يرين: مسيو فارس شرفتينا
وقف سلم عليها بابتسامة قائل: كل الشرف ليا امدوزيل
نطق عصام وقال بجدية: بيرين.. المساعدة ديالي
شاف فيها وقال بانبهار: اوه.. مسيو اوكوراي تايحيط بيه غير الجميلات يمكن هادا هو سر النجاحات ديالك ههه.. محظوظ مع راسك
عصام عطاه بسمة صفراء وفارس قال تايقلب بعينيه: بالمناسبة.. فين ليلى مبانتش ليا؟
عصام شاف فبيرين وهي شارت ليه بعينيها بلي معارفاس الشي لي خلاه ينوض من بلاصتو وقال مبسم
عصام: سي فارس خود راحتك.. أنا شوية ونرجع
فارس رجع برك تايقدمو ليه المشروبات والحلوى وقال: خود راحتك
قبلما يخرج أشار لبيرين تبعو وخرجو بزوج من البيرو عاقدهم عاد ضار عندها وقال بحدة: فين ليلى ؟
ردت باستفهام: ماعرفتش امسيو
رد: كيفااش ماعرفتش ياك عاد كانت فالبيرو دياالها تااتنساا السيد يجي
بيرين: يمكن خرجات ليها شي حاجة من الجنب ومشات
رد بعصبية و صوتو منخفظ: شهاد التخربييق كاينة شي حاجة اهم من هاد الاجتماع ؟؟؟
جبد تليفونو وبدا يتاصل بيها لكن الرقم تايطلع ليه غير مشغل وبيرين قالت بعصبية:
هادا هو الاستهتار.. ملي مقاداش على الحاجة علاش تاتلاح ليها
شاف فيها عاقدهم وقال: قلبي عليها..
بيرين: مسيو علاش غانقلب كون بغات تجي كون جات قبيلة
رد بجدية: بيرين خدمي شوية عقلك.. البنت مايمكنش تخرج من الشركة ولا تخلي اجتماع معم بحال هادا وهي برااسها لي تقاتلات باش يكون.. قلبي ياكما واقع شي مشكل
ردت بتردد: وعلاش مانحضرش انا للاجتماع ..مجاتش نخليو مسيو فارس كايتسنا و....
قاطعها: هاد الاجتماع نتيجة خدمتها.. طبعا مجاتش نعطي خدمتها لي سهرات عليها لشي حد آخر؟ ولا لا؟
بيرين: وإلى كانت هي ماشي قد المسؤولية امسيو؟
زفر من نيفو وسكت شوية عاد فاتها وقال قبلما يدخل: قلبي عليها وفينما كانت حضريها عندي
نفخات من نيفها وزادت البيرو ديال ليلى تاتبرگم: هاد الخدمة أصلا كانت ديالي.. البرهوشة جات البارح ولات باغا تنافس مع سيادها.. لفعة
حلات المكتب وشافت فوق البيرو مالقات والو هي تزيد تعقدهم.. بدات تحل فالمجورة وتقلب على الملفات حلات الخزانة حتا هي وبدون فائدة مالقات والو ووقفاات مصدومة تاتردد: نزلات بلاما تديهم معاها أنا متأكدة ..فين داتهم فييين ؟؟؟؟
..رجعات كاتقلب بسرعة وضروري من الملفات باش الاجتماع يتم وخطتها كدالك.. نيتها مكانتش تخرب الخدمة ولا تفسد اجتماع بحال هادا ولي مهم للشركة .. بغات هي تكلف وتكون فالواجهة جنب المدير العام ماشي شي حد آخر.. ولكن بلا ملف المشروع وبلا الخدمة لي دارت ليلى مابقا اجتماع مابقات خدمة وعيات تفكر فيم غاتكون داتهم لكن حتا فكرة متاطيح فبالها حطات من يدها سرتلة دهبية بأحجار ملونة تاتلمع بعدما قيساتها وكانت غاتجرب وحدة خرا حتا سمعات البائع وراها قال لمحمد لي كان كايتسناه
البائع: هاهي اسيدي جمعتها ليك ..بالصحة والراحة
سيمحمد: شكرا
خدا من عندو الكيس الورقي وجبد جوا بيض من جيبو لوراني خرج منو الفلوس و عاود حسبهم عاد عطاهم ليه وفاطمة الزهراء حداه وقفات قائلة
فاطمة الزهراء: صافي جمعها لك
رد: آه.. بقات شي حاجة خرا؟
فكرات شوية وقالت: نو يمكن صافي
خرج النفس براحة: الحمد لله
زاد خارج وهي وراه تاضحك قائلة: عييتي
رد بضحكة: عييت وتسيزيت.. نتوما البنات لي تبعكم خلات على جيبو
ركبات فالطاكسي حداه دارت السانتور وقالت: بنتك هادي تستاهل طبعا
رد بحب: تستاهل عينيا
بسمات بحنية وشافت فيه: مممم.. وشكون هاد البنات لي قصدتي
رد بعفوية: ليلى ، حتا هي فاش تانوصلها تقدا ساك كاتحط فيه گاع فلوسها
فاطمة الزهراء: اها وشكون اخر ؟؟
رد بهدوء: صافي
عوجات فمها بفضول: يعني ماعندك تاوحدة فحياتك.. نهائيا؟
خطف فيها شوفة سريعة وحرك راسو بالنفي ورجع شاف فيها تايحنحن متردد يقول
سيمحمد: ونتي عندك ؟
ردت ببرود: لاا ..راك عارف أنا الصحاب وماعنديش بقا غير راجل فحياتي ههه
بسم وقال: مزيان ..حسن نيت
فاطمة الزهراء: غانمشيو لدارك.. انا غانبدا نقاد هادشي لي جبت والى خصات شي حاجة نعلمك تجيبها معاك
رد: أنا جاي معاك نعاونك
ردت برفض: لا نتا خاصك تخرج أميمة لشي بلاصة حتا نسالي
سيمحمد: غانديها لعند ختي ونرجع نعاونك.. حتا نساليو ونعيط ليها تجيبها
فاطمة الزهراء: اوكي.. حتا هادي فكرة
وصلو للدرب ووقف الطموبيل بعيد شوية على دارو خلاها كاتسناه وهو مشا دا بنتو عند ختو لدارها وصاها عليها ورجع للطاكسي ركب وساگ للدار عاد هبطو بزوج هي حلات الباب وطلعات مباشرة للصالون تاتشوف فالحيوط وتهندس الزواق فدماغها وهو حل الكوفر والبيبان تايهبط ليها داكشي لي شرات ويحطهم فوق الطبلة حتا تشوف كيفاش تقادهم.. ورا الباب باركة.. ركابيها فاشلين بالخلعة ودماغها تايهيئ ليها باللي الأكسجين غادي وتايقلال وشوية مغاتبقاش تنفس.. حسات بالموت طالعة معاها وبداو دموعها يسيلو دمعة ورا دمعة وعيونها تايتسدو باستسلام واخا باقا بصوت هامس تاتطلب النجدة ....
..
شرب شوية من المشروب لي فكاسو عاقد حجبانو وعينيه على الباب وفنفس الوقت تايتكلم مع فارس فأمور العمل.. تحل وعقدهم لكن ملي شاف بيرين هي لي دخلات قلب وجهو بعدم رضى وهي جات حداه مبسمة باش ماتبين والو وعند ودنو تحنات هامسة
بيرين: مالقيتهاش امسيو.. لاهي لا الملفات
طلع النفس كاتم غضبو وفارس لي تايشوف فيهم شرب من كاسو وقال: شي مشكل؟
عصام: لا ماتشغلش بالك..
فارس: مادام هاكدا نبداو علاش جينا.. ولا لا امسيو اوكوراي
بسم وقال بتقة: هاد اللقاء ماشي للخدمة.. بغيت أولا تكون بيناتنا التقة .. نعرفك كتر وتعرفني كتر عااد ندوزو للخدمة.. بهاكدا غاتفهمني مزيان ونضمنو مشاريع خرا فالمستقبل ولي غاتكون مربحة حتا هي
تبسم فارس وقال: مرحبا امسيو اوكوراي ..ولكن مع الأسف وكيفما فهمت ليلى ..غانكون مشغول بزاف هاد الأيام واليوم للأسف هو الوحيد لي كان عندي خاوي
عصام: مغايكونش اجتماع فالشركة.. غايكون عشاء عمل عندي فداري يعني الوقت لي غاتسالي فيه خدمتك.. الى قبلتي العراضة طبعا ومارديتيهاش ليا فوجهي
فارس شاف فالمساعد ديالو حرك ليه راسو ورجع شاف فعصام وقال: مرحبا اسيدي شرف ليا
وقف ووقف حتا عصام سلمو على بعض وقال عصام: ادا غدا نتسناك عندي ..ممكن تجيب معاك المدام ديالك
حرك راسو: حتا أنا كانتمنى مدموزيل ليلى تحضر هاد المرة.. رتاحيت لديك البنت بزاف
حرك راسو مبسم وقال: معلوم
خرج فارس هو والمساعدين ديالو فحين أن عصام تقلبات ملامح وجهو وتحنا بايديه على طبلة الاجتماع مخنزر قدامو وتايفكر.. بيرين شافتو فديك الحالة وخرجات تاتنهد بعدم رضى و كيف فاتت الباب وقف عليها العساس مخلوع ..شافتو وخرجات عينيها تتشوف فباب الاجتماعات وقالت
بيرين: شنو جاابك نتاا لهناا
العساس: لالة بيرين البنت حسها تقطع
حلات عيونها: كيفاش !!؟؟؟
العساس: كانت كاتغوت مرة مرة.. وفاش رجعت دابة حطيت ودني على الباب ماسمعت......
قاطعهم الباب لي تحل وخرج منو عصام تايشوف فساعة اليد ديالو لي كانت تشير للساعة العاشرة ليلا... طلع عينيه فبيرين والعساس مستغرب وقال
عصام: شكاين
نطقات بيرين بسرعة: قال بلي سمع شي غوات من المكتب ديال الأرشيف
عقدهم وقال: الأرشيف !!؟
سبقهم وهوما وراه غادين تايزربو وبيرين يدها على قلبها لي تاينبض بخوف والعساس حتا هو .. دخل للكوزينة مخلي الحفلة نايضة عندو فالصالون وبدا تاني يجرب الاتصال برقم ليلى.. لكن بدون فائدة مرة أخرى.. قلب النمرة لمها صونا وتسنا شوية حتا جاوبات: الو وليدي
سيمحمد: خالتي بيخير.. بغيت نسولك على ليلى واش فالدار
ردت: لا اوليدي مازال فالخدمة..قالت ليا فاش خرجات عندهم اجتماع ماجتماع وغاتعطل
رد بقلق: تعطلات بزاف "شاف بالساعة وقال" إلى جات عيطي ليا واخا
قالت: واخا اوليدي
سيمحمد: عمر علاش مجاش للحفلة يفوج شوية
ردت: اولدي ماشكيت عليك الضرسة من قبيلة وهي نايضة عليه عاد مسكين فاتتو ونعس.. بوس ليا أميمة وحتال غدا ونجي نشوف بنيتي
سيمحمد: واخا اخالتي مايكون عندو باس ..تصبحي على خير
ردت: تصبح على خير
قطع وخرج للصالون، لقا بنتو غير تاضحك والسعادة فعيونها تتبري هي وفاطمة الزهراء لي بفستان بيض خفيف وطويل وبونضو بيض على شعرها، واقفة قدامها تايتصورو وختو باركة فالقنت تاضحك معاهم حتا هي وتشوف ففاطمة الزهراء من الفوق للتحت..
بسمو عينيه بدفئ ولعندهم مشا.. غمز لفاطمة الزهراء وهي فهماتو وخرجات للكوزينة جبدات الحلوة من التلاجة قادات فوقها الشمع شعلاتو ودخلاتو معاها للصالون ..طفا محمد الضواو وبداو يغنيو أغنية العيد ميلاد واميمة غير تاضحك وعيونها مدمعين بفرح.. طفات الشمع ووكلات باباها وفاطمة الزهراء و عمتها هي اللخرة شي لي خلاها تحرج شوية من الأمر..
جمعات الهدايا ودور دور وتعنقهم بزوج كلما حلات هدية جديدة.. لبس ليها سي محمد سلسة رقيقة بخميسة دهبية مع طوانگها ..ناضت بسرعة للمرايا تاطل عليهم كيف جاوها وضحك وفاطمة الزهراء قالت مبسمة: قلت ليك غايعجبوها
نطقات سهام ختو: الدهب گااع اخويا هههه
رد مبسم: حتا حاجة ماتغلا عليها
سهام: ايوا معلوم راها بنتك و عليها تاضرب تامارا ..الله يحفظها ليك "ناضت" أنا صافي تعطلت بزاف خاصني نمشي
سيمحمد: واخا اختي وسمحي لينا عطلناك
سهام: لا ويلي مرحبا هههه فاتي الغزالة "تحنات تسلم عليها وقالت" تبارك الله عليك هادشي كامل غزال
فاطمة الزهراء: فرحت لي عجبكم وعجب حتا اميمة
سهام: عطاك الله الصحة.. خليتكم على خير
مشات وخلاتهم بزوج متعاونين فجميع الروينة حتا سالاو ..محمد طل على بنتو لقاها نعسات بحوايجها وايدها على السلسلة ..فيقها دايخة بالنعاس لبسها بيجامة مريحة عاد قادها فالسرير وغطاها وخرج.. دخل للكوزينة ولقا فاطمة الزهراء قادات جوج كيسان ديال القهوة خدا منها كاسو وقال ببسمة: ماتعطلتيش على حادة
ميلات راسها ببسمة حلوة: كاتجري عليا دابة ياك
ضحك منزل راسو: لا حاشا
فاطمة الزهراء: ادا ناوية نبقا شوية مازال هههه
دخلات للبالكو لي فالكوزينة وهو وراها غادي.. عيونو مبسمين والراحة فقلبو.. جبد من جيبو علبة من علب الدهب.. حط الكاس على صور البالكو وحلها جابد منها سرتلة بحال لي كانت تاتقيس فالمحل ..جميلة ورقيقة تتبري وواتات ايدها ملي قيساتها.. شافت فيه بعفوية وتحمات من وجهها البسمة ملي خدا يدها بحنية وركبها ليها.. ماعرفات ماتقول صدمها بالتصرف لي دار وخلا قلبها ينبض بسرعة فحين هو شاف فيها بهيام مسلوب بعيونها وقال
سيمحمد: مزيان لي رجعتي
عنقاتو وعيونها دمعو وهو فلحظة ضعف انزاح لقلبو وزير عليها ساد عينيه وقال بتنهيدة حارة: توحشتك
واقف قدام الباب بحواجب معقودين كايتسنا العساس يحلو بالساروت و مع تحل وبغا يدفعو حس بشي حاجة مكالياه من لداخل وشاف فعصام قائل: مابغاش اسيدي يتحل
عصام: يمكن شي حد موراه حيد
بعد من حدا الباب وعصام من الفتحة الصغيرة بدا يحاول يدفعو بالمهل وتايردد: ليلى نتي هنا.. ليلى
طل وشافها وراه سخفانة شي لي خلاه يعافر باش يدخل حتا اخيرا دخل وبسرعة تحنا عندها تايقيس جبهتها العرقانة ويراقب تنفسها عاقد حواجبو بخوف
عصام: ليلى.. ليلى تتسمعيني.. خليك معايا
هزها بين ايديه حل العساس الباب باش يخرجها وبيرين ملي شافتها فديك الحالة شهقات بصدمة والدموع فعينيها تجمعو، داز من حداها كيف البرق وقال بالغوات
عصام: عيطي للطبيب دابااا للمكتب ديالي.. دااابااااا
قفزها حتا جرات كاتقفقف تعيط ليه وهو دخل للمكتب ديالو وداها للجليسة ليفطوي.. تكاها بشوية على فوطوي طويل وعريض وهي سخفانة غايبة على العالم الخارجي لكنها على الأقل كاتنفس واخا نبضات قلبها متسارعة.. حيد الفيسط والكرافاط مخنوق وتحنا عندها تايضرب فحنكها بشوية ويردد بهدوء
عصام: ليلى كاتسمعيني ..ليلى عافاك حلي عينيك.. عافاك ..
بدأت تأن بهلوسة غير مفروز شنو تتقول ..هز قرعة الما من فوق الطبلة رش شوية فايدو ودوزو على وجهها على الأقل يبرد عليها الحرارة لي شعلات فجسمها .. حط القرعة ووقف مخنوق تايشوف فيها وايدو على خصرو حتا تدق الباب ودخلات بيرين ووراها الدكتور بالحقيبة ديالو سلم براسو وبرك حداها فحين بيرين جات حدا عصام مخلوعة وقالت
بيرين: و واش هي بيخير..
رد : ماعرفتش "شاف فيها وقال" شنو كانت كادير تما
ردت بارتباك: ا ا أنا لي س سيفطتها باش تجيب شي ملفات و .. م ماعرفتش شنو وقع من بعد
بقا فيها تايشوف بنظرات وتروها كتر ..وقف الطبيب عاد تلفت ليه عصام وقال مقرب عندو: شنو عندها؟؟
رد بهدوء: ماشي شي حاجة گغاف مسيو عصام ..غير الطونسيو ..عطيتها إبرة مهدئة تتكالما شوية وبعد نصف ساعة غاتفيق.. بالشفاء إن شاء الله
خرج النفس براحة وقال: شكرا
الدكتور: العفو
خرجات معاه بيرين وسدات عليهم الباب.. تنهد بضيق وحداها برك حاني راسو وايديه على جبهتو لي غاتفرق بالصداع.. سمعها تتأن وضور عندها وجهو تايحاول يفهم شنو كاتهمس و شوية قرب بودنو لعندها وسمع: بابا..
كلمة خلات حجبانو يتعقدو ويرجع الداكرة للوراء.. وبالضبط ليوم الحفل وهو فالحديقة الخلفية تايجري مكالمة خاصة.. مع قطع سمع الهضرة والغوات طل بعينو وشافها مع فاطمة الزهراء واقفة و حديت ليلى كامل على ودنيه داز
........
فاطمة الزهراء: على أساس دابة تاتصرفي بنضج
ركزات فعينيها بحدة كتر وقالت ضاغطة على كل حرف: هادي لي قداامك باهاا ماات وهي ماازال تتقرا وخلا ليها جووج النفوس.. مها وخوها.. و هي لي هازااهم ومسؤوليتهم على كتاافها بوحدهاا.. غيير مي إلى ماجبتش ليها دوا السكار تاطيح ليا فالفراش وديك الساعة عاود خاصني فلوس الطبيب والدوايات وطلع وهبط.. تانتقاتل باش مانخلي خويا مخصوص من واالو ومايضحكوش عليه صحابو فالزنقة ..على ودهم تعدبت ودمرت تلت سنين وانا تانقلب على خدمة بلا فايدة.. شنو الأخت كنتي باغاني ندير ..وعلاش أصلا وحدة بحالك غاتحس بيا.. نتي ملي عقلتي على راسك وباك موفر ليك لي بغيتي سوا قريتي ولا لا كااينة شركة قد السخط تتسناك تسيريها.. ولكن انااا ولي بحالي لي واكلين الدق ..اناا
....
تنهد بضيق وهضرتها خنقاتو وهي نفس الكلمة تتردد.. رجع برك منزل ايديه على ركابيه وقالب لعندها وجهو بنظرات غير مفسرة ..مختالفة وهي فهاد الحالة، مختالفة على ليلى لي تتبان عليها وهي فايقة.. ليلى القوية.. المتمردة.. ليلى لي تسوط فبنادم تجرحو وماتخليهش يجرحها .. أو ربما لأن جرحها أعمق من اي جرح آخر ومابقات حتا حاجة تتأتتر فقلبها ولا تهز ليها الحساب ...
ناض هز ليها راسها وحداها برك حاط راسها على صدرو وايدو بلطف تايمررها على گصتها وشعرها المطلوق وهي ايدها على صدرو حطات وزاد لعندو زيرها.. سد ايديه منزل نيفو لشعرها وهي طلعات براسها لجهة عنقو.. ساكتين بزوج بهدوء تام وسكينة ، حتا تحل الباب بشوية من طرف بيرين لأنها مابغاتش تفيقها وكيف شافت المنظر حبسات مستغربة وبقات فيهم تاترمش هي ترجع سداتو وخلاتهم بزوج
.بعدات من حضنو متأترة بالكلام لي قال وهو ساهي فالدميعات لي زادو زينو عيونها اكتر وبرزو لونهم الأخضر
فاطمة الزهراء: حتا أنا توحشتك بزاف والله
هز ايدو متردد وبدا يمسح الدموع لي على خدودها نزلو: دابا علاش البكا
ضحكات وبدات فوجهها تمسح: ماعرفتش ههه بوحدهم تاينزلو
طلع النفس تايفيق راسو من السخونية لي سخن عليه لأن تصرف بحال هادا ماشي ديالو وعمر محمد يديرها واخا يفكر فيهاا مية عام وعام..
هزات ايدها بسعادة كاتشوف فالسرتلة وقالت: عجباتني بزاف
رد: حتا أنا داكشي لي بغيت .." حنحن محرج وقال " فاطمة الزهرا يمكن ..تعطل الحال
حلات عينيها وقالت بفهم: آه بصح ..نسيت راسي ههه
محمد: ماتفهمينيش غلط ماشي تانجري عليك.. غير مابغيتش يتجبد ليك شي صداع بسبابي
ردت تاضحك: ههه عارفة .. شكرا على لكادو بزاف .. ماعرفت مانقولك مازال ههه.. غاناخد ساكي ونمشي
محمد: غانجي نوصلك
هزات ساكها وتسناتو لبس الجاكيط ديالو عاد خرجو وصلها للدار وتأكد بلي دخلات عاد رجع ادراجو مبسم طول الطريق غير بوحدو وشي حاجة فعينيه مبدلة على لي كانت ..
وهي كدالك.. روحها وقلبها ولات تتحس بيهم كتر من قبل وطيف السعادة مرافقها.. دخلات لبيتها بدلات الكسوة ببيجامة قصيرة ديال الدار وعلقاتها فالبلاكار .. الكسوة الوحيدة لي عندها فاللون الأبيض ..حلات المجر الفوقاني هزات منو الاجوندة ديالها وستيلو حلات السرجم يدخل الهوا وبركات فوق السرير مبسمة براحة، طلعات نفس طويل وحلات صفحة اخرى من الاجوندة وبدات تكتب
.....
راحتي فهاد اللحظة ماتتوصفش.. كنت عارفة بلي روحي كانت هنا اامين.. قلت ليك بلي قلبي هنا بقا ملي جا بابا وداني معاه .. وأخيرا بديت تانحس بنبضاتو.. أخيرا.. فهاد الدرب ومعاكم.. واخا حاليا معايا غير محمد لكن ماعليش.. فرحت لي لقيت كلشي هو هو.. محمد باقي كيفما عرفتو النهار اللول، باقي بنفس الحنية ونفس الدفئ والاهتمام فتصرفاتو كتر من كلامو، الحاجة الوحيدة لي تزادت فيه هي بنتو الصغيرة هههه.. بنت غزالة بزاف وعلى ودها اليوم لبست الأبيض.. سميتها أميمة.. بريئة وتتفكرني فراسي بزاف.. ولكن فنفس الوقت مابغيتش تعيش لي أنا عشتو.. مابغيتهاش تكون وحيدة ومنبودة.. كانتمنى تلقا اصدقاء يفهموها ويكونو فجنبها بحالكم.. كانتمنى من قلبي ..
بغيت نفرحك بلي أنا فرحانة كتر من أي وقت آخر.. ومرتاحة بزاف هههه.. و.. توحشتك بزاف.. بزاف بدات ترمش فمحاولة أنها تحل عيونها وتفيق.. حس بحركات ايدها على صدرو وحل عينيه طل عليها وهي طلعات راسها من فوقو وبركات كاتشوف لحت دايخة وعاقداهم حاسة براسها ماهياش وشي حاجة فيها مبدلة ..
عصام دوز ايدو على شعرها وقال بنبرة حنونة: ليلى ..تتسمعيني؟
ردت بصوت تقيل: فين أنا "حسات بالوجع فراسها وحطات ايدها عليه موعتة" آه راسي غايتفرق
عصام: هداي براسك و ماتحركيش عينيك بزاف شوفي فجهة وحدة واخا.. انا جاي
ناض للبيرو ديالو حل تلاجة صغيرة حدا الخزانة بابها خشبي الشكل، هز منها الما وكاس كب ليها تشرب ورجع برك حداها مرة أخرى
عصام: شربي شوية
خدات من عندو الكاس شربات فيه النص وبدات تشوف فالمكتب وترمش
عصام: شوية دابة!؟ ليلى ..واش شوية؟
حركات راسها وباقا الدوخة والسخفة شادينها من الخلعة وقلة الماكلة ..تفكرات اش وقع وبقات فجهة وحدة ساهية حتا حسات بايدو على شعرها وفيه شافت بهدوء وهو قال
عصام: مالك
حركات راسها بنفي وقالت: والو، بغيت نمشي للدار "حطات الكاس على الطبلة وقالت" تعطلت على ماما
حرك راسو بتفهم: اوك اجي
ناض بغا يهزها وقالت برفض: لا بلاش قادرة نوقف
بعد شوية وهي وقفات بصعوبة سادة عينيها حيت الأرض بيها تادور و مع بغات تزيد خطوة هزها بين ايديه وقال خارج : ماشي وقت العناد دابة
ليلى:مناش هاد الدوخة افف
شاف فيها وهو راكب فالمصعد: كليتي شي حاجة هاد النهار ؟
حركات راسها ب"لا" وهو تنهد وخرج بيها من الشركة.. لقا الشيفور كايتسناه حل ليهم بسرعة الباب لوراني وعصام قال: تسنايني غانجيب ساكك ونرجع
حركات راسها ومشا فحين هي تكات على السرجم تاتسنط لعضامها، سد عليها الشيفور الباب وطلع بلاصتو شاف فيها من المرايا وقال : مايكون عندك باس ابنتي
ردت ببسمة عيانة: ماتشوف باس ..عندك شي حاجة تكال اعمو؟
تبسم وحل علبة فالسيارة جبد منها علبة شوكولا وضار عطاها ليها: عندي هادي كنت غادي بيها لحفيدتي ولكن جات من نصيبك نتي ههه
خداتها: شكرا وسمح ليا ..مواكلاش النهار كامل وليت كانشوف منك تلاتة ههه
رد: ههه بصحة ابنتي
بدات تاكل فيها حتا رجع عصام هاز ساكها والفيسط ..دخل حداها وسد الباب بعدما حطهم على رجليها وقال: فين ساكنة ؟
ردت بعفوية: درب المزاليط
طلع حاجبو بتعجب: درب آش؟
ليلى: المزاليط .. هاداك لي جا حدا درب المرفحين
بدات ضحك واخا مافيهاش العضم الصحيح وعصام مازال بجمود تايشوف فيها هي تجمع الضحكة وقالت: احم عفوا.. غير سير اعمو انا نعت ليك
رد الشيفور تايضحك بدورو: ههه واخا ابنتي ..يا بسم الله
ديمارا الطموبيل وعصام قلب منها عينيها وتبسم بجنب فمو فحين هي تاتاكل فديك الشكلاطة وتشوف فالطريق ساكتة وتخمم
.خرجات من الحمام ببينوار بيض سخون ودخلات مباشرة لبيتها مخلية الدخاخن خارجة من الحمام .. ومن فم مها مليكة لي تاطيب فالخبز وتنگر مابغاتش تسرط ليها التعطيلة لي تعطلات البارح
مليكة: يسحاااب والدييك ماعليك حكام .. زغتي زغتي وخرجو رجليك الشواري هاااي هاااي هاااي.. والله ومااااحشمت حتا نقولها لسيمحمد يجي يجرك باابااك من دااك الشعر لي فرحانة بييه
جبدات ليلى حواجيها لي غاتلبس وحناكها حومر بسخونية الحمام وحارت فاينا ساك تاخد حتا وقع الإختيار على ساك أسود جلدي شراتو بالعشاقة ..نشفات شعرها بالفوطة وخدمات السوشوار تقادو، عاد قدرات تريح شوية ودنيها بما أن صوت السوشوار عالي ومابقاتش تاتسمع النگير لي من البارح وهو فودنيها لااسق .. سالات وعلى ضهرها نزل مسبسب كيف الحرير نفخات الگصة حتا هي وكيف طفاتو بدات هضرة مليكة تاني تعلا فالدار
مليكة: يخلييك بالخلااا قوولي اميين.. أناا هاااد الخدمة لي تجيب ليا هضرة الناس ويبدااو الجارات ينعتوو فيااا ماعندي ماندييير بيها بالناااقص....
وقفات قدام مرايتها كاتلبس الفيسط الرمادية ديالها فوق شوميز حريرية سوداء كول عريض وصدرها من الدونتيل
مليكة: الفضااايح هومااا لي بقاااو لياا نهز همهم تاااهومااا ويولي لي يسوااا ولي مايسوااا يحل عليا فموو
بدات تجمع فشعرها وتبرگم بهمس: واقلة غير نطلقو لجنب؟ لا لا نجمعو اللور غايجيني حسن
مليكة: كون تزوجتي بولد خااالتك كون راك فداااااارك معززة مكرمة ماشي كي السلوگي خارجة دايعة وماترجعي تايقرب الفجر يطلع
لبسات طالونها هزات سااكها والسوارت قادات الگصة فالمراية وزادت خارجة تتزرب
ليلى: أنا غادة
خرجات ليها مغددة: انا معامن داااوية من الصباح
حلات الباب قائلة: معايا معايا سمعتك كوني هانية يالله الله يعاون
خرجات تاتزرب لدار سيمحمد وفطريقها دازت على دار عيشة أم امين ولمحات تما سيارة مرسيدس تتبري واقفة قدام الباب.. بفضول كمشات حواجبها وزادت تاتفكر فشكون مولاها حتا وصلات لدار سيمحمد وفعلا لقاتو تايمسح فالطاكسي ببسمة مبهجة على وجهو ..لاابس البيض وماشط الشعر والروايح ياسلام قلبات شفايفها معجبة فيه وقالت تاطلع فيه وتنزل
ليلى: صباح النور
.ضار وقال ضاحك بوجه مبشور ومنور: صباح الخير كيصحبتي
بسمات منباهرة بيه: الحمد لله .. نتا بلاما نسول باينة عليك صاابح زاز لووز
ضحك وقال تايجمع السطل: طلعي طلعي نوصلك هانا جاي
ليلى: اوكي
ضحكات لحركاتو والحيوية لي صبحات فيه على غفلة ودازت للطاكسي طلعات تاتسناه حتا رجع وركب حتا هو
سيمحمد: غاندوزو على فاطمة الزهرا نوصلوها معانا
حلات عينيها وبدات تفهم: هااا وانا نفهاام
شاف فيها ورجع شاف فالطريق سايگ: اش فهمتي؟؟
ردت بتهكم مصغرة فيه عينيها: هاد الفرحة وهاد الزواق وكل مرة مدخلهاا عندك للداار
حاول يمنع راسو مايتبسمش وقال: واباز بقاي حاضياني
ليلى: هههه بااقي تتحبها الزغبي بالله تاكنت عاايقة هههه
سكت مبسم وزادتت ضحكات طانزة عليه: هااي هاااي على سيمحمد الحشوومي هادشي فييين كاان مخبي.. قلبات لك البنت المجاج هااا هههه
وقف بالطاكسي وقال بسرعة: وصافي سكتي هاهي جاية
طلعات فاطمة الزهراء اللور ببسمة عريضة حتا هي وبنفس الحماس قالت:
صباح الخير عليكم
شافيها من المراية ضاحك وقال: صباح النور.. صبحتي مزيان
ردت: الحمد لله ونتا ههه
سيمحمد: الحمد لله ههه
قاطعاتهم ليلى بتذمر: ايوااا لا واالا أنا هادشي بزاف عليا رااعيو للصحراء القاحلة ديالي ويلي سيمحمد: لاااا حول ولاقوة إلا بالله
فاطمة الزهراء: !!؟مافهمتش
جاوبات ليلى بغنج: بلاش احوبي ..الله يعطينا حالتك وخلاص هههه
قلبات منها فاتي عينيها وسيمحمد معاودش هضر حتاا وصلوها للشركة ونزلات تاضحك عليهم بزوج داخلة مع الباب راشقة ليها ومع المصعد طلعات قاصدة البيرو ديال بيرين مباشرة.. دقات ودخلاات مبسمة من الودن للودن لقاتها منزلة راسها على يديها باينة فعينيها مانعسات مشافتو وكيف شافتها وقفات مصدومة ماتوقعاتهاش تجي فحين ليلى قلبات ملامحها للصدمة
ليلى: بيرين.. مالك اش هاد الحالة ؟؟؟!!!
هربات وجهها وتاتحاول ماتبين والو: و والو غير مانعسش مزيان البارح
وقفات قدامها قائلة: علاش شنو وقع؟. واش حيت تخلعتي عليا؟ "قلبات وجهها بتأتر" حبيبة ديااالي
عنقاتها بلطف تاطبطب على ضهرها وبيرين غير تاضور فعينيها مرتابكة وقاالت: كي بقيتي مزيان
ردت ليلى ببسمة عريضة: الحمد لله انااا بييخير
بيرين: ليلى أنا..مـ ماقصدتش يوقع داكشي كامل .. أنا غير كنت....
قاطعاتها بوجه جامد: علاش نتي لي سديتي عليا الباب؟
تبلوكات مع هاد السؤال جاتها بحالا عاقت بيها وعرفات كلشي.. صفار وجهها وقالت كاتمتم: م معلوم لا.. ا أنا سيفطتك تجيبي الملف صافي
دوزات ايدها بحنية على شعرها وقالت: ايوا مالكي مخلوعة.. ريلاااكس دجانم ..ياك هاكا تتقولو ليها بالتركية؟ ههه
عصام: احم
تلفتو وكان عصام بطولتو وأناقتو عند الباب واقف عاقد حجبانو فيهم بزوج وليلى بنفس البسمة البريئة قالت: صباح الخير مسيو اوكوراي
بجدية قال: صباح النور.. علاش نتي هنا؟
رمشات فيه؛ جيت لخدمتي؟
عصام: قلت ليك خودي اليوم راحة شنو جابك
بسمات تتشوف فبيرين: مانقدرش مانجيش لخدمتي مسيو اوكوراي.. ولفتكم
صغر عيونو تايحلل كلامها ويشوف فيهم بزوج بعدها ضار قائل قبلما يمشي: تبعيني
ليلى: اوكي ..باي بيرين
تبعاتو حتا فات مكتب بيرين ووقف.. ضار لعندها وهي معاه تقابلات كاتسنا كلامو لي نطق بلين واهتمام
عصام: كي بقيتي مزيان؟ فاتك الدوخة
ليلى: الحمد لله فأحسن حال مسيو
حرك راسو مطول فيها الشوفة وقال: شنو وقع البارح.. شنو لي وصلك لغرفة الأرشيف وكيفاش حتا تسد علك الباب
طلعات النفس وقالت ببرود: شنو وصلني للأرشيف سول مدموزيل بيرين هي لي سيفطاتني نجيب واحد الملف من تما.. ولكن شكون سد علي الباب.. هنا علمي علمك.. واخا أنا مانظنش يكون شي حد سدو عليا.. متانجبد حد ماعندي عداوة مع حد علاش غايبغيو يآديوني ؟
تنهد بحيرة وقال تايحرك فراسو: أنا غانبحت فالموضوع ماتشغليش بالك
هزات كتفها: اوك لي بان ليك
عصام: إلى كنتي مزال عيانة رجعي لدارك ترتاحي.. ماتجهديش على راسك
بسمات فوجهو ونطقات بتقة: أنا بيخير وقادة بخدمتي امسيو كون هاني
بسم وقال: هادشي لي بغيت.. "تدكر أمر الملفات وجمع حواجب" بيرين البارح قلبات على الملفات ومالقاتهمش.. فين حطيتبهم
زادت تبسمات وفاتتو داخلة للمكتب ديالها وهو تبعها بعينيه حتا تحنات تحت الخزانة ..بعدات النبتة للجنب وبدات تجرهم واحد واحد هو يضحك بجنب فمو وقال: جنية صافي، مالقيتي فين تحطيهم
وقفات هازاهم: ياك مالقاهم حد؟ ادا هادا انسب مكان ليهم
حطاتهم فوق البيرو ديالها قدامو وكملات كلامها: هاد الخدمة سهرت عليها امسيو اوكوراي.. مجاتش تديها وحدة خرا باردة غير حيت وقع ليا ظرف خارج على الإرادة ديالي
ضور عينيه بين عينيها وقال: حتا واحد مغايخد خدمتك.. رتاحي
ليلى: وأنا تايقة فيك