتو تما باش للاحد عطلة كايستغلوه لكروب الخيل ...ويتمشاو على ضفاف الشاطئ ... بداو كاينسحابو بالواحد ... كل واحد كايطلع لجناحو .. واولهم عدنان ورتاج وولادهم الصغار انس وفصيل ... من غير لوؤي لي بقا لان جناحو بوحدو ... طلع عمران و سارة ... وبقاو غير اسد ولامار والشباب ... لامار متكية على كتف اسد وهو كايشوف مع قسم كتوريه شي اومور فخدمتها وقدس كتعاود للماجدة على المدرب جديد والدراري فحديثهم لي لا يلائم الجمهور الناشئ ..
قسم : ( كتثائب) عرفتو فيا الموت ديال النعاس والعيا .... غانطلع ننعس
لامار : سيري ابنتي .. غدا عطلة ورتاحي ... والله يعفو عليك من هاد تمارة كلها لي معمرة فوق راسك فوقاش آبنتي تعطي شوية لوقت لحياتك .. فوقاش ؟
بسم : ماما مغانعودش نفس الموال عاوتاني ...
لامار ناضت على الكتف داسد والجدية فعينيها
لامار : غانعااودوه .. جوج مرات وتلاتة وربعة وخمسين .... واش مكتشوفيش راسك حياتك كتمشي من يديك ... الى ماعشتيهاش فهاد السن امتى بغيتي تعيشها حتى تولي قدي ؟
قسم : ومالك نتيا معايشاش حياتك دابا فاتتك شي حاجة ... ؟؟؟؟؟ واش باقي كتعتبرو السن معيار ؟؟ السن راه مجرد رقم .. الحياة عمرها غاتمشي .... وداكشي لي فبالك ملحوق اماما .. اما متسقبلي الى مخدمتش عليه فشبابي نهار نعيا راه مغانقدرش ليه ..
لامار : كتتمشي ابنتي كتمشي ... الياااام كطير عاد البارح ولدتك .. لبارح عاد كنت كنعلمك تمشاي ... كطييير ليام ... واش عارفة بلي حطمتي الرقم القياسي فشحال من واحد جا خطبك لحد الآن ؟؟؟؟
قسم : ففففف ( ردات شعرها للور ) بابا هضر معاهااا ... راه ملييييييت والله تااااامليت .....
خلاتها وناضت معصبة وجود تبعها بعينو تادخلات ...
واسد غير ساكت وكايشوف ...
لامار : راه رزاف هادشي والله تابزااااف ... واحد كل نهار جايب ليا مشكل كنصلحوه من موراه فامريكا ... واحد كل نهار مهزوز فالكوبتيرات معطوب .. وحدة لاحت حياتها كلها عرض الحيط ... وعلم الله اش غايخرج من داك خيتي تاهي
قدس : انا مادرت والو ..
لامار : داااابا ديري يابنتي حقك تانتي .....
اسد تنهد وقرب لعندهم قاد الكلسة ... من اللول شاكين فسكوتو وغير انه مزال مطلعش .. الا وكايتسناهم تجباد الودنين ... حطو تيليفونات وقادو الكلسة ...
اسد : كبرتو ومابقيتوش صغار ... مغانبقاش تابعكم بهادي مزيانة وهادي لا .. كنضن وليتو عارفين نتائج اخطائكم .. ولي مزال مدار كايتعلم من هداك لي دار .... (شاف عند لامار)قسم مكنشوفهاش غالطة .. كنشوفها بنت مزال مالقات الشخص المناسب ليها ... ماشي بنتك لي غااتخلي مستقبلتها وتخرج تقلب على راجل .. هوو لي غايجي وغاينضم ليها وقتها ويخليها تخصص وقت ليه ... لي شافها فالحفل .. ولا فمؤتمر ولا فعرس .. ولا فاجتماع ولا فتلفازة وجا خطبها .. ولا لي دارليا بنتي صفقة .. هداك ماشي لي غايستاهل بنتي .. لي غاتبغيه بنتي هو لي غايشوفها قسم ... مغايشوفهاش بنت الاسماعيلي ....لامار : اوا شنو غانبقاو نتسناو فهادا حتى تشرف البنت ؟
اسد : بنتك باقيا صغيرة .... والحياة قدامها كتسناها .... ملي يجي لي مكتاب ليها غاتزوج .. ماتبقايش تكتري عليها .. حيت نتي عارفها كاتبغي دير الخاطر لكولشي وغاتقبل بشي واحد ماباغياهش غير على قبلك .. وهاديك هي لي عمرها ماتكون .... وجوود ( شاف عندو) قراري بخصوصو راه واضح وباين قدامو .... تشري اولدي گراح بالتخبية ... راه ماواكلاش معايا ... بغيتي تصنع هياكل الطموبيلات ... نعاااونك .. صمم .. خدم على راسك .. انا ماشي ضد موهبتك ... انا ضد السباقات لي كدير ...
جود : وحدة كتكمل لوخرا ..
اسد،: لا .... ماعنديش انا هاد الهضرة عندي الحاجة مانديرها حتا تكون كاملة مكمولة متحتاجش شي حاجة اخرى تكملها ... بغيتي تمشي فالمجال ديالك سيييير انا من بعد الله نعاونك ... فنفس الوقت تحضر مع باك فمجالو .. تتعلم .. سطااااجي عندي شوف للخدمة كيفاش دايرة ... تعلم للتجارة وعالم البزنس .. راه هو نفسو لي غادي تمشي فيه الى بغيتي تخدم على فكرتك وهيلكة السيارات والتسويق ليهم ...باش تصنع ماركة خاصة بيك ... خاصك تكون دييب فالنجارة وتكون معلم وقاااري السوق كيفاش داير ....ماشي بين وليلة وضحاها غانتجح ... ايه موهبة كاينة ولكن خصك التمريس .. خصك الوقفة والهيئة ديال رجل الاعمال ... تانا قبطان !! ولكن لابد من البورصة والسوق التجاري لي غايطلع ليا سمية الكابيطين .... كدالك نتا وهادشي غاتعلمو الى جيتي لعندي ماشي تصبع ناعس تالربعة دلعشية .. واتسنى راسك تنجح !!! راك اولدي عدييييييم المسؤوولية بالمرة ؟!!!
جود : نتا عارفيني خدمة البيرويات والكرافات و البروتكولات ماعنديش معاهم ... انا كنمارس هواية نعمر وقتي .. الخدمة انا ماشي ديالها ...ونتا عارف لي كاين آلواليد منحتاجش نشرح ...
اسد : المرض عمرو كان سبب يخليك تتوقف ... حتى انا كانت عندي اعاقة كاع .. ولقيت الحل وكملت حياتي مكلستش نبقى بيطالي .... جود هاد المرة كنضهر بالعقل وبالهداااااوة معاكم .... وملي مكيتنفدش اش كانقول ... كتولي هضرتي بطريقة أخرى ونتا أكتر واحد عارف هادشي .... خليني ليوما زوين وطنهضر مع ولدي مزيان .... ( شاف عند سلطان ) والهضرة ماشي غير ليه ....حتى نتا مابقيتيش صغير .... مزيان تلعب كورة مزيان .. يتجمعو عليك الناس للسيلفي .. يعيطو عليك النوادي ... كل مرة سيارة رياضية كادو ... ابارطمون فيلا .. مزيااان هادشي ... ولكن واش درتي بحساب لاقدر الله وقعات شي اكسيدون ؟ تهرسي من رجليك ؟؟؟؟؟ حبستي على الكورة،؟؟؟؟؟ واش دايرر البديل !!!! ولا غاتسنى باك يصىف عليك حتى نتا ...؟؟؟؟
سلطان هبط راسو حداه كايبانو متأثريييين وهوما لي فراسهم فرااااسهم .....
اسد : راكم مواقفين على رجليكم اولادي .... ومنكدبش عليكم مامهنيش عليكم ... اه رجال .. ولكن مامحمريش الوجه .... حنا تعبنا ووفرنا ليكم العيش الكريم ... اش وفرتو تتوما لولادكم ؟؟؟؟ ردو البال ... قبل ماتشوفو مني شي تصررف لي مغايعجبكمش ( وقف ) تصبحو على خير .... لوؤي .. تبعني نتا للبيرو
لوؤي شاف فيه بتسائل ورجع شاف معاهم ..
سلطان : ( بهمس ) الله يرزقك التبات .. سير ومتخاف ومن والو ......
جود : اللهم لا سهلا الا ما جعلته سهلا ... سير الله يوفق سير .....دخل اسد لدار وتاجه لواحد لاصال ديال البيلاردو وفيها حتى المكتب ديالو .. ولوؤي تابعو ...حل وشد الباب ... واسد جلس على الحرف ديال طاولة البيلاردو كايشوف فلؤي مدة كايوزنو ....عاد نطق
اسد : حتى لامتى غاتبقى هاكا مقاتل مع باك هم ؟
لوؤي : ( تنهد ) نهار يفهم بلي ولدو كبر وقاد بمسؤولياتو ...ومايبقاش كايخاف عليه يقطع الطريق بوحدو .....
اسد : اهاه .. واخا ... تقدر دابا تفهمني نهار تولد حتى نتا ويكبر ولدك .. وتشوفو كايسافر من بلاد لبلاد ... بلا خبارك ... ونتا معارفش اش كايدير .. كيفاش غاتعامل ؟
لوؤي : لاكان قاد براسو .. مكيهمنيش
اسد : مممم ... ( بجدية) باك خصو يعرف خدمتك .. السرية ديرها مع البراني ... والديك معندهم علاش يفضحوك ....
لوؤي : راك عارف الطبيعة ديال ديك للخدمة .... وأديت القسم منهار انضميت ليهم .... راك شاهد على كولشي ...
اسد : ومن الول وانا رافض تخبع على باك ... ومكنبغيش ندخل بيناتكم رغم ااني شحال من مرة بغيت نخبرو .....
لؤي : مغايقبلش ... راك عارفو نهار كنت كانقوليه بغيت نلتحق بالبوليس كان كايرفض بحكم غانبقى فالخطر ... فمابلك الى سمع الفدرالية ...
اسد : هاكدا باش غاتجازيه ؟ سيفطك لامريكا تقرا .... باغي يشوف ولدو فجنبو ويهز عليه تعب ديال السنين .... تجيه من تما مناجحش فداكشي لي سيفطك تقراه ...فنفس الوقت دفعتي تخدم خدمة مخبعة عليه ؟ اولدي ... واش عارف قيمة الوللدين ؟؟؟
لوءي : عاارفهم ... ولكن الواليد من صغيري معيشني معقد .... كابيغي بديفرض عليا شي حوياج ماشي ديال شخصيتي ومنقدرش عليهم اعمي .. شي حوايج ماقدرش هو يحققهم فشبابو علاش نحققهم انا ؟ عمرو كان كيسمع ليا ولا كايتناقش معايا ميولي وشنو باغي ندير وفين كنرتاح ... صافي عندي خدمة ختاريتها يتقبلها ..
اسد : على هو عرفها باش يقبلها ؟
لوؤي : على الاقل يتقبل انه كبرت وقاد براسي ....
اسد : مكبرتوووش ... نتوما باقين كيف داك الطيور لي فالعش كايتعلمو يطيرو ووالديهم حابسينهم ومابغاوش يطلقوهم حتى يشوفو جناحهم تمكن يطير ... حيت هوما لي عارفين بحق الريح كيف كتدي الواحد .. مزااااال ماوصلتو لمرحلة تتتلاحو للتحت آولدي ....مزال جناحكم صغير ( لوؤي كايشوف فيه) عدنان من حقو يخاف عليك .. حيت حتى هو بسبب العزلة ديالو على المجتمع ... تربى معقد .. وعاااش هاكاك .. حتى لقا راسو بين يدين عصاابة ... وتلاح لداك ااعالم بلا خاطرو ...ماباغيش يشوف ولدو كايعاود نفس أغلاطو ... نتا عارف عدنان ماشي من النوع لي غايجي يقوليك نتا عزيز عليا .... عدنان كايبين ليك معتزو من تصرفاتتو ... خااايف عليك ماشي خانقك .. حيت باقي مكنشوفوكمش قادين براسكم واخا كبرتو ... مزال ما تحكييتوش .. مازال الزمان مقراكومش ...
لوؤي : واشهد الحق اعمي .. علاش يقول هاكاك فالوسط قبيلة هادي هي التربية ؟
اسد : ااه .. من حقو وكتر عاد .. حيت قالها ليك مرارا وتكرارا بينك وبينو وماسمعتيش ليه .....ماشي غير نتا كلكم حتى ولادي .... كاتكلسو شادين تيليفونات ... نعاطينش قيمة للداك الجلسة بالمرة ؟ ولكن غاتفكرو هضرتنا نهار تخطاااكم العائلة .. نهار تلقى اولدي راسك بوحدك وفالاعياد كتمشى تخبى فشي بلاصة ماتشوفش العائلات مجموعين وتفكر حرمانك .... نهار تمرض وماتلقاش حتى لي يسول فيك ونهار تبغي تخطب وماتلقاش شكون تدي معاك ....عااااد غاتعرف شنو هي قيمة العائلة وتتمنى غير جلسة بحال هاديك ماتلقاهاش . التيليفون غانلحقوه ... ولكن الوقت لي دوز مع عائلتك دغيا كاطير وكايمشي ومكيتعاودش ..... ومابغيناكمش حتى تحرمو منها عاد تحسو بيها ....داكشي علاش حفينا معاكم الحجرة كل سواغي كايتعاود نفس الموال .....رد لبال لتصرفاتك ... رد لبال
لوؤي : ( رجع كلس على الكرس كايتنهد وشاف ليه ) نتا عارف اعمي معزة واليديا عندي ... ومعزة العائلة كاملة ... كون كان كايتفاهم الواليد بالعقل كنت غانشرح ليك كيما جيت عاودت ليك نتا آعمي ... الواليد مكافيتفاهمش ...و راك عارفو مريض بالقلب كنخاف عليه بسبابي توقع ليه شي حاجة مغانسمحش لراسي .... والواليدة دغيا كتخلع كتكمل عليه ... وخدمتي لالد تبقى فالسرية باش نحميهم ...الى عرفوني تابع المافيات الكبار غايسكت ليهم القلب آعمي ... وانا مامستعدش نخون الالتزامات لي على راسي دابا .... انا دخلت لهاد العالم وماباغيش نخرج منو ..اسد : كلامي واضح وباين ... الولدين مكانخبيوش عليهم ... غاتكلس مع باك وغاتهضرو بالعقل .. عدنان مكيعضش ومكياكلش البشري .. مابغيتيش تقول ليه على خدمتك شغلك هداك .....ولكن حاول تبعد ليه من راسو الشكوك القباح ... طمنو انه مكديرش شي حاجة غلط .. وطمن قلبو المريض ... حيت لامشات وقعات ليه شي حاجة ....غايهزك الما ..
لوؤي : يكون خير اعمي يكون خير ...نحل غير شي حاجات فوق راسي ونصارحو ان شاء الله ... ( ناض عندو عنقو ) راك عارف اقرب عمامي ليا هو نتا .... من بعد كل گلسة معاك كنخرج مرتاح ومرسومة طريق قدامي ....
اسد : بالمكانة ديالك انا كنهضر معاك .. حاطك بلاصة ولدي ونتاا عارف هادشي ....
لوؤي : نتا راس مالنا اعمي ...ومرة اخرى ( بابتسامة ) الله يجعل ايامكم كلها عيد ....
اسد : امين ... تصبح على خير ...
خلاه وخرج و لوؤي رجع كلس على الفوطوي تما مطلع راسو كايفكر فكلام اسد .....
قدس ولامار طلعو تاهوما ينعسو ... وبقا جود وسلطان ضاحكين وماجدة كاسة معاهم
ماجدة : مغاضحكوناش معاكم
سلطان : ( شاف عندها ) مكنصابوش هنا المانكير ...
ماجدة : اوا غاضحكونا
مارد عليها حتى حد ونفضات المخدة وطلعات تاهي تنعس ...
سلطان : مزال واحل مع هاد خيتي
جود : تمشي تقود ....
سلطان : برررب ماعرفت فين كااان عقلك
جود : ( حط تيل وشاف فيه ) جاااات *لواااانية باغا ت*وااا .... نوض نقرا عليها الفاتحة ؟ خدات اش بغات بالدل وقودات بحال لي سبقوها ....
سلطان : غاتلسق فيك دابا
جود : بغات خلاصها نخصلوها .. . مالها رخيصة علينا
سلطان : مهضرتش على الخلاص .. غاتنوض تلسق فيك شي كرش ولا تقوليك ديفيغجيتيها
جود: واش منتيك وجه لاڤيغجينيطي هاديك ؟؟؟ راه كانت الطررييق عندها مززززفتة بلا ڤيراجات ... والحمل الى كانت غاتحمل من المعدة منعرف ....
سلطان : بنادم مرخص راسو لهاد درجة ...منلول مكتسرطش ليا .... بعد على الخرا ماشي ديالنا واخا والديها عزاز ....
جود : انا بررب ماعند مّي غرااااام دالموشكيل ... بغات تولي *حبة نوقف انا قدام طموحاتها ؟ مايمكنش ...
جات فوقيتة انا ضااااارب الپلان ... خصني غير معامن ..... تلاحت كدير خدمتها ...
سلطان : مكنتيش صاحي ؟؟؟
جود : واش كون كنت صاحي غايوقف ليا على هاديييك ....
سلطان : بعد على الخرا .. لسقة هاديك ..
جود :حتى اانا كنعرف نلسق الواحد مع الحيط .. تزيد تفوت حدودها غاتقود معايا السوايع ...
سلطان : نتا خصك تزوج نتا ..
جود : هه !! لا لا داكشي لي خاصني ... ( وقف ) نوض نهبطو للبحر نوض الجو زوين
سلطان : ملابسش الشورط ...
جود : طلع جيبو ولحق عليا ...شرقات شمس نهار جديد على قصر الاسماعيلي لي صبح فاللمة عائلية خاصة بالكبار على طاولة الفطور اما الاشبال الشباب كلهم صابحين ناعسين ....
من غير قسم لي مبرمجة على وقت واحد كاتفيق فيه واخا العطلة مكتقدرش تبقى ناعسة ...
دخلات للغرفة الخاصة بلوحاتها التشكيلية ... وبدات كتخط بعض الرسومات ... حتى كتدق الباب دخلو ليها فطورها المتكامل الصحي لي الموني ديالو كاتباها الدكتورة ديالها الخاصة ... خلات اللوحة فالنص حتى تكملها كان عبارة على وجه جا لمخيلتها هاد للصباح...
خرجات من البيت كانو الخادمات كايجمعو ليها سريرها ... كانت بغوب دونوي ساطان حريرية فالغوز قصيييرة .. وصندالة فرجليها فيها وريدة .. رجيلاتها صغاااررر ومطبزين وضفيرات مقادين نقيين... خرجات للبالكون والخادمات تبعوها بفطروها لتما ... شكراتهم بابتسامة وشدات كاسها ديال الحليب باللويزة ويد فيها جوغنال كاتقرا ... وجهها صابح منور كيف شمس الظهيرة .. عينيها البنين كايلعمو فالشمس وخصلات شعرها كايتبعثرو مع هبوب النسيم ..
خدات فطورها فهدوووء ... ثم ناضت كتختار بصبعها فالعلاقات ديال حوايجها لي دخلو ليها ديال اليوم الاحد من الدريسينغ الخاص بيها ... كايخرجو السيغي لي عارفين كاتلبسهم ملي كتكون فالدار .... ولبسات غوب كحلة بحزام ... مع صنيديلة فرجليها وسويعة رقيييييقة ماسية ... الوجه مكتكرش فيه مكياج كايعجبها يبقى على طبيعتو نقي من غير مرطب الشفاه وليكخون ..
تاجهات لجناح جود وبدات تحل عليه فالريدويات بالطيليكوموند وهو كايخسر ملامحو ويزيد المخاد فوق راسو .. عرفات شكون خاصو باش يفيق ...
تاطهات لواحد البيت صغير بابو حديدي .. حلاتو وتلاح عليها روووكسي ... كان هااسكي " ذئب سيبيري" فعمرو عماين ونص الفرو ديالو حريري بين الابيض وبقع بنية وعينين رماديين ...
خرجاتو معاها كتمشط على شعرو القوووى وهو راخلي لسانو ... وجراتو تالعندو للفراش .. هو يطلع على سرير تازعزعها بيه وتلاح كايخبش فظهرو ...وجود ضربو بيدو لاوحو لاجنب ...وقسم كضحك ومشات كتخبش فيه وفشعرو
قسم : جووود .. واانوووض .. جووووود
علا راسو مخنززرر وهي تضحك
قسم : صبااااح نوووررر على اجمل اخ فالدنيا ...
جود بقا كايشوف معاها مبوق بنعاس ورجع حط راسو على رجليها كايكمل نعاسو وهي كتمشط فخصلات شعرو البني ... وهضر بصوت ثقيييييل مبحوح بالنعاس
جود : صباح نوور ماڤي "حياتي" ...
قسم : وناري على راس عندك شحال ثقيل قىبتي تهرس ليا رجليا .. عاد عرفتو علاش قاسح .....( بدلع) جوووود مغاتنوضش تدوز معايا هاد النهار .. ديما شامتني فهاد الديمونش ... مكتفيق فيه تاليل .. ونا كنكون مشيت ننعس ..ليوما نوض راني توحشتك وتوحشت شي خرجة انا وياك .... عفااااااك
جود : ( كايزيد يتمخش فيها براسو) مناعس تالسبعة دصبح .. نزيد شوية ونوض ...
قسم : هاد السيستيم لي غادي بيه معاجبنيش .. الكونجي ديالي قريب و غاانوريك السهير شحال ساوي .... مالك هامل صحتك ونظام عيشك بحال هاكا ...نتا خصك شي كوتش ضروري ...
جود : جايا تحاضري عليا على صباح محشميتيش،... نوضي صاوبلي قهوة بغيتها من يدك ( باس ليها ديها)
قسم : على انا شحال عندي منك .... نصااوبها لخويا الحبييييب( باست راسو وناضت تصايلها ليه )
في مكان آخر
∆حي من الاحياء الشعبية المغربية ...
داخلة للكوزينة بنت عشرينية لابسة عباية ومطلعوة جناب ديالها مع السليب ورجيلاتها بوووويض غليلضين ملتحت لقصر القامة ديالها ... وشادة شعرها لور بمقبط وشي خصلات كووووحل نازلين .. شعرها بحال سواد الليل ...ومن المشية واضح انها يلاه فايقة من النعاس .... شعلات الراديو وملي جات مع اغنية لي كاتعجبها جهدات ليها كدندن وتشطح وكدير الفطور .... تاسمعات الباب تخبطات وهي تطير دغيا نقسات الموسيقى وهبطات البيجامة على رجليها ... وقلبها كايضرب ....
دخل مع الباب وحط ساشي فيه الباگيت " الكومير" والحليب ... وشاف معاها
اصيل : اش باااالك نتي نفطرو حتى لغدا حسن ؟؟؟؟؟
سلمى : ( كتمشي وتجي ودير راسها كدير شي حاجة وهي تلفات ) ه هانا اخويا ... ا اندير دابا .. ك كنت كنتسى الحليب ... غ غير كلس .. غانوجد دابا ....خرج من الكوزينة وتاجه لصالون لي كان عبارة على جوج سدادر ملمطين وطبلة مستطيلة دالخشب فوقها ميكة .. وقرعة دالما وطيليكوموندات داابلازما لي فالحيط .... جلس فيه مطلع راسو لسما كايسوط .. وهم قد الجبل فوق ظهرو ... كل مرة ينقص منو شوية بتنهيدة ...
سلمى دارت الحليب يطيب وهي تفكر المجلة لي كتجيب ليها صاحبتها محطوطة على طبلة وخرجات كتجري .. لقاتو كاع مراهش فداك العالم وهزاتها خباتها بلا متبين ... ودخلات لكوزينة ...
سلمى : مال هذا عاوتاني ؟؟؟؟ ...
رجعات تكمل فطورها بكل توتر باش ماتغلطش فشي حاجة يرد عليها حرو كتعرفو ملي كايكون مقندش كدير لي فجهدها متكونش هي علامن يجيب السبة ...
حطات للفطور .. وكبات لين القهوة وبقى كايضور فالكاس بين يديه وساهي
سلمى : ( سرطات الدغمة وهضرات ) خويا .... ياك لاباس ؟؟ واقعة شي حاجة ...
ضار براسو شاف فيها ورجع ناض
سلمى،: هاااء ؟؟؟ ماااتفطرش ؟؟؟؟؟؟؟
مجاوبهاش وطلع لبيتو للفوق لي فسطح ....حيد التيشورت ونفش شعرو ... وهز كارو وخرج لسطح برا كايكميه وبراهش الححومة كايلعبو ... عينيه كانو بلوون السما .... واحد الزرقة ماشي عااادية .... الزرقة لي كتكون غالبا وراثية ... زرقة العنين لي كتمشي مع الحروف الكحلين .... الملامح الناذرة .... ولكن داافن نذرة جمالو وسط لحية كثييييفة مامقاداش و شعر مبعثررر ... وهاااامل راااسو .. وجهو كله كدمات بسبب الملاكمة الحرة لي كايمارس وكدخل ليه شوية دللصرف . عبارة على طوج كايقمرو عليه ... وهو يقااتل والى ربح كايعطيوه 10 فالمية من داك المصيب .. الملاكمة فالظلااام .. او كما تسمى بالملاكمة السوداء ....
كانو كتافو عرااض وسمريين ... عامرين كدمات زرقين وبعض الغراز .... فورمتو عااادية كأي شخص ثلاثيني كامراس الملاكمة والجري فصباح رغم انه مدخلش لاصال باش يوفر فلوسو ... الى انه واضح عليه بعض من اللياقة واللحم القاسحة ....
كمل الكارو ديالو وكمل معاه تفكيرو وخرج لبس تيشورت اخرى....بيتو كان عبارة على سرير و خزانة دالحوايج ومراية فالحيط وعلاقة و كوافوز عليه اشيائو .. كلو مروووون بالحوااايج والكاسكيطات والكابليات ديال الشارجورات مليوووحين ... هز فراشو نشرو فشميشة ... وخرج لبرا ...
سلمى غير سمعات الباب تزدحات عاد تهنات .. كانت قاااااابطة النفس ....
ناضت دغيا لسرجظ طلات بانليها ماشي فالشارع .. وهي تجبد تيليفونها من صدرها وسط السوتيام .... كاتشوف فالمجلة لي فيديها وكاتصوني .وتعض فشفايفها ..
سلمى : آلو حسنى ؟؟
حسنى : ( بصوت ناعس ) صبااااح الخير
سلمى : اويلي باقا نااااعسة
حسنى : والحد هدا اش بغيتي عندي .. اختي انا معنديش صعصع فوق راسي نوجد ليه فطورو
سلمى : حسنى .. خويا خرج .. جري اجب عندي محتاحاك ضرووووري
حسنى : لا اختي بعدي مني يطرا ليا كيف داك نهار شبع فيا تخنزير ... خوك مايقرب حد لساحتو
سلمى : ففف .. مهم سمعيني ... قريت المجلة لي مديتي ليا البارح من الشباك ..
حسنى : اشنو نجيبليك شي وحدة اخرى تاني ؟ راه اللخرة لي خرجات كتهضر عليهم هي هاديك ....مزال مكاين عدد جديد ....
سلمى،: لا لاااا غير هادي راه جابتلي تمام دابا
حسنى : نتي داك العائلة غاتخرج عليك لابقيتي متبهاها .. وبقاي متبعة لياا لخيال .. اشنو تاني نجيب ليك الانستكرام دشي واحد فيهم
سنى : ولااا ... دابا مابقيتش مزعوطة فيهم ... راااني شفت الخبر لي خلاني بلاااا نعااس
حسنى : شنو ؟؟؟
سلمى : بنتهم داك الكابيطين .. كاتبين عليها بلي كتعطي منح دراسية
حسنى : اه شفتها ؟؟؟ علاش فاش كايهمك نتي
سلمى : اوييييلي على فاش كايهمك .... راه نموت وناخد تانا داك المنحة .. عارفاني خديت الباك وحبسني فالدار
حسنى : اويلي اويلي نندب ولا اش ندير ... واش بغيتيه يييعلقك فالپوطو ديال الدرررب ؟؟؟؟؟ واش مريضة نتي لا ؟؟؟؟؟؟ واش مكتعرفيش خوك ولا كتحماقي عليا ؟ ... سيد مكيخليكش تاتخرجي للحانوت .. بقى غايخيليك تمشي تقراي بمنحة فالكليات الخاصيين ديال شكون وشكون ... لا زمتين غاتجبي المنحة من بنت الملياردييييير دلافريك ... ياااااسيري تنعسي سيري ....