عيشة: ااااشكووون
خرجات من الكوزينة كاتجري للباب لي بغا يتفرع بالدقان وكاتمسح يديها فالطابلية لي لابسة.. قادات زيفها مغطية بيه شيباتها وحلات بسرعة الباب هي تلقا حادة قدامها واقفة وعاقداهم
عيشة: مي حادة!!!؟؟؟.. ياك لاباس
ردت مخرجة عينيها: كاين ولدك
ردت مخلوعة: أمين؟ اه كاين مالو شداار
حادة: دخلي درووكاا كلميه ليااا
عيشة: و واخا وادخلي بعدا من الباب نشربو كويس ديال اتاي ويلا كان دارلك شي حاجة قوليها ليا أنا نتفاهم معاه
ردت بصرامة: لااا ابنيتي غاخليك بعيدة، هاداك انا لي نعرف ليه..نتي غاعيطي ليه يخرج عدي
ردت باستسلام: واخا امي حادة
دخلات كاتتخمم بوحدها.. وحادة عند الباب قارمة فمها المكمش بحال الخاتم وواقفة تسنا حتا بان ليها نازل مع الدروج ببيجامة ديال النعاس وباينة فيه عاد فايق.. ميقات باشمئزاز كاطلع فحالتو وتهبط وقالت تتبرگم: اودي ياودي عالراجل.. قرب يأدن العاصر وهو عاد فايق يخليه بالخلا
أمين: مي حادة عندناا ههه صباح الخير "بغا يبوس ليها راسها هي دفعو بعكازها"
حادة: كحز لهيييه رانا موضية
ضحك تايشوف فمو وفيها: الله يقبل ههه دخلي مالكي واقفة عند الباب
هزات عليه العكاز على غفلة وكونما رجع اللور كون رعفاتو بيه: شوف اولد عيشة..هاانا گدام مك غانتبرااا منك.. ياا غاتقيل عليه بنت ولدي ..ولا راه مغايعجبك حال
خرجات عيشة عينيها مخلوعة وقالت: اويلي مالو شداار ليها" ضرباتو لكتفو وهو جمع حجبانو بعدم فهم" اااش درتي للبنت امسخوط الوالدين گوول اشدرتي
آمين: اينا بنت بعدا.. واش فاتي ؟
حادة: فااااطمالزهرااا.. لي كانت كي النوارة منينما دازت تخلي الفام محلوولة ويصلييو عالنبي.. جيتي تااا باقي تامسخنتي بلاصتك ومرضتيهاااا فصحتهااا مااالك شتكون گااع فملك الله
خرج عينيه وجاتو الضحكة من الباطل لي غاجا ونزل عليه: أنا مرضتهاا !! ؟
حادة: شوفاااه.. داك التبوهيل ديرو على شي حد خر ماانا عاجنااك وخابزااك بيدي.. والله ونعاود نشوفها تاتبكي بمسبتك ياحتا نجبد لك دوك العينين ونعطيهم لولاد الدرب يلعبو بيهم البي.. فهمتي ..وادوزي بخييير اعويشة
مشات تتعكز بعكازها وعيشة قالت: دوزي بخير امي حادة و وسمحي لينااا..
أمين بقا غير تايشوف ويحلل فكلامها حتا نطقات مو بعدم رضى: تاوااش متاتحشمش.. واش ساليتي من بنات الدرب كل ساعة مقنت ليا مع وحدة وبانت لك غاهاديك ليتيمة مسكيينة ماحشمتي ماراعيتي
ضحك باستهزاء: واش من نيتك امي.. فاتي شفتها غير نهار واحد ملي جيت وتاتقولي ليا مرضتها ؟ تتسطاو علياا
عيشة: سبحاان الله السيدة غاجات وحطات علك الباطل من دون النااس
نفخ بعدم اهتمام ودخل قال ليها: حطي حطي ليا نفطر فرعتو لينا راسنا عالصباح
عيشة: قييل علك البنت اولد كرشي هانا تبريت منك
رد وهو طالع مع الدروج: واصافي فهمنا حياة: غاتبقاي هاكدا غير تتنخصصي.. مغاتعاوديش لعمتك مالك؟
مسحات عينيها من البكا وقالت بصوت جاف: مماليش.. غير سيري شوفي شغالك بغيت غير ننعس شوية
ردت: خمس يام ونتي غير ناعسة حتا الزنقة متاتخرجيش ليها.. فاطمة الزهرا هادشي ديالك مابقا يعجب شنو واقع؟ "شافتها غير ساكتة مباغا لا دوي لاتكلم هي تقول بشك" واش بصح أمين هو السبب ؟
ردت بسرعة: لا أمين مدار ليا والو
حياة: ايوا وشنو.. أنا متأكدة مية فالمية الموضوع داخل فيه راجل ياغاتعاودي ليا شكاين ياغانقلب راسي
طلعات النفس وقالت بنبرة باكية: محمد
ردت مستغربة: مالو سيمحمد؟ دار لك شي حاجة
...
دخلات مع الدرب راجعة لدارها بعد يوم طويل من العمل.. فايدها هازة ميكة ديال السقاطة وكتافها بالعيا طايحين.. مع وصلات لدارهم حلات الباب حيدات السبرديلة وعند اول كرسي بركات كاترتاح وتمسد كتافها حتا خرجات عندها مها
مليكة: على السلامة.. نحط العشا؟
ردت: حطي.. فين عمر؟
ردت: مازال برا قالك عندو ماطش
حطات الميكة فوق الطبلة وقالت تاتتنهد: جبدت ليه هادشي تايدخل وياخدو.. افف عييت اليوم النهار كامل وانا من هادي لهادي
مليكة: ايوا نتي لي بغيتيي.. كون تبعتي ري مك كون راكي دابا بدارك ووليداتك ومبرعة فالخاريج
ليلى: مزيان امي تموتيڤيني بهاد الهضرة مزياان ..باش نعرف راسي ايلا ماصبرتش لتامارا شمن هم تايتسناني
ميقات فيها فمها: يشوييني فيييك
تدق الباب وناضت ليلى: أنا غانحل
دخلات مليكة للكوزينة وهي حلات الباب وكان سيمحمد هاز قفة ديال التقدية حطها عند العتبة وقال
سيمحمد: مسا الخير
سلمات عليه وتاتشوف فداكشي لي جاب:
مسا الخير.. العادة هي العادة ههه
رد بجدية وحاجبو بوحدو طالع: هالتقدية ديال السيمانة وإلى خصات شي حاجة علميني
ببسمة عريضة قالت: وااقلة راه دابا وليت خدامة والحمد لله التلاجة عامرة يعني غير بلاما تبقا تعدب راسك كل شهر
رد وهو باغي يمشي: مكاين تاعداب.. سلمي على مي مليكة
ضار يمشي هي تشدو وفيه صغرات عينيها: واقعة شي حاجة ؟
سيمحمد: بحالاش!!؟
ليلى: جيتيني ماشي هو هاداك.. وختك قالت ليا وليتي كاتعطل متاتجي حتال اشمن وقت والصباح بكري كاتلقاي هزيتي الطاكسي ومشيتي.. ومابقيتيش تتعمر فالدرب بمرة .. كاينة شي حاجة أنا معارفاهاش!؟
حيد ليها ايدها وقال: كاينة غير الخدمة وتامارا هاد الساعة.. تهلاي
مشا وخلاها فيه تتشوف والشك فعيونها تايشعل.. فجأة دخلات لبيتها هزات جاكيط كحلة تتلبسها وقالت بصوت عالي: مي دخلي ديك التقدية لي قدام الباب أنا شوية ونرجع
مليكى: افيين غاادة هالعشاا حطيتو
ليلى: خلي ليا حقي هاناا راجعة نطقات حياة بعدما فاقت من صدمتها وفاطمة الزهرا حداها كاتشمر بنيفها لي تخنق بالبكا وساهية قدامها
حياة: واهاانتي لك على سيمو.. هادشي كاامل فيين كان مخبيه.. ومن الصغر وهو تايبغييك!!! ؟ "شافت فيها وغوبشات" دابا بغيت غيير نفهم نتي لاش دايرة هاد الحالة كاملة
ردت بألم: ضارني قلبي اعمتي.. صدمني صدمة العمر
حياة: الصدمة تصدمناها كااملين غانتي قلبك هشيش كتر من القياس
فاطمة الزهراء: مانويتهاش فيه نهائيا.. كان أقرب واحد ليا اعمتي واكتر واحد دايرة فيه التقة وكانت علاقتنا زوينة بزاف.. جا وبسهولة دمر كلشي وخرجني من حياتو ..وكون غير درت ليه شي حاجة
حياة: لا حول ولا قوة الا بالله.. والحل لي بان لك دابا هو تبقاي سادة علك وتعطيها للبكا؟
فاطمة الزهرا: ماعرفتش.. حاليا باغا غير ننسا هادشي واخا مقادراش
سمعو الدقان وناضت حياة بتنهيدة تحل الباب.. مع فتحاتو بانت ليها ليلى قدامها مبسمة وقالت
ليلى: مسا الخييير
سلمات عليها حياة وقالت: مسا الخير الزين دخلي
دخلات كاضور فعينيها وتقلب قائلة بفضول: ياكما نعستو ..شت الحس مقطوع فالدار هههه
حياة: ههه لا لا.. مي راها معروضة عند شي عيالات وكاينة غير انا وفاتي
ليلى: هاكاك.. وفاتي شنو خبارها بعدا لاباس عليها
حياة: لاباس الحمد لله هاهي كاتعدي
ليلى: يامات هادي ماشفتها وقلت ندوز نطل ياكما مريضة
ردت بحرج: ا شويى وصافي.. انا غانكلمها لك
ليلى: واخا الزين.. بالحق إلى كانت ناعسة بلاما تصدعيها
حياة: انا انشوف
خرجات لعندهم فاطمة الزهرا قبل حتا مادخل حياة وتعيط ليها.. ضارت عندها ليلى مركزة فيها الشوفة وفاتي بوجه جامد ربعات ايديها وقالت بجفاء محاملاهاش تجي: السلام
ليلى: الزين.. قالوليا مريضة ياك لاباس ؟
فاطمة الزهراء: الحمد لله
حياة: دخلي بركي نشربو كويس تأتاي
ليلى: لا لا بلاما نعدبكم لقيتوني كنت غادة عند سيمحمد وقلت نطل عليكم فطريقي ههه فاتي تمشي معايا ؟
قلبات فاطمة الزهرا وجهها وقالت: بلاش غير سيري نتي
ليلى: علاش؟ ياكما مخاسمين؟
فاطمة الزهرا: سوليه هو يقولك
ضحكات حياة بحرج وقالت: ساعة لله وصافي..هادشي تايوقع بين الصحاب
ليلى: مممم بصح ههه ايوا جيت نسول وصافي. خليتكم على خير
حياة: يسول فيك الخير الزين سلمي على ماماك
ليلى: مبلغ حتا نتي سلمي على مي حادة.. بسلامة
خرجات وحياة كيف سدات الباب نطقات فاطمة الزهرا بغل: علاش أصلا حليتي ليها
حياة: حشومة ويلي.. زايدون البنت مدارت غير الخير خوها لي منو لافوت
فاطمة الزهرا: ممم مدارت غير الخير.. هاديك أنا لي كانعرفها شتاتسوا.. غاندخل نعس بلاما تفيقوني
دخلات لبيتها مفقوصة و على سريرها تكات تاتقلب فيه ونفس المشكل شاغل بالها ومطير على راسها النعاس وعلى قلبها الراحة ..
.صبح وفتح.. ليلى ملي شرقات الشمش وهي على رجليها واقفة .. مرة هاهي فالشركة ومرة خرا تاطل على اللمسات الأخيرة وتوجد للحفلة لي غاتكون فالغد.. فحين أن فاطمة الزهرا فالسطح باركة.. مباغا دوي مباغا تكلم.. قلبها رهيف وعندها فوبيا من الفراق بحكم أن عدد الناس فحياتها قليل يعد على رؤوس الأصابع.. مباغاش من غيرهم.. وباش تخسر شي حد فمعزة سيمحمد.. قاصحة على قلبها بزاف وصعيب تتقبلها. .
...
لبسات الفيسط ديالها وخرجات من البيرو هازا الاجوندة فيد والتليفون فاليد لخرا.. ضغطات على زر المصعد ناوية تهبط تشرب قهيوة وتقرقب شوية الناب مع الموظفات لكن قبلما دخل للمصعد صونا تليفونها وكيف شافت الرقم جاوبات
ليلى: الو
...: مدموزيل ليلى ياك؟
ليلى: وي هي هادي امدام إشراق.. واقعة شي حاجة
مدام إشراق: الله يخليك تاصلت بيك على ود أميمة إلى ممكن دوزي تاخديها.. اليوم تايقراو غير نص نهار وسي محمد مجاش .. لقيت غير نمرتك كان خلاها لينا احتياط واتاصلت بيك
ردت بتعجب: مجاش؟ ؟
مدام إشراق: لا وحتا الهاتف ديالو طافي
ليلى: واخا امدام ربع ساعة ونكون تما.. عافاك غير خليك مع أميمة حتا نوصل
ردت: كوني هانية امدموزيل غاتبقا معاها الاستادة ديالها حتا تجي
ليلى: شكرا بزاف انا جاية
عصام: فين غادة !؟
قطعات وضارت لقاتو وراها واقف وهاز الفيسط ديالو فيدو.. ضغط على زر المصعد وقالت هي بشيء من الارتباك
ليلى: عندي واحد الغرض مهم ضروري نمشي نقضيه
جمع حجبانو باهتمام وقال: واقعة شي حاجة ؟
ليلى: لا غير مسألة شخصية خاصني ضروري نحلها
رد بتفهم: اوك ماشي مشكل.. الى بغيتي ممكن نوصلك
ليلى: لا بلاما نعدبك.. غانزل فالدروج حسن هادا محال يتحل اليوم
هبطات تاتزرب وخرجات من الشركة.. شدات طاكسي صغير عطاتو عنوان المدرسة وفنفس الوقت التليفون فودنها كاتاصل بسيمحمد لكن تليفونو فكل مرة تايطلع ليها بلي طافي الشي لي خلاها تبدا تخلع عليه.. هبطات وشافت أميمة فالساحة شادة فيد الاستادة ديالها لكن فورما شافت ليلى طلقات منها وجات تتجري لعندها
أميمة: طاااتي ليلى
ليلى: الحببيبة دياالي هههه
هزاتها تاضحك وحيات الاستادة براسها عاد طلعو للطاكسي بزوج
أميمة: بابا مجاش اطاتي علاش؟
ردت ببسمة: خرجات ليه واحد الخدمة مهمة من الجنب احبيبتي.. أنا غانوصلك للدار عند عميتو ونمشي نجيبو ليك صافي ؟
أميمة: واخا
باستها وعنقاتها لعندها وكل شوية تتاصل بيه لكن بدون رد أسوء مكاين فطبع بعض الناس.. هو الكتمان.. كتمان الحب.. الحزن.. خيبات الأمل لي ممكن تصيبنا جميع.. تايخبيوها ويتعافرو معاها بزز باش ينساوها ..بزز من عقلهم لي كل مرة خاص يفكرهم بيها..بزز من قلبهم للي مازال مابرا منها.. و كايعاندو شكون فالاخير ؟ نفسهم فقط.. ومن بعد .. فجأة وبكل بساطة كايوقع الانفجار بسبب كمية التراكمات ..انفجار فالوقت الغلط.. فالمكان الغلط.. ومع الناس الغلط .....
....
فوقت متأخر من الليل حل باب دارو ودخل وسط الظلام بلاما يشعل الضو.. علق الجاكيط لي حيد و كايحاول مايديرش الحس باش مايفيق حد.. حيد سبرديلتو ودخل للحمام شعل الضو وبانت فاصمة رقيقة فووق حاجبو مباشرة..لحيتو طوالت شوية وغير مرتبة ومن عيونو الباهتة واضح التعب.. غسل وجهو وطل على الجرحة لي كانت عبارة على خدش بسيط غطاها ومسح ايديه من الما عاد خرج لبس بانطوفتو وتوجه لبيتو ينعس شوية ويرتاح
ليلى: على السلامة
تلفت لمصدر الصوت وليلى سدات باب البيت على أميمة وربعات ايديها قدامو.. حواجبها مجموعين وفحالتو تاطلع وتهبط بجدية فحين هو قال تفاديا للكلام معاها: الله يسلمك.. اكسيدوو خفيفة وصافي
ليلى: ممم باينة .. وشنو السبب ؟
رد: مكتاب.. سيري ترتاحي فالبيت لاخر غاندخل حتا انا ننعس شوية عييت هاد النهار
دخل بلاما يتسناها تجاوب لكن تبعاتو بتعابير جدية ووقفات قدامو بتبات قائلة
ليلى: عارفة بلي عيان.. بالحق ماشي غير اليوم اسيمو.. يامات هادي ونتا هاكا وزايدها بالسكاات ماعرفنا لامالك والا شنو بيك.. زايدها خاايف حتا تشوف فوجه بنادم باش مايعيقش بيك بحالا مكتوبة على جبهتك راك مأزم ومامرتاحش
نفخ بنفاد صبر وقال: أنا بيخير اختي ومافيا لي يهضر.. باغي غير نرتاح شوية ممكن؟
ردت بعناد: : وانا اخويا هادشي لي بغيت ..ترتااح واحد الشوية فحياتك.. بالحق عااود ليا و قوول ماالك وليتي فهاد الحالة؟ علاش أنا فاش تاضرني شي حاجة نتا اللول لي تاندق بابك ونجي نخوي علك قلبي.. ونتا فاش تايوصل علك الدور تاتسد الباب على كلشي.. بنتك ومابقيتيش عاطيها وقت اش هاد الحالة عاود وصلتي ليها.. شنوو فيها إلى هضرتي وخويتي قلبك واش نتا ماشي بنادم
رد بانفعال: مال قلبي شكيت علك بلي ضاراني شي حاجة.. سيري الله يرحم باك تنعسي الليل هادا
سكتات تاطلع النفس بعصبية وقالت: بسبابها يااك.. هاد الحالة وهاد التقليبة لي تقلبتي على غفلة هي السبب فيها ياك
قلب وجهو لي حمار حتا هو بالاعصاب وقال: ليلى دخلي سوق راسك وسيري الليل هادااا ومباغي صداع
ليلى: بغيت غير نعرف واش مااعييتييش.. فينما تمرض ونقلبو مااالك نلقاو ديك خيتي هي السبب واش لي خلقها ماخلقش غييرهااا.. لي مايبغيكش اخويا راااه عمرو يبغييك لااش تتحمق معااها راسك وترمض صحتك على واااالو لااش
.رد ببرود: الله يحفظك اختي العزيزه
ليلى: ماالي كدبت؟
رد: هاد الهضرة سبقااتك ووصلات قبلما تقوليها غير بلاما تعدبي راسك وسيري ترتاحي
عوجات فمها: ممم هي هادشي علاش مدابزين ؟ ايواا صافي الباب يفوت جمل وألف وحدة تتمناك.. هي لي مكلخة وتايباان ليها
غير داك المخنتر اش غاتگجدر بيه گااع النهار ومطال وهو مقنت فالدرب لاشغل لامشغالة
طلع النفس تايصبر فراسو وقال: ساليتي؟
تنهدات وليه قربات تتساوي معاه وترطب الكلام: اخويا أنا راه باغا غامصلاحتك.. والله مكايعجبني نشفوك هاكدا مريض فصحتك وهامل راسك.. عاارفاك راجل ونص فالمشاكل كاتعرف كيفاش تتعامل وماتحيرش معاهم..بالحق تاتجي حتال المسائل ديال القلب وتايتلفو ليك النوامر وغيير تادوخ صافي كاتسد على كلشي وتغرق راسك فالخدمةو....
قاطعها بجدية: ليلى أنا فاهمك.. ولكن حتا نتي تفهميني شوية.. ماعندي مانعاود لك ومابقاليا لا الجهد والا الخاطر لي يجبد داك الموضوع.. صافي سديتو فخطرة والله كبير.. بغيت غير نرتاح هاد الساعة هادشي لي طالب
ليلى: وانا اخويا هادشي لي بغيت و عندي الحل غييير تبع هضرتي وغااتشوف واش غاترتاح ولا لا
زفر بنفاد صبر وقال فوق نفسو: و شنو هاد الحل بالسلامة
تبسمات:داابا هضرتي.. غدا إن شاء الله وتعرف.. دابا سير دوش.. ريح ليا عضيماتك وترولاااكسا وضور شوية بالحالة.. وغدا غادوز نهار مخير على حسابي
طلع حاجب: اها !!
ليلى: هانتاا غاتشوف .. يالله تصبح على خير
خرجات مبسمة وهو بعدم اهتمام سد الباب ودخل للحمام لي عندو فالبيت ..بدا يحيد حوايجو وقلع التيشورت حتا سمع تليفونو تايصوني.. وقف مكانو.. تنهد ساد عينيه مدة طويلة قبلما يجبدو من الجيب.. الساعة تتشير للوحدة ديال الصباح.. والرقم لي تايتااصل بيه مجهول.. نفس الرقم لي مصدعو خمس ياام هادي.. جاوب وهو على سريرو بارك.. والمتصل مانطق ماتكلم.. كيف العادة كايسمع غير انفاس وشهقات مكتومة من وراء السماعة.. عارفها هي.. وعارفها تتبكي حيت حافض بكيتها مزيان.. كلشي فيها هادئ وصامت.. حتا بكاها تايكون سكوتي فقط تتشهق بزاف وبالزربة تتخنق.. وتتزيد تخنقو معاها.. معدبة راسها ومعدباه معاها هو لي باغي ينسا ويقلب صفحة شادة فيها بكل قوتها ومبغاهاش تقلب .
.
صباح جديد مغيم والشتا فيه كاتنقط.. جو الملابس الساخنة والمشروبات الدافئة.. قهيوة كحلة فوق الطبيلة حطها ليه السيرفور شرب منها جغيمة وهو كايتسنا ليلى لي تاصلات بيه عالصباح وعلماتو بلي بغات تفطر معاه فالكافي لي مقابلة مع خدمتها.. طل على الساعة ومشط لحيتو بسهو تايخمم بحواجب مقرونين حتا سمع صوت الطالون وقف حداه وعطر نسائي كايفوح حدا نيفو.. ضور وجهو بفضول وزاد طلع داك الحاجب ملي شاف بنت جميلة بملابس أنيقة دافئة واقفة كاتبسم ليه هو لي عمرو شافها وقالت مادة ايدها تسلم: بلاشك نتا هو سيمحمد ياك
شاف هنا وهنا مفاهم والو وسلم عليها: هو هادا اختي
البنت: هههه
ضارت باركة مقابلة معاه وهو غير تايشوف: فاش تكلمات ليا عليك ليلى ترددت شوية صراحة ولكن من بعد هانا جيت.. حمسااتني بزاف باش نتعرف عليك
عقدهم وقال: ختي واقلة راك غالطة؟....
صونا تليفونو باسم ليلى هو يقول: سمحيليا نجاوب
ردت: خود راحتك
ناض بعد شوية وفتح الخط: الو وي ليلى
ليلى: الو سيمو.. امضرا وصلتي!؟
سيمحمد: وصلت قبيلة ووقفات عليا وحدة تتقوليا مسيفطاها مامسيفطاها
ردت: اااه شوف سمعني مزيان.. البنت سميتها ياسمين خدامة معايا.. عندها سبعة وعشرين عام الله يعمرررها داار.. ضريفة ومأدبة وعندها حقها فالزين وعارفاك مطلق ببنت ومعندها حتا مشكل و....
قاطعها : اااالمشكل اااش كاتخربقي
ليلى: اخويا ضبرت لك على لي تستاهلك مالها اش فيها.. وإن شاء الله هي لي غاتوالمك دابا تشوف
ضار شاف فالبنت وعض فسنانو بعصبية قائل: ضبرتي ليا واش نتي**وادة غانبدا نخسر الهضرة صبحنا عالله.. شكيت علك اختي مالي مكانعرفش نقلب
ليلى: آااه مكاتعرفش وحتا تهضر مع العيالات مكاتعرفش ليه حادگ غاتحل فمك مع لي ماتسمااش.. والبنت أنا لي قلت ليها بلي راك باغي تعرف عليها ومسكينة الليل كلو وهي تتوجد فراسها وتسولني علك شنو تتبغي شنو لي لا.. ايوا سير هرس خااطرها وشربها من الكاس لي شربتي منو
قطعات وقطعات منو الكلام ..جا يعاود يصوني ليها لكن لقاها طفاتو الشي لي خلاه يزيد يتغدد وفضل يمشي للطواليط يغسل وجهو ويبرد باش يفهم شوية التخرميزة لي خرمزات عقلو..
..هو غبر على الانظار وليلى من واحد الطبلة ناضت كاتزرب لطبلة ياسمين لي كمونضات على عصير وكانت تتشرب فيه حتا بركات قدامها
ليلى: السلام
ياسمين:ليلى هههه شكاديري هنا
حيدات نظاظرها وتاضور تشوف ياكما جاي: جيت نراقب الأمور.. قولي فاش هضرتو قالك شي حاجة؟
ياسمين: مازال يالله تسالمنا وبان ليا بحالا مفهم والو.. صافي وصونا تليفونو هو ينوض
ليلى: مزيان.. شوفي رخفي فك النفس.. هو راه قليل الكلام وقلييل فاش تايضحك ..غايجيك بحالا شوية معقد ولكن والله حتا رجولة يحيدها من فمو ويعطيها لك الى كنتي تستاهلي
ضحكات بإعجاب: بصح
عيباتها: هيهيهية واتجمعي اخيتي راه عدوه البنت المدفگة غاغادة وضحك.. دخلي نيشاان للمعقول وبيني ليه حنة ايديك.. وبنتو رااه هي عينيه الى بينتي ليه بلي راك قادة بيها حسبي قلبو بين ايديك
.ليلى: صافي نعول عليك !؟
ياسمين: غاندير مافجهدي.. ولي فالمكتاب مرحبا بيها ههه
ليلى: يالله هانا مشيت
شداتها بسرعة: اجي عنداك نقفروها فالخدمة!؟
ليلى: مسيو اوكوراي ماعرفتو فين غابر وزايدون لكافي قدام الشركة حتا الى دوا غانقولو ليه خرجنا غير هنا نشربو قهيوة.. مالنا مانرتاحوش شوية
ياسمين: صافي واخا
ليلى: هاهو جاي..بلاما نوصيك
ناضت بسرعة رجعات لبلاصتها وبركات، دارت نضاضرها وهزات المونو مغطية بيه وحاضياهم من بعيد كايدويو
........
حلات عليها حياة باب البيت ولقاتها لابسة جوايج الخروج وتتوجد ساكها باش تمشي للجامعة: على السلامة ياختي هههه
ردت متنهدة: الله يسلمك.. مابغيتش نكتر عليا الغياب
حياة: احسنما درتي وحتا الخروج غايوالم نفسيتك.. اه شوفي أمين راه لتحت جا باش يشوفك
شافت فيها بتفاجأ: بصح ؟ علاش
حياة: الله اعلم هبطي اختي وسوليه.. طلقي راسك راه حادة دابا تفيق وإلى مشات حتا شافتو خلات عليكم بجوج
فاطمة الزهرا: واخا واخا
هزات ساكها وخرجات لبسات سبرديلتها ولعندو هبطات.. لقاتو متكي على الحيط ضارب شوميز خفيفة فالبيض فوقها جاكيط جلدية بالمارو مع دجين كحل وسبرديلة بيضة تتشعل .. لبسات لمونطو ديالها وببسمة خفيفة توجهات لعندو وقالت
فاطمة الزهرا: صباح الخير
رد بضحكة عرييضة: اااصباح النور
عنقها وغمضات عيونها براحة لداك الحضن
..بعدها عليه بهدوء وشاف فيها بتمعن مصغر عينيه وقال: كي بقيتي ؟ شوية
قادات شعرها بحرج: الحمد لله
أمين: ملي لابسة يالله نمشيو نفطرو بجوج باش لبرانسيسة تقولينا مالها
ضحكات بهدوء: اوك يالله ياسمين: ومن بعد تلت شهور ديال السطاج تقدمت للخدمة وقبلوني.. والصراحة تقال خدمة زوينة والسالير حتا هو زوين وحتا مسيو انس كان ضريف معانا.. واخا دابا للأسف مشا لكندا حيت أصلا خدمتو بداها من تما.. ولكن خلا ولد خت مراتو والسيد بحالو فالكاراكتير تاهو إنسان عملي تبارك الله عليك
طلع سيمحمد ايدو للسيرفور وقال: كاارسووو
ضحكات ياسمين بحرج وقالت: ياك برزطت لك راسك هههه
سيمحمد: لا لا خودي راحتك
وقف عليه سيرفور وهو قال: خويا واحد قاصحة.. تكون قاااااصحة عافاك وحداها قرعة الما متلجة
السيرفور: هي اللولة المعلم
سيمحمد: الله يحفظك
ياسمين: ايوا فين خليتها هههه
طلع النفس وقال: فالباطرون
ياسمين: آه مسيو اوكوراي.. الصراحة إنسان عملي تايبغي الخدمة نييت.. وتاأنا مانشكرش لك راسي الخدمة لي دزت فيها كانخدم من نيتي وحتا ل............
خلاها داوية وواخدة راحتها فالكلام وهو هز تليفونو تايكتب ميساج.. واخا وجهو من الخارج تايوحي بالبرود لأن مافيه حتا تعبير على العصبية أو الغضب ولكن من لداخل تايغلي غليان حتا بغا يطرطق وليلى عاقت بيه ماهواش
.جمعات حجبانها وتتشوف فياسمين باشمئزاز وقالت
ليلى: هادي مالها بغات طجو.. ويلي ملي برك وهي كت كت كت كت سارطة كااسيط ولا مالها
وصلها ميساج وحلات التليفون لي عاد شعلات باش تسول مرة مرة على أحوال العمل.. لقات ميساجات من سيمحمد ومازال تايسيفط
"عقلي على هاد الستون"
"ناااري ونشد مك قسما بالله تانقسمك"
"شتي داك الشعر باش فرحانة غانتفو لختي زغبة زغبة غااابلاتي"
"ماحد هاد خيتي تاتبلبل وانا تانشغل علك بالله لادوزت لمك هااادي"
طلعات فيه الشوفة بوجه صفر وقالت: ويلي ياكما قفرتها ..
كتبات ليه ميساج وطلعات راسها كاتنفخ هي توسع عينيها بصدمة ملي بانت ليها فاطمة الزهرا و وراها أمين داخلين مع باب الكافي
ليلى: !!!!! اويلي..قفارت بركات وهو قدامها.. جات مقابلة مباشرة مع طبلة سيمحمد ووجهو قدام وجهها.. عكس ياسمين لي عاطياها بالضهر.. وأمين لي عاطيه هو بالضهر.. هي نزلات عينيها بهدوء متاتلفت لاهاكا لاهاكا .. وسيمحمد عينيه غير تايضورو لأنه مامرتاحش كل شوية يقلب وجهو لجهة ويخرج النفس حتا داز عليها بعينيه وبسرعة رجع شاف فيها بذهول.. وسع عينيه وشوية بشوية بدا يخنزر ملي شااف امين داوي مع السيرفور.. حس بدمو غلا ووجهو سخن و حمار.. ماقدرش يكمل فيهم الشوفة وهوما باركين تايضحكو.. أو على الأقل امين طالق البشرة وتايضحك وهي بابتسامتها الهادئة.. البنت لي عاد البارح كانت كادمع عليه هاهي قدامو ضاحكة ومرتاحة مع الراجل لي كاتبغي.. بغا يطج وحاس براسو غايتقج هز القرعة الما بالنترة حلها وبدا يشرب مغدد وياسمين سقلات على الكلام متعجبة من ملامحو لي فجأة تغيرات.. كلما شاف فيهم كايتزير ويحرك فراسو بحالا كايتحلف ويبركم مع راسو: ضحكي ضحكي مزيان.. نتي لي جا معاك الضحك "حط القرعة مغدد وقال" وانا كي البغل هاجرو
ياسمين: نعام.. بغلة.. أنا ؟
نفخ ماعندو خااطر وقال: لا اختي ماشي عليك تفكرت واحد البغلة عندها فالدرب
ياسمين: اااه هههه اوك ماعليش .. قوليا نتا عندك بنيتة صغيرة ياك؟
رد: ممم
عين قدامو وعين عندهم حاضي اش كايديرو.. وبالصدفة دار أمين تاايحك ودنو هي تلاقا عينيهم وشافو.. سيمحمد بسرعة قلب وجهو محاملش يدوي معاهم ولا يشوفوه.. فحين أن أمين برك تايحقق فيه ويتأكد حتا بدا يضحك وقال
أمين: هاداك ماشي سيمو !؟
ضرب قلبها وسرطات ريقها قائلة: فين ؟ "بدات ضور وتقلب وهو قال
أمين: هادا لي قدامك.. لي بارك مع دير الساطة مولات المونطو لبيض هههه هو ياك.. ولاهيلاا هو هههه
غوبشات تتشوف فيهم وقالت: شكون هاديك لي معاه
شاف فيها بخبت شاد الضحكة: نوضو نشدو فيه شوية هههه
ردت بارتباك تترمش فيهم ومعاجبهاش الحال: لا حشومة يقدر تكون شي خدمة
أمين ؛ آه الاخ تاياخد الطلبات من القهاوي هههه ولا يمكن تايوصل بنادم للقهوة ويبرك يتقهوا معاه هههههه
برك على الضحك وهي تنفسها تبعتر والفضول كلاها.. شوية بان ليها وقف وقالت بتوتر: فين غادي!!؟
أمين: غادي نسلم على صحيبي حشومة مانسلمش
ناضت: أنا جاية معاك سبقها وهي هزات ساكها تابعاه من اللور وعينها على البنت لي باركة مع سيمحمد.. ماحدها تتقرب وهي متايعجبهاش الحال.. مازال ماعرفاتها ولكن حسات براسها كرهاتها وماعجباتهاش نهائيا.. بحالا فيها شي حاجة لي مامخلياهاش ترتاح
أمين: سييمو
سيمحمد شمر بنيفو و بوجه بارد شاف فيهم وقال: وعليكم السلام
سلم عليه امين ضاحك وقال: السلام عليكم.. الأمور هانية؟.. دخلنا نتقهواو حتا بنتي لينا وقلت ضروووري نوض نسلم على صحيبي
حك جنب فمو وقال: ممم، مزيان.. "وجه كلامو لفاطمة الزهرا" ونتي؟
عينها كانت مغوبشة على ياسمين حتا سمعاتو وجه ليها الكلام عاد تلفتات ليهم مضهشرة ووقالت: ا اانا..جيت نسلم
سيمحمد: عليكم السلام.. صافي هادشي علاش جيتو؟
جرات كرسي منها لراسها و بركات مخلياهم غير تايشوفو وهي طلعات نيفها للسما وقالت: ايوا نفطرو معاكم ملي غير تتفطرو
نطق أمين تايضحك: اها..ياك هانية ابا سيمو
برك حدا فاطمة الزهراء وسيمحمد قال تايزفر ويبرد فراسو: كلشي ولا هاني، أنا لي شي حد داعي فيا هاد النهار
...
ليلى: !!!!! وييلي خلات.. هادو مالهم بركو مجموعين
سمعات تليفونها كايصوني جبداتو ولقات اسم"مسيو اوكوراي" قادات البركة وجاوبات فالحين بجدية واخا الخاطر مهانيش كلما شافت فالطبلة ديال سيمحمد وخايفة غير لاتنوض شي مدابزة
ليلى: الو وي مسيو
عصام: ليلى فينك
رمشات قائلة: شكون أنا.. ف ..فالقهوة
عصام: ديال الشركة !؟
ليلى: ا لا.. دابة مع الستريس والضغط ديال الخدمة هاد الأيام واليوم بالليل كاين الحفل.. بغيت نخوي راسي شوية وقلت علاش لي مانفطرش فقهيوة على برا ونريح اعصابي شوية باش نجدد الطاقة.. فهمتيني ياك
عصام: فهمتك..وهاد تجديد الطاقة ايمتا غايسالي حيت محتاج شي وتائق مهمة
ضربات طليلة على الطبلة وقالت متنهدة وحجبانها بقلق مجموعين: ماعرفتش امسيو.. بان ليا خاصني شحاال يالله نديفولا من هاد الخلعة لي راكباني
عصام: فينك ؟ اينا بلاصة
شافت سيمحمد غير حاضي أمين وفاطمة الزهرا بنظرات غير مريحة هي تنطق بعفوية: فمصيبة كحلة
عصام: نعام !!؟؟
تنفضات وقالت متداركة الوضع: ا زعما.. قهوة.. القهوة عندهم خايبة مداقها مرر ماتسرطوش مصيبة صافي.. أنا واحد ساعة ولا جوج إلى طولت ونكون تما واخا امسيو؟
عصام :ممم ..ونتي بوحدك تما
ليلى: بوووحدي