سلمى : مدامو سمع داك خوها غايكون سمعها حتى هي .....
قسم : .. مزياااان ... مالها اش غايخرج منو كاع ( ضارت لقرعة دااسكر كتخووي وباالها كوولو مع هاد القفزة لي دار ليهم مادراش لبال لشحال كتحط فبراد ...) نعرف بنادم الطبيعي كاااايدير الحححس
سلمى : شششش .... غاايسمعك
قسم : على بقى مايتخبى ..( علات راسها بزربة ) من امتى وهو هنا
سلمى : غايكون عااد جا ...
قسم: ( كتخوي فالسكر مفقوصة ) كنصاوبو ليه اتاااي عااااد زايدها بالنخفة ( كتعيبو بصوت غليض) سميييتووو اصيييل ... اييييه ومننبعد تانا سميتي قسم ونتي سميييتك سلمى و جدة سميتها رقية ... عرفنا عندك سمية ومنبعد ...
سلمى : ( مخلطة ليها الضحكة و الخلعة ) الما طاب ، طاااب .. غير عمري
قسم : باش عرفتيه طاب
سلمى : وسمعي راه كايغلي
ضارت عندو قسم تهز المقراج وهي تغووووت باعلى صووووتها ... اصيل كان فبيتو كايبدل يلاه كايحيد تيشورت هو يسمع الغوتة وهبط كايجري هاكاك عريان غير بسروال ...
سلمى : ععععع ويييييلي هزيتيييه هااكاك ( شادة ليها يديها لي ولات حممممرة وقسم كتتتنقز بالحريق ) د ديري فالما ....للااا لا ماشي لما ص صبببري نجيب لييك للل
يللاه كاتهضر هو يدخل اصيل بززربة بانتليه قسم شادة على يديها وسلمى معاها كتفتف وهي مزيرة عينيها واضح كتألم .....
اصيل : اش وااااقع ... ( شد ليها يدييها كايشوف ) تحححرقااات ؟؟؟
سلمى : ( بخوف ) اااه هزات المقراج بلا حتى شي حاااجة ..
اصيل : ففففف اش داااك لشي كوزينة اش داااك .. اجي لهنا .... سلمى جيبي بوماض الحريق هاد البنت شي نهار تموت لينا هنا ..
قسم : ( بحر الحريق ) تمووووت نتاااااا نتااااااااا
اصيل : واغيي زيدي زيدي ...
داها لصالون كلسات وهو شاد ليها يديها المحروقة وهي كتبكي بالحريق
اصيل : ححلي .. حلي يديييك غير نشوووف
بدات قسم كتحل ليه يديها لانها محروقة فكفها وهي تبان ليه حمممرة ولكن ماشي شي حااجة بلييغة وعلا عينو فيها
اصيل : وصافي باركا من فشوش ... ماشي شي حااااجة
قسم : ( بالغوات) سييير دييير يدك فيييييه ووشوف
اصيل : فااش؟؟؟؟
قسم : داك العججب لي سخنت فيه لماا
اصيل : و انا قلت ليك قربي لييه ؟ واش نت بعقلك غاتهزييييه بيديك معارفاهش سخوون ؟ ...
جات سلمى كتجري هازة بومااضة
اصيل : حححلي يديييك
قسم : لاااااا لاا غاتحرقني
اصيل : واااحلي ماااغاتحرقكش .. حلي
قسم : لاااااااا غااااتحرق لاااا
اصيل : دابا ننتي شحال فعمرك شحال ... ححلي .. ( بغوتة) حححلي يديك ...
بدات كتحلهم بزز عليها كان كفها وصبعانها حوومر وهو حل لبوماضة كايدهن ليها وهي عضااات على شفتها بالحرييييق ماحساتش براسها تااااعضاات فكتفوووو بجججهد تازير على عينيييه وسلمى شدات على فمها ...
اصيل: ( بين سنانوو كايتحرق ) مجعوورة .. ططططلقي
قسم عاضة فيه بكل قوووووتها غاكير ليه الجلدة ..وهو كايدهن لييها يديها وصاااابر بزز .... تاساالا عاد بعدات منو كتننهج
قسم : ييييييييدي
اصيل : صااافي هاهي غاتبرا ( تايتحررق فكتفو ) سنااان هادوك ولا شنووو عندك تما
قسم : رااااه تخرررقني ...
سلمى : انا غااانجيب البانضة صببري هاهي غاتبرد ليييك دابا متخاافيش ...
مشات سلمى تجيب بانضة وهو باقي شاد ليها يديها عندو كايشوف معاها
اصيل : الدموووع كاااع،!!!!
قسم : ( كتمسحهم باليد الاخرى ) كاااتحرررق
اصيل: بزااااف !!!
قسم : ممممممممم ...
اصيل كايشوف لحركاتها الطفوليين ماعارفش علاش فهاد اللحظة وهاد "امممم" لي قلت بهاد الصوووت الطفولي ونيفها وعينيها اللحوومر حركو شي حاجة فلداخل ديااالو .... خصوصا ملي كايتدكر انها كانت كاتصاوب اتاي ليه ... حس برررغبة قوية انه يشدها عندو يحظنها بقققوة ومعارفش علاااش!!!! و رجع نفض راسو من هاد الافكار وحط يديييها وناض وقف بعد عليها ...
اصيل : (كايحك فشعرو بتوتر ) هاهي غاتجيب ليك سلمى البانضة شوة غاتبرا ليك ..
طلع فالدروج هااارب من الاحساس لي جاه فجأة ودخل دغيا لدوش حل الما كايررش وجهو حس براااسو تخخخنق ...فلحظة مكانش غايحس براسو وغايحضنها ... ورجع دغيا تحكم فراسو وبعععد .. جاتو واحد الرغبة لاتطاق انه يجبدها لعندو بسبب حركاتها الدلووعين ...
سلمى جابت ليها البانضة وهي نيفها تروح بالبكا .. ودارتها ليها فيديها بسيييف مع الغوات ديالها وخوفها
سلمى : ااااربي وقتااااش ماجيتي لهنا كاتعطبي .... غييير سمحي لياااا نكانش عليا نخليك تهزي المقراج
قسم : ( كتسوط عليها ) مااااعللليش صافي دازت ... ففففف
سلمى : راه هاد البوماضة مزياااانة هانتي شووووية مغاتبقايش تحسي بيها كاع .. تاسيكاطريس مغايبقاش ....انا رااااه ديما خارقة يدي مرة مع الفران مرة مع البووطة مرة مع الزيت هههه هادي هي الكوووزينة ...
قسم : ( عاد سرا معاها البلان وشافت فيها ) اويلي عضييييت خوووك !!!!!
مصحة الحياة
مكتب الدكتور
لوؤي ولامار جالسين فالبيرو مقابلين مع الدكتور ولامار غير كتبكي على هاد الحالة ... و لؤي مركز معاه
الدكتور : المراهقة راه سن صعييييب .. المراهق كايكون متهور وكياخد قرارات بدون ميكترث للعواقب... والمشاكل ديالو واخا غايبانو لينا حنا الكبار تافهين بنسبة ليه هو راه كبار .. يقدر ينتحر غير لا دار شي كوپ لشعرو وعيبوها ليه فاللييسي ... حاولو متستاهنوش بمشاكلهم ... راه بالنسبة ليهم كباااار ... حاولو توقفو معاها فهاد المرحلة من عمرها حتى دوزها بأمان واقل الاضرار ...
لامار : ( كاتمسح دموعها ) كانت عيني عليها ... غير الاكسيدون لي درات لخوها قلبات ليا المجاج ...
الدكتور : حنااااا عارفين وعارفين تالمسؤوليات لي عندكم نتي وسي اسد.... ولكن الولاد راه صعاااب فهاد السن الله يعطيكم الصبر ويزيدكم ....
لوؤي : امتى تفيق
الدكتور : واحد سااعة هاكاك ... الحمد دازت على خير ردو معاها لبال فالايام جاية ومن الاحسن هاد المرحلة يكون معاها شي حد مايفرقهاش يحاول يقلب على الحوايج لي كايعجبوها وتاترتاح فيهم ويعمر ليها جميع الفراغات لي يخليوها تفكر فحوايج قباح .... واش فايتة مرات من الاكتآب ؟
لامار : اااااالا .. بنتي حركية وحيوية ونشيطة ... وحتى دابا راه ماعندهاش اكتآب... بالعكس عايشة حياتها عادية غير شي مشاكل بساط وصافي ...
الدكتور : اخطر اكتئاب هو لي مكايبانش امادام .. كاتشوفش الشخص عايش عادي ولكن مع نفيستو راه مامزياانش ..... قلبي فين عندها الخلل وفين عندها النقص ... راه مايمكنش مراهق يوصل لهاد المرحلة انه ينهي حياتو غير هاكاك
لامار :اعود بالله من الشيييطان الرجييم ( كتنهد ) شكرا ادكتور ... طلعوها لشومبر ديالها ؟
دكتور : وي طلعوها تقدرو دخلو عندها ...
لامار : منوصيكش ادكتور على سرية الامر عافااااك ...
دكتور : متخاافيش راحنا عارفين لي كاين
يلاه غاينوضو وهي تحل الباب بزربة كانت رتاج لي غير دخلات لكلينيك قالو ليها الخبار ...
رتاج : لااامار ...يللااه سقت الخبار كيف بقاااات
لامار : (بقلة صبر تلاحت عليها عنقاتها كاتبكي ) لبارح كان غيمشي لياا ولدي ودابا كااانت غاااتمشي ليا بنتي ..غاااانحماق ارتاااج غاانحماق ...
رتاج : شششش تهدني بشششوية عليك
لؤي وما لماماه تديها تهدنها وهو خرج طلع فالسانسور حتى لطابق فين كاينة وحل عليها لباب ... كانت مستلقية بكسوة ديال الطبيب و سيروم فيديها وشعرها داروه ليها فالجنب مطلوق حداها .....
دخل بشوية بدون مايصدر شي ضجيج يفيقها وجر كرسي جلس حداها ... دار يدو فجبعتها يتأكد من سخانتها ، كانت نزلات .. وبقى غير كايشوف فيها ويطالعها مطووول الشوفة فعينيها وملامحها كيفاش دابلييين .... شابة فسن الزهوررر تدبلها المراهقة لهاد الدرجة ؟... تمنى لو كانت كتحل قلبها لييه وتقوليه اش كايضرها .. تمنى لو كانت كتكى على كتفو ملي ضيق بها .. هو عارف راسو مكيعرفش يواسي و مكيعرفش يهضر زوين ومكيعرفش ييبين حناانتو .. عارف راسو حتى هو خدمتو داية ليه نص وقتو .. ولكن كون تطلبو بكلمة وحدة غايخلي كولشي ويجي لعندها يلبي ندائها ويسمع ليها حتى لصبااااح .....
هز يديها عندو بشششوية بااسها فكفها مطوووول ... وهو كااايواعدها انه مغاايبعدش عليها حتى دقيييييقة ......
عند جود ...
يالاه كايفيق من النعاس دماااغو مرون .. مولف يفيق على هاد الارتجاج بحال هاكا ... مدة كايقاد افكارو ويتفكر المدة الزمنية لي هو فيها هاد تفكر رراسو ... وناض بشوية لدوش كايعرج برجليه غسل وجهو وواضحة كمية العياء لي كاينة فملامحو ... علا راسو كاشوف فالمرايا ولحيتو كاتقطر بالما ... علاش حياتو غادة للاسوء علاش كل مكيضن كايصلحها غير مكتزيد تخرب فوق راسو .... خرج من الدوش ومشا لسرير كالس مدة شاد على راسو .. ماقدرش يرتب افكارو حاس برااسو كايتشتت بزاف ومقادر يوصل لحتى شي قرار ، خصوصا التوتر مع حالة المرض ديالو كايقضيو عليه وكايفقد التركيز بمرة ..... حاس براسو محتاج يبعد بزاااااف باش يقاد افكارو ويعرف منين يبدا هاد روييينة لي طرات ليه ..... واش يبداها من المنافس ديالو ... ولا من موناكو ليغاتكون قصاتو .. ولا من باباه و لا من ماماه .. ولا من عمامو ...
ناض لبلاكارو حلو وجبد كارطابل ديال الضهر عمر فيها تيشورتاتو وبعض لي ڤيست وشورطات وسراول كاع لي يحتاج وهزها داز لدوش يهز برودويات تاسمع دقة فالباب و تحلات ... طل من دوش يشوف شكون داخل بانتليه ماجدة حطات صاكها وجات عندو بزربة عنقاااتوو وهو تنهد بمعنى هادشي لي كان خاااصني
ماجدة : متصوووووورش شحال تخلعت فاش شششفت الاخباااار ( جات قدامو شدات فوجهو ) يااااك نتااا بيييخيرررر
جود : بييخير بيخرر ...
تخطاها وداز يحل على روكسي وهي تجي عندو تاني عنقاتو منلور
ماجدة : شنو كان غايوقع فيا لاوقعات ليك شي حاجة
جود حيد ليها يديها وضار عندها
جود : هانا واقف قدامك مواقع والو لا ليا لا ليك غير تهناي ....
ماجدة : ( شدات فوجهو هو كايهرب وجهو كتققنطو بيديها ) باااش كتحس ... تبغي شي مااساج تبغيني نخفف عليك
جود : ماجدة الله يرحم باك والله ماا وقتك وماعندديش الخاااطر ليك .. خرجي
ماجدة : هااء ؟ كيييفاش خرجي كيفاش غانخليك فهاد الحاالة بوحدك
جود : مال هاد الحااالة ( علا يديه ) اش وااااقع ...كيف بنتليييك .... سيري بدلي ساعة باخرى الله يرضي عليك
ماجدة : لا انا ماان
(قاطعها بالغوات تاقفزات )
جود : واااقااااااودي عليا وااااش بقيييتي لليااا غييير نتي .... قووودي عليا
ماجدة معاوداتش لكلام ، هزات صاكها وخرجات كاتجري خافت يجمع معاه ببشي رككلة كتعرفو ملي كايوصل لهاد الحالة ... وهو تبعها تامشات وزدخ داك الساكادو قلبات ليه المجاج ....
مشا حل على روكسي لي غير حل عليه نققز عندو طيحو للارض ... وكلس هو وياه فالارض كايمشط عليه على الفرووو ديالو ويشمشم فيه وروكسي بلفررررحة مكيزگاش
جود : ( خاشي وجهو فوجه روكسي ) مااالناا هممم ؟؟؟ باغي دااابز ... ( كايهرب وجهو ) فهمنا فهمناا تاحنا تووووحشناك ..... تمممشي معااياااا .... نمشيو نقووودو منهنااا .. غير لنا ويااااك وشي غااابة ....
روكسي غير كايتخشا فيه وهو ناض لبس الفيست ديالو وكلس على السرير كايلبس الگاط وهز الساك ديالو وسوارتو وتيليفونو ولبس كاسكيط بالمقلووب وجر روكسي مع رجليه وخرج واخا باقي كايعرج برجليه ولكن مامحتاجش بزاف للعكاز ... وصل للكاراج ديال طموبيلاتو مشا لجيپ هي لي تنفعو للبلاصة لي ماشي ليها ... ولاح روكسي لور وصاكادو ديالو وزاد مشا ....
عند قسم ....
سلمى : شوية دابا ؟ ها !!
قسم : ( كاتحرك يديها ) وووي ... مابقاتش كتحرق كيف لووول ....
سلمى : رتاااحي انا غانحط الفطور ونجي ومايبقاش فيك الحال البراد غانحطو كيف عمرتيه نتي هههه ...
ناضت سلمى لكوزينة عمرات لما فداك البراد لي عمرات قسم ودارتو فوق البوطة .... وبدات توجد فطباسل وتحط على طبلة وقسم بالها غير مع يديها مايبقاش ليها لاطراس حيت هاد المرة باباها مغايدوزهاش ليها ... مرة لولا تكريسات تانية نفخات جبهتها .. دابا غاتمشي ليه بيدها محروقة عمرها تحلم تحط رجليها هنا ....
اما أصيل دوش وبدل عليه ونزل فالدروج ..
نزل لقى سلمى حطات فطور وقسم مشغولة غير مع يديها كتطل عليها واش مكتبانش الحرقة .... وجر سلمى لكوزينة
اصيل : امتى جات
سلمى : شي ربع ساعة قبل ماتجي نتا
اصيل : مقالتش علاش جات تااني !!
سلمى : ( بخوف حركات راسها بلا )
خلاها وزاد لطبلة جلس بعيييد عليها هاد المرة وهي طلع راسها مشغولة غير مع يديها
قسم : مغااااتبقاش تبان الحرقة ياااك
سلمى : ( كتخوي اتاي ) لااااا مغاتباااانش والله ... حمد الله جاتك خفيفة ودغيا نترتي يديييك ....
قسم كتعلي داك الفاصمة وطل وسلمى خوات ليهم اتاي وجلسات متوترة فاش كايكون اصيل .... اما قسم مكايناش فداك العالم الحرقة نسااتها تاني علاش جات ....وسلمى بغات تستملح الجو
سلمى : مادموز ( رجعات سكتات باش ماتقوليها فضحتني حدا خوك ) ق قسم ... خووودي كاسك ... غاتشربي اتاي ديالك هاد المرة
قسم عاد تفكرات وطلعات راسها كاتشوف فيهم شكون لي شرب تقرا رياكشن ديالو كيف جاااه ... بانليها اصيل لي غادي يشرب غير دارو ففمو وسع عينيه ... مبغاش يسرطو .. وهي كاتشوف معاه .... بزز بااااش سرطو وحط الكاس دوووخووو ..
قسم : ( بحمااس ) زوييييييييين !!
اصيل : ( تايكح حرقو فحلقو ) ااحم ... اا .. زوين ... زوييين ... غ غيير شوية مسوووس
سلمى غير كاتشوف مفاهماش وقسم من ملامحو واااااضح انه مازوييينش
قسم : و ولكن علاش كتكح ( هزات كاسها شربات منو وهي تطرطق عينيها وسرطاتو بزز جاتها البكية )
اصيل : اااحححم .. ( كايسرح حلقو سحقو بالحلاوة ) واقلة كاع اش لقيتي دالسكر فالكوزينة درتيه ....
قسم : ( هزات كاس دالما كاتشرب وسلمى كاتشوف معاهم ) وو .. م ماعرفتش .... نااااااري كاااايسسسحق ... هدا ماشي اتاي هدا ....هذا كراااميييل
سلمى : حلو بزااااف ؟؟؟؟ .. ناااااري الغلطة ديالي انا لي كبيت لماا ومارديتش لبال شحال كان فيه داالسكر
اصيل : نوضي صاوبي واحد اخر
قسم : ( شداتها ) لااا علاش غاتعدب البنت تصاوب وااااحد اخرر
اصيل : ( ربع يدو ) وشنو غانشربو
قسم : شششرب الما ...
سلمى : اا لا ..لا غانصاوب واحد اخر مكان لا عداب لا والو اختي بالعكس ... باركا غير غاتفطري معانا ....
قسم يلاه غاتجاوب هو يصوني تيليفونها وهزاتو شافت الرقم
قسم : سمحولي واحد دقيقة ...
بعدات حتى لكولوار لي تايخرج للباب وجاوبات بالحس يلاه غاتنهال عليها صفااااء وهي تقاطعها
قسم : ششششش تاكلمة اخرى ... الرونديفو لي كتبت ليك خديتيه ليا
صفاء : اءء ؟ .. و وي مادموزيل خديتوو ..
قسم : وصيتهم على اش قتليك
صفاء : وصيتهم قتليهوم يديرو راسهم مكيعرفوكش شكون .... واش كاين شي مشكل مادموزيل... علاش هاد زيارة
قسم : مادخليييش راسك فكولشي اصفاء .. عندي شي حاجة سميتها خصوصياات ..
صفاء : وولك ...
باقي مكملات كلامها قسم قطعات تيليفون و دارتو فجيبهاا لور ودخلات كتفرنس
قسم : اااء .. خاصني نمشي عندي شغاال ضروري ( شافت عند اصيل ) ممكن توصلني ...
سلمى وسعات عينييها حيت عارفاها بطموبيلتها علاش غتطلبها منو... وهو غير كايشوف فيها ... ورجع تنهد ووقف ...
وقسم غمزات ل سسلمى لي مافهمات اش كايضور فعقلها ... هز سوارت الموطور وخرجو هي وياه ... خرج الموطور لبرا وعطاها الكاسك ركبات موراه ... هاد مرة شدات ليه غير فالفيست ...
اصيل : فيين ! للخيرية تاني
قسم : هههه لا ... خرج لطريق الرئييسي انا غانبقى نعت ليك ...
زاد بيها واخا دازت حدا طموبيلتها وطموبيلات ليكارد ولكن ماردوش ليها لبااال بالكاسك.... زايد بيها وهي كتوريييه الطرييق منين يدوز ومنين يدخل ومنين يخرج وهو مسااايرررها ... مرة مرة كايلوح عينيه فالمرايا عليها كاتبان ليه داك الابتسامة لي سحراتو نهار شافها اول مرة فالصورة ... وشعرها لي طاير تحت الكاااسك ... وعينيها الغزاااليّين اللامعييين ... وجه طفلة بكل برائتها ....
حتى وصلو للوجهة لي بغات ووقفاتو ونزلات كتحيد الكاسك وتسرح شعرها وهو علا عينيه كايقرا الپانو .... كانت جمعية دار الارامل و المطلقات والامهات العازبات ..
بقى غير مصغر عينيه هادي اش جايا دير هنا ... وهي تمد ليه الكاسك
قسم : نززل
اصيل : فيين غانزل ؟
قسم : بغيتك دخل معايا ....
اصيل : مريضة ولا مالك اش دخلني انا لهنا !!
قسم : عندي زياااارة بغيتك دخل معايا مالك ااش فيها ؟
اصيل : نو ماعندي تا علاقة بهادشي ... واش نمشي ولا عاد نتسناك هنا ! مافهمتش اش بغيتي بضبط
قسم : نوووو غاااتنزل معايا .... ( بدلع ) بغييييتك دخل معايا .... عااافااااك
اصيل : اش غااااندير هنا مافهمتش
قسم : وغيييير نزل .. زيارة خيرية وصافي .. نتا غي نزل معاياااا
اصيل موكل امرو الله حبس الموطور وجنبو لجنب .. وحيد الكاسك ودخل معاها كايسوط مفاهم والو ومقدرش يرجعها فوجهها ... لي فلباب متوترين ماعرفوش كيف يديرو يتعاملو معاها بعد ماوصاتهوم صفاء مايبينوش انها شخصية معروفة ... ابتسمات ليهم ودارو راسهم مكيعرفوهاش ودخلات ...
قسم : هانتا خسرتي شي حاجة !
اصيل : مافهمتش اش كندير هنا ... بصفتي اش غانجي لهاد البلايص ؟
قسم : هاد البلايص دارو باش نجيو ليهم ...باش نشوفو الاخطاء لي داروهم ونتعلمو منههم ... باش نشوفو عيشتهم ونحمدو الله على عيشتنا باش نعاونوهم الى لقدرنا ... باش نكونو ليهم العائلة لي معندهمش ولي مكيزوروهمش هنايا ..
اصيل :اش دخلني انا فاخطاء المطلقات و الارامل ابنت الناس !!
قسم : نتا غير جاااااي معايا .... ليوما عندهم جلسة مع واحد الكوتش بغيت نحضر ونسمع ليهم .. وجبتك معايا ...
اصيل : غيييير عفيني ... اش غانسمع انا لمشاكيل دعباد الله .. نااقصهم !!
قسم : دابا مال راسك قاسح ... طلبتك طلب ماتردوش فوووجهي ... يااالااااه
جراتو من يدو وهو غي تاتقييسو بحالا كايضربو ضو .. تابعها بلا هواه حتى دخلو لداك القاعة و و ومات بعينيها ليهم باش غير يكملو حيت كانوو بداو .. كانت كوتش دايرة كرسي فالوسط وحداها كرسي اخر .... والنساء لي داخلين فهاد الجلسة كراسى ديالهم ضايرين بيهم على شكل دائرة واللور كراسة دالمتفرجين وجرات كرسي هي واصيل جلسو ....
الكوتش: مزيان دابا سمعنا لحبيبة .... دابا الدور ديال اسماء .. اسمااااء تفضلي .....
جات اسماء للكرسي لي قدامها وجلسات ...
الكوتش : حالتك الاجتماعية هنا فالدار اا اسماء
اسماء : مطلقة ...
الكوتش : عندك وليدات
اسماء : جوح بينات .. مربين هنا نييييت الله يكتر خير هاد الجمعية ....
الكوتش : شنو مستواك التعليمي
اسماء : غير حد السااادس الالة .. دارنا مبغاونيش ندخل الاعدادية
اصيل فهم قسم اش كادير هو ينووض وشدااتو من يديييه كاترجاه بعينيها يكلس ... وهو مزير على سنانو بعنى اش هاادشي !!!!!! ....
قسم : ( بالحس ) كنواااااعدك .... من هاد النهار مغاتعاود تشوفني مزال قدامك غيييير گلس وسمع ...
اصيل : ( هبط راسو عندها بعصبية وبالحس ) فييين كنعرفك اناااا ...... فين كنعرفك تادخلي راسك فحياتي لهاد الدرجة ؟
قسم : طلبت منك غير تكلس .... وعد مني منبعد مانخرجو منهنا القرار لي بغيتيه انا معاااااك فيه .. وعد منعاودش مزااااال نجبد ليك هاد الموضوووع .. ( بترجي فعينيها ) كلس .. مخاسر والو ...
الكل تلفت ليهم فاش سمعو هضرتهم لي بالحس ولي واضح اصيل معاجبوش الحال .. شاف كولشي كايشوف فييه وهو يتنهد وجلس محرج ...وقسم تبسمات وومات ليهم يكملو ... واصيل بحالا كاااالس على الجمر ... فامكانو ينوض دابا يخرج .... ولكن ماعرفش علاش ماقدرش يرفض ليها طلبها و ترجيها ليه ... فنفس الوقت كايقنع راسو انه هادشي فصالحو باش متعاودش تبان قدامو مزال ...... والحديث ديال الكوتش والضيفة ديالها كايتسمع بسبب الهدووء لي فالقاعة ...
الكوتش : اهاه .. مادرتي حتى شي تكوين منبعد ؟
- لا حتى شي حاجة ... كبرنا على داك الهضرة ديال البنت مايجمعها غير الزواج ودارها وراجلها ... عيب عندنا البنت تخرج تخدم ...
ضيفة اخرى : وتدل فدار الراجل ماشي عيب ! اقصى مايمكن يقدمو الوالدين لبنات لي ماقراوهمش على الاقل يختارو ليهم زوج بعناية
- حنا دارنا الراجل لول لي دق الباب قالو بسم الله ...واخا كان كبير عليا .. قالو ليا الراجل عيبو جيبو ... وسيد لاباس عليه ومايخصك خير ....
الكوتش : اغلب العائلات لاسف كضن ان الفقر كاين غيرر فالمال ...شحال كان فعمرك وهو شحال كان فعمرو
- كانت عندي 19 عام ...وهو تسعود وثلاتين .
الكوتش : يعني ملي جيتي نتي لدنيا هو كان فعمرو 20 عام ؟ كان سالا مراهقتو ونتي يالاه غوتي فالدنيا ؟ ... ونت ابنتي مكنتيش واعية بهاد فارق السن وانه الاجيال ديالكم مختلفة وطرق التفكير حتى هي مختلفة بزاف !!! علاش كاترضاو لراسكم بعاد المصير اولا فكرة ااشوگر دادي ؟ اولا داك الجملة ديال راه شارب عقلو ؟ ..... معارفينيش ان فارق السن يساوي فارق الافكار !!! يساوي انك غاتدفني فئة عمرية ديالك وتحبدي توصلي قدو ! هو دوزها ونتي خصك تنقزيها ؟
- مكانش عندي خيار !!!! ... تحطيت امام امر الواقع .. الوالدين تفاهمو انا ماعليا غير نحدر االراس ..
الكوتش :ومنبعد
- تزوجنا .... حتى داك فترة الخطوبة لي كايتعرفو فيها و نرتاح ليه و يرتاح ليا ونولفو مكانوش كايخليوني نخرج معاه بحكم عييييب و الهضرة دالناس و حتى تمشي لدارو وديري لي بغيتي ... ملي تزوجنا ... لقيت راسي مكنتفاهمش معاه حتى فالالوان .. ماعدنا تاشي حاجة كاتشااااابه .. انا كنت باقا صغيرة ( كتسمح دموعها ) وكنتسنى راجل يكون رومنسي .. نعيش معاه مراهقتي .. وكاع داكشي اي شفت فالافلام .... كنتصدم براجل كبييير دوووز مراهقتو وسالا وكايتسنى مني الزوجة العاقلة وانا عندي 19 عام ... باقي ماشبعت حتى اللعب .. العائلة كاتسنى مني نغلاض ونبان مرا ونلبس جلالب والقفاطن ... وهو كايتنسى مني مسؤوليات كبار عليا ... نلبي ليه كاع اوامرو بلا منتشرط .... عرفتي علاش ؟ حيت كاااايصرف عليا .. كلمة جوج .. انا موكلك ومشربك وكاسيك ... اش بغيتي ؟ ..... مكان عليا غير نحدر الراس حيت عندو الحق ....هو لي خدام .. هو لي فلوسو فجيبو .. هو مول الاوامر والقارارات .. انا عليا غير نفد ....
الكوتش : يوكلك ويشربك ويكسيك راهم واجبات ديالو ابنتي .. ماشي خير و أجر دايرو فيك .... مدامو بغاك زوجة راه خاصو يكون موجد راسو لهادشي
- واخا هاكاك .. مجتمعنا مكايعرفش يعطي بلاا ما يدي ... مزال ماوصلناش لداك الوعي لي يفهم فيه بنادم معنى عقد النكاح .... مزال ادكتورة الناس كتعتبر زواج هو طياب وتخمال و تربية دراري ..... حتى فاش كتكوني باقا متزوجتي وكتشوفي تجارب منجحاتش قدامك كاتقولي انا راجلي غانختارو مزياااان ومغايكونش هاكا .. ولكن ( هبطات راسها ) كايبقى المكتاب .... تعياي ماتختاري
الكوتش : ( شافت لعندهم ) الاختيار الوحيد لي خصنا نقومو بيه .. هو نختارو شخصيتنا حنا ... من الاول نبني شخصيتي ... ونقوييها ...
وباش تقوا شخصية البنت .. المحيط لي ضاير،بها هو لي خصو يقويها ... يقريييها .... يثقفها .. يعلمها رياضة ... يدخلها تعلم فنون الدفاع عن النفس .. يدخلها لمتاحف .. لجمعيات .. لنشاطات .... لمخيمات ... حتى الى مخدماتش غاتكون مهيئة لمواجهة كل شرائح المجتمع .. .. لانها شخص جال وضار وشااف ..... كتثقف .. كتفقه .. كتقواا ... مكتخليش الطرف الاخر يضحك عليها حيت عارفها قارية وواعية و تقدر تسكتو بكلمة ..... انا مكنطلبش من الوالدين يعطيو لولادهم شي مساار دراسي كبير ومكلف .. لا .. غير تكويييين .. غير البنت تدير ديبلوم علاش ترجع .... سواء احتاجتو فالزواج او فالطلاق ... غاينفعها ... شي حاجة ديالها هي .. دارتها هي .... علاش كتربيو بناتكم على ان الزواج هو مصلحتهم ؟ اييييه ماااقلناش ....ايييه الزواج رابط مقدس ... ولكن تبني شخصيتك أَقْدَس .. القراية الوعاية غاتفيدك حتى فالزواج لي هو مشروع بحال كاع المشاريع .. غاتفيدك فتربية الاولاد .. غاتفيدك فكيفية التعامل مع الزوج ... غاتفيدك فاش تكلسي وسط المجتمع ديالو و تهبطي ليهوم الراس بثقافتك ... سمعوني الامهات .. الزواج مكيتطلبش من بنتك غير تكون كتعرف تعجن .. و تطيب و تشقى ...وتبدل ليكوش ... لااااا .. مجتمعنا تغير ..كايتطلب من البنت تكون مثقفة .. قااارية.... بديبلوماتها ..... حتى الى جاب الله ليها زوج صااااالح لي يقد بها ..هاد الزوج يقدر يموت !!! يقدر يدير فايييت !! .. يقدر يمرض ..... مغانعرفوش الدنياااا اش تجيب ؟ ..... اولا !!!
- بصح ادكتورة ... هانا دابا طلقت بجوج وليدات .. ضاع معاه شبابي وصغري كامل ....هو فالشهر تزوج بصغر مني .. وانا ؟ حتى دارنا مقدوش على مصروفي انا وولادي كون مالقيت هاد الجمعية .. .. با لي كان كايصرف مات ... والتقاعد يلاه كافي مي و خواتاتي .... كون مكانت هاد الدار كون تلاااحيت لزنقة انا وولادي ... هانا بفضل الجمعية رجعت نقراا .. وكنتعلمو الخياطة والحلوة ونحاولو نوقفو على رجلينا .. كون درت هادشي من لول وقريت ودرت مستقبلي ومعولتش على االراجل كاع منوصل لهادشي ....
قسم تلفتات عند اصيل كاتشوف فيه لي بان ليها واخا عاند فلول الى انه فالاخر ررركز مع حديثهم مربع يديه وكايتفرج ويسمع ورجعات تبسمات حيت شافت خطتها عطات نتيجة ورجعات كتسمع