سيمحمد: واخا طلعي
ركبات اللور وركب حتا هو وزاد يوصل ليلى أولا عاد يوصل فاطمة الزهراء للكلية ..تفكر كلامو بالأمس مع ليلى وشاف فيها قائل بفضول
سيمحمد: شنو درتي مازال دويتي مع رضى؟
ردت بجدية: آه قلتها ليه البارح.. الليل كامل وهو تايقلب قاليا حتال الصباح ونصيفط ليك لوكاليزاسيو ديالو
سيمحمد: ايوا الله المعين
تنهدات: آمين
سيمحمد: ردي البال ..وفاش تكوني غادة لعندو صوني عليا أنا نوصلك صافي
ضربات على كتفو تاضحك: ااوكي برووو كون هاني
ضحك ليها وطلع عينو فالمراية تايشوف ففاطمة الزهراء لي دايرة الليزيات فودنيها وعينيها على الشارع ساهية ..بسم وكمل طريقو للشركة.. هبطات ليلى وهبطات حتا فاطمة الزهراء باش تركب حداه عاد ديمارا ومتايوقف لحد فالطريق لي شير ليه تايفوتو وهي تاتشوف فيه بتعجب حتا فاتو مرا خرا وقالت
فاطمة الزهراء: محمد غير طلعهم ماشي مشكل
سيمحمد: لا ماعليش .. احم.. كي غادة مع الدراسة مزيان !؟
تبسمات: صافا الحمد لله.. فكرتيني، أميمة شنو خبارها؟
تبسم بحنية ملي تفكر بنتو وقال: أميمة ملي فاقت وهي تاتهضر عليك وتسول
ضحكات بفرح قائلة: بصح
شاف فيها مبسم: بصح
فاطمة الزهراء: الله يحفظها من كل شر ياربي
رد بحب؛ آمين يارب
فاطمة الزهراء: عرفتي تانشوفها تان.. "طلعات نفس طويل وقالت ببسمة حزينة مهربة عيونها هنا وهنا باش ماتبكيش" تانشوفها تانتفكر فاطمة الزهراء الصغيرة ههه تانتفكر راسي وكيف كنت
شاف فيها سيمحمد ماحي البسمة ورجع شاف قدامو وهي كملات: صعيبة بزاف العيشة بلا والدين ..تاتحس بالنقص واخا كل حاجة فيها خير ولكن، الأمر تايألم
تقلب وجه سيمحمد ومابقاش مرتاح فملامحو وغير تايطلع النفس ويخرجها بانزعاج ماعرف مايقول
فاطمة الزهراء: على الأقل أميمة محظوظة بأب بحالك
حرك راسو متنهد: الله يقدرنا "شاف فيها" باباك متاتواصليش معاه؟
حركات راسها: تانتواصلو ..بالحق صعيب تتصلح شي حاجة تهرسات ودازو عليها سنين ..صعيب نحطو فالبلاصة لي يستاهلها
سيمحمد: تايبقا باباك.. وتاتبقاي بنتو يوقع لي وقع راكي طرف منو وعزيزة عليه
بسمات باستهزاء ساكتة وهو وقف قدام الكلية.. حيدات السانتور وشافت فيه مبسمة براحة: شكرا امحمد.. شكرا على كلشي
رد عليها مبسم بدورو: الله اودي
فاطمة الزهراء: تهلا فراسك ..باي باي
هبطات وهو تبعها بعينيه حتا دخلات عاد زاد يكمل خدمتو والبسمة مزينة ملامحو الخشنة
.قدام المصعد واقفة تاتسناه يتفتح وتشرب فقهيوتها لي طلبات من الكافتيريا
..فنفس الوقت دخل عصام اوكوراي بفخامتو وواسامتو الجدابة مع باب الشركة، لابس الكلاس كيف العادة.. شوميز باللون الازرق فاتح صدايفها من العنق مع ڤيسط رمادية اللون وسروال توب نفس اللون مفصل على رجليه عبار و صباط جلدي اسود لامع ..عطا تحية خفيفة للبنت لي فالاستقبال لأنها وقفات ليه ببسمة عريضة وكل من داز من حداه ضروري يوقف باحترام يتبسم ويصبح عليه وهو جوابو تبسيمتو الخفيفة ووطأة سريعة براسو ..قشع ليلى بعيونو العسلية واقفة تتسنا ولأنه هو كدالك غايطلع فالمصعد وقف وراها ساكت وريحتها قدام نيفو فايحة.. صونا التليفون فساكها وبسرعة بدات تقلب عليه حتا جبداتو وكيف شافت اسم رضى حلات عينيها وجاوبات بلهفة
ليلى: لقيتيه؟
رد: لقيتو لقيتو اختي ليلى هههه
تنفساات براااحة ويدها على صدرها: اخييرا اووف، عاد رتاحيت الحمد لله ..اااجي افرطوطو كي درتي ليها والسيد من نهار دخل للمغرب وهو مخبع ؟؟
عصام طلع حاجب وعرف الموضوع علامن الشي لي خلاه يستارق السمع للمكالمة ورغم أن المصعد تفتح حتا حد منهم مادخل ليه هي بقات تاتهضر مع رضى وعصام تايستامع بتركيز
رضى: قلبت على سميتو فالسيستيم ديال لوطيلات الكبار حتا جبدتو ..راه كاين غير فالرباط ..وتبعت حتا ليكارط گيشي ديالو فوقما خرج شي ريال تاطلع ليا قداش وفاينا بلاصة تيرا الفلوس
صفرات بإعجاب وعصام زاد طلع حاجبو فحين هي قالت: برااافو.. اتاريك واخا مشعكك راسي عامر البريهيش ههه
رد تايضحك بتعالي: تانتواضعو معااكم وصافي
ليلى: دابا فين كاين اسي المتواضع
رضى: أنا ؟ فالدار وصافي
ليلى: واا السيد السيد فين كاين نتا اش بغييتك متلا
رضى: اااه ههه.. بلاتي نشوف لك ..هو دابة كاين فكلوب ياسمين
ردت بتفكير مع دماغها: مممم المسيو مشا يضرب كويسات ..ولا يمكن عندو تما شي اجتماع فالنوار ؟
رضى: مانعرف اختي ليلى.. الى بغيتي نسيفط ليك لوكاليزاسيو نسيفطها
ليلى: لا لا اخويا نمشي تم ونلقا السيد شارب ولا فشي تخلويضة فين غانولي.. أصلا هاد التخبية ويوصي المساعدين ديالو مايقولو لحد بلاصتو فييها إن ..السيد مخلوض نبصم عليها
رضى: وخااانز فلوس عرفتي الكونطات ديالو شحال فيهم.. بقيت تانشوف الأصفار حتا قرب راسي يصفر
ليلى: وحنا أصلا هادشي لي باغين.. ارا سمية لوطيل فين كاين
رضى: اوطيل سوڤيتيل.. رقم الغرفة 2065
بسمات متدكرة الحفلة لي تعرفات على عصام وبسببها دخلات لهاد الخدمة ولي كانت فنفس لوطيل : واقلة هاد لوطيل داخل عليها بقدام السعد هههه "طلعات النفس وقالت بسرعة" حيد حيد تالدرب ونكملو
رضى: حيت لقيتو بالزربة غاتزيدي ليا فحلاوتي ياك اختي ليلى
ليلى: بانلي بحالا ضسرتي شويى لا؟.. تلاح
قطعات ويغات ضور هي تسطح معاه ووقفات جامدة قائلة ببسمة بلهاء: مسيو اوكوراي ههه س سمح ليا كنت مزروبة شوية عندي شي خدمة على برا
ضغط على زر المصعد وقال بهدوء: خودي راحتك
ليلى: ميغسي
... فاتتو وتمات خارجة مرة أخرى وهو طلع للمصعد بعدما تفتح وبعينيه المصغرة بقا متبعها ببسمة جانبية حتا تسد المصعد وطلع للمكتب ديالو لي حط شي حاجة بين عينيه.. لي آمن بيها بقلبو و خدم عليها بايديه ورجليه.. تايوصل مهما كلفو التمن.. العزيمة والاصرار تايشبهو للتوأم.. صعيب يتفارقو وواحد مساند لاخر.. وهاد جوج بالدات عبارة على شعاع تايبري فعيون ليلى لي متاتحس بنشوتها إلا فاش كاتوصل للحاجة لي عليها دمرات.. نزلات من الطاكسي ديال سيمحمد وحتا هو هبط معاها تايشوف فلوطيل عاقدهم
سيمحمد: ندخل معاك؟
ليلى: لا لا أنا قاضية الغراص غير سير حتا نسالي ونعاود نعيط ليك
سيمحمد: واخا ردي البال ولي كانت علميني
ليلى: اوك
دخلات للاوطبل مبسمة ووقفات فالاستقبال تاتسول على إسم "فارس اليمني" فين كاين وايمتا غايجي؟ كلامها جدي مخلط بشوية النفخة لي متاتخطاهاش ويستحيل تهبط نيفها للأرض خصوصا دابة ملي ولات بخدمتها وصالير مخير.. قلبات البنت على الإسم وخبراتها بلي مازال مارجع جاوباتها ليلى بلي عندها معاه موعد و إلى جا تخبرو بأنها تاتساه فالكافي ديال الاوطيل وداكشي لي كان..
بركات واخدة كافي كريم مع طارطة الليمون الباردة وهازة تليفونها تتسيلفا وتپوزا متلفة الوقت بيه وبالانسطا حتا كملات كاسها والطارطة ضربات فيها النص عاد وقف عليها النادل وقال بأدب: مدموزيل.. تفضلي معايا عافاك
فتحات عيونها وناضت: واش جا مسيو فارس
رد: جا وتايتسناك تفضلي نوصلك لعندو
حلات ساكها: واخا شحال عندي اخويا
رد: مكاين لاش هادشي على حسابو
طلعات حاجب ببسمة: بصااح "سدات الساك وتبعاتو تتبرگم" ايوا الله يخلف عليه
تبعاتو للقنت الآخر من المقهى فين كان بارك رجل وسيم خمسيني وأنيق فلباسو.. اكتسى الشيب لحيتو وشعرو الخفيف رغم أن لياقتو البدية لازال محافظ عليها وعينيه زايغين من الشوفة لي شاف بيها فليلى وحتا هي دغيا شماتو وتبسمات بسمة صفراء على عكسو هو لي تبسمو عينيه بإعجاب لجادبيتها المميزة ووقف بلباقة مد ليها ايدو: بونجوغ مدموزيل
سلمات تاضحك: بونجوغ مسيو فارس
باس ايدها بكل لطف عاد بركات قدامو هو لي باقي مبسم
ليلى: احم.. أولا نتمنى مانكونش عطلتك على شي حاجة، ولو أن كلامي غايكون خفيف ومختصر كون هاني
نطق بتساؤل: مدموزيل.....؟
قالت بسرعة: ليلى
رد بصوت هادئ ونظرة معجبة: مدموزيل ليلى.. اسم على مسمى ماشاء الله
ضحكات عاجبها المدح وقالت: ههه ميغسي مسيو فارس
نطق مصغر عيونو ومحافظ على بسمتو: شنو حب خاطر ليلى حتا جات كاتسناني ساعتين كاملة ..وكيفاش حتا عرفات بلاصتي؟ هادا هو السؤال الأهم
ردت بجدية : بالنسبة لشنو بغيت "حلات ساكها جبدات كارط ڤيسيت باسم الشركة حطاتها فوق الطبلة وكحزاتها ليه بايدها حتال قدامو وهو هزها تايقراها وقالت" جيت نقاد معاك موعد ..المدير ديالي مسيو عصام اوكوراي عندو ليك شي كلام ..ومأكدة غايعجبك بزاف
طلع حاجبو بتعجب: مأكدة گاع !!؟
ردت ببسمة واتقة ومشبكة ايديها فوق الطبلة: واخا معرفتي بيك قليلة ومتواضعة.. ولكن عارفة مزيان بلي نتا شخص مكايبغيش يفلت الفرص الدهبية.. وتيق بيا... هاد الكارط لي بين ايديك فرصة من دهب ..نتا جيتي للمغرب على ود الخدمة .. ولكن حيت بلادنا بلاد مضيافة.. عطاتك ضرب عصفورين بحجر واحد ومن صفقة وحدة ولاو جوج ههه
ضحك من قلبو وقال: هههه دكية مع راسك اليلى.. كلامك عجبني برافو .. واخا مازال ماقلتي ليا .. منين ضبرتي على بلاصتي؟
ردت ببساطة: سولت ..وقلبت.. ولقيت.. راك ولد البلاد وعارف حتال المغرب تاحاجة متاتخبا
ضحك مرة أخرى عاجبو الحديت: كااينة ههههههههه " شاف للكرط مرة أخرى وشاف فيها بإعجاب" عجبتيني.. وشي حاجة فيا باغا تيق بيك
قادات شعرها تتبسم: شكرا
فارس: لسانك حلو وحتا دماغك ناضي
حنحنات تاتخفي بسمتها لي بغات ترسم تجاوبا مع اطراءو لكن بغات تبان جدية ماأمكن
ليلى: وهادشي هو لي بغيت مسيو.......
قاطعها: فارس.. بلاش ديك مسيو تاتجيني تقيلة غير فارس باراكة
ليلى: اوكي ..شنو دابة متتفقين؟
سكت شوية تايشوف فيها بتفكير وهي بدا قلبها يضرب حتا وسع بسمتو وقال: من عيوني أكيد
رخفات النفس: هههه ادا متافقين "مدات ليه ايدها قائلة" تانواعدك ماغاتندمش حيدات ايدها وقالت: خبرني شنو هو الوقت لي يناسبك وأنا على هاد الأساس غانقاد الموعد
رد: حاليا مشغول وبزاف .. غدا عندي خاوي ولكن بعدو مانضمنش ليك
ليلى: ادا غدا مع العشرة غانتسناوك تشرفنا "وقفات قائلة" متشرفة بمعرفتك
قال بسرعة: بلاتي فين غادة!!؟.. على الأقل نتغداو بزوج
ردت بنفس الابتسامة: ماكرهتش ولكن.. الخدمة تنادي
تنهد بخيبة أمل ووقف تايسد صدايف الڤيسك وقال تايطلع فيها شوفة بطيئة
فارس: ادا تواعديني بعشيوة زوينة معاك
هزات كتفها: نشوف ..نهارك مبروك
ضارت خارجة ومحاتها فالحين تاتجبد تليفونها وعلى سيمحمد صونات
.. دقائق وكان عند الباب واقف وصلها للشركة ودخلات فرحانة كأنها دارت إنجاز كبير وفمها مترع بالضحك لي دازت عليه من الموضفين ضحك معاه وتسلم و البنات لي تما دغيا دارت بلاصتها وسطهم.. إنسانة اجتماعية ماتعرف شنو تحت راسها لكن ضحوكية وطنازة من الطراز الرفيع واخا تكون واصلة بيها العضم ضروري ضحك وتنشط وتنشط ليمعاها ومولاها ربي ..وقفات عليهم بيرين بعصبية وقالت بحدة
بيرين: اش هاد الهاارااج شنو واقع هنااا !!!؟؟؟
حبسو من الضحك وتفرقو البنات كل وحدة للبيرو ديالها من غير ليلى لي بقات مبسمة تتشوف فيها وايديها مربعاهم
ليلى: مدموزيل بيريين ..منورة هاد الصباح
ردت بغضب شااعل فعيونها: هاااد التصرفات امدموزيل ممنوعة فالشرركة تتفهمي.. ممنوع نعااود نشوف شي حد ماشي فالبيرو ديالو ولا واقف تايضحك
ليلى: باان ليا واقلة ماشربتيش قهوتك هاد الصباح.. ياكما كان خاصني نجيبها لك معايا؟
قربات منها غاطق من غيضها وقالت: هادي الخدمة الوحيدة لي تجي مع وحدة بحاالك .. و أصلا اش هاد الوقت داااخلة فيه شنو يسحاب ليك راسك الشركة ديال بابااك؟
ردت بنفس بسمتها: كانت عندي خدمة الغزالة ديالي غير بردي ليا قلبك
بيرين: شمن خدمة بالسلامة !؟
قربات ليها لاستفزاز وقالت: بيني وبين الباطرون الغزالة.. وواحد المتل عسل على قلبي تايقولك.. مايدخل بين الضفر واللحم.. غير ...
غمزاتها وزادت تاتمختر بمشيتها حتال البيرو ديالها ودخلات جبدات اجوندة عاد شرااتها جديدة هزات ستيلو وتوجهات لمكتب عصام دقات ودخلات لما سمعات الادن متحمسة تخبرو وهو غارق فاخدمة طلع فيها الشوفة ورجع ضهرو للكرسي قائل بجدية: شنو كاين
.دخلات لما سمعات الادن متحمسة تخبرو وهو غارق فالخدمة طلع فيها الشوفة ورجع ضهرو للكرسي قائل بجدية: شنو كاين
وقفات أمامو مبسمة بفخر براسها ومتحمسة تزف ليه الخبر: كل الخير مسيو اوكوراي ..كل الخيير
صغر عيونو شوية ببسمة خفيفة: بنتي ليا راشقة ليك امدموزيل ليلى .. إدا عندك ليا شي خبار زوينة
ردت: تماما "حلات الاجوندة تتكتب وتهضر" غدا مع التمنية صباحا عندك موعد مع مسيو فارس اليمني فقاعة الاجتماعات.. كتبتها
طلعات فيه عينيها الضاحكين وهو طلع حاجبو بانبهار: غدا !!؟..
ليلى: ؟؟فاجأتك
عصام: نكدب؟.. بصراحة آه ..ولكن كيفاش لقيتيه؟
لوات الستيلو على شعرها تتلعب بيه عاجبها راسها والانجاز لي دارت وهو حاضي حركاتها العفوية ببسمة خفيفة
ليلى: تقدر تقول، سر المهنة.. ولي قلب تايلقا.. ياك؟
حرك راسو وقال: ماعندي مانقول، برافو..
"رجع تحنا للوراق لي قدامو تايكمل خدمتو وقال بجدية" غدا نتي لي غاتكلفي بالاجتماع بما انك نتي لي نظمتيه
ردت بتقة: كون هاني مسيو اوكوراي غدا كلشي غايكون هو هاداك
عصام: مزيان، تقدري تتفضلي
ضارت تخرج وشوية وقفات بتردد ورجعات شافت فيه قائلة: مسيو اوكوراي.. فحالة كنتي كاتساءل على البلاصة فين بارك مسيو فارس...
قاطعها بجدية: عارفو فين كاين ..لي وصل ليا بلي دخل للمغرب وصل ليا حتا سمية لوطيل لي بارك فيه "قوصات حجبانها باستفهام وهو كمل كلامو وفيها شاف" كنت باغي نعرف واش احسنت الاختيار فالبوسط لي عطيتك.. ولا لا
بدات تتبسم شوية بشوية وقالت بتقة: وطبعا احسنت الإختيار ههه
ضارت خرجات سادة وراها الباب وهو رسم ضحكة خفيفة وهز تليفونو الشخصي.. دوز مكالمة وتسنا حتا تفتح الخط وقال: مسيو أنس
أنس: مسيو اوكوراي نهار كبيير هادا ههه.. كلشي هو هاداك
رد: كلشي مزيان.. الاجتماع مع المستتمر لي قلت ليك غايكون غدا مع التمنية.. اعتابرني قنعتو وتوقيع العقد غايكون فهاد الشهر
رد بنبرة افتخار: تبارك الله عليك ماخليتي ليا مانقول.. كانزيد نتأكد بلي ماندمتش النهار لول ملي خليت رئاسة الشركة فيدك ..كنت عارفك اولدي مغاتخيبنيش
تبسم وقال: لهلا يحشمنا.. نخليك دابة، كنت بغيت غير نعملك بالجديد.. الله يعاون
يرين تساطحات معاها فالدخلة ديال المصعد خنزرات فيها بتكبر وزادت للبيرو ديال اوكوراي فحين أن ليلى ميقات وهبطات للكافيتيريا لي كانت فالطابق السفلي للشركة.. كاين مطبخ صغير فين تقاد قهوتك لراسك وجليسات مفرقين و ملونين من كراسي وفطويات ضايرين على طبيلات صغار .. لقات ياسمين فالمطبخ ، بنت من الموظفات لي تما حتا هي واقفة تاتشرب قهوة بالحليب وتليفونها فايدها تاتلف فيه الوقت
ليلى: السلام
شافت فيها بضحيكة: السلام زين هانية
ليلى: هانية الحمد لله "بدات تقاد لراسها قهيوة وتشوف فياسمين بنص عين" الزين بغيت نسولك.. "دارت يد على جنبها ويد على البوطاجي وقالت بفضول" دابة ديك بيرين شحال وهي خدامة مع الباطرون؟
ردت: على حسب ماتايقولو، خدامة معاه جاية لست سنين دابة
جبدات عينيها: ست سنين كاااملة
ياسمين: ست سنيين الصاحبة.. وهو لي دربها على يديه
ليلى: مممم" شربات جغيمة مصغرة عينيها قدامها وقالت تتبرگم" كيتي انا لي عمري كملت حتا عام مقادة فشي خدمة ..اودي .. "زفرات وعاود شافت فيها تاتحنحن وتشوف ياكما جاي شي حد"
ليلى: ياسمين اجي نقولك "تسوخرات عندها باهتمام ونطقات ليلى بهمس" زعما مبانش لك بلي بيناتهم شي حاجة ماهياش
قوصات حواجبها بعدم فهم: بحالاش
ليلى: بحال متلا يكونو ..." غمزاتها وياسمين ضحكات قائلة "
ياسمين: الااا هههه البنت رامجوجة
بصدمة: هاديك السليعفانة مجوجة
ياسمين: مجاااوجة ياختي راها تركية وداتو تركي هههه .. وأصلا حتا الى كانت ممجوجاش مايمكنش مسيو اوكوراي يدير معاها علاقة.. مايقدرش
ليلى: علاش مايقدرش !!!؟؟ "شهقات بصدمة" ويلي ياكما ديك العظمى كاملة ألوان؟
طرطقات بالضحك: الااا ههههه ويلي مسخوطة ضحكتيني هههههه
ليلى: ايوا نتي تاتدوي بالالغاز قولي نيشان اش كاين
ياسمين: دابة مسيو اوكوراي ههه من المبادئ لي داير فحياتو كخط حمر مايمكنش يتجاوزو.. هو أنه متايتصاحب متايدير علاقات سوا مع لي خدامين عندو ولا لي تايخدم معاهم.. مستحيييل
طلعات حاجب: وعلاش
ياسمين: حيت خدمتو عندو هي نامبر وان اصاحبتي
ليلى: هاكاك.. الصراحة هو لي عبر.. الواحد هو لي يفرق بين الخدمة والزهو ..براافو
ياسمين: هههههه ونتي مالكي على قوة السؤالات
هزات كتفها: فضووول ياختي "هزات كاسها وضارت" يالله تشاو الزين
ياسمين: تشاو هههه
"إذا أردت أن تقتل أحدهم..
أغرقه حبا... وارحل"
..
وقف قدام دارها، حيدات السانتور وهو ببسمة خفيفة فيها تايشوف حتا لعندو ضارت عاد هبطهم تايحنحن وقالت هي بصوتها العذب ببحة حنينة
فاطمة الزهراء: تصبح على خير
رد: تصبحي عل خير
هبطات تحت نظراتو وهو الكلام فلسانو واحل.. متردد واش يقول ولا غادي غير يحرجها ..حتا بانت ليه حلات باب الدار بالساروت هو يهبط بسرعة وعيط: فاطمة الزهراء
ضارت باستفهام: وي
حك مؤخرة راسو وقال مرتابك: غدا كاين عيد ميلاد أميمة.. و ..مولف ختي ولا ليلى هوما لي تايعرفو داكشي لي خاص و يوجدو داك الزواق ديال البنات.. مهم احم.. ليلى خدامة دابة.. وختي جا راجلها من الخدمة مابغيتش نبرزطها....
قاطعاتو مبسمة: الى بغيتي ممكن نمشي أنا ؟؟ يعني إلى مكانش عندك شي مشكل
قال ببسمة بدات ترسم على وجهو: إلى مكنتيش مشغولة ندوز عليك ونمشيو بجوج نتقداو لي خاص
ضحكات برقة وقالت: اوكي كون هاني هههه سلم ليا عليها بزاف بزاف
محمد: مرحبا ب.....
حلات حادة الباب وشافو فيها بزوج بسم محمد وقال: مي حادة بيخير
طلعات فيه وهبطات بشك عاد قالت: ولله الحمد.. نتا بيخير اولد هنية
كمش عينيه مفاهمش مالها وقال: م مزيان الحمد لله.. يالله نخليكم أنا.. بسلامة
فاطمة الزهراء دورات عينيها تاترمش ودازت بسرعة من حداها مخلية حادة وشوفات الشك فعيونها ..
....
فاطمة الزهراء: السلام
سدات الباب ودخلات باست عمتها لي كانت باركة فالصالة تاتفرج وتاكل فالزريعة: هاي هاي الناس داخلين تايضحكو
ضحكات بلاما تجاوبها ومشات بدلات حوايجها ببيجامة خفيفة ديال الدار وجات حداها بركات
فاطمة الزهراء: عييت شوية اليوم
حياة: كي غادة مع القراية مزيان
ردت: الحمد لله "بسمات قائلة" غدا مقارياش.. كاين عيد ميلاد أميمة وغانوجدو ليها الحفلة أنا ومحمد
ضارت ليها حياة مطلعة حاجب: شوفي فيا تي.. شفتك ملي رجعتي للدرب ونتي محمد محمد محمد.. اش تما؟
ضحكوها شوفاتها وقالت: هههه والو فين مشا عقلك
غمزاتها ضاحكة: ايوا مانعرف
فاطمة الزهراء: محمد هو صديقي الوحيد ولي كانكون معاه فراحتي.. هو بحالا قلتي خويا لي ماعنديش
حياة: مممم خوك
ردت: والله هههه
حياة: ايوا هو فراسو هاد الأخوة في الله.. عنداك غير طمعي السيد فشي حاجة من بعد تهجريه ليه
بسمات ساهية: محمد ماشي هاكاك احياة.. هو مختالف بزاف على الرجال لخرين.. تايحشم مني بزاف وصادق كترما تصوري وتايخاف عليا بحال ختو .. داكشي علاش عزيز عليا
رجعات ضارت تاتفرج: ايوا الله يدومها محبة اختي
فاطمة الزهراء: اميين
دخلات حادة هوما يضربو الطم تايشوفو فالتلفازة وساكتين بزوج صباح جديد.. امل جديد واحداث جديدة ..
صبحات فكامل اناقتها بشوميز حريرية سوداء نازلة من الكتاف وكمامها عراض بزاف مع جوب لاسقة على طايتها نازلة للركبة وطالعة للكرش خشات فيها الشوميز ولبسات معاهم طالون أسود متلت من القدام وشعرها طلقاتو هو والگصيصة لي على جبهتها نازلة.. وصلات للشركة قبل كلشي وبدات الله الخدمة على الملفات لي خاصها توجد و بنفسها واقفة عليهم مباغا حتا غلط وخصوصا وتائق المشروع لي وصاها عليهم عصام.. وجدات كلشي دارتهم فملف اصفر اللون وغير هازاه فيدها وتاتشوف فالبنات لي مكلفات بترتيب قاعة الاجتماعات.. الطاولة العريضة والطويلة تزينات من الوسط بحلويات مغربية مقدمة بطريقة بريستيج وقدامها طبيلة اخرى صغيرة محطوط عليها أنواع من العصير والشروب بأنواعو.. تفقدات كلشي عاد خرجات من تما مخلياهم يكملو شغلهم وهي هازة ستيلو تاتكتب فالاجوندة ديالها لي مازال خاص حتا تم مع الباب داخل عصام اوكوراي... حتا هو مصبح أنيق ببدلة رسمية زرقاء اللون وشوميز بيضة وگرافاط فاللون الازرق كدالك.. كانت أول مرة تشوفو بالكرافاط لي زادتو كريزمة وأناقة، عطرو فاح فالشركة مع دخل من الباب وشعرو المجعد قادو شوية للجنب بطريقة جدابة ..استاقمات فوقفتها ملي عندها قرب وقالت ببسمة متحمسة
ليلى: صبح الخير مسيو اوكوراي
رد: صباح النور..
حل مكتب الاجتماعات شاف بعينو التحضيرات وقال بجدية: كلشي مزيان.. تأكدتي بلي جاي؟
ردت: مع وصلت اتاصلت بالمساعد ديالو وقال ليا العشرة يكون هنا
حرك راسو وخرج متوجه المكتب ديالو وهي وراه غادة
عصام: بيرين وصلات
ليلى: آه فالمكتب ديالها
عصام: الملفات لي سيفطت ليك فالإيماي؟
ردت: طبعتهم هاد الصباح ودرت جوج نسخ من كل ملف وحتا الملف لي تايتضمن المشروع قاديتو فملف ديالو بوحدو
وقف شاف فيها وقال: هاد الصفقة مهمة بزاف ليا وللشركة امدموزيل ليلى.. مابغيت حتا حاجة تفسدها
ردت بتقة: دايرة لي فجهدي امسيو
عصام: بغيتك ديري كتر من جهدك.. هادا أول إجتماع غاتحضري ليه كانظن.. الى داز مزيان غاتكوني حليتي أبواب النجاح على راسك وغاتكتاسبي خبرة غاتفيدك بزاف سوا كملتي معانا ولا لا
بسمات قائلة: وداكشي لي بغيت حتا أنا
تبسم ودخل للمكتب ديالو وهي ضارت غادة من تما.. ورا الرواق كانت واقفة بيرين تاتصنط عليهم.. نظراتها جامدة وساهية قدامها تاتفكر فجهة أخرى.. بالضبط بسوق مرجان الكبير.. كانت فاطمة الزهراء وسيمحمد كايتقداو لي خاصينهم فتحضيرات الحفل.. هو تابعها بالكريريسة وهي تهز وتحط وكاتبقا واقفة شحااال محتارة فالالوان وواش تاخد هادي ولا هادي ..نفخات ليه الراس بدوز من هاد الصف اجي نرجعو لفين كنا، نسيت شي حاجة بلاتي نمشي نجيبها بلاتي ناخد هادي بلاتي هادي، وهو غير تابعها ومصبر راسو.. بالونات ملونة بدرجات من اللون الوردي وبأشكال مختالفة، كؤوس وصحون وقبعات العيد ميلاد بنفس اللون ..مرشميلو ممزوج بين اللون الأبيض والوردي.. حلويات بنوتية وكعك الحفلات وقطع من الحلوى والمكسرات.. أما فالبااتيسري كان كلام اخر..الكيك لي جبدوه ليها ضروري تعيب فيه شي حاجة وهو حداها عيا يصبر و مفاهم والو حتا بغا يطج وجرها للقنت قائل بهمس
سيمحمد: دابة ياك اخرتها غايتكال ..علاش هاد التعطال كامل؟
ردت بتذمر وبنبرة حزينة: خايبين امحمد ماعجبونيش والله
تلفت لمجموعة من الكيك لي حاطين تما وقال: هاديك ديال الشكلاط مالها
ردت: تتگهم دغيا
سيمحمد: لي حداه؟
ردت: شكلو خايب قوة الزواق وصافي ضرني فعيني
سيمحمد: وديال الفريز لي حداه
فاطمة الزهراء: هاديك مافيهاش مداق الفريز أصلا
مسح وجهو وقال: و ديال الفاني
فاطمة الزهراء: باسلة معجباتنيش
نطق بنفاد صبر: عرفتي اش ديري.. أنا غانخرج نشم شوية الهوا فاش تسالي عيطي ليا نخلص
حركات راسها: اوك
خرج وخلاها ساعة تما حتا لقات لي بغات عاد عيطات عليه للاكيس.. حط فلوس صحاح وعمر الكوفر ديال الطموبيل والبلايص لي اللور عاد مشاو هاد المرة لمحل المجوهرات.. نزلات مبسمة وشعرها الاشقر تايلعب بيه الريح ونزل معاها حتا هو تايشوف فالاجواء وقال مستغرب
سيمحمد: البنت مازال صغيرة واش ماشي حسن ناخد ليها شي لعبة ولا نونوس
ردت: اوكي خود.. ولكن حنا البنات فأي سن كنا فيه تايحمقونا شي حاجة سميتها لي بيجو ..غناخدو شي حاجة زوينة وعلى سنها ومن بعد جيب ليها شي نونوس كبير وزوين
رد: واخا الالة
دخلو وبداو يشوفو فالمجوهرات المعروضة من الزجاج حتا جا لعندهم البائع وقال ببسمة: مرحبا ..تتقلبو على شي حاجة معينة
سيمحمد شاف ففاطمة الزهراء هي تهضر وقالت ببسمة: عافاك شي حاجة سامپل وتكون انتوية
رد: مرحبا.. دهب امدموزيل ياك؟
ردت: وي وسي ميو يكون لبيض
رد: مرحبا
. كانت فالبيرو ديالها باركة تاتراجع الملفات مرة أخرى وماباغا حتا غلط.. تدق باب البيرو ودخلات بيرين
بيرين: نتي هنا؟
طلعات فيها حاجب: و فين غانكون.. السيد مابقا ليه والو ويجي وانا هنا كانتسنا؟
بيرين: مممم "دخلات مربعة ايديها وتتشوف فالملفات" المفروض تحطيهم فقاعة الاجتماعات ماشي تخليهم عندك.. ياكما خايفة عليهم يهربو
بسمات ليها: بحالا علمك الله.. خايفة يهربو الفنة ..
قلبات عيونها بتكبر ومدات ليها ملف فيه ورقة : خودي
ليلى خدات الملف حلاتو وقالت: شنو هادا
بيرين: فكل اجتماع خاص ملف بحال هادا يتحط قدام مسيو اوكوراي.. فيه معلومات عملية على المستتمر لي غانخدمو معاه والأهم هو الصفقات لي فايت دار ونسبة الربح والخسارة فكل صفقة
شافت فيها ليلى عاقداهم وقالت: وفين هاد الملف ؟
ردت: الملف كاين فالارشيف.. كنت قاديتو مدة هادي وفاش عرفتك نتي لي تكلفتي ماشي أنا حطيتو تما.. ولكن مادام نقطة مهمة بحال هادي مارديتيش ليها البال فالافضل نتدخل واخا ماتستاهليش المساعدة
سدات الملف وحطاتو ليها قدامها: الى هاكا سيفطي شي حد يجيبو
ضحكات باستهزاء: شكون المكلفة بالاجتماع نتي ولا شي حد.. كملي خدمتك على احسن وجه امدموزيل ليلى ..عندك الزهر لي فكرتك فهاد الأمر
صغرات فيها عينيها وناضت تقابلات معاها وقالت بشك: بيرين.. ياترى علاش مقادرة لا نتيق والا نشم فيك ريحة الصراحة
بيرين: نتي تعرفي
خرجات وخلاتها تاتشوف فالورقة وراسها دخل معاه التناوي ..شافت حتا شافت وهزات ديك الخدمة لي سهرات عليها جوج ليالي خشات كلشي تحت الخزانة لي عندها فالبيرو من القنت وغطاتو بغرس الصغير فيه نبتة طويلة خضراء ..عاد خرجات تاتزرب ودات معاها تليفونها، سولات على الارشيف وراوه ليها وكان فالطابق الأرضي كامل.. كمشات حجبانها مخلوعة وحتا كاتبغي ترجع والخنقة شاداها متاتحملش البلايص المخنوقين والمضلمين ولكن مارضاتش ترجع تطلبها من شي حد ونزلات دخلات بسرعة مع الباب بعدما تأكدات بلي خلاتو محلول عاد بدات تقلب بين الملفات على اسم الملف لي مدكور عندها فالورقة حتا سمعات ضربة قوية خلاتها بلاصتها تجمد.. بسرعة جرات للباب ولقاتو تسد خرجات عينيها فيه و بدات دق وتخبط وتعيط..
ليلى: حلووو الباااب.. واعتقوووني حلوووو عليااا الباااب حلووو
وراؤو مباشرة من الجهة الأخرى كانت بيرين واقفة هي والعساس مدات ليه ظرف مسدود ببسمة باردة، حلو وطل على الأوراق النقدية لي فيه وقالت هي بنبرة أمر
بيرين: مانبغيش هاد الباب يتحل حتا نقولها أنا.. مفهوم
رد: كوني هانية الالة
بيرين: خدمتك يالله
مشا وبقات هي واقفة تتسمع لغواتها عاد ضارت طالعة مع الدروج
ليلى: حلوو البااب.. كااين شي حد هنااا.. عتقوووني حلووو عليااا البااااب "شداتها البكية وبدات تفتف ودعي مرعودة بالخلعة"
ليلى: يااربي ياربي يجي شي حد ياربي "شعلات تليفونها ودخلات للمكالمات لكن الريزو والو هي تزيد تجهل وبدات تخنق وجبهتها تاتعراق
..
عصام: سيد فارس
سلم عليه فارس اليمني وهو كدالك انيق فبدلة رمادية حداه جوج من المساعدين ديالو وقال ببسمة خفيفة: مسيو اوكوراي.. شرف كبير هادا نشوفو سيادتكم
رد مبسم: الشرف كلو ليا.. تفضل
تاجهو للكراسي وبرك جنب عصام لي مترأس طاولة الاجتماع وتايشوف مرة مرة ناحية الباب حتا تفتح وتبسم لكن فورما بانت ليه بيرين جمع حجبانو باستغراب وهي سدات الباب وراها ودخلات بابتسامة عريضة تاترحب بالضيف