أمواج الحياة وتياراتها المفاجأة ..تارة ترميك لليمين وتارة للشمال.. مرة تنتر عليك فتات من السعادة والبهجة.. ومرات تغرقك فبحور من الهم والتعاسة ..مرات ترسم ليك طريق وسط الشوك.. ومرات تتلفك على طريق الحلم المنتظر.. وتايبقا الكلام الوحيد العالق فجوفنا هو.. ياريت ..ياريت كان قلم قصتنا بيدنا.. كنا كتبنا طريقنا بالحروف لي حنا باغينها وبلي كانشوفوه مناسب لأحلامنا.. ولكن واش فعلا حنا عارفين شنو الصالح والطالح لينا ولحياتنا؟ عارفين الحاجة لي غاتجي معانا ومناسبانا؟ واش كلمة ياريت.. فمحلها هاد المرة؟ أو غاتكون مصدر هلاك لينا ؟
..
الهدوء.. الصمت والراحة.. تلاتة المصطلحات شبه منعدمة فدرب المزاليط.. اجواءو الشعبية ماخطاتو لاشتا لاصيف، لاربيع لاخريف.. لا فاش كانت صغيرة وحلات عينيها اول مرة فهاد الدرب.. لا دابة وهي فريعان شبابها..
لابسة هودي فالاسود مع دجين اسود وسبرديلة فنفس اللون.. خرجات تشري الپاريزيان للفطور وفنفس الوقت دارتها سبة باش تتسارا فالدرب وحيوطو.. شعرها وراها مطلوق والابتسامة لي مكانت تبان فوجهها من ليين لليين بانت وشرقات.. تاتشوف فالعيالات.. فالصبيان والبنات..فالحيوط والخربشات..فالحوانت والمحلات وفالطيور والنبات لي كل شرجم فاي دار بيه تزوقات.. وحتا ناس الدرب غير مايلين بعناقهم وحاضيينها منينما دازت ..راسهم عاطيهم الحريق باش يعرفوها شكون وعند من جات.. دخلات للدار متاجهة للكوزينة عند حياة لي كانت تتشحر فأتاي وحطات ليها الخبز قائلة
فاطمة الزهراء: هاهو
حياة: ياكما دوا معاك شي حد.. واخا دربنا فيه قوة الهاراج ولكن خاطيه الباسلين هادشي لي فيه زوين.. غير هو عيالاتو ياختي متايحشمو متايعرفو دخل سوق جواك
ضحكات بخفوت قائلة: لا مادوا معايا حد.. غير كانو كايشوفو فيا فطريقة فشكل شوية
غمزاتها بمكر مبسمة: شافو الزين اختي الزيين
ضحكات برقة وقالت: جداتي فاقت
حياة: جداتك فاقت قباال منااا وخرجات فالصباح بكررري
فاطمة الزهراء: بصح.. فين؟
حياة: وشكون عرف.. حادة ماتعرفيها شنو تاطبخ.. غدا عاود غايتجمعو عندها العيالات وغاتشوفي الصداع بعينيه
ضحكات بتفاجأ وقالت: باقا تادير دوك الطقوس ؟
حياة: هههه طقوس !!
فاطمة الزهراء: ماعرفتش انا جاوني بحال شي طقوس ..يعني الكارطا وتتبدا تقولهم شنو يديرو وداكشي
حياة: ديك مي خطااار انا لي تانعرفها ..زيدي تفطري زيدي ..قارية اليوم ياك؟
بركو على الطبلة وجاوباتها قائلة: آه.. غير كنت باغا نشوف جدا عاد نمشي
حياة: واسيري لبسي هو اللول
شافت فالهودي لي مازال نقي وجديد وقالت: مال هادو؟
حياة: تاتمشي للجامعة هاكدا.. ياحبيبتي مالك على الكحل ونتي كيف الوريدة ههه
ببسمة خفيفة قالت: كانرتاح فيه
حياة: على راحتك الزين ديالي.. أصلا لي لبستيها تاتجي معاك ماشاء الله ديما منورة
ضحكات مرة أخرى بخجل وبدات تفطر..تتاكل بشوية عليها باش ماتوسخش حوايجها وماكلتها بحال ماكلت العصافير تتهز فتات بفتات ..شافت حياة فيها ساهية وحركات ليها راسها بمعنى شنو وحياة قالت بإعجاب
حياة: ماشاء الله غير ماماك محطوطة.. تتشبهي ليها بزاف
لمعو عيونها وتبسمات بزز قائلة ببحة مجروحة: الله يرحمها
حياة: آمين ياربي
حطات كاسها ووقفات؛ أنا غانمشي .. حتال الربعة تانظن عاد غانرجع
حياة: واخا احبيبة الله ينجحك
ناضت لبيت حياة لي تشاركاتو معاها وهزات سكادو ديالها .. خرجات من الدار ومن الدرب كامل كاتشوف حواليها وتحفظ الطريق وتبسم عند كل دكرى طاحت فبالها.. خدات طاكسي للجامعة و دوزات الحصص لي كانو عندها فداك الصباح عادبركات فالكافتيريا كيف العادة بوحدها تتراجع حتا اتاصل بيه باباها أنس وجاوباتو..
فاطمة الزهراء: الو
أنس: بنتي الغزالة.. لاباس عليك بيخير
ردت: صاڤا بيخير.. نتوما وصلتو مزيان
أنس: الحمد لله ابنتي.. ولفتي شوية تما
حركات راسها ببسمة خفيفة: أصلا حسيت براسي فداري ..ماتشغلش بالك عليا أنا فأحسن مايكون
تنهد وقال: داكشي لي بغيت حتا انا ..عيطت باش نعلمك بلي كاين واحد الحفل غدا الى بغيتي تحضري ليه
فاطمة الزهراء: حفل؟ ديالاش؟ أنس: الحفلة دارها عصام بمناسبة الذكرى السنوية ديال فرع الشركة ديالنا لي فالمغرب ..غايكونو ناس مهمين بزاف تما خصوصا فالمجال الهندسي.. سيري حضري منها تتعرفي على ناس مهمين ومنها تبدلي الجو شوية
قالت تتفكر: ماعرفتش صراحة.. ايمتا غاتكون
أنس: غدا فاوطيل سوفيتيل فالرباط.. غاتمشي ياك ابنتي
ردات شعرها ورا ودنها قائلة : يالله رجعت للدرب ومازال مارتاحيت مزيان.. زيد عليها تانقاد بيتي الجديد، من الأفضل بلاما مانمشي
وصلاتها تنهيدتو وقال: المهم أنا وصيت عميد الكلية يعطيك الدعوة فايدك.. فحالما غيرتي رأيك.. واخا كانتمنى تحضري بلاصتي تما ..بغيت كلشي يشوف بنتي الغزالة الدكية ويتعرف عليها
فاطمة الزهراء.. مهم دابة ..كيف دايرة كندا
رد: بحال ديما.. بالحق كانت غاتكون زوينة بحضورك الحبيبة ديالي
فاطمة الزهراء: حتال العطلة ونتشاوفو
أنس: واخا ابنتي إن شاء الله.. تهلاي فراسك والى حتاجيتي اي حاجة علميني
فاطمة الزهراء: واخا.. بسلامة
قطعات وجمعات كتابها وناضت للحصص لي باقين ليها..
انتهى اليوم ورجعات لدربهم وهي هازة ساكها فيد والدعوة فيد بعدما عطاها ليها العميد عند باب الكلية وهي خارجة.. دخلات مع الدرب تتجبد السوارت من جيبها ودازت على الباب المنقوش لي كانت ساهية عليه.. وقفات مترددة باش تدق لكن تراجعات ملي شافت حياة جاية جيهتها هازة الحليب وتمات لعندها غادة
حياة: الزين جيتي
سلمات عليها وردت: عاد وصلت
حياة: و آاش نوقفك عند باب عيشة
فاطمة الزهراء: والو غير.. كنت غانسول فيها وصافي
حياة: مرة خرا الحبيبة زيدي دابة راه عندنا الضياف
كمشات حواجبها باستغراب: ضياف؟ شكون..
حياة حلات الباب وقالت: ناس الدرب ..ماقدوش يصبرو مساكن ضرهم راسهم يعرفوك شكون
دخلات ورا حياة تاطل على الصالون لي بابو عامر بقوة الصبابط و اصواتهم المرتفعة.. حياة خدات من عندها الساك والدعوة حطاتهم فوق البلاكار وفاطمة الزهراء دخلات تاترد شعرها ورا ودنها وحناكها حمارو ..شافوها العيالات وسكتو من غير حادة لي مدات ليها يدها ضاحكة وقالت
حادة: دخلي الحبيبة سلمي دخلي ماتحشميش.. هادو غاجاراتي وحباباتي جاو يشوفوك ويقولو لك على سلااامتك ههه
بدات من القنت فالسلام وكل وحدة تتعنق وتبوس وتصلي على النبي.. حمرو ليها حناكها بالبوسان وضهرها بغا يتقسم بكترة ماتحنات ..ماوصلات للقنت فين باركة ليلى حتا تخنقات فيها النفس وبغات طج من حداهم.. شافو فبعضياتهم بنظرات باردة من طرف فاطمة الزهراء وشوفات ناقصين من طرف ليلى لي ماحملاتهاش من آخر فلاش دارت معاها ولولى مها لي تتنغزها تسلم كون خلاتها مادة حنكها للهوا ورجعات اللور.. بركات فاطمة الزهراء حتا جداتها تتحاول تبسم ليهم والعيالات تايسولو على أحوالها وأحوال باها، فحين ليلى نغزات مها وقالت عاضة فسنانها الضحكة
ليلى: هانا بركت وسلمت عليها رتاحيتي.. وانوضي نمشيو
ضحكات ضحكة صفرة وقالت: وااتبركي على الشوط طيبتي ليا جنبي بالنغير كل خطرة.. بركي وسكتي
ليلى: عرفتي شنو.. بقاي نتي انا غادة فحاالي ناضت بتبسيمة صفرا وقالت: مي حادة انا مشيت..
حادة: ولاش زرباانة بقاي ابنتي تشربي غاكويس تاع اتاي
ليلى: مرة خرا.. "شافت ففاطمة الزهراء ببسمة صفرا وهازة نيفها للسما" على سلامتك الغزالة.. مرحبا بيك معانا مرة خرا
بادلاتها نفس الإبتسامة وقالت: شكرا
ميقات ودازت خارجة من الصالون ..هزات سبرديلتها ووقفات عند الباب تاتلبسها وبالصدفة شافت الدعوة لي على البلاكار محطوطة ولي أتار انتباهها كتر هو إسم الشركة لي ياما حاولات تدخل ليها وبدون جدوى كل مرة تتلقا الرفض من طرفهم.. وقفات طالقة السبرديلة من يدها وخدات الدعوة تتقراها بتفاجأ وتبسم..
ليلى: هياا.. هههه ولاهيلا هي..
طلعات راسها وقلبها بالفرحة تايترعد وبدات بالزربة تاتلبس سبرديلتها حطات الدعوة وهبطات تاتجري مع الدروج لدارهم.. دخلات لبيتها مباشرة وجبدات البيسي ديالها تاتقلب على معلومات تاتخص الحفل علاش دار وشكون غايكون حاضر تما.. دخلات للصفحة الرسمية ديال الشركة وبدات تبحت وتعاود.. لقات فعلا إعلان الحفل وصور التحضيرات.. لكن ماشي اي واحد ممكن يدخل وضروري من الدعوة.. شخصيات مهمة ووزنها تقيل فالبلاد وخارج البلاد غاتحضر.. حفل عملي كترما هو احتفالي بالدكرى السنوية للشركة وكانت فرصة دهبية لكل من بغا يدير علاقات تجارية وشراكات جديدة ويتعرف على أصحاب الشركات الكبرى بالمغرب وخارجو.. فرصة دهبية لكل طموح وأصحاب الشركات ومدراءها .. لكن بالنسبة لليلى ..كانت فرصة من الألماس .. فرصة جابتها ليها الحياة حتال بين ايديها.. فرصة بمتابة اعتدار لكل خيبة أمل تعرضات ليها رغم تفانيها فقرايتها وعملها لكن تاحاجة متاتبغي تكمل ليها كيفما هي بغات وخططات.. طموحها فاق وبريق الأمل فقلبها شعل مرة أخرى وناضت تاضحك وضور فالبيت وتسنا مها حتا دخلات مزال حتا ماحيدات من رجليها هي تخرج ليها تتجري حتا قفزاتها
مليكة: ارسول الله مااالك
ردت بلهفة: ماتحيديش ماتحيديش جلابتك.. مشاو العيالات ؟؟
قالت مخلوعة: مشاو مالك شكاين
ضحكات من الودن للودن قائلة: عرفتي امي إلى وقفتي معايا فهادي.. بنتك غاضرب دقتها وطلع الفوق.. الفووق امي الفوووق ههه
تبسمات مليكة وقالت: فهميني شكااين اش غاندير اناا مربعة ايديها بوجه بارد تتشوف فليلى لي ملي دخلات هي ومها ماسكتات من الضحك وحتا جداتها معاهم.. قلبات عينيها بضيق وتتحرك رجلها بنفاد صبر.. حتا قالت هاهي خرجات فحالها وعاود رجعو ولولا جداتها كون ناضت من حداهم خصوصاً حركات ليلى وضحكتها لي عارفة انها ماشي من قلبها الشي لي برزطها وتايستفزها كتر
ليلى: احقا.. نسيت گااع ماسولتك افاتي.. فاينا جامعة نتي
ردت وهي تتشوف فيها بنص عين: علاش!
ليلى: ايوا نشوفو التخصص لي دايرة والى كان فاش نعاونوك علاش لاهههه راه قالك لي فاتك بليلة فاتك بحيلة هههه
زفرات من انفها وقالت: الهندسة
ليلى: اوووه مزيان مزيان.. الله يوفقك الحبيبة ديالي ..الى حتاجيتي اي حاجة مانسمحش ليك إلى ماقلتيهاليش عار الجار على جارو ولا لا امي حادة؟
ردت حادة بحكمة تتحرك راسها: اييه ابنتي الله يكملك بعقلك
ليلى: أميين ..احم
نغزات مها تهضر ومليكة بدورها قالت بتودد: والصراحة امي حادة.. مايخفاش عليك بنتي مسكينة شحال تعدبات وحفاو ليها الرجلين باش تلقا خدمة وتهزني انا وخوها.. ماخلات مسكينة شركات مخلات معامل ماخلات قهاوي ماخلات مخبازاات ووالو مجابش الله ..والخدمة لي لقاتها الزغبية وقالت الله تهنيت، تايضورو بيها الضبوعا ويطمعو فيها
كملات ليلى متنهدة بحزن: آآآه امي حادة.. المعقول والله مابقا باغيه حد.. انا تانقلب على طرف الخبز بالحلال وبنادم تايطمع فيك وفلحمك والى مابغيتيش يقولك الباب
خسرات حادة سيفتها وقالت: اعود بالله ..الله يعطيهم قطيعة ابنيتي
ليلى: اميين امي حادة اميين
شافت فمها لي بدات تقاد الكلام ففمها وقالت: ا ا ..دابة امي حادة كيشتي بنتي غير غادة ودفع للشركات.. على وعسى تقبلها شي وحدة فيهم وتلقا المعقول.. ايوا وواحد الشركة بغات تحماااق وتخدم فيها ..عيات مسكينة تحط ليهم ل.. شسمو؟
ليلى: سيفي اماما.. ولكن والو حلفو لاعيطو ليا.. أنا عارفة حيت ماعنديش خبرة فالخدمة ولي دخلت ليها متانطولش داكشي علاش قالو هادي مافيدهاش ولكن والله امي حادة إلى انا فران وقاد بحومة غيير يجربوني ولي حكمو عليا انا قابلة
تبسمات حادة بإحراج وقالت: ا ايه ابنتي هادشي زيين ولكن.. انا.. مالي فهادشي كامل راه مك حادة ماتفهم فشركات ماتعرف معامل ههه
ليلى طلعات النفس و شافت ففاطمة الزهراء لي رخات ملامحها حيت مافهماتش نوع هاد الشوفة وليلى قالت
ليلى: هاد الشركة راه فاتي تتعرفها ..واليوم دايرين حفلة غايتجمعو فيها غير شكون وشكون.. انا خاصني غير نمشي غيييير نمشي وديك الساعة غانتبت لكشي بلي نستاهل نخدم تما والله
فاطمة الزهراء شفت فيهم تترمش وقالت: مافهمتش .. اينا شركة
كانت غاتقوليها على الدعوة لي شافت وقرات لكن تراجعات قائلة: الشركة ديالكم.. كنت كاندوز فالانترنت وبالصدفة عرفت بلي عندهم حفلة غدا بالليل وداك الفرع أصلا لي فالمغرب باباك لي شادو.. قلت زعما ممكن يكون سيفط ليك الدعوة باش تحضري ليه ههه.. و ..الى كان ممكن تديني معاك إلى كنتي غاتمشي ..والى لا نمشي بلاصتك هههه
بدات تشوف فيها بأمل فحين فاطمة الزهراء طولات فيها الشوفة عاد قلبات عينيها ونطقات قائلة: لا ماعنديش
تمحات بسمة ليلى ومها وقالت فمحاولة أخرى: غير قلبي مزيان.. يقدر بكون سيفطها لك.. شوفي الى كنتي غاتمشي نتي غير ديني معاك راه مغانصدعك ماوالو غير دخليني وديري راسك متاتعرفينيش گااع
ردت بهدوء وهي تتهرب عيونها منها: سمحيلي مي لا.. ديجا أنا ماتانمشيش لبحال هاد الحفلات متايعجبونيش..من الاحسن تمشي تقلبي فشركة أخرى حسن ليك
سرطات ليلى ريقها بصعوبة وناضت بكرامتها لي بقات تاطلع النفس بزز فحين فاطمة الزهراء تتجنب الشوفة فيها
ليلى: ماشي مشكل.. انا غانمشي امي حادة.. سمحيلينا صدعناكم
فاطمة الزهراء حركات راسها فقط ومليكة ناضت بخيبة أمل كدالك وقالت: الله يعاون امي حادة
حادة: امين ابنيتي
خرجو وتلفتات حادة عند فاطمة الزهراء قائلة بعتاب: فاطمة الزهراء اش هادشي.. ماشي حشومة ابنتي تكدبي على البنت وهي جاية تزاوب فيك وطلب.. علاش ماتعاونيهاش مالها شنو فيها
هزات كتفها مغوبشة وقالت: ماعنديش معاها امي وهانتي شفتي غير حاجتها لي جابتها وجاية تمتل عليا هنا
حادة: وشنو فيهاا الى جات بغاتك تعاونيها فيها شي عييب
فاطمة الزهراء: انا مابغيتهاش تخدم فالشركة ديالنا .. هادا عامي لخر فالجامعة وغاندخل نخدم ومابغيتش نبقا نصبح عليها ونمسي.. تمشي تخدم فبلاصة خرا بعيد عليا
ناضت فحالها مقلقة وطلعات للسطح ديال دارهم مخليا حادة باركة وتخمم الدكريات ..او اسمهم التاني ..سم القلوب ..سواء كانو دكريات زوينة ولا خايبة، بجوج تايألمو وبجوج وجعهم قاهر.. ياإما من الاشتياق ليها والحسرة على مافات.. ياإما من القهرا، والجرح لي مازال مابغا يبرا..
.
فدار مي حادة كانو باركين فالصالة بتلاتة بيهم ..التلفازة شاعلة وتايتعشاو فصمت حتا صونا تليفون فاطمة الزهراء بنمرة باباها.. مسحات فمها بمنديل واستأدنات منهم بأدب عاد ناضت من الطبلة لبيتها وجاوباتو بنبرة هادئة: الو
أنس: مسا الخير الحبيبة ديالي..
ردت ببسمة خفيفة: مسا الخير
أنس: صونيت باش نعلمك بلي الحفل بدا ودوا معايا عصام، قاليا بلي مابنتيش ليه تما.. واش مغاتمشيش؟
فاطمة الزهراء: لا الصراحة مافياش
رد بقلق: ياكما عيانة؟ ضاراك شي حاجة؟
ردت: لا لا..غير ا ..ماعندي نفس للخروج وصافي
سكت شوية عاد قال بغير رضى: واخا لي يريحك ابنتي.. مانبززش عليك ..نخليك ترتاحي دابة بسلامة
فاطمة الزهراء: تصبح على خير
قطعات متنهدة وشافت فالسكادو ديالها وهي زامة شفايفها وتترمش فيه ..الندم بدا يتسلل لقلبها وصوتها الداخلي علا صوتو وبدا فيها يلوم ..كون غير عطيتيها ليها.. شنو فيها إلى كبرتي عقلك ونسيتي لي فات؟ المهم تبقا بعيدة عليها.. البنت جاية تاتطلب وتعاود مع مها حشومة.. عمرك كدبتي ولا تعاليتي على شي حد حتال هاد المرة هادشي ماشي ديالك نهائيا..
نفخات بضيق وقبلما تتردد مشات حلاتو تتقلب على الدعوة باش تمشي تعطيها ليها وتهنى.. المهم هو يرتاح ضميرها وماتبقاش ليل كلو عاود تاتقلب ففراشها وتقول ياريت عطيتها ياريت ..
ساست الساك فوق الناموسية وجبدات جيابو كاملين واخا متأكدة بلي حطات الدعوة فالجيب اللول.. قلبات البيت كامل بالتقلاب وفجأة حبسات موسعة عينيها بصدمة وقالت غاطق من غيضها: الللللفعة
...
قدام مرايتها تتقاد حلقات فضية فودنيها وترد شعرها المسبسب اللور.. فستان سهرة جميل نازل للأسفل بلا سميطات ومزين من صدرها على شكل قلب .. لبسات الطالون وخرجات تاتقرقب بيه عند مها لي كانت باركة تتخيط واحد الجلابة عندها وقالت بحماس
ليلى: كي جيتك ههه
ضارت جوج دورات كيف الاميرة تاضحك ومها بإعجاب قالت: ماشاء الله قل اعوذ برب الفلق.. جيتي كي النوارة هاكا هاكا تتشعلي ههه.. واخا !؟!، داك الصدر شوية معري لا؟
ليلى: الكساوي الكلاس هاكدا تايكونو امليكة اش ندير نمشي بقفطان.. زايدون لي غايكونو تما راهم لابسين كتااار من هادشي مكاين غالعرا ..دابة نصورهم ليك وتشوفي
مليكة: مممم واسيري سيري وعنداك تلهاي فالناس وتنساي علاش ماشية.. ضبري على راسك راه غامرت حتا شفرت لك ديك الورقة.. تعرفها حادة تشتف عليا فالدرب
ليلى: كوني هااانية ههه.. انا غير ندخل لديك الحفلة وكلشي ساهل من بعد
لبسات المونطو ديالها وقالت: انا مشيت دعي معايا امي عافاك
ناضت تابعاها ودعي: سيري الله يسهل عليك.. الله يبعد من طريقك ولاد الحرام وبنات الحرام.. الله ينقي طريقك من الشوك الله يفتح ليك بيبان الخير
ليلى: امين امين
مشات تتزرب بالطالون وتحاول مايطيحهاش بسبب طرقان الدرب لي ممسرحاش ومجاتش تدي معاها سبرديلة.. خرجات فالشاريع الكبير ووقفات تتسنا طاكسي بفارغ الصبر حتا وقف ليها واحد وركبات بحماس قائلة: اوطيل سوڤيتيل عافاك
.
الحياة خاصها مخالب.. خاصها محارب.. حياة بحال حياتنا لي تاتهمش الضعيف وتحني الراس لكل مقاتل جابد السيف.. خاصها تكون قوي بايمانك.. بقوة صبرك.. قوي بالأمل.. بتقتك فراسك ..و إلى مشيتي حتى استسلمتي لعقباتها.. همشاتك وللطرف رماتك ..ديك الساعة أما غاتكون هزماتك وقضات عليك.. أما غاتعاود تنوض والامل شاعل عينيك.. عينيك لي تايشوفو طرف من الحلم وأول الطريق قدامك..تما غاتعيش سعادة غير كل السعادات.. سعادة طيحات السر على ليلى وخلاتها كيف النجمة تبان.. طلعات النفس مع صدرها وهي عند مدخل الاوطيل واقفة تتلذذ بهاد اللحظة.. وسط أصحاب الطبقة المخملية لي تايمرو من حداها سوا فرديا ولا جماعةً .. ببسمة جانبية تقدمات لعند الرجل لي واقف قدام الباب ببدلة سوداء هو وسيدة أنيقة تايتأكدو من بطاقات الدعوة ويرحبو بأدب بالمدعوين وحداهم جوج حراس من الحجم التقيل تفاديا لحدوت أية مشاكل.. الشي لي تايبين قيمة هاد الحفلة ووزنها التقيل.. وقفات قدامو حلات البوشيط ديالها وجبدات الدعوة ماداها ليه وعينها لداخل فحين هو قال بعدما خدا الدعوة: مرحبا بيك مدموزيل ! ... "سكت شوية وقال" مدموزيل فاطمة الزهراء
حولات نظرها ليه تترمش وتشوف فالبطاقة لي شاد مافهماتش منين عرف الإسم وهمهمات بعدم فهم: هم؟
رجع تأكد من الإسم لي قرا فالجهاز الرقمي لي عندو ولي تايسكاني بيه الدعوة باش يعطيه المعلومات الشخصية ديال كل مدعو
الرجل: آنسة فاطمة الزهراء.. ممكن تعطينا البطاقة الوطنية ديالك إلى سمحتي
سرطات ريقها وقالت بقلب تايضرب بسرعة: ش شمن بطاقة مافهمتش !!؟
رد بأدب: خاص نتأكدو انك نفس الشخص لي تبعتات ليه الدعوة وماشي شي حد آخر
ليلى: هههه كيفاش.. زوينة هادي بنت لك كداابة دابة؟؟؟.. يااك الدخول بالدعوة وهاهي عطيتها لك شنو هاد التخربيق تتقووول
شاف حواليه محرج وقال: آنسة لطفا خفضي صوتك شوية.. انا فقط تاندير خدمتي وهاد البروتوكول ضروري منو
خرجات فيه عينيها كتر: و أنا ماكنتش عارفة بلي ضروري نجيبها ومغاداش نعاود نرجع حتاال داري باش حضرتك دير البروتوكول دياالك تتفهم.. بطاقة الدعوة هاهي عندك قوة التفلسيف خليه عندك
بغات دخل والكارد وقفو بزوج كجدار قدامها مانعيها تزيد فحين الرجل قال بهدوء: آنسة الله يخليك شوية المساعدة من طرفك.. هاد الحفل مهم ومهم بزاف لدرجة أن العديد من رجال الأعمال بغاو يحضرو ليه لكن مقدروش ياخدو بطاقات الدعوة لي كانت محدودة.. داكشي علاش خاص نتأكدو من كل شخص تفاديا لأي عملية نصب
ليلى: هاداا رااااه سمييتو التخربييق وغاتندم بزااف إلى ماخليتينيش نددخل تاااتفهم
رد: اوك.. الى سمحتي فقط وقفي على جنب .. غاندوز إتصال بسيط يجيبو ليا لائحة المدعوين واكيد صورتك غاتكون تما
صفار وجهها وقالت تترعد بالخلعة: لا صاافي هادشي لي بقاا غير تزيد تعطلني هنا كترما انا معطلة.. الدعوة ديااالي ..عطيتها لك.. ادا غااندخل
رد؛ الله يخليك بلا مشاكل.. مايمكنش تدخلي بلا مانتأكدو من الهوية ديالك ضروري من هاد الإجراءات
تحطات يد باردة على كتفها خلاتها تلتافت وكمل ليها ليخاص ملي شافت فاطمة الزهراء قدامها ببسمة جانبية وعيون حادة.. تشللات حركتها وهبطات الشوفة لفستانها الراقي باللون الأسود كدالك غير انه قصير حد الركبة وبسميطات رقاق .. مكياج خفيف وأحمر شفاه براق مع اكسسوارات بسيطة وشعر أشقر متموج تايلعب معاها كلما تحركات..
فاطمة الزهراء: بونصوار "ضغطات سنانها ناطقة بعصبية" ليلىىى
ليلى شافت فالسيد بتلبك ورجعات شافت ففاطمة الزهراء مالقات حتى حل من غير تجرها من مرفقها بسرعة قبلما تقول شي كلمة وتفضحها.. داتها جنب الورد لي حدا مدخل الاوطيل و وراهم كاينة الحديقة الخلفية ..نترات منها فاطمة الزهراء يدها بعصبية واضحة وبحر الشمتة قالت
فاطمة: طلقي ماتمسينيش السراقة.. كونما كان الحفل مهم لبابا وللشركة ديالو كون فضحتك تماا قدام كلشي الكداابة
نطقات ليلى تترعد وتقلب على الهضرة لي ختافات من فمها بالصدمة: ا ا بلاتي انا نشرح ليك لي وقع...
قاطعاتها قائلة: فين عند بالك غاتوصلي اا .. صافي قلتي لعبت بيها وشفرتها مااعندهاا ماادير؟ مكلخة.. يالله وريني كيفااش غادخلي يالله
.ليلى: نتي لي ماخليتي ليا حتا حل اخر.. جيت حتاال عندك وجبت معااايا مي وطلبتك وعاودت ووالله مكانت فنيتي نشفرها كنت باغاك نتي تعاونيني بخاطرك.. كون بغيت نشفرها كون خديتها من الأول فاش شفتها ولكن نتي لي اضطريتيني ندير هاكاك..
مادرتي لابحق الجورة لا واالو شنو فيها كون عاونتيني
خنزراات فيها كتر وعصبيتها خلات دمها يغلي: هادشي بااش تتبردي على راسك الكداابة.. شفتي نتي.. عمرك تتبدلي اللفعة عمرك
طلعات حاجب مخنزرة فيها وقالت: واش نتي مريضة شوية فمخك فين تتعرفيني اصلااا
فاطمة الزهراء: داكشي لي عرفتو عليك من الصغر كافيني ومايشرفنيش نزيد نتعرف على وحدة بحالك
طلعات حاجبها بتدكر والضحكة على وجهها تاترسم : ..اااه ههههه "قلبات وجهها تاضحك وفاطمة الزهراء باقا فيها مخنزرة" وانا تانقول مال البنت ملي جات وهي هازا عليا خنافرها وحتا نص كلمة ماتعطيها لك.. قولي نتي باقا لاسقة تما وماباغاش تنساي لي وقع
هربات عينيها مراضياش وقالت: شنو تتقصدي
قربات منها تترمش ببرائة مصطنعة: تانقصد احبيبة ديالي داكشي لي طرا قبلما يهزك باك ويديك معاه.. العاشقة السرية ديالنا هههه
تقلب وجه فاطمة الزهراء ولأنها متاتعرفس تخبي أحاسيسها دغيا تزيرات والكلام تخنق فحلقها ..ليلى محات الضحكة و قلبات وجهها تاطلع النفس وتبرد عاد فيها شافت قائلة بجدية
ليلى: كنت برهوشة تتسمعي.. شحال بالسلامة كان عندنا 14 لعام ؟ واش غاتبقاي حاقدة على وحدة قو*** ففترة مكانش عندها فيه العقل؟
فاطمة الزهراء: على أساس دابة تاتصرفي بنضج
ركزات فعينيها بحدة كتر وقالت ضاغطة على كل حرف: هادي لي قداامك باهاا ماات وهي ماازال تتقرا وخلا ليها جووج النفوس.. مها وخوها.. و هي لي هازااهم ومسؤوليتهم على كتاافها بوحدهاا.. غيير مي إلى ماجبتش ليها دوا السكار من تاطيح ليا فالفراش وديك الساعة عاود خاصني فلوس الطبيب والدوايات وطلع وهبط.. تانتقاتل باش مانخلي خويا مخصوص من واالو ومايضحكوش عليه صحابو فالزنقة ..على ودهم تعدبت ودمرت تلت سنين وانا تانقلب على خدمة بلا فايدة.. شنو الأخت كنتي باغاني ندير ..وعلاش أصلا وحدة بحالك غاتحس بيا.. نتي ملي عقلتي على راسك وباك موفر ليك لي بغيتي سوا قريتي ولا لا كااينة شركة قد السخط تتسناك تسيريها.. ولكن انااا ولي بحالي لي واكلين الدق ..اناا
ضحكات نفس الضحكة لي كانت راسمة ليلى قبل قليل وقالت ببراءة مصطنعة: شنو ياكما نبكي دابة احبيبة ديالي.. ولا يمكن خاصني ننسا استغلالك ليا والشفرة لي شفرتيتي؟
بنفس الحدة نطقات: ماتبكييش.. غير عدريني شوية وتفهمي علاش درت هاكااك.. أنا محتاجة لهاد الفرصة افاطمة الزهراء ..وتانعاود نطلبك الله يخلييك قولي ليهم يدخلوني
قربات منها مربعة ايديها ..طلعات فيها وهبطات قائلة: مغانعاودش نتيق فلفعة بحالك ونحن قلبي عليك.. تصرفتي غالط.. ادا تحملي النتائج
تخطاتها وزادت تتقاد شعرها حتا سمعاتها قالت: و على ود أمين ؟
وقفات بلاصتها بوجه جامد وعندها ضارت باستفسار.. فحين ليلى عندها تقدمات وبصوت بارد هاد المرة قالت: على ود أمين غاتعاونيني؟
ردت بشك: كيفاش أمين
رسمات بسمة بجنب فمها عاد جاوباتها باستهزاء: ماشي غير أنا.. كلشي عارف شحال كنتي تتحمااقي عليه.. ومازال مانسيتيه باينة ..غير ملي مازال لدابة ماسمحتي ليا ادا مانسيتي والو
خنزرات فيها بغضب قائلة: جمعي راسك معايااا وحسن لييك بلاما تعصبيني كتر
ردت: ادا بصح مازال مانسيتي والو ..اوكي "غمزاتها" اجي نديرو انا وياك واحد لعيبة ..غادخليني وتوقفي معايا هاد الليلة حتا نلقا خدمة ..وانا فالمقابل غانعطيك نمرتو
بسرعة قالت: كدابة
ليلى: ماعندي علاش نكدب عليك وماشي فمصلاحتي أصلا.. أمين حرگ لبرا فاش شد الباك ومن تما مارجع.. ولكن كايتواصل معانا ومع مو فالتليفون ..وانا عندي نمرتو حيت فايت هضرت معاه
سكتات تتشوف فيها بشك وليلى تتسناها تقرر حتا نطقات: عطيها ليا هو اللول
ليلى: تؤ تؤ ..حتا تسالي هاد الليلة بعدا ونوصل لداكشي لي بغيت.. عاد ديك الساعة نعطيها لك
فاطمة الزهراء: وإلى كدبتي عليا؟
نفخات بملل وقالت: تانحلف ليك بحياة مي حتا عندي.. مرتاحة دابة؟
حركات راسها بالايجاب وزادت لعندها قربات: واخا.. انا غانتيق فيك هاد المرة واخا ماتستاهليش..ولكن إلى مشيت حتى لقيتك تتلعبي معايا اليلى ..غاندمك
ردت ببرود: مممم.. شنو دابة متافقين؟
ضارت بلاما تجاوبها ونطقات بنبرة أمر؛ تبعيني وقفات فاطمة الزهراء قدام الرجل تتحل ساكها المربع الصغير وليلى وراها تتسنى وتسمع
فاطمة الزهراء: هادي لاكاغط ناسيونال ديالي
عطاتها ليه وتأكد من الإسم من بعد هز عينيه فليلى بعدم فهم وقال: !!؟ولكن الآنسة...
قاطعاتو بجدية قائلة: خليك من الآنسة دابة.. درتي خدمتك، يالله بون كوغاج
زادت هو يوقفها: مدموزيل.. الدعوة باسمك غير نتي .. الآنسة ماشي من المدعوين ومايمكنش ليها تدخل
قربات ليه ليلى لي فقصها نييت هاد الليلة: بغيت غير نعرف نتا مال مك معايا هاد الليلة شكون سلطك عليا اخوياا.. قالت لك معااها يعني جايات بجوج نتااا ماااالك
طلع النفس مصبر راسو وقال: كاندير غير خدمتي.. والدعوة فردية ماشي جماعية إدا مايمكنش ليك دخلي
خنزرات فيه كتر: شوف فيا نقولك واحد جوج كلمات..
قاطعاتها فاطمة الزهراء موجهة ليه الكلام بحدة: كانظن بلي مغانحتاجش ادنك.. باش ندخل معايا شي حد للحفلة ديالي.. ولا لا؟
رد بعدم فهم: كيفاش !!
..رجع بسرعة تايتأكد من النسب ديالها وليلى قالت ببسمة جانبية: الجوهاري الزين الجوهاري.. والشركة لي منظمة الحفلة ولي غاتخلصك على خدمتك الزينة.. ديال باباها ..دخلتيها لمخك ولا ناوي تبيتنا معاك هنا؟
طلع وجهو تايسرط فالريق ووجه كلامو لفاطمة الزهراء بنبرة آسفة: باغدون مدموزيل الجوهري.. كانعتادرو من سيادتكم ماتأكدتش مزيان
مجاوباتوش ودخلات فحين أن ليلى زادت ليه قربات و خدات بجوج صباع البادج لي معلق فرقبتو ولي تتحمل اسمو الكامل وقالت بتهكم
ليلى: عبد الرحيم منعم "طلعات فيه الشوفة بحاجب مرفوع وكملات" أنا متانساش اعبد الرحيم.. رد البال البوگوص
خلاتو وزادت تاتزرب تابعة فاطمة الزهرا وعينيها تايضورو على المدعوين وعلى أجواء الحفل ..التحضيرات بقدما هي بسيطة بقدما تتفوح منها رائحة الفخامة والرقي.. شافتها واقفة قدام أحد الطاولات العالية بدون كراسي على عكس الطاولات الأخرى لي تتكون منخافضة وعليها ضايرين فوطويات مريحة فاللون الاحمر والأبيض .. مشات لعندها مباشرة وفطريقها خدات عصير من ناذل كان من حداها دايز وخدات حتى لفاطمة الزهراء ..حطاتهم فوق الطبلة وقالت تتشوف فالاوجه لي قدامها
ليلى: تتعرفي هادو كاااملين !؟
فاطمة: شوية.. منهم صحاب بابا وكان ديما عارض عليهم.. ومنهم لي خدامين معاه.. شي عرفتو شي لا
ليلى بدات تادور عينيها عليهم وتفكر منين غاتبدا وكيفاش حتا زفرات فاطمة الزهراء وقالت بهدوء: بلاما ضيعي وقتك مع لخرين.. واحد فهاد الحفلة كاملة هو لي غايفيدك الى بصح باغا تخدمي
ضارت ليها : شكون؟
فاطمة الزهراء: عصام ليلى: شكون هاد عصام !!؟
ردت: هو لي شاد الشركة فغياب بابا.. وبما أنه مالتاحق بالإدارة إلا مؤخرا فغايكون محتاج لمساعدة
حلات عيونها كتر: سكرتيرا زعما ..حللفي !!!
فاطمة الزهراء: أنا لي عليا درتو ..الباقي عليك نتي
ردت بلهفة تتشوف فالحضور: واخا فين هو وريه ليا
فاطمة الزهراء: انا براسي مازال ماشفتو.. يمكن خرج لبرا شوية.. ا ..هاهو جاي
ضارت بسرعة للمدخل ديال قاعة الحفل تتقلب عليه بين الناس لي عاد جاو وفنفس الوقت تاتقاد فشعرها فحين فاطمة الزهراء هزات تليفونها ولعند شاب وسيم توجهات.. شعر مائل للزعورية مجعد شعرة شعرة.. بنية قوية شامخة زادت برزات تحت البدلة السوداء لي لابس والكاريزما فحركاتو وفابتسامتو الجانبية.. ليلى حلات فيه عينيها وايديها تبلوكاو بعدما كانت تتقاد بيهم شعرها.. رجعات وزناتو من سباطو وهي طالعة لشعرو وتبسمات بسمة جدابة قائلة
ليلى: ماشاء الله ماشاء الله.. هادو خداو الفلوس وخداو حتا الزين معااهم " هزات البوشيط تتنهد وعندهم غادة" أصلا هاد التوت اش غاينبتو وسط الخبز وزيت العود ..غادي غير يكحال يالشموشات ويخماج مسكين
سكتات ملي عندهم وقفات وفاطمة الزهراء تلفتات ليها ببسمة خفيفة وقالت تتعرفهم
فاطمة الزهراء: عصام هادي ليلى.. ليلى هادا عصام ..ولد خالتي وفنفس الوقت هو لي خدا بلاصة بابا فالخدمة
غمزاتها والأخيرة مدات يدها ليه قائلة: مشرفين مسيو عصام
سلم عليها ببسمة خفيفة وقال بصوت خشن زعزع ليها العضام: الشرف ليا امدموزيل "شاف ففاطمة الزهراء وقال" مزيان لي جيتي.. سي أنس كل ساعة يصوني ويسول عليك
فاطمة الزهراء: فكرتيني.. أنا غانخرج نعلمو بلي جيت ..خليكم نتوما داويين حتا نجي
مشات وقبلما ليلى تهضر هز كاسو وقال حاني راسو شوية: بالادن
مشا عند مجموعة من الرجال وقف تايرحب بيهم وهي سرطاتها بصعوبة ووقفات بلاصتها مربعة ايديها وتعض شفتها التحتانية بعصبية مخفية.. عيات تسنا فيه و والو واش رجع حتا حسات بشي حد حداها وقف ضارت ولقاتها فاطمة الزهراء لي قالت بجدية
فاطمة: ساليتي ؟
ردت مفقوصة: علاه بديت أصلا ..السيد نتي مشيتي من هنا وهو داز من لهيه وكل دقيقة يوقف عليه واحد فشكل
فاطمة الزهراء: سربي راني باغا نمشي فحالي مغانبقاش مقابلاك غير نتي
حولات نظراتها لرجاء وقالت: عيطي ليه نتي ودخلي فالموضوع نيشاان.. شنو فيها إلى عاونتيني شوية؟.. نتي ترتاحي وترجعي دغيا لفراشك تنعسي وأنا غاناخد لي بغيت زفرات بتعب وبلاما تجاوبها مشات للطبلة فين كان واقف مع واحد من رجال الأعمال وليلى بقات بلاصتها تتشوف فيهم بتوتر ودعي فخاطرها كلشي يدوز كيفما بغات.. بقات حاضية فاطمة الزهراء لي غير واقفة جنبهم فصمت حتا مشا كلشي عاد بدات تاتهضر معاه وتنعت ليه جهة ليلى.. طلع حاجب بانتباه لكلامها وضار جهة ليلى حتا هو.. تبسمات ليه بتوتر وهو تايشوف فيها بطرف عينو حتا سالات فاطمة الزهراء الهضرة.. بقا مدة ساكت حتا فتح فمو ودوا.. بعد شوية تمات فاطمة الزهراء جاية جيهتها هزات ساكها وقالت: يالله زيدي
ليلى: ف فيين "هزات بوشيطتها تتزرب تابعاها" بلاتي بعدا فهميني شنو قال لك
فاطمة الزهراء: غدا مع التمنية الصباح تكوني فالشركة على ود المقابلة ..تما هو يقرر واش يخدمك ولا لا
وقفات بلاصتها تاتستوعب شنو قالت وضارت شافت فيه هو لي عاطيها بالضهر ..بدات تبسم شوية بشوية حتا تحولات لضحكة عالية ضارو على اترها بعض المدعوين حداها تايشوفو جيهتها باستغرااب فحين هي كملات طريقها لبرا تاتزرب باش تلحق على فاطمة الزهراء وقلبها بالجهد تايضرب ..وقفو فالشاريع وبدات ليلى تجبد تليفونها وضحك غير بوحدها
ليلى: انا غانعيط لطاكسي يدينا هههه
وقفات عند رجليهم سيارة ليموزين سوداء بهرات ليلى وصدماتها حتا بدات بسمتها تمحا.. مدات ليها فاطمة الزهراء تليفونها وقالت ببرود: داكشي لي تافقنا عليه درتو.. بقا دورك نتي
خدات من عندها التليفون جبدات نمرة أمين من تليفونها وبدات تقيدها ليها وتشوف فالسيارة وتردد: ليموزيين ياحبيبي ههه
ردات ليها تليفونها ملي سالات وفاطمة الزهراء طلعات وقبلما تبعها سدات وراها الباب وزادت ..ضحكات ليلى وبكل روح رياضية تقبلاتها وقالت : ماعليش اليلى.. ماعليش.. شوية الصبر وحتا نتي غاتركبي فما حسن منها الكبيدة ديالي.. ههههه
. جبدات تليفونها تتاصل بالطاكسي وتشوف فالاوطيل كل شوية وضحك اليوم بالصدفة سمعت كلام جداتي وبابا.. عرفت بلي بغا يتزوج ووراها مباشرة غايديني نسكن معاه هو ومرتو الجديدة وبنتها.. أنا مابغيتش نمشي معاه اأمين بغيت نبقا معاك نتا ..كون غير مكانتش عندي 14 لعام كون سكنت بوحدي وقررت فحياتي شنو بغيت.. وكون هربت لعندك ونسكنو بجوج غير أنا ونتا.. سمعتك ديك المرة ونتا مدابز مع هاداك لي ضبرني و قلتي ليه هادي ختي ماتعاودش ضور بيها.. جرحتيني بزاف بكلامك كترما جرحاتني الضربة لي ضربني حيت أنا ماشي ختك.. واش كاينة شي اخت تتبغي خوها؟ انا تانبغيك بزاف اأمين تانبغيك وغانبقا نبغيك حياتي كاملة.. مغانقدرش نقولك هادشي مباشرة داكشي علاش كتبتو ليك هنا.. نتمنى حتا نتا تكون تتبغيني بحالي.. غانكون أسعد وحدة فالدنيا ..
سدات الطفلة الصغيرة الرسالة ورشات عليها ريحتها الجميلة بابتسامة بريئة وأحلام وردية تتخيل شنو ممكن يوقع إلى قراها ..
حياة: فاطمة الزهراء
رمشات فايقة من سهوتها لي سافرات بيها لدكريات الطفولة.. فحين حياة منها قربات وقالت
حياة: اشمطلعك للسطح فهاد الصباح
بابتسامة هزات كأس القهوة فوجهها وقالت: تانشرب قهيوة
حياة: ههه بالصحة.. أنا الزين غادة للجوطية نتقدا شي حاجة ونرجع
حطات الكاس وناضت: حتا أنا غانخرج دابة عندي حصة من دابة لساعة
حياة: واخا انا نتسناك فالباب
فاطمة الزهراء: اوكي
...هبطات لبيتها لتحت باش تبدل البيجامة لي لابسة وبعد دقائق قليلة وقفات قدام المراية تتشوف فحوايجها وتقاد شعرها.. لبسات تيشورت بيضة فوق منها فستان وردي انتوي بسميطات غلاض نازل حد الركبة و فيه خطوط رقيقة بيضاء ومعاه سبرديلة فنفس اللون.. هزات ساكها ورشات ريحتها عاد زادت خارجة ..تلاقات بحياة لتحت وهاد الأخيرة تبسمات فاش شافت شكلها وقالت بإعجاب
حياة: هاي هاي على الغوز هههه.. ايوا هاكا نبغيك ماشي الكحل الكحل الكحل تقولي راكي فعزا
كتافات ببسمة خجولة فقط لأنها أصلا ممولفاش بالالوان قليل الى لبساتهم وفقط بطلب من باباها..
ضارت حياة مع طريق الجوطية مخليا فاطمة الزهراء تتشوف فيها من اللور حتا مشات عاد قلبات الدورة راجعة من الطريق لي جاو منها و قدام الباب المنقوش وقفات.. ترددات شوية عاد دقات الباب ورجعات اللور تتقاد شعرها ومتوترة غير مع حوايجها حتا سمعات صوت إمراة كبيرة فالعمر من لداخل: هانا اولدي محمد جاية
حلات الباب لابسة جلابتها و مبسمة لكن سرعانما بدات تمحيها باستغراب وقالت : نعام ابنيتي تتسولي على شي حد
ردت بابتسامة: ماعقلتيش عليا امي عيشة
صغرات المرا عينيها وقالت: سمحي ليا ابنيتي ماعرفتكس
ردت بضحكة: انا فاطمة الزهراء ههه بنت ولد مي حادة
تحلو عينيها بتفاجأ وقالت: فااطمة الزهراات هاادي.. زيدي زيدي ابنيتي تباارك الله ههه كبرتي وزيانيتي .. مرحبا بييك