#ياريت..يَارَيْتَ أخطاأنا في لحظة طيش كانت كابوساً منه نستفيق ونتعلم.. نبتسم ونتجنب الوقوع به ..نتجنب خسارة أناس كانو الأقرب إلى القلب.. نتجنب خسارة طهارة أرواحنا وصفائها ..ياريتنا علمنا حجم الخسارة.. قبل الوقوع في الخسارة ..يَارَيْت
***تنهد.. وهو رجل خمسيني ذو ملامح طيبة ونترات من الصرامة والصلابة.. واضح عليه الرقي والفخامة من ملابسو الأنيقة و وجهو لي صافي من أية لحية، داير نظارات طبية بإطار مربع، أصلع من وسط راسو فقط والجوانب مكسية بالشعر.. شاد الفولون بيد وشمس حارة ضاربة فالزجاج الأمامي من سيارتو الفاخرة.. هز كلينيكس مسح جبهتو وعينيه تايضورو بحيرة من أمرو حتا قال بصوتو الخشن: ماعرفتش.. حرت مع هاد البنت وقريب تخرج ليا العقل.. مابقيت عارف شنو ندير معاها
وصلو الرد من الهاتف لي داير ليه مكبر الصوت وتكلمات امرأة بصوت انتوي هاادئ: فين نتا دابة؟ قدام الجامعة ديالها؟
رد محول نظرو لباب الجامعة: آه، تانتسناها تخرج.. غاندوي معاها مرة خرا على الله تكون دارت عقلها اما البارح شيباتني، بحالا هاضر مع حييط
ردت بصوت انتوي خفيف: صافي خليها براحتها ا أنس.. هاد الشهر كامل ونتا كل نهار نفس لكلام، واش هاد الجيل تايتفرض عليه شي حاجة؟ مايمكنش تجرها من رجلها وتقوليها زيدي ورايا أنا باباك ومفروض عليك طيعيني
رد بانفعال: وشنوو الحل..نخليها هنا فالمغرب؟ عوض ماتفكر فمستقبلها وتمشي تقرا فبلاد احسن وفظروف أحسن ..قالت لك باغا تبقاا هناا ومستحيل تمشي دابة هادي شنو ندير معاها
خولة: أنس تهدن احبيبة غايطلع لك طونسيو عاود.. حنا شنو عندنا غلا من صحتك تهدن عافاك.. كان بودي نعاونك ونقنعوها بزوج مي نتا عارف عندها حساسية مني من نهار تزوجنا
رجع تنهد بندم وقال: لا حول ولا قوة إلا بالله.. الغلط ديالي من الأول اخولة.. انا لي تخليت على بنتي النهار اللول وقصحت قلبها من جيهتي.. انا الغالط حتا ولات هاد الفجوة بيناتنا....
قاطعاتو قائلة: اانس سيلتوبلي باراكة ماتلوم فراسك وتجبد هاد سوجي مرة خرا.. بنتك لي راسها قاسح وسمح ليا على هاد الهضرة مي زادت فيه.. عطا الله البنات لي كبرو بلا واليديهم عادي ومنهم انا.. ياك عارف بابا كان سيفطني نكمل قرايتي فلبيلجيك وشوف هاأنا معاك دابة مابيا والو.. بالعكس عتامدت على راسي وتقوات شخصيتي كتر ..بلا قوة الفشوش عاود
رد بجدية: نتي باباك ماسيفطك تقراي حتا كبرتي واستوعبتي القرار لي خدا.. أما أنا... "تنهد وقال بصعوبة" أنا خليت بنتي لحمة صغيرة عاد ماتت مها وهربت لكندا "سرط ريقو بقهر.. قاصح عليه يعتارف بالخطيئة لي دار وبقات مرافقاه طول عمرو" كونما الواليدة لي رباتها كون علم الله كيف كنت غانلقا بنتي.. كنت طايش أخولة.. طايش وتانغلط بلاما نضرب حساب لغدا.. ياريت يرجع الوقت اللور، ياريت.. كون صلحت بزااف الأمور بلاصة مانخلص غالي
خولة: فاش تتجبد هاد الموضوع تتمرض راسك وصافي ا شيغي ..ڤغيمون زدتي فيه ووليتي حساس كتر من القياس..
رد بسهوة: مايحتاجش نجبدو باش عاد نتفكرو.. الماضي ديما تابعني ..وعمري نتهنا منو ولا نسامح راسي
خولة: هاد الهضرة ماشي ديال طليفون.. ترجع للدار وندويو اوكي شيغي
حرك راسو متنهد: واخا
خولة: يالله بون كوغاج
قطع مطلع تنهيدة من صدرو.. عيونو المكمشة ورا نظاراتو الطيبة تتبان براقة بالندم.. بالحسرة.. تلفت صدفة لباب الجامعة تايرمش ويمطمط فمو بترقب حتا بانت ليه خارجة وسط الطلبة.. وحيدة ..الليزيات فودنيها وتتمر جانب كل كليكة خارجة تاتعاود وضحك مع صحابها.. إلا هي.. مميزة عليهم بوحدتها وحتا ملابسها البسييطة جدا عكس رقي ملابس الطلاب لخرين.. تيشورت بيض مدخلاه وسط دجين زرق ناصع فوقهم شوميز مربعات بالاحمر والأسود مع سبرديلة بيضة.. ملابس هادئة بحال ملامحها الناعمة.. مميزة بعيونها الحوراء ورموشها العالية لي قليل فين تترمش بيهم.. وبالرغم من برائة وجهها وقتما هزات عيونها تتلمح فيهم الحدة والصلابة.. تتشوف قدامها فقط وأحيانا تحتها حتا سمعات التزمار ودورات عينيها للصوت شافت الطموبيل ووقفات مدة تتشوف فيه.. عاد لعندو مشات ..فحين هو حااول يتبسم فاش طلعات حداه وقال
أنس: السلام عليكم ههه مفاجأة ولا لا
باستو فحنكو وحيدات ليزيات تاديرهم فساكها وقالت ببحة خفيفة: السلام ..مايسحابليش غاتجي نتا توصلني
ديمارا وقال مبسم بحنية: باغي شوية الوقت مع بنتي ..ولا ماشي ممكن
كتافات ببسمة خفيفة وتلفتات للطريق: فين نمشيو..للدار ؟
أنس: لا.. غانتغدا مع بنتي برا اليوم
ردت ببرود: الجو خايب.. حتال مرة خرا تنهد: علاش مال ابنتي الجو.. الشمش هي هاديك والسما صافية الحمد لله
ردت: نتا عارف هاد الحرارة متانرتاحش فيها
رد: خاصك تبداي تخرجي شوية تبدلي الجو.. ماعرفت كيفاش غايهنا بالي عليك والله ماعرفت
كانت غاتكلم وتقول أول حاجة جات فراسها لكن تراجعات.. مابغاتش تجرحو وقالت بصيغة أخرى: دوينا فهادشي ابابا.. وهاديك راها جداتي ماشي شي حد لي براني ولا لا.. هاانا معاها حتا نكمل قرايتي ونتا كلما توحشتيني اجي لعندي
رد بغير رضا: جداتك باقا فنفس الدرب لي تزادت فيه.. حتا هي راسها قصح من راسك.. كون قبلات تسكن فالفيلا ديالنا على الأقل نخليك معاها ماشي مشكل.. ولكن بنتي تسكن فداك الدرب!!!
ردت بلاما تشوف جيهتو: داك الدرب انا تربيت فيه ..وفيه وليت هاكدا ..الموأى ماشي هو البلاصة لي تانتزادو فيها .. الموأى هو البلاصة لي تترتاح ليه قلوبنا وتانحسو بروحنا فيها استقرت ابابا
شاف فيها لبرهة مبتاسم وقال باستغراب: كيفاش مدايراش الصحاب.. ماعرفتش؟ كون انا من هادوك لي تايقراو معاك مانفلتش صديقة بحالك
رمشات تتشوف فالسرجم: هاكدا مرتاحة
أنس: الالة آمنا بالله ...يالله نزلي
دار لي فراسو وهبطو قدام واحد من الريسطويات ديالو "Anis".. دخلو سابقاه للطبلة لي مولفين يبركو فيها.. كل مرة وشنو.. مرة مجموعين.. باباها ومراتو وبنت مراتو وهي.. مرة هي وباباها فقط، لكن عمرها خرجات تتغدا فيه بوحدها ..بركات تتحط ساكها وخدات شنو بغات وتتسنا باباها بيما تفقد الأوضاع ودوا مع الجيغون عاد رجع وبركو على الكلام ..او بالاحرى هو لي تايهضر بزاف.. كلامها قليل وحتا جوابها أقل ..بريئة فملامحها هادئة فكلامها وتصرفاتها وتتسها بزاف ..الشي لي مخليها ديما تفضل الوحدة.. صعيب تلقا كاراكتير تايشبه ليها، أو على الأقل يتحمل طينتها والطبع لي هي فيه ففيلا راقية بمحادات البحر.. ألوان جدرانها هادئة بين الازرق والگري فاتح واتاتها فخم كلو عصري..من بينهم صالون صغير مقابل مع الباب جالسة عليه بنت صغيرة تترسم الملونات فوق الطبلة والكاسك فودنيها تتمزك بيه.. مشافتش الباب لي حلاتو الخدامة ونحانات باحترام.. دخلات البنت مخلية وراها باباها أنس عاد هبط من الطموبيل فحين من المطبخ خرجات سيدة دو ملامح جميلة شعر قصير أشقر وملابس ممزوجة بين الرقي والجرأة ..فستان اسود فوق الركبة مع طالون طويل ومكياخ خفيف جاي مع شعرها الأشقر ..شافتها وتبسمات قائلة: فاتي بونجوغ.. فين باباك ؟
قالت وهي طالعة مع الدروج: هاهو داخل
قلباات عينيها وبكل انوتة ضارت للصالون فين باركة بنتها ، جمعات ليها الكتاب وقالت بعدما البنت حيدات لكاسك باستغراب: جوديا.. طلعي اماما لبيتك ورسمي يالله
ردت بتذمر: مي ماما..
خنزرات بصرامة: قلت طلعي.. آلي. ..
نفخات وتمات طالعة أما هي بركات رجل على رجل تتعيط:.. عائشة.. جيبي لينا قهوة أنا وأنس
رد داخل مع الباب تايحيد الڤيسط بتعب: هي نيت لي محتاج
ناضت سلمات عليه: على السلامة احبيبة
أنس: الله يسلمك
خولة: تسنيناك للغدا..مي ماعليش.. على الله الخرجة تكون جابت نتيجة.. قنعتيها؟
رد بقلق : لا، ماعاودش جبدت معاها الموضوع ..صافي كيف قلتي نتي خليها براحتها.. بغات تبقا هنا تبقا.. بغات تمشي تمشي
شدات ايدو مبسمة بسعادة: تيق بيا هادا هو القرار الصائب.. وماتعرف تحس بغيابك وتعرف قيمتك فحياتها شحال كبيرة؟
ضحك بسخرية وقال: ممم ..بصح
خولة: بنتك كبيرة وقادة براسها اانس ماتشغلش بالك
أنس: مشاغلانيش هي هاد الساعة.. شاغلاني مي وداك الدرب فين ساكنة.. خليها على الله وصافي
ردت مستغربة: ماماك واخا شفتها مرة وحدة طيلة زواجنا ولكن.. باينة فيها وقورة وسكوتية.. شي وحدة لي بعقلها زعمت
طلع حاجب وضحك باستهزاء .. فحين فالطرف الآخر.. الطرف المناقض والمتناقض مع البيئة لي فيها ساكن أنس.. بيئة شعبية بامتياز.. ديور بسااط قليل لي فيهم مسبغة اما الباقي مدوز على حيوطها غير الجير وماتبقا مقشرة فيهم السباغة.. خيوط النشير قدام كل باب عامر ببيجامات ستمية دريال وحوايج البال صبن وعاود ..الممرات ضيقة وشي داخل عند شي.. الجورة أهم حاجة عندهم وكلمة دخل سوق راسك ماعندهمش .. دراري لاعبين البي والكورة حوايجهم گاع ممردة بالتراب و لبنات مجموعات على شريطة ولاستيك وكل شوية تنوض المناتفة بيناتهم ولي سمعاتها مها لولة طل من السرجم وتبدا تبرح. حلييمة.. وجمعي بنتك شووفي على حاالة دارت لبنتي ..ااشوفي ياااه لاماربيتيهااش تي ياانا نهبط لييها
كلام العيب هادا الضااوية ماالنا شكااين الدراري غير درااري تايلعبو وصااافي
تي واش بنتك قد اللعب ساقطة تلت سنين فالتاسعة وتتخرج تفرشخ لينا الدرااري
ايييوا جمعي فمك وحدك تممممم ادييك السليعفااانة
بلا بلا من هنا ومن لهيه وحدة تعطي للخرا البنات لي تناتفو وعلى ودهم ناض المشكل تصاالحو وكملو لعبهم وهوما مازال فالمعاطية ..وماشي بعيد عليهم بزاف.. فواحد الدار شوكة بحالها بحال كاع الديور.. لكن أتاتها من لداخل فخم وعاطي للعين.. باركة مرا كبيرة فالصالون الصغير عاقدة زيف حياتي وشيباتها منو خارجين.. مربعة رجليها و سادة عينيها ووشمة خضرة فجبهتها المكمشة وتحت فمها.. لابسة بيجامة طوييلة فالزرق منقطة بالحمر فيدها تلاتة الدبالج ديال الدهب وقدامها طبلة مفرقة عليها لكارطة وحوالين الصالون باركين ربعة العيالات، وحدة منهم حداها باركة عينها زرقة وغير تتبكي وتمسح بزيفها.. حلات الشارفة عينيها المكمشين بحدة تنتفخ وشافت فيها : واباراكة سكتيناا شوية من التنخصيص تلفتيني
ردت البنت لي مزرقة ليها العين بصوت مرعود: واخا واخا امي حادة.. اش بان لك
مي حادة: هممم.. طبلة المخزن هنا بااينة.. ياغادخلي للحبس.. ياهو غايدخل "شافت فيها عاقدة دوك الحجبان ووجهها كلو مكمش" عرفتي شديري.. نوضي تي دعي والدين.. كوني مرااا ولالة وماالي خلييه يتشواا فالحبااساات باش يتعلم يمد علك ايدو
ضربات البنت فخاضها وقالت: اناااري على ندعيه.. ويلا دعيتو امي حادة ماغايردنيش
جبدات حنكها مصدومة: يرداااك.. ويلي الشيطاان على باقي عد بوك الوجه لي يرجع ليه.. مخلط ليك ديك الكمارة يالمديليلة وباغا ترجعي عدو ؟؟؟
ردت تاتمتم: و و وامي حادة راه كان شارب
ردت مخسرة سيفتها: تشربي بوزبابالي ياعيقة العياالات ..هي هوك علاش جاايااا عدي ناوية ترجعي عدو يزوق لك العين لخرا .. نوضي.. نووووضي غانوض ليك نووووضي العيالات لي كانو حداها باركات وطامعات حتا حتا هوما فتشوافيت ديالها، ناضو تايفكو ويبردوها ويطفيو الغضب حسن لاتسوط فيهم كاملين.. حادة ياحادة.. الى مشات تاشعلات تاتولي سيف دو حدين ..تاطلع على نقشة وصعيب طفا بحال شي تلفازة فيها تشاش تتضر فالودنين ولي جات حداها تشير بيها.. البنت حداها طلب وتزاوب هي أملها الوحيد باش راجلها يرجع معاها للطريق حيت حادة سيرتها عند گاع العيالات ..تتلعب الكارطة باش توهمهم ويتيقو فيها.. ساعة هي تتلعب بالكلام وتقلع المشكل من جدرو وتوريهم الحل بلا سحور بلا جوج..مرا داااية وجايبة فالزمان ماعزيزش عليها قوة اللغا والى واعدات تتوفي.. بركوها معصبة بعدما جراات على البنت وناضت وحدة جابت ليها الما وعطاتو ليها : هاكي امي حادة شربي وبردي السووق
ردت حادة تتلهت: خزييت.. قلة النفس وريحة الدل خنزاات ليا ماحاالي.. "هزات صباعها عليهم تتحلف" ياااوالله و لله لي ليه الحق وتعود تجي عدي شي مهتوكة تاتعطعط بالدل تانجفف بباباها هاد المكان
نغزات وحدة فيهم صحيبتها وقالت بهمس تتميق: بقا ليها شبر للقبر وشوفي الجهد لي عندها دابة.. داك العكاز عدها تقيل دور بيه غير تاتشعل تاتلوحو وتولي لك كي العودة
ضارت ليها حادة كي النمس مخرجة عينيها هي تنفض المرا لي ماظناتش غاتسمعها
حادة: شگللللتي ابنت كلتووووم
صفرات الضحكة تاتمتم: و والو امي حادة ويلي هههه اش غانقول الله يهدي ماخلق وصافي.. م ماديش عليها مسكينة هادا حال العيالات نص عقل
قالت وحدة خرا: مي حادة عافاك لاما بردي و شوقي ليا معاك غاراضي ايمتا يتقضا
نهضات فيها تاهي: تي مالكي ماالكي غاتتنقزي صبري على خبزتك.. استغرت الله العظيم.. زايدون ياك واكلة شاربة مخرجك مساريك مال باباك تتقلبي على خلاك
ردت تادمع: امي حادة راشااكة فيه تايخوني ..الراجل هزيتي واحد وحطيتي واحد يقيل هاز المشقوف مافهمت فيه والو ..البووشتا مابقاش كيكاان امي حادة بدا يتبدل عليا
ضمات ايديها تتعوجها: بدا يتبدل عليا.. خليكم بالخلا
ردت: عافاك امي حادة ماعاونيني غير هاد المرة عافاك
نفخات حادة هازة فيها حاجب وقالت: درتي لي قلت لك ديك الخطرة
ردت: درتو كاامل وديما منقية راسي ودااري وعمري مازال قلت ليه فين كتي ولا منين جيتي وتالمشقووف مابقيتش نقرب ليه ..ولايني قلبي وااكلني امي حادة مابقيتش قادة نصبر
حادة: ااااوالله ابنتي وماصبرتي لاطفرتيه ..سيري سيري لمحالك التلات إن شاء الله يتقضا الغراص
حلات عينيها بفرح: بصح امي حادة.. هههه سييييري الله يخلي لييييك ولييييدك الله يطوووول ليييييك فالعمممر الله...
غوتات عليها: وااا الله يلگيها لك سكتي من التبرااح "تحنات البنت باست ليها يدها وخرجات تاضحك.. فحين حادة ضارت للعيالات عاقدة حجبانها وقالت مخسرة سيفتها" نوضو توما تال من بعد ورجعو عدي ..راسي قلباتو ليا ديك مزغوبة ليام الله ياربي الحبيب ..شتكم سايرين تشوفو فياا؟
ناضو ساكتات واخا ماعاجبهم حال تاوحدة مادوات بحرف.. زادو مع الدروج وحدة وحدة ومع حلو الباب تلاقاو ببنت عاد مدات الساروت تحلو.. بنت فاواخر العشرينات ملامحها زوينين وسابغة شعرها بالصفر لابسة جلابة زرقة مخزانية وبلغة وهازة گفة فيها الخضرة وقبطة الربيع فالقنت تاطل ..بداو العيالات يدوزو من حداها ويسلمو عليها وحدة ورا وحدة: كيف دايرة احياة بيخير
حياة: الحمد لله.. مال مي صوتها تايتسمع من راس الدرب شوقع تاني؟
قالت وحدة فيهم: ساعة لله غاعصباتها بنت تورية وخلاص ..الله يعاون
حياة: الله يعاون
سدات الباب ودخلات تتبرگم فالدروج معاجبها حال: حنا مانرتاحوش والو غاوحدة داخلة وحدة خارجة.. ميي.. ااامي فينك خرجات حادة من واحد البيت تاتنزل جلابتها لي تتعقل على عام الفيل.. الزيف لي كانت عاقداه اللور رداتو القدام وعقداتو عند العنق وفيدها هازة عكازها.. شافتها حياة لي بدات تحيد جلابتها وقالت مطلعة حاجب
حياة: فين غادة وانا عاد دخلت؟
حادة: نضبي الطاجين هانا جاية
حياة: وفين بالسلامة
هزات العكاز فوجهها تاكانت غاتعورها: تي واش انا لي مك ولا تي
حياة: واغاسولت امي
خنزرات فيها: حيدي من البااب وماتحلي لحد .. ارسول الله
نزلات من الدروج درجة درجة بشوية عليها وتتوجع من الم المفاصل حتا خرجات من باب الدار حانية داك الضهر تتشور بعكازها ومخنزرة فلي مشا وجا.. كلشي تايعرفها فداك الدرب ،صغار وكبار بنات وصبيان ولي داز يبوس ليها الراس احتراما ليها.. .. حتا من الحيوط والشجر والحجر عارفها شكون هي حادة بنت الحاج المقندر.. مات المقندر وبقات بنتو عندها وزن فداك الدرب..شحال من مرا ولدات وشحال من مشكل فكات ولي هاز هم شي حاجة تايقصد باب دارها ..لي مدايز مع شي حد ولي واحل حقو عند شي ولي ظالمو شي .. كلشي عارف دار حادة بنت المقندر فين جات وعارف بابها مايتسدش فوجهو خاصو غير يعطيها الخاطر ومايعصبهاش..
دازت على العيالات لي مازال مدابزات كل وحدة من شرجمها.. غير شافوها ضربو الطم وحدة دارت راسها تتقاد محابقها ولخرا دارت راسها تتعيط لولدها حتا دازت وفاتتهم عاد كملو المعاطية ..وصلاات لواحد الساحة فين تايتجمعو الدراري المراهقين.. غمزات لواحد فيهم عندو جهد خمسطاش لعام ..رقييق وقصير تايطير مع الطيور وصل عندها ضاحك من الودن للودن باس يدها وقال: مي حادة توحشناك
لمطات فمها هازة حاجب: ممم توحشتيني ولا توحشتي التدويرات العفيريت
ضحك الولد حشمان فحين هي شافت هنا وهنا عاد جبدات الف ريال عطاتها ليه مكمشة وقالت مصغرة وعين حالاها..
حادة: البوشتة راجل ربيعة
رد الولد بانتباه: مالو امي حادة
ردت:. نبغي نعرف فين تايمشي. فين تايجي معامن.. معامن تايبرك معامن تايقيل يهضر ..سلييبو شمن لون جبدو ليا
رد تايخشي الفلوس فجيبو: حسبي خبارو عدك امي حادة كوني هانية
حادة: الله يرضي عليك ..اجي هنا باقي ماساليت ..المهيدي فالقهوى؟
رد: راجل تورية؟ راه لاعب الضاما تما مع ولاد الدرب
خنزرات تتهز فراسها: مممم.. واسير سير قضي ليا الشغل وغدا نلقا الخبار عدي
رد: كوني هانية
ضربها جرية وحدة فحين هي قلبات الضورة هي وعكازها للقهوة الشعبية ديال الدرب ..وقفات برا مصغرة عينيها وتتركز فالرجال حيت قلال ليها الشوف حتا لقات لي عليه تتقلب وعليه نيشات.. گفضات كمام جلابتها وتمات داخلة قاصداه ماجا يضور حتا جراتو من الكول بعكاازها طيحاتو من الكرسي وگاع لي كان خايب باركين وقفو
.غوت مصدوم وضار شافها واقفة عليه كيف ملك الموت هو يصفار وبدا يتمتم: مي حادة
خرجات فيه عينيها كي السم وهزات العكاز مستعدة للهجوم: يحدووها لك "مع كملاتها بوقلاتو للراس وبدات تعطيه وهو تايقفز والرجال تتفرج وتضحك متايجي ينوض حتا تاتعاود تزلقو وتعطيه
حادة: هاالي يضرب العياالات.. هااالي مايعرف يترجل ..هاالي يحگر الوليااات هاا.. هاااا
بدا يغوت ويطاكي على وجهو: وا ..وااااعتقووني.. وامي حادة العااار
حادة: مزرق لييها العيين حيت ولية ..هاااك لباااباااك.. فاش بغيتيها جاي عدي تبكي مي حادة انا غايتيم يالله خطبيهاا ليا..هاااك شد لواالدييك.. و داابة رديتيهاا جفااف ..ادوي ..ولينا درااري درووك.. زيد لهنااا فييين غااادي تتحبو
رد: هالعار امي حادة الشيطاان الشييطان اااي امي حادة.. والله غا ملي تانشرب ماانعقلش العار امي حادة
حادة: تاناا ملي متانشربش دوايا متانعقلش.. غانتا ضرب وانا نضرب حتا نشوفووو.. شكون يعيا واش انااا.. ولا تااا
حبسات تتنهج وهو تايبردها ويتنخصص: والله اباباك وماديتي الدبيحة بگرونها وحلفتي ليها فباب جامع ماتعاود تقيسها لارجعتها لك.. سمعتي المهيدي
رد:س سمعت سمعت
حادة: رجلة آخر الزماان..
زادت بعكازها تتنگر طايرة ليها النقشة وتتهضر مع راسها حتا بدا تليفونها يصوني فجيب بيجاتها الدخلانية.. طلعات الجلابة حتا جبداتو مصغرة عينيها فالنمرة حتا قراتها ووسعاتهم مزياان عاد ضحكاات ووركات على البطونة الخضرة دايراه فودنها
حادة: االو وليدي.. الو حبييبي.. سعدي فرحي وليدي تفكرني.. هااا.. فين؟ .. جاااي عدي؟ "بدات تمحي البسمة وقالت" ماالها اااحي.. تااقول ماال بنيتي كبيدتي.. جاية معااك؟ انااري تاقول شكااين ..واخا وااخا ..قطع قطع تاتوصل
قطعات تتخم وتبركم مع مخها.. دازت من حدا واحد طاكسي تايمسح فيها شاب فأول التلاتينات ..شاب نقي من لباسو ووجهو.. شعر اسود كيف الليل كتيف وملامح وسيمة خشنة.. لابس دجين وتيشورت فالارونج وسبرديلة عادية.. حداه سطل ديال الما تايعصر الشيفون ويمسح فالطاكسي ديالو حتا دازت من حداه حادة شافها وقال ببسمة خفيفة وبحة رجولية قاصحة: مي حادة شخبارك.. مي حادة !!
مجاوباتوش وماسمعاتش اش قال غير غادة وتخمم بوحدها ..حرك راسو يمين شمال مولفينها حال واحوال وكمل المسيح بكل تركيز.. حتا خرجات من الدار لي مقابلة مع دارو بنت صغر منو بسنوات قليلة.. جميلة وحلوة بشعر بني لامع مقطعة ليه الگصيصة لي زادتها برائة وحلاوة.. ابتسامتها جدابة ونازلة تاضحك فالتليفون بفيسط ارونج مع سروالها توب عريض وبودي أبيض خاشياه وسط السروال وهازة بوشيط فيد والطالون فاليد لخرا بينما فاتت الدرب عاد تحيد السبرديلة وتلبسو.. شافت الطاكسي وضحكات قائلة: الله على زهر عندي هاد الصباح ..ضربات فكتف الشاب وقالت صباح النور
.
رد بلاما فيها يشوف و تايكمل شغالو : صباح النور.. مالك غاتاتكركي على الصباح
رمات شعرها اللور تاضحك وتغنج فكلامها: كيتك نتا لي غير عااقدهمم هههه
رد: آش تما؟
قالت وهي كلها حماس وطاقة: غادة ندوز اونتخوتيان فواحد الشركة قد السسسخط هههه.. عرفتي اخوياا الى مشيت حتا تقبلت باي باي درب المزاليط هههه
بجنب فمو تبسم وحط الشيفون فالسطل ..دخلو لدارهم وهز فوطة تايمسح بيها وحداها طلع: ياك عاد لقيتي خدمة السيمانة لي فاتت.. معامن دابزتي تاني
تنهدات ليلى تاتميق وتقاد گصتها فالمراية: اشمن خدمة ااودي.. مابقا معقول فالدنيا.. انا عينيا فالخدمة وبنادم استغلالي الله ينعلو ويخزيه
حبس تايشوف فيها وزااد فحدة تخنزيرتو: شناهوا.. شكون هادا لي استغلالي ؟؟
رمشات بتردد تتحرك كتفها وقالت: داكشي فات صافي وعليها أصلا خرجت .. خليهم يربحو بيها ديك الشركة بصحتهم
سد ليها المراية وقال مزير سنانو: شتي كترة الزواق شتايجيب وكركر لهادا وهاادا ..وابقاي ضسري علك بنادم تايطلع لك فوق الرااس "سقلات وهو ديمارا مخنزر وقال" المرة الجاية يضور بيك شي حد زيدي قوليها ليا ..ولا سطحي ديييل مو حتا يضور
عنقات ايدو فرحانة بيه: يخليلي خوها الابضااي هههه غاشفتيني انا سااهلة ليييهم .. عفط عفط عافاك اسيمو مجاتش نتعطل من النهار اللول
خرج من الممرات ديال الدرب وكيف فاتو لمح قدامو سيارة قاصدة طريق الدرب.. سيارة رباعية الدفع باينة فيها ساوية ووازنة تتبري من المطريكيل ديالها
نطقات ليلى مطلعة حاجب بانبهار وقالت: واي وااي.. الزااز عندنا فالدرب ولا ااش؟ شكون هادو؟
مجاوبش وماتسوقش، بقا بملامحو الباردة فقط ولأن الطريق شوية ضيقة حبس ووقف فالجنب مخليها دوز هي اللولة ببطئ وعيون ليلى بفضول كايختارقو زجاج السيارة.. حتا لمحات البنت لي باركة اللور دايرة ليزيات فودنيها وشعرها الاشقر مطلوق ومخبي النص فوجهها لكن مع دالك قشعاتها دغيا شكون وقالت بشهقة مصدوومة حتا سمعها خوها
ليلى: فاطمة الزهراا !!! ولااهيلا هياا.. "ضارت عندو هو لي جمد بلاصتو فاش سمع الإسم.. بؤبؤ عينيه توسع وحجبانو ترخاو تايسمع ليلى تتكلم بعفوية وحاضية الطموبيل من اللور
ليلى: هياا فاطمة الزهرا بنت عمو أنس.. ..واش رجعات للدرب ولا شنو؟
ضور وجهو اللور بلهفة حاول يتحكم فيها تايشوف فالطموبيل ويرمش بتقالة.. شافتو ختو فديك الحالة وجمعات فمها ساكتة معاودش هضرات.. مرة تشوف فيه مرة فالطموبيل حتا غبرات وسط الدرب عاد ضار تايحنحن سااكت وسكتات تاهي تتشوف فيه بنص عين
ليلى: عقلتي عليها بعدا ماعندي مايتسالك
زاد فالسرعة عاقدهم وقال: فين نحطك؟
تنهدات تتشوف فيه شارد واخا تايتكلم وقالت مغيرة الموضوع: الحي الصناعي ..ودعي مع ختك هاد المرة تزدق ليا الخدمة
سي محمد: اللهم يسر.. ردي البال لراسك والى كانت شي حاجة عيطي ليا
ليلى: اووكي
.
أخيرا.. رجعت للأصل.. لفين تانرتاح ولي فيه حليت عينيا.. رجعت لدربنا اأمين.. الدرب لي لاقاني بيك النهار الأول ولي فيه جمعنا دكريات زوينة مجموعين ..انا.. ونتا.. وحتا لخرين.. واخا كنت كانتفاهم معاك غير نتا بوحدك.. الى كنتي غاتسولني على بابا ..فاهو غايمشي مع مراتو وبنتها لكندا..فايت قلت ليك بلي واخا عشر سنين باش رجع للمغرب ماقدرش يولف.. عارفة على ودي صبر هاد المدة كاملة وبقا غادي جاي من كندا للمغرب.. ولكن دابة قرر يستاقر تما حيت خدمتو كاملة تما فين كاينة..ماعليش.. على الأقل دابة ماشي بحال أول مرة.. فاش حليت عينيا فالدنيا ولقيت جداتي وعمتي بوحدهم لي معايا.. ماعمري شفتو ولا عرفتو حتا طلعت للكوليج.. على الأقل دابة طلبني باش نمشي.. وبإرادتي أنا خلاني نبقا فدربنا القديم.. على الأقل القرار كان ديالي.. ماشي بحال فاش مشا أول مرة بلا حتا مياخد رأيي
..توحشت دربنا اأمين.. عمري قدرت نتوالف مع العالم الجديد لي مشيت ليه.. أنا كانسميه عالم.. حيت عالم آآخر فعلا.. نتا عارف طبعي مزيان.. بالحق حتا واحد تما مافهمو.. وباش نتجنب قوة الكلام عليا سديت عليهم الباب وكتفيت بالوحدة ديالي.. هاكدا حسن.. الوحدة ماشي خايبة ابدا كيف كايعاودو عليها.. الوحدة حسن ماترافق المتصنعين والمنافقين والكدابين لي شفت فداك العالم.. والأمور غاتتحسن كتر هنا فالدرب.. انا كانتكتب ليك من السطح ديال دارنا.. دار مي حادة لي متاتفاهمش معاك وماتتحملش فيك الشعرة ههه.. تانكنتب ليك كلام من قلبي.. كلام نتا مغاتقراهش.. توحشت هاد النسمة دالجو.. توحشت دكرياتي هنا.. وتوحشت.. توحشتك.. بزاف
حياة: فااتي فينك
سدات المدكرة بهدوء وتلفتات ببسمتها الجميلة عند حياة لي داخلة مع باب السطح مغطية جبهتها من الشمس ويد على خصرها
حياة: تي هنا وانا كانقلب دار كاملة ههه
ردت بنفس الابتسامة: طلعت شوية وصافي.. توحشت سطحنا
حياة: حتا هو غايكون توحشك ههه.. واهبطي الزين ديالي راحطينا الغدا
فاطمة الزهراء: اوك
هبطات رجيلاتها الناعمة من الكرسي وحياة واقفة تتسناها وتاطلع فيها وتنزل..هاد البنت زينها مختالف.. زينها مزيج بين المغربي والاوروبي بحكم زعوريتها وخضورية عينيها عاد لحمها البيض الصافي.. حركاتها انتوية هادئة بحال كلامها ..متاتبانش نهائيا أنها وحدة من بنات درب المزاليط ..باينة فيها ريحة الفلوس واخا لباسها البساطة منو تتقطر ومتواضعة جدا ..حياة زادت تبسمات ليها ملي فاتتها وهبطو بجوج لدار.. قصدو نيشان الكوزينة لي جات حدا الصالون فين باركين لخرين.. الصالون الكبير لي متاتحلو حادة غير لولدها ولا لشي شخصية نييت ..متول ومأنتك فرشاتو بالشهوة والتاويل.. وفالقنت كانت باركة هازة تسبيحها ولابسة قميس بالبيض وفولار بيض وراسها شوية حانياه ..تتبان حنييينة وكاالم هاد المرة ماتهز الدجاجة على بيضتها.. قدامها ولدها بارك مرة يشوف فيها مرة فالدار ويتنهد وحداه خولة لاسقة فيه وحاطة رجل على رجل.. سيقانها عريانين بسبب فستانها الارونج بالكمان وعالي حتال العنق.. ملات داك السكات وبدات غير طلع النفس وتهبطها.. سالات كلمات الصواب كاملين ملي عاد دخلو قالت گاع داكشي لي تايتقال ومازعماتش تزيد تهضر قدام حادة.. جاتها فشكل انها تبقا غير ساكتة بلا كلمة بلا زوج قدام عگوزها لي هادي تاني مرة تشوفها هي تحنا على ودن أنس وقالت بتذمر
خولة: واش غانبقاو هاكدا.. ساعة وحنا غير باركين لاكلمة لازوج
قال بهمس عاقدهم: وشنو بغيتي ندير
خولة: وا.. اففف.. ماماك علاش غير ساكتة ..على الأقل تدويو شوية ماشي سكات سكات سكات جاتني غمة على قلبي
أنس: شفتي مي.. الى مشات حتا هضرات غاتقولي كون غير بقات ساكتة حسن.. اللهم خليها فراحتها
نفخات بضيق: يااربي.. "بدات تنش على راسها وشوية شافت فحادة وقالت ببسمة مترددة" اا خالتي.. ماعندكمش الكليما ؟ الجو حار عندكم هنا فالدرب الصهد بزاف ههه
حادة وهي على حالها قالت تتنهد بحصرة: اييه ابنتي.. هادا حال الدنيا وهادا حال البشر.. تايخنقو حر الشمش.. ومتايخممش لحر جهنام لي تاتغلي بالكاسيات العاريات والمنافقات
أنس زير عينيه وخولة تبلوكات ليها الضحكة وشافت فأنس مجروحة ومامتيقاش لي سمعات: م ن ماماك تاتدوي عليا.. انا؟ رد تالف ماعرفت مايقول: لا لا.. ااا..ماقصداتش غير فهمتي غالط ..احم مي.. "حاول يبدل الموضوع وقال ببسمة راسمها بزز" شفتك مادويتي معانا ماهضرتي.. مالك ياكما مريضة؟
حادة: حمدنا الله وشكرناه.. مادينا بلاصة حد ماغدرنا حد.. عارفين بحق العشرة والصحبة وعارفين بحق ليتاما.. علاش نمرض؟ ولله الحمد
هبط راسو شاد جبهتو اما خولة فهمات بلي حشيان الهضرة عليها وماتحملاتش تزيد تبقا تما وتجرح ..هزات لبوشيط ديالها بالنفخة وقالت
خولة: أنس.. انا فالطموبيل
أنس: بلاتي خولة.. خولة !!
هبطات بلاما تتلفت ليه وحادة قالت مخسرة سيفتها: يخوي ليها الجناب واخا ماتكسابهم
ضار ليها بعتاب: دابة امي هادي هضرة تقال.. ماشي حشومة انا جايب السيدة هاد المسافة كااملة تاال عندك وتهينيها هاكدا
خنزراات فيه قائلة: ااش جايب بالسلامة ملكة الجماال.. جاايب ليا يهودية تالخلاا ومدخلها عليا لداري الشلاهبي ..ماحشمتييش
رد مراضيش بكلامها: واامي واامي.. بنتي تتسمع اااش هاد الهضرة دابة
هزات فيه صبعها تتحلف: شوف اااه.. النهار لول جاي طلب وتزاوب نحضر معاك لضريب الصداق.. وفوجه المرحوم جيت وسدييت دلقووشي.. بالحق شگلت لك.. ااا؟ ياك گلت لك هاد المخلوقة مانشوفها ماتحادي جيهتي.. جيتي تا ومدخلها ليا تاال ماحالي
تنهد تايشوف فيها بقلة حيلة: واالو امي والو ..وتقول واش تاتهدي السلامة
حادة: حياااة..
دخلات عندهم تتجري: نعام.. نعام امي
حادة: عكازي جيبيه ليا
أنس وقف ديك الساعة خلعاتو وحياة بدات ضور فعينيها
حادة: وااتي جيبي ليا عكاازي
أنس: مي الله يهديك.. تانجي مرة العام تاتندمينا خلي غايدوز النهار بيخير وتعرفي علاش جينا بعداا
حياة: وامي حشومة فاتي فالكوزينة تتسمع
حادة: حق لي ليه الحق إلى على وجه ديك الملايكة غانسكت.. أما تاا بنتييي ليا ياوليدي توحشتي العصا عضاامك بردوو علييك
نطق مغدد: واامي
دخلات فاطمة الزهراء وعلى اترها كلشي سقل وتبسم وجه حادة أخيرا.. أنس برك تاينفخ ويصبر فراسو وحادة وسعات ايديها تعنقها
حادة: زيدي يالنوارة.. زيدي يازينة البنات.. زيدي نشبع عينيا بشوفتك زييدي
ضحكات بخفة وحداها بركات مخلياها تعنق فيها وتبوس
حادة: اش هاد الزين.. سبحان الله غاأنا محطووطة
حياة طلعات حاجب وأنس سكت خلاها تقول لي بغات
حادة: عدك الزهر ديتي مني زين الوجه والفعايل.. اماا كرشي ماحطات ليا غالشياطة ماعرفتها لمن طالعة
أنس: لاحول ولاقوة الا بالله
حادة: ايه موومن مسكين
نطقات فاطمة الزهراء بلطافة بلاما تسوق لكلامها: جداتي.. ماقلتيليش كيف بقاو رجليك واش شوية؟
حياة: مي انا غادة نحط الغدا
حادة: سيري ..رجيلاتي صحة سلام الحبيبة دياالي.. نتي كيف غادة.. مازال تتقراي ياك ابنتي
حركات راسها: آه تاتقرا فكلية الهندسة
حادة: مزيان مزيان ابنتي قرااي القرااية زيينة.. قراي باش تولي ليا طبيبة قد السخط وتداوي جداتك
ضحكات حياة بخفوت وحطات ليهم طبسيل اللهم بالبرقوق والمشماش.. حطات الخبز والما والموناضة قطعات حادة الخبز وقالت بسم الله.. بدات تاكل وتوكل فاطمة الزهراء فرحانة بحفيدتها وتتقطر ليها من عويناتها .. تجمعات الطبلة وتحط اتاي وموضوع الهجرة إلى كندا تجبد .. كلها هاز كاسو وتايسمع لأنس لي قال شنو كاين وختم كلامو ب..
أنس: هادشي لي كاين.. أنا مابغيت نفرض عليها والو وخليتها فراحتها.. هي تقرر
حادة شافت ففاطمة الزهراء لي هي كدالك شافت فيها مأيدة كلامو
حادة: ونتي ابنتي علاش ماتشميش مع باك
ردت بليونة: راحتي هنا امي.. خليني معاك
عنقاتها بحنية وقالت: يالحبيبة دارك هادي ونهزك فوق كتافي.. انا غير قلت على ود مصلاحتك وخلاص.. ملي نتي باغا تبقاي معايا.. الصلاة على النبي مرحبا بيك الغالية بنت الغالية ...
على هاد الكلام ناض أنس ناوي يمشي.. عنق بنتو مدرعها عندو وهبطو بزوج مع الدروج تايتحصر والغصة فقلبو.. هل الطموبيل وبدا يجبد ليها فحوايجها من الكوفر باليزة بباليزة وهو مساخيش.. ماكرهش كون سمعات كلامو.. مكرهش كون معاه بقات وحاولات حتا هي تحيد الفجوة لي بينها وبينو.. لكن ماشي أي حاجة تمنيناها تاتوقع.. لسانو تايتكمل وهوما واقفين قدام الباب تايوصيها على راسها وانه غايبقا على تواصل معاها.. لكن عينيه ليهم كلام آخر.. هربات منهم عيونها وحناتهم تتسمع ليه حتا سالا بتنهيدة وعنقها عناق غير متبادل كيف ديما.. لكن كافيه على الأقل
..ركب سيارتو فين كانت باركة خولة وبصمت كانت مراقباهم.. ديمارا ومن حداها داز ومشا.. قلبات عينيها من السيارة وشافت حواليها مزيان.. خصوصاً لدار جات فالقنت لاخر من الدرب ..تبسمات لبابها المنقوش وسهات فيه تتشوف حتا تمات جاية من الدورة ليلى هازة الزريعة تتاكل فيها وفيدها لهرا هازة ساك دايرة فيه طالونها لي خدات معاها فالصباح.. شافتها فاطمة الزهراء وبدات تبسيمتها تمسح فحين ليلى وقفات شوية ومن بعد ضحكات وتمات عندها غادة
ليلى: اااي هااي شكون تفكرناا هههه
مدات حنكها مسلمة عليها جوج بوسات فالحنك وفاطمة الزهراء بمضض كملات معاها السلام وقالت ببرود
فاطمة الزهراء: السلام ..نهيلة ياك؟
طلعات حاجب: ويلي على نهيلة ماعقلتيش عليا؟ انا ليلى اصاحبتي هههه
فاطمة الزهراء: ااه ..سيڤغي دابة تفكرتك
كملات تاتاكل زريعتها وقالت تتغمزها: ايوا.. ايه الاخبار.. شتك باقا فالدرب هي ناوية تحولي عندنا عاود هههه
فاطمة الزهراء: ممم داكشي.. يالله باي
دخلات مخلياها تاطلع فيها وتهبط وقالت بانزعاج: ايااه وكبريها نتي لبنادم.. كليميني منفخ.. دارو الفلوس ويسحابهم مانعرف فين وصلو
..دخلات لدارهم تتكمش الزريعة وحطاتها فالساك.. مع حلات الباب بدات تحيد سبرديلتها وقالت مها من الكوزينة: مروان جيتي
ليلى: هادي انا امليكة ..كاين شي مايتكاال
دخلات جارا سندالتها للكوزينة وقالت مها باستغراب: را الخبز عاد طاب.. جيتي بكري لا
تنهداات بهم وهي تتندغ فالخبز وقالت: ماقبلونيش فالخدمة حطات الام الكاس لي كانت تتغسل وقالت تتمسح فيديها بخيبة أمل: عاوتاني.. ولاش هاد المرة؟
هزات ليلى كتفها وتمات خارجة من الكوزينة: مابغاوش شنو ندير
تبعاتها مها مليكة عاقداهم وايديها على جنابها: ايوا والكرا.. والضو والما.. شنو دابة نخرجو نسعاو؟
ضارت ليها بتعب قائلة: امي واش خبيتهم عليك .. شوفي حالتي حتا نتي رجليا تقهرو بالتقلاب بلا فايدة ولي خدمت عندو تايطمع فيا شنو نديير
لينات كلامها وقالت تتودد ليها: اش بغيتي ابنتي شي خدمة.. الله يهديك اهاد البنت هاولد خالتك عاد جا من برا وباغيك للزواج ..وهو بفمو قال غايهزنا ومايخلي حتا خير خاصانا
زادت لبيتها تتنفخ وقالت: يهز غاسروالو ويعطيني التييقار.. انا قادة بيك وبخويا
مليكة: لاا بااينة.. هالخضرة قربات تساالي والتلاجة بدات تصفر.. ياكما تسحابي سيمحمد خوك دبصح وغايبقا هازنا طول عمرو.. راه ابنتي جامعاكم غير الرضاعة والجورة وتايفكر لينا.. اما تاهو عندو مصاريفو وحياتو.. تالين غانبقاو هاكا وغير الناس لي تاتوكلنا تالين
ضارت عندها بقهرة: واش كرهت.. بنت ليك لقيت الخدمة وقلت لا؟
مليكة: نتي لي تتشوفي غير الفووق وماقابلاش بالقليل... وشتي هاد النفاخة لي فيك أنا بعدا قهرااتني ابنتي.. شهماتني
ليلى: انا ماقريتش حتا حفيت باش نولي سرباية ولا تانضرب الجفاف امي.. ومغانتزوجش غير باش نخرج من القهرة.. دابة تشوفي غانلقا خدمة وغانهزكم نتي وخويا بسناني من هنا وگاع لي حلمت بيه غانديرو ليكم
هزات ايديها بقلة حيلة: قهمريتيني... قهرتيني ابنتي راسك قاصح قاااصح
خرجات وليلى سدات بيتها وبدات تحيد فحوايجها وتخرج نفس مرعود.. طلعات عينيها فصورة معلقة فالحيط.. صورة بيض و كحل لراجل مبتسم بحنية للكاميرة ..زاد الهم تجمع فعينيها على شكل قطرات من الدموع وحناتهم بسرعة تتبدل.. مسحات وجهها كامل وخرجات تعاون مها فالغدا.. وحدة مادوات مع الخرا حتا دخل خوها الصغير من الكورة غسل ايديه ورجليه وتحط الغدا تايتغداو فالسكات وكل وحدة وهمها ..وتاحد ماخطاوه الهموم ..سوا لي عندو.. ولا لي ماعندو ..كاين لي همو الصحة.. ولي همو المال.. لي همو راحة البال.. ولي همو بنت الجار ..
وقف الطاكسي قدام دارو كيف العادة وهبط منو مسخسخ واخا تعطل فالنعاس فالصباح وماخرجش بكري كيفما مولف.. دخل لقا السقيل والضواو طافية.. حيد من رجليه ودخل حل واحد من البيبان عليه طابية وردية اللون.. غرفة زهرية جدرانها وأتاتها طفولي جميل.. متوسطها سرير صغير ناعسة عليه طفلة دو اربع سنوات وحداها مستفة نونوساتها.. دخل عندها بالحس وتحنا بابتسامة باسها فخدها وتما فاقت قافزة حتا قال بحنية مهدنها
محمد: غير انا ابابا.. رجعي نعسي
ردت تقيلة بالنعاس: بابا هادا نتا
قال مبسم: انا احبيبتي
قالت: جبتي ليا شكلاط؟
ضحك ومن جيبو جبد ليها قطعة شكولا وقال: هاهي.. ولكن حتال غدا عاد كوليها صافي
باستو فحنكو بابتسامة وهو غطاها وخلاها معنقة شكلاطتها ورجعات لسباتها.. خرج ساد الباب وحل الباب لي جنبو وكانت غرفتو.. دخل كايحيد التيشورت وحل السرجم تايستنشق الهوا وعينيه فاالسما.. مدة قصيرة من التأمل عاد مسحهم بتعب وحل البلاكار كايجبد مايلبس باش ينعس يرتاح .