خنسااء ناضت لعندهم كضحك:ههه وحتا نتا أعصاام..مالك على هاد لحكاام من نهاار لول...أشفيهاا إلى دارت شوية لمكيااج..وااش بغتيهاا تخرج صفرة وهياا مزاالة عروسة؟؟!تت..مجااتش
عصاام شافيهاا ورد بعصبية:صفرة ولا حمرة نتي عارفاني جني وجنووني مع هاد صبايغ...منحملهم منقبلهم...
نسرين :راه درت غير عكر ولونو خفييف ݣاع ماباين...ووجهي مابايين فيه والو...ياك أخنسااء (غمزاتهاا بشوية بلا ماتعيق)
خنسااء بإقنااع:أه أخووياا عندها صح...راه مكايبان واالو...غا نازل عليهاا السر من عند الله...داكشي علاش كاتبان ليك هاكاا..
خنزر فيهم :الله يجعلني نتيق..زعماا نتوما لبنات ملي كدورو شي واحد وسطكم،كتقنعو والديه بلهلا يتبتو ليه...(شاف فنسرين)أنا غانمشي نديماري سكوتر...نكلاكصوني عليك نلقاك قدامي..
حركات ليه راسهاا بلإجاب...خرج وقرباات عندهاا خنساء كتهضر بشوية:فين غاتمشيو؟؟...وااش غتعطلوو؟؟.
جوباتها نسرين وهيا كضحك:ههه علاش هااد لأسئلة كلهااا
خنسااء:عندي واحد لبلان،ومبغيتش يجي عصام مايلقانيش فداار،غاينوض عليا لقيامة وأجا مسكتو عليا تااني...داكشي علاش بغيت نعرف واش غتعطلو..باش نضرب لحساب
نسرين:وصراحة أنا معرفتش..هو قالي وجدي راسك غانخرجو وصاافي...نتي عارفة خوك مايعطيكش راس لخيط...واقلة يمكن غانمشيو لبحر..
خنسااء حكات شعرهاا بتفكيير:ممم واخاا غانشووف
نسرين:عرفتي شنو...ملي غنوصلو غانصيفط ليك ميساج فواتساب نقوليك فين حناا..وملي نقربو نجيو غاانسيفط ليك ميسااج تاني..ونقولهاا ليك باش تسبقينااا لداار
خنسااء بتااسمات ليهاا:معلييكش...حتاا هداا بلاان...هههه باين ليا أنا ويااك غنتفاهمو مزيااان
يلاه غترد عليهاا وهو يقاطعم صوت لكلاكصوون...
خنسااء:ههه سربي لا يصدق راجع فهضرتو،راه يديرهاا
ضحكات ليهاا وودعاتهاا ومشاات...وهيا دخلاات لبيتهاا باش توجد رااسهاا ... بالخف قادات و هزات صاكهاا لابسة جلابة قصيرة محلولة من الجناب التحت فالخزي مخيطة بالرانضا مع باسكيط سامبل فالابيض ... طلقات شعرهااا على راحتو مرولي كيف العاادة يلاه بغات تخرج شافت راسها فالمرايا وعبسات : ويلي نخرج صفرة هاكاا ... نووووووو
ابتاسمات و دوزاات على فمها عطر ماااط كرونة .... هزات عدسات فالاخضر ركباتهم باتقان مولفاهم لدرجة مكاتقدرش تستغنا عليهم ولا فيها بلية كاتشريهم باللوان واخا غير الماركة العادية .... دارت ماسكاارااا هزات شفاارها ودوزات مشطة رقيقة على على حجبانها رتباتهم ... هزات عكر حمر حطات شوية على حناكهاا وقاداتهم حتى ولاو موردين ... وخرجات كاتسلت فالدروج شافت نصيرة فالكوزينة وتمشااات بشوية بااش ماتسمعهاش يلااه غادور للباب وهي توقفها بصوتها : شنو زعما خارجة كاتسلتي ولا شنوو ... مكانشوفش فيك اياااه ... ولكن ريحتك كاسرة الدار كااملة ... الا بغيتي تهربي عرفي غير كيفاش بعدا
دارت عندها مدلية شنايفها : يااختي عندي نيف ديال السلوكي ...
هبطات هازة صندالتها : الله ينعل طاسيلتك ... تقادو الكتاف وليت سلوكي...
تخبات ورا الحيط : غير كانضحك معاك ماالكي اعمتي ... لقيتي غانخرج نضرب ضورة مع واحد صاحبتي نفوج شوية قنطت ..
طلعاتها وهبطاتها : بهاد الحالة ... وجهك مطعرج ولابسة جلاابة شوية وتطرطق عليك وغادا مع صاحبتك ... قالو ليك عليا كانرضع صبعي ... ( وجهات ليها صبعها ): ياكما يحساب ليك انا مقلوبة عليا القفة ولا مجايبة للدنيا خبااار ... الدرب كامل عارفك مع دااك الشمكاار .... الليل والنهار ونتي طوطحي معااه مخليتو لا حاحة لا ملاحة ... حتى قنت فقنيطرة ماخليتوه يضروا راسو ... وااش ماحشمتييش مالقيتي معامن ... كون غير كان علاش بعدا نقولو .. ونتي كاتجلوقي ليا مع المزلوط ديال الدرب ...
خنساء تأفأفات : الله يهديك راااه غادااا نخرج غير مع صاحبتي ماتزيديش فيه .. وانا وعبدو غير اصدقاااء .. ديك الهضرة غير خاوية لي كاتسمعي ماتعمريش بيها ودنيك ... والا جات غير على الناس مكايناش شي بنت فاولاد وجيه مادواوش فيهااا ...
نصيرة : هاا ودني منك اديك المسخوطة ... راه والله خوك ويشوفك معاه ... يا حتى يخرج فموك القديم والجديد وهاني كانعلمك ... والله ماتفكك منو غير سكرات الموت ... نتي وداك السلكوط مغاتهناو حتى ديرو شي فضيحة ... ونوليو شفايا للعدياان ...
خنساء زادت : مكاتقاضاايش ... ماحنا على فاالك اوووف ...زاادت وخلااتهااا كاتغوت .. زدحاات الباب وخرجااات ... ابتاسمات للرباعة الدراري لي كايوقفوا تما غير على قبلها بااش يمتعوا عويناتهم ... وحتى هي عاجبها الحال كل مرة تشوف واش تزاد عليهم شي وااحد يعمر العيين سااعة ولا كل نهار نفس الكمااامر ....
زاادت من تمااا جهة الدرب والمرا لي دازت من حداهااا تسلم عليها .. واخا قبيحة وضاربة الدنيا بركلة ولكن بشوشة ولي عطاها الصواب كاتردو ليه .... وقفاات قداام داار عبدو كاتعاود تصوني واالو طااافي ... دقات فالبااب كادور عينيها لا يشوفها باهاا اما حتى خوها تهنات علييه خارج بعيد ... كادق وتعااود عاد حلااات مو الباااب ... امرأة كبيرة شوية اربعينية باين عليها شوية العياء صفرة وغليضة بالسكار .... ملامحهاا بيضة وباينة مدوزة الزين فالصغر... لايحة عليها فولار فالاسود مع بيجامة مزوقة ... غير شافتها واقفة هكااك سيكانها باينين بيضين من الفتحات ديال الجلابة كحلات بالعما ...
خنساء دارت ضحكة صفرة عارفة مشاعرها اتجاهها : اهلاا خالتي حياة ... لباس عليك
حياة : هاد الساعة حامدين الله وشاكرينواا الا قالونا شي ناس وعطاونا التيساع ... ياك لابااس ابنت السايب اش جابك فهاد الطيطانية ديال الشمس ؟؟
خنساء : بغيت عبدو ( حياة خنزرات فيها )
فهماتها وضحكات كاتسايس : احم بغيت عبد الله واش كااين ؟؟
حياة : عبد الله خاارج وزايدون راه شحال من مرة تبريت منك قلت ليك لا باقي شاي تجي دقي فالباب ... واش ما عندك والدين يحكمووك ... شي نهار تجبدي لينا شي صداع مانتفاكوش معااه ...
خنسااء بنفاد صبر : صافي اخالتي شكرا بسلامة ... يلاااه بغاات تزيد وهو يطل من الفوق فالسطح : خنساااء
دارت هازة راسها تحت انظاار حياة لي غاتاكلها بعينيها : ياك ماكونتيش فالدار ( شافت فحياة ): ولا نقزتي من عند الجيران ...
عبدو ضحك : صبري هاني هابط ... خنساء ميقات فيها وهي ردخاات الباب فوجهها معاجبهاا حاال ... هبط عبدو من الفوق لبس عليه وتم خارج
حياة بعتاب : واش مباغيش تفرق من ديك الموصيبة ... الله يهديك اوليدي بعد من الخنز لا يطلييك .... رااه باهااا جلااخة وخوهااا قالو ماتعرفش اما ديك عمتها خلاااص عافية كحلة .... واش هاد شوي الصحة لي عندي باغي تهدها ليا
عبدو قرب باس ليها راسها : غير تهناي الواليدة ... راه غير عندنا شي حاجة ديال القراية ... نساليوهااا ... ونجي ....
حياة : ياربي تهزها من هاد الدرب ... وتهنيني منها ياربي .... من نهار عاشرتيها ونتا اللور اللور
عبدو لبس كاسكيط ديالو وخرج عندها لقاها واقفة كاتسناه ... خنزرات فيه : طيباتني الشمس ياربي السلاامة ... علاش مكاتجاوبنيش ولا غير باااش نسمع هاد الموال من عند موك ....
عبدو تقدم باسها فحنكها : رااه تليفوني كان طافي درتو فشارج وماشعلتوش ...
خنساء : ياربي السلاامة هاااد ماماك الجن لي فيها مايحملني .... تقول قاتلة ليهاااا
عبدو خاشي يدو فجيبو : راك عارفة الواليدة كيفاش دايرة نسايها عليك ... ( شاف فيها باعجاب ): اش هاد الشياكة والاناقة كاملة ... تهبلي ...
خنساء رجعات خصلات شعرها بتكبر : ايوااا انا ديمااا زينة ونهبل ... مااشي عااد
عبدو : غير لي بغاا يدوي معااك ... فين غانتحركواا ؟؟
خنساء : بغيت نمشي للواد ... ماحد خويا خاارج .... هاد القنت طلع ليا ف*ري .... خلينا نبدلوا السيكتوور ...
عبدو : هي اللولة ... وازيدي نشدو الطوبيس فالبلاكة
ميقات فيه : حتى فلوس الطاكسي ماعندك ... ماعرفت اش مخليتي معاااك ....
عبدو : الحب الحب لي شاادك ... مربوطة فيا والربطة زغبية هههه
خنسااء : هادشي غير فراسك ...اما انا القلب خاااوي فيه غير راسي هاد السااعة
عبدو : ونعمروا باباه مالو يغلبنا .. وزايدون بغيتي ولا كرهتي راااك ديالي .... انا بعدا من نهار شفتك وانا كننعس حفيان .
ضحكات بصوت شيخاوي : علاااش كاين لي مكاينعسش حفياان ... هاد التعناب عندك قداام ... زيد ناكلوا الدجاج فحسان وعاد نهبطوا للواد ...
عبدو : ههههه اهاااه علاااش لااا ...
ركبو فالطوبيس واتاجهوا نيشاان لوسط المدينة يتساراااو ويشبعواا دورااان .... دازو نيشااان للسنااك تغداااو ودخلوا للمولاات كايتمنظروا وخنساء لي تشوفها تعجبهااا وتحلم تشريهااا كلشي باغااااه ...
سلاو عصام ونسرين لغداا دياالهم لي كلاوه فقهوة لي كاانت بااردة ومهوية مزياان بحكم كطل على بحر مهدية ...
نسرين تسندات شوية على لكرسي نطقات وهياا حاطة يديهاا على كرشهاا:الله تنفخت...عرفتي شحاال وأنا مشهية ناكل لحووت فشي بلاصة بحاال هاكا
عصام:بصحة...(كمل بتسااؤل)ياكما بغيتي مزال تزيدي؟؟!
نسرين بنفي:لا الله يجعل لبركة...دابا غادي نوضو نتمشاو باش نهضمو هادشي...معزيزش عليا نبقى متقلة
ابتاسم بخفوت و حرك ليهاا راسو بلإجااب وناضو...غسلو يديهمم،وعصام مشا خلص وخرجوو مع بعضيااتهم ناشطين ... هاابطين لجيهت لبحر...كيتمشااو بشوية فوق رملة..هازين صبابطهم فيديهم ومرة مرة كيوصل شوية تلماا لرجليهم...دخلات نسرين يديهاا فدراع عصاام ونطقات وهيا كضحك:هه هياا مولف كاتجي تبحر مع راسك هنايااا؟
رد عليها وهو كايقاد لكاسكيط ديالو فوق شعرو البني الغامق:اه.. تقريباً فصيف كل ويكاند كانجي...ولفت هاد لبحر،كاينسيني فكلشي ملي كنجي ليه وكنحيد بيه حتا ستريس ديال لخدمة
نسرين بتساؤل : ولحمد الله بعدا ياك عمرو ماغرقك؟؟
وقف وشاف فيهااا...ونطق وهو كايضحك مركز أنضارو عليهاا:أنا لوحيدين لي يقدرو يغرقوني هما عينياا...وراه داروهاا ليااا،وغرقوني فيك...
بتاسمات ليه بخجل...وهيا هايمة فملاميحو الرجولية...و حروفو لكحلين زائد عينيه لعسليين لي كاتحس بيهم مغناطيس كيجدبك تشوف فيهم بلا متحس...عاد لحيتو لخفيفة لي مزينة بشرتو السمراء..زادت عطات لملاميحو جادبية خاصة..عاقت براسهااا مطولة شوفة...هربات عينيهاا ورجعاات خشات يديهاا فيه ونطقاات بتساؤل كتمشاا معاه:ماقلتيليش...من إمتاا ونتااا حااط علياا لعين؟؟
عصااام بتااسم بتدكر : من مممدة هاادي ...(كمل كيضحك)ههه تعقلي نهاار لي لقيتك مطايفة مع خنسااء وفارقتكم؟؟
جوباتو بعدم تصديق:لااا..متقوليش ملي كنت كنقرى فسنكياام ونتا طايح فيااا
عصاام: بحالا شفتيهاا بعينيك،من تم وأنا طايح على زناافري،لدابا باقي كنتخيلك فداك نهار كيفاش كنتي كتجعوقي وتغوتي وماخفتيش مني...ههه بلعكس بقيتي كتخرجي فياا عينيك بحال شي ببوشة...وماسكتيش على حقك..رجعت لداار و بقيت كنفكر فيك و مقدرتش نحيدك من باالي ماعرفتش شنو وقع لياا
نطقات نسرين و ضحكة شادها من هضرتو:ههه وراك طحتي طيحة فاعلة تااركة ماجمعوهاا شرااوط..شكون كان كايقول من ديك ساعة حتا تولي عندي 21 عام عاد يكتااب نتجمعو مع بعضياتتاا..(كملات بتساؤل)زعما عمرك مفقدتي لأماال؟؟
جاوبهاا بتقة:لا لا مفقدتوش،حيت كنت مأمن بديك لفكرة ديال إلى كنا مجموعين فسماا..حتا حد مايقدر يفرقناا فلأرض ...
عراضت ابتسامتهاا وهيا كترد علييه:وييه...عندك صح...
عصاام سكت تواني ونطق :إوى ونتي؟؟!
جوباتو وهيا لاوية فمهاا بستفهاام:ماالي أنا؟؟؟
عصاام:ممم واخا ساكنين فدرب واحد معمرك حطيتي عليا لعيين ولا كنتي طايحة فياا متلا؟؟
نسرين:وبصراحة بصراااحة....كنت مزعوطة فيك...
عصام ميق فيهاا:مزعوطة ݣااع؟؟..هه تي بركة من طنز..
جوباتو وهيا كضحك:ههه والله إلى معااك بصح...و نهار لي قالت ليا خنساء غادي تجيو تخطبوني..مقداتني دنياا...مقدرتش نغمض عيني ديك ليلة و ننعس بالفرحة.... اصلااا بنات الدرب كاملين كاتعجبهم غير هما بالعلالي وانا داكشي فالقلب
ضحك ليهااا...وشبك يديه مع يديهاا و كملو لمشي كايهضرو مع بعضياتهم ونسرين خدات تصاور مع رااسهاا..وعطات لعصام يصورهااا...شبعاات بوزاات...اي تصويرة خداتها كتلوحهاا ديك ساعة فسطوري..زعمااا شوفوني راني خارجة مع رااجلي...من بعد دازو حدا واحد مول لكروسة كايبيع لببوش...غير قشعاتهاا وهياا تجر عصام يمشيو لعندو ملهوفة عليه...دار ليهاا خاطرهاا..ومشا معاها كلاتو بوحدهاا أما هو مبغاهش مكايكلوش أصلاا ..من بعد زادو دارو مع راسهم... حتا بدا كايضلام لحال...خدات نسرين لݣلية وعصام خداا فاكية مخلطة... كملو تفويجة مسخااتش نسرين بديك لخرجة معاه لي عجبااتهاا بزااف... رجعو لباركينݣ باش ياخدو سكوتر... وقفات هياا كاتسناا فيه..حلات صاكهاا وهزات منو تيل... سيفطات ميساج لخنسااء بلا مايشوفهاا علماتهاا راهم جاايين.... جا عصاام...و ركباات موراه دارت لكاصك ديالهاا ومن تماا انطالقو لداار ..
تعاشات العشية وخنساء متكية على رجل عبدو فوق الربيع وقدامهم ممر ديال الناس كايتمشااو خصوصا لي كوبل لي فمقتبل العمر هادي هي بلاصتهم ... عاد الجهة لي فيها الوااد مقابل معاهم ... كايلعب بشعرها ويتأمل ملامحهاا ... بعض المرات كايحس ببراءة غريبة فتفاصيل وجهاا ... وبعد المراات كاتبان افعى سامة لي قرب ليها ممكن تلدغوا فأي لحظة ... ابتاسم بهدوء : شنو مزاال ماشبعتيش ؟؟
خنساء عينها فالسماا : صراحة وبلاما نكدب عليك ... بعد المراات كانحس براسي ماعندي فايدة فهاد الحيااة ... لا قراية كيف النااس ... لااا خدمة ... لا حتى حاجة غير عايشة وصافي ...
عبدو : واايلي حتى نتي ... واش نتي قد هاكا كاتفكري ليا فهادشي ... الحياة باقا قدامك ارااا ماتحققي فيها ... وماشي ضروري بالقرايا .... المهم الواحد يكوون قادر ... شوفيني انااا عاايش لااافي ( la vie) كيفما هي وماحاسبش للدنيا خباار ... كاندوز النهار بنهارو حتى يحن مولااناا ...
حسات براسها غايخصر ليها الجو : مافيا لي يطيح الموراال ... نسدو الموضوع حسن ...
عبدو : ماخفتيش خوك يجي يلقاك خاارجة ؟،
خنساء ضحكات ووقفات قادات الكلسة : هههههه دايرة مع مراتو مني يكونوا جايين تعلمني ... القضية غاتسهال دابا
عبدو : وااا نمرة نتيا ... باغا تبروفيتي فيهااا ماااعليكش ....
خنساء : الواحد هو لي يستاغل الفرص والاشخاص على قبل مصلاحتو ...
دوز يدو على خدودها : كل نهار كانزيد نعرف اني معاشر حية فصفة انساان ... قرب عندها بهدوء حاط شفايفو على شفايفهااا طابع قبلة خفيفة بزربة خاطفها منها : اححح على قنوفة عندك غير ديال العضان
هزات حاجبها : ايوااا بااز ( مسحات فمها ): حرام عليك خصرتي ليا العكر ابنادم ... تفووو ... اخر مرة تحط عليا داااك الفم ونتا يلااه كاامي ععع ( مخصرة كمارتها)
ضحك مجبد ليها شعرها : المرة الجاية ندير مسكة عاد نبوسك .... كوني هانية ... ( وقف ): يلاااه تكعدي يلااه نلحقوا المغرب قريبة ... وانا عندي شي غراض
خنساء هزات صاكها : ممممم الغرااض .... قول عندك شي بنت داير معاهااا .... الله يمسخك
خرج عينو بلعاني : كاضلمني هاكا ابنت السايب ... على انا نقدر نشوف فغيرك ...
جراتوو كاتعوج كمارتها ... تمشااو وطلعوا نيشان للبلاكة ديال الطوبيس .... ركبوااا واتااجهوا راجعين للحومة ...
وصل عصام و نسرين للدار .... لقاو خنساء متكية فالصالون وحداها نصيرة معبسة شبعاتها معيور منين جااات ... بالطليب والرغيب باش قنعاتها ماتقولهاش لخوها وباها ....
خنساء دارت جهتهم : على السلامة ... نتوما لي جا معاكم الخروج ...
نسرين ضحكات غامزاها : ايوا الله يجيب لي يخرجك حتى نتي
عصام كلس : نوضي وجدي ليا الدوش ...
شافت فحوايجوا عامرين رملة : ياااك اخويا نتا تبحر ليا مع المدام وانا نوجد الدوش ... ايواا الله ينعل لي مايحشم
نصيرة مغددة كاتحشي ليها الهضرة : الله ينعلوا ويخزيه ....
نسرين عاقت بالبلان كاضحك اما خنساء غير شافتها بدات تشعل وهي تنوض توجد لخوها الدوش .... كلسات نسرين كاتبل عينيها : ولاهيلا كانت خرجة على من زيناتها ... دوزنا نهار مبرع
شافت فيها بنص عين : ايوا بااصحة والراااحة .... ( ميقااات كاتدوي تحت منها ): الحنة ما زال فظفارها والخطاب جابو خبارها
عصام : قلتي شي حاجة اعمتي ؟؟
نصيرة: قلت ليك اوليدي راه ختك تكون وجدات ليك الحمام الا بغيتي دوش باااش ترتااح ... العشاا رااه وااجد الاا بغيتوووه ( طلعات فيها ): ولكن على ما بااان لياا جايين شبعانين ... عصام حرك راسو وزااد يدوش
نسرين : ايوا مافيها بااس نتغداو بيه غدا ... راه كايقوليك اللي خلى عشاه لغداه، ربي اغناه.
نصيرة باستهزاء : اياه وكايقولو اللي خلى غذاتو لعشاتو, ما تشفات فيه عذاتو .... ولكن كون كفضتي على يديداتك ووريتي حنتهم اما الا غير الفم وضريب الكلاام كاااع كانعرفوا ليه ... ايوا نمشي نصلي واحد جوج ركعات ونحط راسي للارض غدا صابحة خدامة ... نستغفر مولاياااا حسن من عطيني نعطيك
زادت ونسرين تنهدات براحة : الله على راحة ... مشية بلااا رجعة ياربي ...
ناضت طلعات لبيتها بدلات عليهاا ودارت حوايجها فالسلة حتى تجمعهم للصابون .... بدلااات عليهااا ولبسات شورط قصير مع ديباردور وتكات فبلاصتها كاتسناه يخرج ...
خنساء تعشات مع العربي مني دخل من القهوة وطلعات لبيتها لقاات نصيرة كاتشخر .. غاطسة فنومهااا ... هزات تليفونهاااا لقات ميساج من اينوي بيلا قريبة تسالي ليها الكونيكسيون ... عوجات كمارتها كاتسووط : بفففف ... نموت ونعرف هادو كيفاش كايديرو لهاد الروشاارج ... كايسرطوها ياربي السلامة ...
تنهدات ودخلات للفايس بداكشي لي بقا .... حلااات الكونفيرساسيون ديال واحد السيد شحال وهو مصدعها دوات معاه غير شي مرة وقلبات عليه .... دخلات نيشان للبروفاايل ديالو بنقشاتو فين كايكلس كاتوزونوا وااش ملعق شوية ولا واالوو ... بان ليها كايكلس فبلايص عادية... خصرات وجهها : هاذا يلاااه ينفعني هاد الليلة ...
خنساء تعشات مع العربي مني دخل من القهوة وطلعات لبيتها لقاات نصيرة كاتشخر .. غاطسة فنومهااا ... هزات تليفونهاااا لقات ميساج من اينوي بيلا قريبة تسالي ليها الكونيكسيون ... عوجات كمارتها كاتسووط : بفففف ... نموت ونعرف هادو كيفاش كايديرو لهاد الروشاارج ... كايسرطوها ياربي السلامة ...
تنهدات ودخلات للفايس بداكشي لي بقا .... حلااات الكونفيرساسيون ديال واحد السيد شحال وهو مصدعها دوات معاه غير شي مرة وقلبات عليه .... دخلات نيشان للبروفاايل ديالو بنقشاتو فين كايكلس كاتوزونوا وااش ملعق شوية ولا واالوو ... بان ليها كايكلس فبلايص عادية... خصرات وجهها : هاذا يلاااه ينفعني هاد الليلة ...
سيفطات ليه ميساج كاتعض على قنوفتها :💬💬 سلام نور الدين ... سمح ليا مجاوبتكش كنت مشغولة شوية مع الامتحاناات ... ياك صافا بيخير عليك
بالخف جاوبها : 💬💬الحمد لله ... نتي لاابااس ... عاش من هضر معاك مدة هادي وانا نسيفط ليك ... قلت غير مابغيتيش تجاوبيني
خنساء : 💬💬 لا حاشة الله اودي ... شكون هادي لي ماتجاوبش راجل فحالك غير الا كانت هبيلة
غير قرا الميساج وهو يصوني ابييل ... شاافت جهة عمتها وخرجات من البيت كاتسلت هبطات للصالون لتحت ... جاوباات بنبرة حنينة مستحيل تقول انها خنساء نفسها : اهلاااا نور الدين ... ( كاتلعب بشعرها بتحلوين )
نور الدين طاح فالصوت بلاما يحس : عيون نوور الدين وقلب نور الدين ... هاد الصوت كااامل ومخبياه علياا ...
خنساء كاتزيد ترطب هضرتها : احم ... ايوا خلاااص ماشي كاااع لديك الدرجة ...
نور الدين : لهاد الدرجة وفوتها كاااع ... نمووت ونعرف انا مولااات هاد الصوت الرنااان ... كيف دايرة ؟
خنسااء : كاين الشرجم حداك ؟؟
نور الدين : كاااين البالكون كاااع نطيح منو على قبل لالة البناات ...
خنساء ضحكات بت*حبين : ايواا طل منو هز عينيك للسماااا وشوف مولات الصوت الرنااان كيف دايرة . ورد بالك لاا طيح من تما بصح...
نور الدين شاف فالقمر و وسع ابتسامتو : الله على ضو الكَمرة وانا كانقول علاش الليل ليوم غير كااع الليالي
خنساء : ايوااا شتي ... مرة مرة بقا الطل علييه الا توحشتيني ...
نور الدين : ايوا الليل هاهو لقينا ليه الحل ... وفالنهار اش ندييير ؟؟؟
خنساء بضحكة شريرة : نخاف نقوليه طل فالشمس وتعميك ....
نور الدين : نعما ونصماك ونعرااج على ودك ... ماكرهتش نشوفك ... زعمااا ماتقدري تضوي عليا هاد العتمة ؟؟
هزات عينيها بعجرفة ونطقات بنبرة هاادية كادوب الحجر : ممممم ماكرهتش صرااحة ... ولكن الانترنيت غاتسالي دااباا ... ( كاتعض شنايفها ): ماعندك زهر ...
نور الدين : نجيبو والديه هاد الزهر ... سيفطي ليا نمرتك انا غانسيفط ليك روشارج داباااا
ابتاسمات بنصر : احم ... مابغيتش نعدبك صراااحة ...غير بللاااش انا الصباااح ونشارجي ...
نور الدين : وشكون قالك انا غايصبح عليا الصبااح الا ما شفتكش ... سيفطي دابا قبل ما تقاضى لييك ...
خنساء : اووك ... لهلااا يخطيك علياااا ....
نور الدين : لهلا يخطيني على هاد الولية ياااربي ... يااااربي ومنين عندي هاد الزهر ... انا راااه كنت منحوس حتى جيتي نتي
خنساااء : هههههه لاااوااه لاااواااه ... يتنحس عدوك ولي مايبغييك .... قطعااات علييه بزربة عااجبهاا الحااال وسيفطات ليه النمرة وتكات فوق السدااري كاتسنى الروشاارج ... مكاملاش قسمااين حتى وصلها الميساااج فيه 100 درهم كونيكسيووون ... وسعاات ابتساامتهااا مكانتش متوقعاه يسيفطها كاملة ....
هزات حاجبها بتفكييير : ولاهيلاا صدقتي سخي ... هههههه باش تاكل الشوك أ عمي الجمل, باللسان لحلو .. احح عليا وخلااص ...
صونا عليهااا وهي ضحك وقطعاات بكل دم باارد بلوكات نمرتوا ... ودخلات كتبات ليه فالفايس : 💬💬الراجل بالهمة أما اللحية راها حتى عند العتروس .... وماتنساش الي دار راسوا في النخالة ينقبوه الدجاج .... واش كاين لي كايتيق فالكَمرة وهي كل مرة فشكل ... على الاقل صبر حتى تكمل ... 🌑🌒
🌓🌔🌕🌖🌗🌘🌙 ... بصحتك القالب مواااح 💋
سيفطات الميساج وبلوكااتوو فرحاانة كايعجبها تشمت الرجال لي كايبغيوو ياكلو للمرأة دماغها بالهضرة الحلوة ... طلعاات لبيتهااا كاتفرج فالفايس طالعة هابطة حتى داها النعاس ...
فاق عبدو على الصباااح خرج من البيت لي كاينعس فيه فالسطح ... داز جهة الروبيني غسل وجهوااا كايصحصح ... الجو باقي بااارد مع الحال بكري .... دخل للبيت هز سيرفيت لبسها عليه ... خدا كاارو على الريق كماااه وهبط للتحت لقا باه ومو كالسين على الطبلة ديال الفطور ... غير شافو وهو يخنزر : تااا واش مباغيش تحشم
عبدو كلس قارم حجبانو : مالنا الواليد على الصباح اش كااين ؟؟
حسن : صابح على الكماية تااني ... ريحة داك الويل هابطة عندي حتال هناا .... مااعرفتش اش درت فحياتي حتا بلاني بيك الله ...
حياة : نعل شيطان احسن وخلينا نفطرو فراحتنا ها العاار ...
حسن قارم حجبانو : تي اشمن راحة ولا زبل ... واش لي عندو بحال هاد الكنس يبقى ليه شي خاطر .... ياااك قلت لموك بعد على ديك البلية راه غاتخرج عليك ... المراهقة وفتيهااا اش باااقي لييك ... راك فتيني فالطول وشي مادرتيه .... لحيتك قد العترووس والدرااع الله يجيب
عبدو : بدينا تاني ... العفواااا
حسن : الله يعفو عليا منك يا تريكة الناقصة ... ماخدمتي كيف سيادك ماقريتي ... غادي جاي بديك الشكارة تشير بيها عامرة غا حشيش وجوانااات الشمكاااار ....
عبدو وقف صاعر : تاااا مااالك على هاد الصبااح بانت ليك فيا تاني ولا كيفاش ...
حياة كاتهدنوا : ها العار احبيبي لاما ميك علييه .... البزيزيلة اوليدي لا تجاوبوش ...
عبدو بعدها عليه : هاهو الواليدة هاهو ... حياااة ديال الويييل ... ( هز كاسكيط وخرج من تما شااعل )
حياااة محروقة على كبدتها : هادشي لي بغيتي هاهو خرج بلا فطووور ...
حسن زفر : لهلا يوكلوا ليه الكلوشاار لاااخر ... الله يخليه كنس بالخلاا ولكن نتي نتي لي ضسرتيه حتى خرج بيا فعودي ... انا عند بالي واالد رااجل ساعة والد غير خطية الله يلكَيها ليه
حياة تنهدات : برا والباس علييه ... ( مدات ليه اتاي ): فطر فطر
حسن : بحالك بحالو غير سهم الخطية ياربي السلااامة .... كمل ماكلتوو كايعرعر وعبدو طلع لبيتو الفوق هز شكارتو وخرج نيشان للقهوة فين كايريح دار بناقص من الفطور
خنساء كالسة مع نسرين فالبيت كاتعاودو حتى صونا ليها التلفون ... وسعات ابتسامتها : ياااختي حب قلبي كايعيط على النبوري
نسرين : الله الله على حب قلبي ... جاوبي جاوبي ...
جاوبات : اهلا عبدو صافا
عبدو كالس فالقهوة : صافا الحمد لله ونتي ؟؟
خنساء : بيخير ؟؟ ( بان ليها من صوتو ماهواش ): ياك لاباس عندك شي مشكل ؟؟
عبدو تنهد : لا غير ضارني راسي ... اليوم مغاديش نجي لليسي ... دوي مع ديك الكرابة ديال المكلفة ماتقيدنيش ..
خنساء : علاااش ؟؟
عبدو : من بعد وندويو ... صافي نعول عليك ؟؟
خنساء :واخا كون هاني ...
عبدو ماعندو خاطر : يللاه تهلاااي .....
خنساء : باااي ... خنساء قطعات لابيل تحت انظار نسرين لي كاتشوف فيها بنظرات استهزاء .... حركات ليها راسها بمعنى شنو ...
نسرين ضاربة يد على يد بالغدايد : ربي نموت ونعرف اش عاجبك فداك كحل العفطة لا زين كيف الناس ... لا خدمة لا فلوس لا حتى حاجة تفرح القلب ...
خنساء : وشكون قالك اختي انا بغيتو على زينو ولا على فلوسو .... هاااء كون بغيت مول الزين والفلوس لمخير فاولاد اوجيه يطييح مايعاود يهز الراس .... نحط فيماه سمي يفشل ولكن مابغيييتش ... ( سبلات عينيها بطنز مكاتبغيش تعطي راس الخيط لحتى واحد ) ... وزايدون القلب مايشاور اختشي .... ههههه انا بعدا كايوفوج عليااا وكانسا العاالم والهم والغم غير بالنشاط لي فيه ... ولاهمااا خايب و يونس ولا غزال يهوس ....
نسرين هزال يدها بلا حول : اختي والله بعد المرات مكاتفهمي ليا ..... مكاتبغيه مكايبغيك وشاريين السعادة وكل واحد فيكم عايش هاني بحال الا مناقصكم خير .... جيني نيشااان كاتحسي بشي حاجة من جيهتو ؟؟
دارت رجل على رجل كاتبرد ظفارها وتمضغ المسكة مجبدة عينيها كايعجبها تخلي بنادم تالف : واش غانقول ليك ... داكشي صعيب تفهميه ... وزايدون زعماا نتي السَّحت كنتي تحماقي عليه .... دوزتواا يامات وفلخر هانتي تزوجتي بالزين ديال خوياااا ... نتي حلال عليك وانا حرام عليا .... تبيعي القرد وتضحكي على لي يشريه هههههه
خرجات فيها عينيها كادورها لايسمعها شي حد : سكتي يعطيك الساكتة .... يسمعك خوك ينحرني .... مالنا على هاد الهضرة دابا ... داكشي عقل الصغر وصافي وزايدون على الاقل حسن من داك عبدو ديالك ....
صغرات فيها عينيها بابتسامة : ممممم وماحشمتيش ... زعما راك مرت الراجل دابا .... باقا كاتفكري ليا فالحيبان القديم ولا كيفاش ( غمزاتها )
نسرين : واش نتي مريضة لا ... اشمن حب ولا خرا راااه غير كنا مدوزينهاا وصافي ... وزايدون عمري بغيتوو غير مصاحبين باش نتسماو اون كوبل وصافي ... نهار قلت ليه غانتزوج راه شاف فالايكس ديالو يردها زعما بقاا سول فيا .... واصلاااا عمري طرات بيناتنا شي حاجة ... صديق وصافي
خنسااء عوجات فمها : ممممممم ايواااا ومني كنتو تخشاو فمور الليسي نتي وياه فاص افاص ... ( هزات حاجبها ): كنتو كاتقراو المعودتين متلااااا ههههه
نسرين خنزرات : خنساء صافي هنينا ماتعاوديش تجبدي ليا هادشي .... خوك الا سمعني يطلقني باقي كاعما كملت نهاري ... واش نتي باغا تشتتي ليا الشمل .... معارفاش خوك شوكتو غير مقلزة راه والله حتى يدير فيها شد ليا نقطع لييك ... كنا فالنعالة غانوليو فالعمامة .... سدي الموضوع
خنساء وقفات : ههههه غير تهنااي داكشي بيناتنا .... ولكن خويا راه غاالط فيك عند بالو كاعما كاتحركي الدجاجة على بيضها ونتي السلكوط ديال الدرب كنتي طايحة معااه ههههه .... ( نسرين شافت فيها بعصبية ): هههههه صافي صافي هاني ساكتة ....
ناضت من بلاصتها يلاه غاتخرج وهي دور عندها مصغرة عينيها : كانتخايل ردة فعلو الا عرفك مدوزة العجب مع السحت
نسرين بلعات ريقها : خنساااااء
هزات حاجبها بمكر باغا طنز عليها: اش غايطرا الا قلتها ليه ههههه
نسرين الدم هرب من وجهها ... وخنساء ضحكات : بردي بردي غير بغيت نشد فيك ونتي غاتموتي غير راسك
ضحكات وزادت خرجات من البيت كاتمختر متاجهة لبيتها تبدل باش تمشي للمدرسة ... خلاتها بالعة ريقها اكتر حاجة خالعاها هي ان خنساء عارفة علاقتها اللولة وهي متأكدة انها الا قلبات عليها تحرق العشرة وتفضحها وعصام ماشي من نوع لي يتفهم ولا يقول ماضي غادي يندمها ... دوراتها فراسها مزياان ... معرفة خنساء بهادشي وهي معاها فدار خطااار عليهااا .. الا نوضاتها معاها شي نهار تقدر تشبك فيها وتفرش كلشي بلااامااا تفكر ... تنهدات كاتحاول تنفض الافكار من راسها ودارت جهة المجر هزات كريم تمسح يدهااا كاتلاهي الوقت وفنفس الوقت دماغها خدام فشي حل لي يهنيها من هاد الوسواس فخطرة مايمكنش تبقا عايشة هاكا ديما
خنساء سالا الحصص ديالها .. قراتهم غير بزز خصوصا ان عبدو لي كايونسها مكاينش دازو عندها تقاااال .... خرجات من الليسي راجعة للدرب مشات للقهوة سولات عليه قالو ليها عاد مشا واتاجهات للدرب ... قشعاتو كاالس قدام باب دارهم ... تقدمات جهتو كلسات حداه فالعتبة ديال الباب ... كاتدور عينيها جهة الدرب لايكون جاي خوها : شفتك اليوم ماجيتيش للمدرسة مالك ...
تنهد : ماعندي كانة لا لقراية لا تا *لوة ... ( هز فيها عينو ): حتى نتي كون غير ماجيتيش ... غير غاتسمعي شي حاجة ماشي هي هاديك ماشي على كانتي .... فوتيني هاد الساعة وزيدي خلفة لداركم .... ( كاينتر فالجوان )
خنساء : ممممم هي طرا شي مشكل فالدار ؟؟
عبدو خنزر فيها : خنساء قلبي ستة تسعود الله يحن علييك ... ولا غانخرج فموك هاد الاعصاب لي فيااا .... تلاحي *ودي لداركم .... المغرب هادي وخوك شوية ويوصل ... المجاج لي يزيد شي مشكل اخر مكاينش ... سيري فحالك ...
حطات يدها على ركبتو : ومن ايمتا كانشوفك مغير ونفوتك .... حنا زعما راه عشران ومادوزناش قليل ... قول ليا اش تماااا ... خوا الجيب تاني ؟؟؟
عبدو ساط عارفها مغاتفرقوا حتى تعرف اش كاين : شتي بربي كون مكانت الواليدة مانعاود نضرب الضربة فهاد البلاااد .... غا لي يزيد خلفة مايعاودش يتلفت وراااه .... حتى حاجة مامقادة .... م*ودة على مي من كاع الجواايه ...
خنساء ابتاسمات : ونتا ديما م*ودة علييك .... الله يهديك مالك هازها منين تقالت .... خفف عليك اصحبي وعيش لافي ( la vie ) زعما غير نتا لي عندك المشاااكل راااه العالم كاامل ضربة فمو حتال الجدر .... مكاينش لي عايش هاني لي ماعندوش هادي عندو هادي وهي غادة ...
عبدو : نتي رااااك معارفة وااالو .... طرف الخبز كايوصلك حتاال الدار .... خوك معيشك قاايدة ولي طلبتيها كايحضرها واخا يقطعها من لحموااا .... باك من نهار ماتت مك عمروا دخل بنت المرا عليكم غير باش تبقاو هانيين ... شكون فحاااالك .... غير ماباغااش تحمدي الله ... اودي قلبي السيجي حسن ...
شدات الجوان من يدو : ايوا نتاااا عندك هاادااا كايهزك من الدنياااا وكايخليك طاااير ( غمزاتو): نجرب نشوف باش كاتحس ...
عبدو : نتي رااااك معارفة وااالو .... طرف الخبز كايوصلك حتاال الدار .... خوك معيشك قاايدة ولي طلبتيها كايحضرها واخا يقطعها من لحموااا .... باك من نهار ماتت مك عمروا دخل بنت المرا عليكم غير باش تبقاو هانيين ... شكون فحاااالك .... غير ماباغااش تحمدي الله ... اودي قلبي السيجي حسن ...
شدات الجوان من يدو : ايوا نتاااا عندك هاادااا كايهزك من الدنياااا وكايخليك طاااير ( غمزاتو): نجرب نشوف باش كاتحس ...
نترو ليها من يدها مخزز : *مل على موك الضمير ولا ماالك ... شتي نهار لي يسخا عليك عمرك قربي لهاد السم ..... والله حتى نقلب على حسك الدنيا .... ( رما الجوان فالارض وعفط عليه مغزز ): الوسخ ماشي ديااالك ومايصلاحش لييك .... وياويلك تعااودي هاد البلان مرة اخرى ..... ولا وديني حتى نفوتي فمووك شي دقة ماتعاوديش تهزي الراس
خنساء هزات حاجبها : مالك اصحبي صعرتي راه غير كنت كانقجم معاك .... هاااء
حمر فيها واقف : هادا ماشي ضحك ... تلااحي فحالك ... يلاااه رولي ....
خنساء كاتسوس حوايجهااا : ها هي غادا .... وماتزابيييش ... نشوفك غدا صافي ...
عبدو : على مولانااا .... تهلاااي .... شارت ليه بيدها بسلااامة وزادت جهة داارهم معاجبهاش حالو ... عزيز عليهاا واخااا مكاتحسش بجيهتو بشي مشاعر خاصة ولكن علاقتهم دامت مدة وخلاتهم يولفوا بعض ويرتاحو لبعضياتهم ... والمشاكل كايتقاسموها بجوج واخا غير بالمعاودة ....