أينَ يُباع النسيّان؟
أين أجدُ ملامحي السابقة؟
وكيف ليَّ أن أعودُ إلى نفسي؟
شافت فيه بحزن
شيماء : انا تمنيت كون مكانتش عندي ام حيت عمرني حسيت بحنانها واخا هيا معايا و هيا سبابي حتا وليت هكا
تامر : تقدري تعاوديلي ايلا بغيتي و خوي عليا قلبك وكنواعدك بلي سرك فبير
شيماء ( شافت فيه بابتسامة مصطنعة ) : يالله نمشيو نكلسو بعدا
تامر : سيري سبقيني انمشي نجيب شي حاجة نشربوها و نجي
شيماء : واخا انا نتسناك
مشات كلسات حاضياه من بعد و كتدقق فكل تفصيل فيه و كتفكر كيفاش انسان بحال هادا مهتم بيها و شنو سبب اهتمامو بيها
فجهة اخرا
فاقت عينيها منفوخين و عضامها ضارينها بسباب لبرد مشات لدوش طلقات الما سخون هابط مع لحمها دوشات وتلوات فالفوطة و خرجات لبسات بيجامة سخونة فالحمر و تقاشر كحلين و دارت فوطة علا راسها و مشات لصالون لقات لبنات فايقين و حاطين الفطور كيتسناوها كلسات كتفطر فجو ساكت حتا قاطعاتو بكلام لي صدهم
عيشة : سمحو ليا علا هاد دل لي عيشتكم فيه وانا كنواعدكم بلي غادي نبدل هاد لخدمة و نخدم خدمة بشرفها ( نزلات دمعة من عينها ) سمحو ليا
مرام : ماما مكاين لاش طلبي سماحة حنا فاهمينك و غادين نتعاونو كاملين باش نعيشو مرتاحين
اسمهان : اه اماما معندك لاش تعتادري حنا معاك فأي خطوة خطيتيها و فجنبك ديما
عيشة : علاش شيماء مفكراتش فيا بحالكم و محساتش بيا و مقالت بلي خاصني نوقف جنب ماما فقط مشات و خلاتني
مرام : ماما شيماء ماشي لخاطرها دارت هادشي راك عارفاها هيا اصلا ديجا معقدة من جيهت خدمتك و كملت عليها هدرت ناس
تنهدات عيشة كأنها حاملة دنيا كاملة علا كتافه
كملو فطورهم و بقاو كالسين هاد نهار غير فدار كاملين حتا وصل اسمهان مساج لي طيرها من فرحة
اسمهان : يااااي لااا مايمكنش واخيرا الحمد الله ياربي
عيشة : خبار الخير ابنتي فرحينا معاك
اسمهان : تقبلت اماما تقبلت فاشهر شركه لعرض الازياء متصوريش شحال فرحانة
بقوة الفرحة طلقاتها عيشة بتزغريتة دايزها الكلام اما مرام حتا هيا فرحتها مكتوصفش حيت ختها اخيرا حققات حلمها
مرام : مبرووك عليك احبيبة ديالي فرحة ليك
اسمهان : شكرا بزااف نااري متصوروش شحال فرحانة خاصني نوجد راسي حيت غدا عندي عرض تجارب
# فجهة اخرا
متكية علا كتفو و كتعاود ليه علا حياتها وكاع دكشي لي طرا ليها و لي خلاها تكره خدمت امها حس بالشفقة عليها ولكن حاول ميبينش ليها بقا غير كيتصنت ليها باهتمام و هيا كتهدر و تعبر علا كل ما كتحس بيه
شيماء ( هزات راسها ) : احم سمح ليا واقلة كترت عليك
تامر : لا بالعكس انا مهتم باي حاجة كتعلق بيك و بغيت نعرفها سوا خايبة سوا زوينة
شيماء ( تزنكات ) : احم شكرا
تامر : هدا واجب كنضن خاصنا نمشيو غادي يتخلع عليك قيس
شيماء : اوكي يالله نمشيو و كنتمنا نعاود نزور هاد البلاصة مرة اخرا
تامر : فأي وقت بغيتي تجي علميني نجيبك انا
شيماء : شكرا بزاف علا هاد لوقت زوين لي عطيتيني ليوم متصورش شحال كنحس براسي رتاحيت بعدما عاودت ليك كاع هادشي لي متقل عليا
خرجو من جردة باتجاه لوطو ركبو و مشاو لدار لقاو قيس كيتسنا بيهم تمات غاديا طالعة لبيتها و هو يقفها صوتو
صقر :ايي فين غاديا من زنقة لبيتك كانضن خاصنا نهدرو
شيماء ( تلفتات بالعرض البطيء ) : وي فاش غنهدرو
صقر : كانضن رتاحيتي ادن خاصك تبداي لخدمة اولا
شيماء ( مشات كلسات قدامو ) : امم وشنو غادي تكون خدمتي انا
صقر : تامر أجي هنا واحد دقيقة
تامر ( كلس حداه ) : وي
صقر : شيماء غادي تخدم معاك يعني هيا مسؤوليتك و خاصك تشرح ليها كلشي بالتفصيل الممل
تامر ( فرح ولكن حاول ميبينش ليهم ) : واخا و امتا غاديا تبدا
صقر : تقدر تبدا من غدا
شيماء : كيفاش نخدم انا وياه مفهمتش
صقر : تامر عندو مكتب خاص بيه يعني غادي تخدمي نتي وياه فنفس المكتب فهمتي دبا
شيماء ( بتوتر ) : واش ضروري نخدم معاه
تامر : علاش عندك شي مشكل معايا
شيماء : احم لا ماشي هادشي لي قصدت
صقر : انا قلت لي عندي و انا متشاورتش معاك واش تخدمي معاه ولا لا حاليا البلاصة الخاوية هيا معاه حيت شريكو مات و نتي غتشدي بلاصتو
شيماء (شافت فتامر لي ماقاده فرحة ) : واخا
فجهة اخرا
كالسة قدام لمراية كتقاد ماكياج بعدما خدات دوش دايزو الكلام و ختها حداها كتوجد ليها حوايجها و عيشة فالكوزينة كتوجد الفطور كأنه عيد عندهم
بعدما كملات مكياجها بدات مرام كتقاد ليها شعرها سرحاتو من لفوق و دارتو بوكلي من لتحت و لبسات كسوة فالأحمر مفتوحة من عند صدر شوي و حد فخاضها لي كيبانو بيضين دارت لمسات الأخيرة و لبسات طالو ديالها و هبطات عند عيشة لي عجبها جمال بنتها و طلقاتها بتزغريتة
عيشة : تبارك الله علا بنتي هاد زين كامل والداه انا
اسمهان : كيف جيتكم
عيشة : تحمقي الله يحميك من العين
اسمهان : امين اماما
عيشة : يالله كلسو تفطرو قبل متعطلي فأول نهار ليك
كلسو كيفطرو و ابتسامة مرسومة عليهم كأنه هاد نهار عيد عندهم ولكن لمة ناقصة بلا شيماء
كملو فطورهم فجو ساكت و خرجات اسمهان و عيشة كدعي معاها باش يدوز كلشي بخير و مرام توجهات لاحد المستشفيات تدفع وراقها حتا هيا تقلب علا خدمة
مشات للمستشفى دفعات وراقها و طلبات منها سكريتيرة تسناها تما حتا ترجع بقات كالسة و مشات سيكريتيرة لكتب ديال المدير دقات عطاها الادن باش دخل
سكريتيرة : موسيو إياد وصلنا ليوم طلب عمل بنفس مواصفات لي طالبين و زائد انه هاد البنت عندها نقط زوينين و ديبلوم ديالها حتا هوا مزيان
إياد : اوكي سيفطيها لعندي و خليلي وراقها هنا
خرجات سكريتيرة توجهات عند مرام قالت ليها بلي المدير كيتسناها فالبيرو ديالو مشات تبعاتها حتا وصلو لبيرو دقات عطاها ادن دخلات
بدات كتقرب ليه و قلبها كيدوب و كتهدر فخاطرها
مرام : الله ياربي اش هاد الزين كامل اش هاد العسل عيون كحلين كسواد اليل وداك الشعر المجعد الشهب اخخخ علا داك الفم صغيور غير ديال البوسان و فورمة هيا واشمم فورمة عضلاات منفوخين باينة فيه رياضي
قاطع تفكريها صوتو لي قفزها
إياد : غاتبقاي واقفة
مرام : احم لا انا نكلس
إياد : ادن نتي جيتي باغيا تخدمي معانا كنضن راك عارفة سمعة هاد المستشفى و بلي ماشي اي واحد يقدر يتقبل فيه
مرام : اه دكشي علاش جيت ليه و عندي امل انني نتقبل فيه
إياد : امم عندك غير امل ممتأكداش
مرام : احم انا متأكدة انه خدمتي غاتعجبك
إياد : نتي ماشي اتخدمي ليا ميناج هنا باش تعجبني خدمتك
مرام ( تقرصات من هدرتو و فنفس الوقت تعصبات ) : شوف نقوليك جوج كلمات بغيتي تقبلني قبل مبغيتيش متبقاش ضيع ليا وقتي هنا وقتي غالي علا اانني نضيعو
إياد : واش جيتي تخدمي ولا جيتي ضاربي
مرام : سمح ليا مقصدتش
إياد : مهم خلي نمرتك فالاستقبال و غادي يعلموك ايلا تقبلتي تقدري تفضلي
خرجات و عرفات راسها قفراتها كتلعن فلسانها لي ديما خارج عليها و كتدعي انه يكون قلبو كبير و يقبلها
مشات لدار لقات عيشة كتسناها غير دخلات وهيا توقف
عيشة : امدرا ابنتي اش درتي اربي فرحيني حتا نتي
مرام : نتسناهم اماما حتا يعيطو ليا
عيشة : ياربي تقبلي يابنيتي و ديري مستقبلك حتا نتي ترفعو ليا راسي
مرام : نشالله اماما كاين شي غدا
عيشة : كاين ابنيتي كلسي كلسي تعشاي
حطات ليها الغدا لي كان عبارة علا طاجين دايزو الكلام مرتبة فيه الخضرة و معاه شلادة و مونادة و قرعة الما و الخبز يالله طايب
مرام : اححح و شحال توحشت لماكلة ديالك اماما
عيشة : من ليوم ابنيتي انا لي نطيب انا لي نعجن انا لي ندير كلشي نتوما ديوها ليا غير فخدمتكم و حمرو ليا وجهي
كانو مجمعين حتا دخلات عليهم اسمهان
اسمهان : امم مجمعين تغداو بلا بيا محشمتوش
عيشة : أجي ابنيتي من حد لغدا باقي سخون
اسمهان : واخا غير نبدل اماما
فجهة اخرا
صباح جديد بأحدات جديدة فاقت علا أشعة شمس ضاربة فعينيها ناضت توجهات لدوش دارت روتينها صباح خرجات لبسات سروال دجين كحل اوفر و قبية كحلة مع سبادري كحلة جمعات شعرها كوب شوفال دارت ميكاب خفيف مع حلقات صغار و سنيسلة لي مكتحيدهاش من عنقها هبطات لقاتهم مجموعين فصالة كيتسناو الفطور
شيماء: صباح الخير
تامر و صقر: صباح النور
صقر : واجدة لاول نهار ليك فالخدمة
شيماء : انا واجدة من شحال
تامر : ادا غير نفطرو و نمشيو
شيماء : وي حتا نفطرو
تحط لفطور تجمعو علا طبلة لي كانت كبيرة عائلية و هوما غير 3 ناس كل واحد فين كالس ولكن هاد لمرة زعم تامر و كلس حدا شيماء لي بدورها تصدمات من تصرفاتو
كملو فطورهم فجو هادىء و مشا تامر لطوموبيل كيتسنا شيماء باش يخرجو و هيا مشات عند صقر لبيتو
شيماء : صقر زعما متقدرش تلقا ليا شي بلاصة اخرا من غير مع تامر
صقر : للأسف البلاصة الخاوية هيا معاه
تأفأفاات بأسف و خرجات لقاتو كيتسناها ركبات حداه دارت سمطة ونطالقو نحو طريق طوييل كيجمع حاضرها و مستقبلها طريق لي غادي تكمل فيه حياتها
وقفو قدام شركة صغيرة فمكان معزول وسط غابة كبيرة صعيب علا اي واحد يلقاها هبطات من لوطو و تفاجآت بشخص لي لقات قدام باب شركة