مي عيشة: زيدي ابنتي مرحبا بيك
تبعاتها للصالون بخدود حمراء من الخجل وفجنبها بركات ..طلعات مي عيشة ايديها و شدات خدودها بحنية تاتشوف فملتمحها بتمعن وقالت: ماشاء الله تبارك الرحمن .. تبدلتي الغزالة ديالي.. كبرتي ووليتي مرا تاتفتن وطير العقل هههه
ضحكات بخجل مهبطة راسها وقالت: دازت كتر من عشر سنين امي عيشة ضروري مانتبدل .. واخا أنا غير شفتك عرفتك وباقا نتي هي نتي ههه
دورات رااسها دائريا تتحصر : احياانا.. الزمان ابنتي شرف مك عيشة ورشا لي العضام حتا ولات كلها تكامش
ردت بعفوية: لا بالعكس حروفك غزالة ومميزة ..من ديما كنتي زوينة فعيني وهاكداك حتا دابة.. وغاتبقاي ديما هاكدا
مي عيشة: هههه يخليلي الحلاوة والطرااوة امولات اللوين ههه
ضحكات فاطمة الزهراء وقالت: هاد الجملة كنتي ديما تتقوليها ليا ملي تانجي نعيط على أمين.. عقلتي فاش تتشديني وتتقولي ليا عينيك ملونين امولات اللوين ههه
تنهدات عيشة مبسمة بحصرة وقالت: اييه اليام.. فيين أمين ابنتي ، علم الله فين تلات بيه
رمشات باهتمام وقالت: وصلوني الخبار بلي حرگ لبرا ملي خدا الباك.. واش متايتواصلش معاك ؟
عيشة: إلى تفكرني راه تايصوني يسول.. وإلى ماتفكرنيش ابنتي ليا الله سبحانه وتعالى غير خلي داك الجمل راگد ، انا غانوض ندير لينا شي كويس
فاطمة الزهراء: لا لا عافاك بلاما تعدبي راسك وأصلا يمكن كنتي خارجة وغير عطلتك...
ردت: لقيتيني ابنتي غادة عند الطبيب، ماشكيت عليك عينيا النهار ومطال وهوما عاطييني الحريق.. ايوا ودرت مع سي محمد يوصلني لعندو نشوف اش كاين
خدات ايدها بلطف وقالت: مي عيشة.. الى كنتي محتاجة شي حاجة نتمنى تقوليها ليا عافاك ..نتي راكي فمتابة جداتي وتربيت على يديك ز معزتك من معزتها والله
تبسمات بتأتر لكلامها وقالت: الله يرضي عليك الحنينة بنت الحنيينة ..نمشي نجيب باش ندوزو الحتيت ونرجع لك
ناضت مخلياها باركة بوحدها فالصالون وتتسناها ترجع.. حتا فجأة بدات تتسمع الدقان فالباب.. تسنات عيشة تحل وملي تعطلات ناضت هي تحلو، ضورات الساقطة ومع الفتحة جا وجهها فوجه سي محمد لي تطلقو حجبانو مركز فعينيها الشوفة وتايتأكد واش هي ولا غير تلف
فاطمة الزهراء: سي محمد ياك؟
استاقم فوقفتو كايرمش وحنحن بجدية قائل: هو هادا.. مي عيشة لداخل؟
خرجات عندو ببسمة لطيفة وقالت: هاهي جاية "ميلات شوية راسها وقالت بنفس الضحيكة" ماعقلتيش عليا يمكن ؟ "شافتو سكت الشي لي خلاها ترتابك وقالت" ا أنا فاطمة الزهراء، حفيدة مي حادة.. كنا صحاب وحنا صغار أنا ونتا وأمين و...
قاطعها وقال: عرفتك اختي ..على السلامة مرحبا بيك فالدرب
ضحكات برقة وقالت: الله يبارك فيك شكرا "شافت فالطاكسي وقالت" هي خدمتي فالطاكسي؟
سي محمد: هادشي لي عطا الله.. مجاتش بالقرايا وقلبناها طاكسي، المهم نتحركو فشي حاجة بيما تيسرات الوقت
فاطمة الزهراء: بصح عندك الحق ..الله ييسر ليك ياربي
سي محمد: آمين وليك حتا نتي
سكت وسكتات حتا هي تترمش فأنحاء الدرب ومرة مرة تشوف فيه هو لي جبد تليفونو ملاهي معاه حتا خرجات مي عيشة عندهم وشافو فيها بزوج
عيشة: هادا نتا هههه.. واصبر اوليدي نلبس جلابتي ونجي معاك
فاطمة الزهراء: مي عيشة بسلامة عليك حتا ندوز عندك مرة خرا واخا
عيشة: إن شاء الله الحبيبة ديالي سلمي على جداتك
فاطمة الزهراء: واخا..
مشات شادة طريق الشارع باش تمشي للكلية ديالها فجهة أخرى.. فأضخم شركات العقار بالمغرب، كانت ليلى جالسة فكراسي الاستقبال تتلعب بالطالون ديالها لي كان فالموطارد متلت من القدام وعالي جدا، مزينة رجلها بخلخال رقيق تايبان بحالا دهب من شدة بريقو ولابسة سروال اسود توب لاسق على لحمها وطالع لكرشها.. دخلات فيه شوميز سوداء حريرية شوية مفضفضة وكول V مزين بالدونتيل زادت برزات خصرها المنحوت وفوقها لبسات ڤيسط فالموطارد وضفار صباعها مسبغين بالصومو باارد .. شعرها خلاتو مطلوق وكل شوية تلعب بيه وطل على ساعتها الرقيقة وتنهد بملل ..دازت عشر دقائق أخرى بدون أي تغيير الشي لي خلاها تهز ساكها الأسود وناضت عند البنت لي فالاستقبال حطات الساك قدامها الشي لي خلا البنت تنتابه ليها فحين أن ليلى عرضات بسمتها الصفرة وقالت
ليلى: كبيدة.. واش هاد مسيو عصام مازال مغايجي؟ ساعتاين وانا معلقة هناا وكل شوية هاهو جاي هاهو جاي ، الى السيد مكانش غايجي قوليها ليا نزيد فحااالي حسن
ردت البنت بحرج وقالت مبسمة: غايجي امدموزيل غير عندو شي شغال خاص يقضيهم فالاول ..ولكن واش متأكدة بلي عندو رونديفو معاك؟
ردت بحدة: و علاش بالسلامة غانضرب هاد الطريق كاملة الى ماكانش عندو معايا رونديفو ؟؟
ردت: ا لا ماتفهمينيش غلط.. غير هو مسيو اوكوراي دقيق فالمواعيد ديالو حتا أنه ديما حاضر قبل الوقت.. هادشي لي قصدت
ليلى: مممم باينة "زفرات تتشوف جهة باب الشركة وطرطق بضفارها الطوار على البيرو.. رجعات شافت فيها وقالت بملل" فين جاو طواليطات ؟
البنت: الحمامات من ديك الجهة امدموزيل
طلعات فيها حاجب وزادت جهة الحمامات ..دخلات للحمام الخاص بالنساء قادات عكرها بالنگير محاملاش هاد النشرة لي تنشرات من التمنية الصباح حتال العشرة..
نفخات شوية شعرها هاد هزات ساكها وزادت راجعة لبلاصتها دايرة رجل على رجل مرة أخرى وكل شوية تشوف فساعتها حتا شافتها البنت بالصدفة وعيطات ليها: مدموزيل ..مسيو اوكوراي راه جا فاش كنتي فالحمام هو فالبيرو ديالو دابة كايتسناك
خرجات عينيها وبسرعة ناضت: شنوو ..مالك ماگلتيها ليا قبييلة مخليا السيد تايتسناا وانا هنا منشوورة
خلاتها مضهشرة وزادت تاتزرب وتقلب فالبيبان والموظفين بملابس أنيقة شي غادي شي جاي ..حبسات بلاصتها تالفة حيت نسات تسولها اينا بيرو واينا طابق خاص تمشي ليه لكن لحسن حضها كانت دايزة واحد البنت هازة بعض الملفات وبالزربة وقفاتها وقالت
ليلى: حبيبة عافاك البيرو ديال مسيو عصام فين جا؟
طلعات حاجب باستغراب منها وقالت: مسيو عصام اوكوراي ؟
ليلى: هواا هادااك.. واش كاين هنا؟
ردت: البيرو ديال مسيو اوكاراي كاين فالطابق قبل الأخير امدموزيل.. آخر صف راه مكتوبة عليه سميتو
ضحكات براحة قائلة: اووه مييغسي الزين
خلاتها وزادت تتزرب طلعات فالمصعد للطابق قبل الأخير لأن الأخير هو سطح الشركة.. خرجات منو فاش تحل وضارت بسرعة قبلما يتسد شافت فراسها من الفوق للتحت قادات شعرها عاد زادت فاتجاه آخر بيرو ولي كانت جانبو بطاقة سوداء منقوشة بحروف ذهبية "ISSAM OKORAY" دقات شوية لكن ماسمعاتش الادن الشي لي خلاها دخل مبسمة وهو عينيه فيها طلع والحضاش مرسومة بين حجبانو سدات الباب بإحراج وقالت: باغدون ههه دقيت ولكن يمكن ماسمعتينيش
طلع النفس كايهدأ نفسو وحط الستيلو لي كان بيع تايوقع بعض الملفات قائل: دخلي
رجعات تبسمات وبركات فالكرسي لي قدام البيرو ديالو حاطة ساكها قدامها وشافت فيه دايرة يد على يد ورجل على رجل ضهرها مستقيم عينيها فعينيه ومطلعة راسها تتحاول تبرز تقتها بنفسها وتستاعد للمقابلة باش تجاوب مزيان .. طلع حاجب وضحك بجنب فمو قائل
عصام: ترخاي اليلى، غانوضحو شي حوايج بسيطة فقط بلاما تتوتري
ضحكات قائلة: لا لا مامتوتراش نهائيا
رد: داكشي لي بغيت حتا أنا.. تشربي شي حاجة؟
ردت ببسمة: نو مكاين لاش
هز الفيكس دارو فودنو وتايتكلم: من التمنية ونتي هنا ادا مفاطراش ..شنو تاخدي ؟
حنحنات شوية وقالت : جو دغونج
عصاب: جيبي ليا جو دغونج بارد
قطع وفيها شاف بجدية وقال : أولا كانعتادر على التأخير.. كان عندي موعد مهم برا الخدمة وعلمت فاطمة الزهرا باش تقولك أن الموعد تأجل من التمنية للعشرة.. لكن علاما بان ليا مقالتهاش لك
طلعات حاجب تتحلل كلامو وضحكات بتوتر: ااه هههه الحبيبة ديالي غاتكون غير نسات يمكن
عصام: ممكن.. ومادام جبدنا سميتها.. فبغيت نوضحو أول حاجة لي شوية مخربقاني و هي .."الواسطة" .. "ليلى ركزات مع كلامو بقلب تاينبض بالخوف وهو كمل وقال" هنا فهاد الشركة مكانخدموش هاد المصطلح ا مدموزيل ليلى..الفريق ديالي كامل كل واحد فيهم كاين فبلاصة هو كايستحقها.. ولي مكايستاحقش شي حاجة كانحيدها ليه كيفما عطيتها ليه النهار اللول.. نتمنى نكونو وضحنا هاد النقطة؟
حركات راسها بسرعة واخا خوفها بكلامو: معلوم معلوم مسيو عصام انا..
قاطعها قائل: اوكوراي ..مسيو اوكوراي
ليلى بعدم فهم: ا ؟
رد ببسمة جدية خفيفة: لي فهاد الشركة كلهم تايعيطو ليا باسم النسب ديالي.. الاحترام واجب ولا لا؟
ردت: ا أكيد.. مسيو اوكوراي
حرك راسو: مزيان.. حاجة خرا.. خدمتك وطريقة التعامل ديالك هي الواجهة ديال الشركة ..سوا كنتي فالخدمة ولا برا .. يعني تصرفاتك.. طريقة تعاملك مع الموظفين وما إلى ذالك.. كلو خاص يكون بضوابط
ليلى: أكيييد ههه
بسم وقال: ومن بينهم أنك مادخلي لحتا بيرو قبلما تسمعي الادن...
قاطعاتو بسرعة قائلة: لا أنا قلت مع راسي....
قاطعها كدالك بجدية وقال: وماتقاطعيهش ملي يكون كايهضر
حركات راسها ببطئ وتوتر فحين هو قال: مزيان.. حاجة خرا امدموزيل ليلى.. انا شخصيا وعمليا اكتر حاجة تاتستفزني وتخليني نغلط فلي قدامي.. هي قلة الحياء
رمشات مفاهماش وقالت: مافهمتش
هز الستيلو ديالو وقال : يعني قوة الضحك مع الموظفين بوقت ولا بلا وقت.. الحركات الغير لائقة واللباس الغير لائق.. تانبغي الموظفين ديالي يحتارمو بعضياتهم ويتعاملو مع بعض تحت حدود وضوابط
ليلى: ط طبعا طبعا وحتا انا هاكاك دايرة.. مكانحملللش نضسر عليا بنادم اليوم ضحكة غدا لمسة بعدو مانعرف فين غانوليو
حرك راسو وقال: إدا مفاهمين
ليلى: اكييد مسيو عص.. اوكوراي ههه مسيو اوكوراي شوية الوقت ونحفظها بتاسم بلاما يجاوبها وضغط على زر فالفيكس.. تواني وتدق الباب عطا الادن بالدخول عاد تفتح ودخلات امرأة جميلة هازة فيدها اجوندة كبيرة فوقها طابليط ولعندو توجهات بلاما تشوف فليلى ..هاد الأخيرة ليبدات فيها تحنزز وتسكاني.. كانت سيدة طويلة وزادها الطالون طولا لابسة بدلة فغاية الرسمية سروال عريض رمادي مع فيسط ديالو سادة ليها الاصداف الدهبية لي عند الخصر وطاوية اكمامها قليلا ..شعرها الأشقر مجموع بربطة عملية ممخلية حتا زغبة منو تنزل ومكياجها خفيف من غير أحمر شفاه فاللون الوردي نفس لون ضفارها لي ضربات عليهم ليلى الشوفة وعلى الاجوندة الكبيرة لي هازة .. وقفات حدا عصام وعطات التحية لليلى براسها فقط وليلى كدالك رداتها ليها فحين أن عصام شاف فيهم وقال
عصام: نعارفكم ادا..بيرين هادي مدموزيل ليلى غاتخدم معانا ..ليلى هادي بيرين.. المساعدة ديالي
بسمات ليلى بعدم فهم وقالت: مساعدة ديالك؟
عصام: تماما
ليلى: هه ولكن ملي هي المساعدة انا شنو كاندير هنا ههه
طلع حواجبو بجوج مبسم بتعجب: كنتي تتوقعي تكوني مساعدة عندي !!
بيرين بسمات بجنب فمها تاطلع فيها وتنزل فحين أن ليلى قالت بعفوية: آه بصراحة هادشي لي كان تايسحابلي، گلت مادام عاد خدمتي هنا ادا ماعندكش مساعدة !!
طلع النفس وقال تايشرح ليها: صحيح.. أنا مؤخراً عاد شديت الشركة.. ولكن ماعندي لا الوقت والا الخاطر لي يجيب مساعدة جديدة ونبدا ندربها من الصفر ونعرفها شنو خاص يدار وشنو لا وعاد غاتبدا تتعرف عليا وتعرف شنو تايعجبني وشنو متانحملش.. داكشي علاش نهاار جاني عرض هاد الخدمة.. جبت ليكيب ديالي كامل معايا
ضحكات ليلى بفقصة وقالت: اووو قول هاكاك.. فكرة زوينة صراحة ههه ولكن ا.. "قربات عندو خافضة صوتو وقالت" ماتاخدهاش مني قلة الصواب.. أنا شنو غاتكون الخدمة ديالي بالضبط؟
رد: نتي غاتعاوني بيرين ..يعني غاديري گاع داكشي لي تاطلبو منك
طلعات حواجبها بنفس البسمة وشافت فبيرين: يعني، مساعدة المساعدة ديالك؟
عصام: إلى مكانش عندك شي مشكل طبعا
ليلى: لا لا ههه علاش غايكون عندي مشكل بالعكس
عصام: حنا داخلين على مشاريع جديدة والخدمة كتارت.. فباش مايوقعش الضغط على بيرين.. غاتقاسمو الخدمة بزوج
عطاتو بسمة عرييضة صفرة تتشوف فبيرين لي غير مبسمة ببرود وعصام قال: ماعندك حتا سؤال..
ليلى: لا ..بااراكة عليا غير داكشي لي عرفتو لدابة ههه
عصام: ادا تفضلو ..تعرفو على بعضياتكم اليوم وغدا إن شاء الله تبداي معانا الخدمة
تكلمات بيرين بعدما حطات ليه مجموعة من الرسائل فوق البيرو ديالو وقالت: مسيو اوكوراي هادو وصلو هاد الصباح ضروري تشوفهم
رد تايتفقدهم: تقدري تمشي حركات راسها وزادت تتشوف فليلى لي ناضت حتا هي تبعاتها حتا خرجو وسدات الباب عاد لعندها ضارت بملامح جدية ونظرات مغرورة تاطلعها وتهبط وقالت
بيرين: ادا نتي البنت الجديدة
حركات ليلى راسها وقالت: مممم داكشي
بيرين: غدا مع السبعة ونص تكوني هنا.. كاينة ستاربكس فالشارع لي ورا الشركة غاتجيبي منها جوج اسبريسو وواحد كابتشينو وحسن لك يكونو سخان ..مفهوم
حركات راسها وبيرين عطاتها ودنها وقالت: ماسمعتش
طلعات النفس مصبرة نفسها وقالت: مفهوم ..مدموزيل بيرين
بيرين: good "مزيان"
مشات وعاود وقفات ولعندها ضارت هازة صبعها وقالت: حاجة خرا.. الخلخال ممنوع تلبسيه هنا.. هادي شركة الغزالة.. ماشي كلوب
خلاتها ودخلات للبيرو ديالها فحين ليلى غوتات بصوت منخافض بغات طق من غيضها ومبان ليها إلا سيرفور جايب العصير لي طلبات ومشات ليه
ليلى: ارا ارا لهنا ..مالك بالسلاامة على هاد التعطيييلة كنتي تتقطع فيه قطرة قطرة
بغا يدوي وقالت تتشرب: صاافي سير
مشا وهي بدات تقلقل فيه حتا شرباتو كامل عاد حسات بحلقها برد وصدرها شوية ترخف..بدات الشمس فالغروب وليلى عاد دخلات مع الدرب بوجه متغير على كيف كانت خارجة منو..تاتجرجر فرجليها وعقلها غايب تايخمم حنا قربات للدورة فين كاينة دارهم وبالصدفة شافت فدار حادة ولقات تما حياة وفاطمة الزهراء ببيجاماتهم باركات قدام البااب فوق كراسا بيضين وقدامهم طبيلة صغيرة ضايرة ديال البلاستيك تايقشرو الزريعة ويدويو وبنيتات صغار قدامهم تايلعبو لاستيك ..قلبات رجليها لعندهم ورسمات بسمة خفيفة قائلة
ليلى: مسا الخير
شافت فيها فاطمة الزهراء فصمت وحياة قالت: الزيين
تحنات سلمات عليها وقالت: لاباس عليك الفنون
حياة: هاحنا غادين مع الحياة ههه
ليلى: كلنا هاكاك " شافت فاطمة الزهراء وقالت" فاتي ..هانية
ردت بهدوء: صافا
حياة: دوزي تبركي انا غانطلع نجيب ليا كرسي
ليلى: واخا الزين نيت ضروني رجليا
حياة: هي شي خدمة جديدة هادي
بركات بلاصتها وشافت ففاطمة الزهراء: بحال هاكاك
خلاتهم حياة وطلعات للدار، ليلى مدات ايدها للزريعة بدات تقشر وتاكل ووحدة ماتدوي مع لخرا من غير ليلى لي حاضياها بنص عين حتا قالت: مشيت مازال للشركة
شافت فيها ورجعات قلباتهم ببرود: مزيان
كملات كلامها ببرود حتا هي: داك عصام ماجا حتال العشرة.. ساعتاين وأنا منشورة تما
ردت: كان مشغول ..وماعنديش نمرتك باش نقولها لك
قلبات عينيها مميقة فالسما: ممم.. بصح تيقتك
بنص عين شافت فيها وقالت بفضول: خدمك معاه؟
ليلى: خدمني مساعدة ديال المساعدة ديالو
فاطمة الزهراء: مساعدة ديال بيرين !!؟
شافت فيها: تتعرفيها ؟
هزات كتفها: شوية وصافي
ليلى: ديك خيتي منفخة غابوحدها الله يستر شوية وطق..
فاطمة الزهراء: هي هاكاك دايرة.. المهم تاتقن خدمتها كما يجب
تنهدات وشافت فيا بنص عين حتا هي وشوية بدات تصغرهم بفضول وقالت: ايوا ونتي شنو درتي
فاطمة الزهراء: فآش ؟
ضحكات بجنب فمها وقالت: فقضية العاشق الهارب ههه
ليلى بدات ضحك وفاطمة الزهراء دغيا خنزرات وضارت للدروج ديال دارهم تتشوف ياكما جاية حياة عاد ضارت ليها معصبة: ماتعاوديش تقولي هااد الكلمة ماازال.. ليلى متااانضحكش معاك
ليلى: هههه صافي صافي سمحيليا.. بغيت نقول امييين ههه.. صونيتي عليه مازال؟
ردت بغيض: مااشي شغلك دخلي سوق راسك
ليلى: ممم.. نبصم عليها ماصونيتي
هزات فيها حاجب: بان ليا تايقة فراسك كتر من القياس
ردت بهدوء: ماشي قضية تقة ولكن ..كنت ديما فاش تانشوف تصاورك فالسوشل ميديا تانقوول واااو شو فاطمة الزهرا كي ولاات شو كيتبدلاات.. ساعة تبدل فك غالكاركاص احنينتي باقا نتي هي نتي
عطاتها بسمة صفرة وقالت: نفس الشيء بالنسبة ليك حتا نتي
حطات الزريعة فوق الطبلة وبدات تسوس ايدها من القشور: على الأقل أنا فاش تاندير الخطوة اللولة وتانزعم.. تانكمل فزعامتي حتال اللخر "غمزاتها" ماشي تانهرب الفنوون.. بونوي
خلاتها عاقدة حجبانها وزادت لدارهم تتلووي عنقهها بتعب
كلام ليلى مامرش مرور الكرام.. وعمر كلامها داز من ودن وخرج من لخرا.. من ديما كانت تتأتر فيها سلبيا وايجبيا وغالبا تتكون سلبيا بحكم أن ليلى تتقول الهضرة بااما توزنها واش زوينة ولا خايبة سوا بالضحك ولا بالمعقول.. وفاطمة الزهراء عقلها تاياخد كلشي ويدكسو عندو متاتعرفش تفرز بين هاد الهضرة ماتستاهلش ندي عليها وبين هادي تستاهل ..لهادا من الصغر ورغم صداقتهم كانت بيناتهم حساسية وضروري كل يوم الخصام ..شخصيات مختالفة ومتناقضة مع بعضها فنفس الوقت كبرو بجوج وعرفو بعضياتهم حق المعرفة ..
الساعة تشير إلى التاسعة مساء والدرب منوغش بالهضرة بين مجموعة من الرجال جايين من الجامع تايدويو مع بعضياتهم ووليدات صغار مازال تايلعبو فالزنقة وشي مسخراه مو للحانوت وبعض المراهقات مجموعات عند باب شي وحدة تايتحتو بالهمس ويضحكو أما الامهات فكل وحدة فكوزينتها تايوجدو العشاء ..وفاطمة الزهراء فسطح الدار غادة جاية وتليفونها فايدها.. وقفات فصور الصطح تتشوف فالدرب وتليفونها فايدها شاعل بنمرة أمين لي مقادراش تصوني عليه.. كلام ليلى رغم وقاحتو كان فعلا صحيح.. ماتقدرش تزعم وتصوني عليه.. معارفاش شنو تقول وماقدراش تتحمل حجم الألم لي غاتحس بيه الى كان نساها.. أمين ..هاد الإسم و هاد الشخص مكانش أبدا شخص عادي بالنسبة ليها.. والفترة لي دخل فيها لحياتها.. مكانتش فترة عادية لأي بنت .. بنت كانت يتيمة ومتخلى عنها من طرف الأب ديالها.. فحياتها عندها جوج نساء فقط، حادة وعمتها حياة.. وأول رجل لي كان باقي ماكتاملات فيه معالم الرجولة وعرفاتو فحياتها.. هو أمين.. أمين ولد الجار لي حلات عليها عينيها بحكم أن مو وحادة كانو صحابات بزاف.. وبحكم أن فاطمة الزهراء مكانش عندها مع بنادم من الصغر ديما وحدانيا ومكتافية بلعبها ورسوماتها وخيالاتها الخاصة.. عكس أمين تماما.. الطفل النشيط الضحوكي ولي نجح بجرادة فأنه يخرجها من قوقعتها للعالم الخارجي.. فتح عينيها على الالعاب الجماعية وكان هو الداعم ليها وصدر الأمان فوجه كل متنمر تايضحك عليها فمساطألة واليديها.. كلما فكروها فجرحها بقصد وبغير قصد كان هو الاخ الكبير لي كايدافع عل ختو من دئاب الشارع وليزعم عليها تاتقول ليه غانجيب لك أمين وتجري للدار تعيط ليه.. لكن مع مرور السنوات، وفاش بدات تفرج فأفلام الأميرات والأمراء بدات تاتفرز بين الاخ.. والحبيب.. تما أمين بدا شوية بشوية تايتغير مكانو من الأخ لـلأمير الساحر..حب بدا فقلبها كايكبر يوم بعد يوم ..رغم أنها فطفولتها معرفاتش أمين فقط ..إنما حتا سيمحمد لي كان كبر من أمين بعام وهو الكبير فشلتهم كاملة.. هو لي كان كايرافقها للمدرسة ونهار حتا هو تتوصلو الخبار بلي قلقها شي حد تايمشي ليه ديك الساعة ونهارو تايدوز كحل زحل .. كانت تتلاحظ اهتمامو الكبير ليها وتوترو فحضورها دائما.. الفرق البسيط بينو وبين أمين.. هو أن أمين كان زاعم عليها فالهضرة وفالتصرفات كان يعنقها إلى فرح ويهزها على ضهرو إلى عيات بالمشي ويدرعها عندو إلى كانو تايتمشاو.. عكس محمد لي كان حشومي من الطفولة مع الجنس اللطيف.. تايترافق غير مع خواتاتو وفاطمة الزهراء وصعيب يقول جوج كلمات مسگدين للبنت ..فحين أن أمين كان طياح البنات بامتياز لسانو حلو ومن الطراز الرفيع.. كانو رباعي جميل غير متشابه نهائيا كل واحد وشخصيتو وكل واحد واحلامو وكيفاش تايفكر وكل واحد.. وشكون تايبغي.. لكن كانو ونعم الصحاب وعزاز على بعضياتهم رغم الخلافات والمشاكل.. حتا جا النهار لي كلسي فيه تخرب.. نهار فاطمة الزهراء قررات تفتح قلبها وتخرج خباياه للعلن.. نهار كانت غاتعتارف بحبها لأمين وكتبات الرسالة المشؤومة.. تما كلشي مشا.. والرفقة لي دامت من نعومة الأظافر خسرات فلحظات طائشة ..ماعرفات واش تلوم راسها.. ولا تلوم ليلى .خارجة من الكلية بقبية فالاسود مرسوم عليها رسمة فالبني وسروال ديالها نفس اللون ..شعرها مطلوق هازة ساكادو ديالها الصغير بيد والتليفون فودنها خارجة وتتهضر مع باباها فنفس الوقت
فاطمة الزهراء: ماتشغلش بالك.. الحمد لله كلشي بيخير
أنس: مع دالك تهلاي فراسك الحبيبة ديالي.. غادة للدار دابة؟
ردت: وي كانتسنا غير شي طاكسي دوز
رد باقتراح: علاش مناخدش ليك شي شيفور هو يولي يوصلك فينما بغيتي .. حسنما تبقاي معدبة فالطاكسيات
ردت: لا مكاين لاش أبابا انا هاكا مرتاحة
أنس: واخا الالة نتي تعرفي ..تهلاي فراسك
فاطمة الزهراء: بسلامة
قطعات وطلعات راسها تتسنا فطاكسي حتا بان ليها واحد وطلعات ليه يدها ..ماحدو منها تايقرب وهي ملامحها تتطلق وتبسم بلطافة لانه كان سيمحمد .. حياها براسو بجدية فحين هي طلعات حداه وقالت
فاطمة الزهراء: السلام
قلب الفولون وديمارا: وعليكم السلام.. فين نديك؟
ردت: للدار.. واش صافا مزيان؟
سيمحمد: الحمد لله "شاف فيها بطرف عينو وقال" تتقراي هنا؟
ردت ببسمة: آه.. الهندسة
حرك راسو: برافو
ردات شعرها لورا ودنها وقالت: ا ..نتا ..شنو درتي ورا الباك؟
سيمحمد: دخلت لمدرسة التجارة والتسيير ..ولكن مجابش الله فالخدمة ومكان فيا لي يتسنا ويصبر.. تما قلبتها طاكسي
حركات راسها تترمش وتمص شفايفها بتردد.. بغات تساعدو فموضوع الخدمة لكن ترددات وقالت بدل دالك
فاطمة الزهراء: ونتا مرتاح فهاد الخدمة؟
رد: الحمد لله تاناكلو منها طرف الخبز ونوكلو، المهم حلال
فاطمة الزهراء: بصح ..الله يعاونك
سيمحمد: آمين
بقات تتشوف فيه بتردد هو لي عينيه قدامو بتركيز ولو أنه حاس بنظارتها جيهتو .. جاتها صعيبة تزيد تهضر وماعرفات أصلا ماتقول.. متاتعرفش تخلق احاديت مع شي شخص لأنها من الأصل ماشي إنسانة اجتماعية ومهامهاش الموضوع .. لكن سيمحمد كان صديق الطفولة ..عندو معزة كبيرة ومكانة أكبر فحياتها وقلبها..بسمات وهي تاتفكر أنها حتا هي كانت عزيزة عليه فواحد الوقت وكان يحيدها من فمو ويعطيها ليها واخا كان قليل الكلام معاها .. واش تبدل؟ واش مبقات لامعزة لاوالو وداكشي ديال الصغر تبخر مع وراما مشات.. واش واخا تحاول ماغاتقدرش ترد الصداقة لي كانت جامعاهم؟ .. ماعندهاش الصحاب فحياتها الواقعية وعمرها دارتهم من نهار خرجات من الدرب.. ببساطة لأنه گاع لي عرفات تتلقا أما نيتو مصافياش أما فيه قوة المظاهر والنفاق وهادو اكتر الصفات الغير محبوبة بالنسبة ليها.. شي لي خلا حنينها داائما يشعل لصداقات الطفولة ..ديك الصداقة البريئة الصافية ولي بدون مقابل ..صداقتهم هوما بربعة ..ليلى سيمحمد امين وهي.. ليلى خسرات معاها الوراق.. أمين بات ماصلح.. والوحيد لي بقا ليها هو سيمحمد ..
قاطع تفكيرها صوت التليفون ديالو شاف المتصل ودار الكيت فودنو عاد جاوب وقال
سيمحمد: الحبيبة ديالي
طلعات فيه فاطمة الزهراء الشوفة بتعجب فحين أنه هو ملامحو تبدلو لقلق جومع حجبانو قائل:
أميمة مالك ابابا؟
خرجو عينيه وحتا فاطمة الزهراء حداه تخلعات وغير تتسمع
سيمحمد: شنو!!؟؟؟ فينكم داابااا قدام السبيطار وقفات الطاكسي نزل بلا عقل تايجري وفاطمة الزهراء هبطات وراه حتا هي ..دخل تالف معارف فين يمشي وكيف بانت ليه ممرضة دايزة وقفها وقال بسرعة
سيمحمد: ختي عافاك بنتي جابوها لهنا هاد الصباح وبغيت نشوفها
شيرات ليه جهة الاستقبال: سيري اخويا سول لهيه هوما يوقولو ليك فين كاينة
خلاها وزاد تايزرب وقف عند البنت لي طلعات فيه عينيها ونطق: ختي عافاك بنتي جابو لهنا هاد الصباح مضروبة فجبهتها..
قالت البنت: شنو سميتها
سيمحمد: أميمة بلحاج
قلبات على الإسم فسيستيم وقالت: فليطاج التاني الغرفة رقم 23
رد: شكرا
مشا طالع بالزربة وفاطمة الزهراء تابعاه حتا وصل للغرفة وفتحها لقا بنتو تما باركة على السرير تتلعب فننوس صغير لاسق فكسوتها الوردية وفجنب جبهتها ضماضة بيضاء منزلة راسها ساهية حتا شافتو قدامها عاد قلبات شفايفها للأسفل تاتستاعد للبكاء ..برك حداها وعنقها بالجهد مغمض عينيه بألم وهي تتبكي وتردد: بابا خرج ليا الدم من راسي
باس راسها وفعينيه الحزن والقهرة كلما شاف الضماضة لي مغطية الجرح وقال بحنية: تاضرك بزاف احبيبة باباها؟
ردت بنفس: لا ..دار ليا عمو الطبيب الدوا ومابقاتش تاضرني ..ولكن خرج الدم بزاف
سيمحمد: واخا خرج الدم بزاف غاتبرا بحالا عمرها كانت البطلة ديالي غير نديرو ليها الدوا وغاتمشي "حركات ليه راسها وهو مسح دموعها وقال بتفحص" تاضرك شي بلاصة خرا ؟
ردت: لا غير راسي وشوية هنا
وراتو ركبتها لي فيها بعض الخدوش الطفيفة ولي بدات تبرا
تنهد وقال جامع حجبانو: دابا يبراو الزين ديالي.. فين إلهام؟
ردت: مشات تجاوب فالتليفون
سيمحمد: وكيفاش حتا وقعو هاد الجريحات
ردت بحزن: طحت قدام الباب على وجهي.. وضرباتني هاديك هنا
سيمحمد: شنو هي لي ضرباتك؟ الدرجة لي قدام الباب
حركات راسها فالايجاب: آه هي
سيمحمد: ايمتا هادشي؟
ردت: فالصباح
رد مطلع حاجي: الصباح ماعندكش مدرسة.. فين كنتي خارجة ؟
ردت: مشيت ن.. نجيب الفطور حيت عمتي إلهام سخراتني للحانوت.. وفاش رجعت..خلعني واحد الكلب و تعكلت وطحت
بدا يحرك راسو مفقوص: إلهام لي سخراتك للحانوت.. وعلاش متاترديش البال قبلما دخلي ..كون تهرستي دابة ولا طحتي على سنيناتك شنو كان غايوقع فباباك مسكين.. مافكرتيش
هزات بكتفها منزلة راسها ومعارفة ماتقول.. تنهد من قلبو ومسح العرق لي ترسم على جبهتو من كترة الخلعة عليها عاد عنقها لصدرو وقال
سيمحمد: ماعليش ابابا.. عادي كلنا تانطيحو ونوضو.. دابة تبراي ماتخلعيش
باسها فشعرها وبقات متكية عليه ساكتة وهو كدالك غير تايخمم.. فحين أن فاطمة الزهراء واقفة جنب السرجم بصمت تتشوف فيهم ببرائة حتا تحل الباب ودخلات امرأة تلاتينية محجبة لابسة جلابة شيبية خفيفة وفولار بيض وساكها فايدها ..شافت ففاطمة الزهرا وسلمات براسها مستغربة من حضورها وقالت: السلام عليكم
فاطمة الزهراء: السلام.. مايكون عندها باس
ردت: شكرا
بعد سيمحمد من بنتو بعدما قاليها بحنية: انا جاي أبابا واخا ..خليك هنا وماتخرجي لحتا بلاصة
نطقات فاطمة الزهراء بسرعة: ا أنا غانبقا معاها ماتشغلش بالك
حرك راسو وشاف فالمرا ماسح التبسيمة وقال: اجي معايا نهضر معاك
. رجعات هزات ساكها وتبعاتو فحين أن فاطمة الزهرا بقات فالبنت تاتشوف والأخرى كدالك نفس الشيء ..ماعرفات ماتقول من غير أنها تتبسم ليها والبنيتة قالت حمشانة وتتشوف فشعرها
أميمة: شعرك زويون
ضحكات فاطمة الزهرا وجات لحداها بركات وقالت مبسمة: حتا شعرك زويون
فتحات عينيها : بصح
ردت: مممم.. تاضرك الجريحة؟
أميمة: لاء ماشي بزاف
فاطمة الزهرا: حتا أنا فاش كنت صغيرة كنت تانطيح بزاف ..وشي مرات كانو الدراري لي تانلعب معاهم هوما لي تايطبحوني ومنهم باباك ههه
قالت بتفاجأ: بابا كان تايلعب معاك
ردت: آه فاش كنا صغار.. ولكن واخا كنت تانتجرح كانو دغيا تايبراو ..وحتا نتي دابة تبرأ ليك
حركات راسها ببسمة عريضة: قالها ليا عمو طبيب.. واش دابة نتي صديقة بابا؟
سكتات شوية عاد قالت: شوية
أميمة: وشنو سميتك
ردت: فاطمة الزهرا.. ونتي
ردت: أميمة.. سميتك زوينة
فاطمة الزهرا: ههه سماتني جداتي ..وحتا نتي سميتك زوينة بزاف
أميمة: شكرا
تدق الباب ودخل الطبيب شافتو فاطمة الزهرا ووقفات فحين هو تبسم ليهم وفحص أميمة مرة أخرى تايتأكد ياكما مازال دايخة ولا مقصحة من شي بلاصا أخرى
فاطمة الزهرا: انا غانمشي نعيط لباباها ونرجع
خرجات سادة الباب وتادور عينيها وتقلب حتى دارت مع الدورة وشافتو واقف بعصبية ايديه فجنابو والمرا قدامو تتنفخ وتقول: هادشي لي كاين وكلو عاودتو ليك
رد ضاغط على سنانو: بنتي علااش تخرج تسخر اصلاا.. البنت عندها خمس سنيين االهاام كون وقعاات ليها شي حاجة كون تخطفات ولا طرات فبها شي مصييبة
إلهام: وييليي استغفرت الله على افكااار
سيمحمد: هاداا راه الوااقع المسخ لي نتي مازاال ماباغا تفاهمييه .. أنا اااصلا لااش تاانعمر ديك التلاجة ياك غير باش ماتحتاجي والو لانتي لااهياا..وحتا فااش تزيدي على شي حاجة لبسي جلابتك وسييري جيبيهاا لرااسك فرقي علك البنت ردت العمة مقلقة: اييه اخوويا مابقاا غير تلومني بحالا أنا لي طيحتهاا لك.. واقيلة نسيتي بلي تانا عمتها وعزيزة عليا بحال بنتي وحتا الحانوت راه قدام الباب شعرفني غايوقع خادشي كامل
قلب وجهو تايزفر ويردد: الصبر اربي الصبر
فاطمة الزهراء: احم "وقفات عليهم وقالت بحرج" محمد.. "تلفت شاف فيها وكملات كلامها" الطبيب دخل عند أميمة
نطق بسرعة: وقعات ليها شي حاجة
ردت: لا لا ماتخافش مكاين والو
سبقها للغرفة هو وإلهام وهي بقات واقفة برا مربعة ايديها وتاتسناهم
...
ليلى: ختي واش قربتي تسالي ليهم الصليح
ردت البنت لي خدامة فالمصبنة: مابقا والو ويوجدو
نفخات وخرجات من المصبنة تتقرا الاجوندة وداكشي لي قيدات فيها وتحسب: الوراق وصلتهم ..الحوايج هاهوما قربو يكونو فيدي.. من بعد نعطيهم للشيفور ..وندي معايا اسبريسو سخونة ...
قاطعاتها البنت قائلة: مدموزيل
ضارت لعندها وجمعات الأجوندة فساكها: صافي وجدو
ردت: هاهوما
عطاتها مجموعة من العلاقات فيهم ملابس رجالية رسمية مغطية باغطية قوية من البلاستيك خداتهم وقالت
ليلى: شكرا ازين
ردت: العفو اختي مرحبا
خرجات من تما وركبات فالطموبيل لي كانت تتسناها حطات الحوايج فالكرسي حداها وقالت للشيفور هادو غاتوصلهم لدار مسيو اكارااي بغاهم اليوم فالعشية
الشيفور لي كان كبير فالعمر تبسم وقال: تتقصدي مسيو اوكوراي
ليلى: اوكوراي اوكوراي ..هاد السمية حلفات لاتحفظات ليا
تبسم وقال برزانة: كنية تركية ابنتي داكشي علاش غريبة شوية
حلات عينيها فيه: علاه هو تركي
رد: تركي الأب.. الوالدة ديالو مغربية
ليلى: هاكااك .. "شافتو قرب للشركة وقالت" لا لا ماتدينييش للشركة وقف غير حدا هاد الشارع
رد: مرحبا ابنتي
نزلها فستاربكس خدات منو قهوة اسبريسو والفاتورة دازت الحساب الشركة عاد خرجات هازاها وتتزرب للشركة باش توصلها سخونة ..طلعات فالمصعد حتال طابق خدمتها وتلاقات ببيرين خارجة من عند عصام وهازة فايدها بعض الملفات ..شافتها ووقفات هازة حاجب
بيرين: فين تعطلتي هاد الوقت كامل
عطاتها القهوة تترد النفس: جاية كانجري ..مالقيتهمش صالحين الحوايج وبقيت كانتسنا حتا سالاو
بيرين: صافي صافي شحال فيك "عطاتها الملفات وقالت" هادو ديهم لياسمين
دخلات مرة أخرى لعند عصام وهي نفخات ومشات نازلة لتحت دخلات لأول بيرو كانت بنت تما تاتقاد فعكرها حطات ليها الملفات وقالت: هادو ليك
ياسمين: شكرا الزين
ليلى: هانية.. ديك قرعة الما لي وراك الله يعطيك الستر سخفت
ضحكات ومداتها ليها: هاكي.. سخفاتك ديك خيتي
ليلى: لفعة بنت الهم "شربات وحطات الكاس قائلة" ولكن ماعليش.. قالك لاكانت حاجتك عند الكلب.. قولو سيدي
ياسمين: هههه مسخوطة
ضحكات بجنب فمها وتمات غادة: باي الزبن
طلعات فالدروج وضغطات على المصعد لي كيف تفتح جا وجهها فوجه عصام تبسمات وركبات فحين أنه هو خرج وبقات فضهرو تتشوف حتا تسد المصعد ورجعات لخدمتها ..