سكت شوية وهو فالمكتب واحد تايقلب فبعض الأوراق فوق البيرو ديالو.. لملم لسانو وقال بتردد وكل شوية يحنحن: إلى بغيتي ممكن نجي.. يعني ندويو فالخدمة تما وفنفس الوقت تلقاي معامن تتكلمي الى بغيتي
قرنات الحضاش فحجبانها وبتذمر قالت: واش امسيو أنا هاربة من الخدمة ونتا باغي تجيبها ليا تال هنا؟ ايوا لا سمح ليا أنا يامات الكونجي ديالي وتانسمح فيهم في سبيل العمل تانقول حشومة بيروش مازال مريضة والضغط كامل على مسيو اوكوراي خاصني نعاونو بيما رجعات حشومة أنا نرتاح وهو يبات خدام.. وفاش جيت طالبة هاد الساعة ماتعطيهاليش ؟ عيب والله تشووك آاااايب
طرطق بالضحك وقال: قلبتيها تركية هههه
ردت تاضحك حتا هي ملي سمعات ضحكتو: تفرجت فواحد الفلم البارح البطلة دور دور وتقول للبطل آيب تشووك آيب بونيبيي ياااا
عصام: ههههههههههه
...ضحك من قلبو على لهجتها وبرك على الكرسي ديال البيرو راد ضهرو على اللور وقال
متنهد: واخا الالة ارتاحي.. خودي راحتك وإلى بغيتي سيري هاد نص نهار للدار حتا توصل وقيتة الحقل عاد دوزي للبلاصة مباشرة
حلات عينيها بتفاجأ: بصح !!!
عصام: ههه بصح
ردت بامتنان: شكرا شكرا على طيبوبة قلبك وبياضو امسيو اوكوراي أنا والله تاكنقولها ليهم تانقول ليهم نتا مكاينش بحالك
ضحك عاجبو الحال وقال حابس البسمة بزز: ممم بصح
ليلى: وحق القسم "بانت ليها ياسمين ناضت للحمام هي تقول بسرعة" ا ي يالله امسيو خاصني نقطع دابا نتلاقاو فالعشية
قطعات وهزات نضاضرها والساك تابعة ياسمين ومخبية لايشوفوها
..باركين بتلاتة والسكات ضاير بيهم.. هو قالب وجهو.. فاطمة الزهرا تاتشوف فيه عاقداهم وأفكارها غادين جايين.. وأمين شاد الضحكة وشاد لسانو حتاماقد يصبر وقال
أمين: ايوا.. "غمزو وسيمحمد طلع حاجبو بعدم فهم"
سيمحمد: مالنا
أمين: الدنيا ولات غرييبة العشير..سيمو ليمتايطلعش عينو فبنت المرا.. بارك مع تيتيزة تايتقهواو ههههه والله كونما شفت بعيني لاتقت
قلب وجهو بعدم مبالاة فحين أن فاطمة الزهرا زيرات سنانها وضارت لأمين قائلة: أمين حشومة اش هاد التخربيق تتقول
أمين: هههه مالي اش قلت.. بغينا غانفهمو شكون الاخت الكريمة وآش كاين فالطاجين
فاطمة الزهرا: البنت يقدر غير خدامة معاه "شافت بنص عين فسيمحمد وقالت" سيمحمد ماعندوش أصلا مع داكشي
شاف فيها بطرف عينو وأمين زاد ضحك وغمزو: هانية ابا سيمو حنا الرجال عيبنا واحد.. غابلاما تحشم منا ههههه
عقدات حجبانها: كيفاش عيبنا واحد ؟؟؟
سيمحمد: فطرتي ؟.. وانوض اخاي يالله توصل بكري
أمين: شتك تاتجري علييناا اصحيبي
طلع النفس وقال: هي لافهمتي راسك
أمين: اااه قول باغي تنفارد بالاخت الكريمة ههه ياكما قجرنا عليكم ههه؟
فاطمة الزهرا شافت فسيمحمد وتتسناه يهضر حتا قال ببرود: آه .. باغي نبقاو طيط اطيط بلاما يصدعنا شي حد.. واشريه ماحدو رخيص
وببرودة شاف ففاطمة الزهرا حتا هي بمعنى الكلام ليك حتا نتي.. تقجات وتزيرات فيها النفس.. ماتسرطش ليها كلامو وكانت فالداخل ديالها متيقنة بلي البنت ربما غير معرفة ولا شي حاجة عملية جامعاهم.. لكن باش تخيل أن سيمحمد الرجل الخجول المهدب مصاحب ولا عندو علاقة غرامية مع شي وحدة.. مستحيل كانت تفكر فيها .. ناضت مكسورة تتنفس بصعوبة والغصة فحلقها واقفة تبعها امين تايضحك حتا بانت ليه خرجات هو يجمع الضحكة وقلب عندها الدورة مستغرب
أمين: واش صافي نمشيو !؟
قالت بلاما فيه تشوف: محاساش براسي هي هاديك.. وصلني للجامعة عافاك
أمين: ولكن باقي ماهضرنا فوالو
فاطمة الزهرا: مرة خرا اامين عافاك غانتعطل
حل ليها الطموبيل ركبات وركب حتا هو وزادو ...
.بقات تتسناها حتا خرجات من الطواليط وقالت: على السلامة
ضحكات ياسمين وغسلات ايديها قائلة: كنتي كاتسنايني
قربات ليها وقالت بجدية: شوفي مغاتلفتي لاهك لاهك.. سيري نيشاان للطبلة ديالك هزي ساكك وفرتحي
ردت باستغراب: علاش!؟
عيباتها: عالمشماش اختي.. إلى مادرتيش هادشي لي قلت ليك واحد الشوية غايبداو يبانو لك الكيسان والطوابل كايتشايرو فوق من راسك.. خويا وانا عارفاه.. اللهم تمشي بحالك باش حتا هو يجمع النوضة يتبعك ونتهناو حنا گاع من هاد القرع لي بغينا نمشطو ليه صلعتو..
ياسمين: ايوا ورونديفو !؟
ليلى: ويلي باقا تتقوليا الرونديفو "جراتها تتخرجها لبرا " من بعد ونعاودوه صاافي يالله طلقينا
خرجاتها وهي بقات تما كاتسنا واحد الخمسة دقايق عاد خرجات تاطل براسها وتقلب.. بانت ليها الطبلة خوات مابقا فيها حد.. شافت هاكا وهاكا هي تجري لطبلتها خلصات داكشي لي طلبات واخا مشربات فيه تاجغمة وزادت خارجة وتنگر
ليلى: غالي بغا يدير الخير.. نمشي لدارنا نعس حسن ليا مالي أنا على هاد ملاقية السلوكة لاقيت تاسلوكاتي بقا ااااا
شنق عليها سيمحمد من اللور مزيرها بيدو بحالا مدرعها وهي كاتحاول تفك راسها
سيمحمد: حصلتي دابا الفليفلة هااا.. شنو دابة نهرس مك
شادة فيدو لي لاوي على عنقها وكاتحاول ضور عندو: واطلق اااي عنقي كح كح كح شوف راه والله تانغوت بالله تانجمع علك الناس ومغانقول لحد راك خويا غانخليك منك ليهم
رد مغدد: علاه خليتي فيهاا شي اخوة بفعاايلك.. العاصااب لي تعصبتو اليوم بسباابك اصوبيصة عمرو ركبني
ليلى: ياااك اخويا يااك دابا وليت صوبيصة حيت باغا ندير فيك خير ونعاونك
زاد زيرها حتا غوتات كتر كاتغبن عليه: الخيير ديريه فرااسك وفوتي علك شبوقاات الناس.. اااش قلت ؟
رمشات شوية وبغات تهضر حتا شافت سيارة عصام تاضرب الفران حدا رجليها وبان ليها هبط من السيارة وجاي كايجري جيهتها.. ماجات تفيق من الصدمة تاكان جرها بالجهد وراه وتلاح شنق على سيمحمد لي بدورو مافهم والو وهو تايشوف فوجه الشر قداامو وكشاكشو خارجين طارت تفك لالقات ماتفك لكن عصام شد فيه شدة العدو وسيمحمد ملي شافو طغا عليه شنق عليه حتا هو وخلاو الغادي والجاي تايتفرج وليلى تتغوت ووسطهم لاسقة
ليلى: وااا طلقووو واااش حماااقيتو مسيو عافاك طلق منو راه والله تا فهمتي غلط
رد تايغلي وعينو فعين سيمحمد كونما ليلى لي وسطهم وكل واحد فيهم خايف لا الدقة تجي فيها كون بداوها كونبات
عصام: اش غانفهم غلط وانا تانشووف الز***** شانق علك وسط الشارييع
سيمحمد: شانق قاتل نتا مااال جد مك جاي مدرم ساخنين علك عضامك
عصام: دااير فيها صعصع.. انا غانربيييك
رجع اللور ناوي يضور ليه هي تلسق فسيمحمد بضهرها وقالت بهستيرية: لا لا لا لا لا لا والله ماااهاكاك راه غي ضاااحكين وحق الله اييلا غير ضاااحكييين امسيو
سيمحمد خنزر فيها وقال بشك: شكون هاد بنادم نتي منين تتعرفيه
ضورات ليه وجهها لي صفار بالخلعة: ب
أناا..بالعما واش تانعرفو "عصام تبدلو نظراتو ليها وهي بسرعة قالت" ا زعما آه تانعرفو ولكن ماشي ديك المعرفة لي مشا ليها بالك"طلعات حجبانها تتمعني ليه" هادا رااه البباطرون.. الباااطروون لي خدامة عندو ولي بلا خدمتي غانتشرد اااسيمووو
كلامها خلاه يسكت بزز منو ويبرد دمو ..فحين أن عصام هو لي زاد تزند ملي شافها تتشرح ليه وخايفة يفهم غلط ولايسحابو بيناتهم شي حاجة وبلا مايحس قاال بغضب
عصام:: وهادا شكوون لي زاااعم علك هاد الزعامة كاملة
سيمحمد بدا يمسح فوجهو: الصبر اربي الصبر
ليلى: لا لا لا امسيو اشمن زعامة راه غير ضاحكين ..حنا فالدرب هاكدا مولفين فالتقشاب مكاين غاضحك البنايا هههه ياك اسيمو
سيمحمد: أنا غادي بحالي قبلما نرونها على مك
داز من حداه وخنزرو فبعضياتهم مزياان حتا طلع للطاكسي ديالو وزاد مع الطريق.. حول نظراتو الحادة لليلى لقاها تتبسم ليه تبسيمة صفرا بحالا تاحاجة ماطرات هو يرجع اللور تايفك أزرار الشوميز من عنقو باش يالله يتنفس شوية من خنقة الأعصاب لي ركباتو وتم غادي جهة الشركة لي جات قدام المقهى مباشرة.. عاد تنفسات وتحنات هزات ساكها باش تمشي للدار هي تسمعو قال بصرامة
عصام: تبعيني
.ليلى: مااالي انا اش درت ااش درت
مع خرجات من المصعد سمعات باب البيرو ديالو تخبط هي تقفز وبدات ضور فعينيها بخوف حتا وقفات عليها ياسمين تتقفقف وتويل
ياسمين: اناااري ياكما معصب منا شفتو دخل حاالتو عرفتي حمر وحوايجو مرونيين هو لي عمرو نسا يسد حتاا صدفة الشوميز.. باااينة قفرنااها اليلى
ليلى: ربي لااااما سكتي متاتشوفينيش مخلوعة لاش تتزيدي عليا لااااش.. زايدون ماالناا اش درناا گااع.. اش درت انا بعدا والو هو لي كايطير وكايفهم غالط
ياسمين: اش فهم!!؟
ردت تالفة: مانعرف.. هاد لمكلمنين والله متانفهمهم علم الله مخو اش قال ليه.. مهم أنا غادة
ياسمين: عاافاك اختي ليلى إلى قالك عليا شي حاجة عليا گولي ليه بلي عمري نعااود هادي والتوبة
ليلى: غاتمشي ولا غانجي نتفك.. هادي والتوبة قاتلة روح
خلاتها وتمات غادة للبيروو ديالو.. دقات ودخلات تاطل بعويناتها وكان هو غادي جاي حاني راسو وتايحك فلحيتو وانفاسو مبعترة من شدة غضبو.. أو الإحساس لي تملكو وماعرفش كيفاش يتحكم فيه.. سدات الباب ودخلات لوسط المكتب عاد وقفات تتشوف هناا ولهيه وتخمم فسبب هاد العصبية كاملة باش تعرف كيفاش تسلك راسها .. دابا مالو ؟ واش حيت شنق عليه سيمحمد مارضاش ؟ ولا بقا فيه الحال شي حد يغوت عليه ؟ زعما هو حساس لهاد الدرجة؟
عصام: شنو الكلام لي كان دار بيناتنا أول مرة جيتي فيه لهاد الشركة !!؟
شافت فيه بعدم فهم: كيفاش !؟
زاد لعندها حتا تقابل معاها وقال عينيها فعينيه وعلى سنانو ضاغط: الكدوب اكتر حاجة تتتخليني نغلي اليلى
ليلى: وأنا ايمتا......
قاطعها بصرااخ قفزها: سولتك فييينك جيني نيشااان وقولي راااكي تتقهوااي مع صحييبك وباغا دوزي معاه الصبااااح.. ماتستحمرينييش وانا بارك هنا ومتيق كدووووبك وسعات عينييهااا مصدومة فيه وهو عروقو تنفخو بالعصبية وقالت بصوت خافت تترعد والخنقة شداتها: مسيو راكا كاضلمني.. انا عمري كدبت ولا خبييت عليك شي حاجة بالعكس ديما صاادقة معاك
عصام: الصدق !!!؟.. وهاداااك لي كنتي كاااضحكي معاه ضحك البنااية شكوووون.. يااكمااا خوووك وانا ظااالمك هممم
ردت: وشنو مايمكنش زعما يكون خويااا.. ضروري تفكر فيا بديك الطريقة
زااد تغدد وسنانو تايترعدو: ماااتحيمريش عليااا اليلى ماااتحييمرييش..اناااا عااارفك مزياان وعارف الحاالة منين جااايااا ولي عليهااا شفقت عليييك النهاار اللول وقلت هااادي وحدة معقوولة بااغا غير تخدم على مها وخووها الصغير ملي مااات باااهااا.. اراااا ندير فييهااا خييير ونعطيهاا بوووسط مخيير واخااا ماتستاهلوووش ..ونتي باااش تتجازيني.. بااااش
سكت كايلهت وفيها تايشوف هي لي نظراتها تغيراات وعلى فكها ضغطات كاتبت فراسها..مدة وهي غير فيه تتشوف وهو كايلهت حتا فجأة طلعات راسها بكبرياء وبعيون تابتة على عينيه نطقات بكلام بارد: ايوا الله يخلف عليك امسيو اوكوراي.. طلع قلبك كبير
رد تايغلي: هاااد شكرااا صرفيييهااا لياا افعاال وبححااال هاااد الزبل مانعااااودش نشوفو منك.. شكوون داااك بناادم اصلاااا شكاايجييك صحيييبك؟ خطيييبك ؟
ردت ببرود: أولا..ماشي شغلك.. أنا كنت برا الشركة.. وبالادن ديالك .. ادا ماعندك فيا حتاشي دخل ولا سلطة حيت تما نقدر ندير لي بغيت نضحك معاه نبوسو ن****
غوت تايغلي: لييييلىى
ردت بصراااخ وفعينيها شرارة: نعااااام اعصااام
حرك راسو: عصااام !؟
ليلى: فاش كايترفع الاحترااام وكاييتقلل عليااا شي حد الحيااا.. تانا مكانبقاش نحتارموو.. أنا مدرت حتا غلط.. بغيتي ظلمني كيما مولفين دييرو نتوما لي عندكم الفلوس.. مرحبا.. بغيتي تبقا شفقان عليا وعلى عائلتي.. حتا هي مرحبااا
خلاتو وزادت تخرج.. زير على عينيه وقال:
مازال ماكملت كلااامي.. ليلى.. ليييلى
خرجات وخبطات الباب هي تخرج النفس مرعوووة وطلعات راسها للسما تتحبس البكية لي بغات طرطق ليها وتخرج.. صبحات كلها تترجف.. .. وأصعب شعور.. هو تصطانع القوة فلحظة نتاا باغي غير تبكي.. لمحات ياسمين جاية تتزرب ناوية تسولها اش وقع وبسرعة جمعات راسها مباغا دوي مع حد وفاتتها بحالا مكايناش زيرات على ساكها ومن الشركة خرجاات بصفة عامة الكسور أنواع.. ماشي الكسور الجسدية.. انما الكسور النفسية لي تأتيرها تايكون اشد على الانسان.. واسوء الكسور.. كسرة الخاطر..
..
رجعات لدربهم وهاد المرة دخلتها ماشي بحال كيف خرجات مع أمين.. كانت بغات ترتاح وتبدل شوية المود.. تنفس هوا نقي وتصفي أفكارها باش تعرف شنو دير.. ساعا الراحة عاد غابت وزادت فخاطرها مرضات..والمشكل كون غير عرفات الخلل فيك كاين باش تقدر تصلحو.. حاسة براسها فمتاهة وعقلها تكلخ معارفاش كيفاش تتعامل باش تلقا الطريق منين تخرج وترتاح..
طلعات النفس وبكتاف طايحين غادة جهة دارهم وتتفكر.. و من الجهة الأخرى كانت ليلى جاية.. مربعة ايديها كأنها محتاضنة نفسها وباينة فيا ماهياش وعلى غير عادتها غير ساهية وتتجر رجليها بعياء حتا شافت فاطمة الزهرا هي تحبس.. استغربات هاد الأخيرة لكن كملات طريقها فحين أن ليلى تقلبو ملامحها للحقد ضاغطة على فكها وتمات ليها جاية بعصبية ومن بعيد قالت
ليلى: البرانسييسة.. مرتاااحة.. بردتي شوية من السم لي معشش فيك
شافت وراها مغوبشة ورجعات فيها شافت بتعجب: معايا ؟
وقفات قدامها مغددة: لا مع غاانااا.. إن شاء الله تكوني خرجتي شوية من داكشي لي هااازة فقلبك.. ولا يااكما باقاا واحلة فالتبرهييش ديال الصغر وماازال تتقلبي على منين تردي ليا الدقة
جاوباتها بحدة: كنتي غاادوي دوي معايا نيشان بلا ألغااز ..ولا حيدي من طريقي ممسالياش ليك
بملامحها الغاضبة قربات ليها وقالت: نتي لي قلتيها ليه يااك.. اناااا كي الحماارة و من نيتي درت فيك التقة وطلبت منك طلب وااحد.. وااحد.. خدمة نقية ..ونتي اااش درتي.. بركتي مع ولد خالتك كاضحكو علياا وشفقاانين على معانات ليلى وحيااااااتها..
ضحكات مطلعة فيها حاجب وقالت: شنووو.. اش كاتخربقي؟؟!
ليلى: كوني لالة ومولااتي وجيني نييشااان.. نتي لي قلتيها لييييه شكوون من غيييرك عااارف
فاطمة الزهرا: غانعاود نقوليك.. اما هضري مباشرة.. ولا حيدي من قداامي
طلعات النفس تتبرد عصبيتها وقالت: قلتي لعصااام بلي ماعندييش بااا وخدامة على خووويااا.. وهو مسكيين خدمني حيت شفق عليااا.. ياااك احبيبة.. نطقي اعتاارفي
خنزرات فيها بحدة: أنا مااقلت والو ..اون بلوس مغانديرهش رااسي فوحدة بحاالك
شداتها معصمها ملي بغاات تمشي والناس بدات طل وتجمع عليهم: انااا ماتوصلينييش المحقااادة.. تتبيني وجه البراااءة للناااااس ونتي كحل من قلبك مكاااااينش..
فاطمة الزهرا: طلللقي منييي
ليلى: بااااااشمن حق دوي على حياااتي بااااشمن حق
نتراات منها يدها بغضب::ايييه باارااكة.. ممضطرااش نبرر لوحدة بحالك ومهامنييش أصلا شنو تفكيرك فيااا.. أما إلى جينا ندويو على الحقد رااه مانوصلوووكش واناا اكتر وحدة عااارفة حقييقتك
ليلى: ااااااه مسكيينة.. بااقا مبلوكية فتبزقييل الصغر وعمرك دوزيه حيت نتي حقووودة "خرجات فيها عينيها بغل" اااه هزيت رسالة الغراام دياالك وشوهتك مع گااع صحااابنا وتستااهلي.. قبل كنت ندماانة وتانقول مالي تبرهشت ساااعة وحدة بحاالك ماتستااهلش تبقا فبناااادم
ردت بغضب تترعد: مغاانتسنااكش باش نبقاا فيك.. نتي طول عمرك تتغيري مني وبااغا حياتي وتوصلي لياااا بأي طريقة كانت
طلعات راسها تاضحك بالفقصة: هههه تانغييير منك.. كون اماما بغيت بحال حياتك كون رااني غاارقة بالفلوس وتانلعب بيهم كيف بغييت.. ولكن تانقلب علييييها حلاال وبدرااااعي ماشي بنت بااابي وماامي.. وماشي بالشفقة دياااااالكم خدمتي هي لي وصلاااااتني للي أنا فيييه.. نتيي لي ديما غايرة مني وتتقلااااي بسمك
وقف عليهم سيمحمد ملي شاف الجوقة مجموعة وحتا أمين جا تايجري
سيمحمد: اييه ماالنا شكااين
فاطمة الزهرا: اللفعة شخصيااا كادوي على السم.. أنا بزااف عليييك المسخة
خنزر فيها سيمحمد: فااطمة الزهرااا اش هاد الكلام
شاف ليلى جاية ليها هو يشدها مزيرها عندو وهي تتغوت: كاااين شي لفعة قدك البعكاااكة طلللق مني
فاطمة الزهرا: حييت ماتوصلينيييش
آمين: فاطمة الزهرا داركم الله يرحم باااك واش هبلتوو
ليلى: شتي نتي عمر شي حد يبغييك ولا يديها فيك المكلخة.. متبعة ليا برهووش بالحق توااتيتوو هو لي يجي معااك
سيمحمد: ليلى زمييه وزيدي لدااركم
فاطمة الزهرا: أنا بزاااف عليك ومستوايا ماشي من مستوى وحدة بحاالك باش نبقا ندي معاك ونجيب فالهضرة
ليلى: اااجي نوريك المستوى ااااجي
فاطمة الزهراء: طرطقي تمااا بسمك اللفعة
خلاتها ومشات تتغلي وليلى بغات طق من غيضها.. دفعات محمد هزات ساكها وزادت لدارهم تتلهت ودوز فبنادم لي كان مجموع علييهم.. كلشي بدا يتفرتك بقا غير سيمحمد وأمين لي مفاهمين والو
أمين: تاهادو مالهم؟
سيمحمد: مانعرف "حضا فاطمة الزهرا بعينيه حتا ضارت مع الدورة عاد تبعها كايعيط"
.فاطمة الزهرا وصلات للدار تتبكي وطيح الدموع لي كانت حابسة وحتا كانت غادخل هو يشدها دورها لعندو وقال معصب: مكاتسمعيش
فاطمة الزهرا: طلق مني شنو بغيتي
سيمحمد: دابا مالك تتبكي.. شنو وقع حتا دابزتو؟
ردت تتغبن: سير سول ختك
وقفات عليهم حادة بعكازها وقالت: اااتي مالكي العيالات جايين عدي يتجااراااو عتقي بنت ولدك مداابزة وتترايااش.. معامن اااحي
ردت بغير نفس: غير تايزيدو فيه اجداتي ماترايشت موالو
حادة: اييه ومعامن مدابزة
خنزرات فسيمحمد وقلبات وجهها: مع ختو
حادة شافت فسيمحمد لي تنهد وقال: مع ليلى امي حادة.. راها مشات للدار وجيت عند فاطمة الزهرا نفهم مالهم ساعة بدات تبكي
ضارت ليه بعصبية: علاش تايهمك إلى كنت تانبكي ولا لا
سيمحمد: وعلاش مغايهمننيش
فاطمة الزهرا: اااه تيقتك نسيتي كيفاش جريتي عليا؟
رد بحدة: قلت تاخدي راحتك كتر مع أمين بلاما نصدعوكم
قادات الوقفة والخلعة ركباتها: ا اشمن امين اشمن
ميلات فيها حادة راسها: علاه ابنيتي كتي مع أمين
فاطمة الزهرا: أنا.. لا
سيمحمد: وعلاش كاتكدبي "خرجات فيه عينيها وبدات تمعني ليه يسكت لكنو تجاهلها وشاف فمي حادة قائل " كانو فواحدالقهوة امي حادة كايفطرو بجوج
طلعات حادة راسها بفهم وقالت بصوت هاادئ: هاكااك
فاطمة الزهرا: ا غير كانفطرو وصافي مالها اش فيها
حادة: مافيهاااش لاااا لااا.. هزي هزي ديك ليد ابنيتي وقولي يااربي.. ياااربي حبيبي أناا بغيت لياااا غاالعز.. أما الدل هانااا فييييه
هزات عكازها على غفلة تعطيها هي طير تخبات ورا سيمحمد لي ولا وسطهم مكالي عليها
سيمحمد: مي حادة واش البنت باقا قد العصا
حادة: ولد مينة حيد هك ولا اليوم نسيفطك تزور مك
فاطمة الزهرا: أنا شنووو درت گااع حتا تبغي ضربيني حشومة عليييك
حادة: شنووو درتي المديلييلة.. مدوزة خمس يااام ونتي تتنخصصي وتبكي عليييه النعاس ماتتاتشوفيه والماكلة متتاكليهااا جااا ضحك علك بجووج كلماتت تحليتي لييه وبركتي دوري معاه فالقهاوي
سيمحمد بنص شاف فيها وهي زماات فمها بعصبية مارضاتش يعرفها كانت مريضة على ودو وهو تايخرج عادي مع البنات.. لحظات قليلة من النظرات الساهية بيناتهم حتا جاتها دقة فرجلها نقزاتها موعتة وحادة طلعاات العكاز تعاود تعطيها ساعة خوات ليها وجات فسيمحمد للراس مباشرة فلقاااتو
سيمحمد: اااااي فالسداري بارك وكموسة التلج دايرها ورا راسو كايبرد بيها على الدقة لي وضرات ليه السلوكا وخلاتو لفترة قصيرة مقادرش يشد توازنو حتا هبطات حياة تتجري وعاونوه طلع فالدروج وبركوه فالصالون.. باركة حادة من جهة متكية على عكازها وحياة من الجهة لخرا اما فاطمة الزهرا بركات بعييد فالقنت وبعيون حزينة تتشوف فيه وقلبها ضارها على حالتو
حياة: فاتك شوية الدوخة.. هانتا شحال هادو؟
ضحك تايشوف فيها دايرة ليه جوج صبعان وبالطنز قال: سبعة
نقزات فاطمة الزهرا بالخلعة وقالت: عافاكم نوضو نديوه للطبيب مايمكنش نخليوه هاكدا
حياة: صاافي اامي بردتي تهنيتي هالدري طفاو ليه العينين
سيمحمد: غاضاحك اختي ماوقع باس
ردت حادة بالغدايد: حووو فيه قلت ليه حيد من قداامي هو مابغا يسمع هاهو جابها فراسو
شاف فيها ضاحك: وااادقة عندك امي حادة
حياة: ياك دابة شوية اخويا متأكد
حيد الكموسة وناض واخا فيه شوية الدوخة: الحمد لله دابا حسن.. خليتكم على خير.. مي حادة بردي شوية الأعصاب ممزيانينش ليك
باس ليها راسها وقالت متنهدة: الله يرضي المرضي وسمح لينا
حرك راسو عادي وشاف ففاطمة الزهرا وهو دايز من حداها قال: تصبحي على خير
ردت بصوت خافت تترمش فيه: تصبح على خير
تبعاتو بعينيها حتاخرج وبتنهيدة قلبات عينيها.. لقات حياة وحادة بجوج تايشوفو فيها هي ترمش وجمعات النوضة: غانمشي ننعس بلاما تفيقوني للعشا
حادة: زعما هربتي.. اييوا هاهي فيك على سريرها ناعسة مغطية كلها بمانطة خفيفة وتحتها كايتحركو كتافها نتيجة البكا لي تتبكي.. بكات بحرقة وطيحاتهم حجر خصوصا أن ليلى من الناس لي صعيب تبكي.. كاتجمع فقلبها وتجمع وتجمع حتا تخرجهم دقة وحدة عاد تنوض نوضة وحدة ..الحكرة هي اكتر حاجة ممكن تقهرها وعلى ود نظرة الشفقة خدمات ودمرات باش حد مايشفق عليهم وحد مايحگرها لاهي لاعائلتها الصغيرة.. تحل باب بيبتها ودخل خوها الصغير عندو 12 لسنة لابس توني ديال البارصا وقال
عمر: ليلى قالت لك الواليدة نوضي تعشاي
ردت تحت المانطة بصوت مغنغن: خرج وسد وراك داك الباب يالله
عمر: مالك!!؟ واش مريضة
ليلى: مماليش قوليها عيانة فيها النعاس
خرج خلاه محلول وسمعاتو قال ليها: مابغاتش قالت لك فيها النعاس
حيدات الغطا بعصبية وعينيها منفوخين بالبكا: عنمار اجي سد هاد الباب لي خليتي
عمر: واسدييه تي
ليلى: غاتجي ولااانوض لك
عمر: غاحاگريني انا فهاد الدااار "رجع تايجر فرجليه بغا يسدو هو يشوف وجهها عامر دموع.. تقلب وجهو وقال بصوت خافت" مالك !
ردت بعصبية: مماليش سد داك الباب وسير يالله
دخل وقال:'تي كيفاش مماليش وتي تتبكي .. ماااا....
قاطعاتو مخرجة فيه عينيها: غاتعيط ليها غانوض نشتف علك
عمر: ولاش تتبكي؟
مسحات وجهها بنفاد صبر: مقلقاني شي حاجة وتانبكي شنو مانبكيش
رد بعناد: لا شي واحد قلقك.. شوفي اختي غاوريه ليااا والله تانشتف على مو نوريه يبكي ليا ختي
ضحكات على كلامو وقالت: سير البعلوك سيير
عمر: داوي معاك راه كبرت انايا وليت راجل لي حگر علك قوليها ليا نشربو اتاااي
ليلى: ههه واخا كون هاني.. يالله سير وسد داك الباب
عمر: وماتبقايش تبكي ياك؟
ليلى: مغانبكيش
عمر: الله يحفظك لينا الخوادرية نتي رجولة والله.. شتي نتي هي با لي ماعنديش لي بكاك قوليها ليا
تنهدات مبسمة وهو خرج.. طلعات راسها فصورة الأب ديالها وبسمتها عراضت بحسرة حتا تتسمع مها تتعيط.. حلات مجر حداها هزات منو كلينيكس مسحات بيه وجهها ونيفها عاد لبسات سنضالتها وخرجات من البيت لقاتها عاد تتحط الشعرية بالحليب للعشا
مليكة: سيمحمد بغا يشوفك.. عييت فيه يدخل مابغاش خرجات لعندو و كان واقف قدام الباب ايديه مخبيهم فجيابو من البرد والسقيل فالدرب كايتسمع فقط صوت الكلاب مدابزة .. ربعات ايديها وهو طول فعينيها الشوفة وشقعها كانت تتبكي واخا هربات وجهها عليه حتا حساتو جرها فصمت و بحنية معنقها عندو ..حضن أمان كانت محتاجاه وخلاها تنهار اكتر وهو بحنية تايدوز على دراعها وقال بنبرة مازحة
سيمحمد: شكون هاد الحمار لي بكا ليا ختي.. همم
ردت بصوت باكي: والو
سيمحمد: هادشي كامل على المدابزة
مسحات وجهها فالتيشورت ديالو هو يضحك وهرب راسو اللور: وااالاخت جمعي خناينك هههه
ليلى: تخنقت آو
سيمحمد: اجي اجي هههه
رجع عنقها وقال: المخننة.. واقولي مالك.. ياك خوك تتعاودي ليه كلشي
تفكرات لي وقع وفعينيها زادو تجمعو الدموع: المدير ديال الشركة قاليا نتي كدابة.. أنا شفقت عليك النهار اللول وخدمتك ونتي ماتستاهليش الشفقة
خنزر مزير على سنانو بغضب وقال: علاه مال الحمار تاع بوه كنتي تتبوسي ليه الرجلين حتا قبلك
ليلى: عرف بلي ماعنديش با وانا لي هازة مي وخوتي.. انا بعرق كتافي خدامة تانجري ونجاري باش نحلل رزقي ومباغا حتا حد يشفق علياا.. فاللخر كلشي تضرب ليا فاللزيرو
..
طلع السائق عينو فالمرآة وقال: سي عصام.. ساعة وحنا حابسين هنا.. واش الآنسة ليلى غاتجي؟
تنهد تنهيدة طويلة وبعيون ساهية تايشوف فالدرب حتا نطق وقال: تسناني هنا
رد::واخا امسيو
هبط متوجه لعنوان دارهم.. فحين أنها هي مزال تتبكي بحضن سيمحمد لي تزير عليه خاطرو من حالتها
سيمحمد: دوك الناس هادي طبيعتهم اختي.. خرجي من تما إلى مابقاش مريحك الوضع
ليلى: لفين تاني.. عييت من هاد الحالة عييت اخويا.. حتا قلت صافي لقيت خدمة نقية والمدير راجل الله يعمرها دار صدمني اليوم.. مالي ماعندي زهر مالي تايوقع ليا هاكدا بغيت غيير نعرف
سيمحمد: ششش صافي دابا من البكا كاتمرضي غير راسك.. يصبح ويفتح وسيري قدمي استقالتك والله يعاون.. لاكان الرزق فيدهم الله يقطعو
سكتات بحصرة وهو تايواسيها.. وعيوون عصام من بعيد عليهم
صبح وفتح عند ليلى وهي داخلة مع باب الشركة بملابس رسمية رمادية وساك اسود فيدها .. بوجه بارد وقلب ابرد منو دخلات للكافيتيريا خدات قهوة كحلة قاصحة وبركات تتشربها ودوز على راسها لي بغا يتشقق مالقات من غير القهوة تفيقها شوية.. سالات الكاس عاد ناضت طالعة الفوق وتادوز على الموظفين لاسلام لاكلام جابت ليهم العجب هاد الصباح وهوما مولفين ليلى البنت النشيطة لي ضروري ماتنوض الحيحة الى دازت من حداك واخا غير ضحيكة أقل حاجة..
ليلى: ياسمين مسيو اوكوراي فالبيرو ديالو
ياسمين: آه اختي جا قبل منا كاملين.. مالكي ماجيتيش للحفلة البارح
ببسمة خفيفة قالت: حتا نعاود لك
ياسمين: واش صافا باينة فيك بحالا مقلقة
ليلى: الحمد لله صافا ماديريش فبالك
فاتتها وللمكتب ديالو توجهات.. دقات ووقفات حتا سمعات الادن عاد حلاتو ودخلات كان هو تايسني شي اوراق حتا طلع فيها عينو وحبس ..استاقم بضهرو وقال ببحة وملامح جدية بحال ملامحها: صباح الخير
ليلى: صباح النور مسيو اوكوراي.. بغيت نتكلم معاك فواحد الأمر
عصام: موضوع البارح مابقيتش بغيتو يتجبد.. يكفي الروينة لي وقعات
حركات راسها بانصياع: أوامرك
عصام: علاش ماجيتيش للحفل
ليلى: حيت حضوري تما مكان ليه حتا لزوم
سكت فيها تايشوف لمدة عاد زاح نظرو وتنهد.. هز الملف لي كان تايسنيه قراه لآخر مرة تحت نظراتها وسدو مادو ليها.. شداتو وهو هز اوراق أخرى تايسنيهم ويتكلم بلاما فيها يشوف
عصام: المشروع الجديد غايبدا فالفرع لي عندها فوجدة.. تما فين غاتحولي وغاتولي خدمتك.. بيرين غدا غاترجع لخدمتها ونتي تقدري اليوم تمشي الى وجدتي راسك.. السالير محترم غايقدك نتي وعائلتك.. والسكن على حساب الشركة وصيتهم يقلبو ليك فحي نقي وتقدري تاخدي معاك ماماك وخوك.. وإلى كنتي محتاجة شي حاجة خرا قوليها نضيفوها فالملف
بسمات بحصرة قالبة وجهها وقالت بألم: الله يكتر خيرك
حرك راسو ومازال حانيه حتا حطات ورقة مطوية أمامو عاد طلع فيها الشوفة عاقدهم: شنو هادي
ردت: جوابي
حلها تايقراها وكانت الاستقالة ديالها.. وصل فيها للنص وقالت هي ببسمة حزينة: كنت نتمنى آخر يوم ليا فهاد الشركة يكون حسن من هاكدا.. أنا فعلا خدمت معاكم بقلبي. وبضميري... وكنت كانتقاتل باش نبقا متفانية فخدمتي.. وباش حتا إلى مكتبش الله نكمل معاكم وجمعاتنا ليام شي نهار " شاف فيها وهي قالت" يكون لقاء زوين ومحتارم.. مباغاش شفقة ديالك امسيو اوكوراي.. كون عرفت بلي هي السبب حتا أنا خدامة هنا كون خرجت شحال هادي ووفرت عليك وعليا شحال من حاجة.. على أي.. لي وقع وقع دابا.. نتمنى تلقاو ماحسن مني.. واخا ليلى منها غير وحدة هه ..نهارك مبروك
خلاتو ومع ضارت نزلات دمعة من عينها مسحاتها بسرعة وخرجات تتسد ساكها وللمكتب ديالها دخلات تجمع أغراضها رجعات الحياة لروتين كئيب وخايب..القلب موجوع والخاطر ماشي على راحتو.. فاطمة الزهرا مقابلة قرايتها تتلاهي بيها الوقت وتنسي فيها وجاعها.. لكن الى غير صادفت سيرتو ولا سمعات اسمو بطريقة عابرة تتحس بقلبها ضارها بزاف..من آخر مرة معاود شافتو ولاسمعات حسو.. توحشاتو ومباغاش تعتارف حتا بينها وبيين راسها وغيابو فحياتها خلاها تعيش مرارة الفقدان.. واخا راهم فدرب واحد.. الدار قريبة من الدار.. لكن حساتو بعدها عليه كلمترات كتيرة..
أما ليلى رجعات للتشوميرة مرة خرا.
شي مرات تتخرج تقلب على خدمة ودفع السيفيات لي كرهات سيرتهم لكن ديك الطاقة والنفس الجميلة والحماسية مازال مارجعات ليها وباقي خاصها وقت باش تخرج من المود لي هي فيه..
فافت معطلة كمعظم الايام طلات على الساعة ولقاتها الطناش هي تنوض تتجمع فشعرها بقراسة وخرجات من بيتها تتعيط
ليلى: مي .. مليكة.. كاين شي فطور.. ااامي
طلات لقات الكوزينة تتصفر ومكاين حد فالدار.. دارت البراد يسخن وحطات الخبز والكاشير قادات نصيص وكبات ليها كاس اتاي فطرات بيه..جمعات الروينة وبدات تحل فالبلاكارات وتجبد قادات ماسك لشعرها وطلاتو بيه وغطاتو بزيف حياتي عاد ناضت لبيتها جمعات حوايج الحمام وهزات التبريمة لي تتصيب مها حطاتها مع المستلزمات لي فلاتروس ديالها لبسات جلابة شيبية خفيفة وسنضالة پلا وحطات سنضالة الميكة فالسطل لي غاتدي مع طاسة وخرقة علاش غاتبرد وفوق داك الزيف حياتي لوات فولار شيبي ديال الجلابة ..حطات التليفون يتشارجا. خرجات من الدار سادة وراها الباب والسوارت دارتهم فالبزطام ديالها وللحمام توجهات وفالطريق تللااقات بحياة جايبة السخرة من السويقة وقالت ليها
حياة: اابصحة مسبقا
سلمات عليها مبسمة: يعطيك الصحة الزين هههه
حياة: شوري نحط هاد التقدية ونجي معاك تانا كنت ناوية نمشي ههه
ليلى: صافي هانا غانتسناك
مشات معاها للدار ووقفات قدام الباب حطات السطل حداها و تتسناها .. شوية سمعات الحس فالدروج وخرجات فاطمة الزهرا لابسة حوايج الخروج وهازة ساكها فيدها وسبرديلة بيضة.. ميقات ليلى ملي شافتها وقلبات كمارتها وفاطمة الزهرا كدالك بركات فالعتبة تتلبس فالسبرديلة حتا تمات نازلة حياة هازة ساك كحل وسطل كبير
فاطمة الزهرا: عمتيي هانا مشيت
حياة: سيري احبيبتي الله ينجحك
فاطمة الزهرا: آمين
مشات وحياة سدات الباب وقالت لليلى: يالله زيدي.. واحد مك شكاتعاود
ليلى: لاباس عليها.. ومي حادة؟
حياة: تاهي لاباس.. اجي تي وفاطمة الزهراء مالكم ديك النهار.. جيت نسول العيالات ساعة كل وحدة تشرق فجهة
.عوجت فمها وقالت: دارت معايا بلان خايب
حياة: فاتي ؟
ليلى: ااه هي.. صافي نساي عليا عافاك مباغاش نتفكر داك المرض.. الله يخلص كل واحد
حياة: اختي ماعرفت هاد العداوة ديالكم ايمتا غاتسالي.. كنتو كي الفتيتات فالصغر مدابزات اليوم وغدا نلقاوكم تاني مصالحين
سكتات ليلى حيت معرفات ماتجاوبها وكانو نيت وصلو للحمام ودخلو
....
تحمحمات نييت وبردات على قلبها مارجعات للدار حتا وصلات الربعة ونص.. دخلات مهدودة بداك الساك والسطل تاتعطعط منها ريحة باندوش والمستحضرات لي مولفة طلي للحمها وحناكها حومر طايح عليهم السر.. نشرات لي خاصو يتنشر وشي لاخر دارتو يتصبن وردات كل حاجة لبلاصتها عاد دخلات للكوزينة هزات كاس وقرعة العصير شراتها فطريقها ..كبات باش تتبرد وداتو لبيتها وهي تتردد "الله شحال بارد" بركات على سريرها ترتاح حيدات التليفون من الشارج وشعلاتو هوما يطلعو ليها الرسائل لي وصلوها ومن بينهم رسالة من عصام اوكوراي.. تفاجآت وحبسات مبلوكية تتفكر اااش فكرو فيها مازال.. دازت سيمانة وكلها شد طريقو شنو يكون مسيفط زعما ؟ قتلها الفضول ودخلات للميساج لقاتو كاتب جريدة طويييلة وبدات فيها تقرا
...
"صباح الخير ليلى.. كيف دايرة مزيان ؟ نتمنى أمورك تكون أحسن.. وتكوني لقيتي الخدمة لي ترتاحي فيها.. فهاد الرسالة بغيت نعتادر منك مدام أنه مابقيتش غانشوفك.. فلحظة غضب قلت هضرة مخاصش تقال وماشي صحيحة نهائيا.. علاش ادا خرجتها من فمي وعلاش تعصبت لديك الدرجة؟.. ربما غايجي نهار تلاقينا ليام ونبركو ندويو ونكون قادر ديك الساعة نشرح ليك كلشي.. أما دابا بغيت سماحتك.. كنتي خدامة بعرق كتافك ومتفانية فخدمتك وهادشي شفتو وعشتو معاك فهاد المدة لي كنتي خدامة معايا.. عمري شفقت عليك نهائيا.. حتا أول شفتك فيها وسمعت كلامك نتي وفاطمة الزهرا برا الاوطيل ونتي كتعاودي ليها على ضروفك ماشفقتش عليك.. إنما احتارمتك وقدرتك.. ونهار وظفتك كون ماكنتيش مستاهلة داك البوسط مكنتش غانخليك فيه كوني اكيدة.. نتمنى تقبلي اعتداري.. حيت حتا أنا بغيت هاد الفراق يكون بطريقة حسن باش بجوج بينا نرتاحو.. وكيف قلتي نهار تلاقينا الوقت.. ماتكون فقلب حتا واحد شي ضغينة تجار لاخر.. كانتمنى لك السعادة.. حتاجيتي اي حاجة علميني.. نهارك مبروك "
.شربات جغيمة و كتبات ليه
"هاد التخربيقة سير كولها.. ماتعاود تسيفط ليا مانسيفط ليك.. وحسن لك ماتلاقاني منتلاقاك"
سيفطاتو ودارت ليه بلوك تم تم وهبطات على داك العصير تتبرد بيه الجوف.. جاها مع الفقصة ديال التشوميرة والفلوس قربو يساليو كملو عليها لي خاص.. أما كانت غاتنخلو ولا تعطيه ضحكة صفرا وجواب زوين فوق النفس.. حطات التليفون وتغطات ضرباتها بنعسة وهضرتو تتعاود فدماغها كيف الكاسيطة حتا داها النعاس....
..
تعاشات العشية والدراري من المدرسة راجعين ومنوضين الصداع والهاراج.. رجعات فاتي حتا هي من الجامعة و دخلات للدار بدلات حوايجها وبركات دير كسكروط مع حياة ويتحتتو شوية
فاطمة الزهرا: مي حادة خارجة
حياة: راها مازال متكية.. كي داز نهارك
فاطمة الزهرا: صافا عادي
حياة؛ كونما كنتي قارية كون ديتك معايا للحمام غاتنساي الزعل وماجي منو هههه
ضحكات على كلامها حتا تدق الباب وناضت قائلة:'خليك انا غانحل
مشات فتحاتو ولقاتها ليلى واقفة بأدب وكسيوة موردة تحت الركبة بشوية والتليفون فايدها.. تبسمات ليها بسمة عرييضة بريئة وقالت: السلام.. ممكن ندخل؟
طاح عليها العجب من هاد التبسيمة لكن قلبات وجهها ببرود وخلات ليها الباب محلول..
سبقاتها للصالة وبركات تكمل ماكلتها قائلة: ليلى لي جات
حياة: وفينها ؟
فاطمة الزهرا: هاهي طالعة
دخلات مع الباب تتشوف فيهم مبسمة بتوتر خصوصا ففاطمة الزهرا ليمعاودش طلعات فيها الشوفة
حياة: زيدي الزين مرحبا بيك.. غانوض نجيب لك كاس ههه
ليلى: واخا ربي يخليك
مشات وليلى حنحنات وتسوخرات عند فاطمة الزهرا قائلة: فاتي.. لاباس عليك بيخير ؟
طلعات فيها راسها وطولات الشوفة مصغرة عينيها عاد قالت: إلى كنتي باغا شي حاجة ولا تتقلبي على شي حاجة.. غير فوتيني .
من دابا تانقولك لا
جمعات البسمة: ناااري نيتك ناااقصة والله
فاطمة الزهرا: ولكن كنعرفك مزيااان والله
ليلى: الله يستر.. جينا غانطلبو منك السماحة
طلعات حاجب بتفاجأ وقالت: علاياش
قلبات ملامحها للحزن مراضياش ظلمها وضميرها كايأنبها: على ديك النهار.. عارفة راسي ظلمتك وجبدت معاك الصداع غير هاكاك.. ولكن كان يسحاب ليا بلي نتي عاودتي اموري الشخصية للمدير
فاطمة الزهرا: قلت ليك بلي مقلت والو نتي مابغيتيش تيقي
تنهدات بندم: الشيطان وصافي.. فاش قالها ليا نتي لي جيتي فبالي ديك اللحظة حيت بوحدك لي تتعرفيه وعارفاني حتا أنا
بقات فيها تتشوف ومن جهة بقات فيها كيفاش تتهضر والندم واضح عليها حيت ظلماتها.. طلعات النفس وقالت: انا مقلت ليه والو.. ماعرفتش أصلا كيفاش عرف بالحق ماشي أنا
ليلى::عارفة.. عاد قاليا بلي سمع كلامنا انا وياك النهار ديال الحفلة.. تما عرف كلشي محسوش بحياة لي حطات الكاس وناضت من حداهم ملي شافتهم منساجمين فالكلام
فاطمة الزهرا: وهاهو عرف.. شنو علاقة حياتك الشخصية بخدمتك مافهمتش
بسمات مراضياش تقولها وحنات راسها تتلعب فواحد الحاجة فالخدية: حيت قالك.. خدمني لأنه شفق عليا هه وانا ماطلعتش نستاهل الشفقة ديالو
ردت مصدومة: عصام؟
طلعات النفس مخنوقة وقالت: صافي نساي.. داك الباب أصلا سديتو الله يعاونو ويعاونني
فاطمة الزهرا: واش مايقيتيش خدامة تما
ليلى: لا هادي سيمانة باش قدمت استقالتي.. قاليا غانحولك لوجدة تتكلفي بالبروجي الجديد ولكن أنا قلبي برد من ديك الخدمة ماعجبنيش الحال ملي قال بلي أنا تما غير بشفقة منو ..وصافي استاقلت
فاطمة الزهرا: ماعرفتش علاش دار هاكدا أنا لي عارفة على عصام بلي إنسان عملي ومعقول متايبغيش الظلم.. مافهمتش مالو تصرف معاك بهاد الطريقة
ليلى : حتا انا تصدمت بحالك ..ولكن من بعد نسيت الأمر الله يجيب االرزق فبلاصة خرا
تنهدات وترددات شوية قبلما دوز على يدها بحنية وقالت: دابا تلقاي ماحسن منها.. والى گاع بغيتي ممكن نعاونك مايبقاش فك الحال والله
رمشات فيها متععجبة من هاد المعاملة وبدات تبسم: هاي هاااي على فاتي طلعات حنينة هههه
جمعات يدها مخنزرة وقالت: غير لي بغا تبقاي فيه
قالت بطنز تاضحك: بصح بقيت فيك اخيتي ههههه
فاطمة الزهرا: ليلى فوتيني
ليلى: لا لا والله تاضرافيتي ووليتي تواسيني گاااع وباغا ضبري ليا على خدمة هههه هااي هاااي
فاطمة الزهراء: ااه طنزي طنزي سري انا لي دايرة فك راسي
ليلى: هههه تقلقتي تاني
مدات ايدها تهرها هي تنقز وقالت مخرجة فيها عينيها: وااياااك والله تانغوت والله هههه ليلاااااا وعتقونيهههههههه
بدات تهرها وضحك وفاطمة الزهرا غاتموت بالضحك: فين النفخة داابااا هااا ههههه
فاطمة الزهرا: وااااحيااااة هههههههه
خرجات من الكوزينة صفرا تتجري: امالكم اناااري.. يعطيكم الدل نسحابكم غامدابزات ليلى تيحيدي راك غاتقتليها
ليلى: ههههه "بعدات ليلى وهربات لاتنوض ليها فحين أن فاطمة الزهرا بدات تنهج وقالت
فاطمة الزهرا: حمارة ماتعاوديش تهضريني
ليلى: ههههه وابااز عند كنتي تتكركري
حياة: ولايني هبيلات اش هاد الضحك الباسل
ليلى: هاد بنت خوت تايعجبني نعصبها راحة نفسية اختي ههه
شيرات عليها فاطمة الزهرا بمخدة وشداتها تاضحك
حياة: هههه لاااحول برهوشات صافي
ليلى: أنا غانمشي قبلما طرطق.. اجي نخرجو هاد العشية؟ ماخدامة ماردامة قتلني القنط
جاوباتها مخنزرة: وانا مالي سيري مع صحاباتك
حياة: اويلييي الدرية سولاتك نتي وتتقولي ليها صحاباتك
ليلى: قليلة الصواب.. التسعود ندوز علك تخليني منشورة لتحت غانطلع نشر ختي
فاطمة الزهرا: آه خلعتيني
خرجات وحياة بدات تجمع الطبلة وضحك: الهبيلات.. ولكن هاكدا نبغيكم ديرو شوية داك العقل راه كبرتو زعما على المخاسمة
فاطمة الزهرا هزات كتفها وقالت: انا متصالحت مع حد
حياة: ايوا اختي باز.. جيبي معاك ديك الصينية ضربات التسعود ونص وكانو اتناءها داخلات بكساويهم المتأنقة والشعورات مطلوقين والوجه مقاد لواحد الريسطو بسيط وشعبي شوية.. لكن النقاوة ماعندهم فيها مايقولو والروائح الزكية مالية الجو..
سبقاتها ليلى خدات بلاصة اللور كامل وفاطمة والزهرا تابعاها وتتشوف المنظر
فاطمة الزهرا: كون مشيتا لشي بلاصة حسن فالسونطر
ليلى: !!! السونطر.. باغا تسيزيني وانا شومور
بركات مقابلة معاها: اوكي الالة
ليلى طلعات ايدها للسيرفور: خويا المونو عافاك.. عندهم الماكلة زوينة خصوصا البيتزا كايقادوها خطيييرة
وقف عليهم السيرفور ونطقات ليلى: عافاك جيب ليا واحد لجو درونج و واحد بيتزا فروي دمير.. ونتي شنو تاخدي؟
فاطمة الزهرا: حتا انا بحالك
ليلى: جيب ليها بحالي ووجد ليا معاك واحد جوج بيتزا كفتة موايان نديهم امبورطي
رد: واخا اختي مرحبا
ليلى: ميغسي "مشا وشابكات ايديها تتشوف ففاطمة الزهرا ومصغرة عيونها" ايوا اختي.. هانية بيخير كلشي هو هاداك
هزات كتفها: صافا عادي.. مالك تتشوفي فيا هاكدا؟
ليلى: واالو.. اجي شنو ديك التخربيقة لي وقعات بينك وبين سيمو ؟
قلبات وجهها تتنفخ: مابغيتش ندوي فهاد الموضوع
ليلى: راه باينة للعما هاد الموضوع هو لي مبرزطك.. هو غابر من جيهة ونتي كتر منو واقلة ديك الجامعة وليتي ساكنة فيها
شافت فيها: واقلة نتي ملي خرجتي من الخدمة وليتي حاضياني غير انا ايمتا خرجت ايمتا دخلت
ميقات قائلة: معشوقة فك أنا.. راه غالواليدة والجارات قاعيدة وحدة وسمعت التنقنيقة منهم.. أصلا أنا برأيي فهادشي كامل مزيان لي ماتفاهمتوش والله
شافت فيها بنص عين وقالت تتحك جنب عنقها: وعلاش ؟
ليلى: حيت بصرااحة خويا لاعلاقة مع داك لميخي لي طايحة فيه.. باغدون سبيت لك لپيروج ديالك ولكن الصراحة تقال إلى كان كايعجبك النوع ديال امين غاهربي ملي يبان لك شي كراكطير بحال ديال خويا
حط ليهم السيرفور العواصر ديالهم وقالت ليلى: شووكرا "جرات كاسها شربات منو" الله.. شتك سكتي
طلعات النفس تتشوف بعيد ونطقات: شنو غانقول أصلا..
ليلى: والو ..غابغيت نسمع رأيك.. بعدا علاقتكم كيف غادة؟
ردت بشيء من الحسرة: من ديك المرة معاود هضر معايا.. وحتا أنا قلبت عليه حيت كون كنت فعلا تانعني ليه شي حاجة وتايبغيني كيف قال گاعما يقلب عليا وجهو بهاد السهولة
طلعات فيها حاجب: دابا حنا داويين على امين ولا على سيمحمد ؟
فاطمة الزهرا: مال امين فهادشي!؟
ضحكات بجنب فمها وقالت: نتي وياه واش متاتخرجو موالو "حركات ليها راسها بالنفي" متادويو لافواطساب لافميساجات لاليزابيل
فاطمة الزهرا: علاش غاندويو!؟
ليلى: على أحوال الطقس.. ياك تتبغيه سنين هادي ايوا هالفرصة قدامك ؟
نزلات عينيها تترمش وتحرك الباباي فكاسها: إلى بغا يهضر معايا راه عارف نمرتي
ليلى: دابا بلاتي.. أمين متايهضرش معاك.. وسيمو حتا هو.. بالحق لي مبرزك فالموضوع هو سيمو ماشي أمين.. هو لي حاسة بالفرق فغيابو ومرضتي گاع ومامتقبلاش يبعد عليك
غوبشات فيها: شكون قال هاد الهضرة
ليلى: علاه كدوب
فاطمة الزهرا: اناا ممقلقني حد ويعاودها لراسو كيفما نساني حتا اناا نسيتو