تصدم فاش عرفها سمعات حديتو و قال اخر كلمة ليه و خرج من البيت خلاها حايرة كتفكر شنو قصد
تامر : غانتسناك من هنا لساعة حدا الجردة لي فايت مشينا ليها كنتمناا تجي بغيت ندوي معاك لاخر مرة
مشات دغيا لماريو صاية فالازرق السماوي وتيشورت بيض طلقات شعرها و سرحاتو دارت ميكاب خفيف هزات صاك بيض صغير و لبسات صندالة صيفية بيضة
بغات تخرج لفت انتباهها فلاش التيليفون تعجبات شكون ممكن يصوني ليها و تيليفونها من شحال مبقاش صونا
هزاتو تجاوب كتفاجىء بختها اسمهان كتصوني ليها فواتساب ابيل فيديو باش تشوفها
جاوبات و بعدات تيليفون عليها شويا باش تبان
اسمهان : سلام ختي
شيماء : لباس عليك
اسمهان : بخير اختي ونتي اش خبارك توحشتك علاش مكتصونيش ليا ولا تسولي
شيماء : غير مع الوقت و الخدمة اختي مكنساليش
اسمهان : ااه اختي الله يعاونك مناش وكنبغي نسولك شنو كتخدمي
شيماء ( جاوبت بتلعتم ) : اا انا رسامة
اسمهان : اه مزيان احبيبتي عرفتي عندي ليك واحد الخبر غادي يعجبك
شيماء : وي كنسمعك
اسمهان : انا تخطبت اختي خطبني واحد كوميسير نااري شحال بوكوس اختي من نوع لي كيعجبني و مكرهتش تهضري لخطبة ديالنا و العرس
شيماء : سمحي ليا ولكن منقدرش نخلي خدمتي ونجي
اسمهان ( تقرصات من كلامها ) : كيبان ليا برزطتك اختي نخليك دبا
قطعات عليها باقا مكملاتش كلامها و خرجات بزربة هبطات لقات شيفور كيتسناها ركبات و توجهو الجردة
هبطات من لوطو دورات عينيها مبانش ليها قالت فخاطرها غادي يكون باقي مجاش
جلسات كتسناه فجأة بدات كطيح شتاء ولكن بقات بلاصتها متحركاتش حتا حسات ضل فوق راسها كأنه شتا حبسات غير فوقها
هزات راسها لمحاتو واقف بابتسامتو العريضة كيشوف فيها بكل حب بادلاتو الابتسامة
جلس حداها و تغطاو بزوج بالمضل
جرها تكات علا كتفو و بدا كيعاود ليها علا حياتو و سباب لي مخليه محافض علا ليليان
اسمهان : شفتييهاا اماماا سمعتييهاا كيفااش كدوي معايا و مقاالتش ليا حتا مبرووك
عيشة ( كتمسح ليها دموعها ) : ششش صافي ابنتي حنا معاك وهيا اكيد مقصداتش والو بهدرتها
اسمهان : لا اماما هيا مابغاتش تحضر لفرحة ختها ولا تقول ليا غير مبروك فرحت ليك هيا مفرحاتش ليا مبقاتش كتحملني أمي هىء هىء هىء
مرام : صافي اختي عفاك راكي عارفا طبع شيماء كيفاش داير حنا معاك و غادي نديرو ليك احسن عرس فالعالم و اش بأن ليك نعاونك تصممي كسوة عرسك بيديك اش قلتي
عيشة : يالله نوضو بداو فيها دبا نيت انا نمشي نوجد شي حاجة ناكلوها و نجي نعاونكم راه مكم خبرة فهادشي
مرام : هههه هاي هاي علا عيشة ولات مصممة
اسمهان : ولكن انا بغيت نكون عارضة ماشي مصممة كيفاش غانقدر نصمم
مرام : بما انك باغيا تكوني عارضة ادن عندك فكرة علا الازياء لي كيعجبوك
فجهة اخرا
خانوه دموعو و هبطو قدامها اول مرة يبكي قدام بنت
حسات بدموعو سخانين فوق كتفها هزات ليه وجهو بيديها و حضناتو لصدرها كطبطب علا راسو و نطقات بخفوت
شيماء : ششش عفااك انا معاك و عمرني نخليك حتا تلقا واليديك و كنوااعدك نرجع انا وياك المغرب و نقلبو عليهم واخا متكونش ليليان ولا تعاوننا
تامر : شيماء نسولك
شيماء : وي سول
تامر ( هز راسو كيشوف فيها ) : واش كتبغيني ولا لا عفاك ولا متكدبي عليا
طلع هارون لبيتو و هز تيليفونو دخل لواتساب كيقلب علا نمرتها علا الاقل يدوي معاها يخفف من حزنو شويا
صونا ليها لقاها مشغولة كاتهدر مع شي واحد بقا كيتسنا حتا وصلو منها ميساج
اسمهان : سلام
هارون : سلام حبيبة
اسمهان( حشمات ) : لباس عليك
هارون : توحشتتتك غدا غانجي بغيت نهدر مع ماماك باش نقربو موعد العرس
اسمهان : ولكن باقي حنا موجدنا والو من احسن بلا منزربو
هارون : شوفي العرس انا لي غادي نديرو فاكبر قاعة و غادي يكون احسن عرس ممكن تشوفيه فحياتك
اسمهان : ولكن بغيت نصمم كسوة عرسي بيديا خاصني وقت
هارون : انسيفط عندك مصممة تعاونك تكمليها دغيا
اسمهان : واخا
سد تيليفون وتكا كيفكر امتا يتجمع هوا و فاتنتو فدار وحدا تحت سقف واحد ايمتا يكونو شخص واحد بقا كيفكر حتا داتو عينو
فجهة اخرا
حطات يديها علا وجهو كتمسح ليه دموعو قطع ليها قلبها بعدما سمعات قصتو وانه عمرو شاف واليديه
شيماء : اه انا كنبغيك و عمرني نتخلا عليك و كيف قلت ليك غادي نعاونك باش تلقا واليديك
بقا كيشوف فعينيها لدقائق كيفاش انسانة حنونة بحال هادي مضطرة تبعد علا عاىلتها و تعيش وحدانيا فبلاد غريبة مع ناس غرباء عليها
كيفاش بحال هاد العيون البريئة كتبكي كل نهار بسبب الغدر و الضلم من اقرب الاشخاص
كيفاش عطاتني خاطري نبكي هاد العيون
عنقها و ضمها لصدرو و كتافا بصمت كيحاول يحسسها بلي هوا معاها و كيبغيها و عمرو يتخلا عليه
دوزات اسبوع كامل غير فبيتها كتوجد فستان عرسها وختها معاوناها و حتا المصممة دايرة شغلها معاهم
كملو تصميم الفستان و عطاتو المصممة تخيطو ليها بادق تفاصيل
و بدات كتعتاني براسها كدير وصفات لوجهها و لحمها باش نهار العرس متخلي ليهم ميقولو عليها
بعدما تافقو بلي العرس بعد جوج سيمانات بدات عيشة تحضيرات شرات الحوايج لبنتها و الروايح و المكياج جمعات ليها جوج شانطات عامرين
#بعد اسبوع
القاعة واجدة و مزينة من اكبر القاعات الضياف حاضرين كاملين و الميدات محطوط فيهم الحليب و التمر و الماء
كالسة عند نكافة كتسنا راجلها يجي يوصلها بعدما لبسات و تقادات رجعات بحال الأميرة بالمكياج لي برز جمالها و عطاه رونق رائع
كانت تكشيطة حمرة مرصعة بالاحجار الكريستالية لي كتلمع مع مضمة لي رافعة صدرها تاج فوق راسها كبير و مرصع حتا هوا بالاحجار الكريستالية اللامعة شعرها مقاد و متول باخر شديدات العريسات مكياج صارخ فوجهها مع خيط الروح فجبينها لي زادها جمالية صباغة فالاضافر بيضاء لي بينات يديها بيضين كتر من القياس مع صندالة عاليا فالحمر و العقدين الاول من الجوهر كيلمع و التاني المكون من 2 طبقات
كلشي البنات لي معاها كيشوفو فيها بحب و اعجاب كأنهم اول مرة يشوفو عروس بهاد الجمالية
تسمع الكلاكصون قدام باب الصالون غطاو ليها راسها و خرجو مع الزغاريت و الصلات علا النبي و البنات دايرين بيها مخبينها علا عيون الحسادة ركبات فاللوطو حداه
كيحاول يسرق نضرات منها ولكن الشال لي علا راسها مغطيها مكرهش يحيدو من راسها ويشوفها يسقي عييونو بجمالها ولكن ميقدرش هادي هيا العادات
وصلو القاعة و تعالات الصلاة علا النبي و الزغاريت تحل الباب و دخلات العروس فوق العمارية و العريس كيتمشا قدامها كلشي تبهر من جمالية المنضر
داخلين بيها كيشطحو علا أنغام أغنية عرسي اليلة للمغنية خولة بنعمران
تعالات الزغاريت و لالة عيشة لي مقاداها فرحة ببنتها لي بحال الملاك فوق العمارية
هبطات من فوق العمارية و مشاو كلسو فالبرزة ديالهم لي كانت عصرية و مزينة بالورد الابيض و الاحمر و فيها سمية العرسان
طفاو الأضواء على غفلة و توجه ضوء لجهة الباب تطلق لحن أغنية ma sœur كلشي كيشوف جهة الباب و متبعين مع اللحن. و الصوت العدب لي كيغني من غير عيشة و مرام و اسمهان لي خانوهم دموع فاش شافو شكون كيغني
لشي مستمتع بصوت غنائها العذب فجأة تخلط بصوت رجالي لي زاد جمالية الاغنية
كتمشا بخطوات تابتة و بطيئة نحو وسط القاعة و كسوتها لي شادة مساحة كبيرة
كانت عبارة علا كسوة فالاحمر دموي طويلة و منفوخة و مزينة كأنها من ارض اميرات ديزني طالقة شعرها و دايرة تاج مرصع بالاحجار حمراء كريستالية لامعة عقد فعنقها باللون الاحمر خيط من الؤلؤ الابيض مزين جبينها
مكياج تقيل لي برز جمالها كانها ملكة كتستعرض جمالها مع العكر الاحمر الدموي لي زاد من رونق مضهرها صباط طالو بيض فرجليها
كتغني وعينيها عامرين دموع ولكن محاولة تمنعهم باش متخسرش مكياجها
وقف حداها شاد فخصرها وشاف فيها و ندامجو مع الاغنية كيغنيو بزوج فدقة وحدا
لابس كوستيم كحل مع بابيون حمرة شعر لي مقادو كيرلي كل زغبة واخدة حقها حسن وجهو من الشعر يشبه القمر في نوره كأنه ملك بجانب ملكته
هبطات اسمهان من البرزة و تمات غاديت جهتها و تبعاتها عيشة و مرام لي مصدومين و دموع مسيطرين عليهم
هيا كتقرب ليهم بخطوات تقيلة هادئة و هوما نفس الشيء كيقربو منها بخطوات هادئة راقية
وقفات قدامهم كتغني مدات يدها مسحات لختها دموعها و عنقاتها و عنقوهم مرام و عيشة عناق عائلي كيعبرو فيه علا اشتياقهم ليها وهيا كدلك كتبين ليهم شحال موحشاهم
كملات اغنيتها و عنقات اسمهان
شيماء : ششش صافي احبيبة ليوم ليلتك مخاصكش تبكي
اسمهان : توحشتتك اختيي توحشتنتك شكراا علا المفاجأة يحساب ليا مغدياش تجي
شيماء : حمقة نتي كاينة شي وحدا مكتحضرش عرس ختها
عيشة : برااك من البكاء هاد العرس رديناه جنازة
مرام : صافي البنات اجيو نشطحو
شيماء : مرام محتاجاك ممكن ندوي معاك دقيقة
مرام : اه مرحبا اختي
شيماء ( شافت فتامر ) : تامر اجي معايا
مرام ( قربات لعندها ) : وتيتيز هواا ضبرتي عليه يااختيي
شيماء : زيدي زيدي خلينا نمشيو بعدا
مشاو غادين خارجين من القاعة و مرام مجمعة مع شيماء مكتشوفش قدامها حتا حسات راسها دخلات فصدر عريض و قاصح
مراام ( بعصبية ) : وااش عماا نتا ولا ماا ( جات تكمل هدرتها هزات راسها وهيا تصدم فيمن خرجات ) اا هادا نتاا
إياد : واش مكتشوفيش قدامك وشحاال عزيز عليك المشاكل لي لقيتيه خاصك تخاصمي معاه
مرام : وراك نتا لي خرجتي فيا مكتشوفنيش جايا
إياد : (هبط لمستواها ) لاا مشفتكش انا اصلا مكنشوفش بحااااالك
مرام ( تقرصات من هدرتوو و خرجات فيه عينيها ) : شووف نقوولييك غادي تبعدد منيي متبعدش ميعجبك حال
إياد ( زاد تحدر لعندها ) : اشنو غادي ديري بسلااامة ااا
جات تهدر و هيا تقاطهم شيماء
شيماء : وااش منيتكم نتووماا ناس قدكم مزوجيين و دايرين الولاد ونتوما هنا باغين تناتفو زيدي نتي قدامي راني قلت ليك محتاجاك ماشي جبتك باش ضاربي ليا مع هادا
إياد : شكوون نتي بعدا لي كدخلي بيناتنا
شيماء (قربات لعندو و حمرات فيه عينيها ) : اناا ختهاا سمعتييني ختهاا قدما دخلتيها لرااسك مزياان
إياد : شنو باغيا ضربيني مالك علا هاد شوفات
شيماء ( زادت قربات لعندو ) : تجرببب
مرام : ختيي عفااك براك يالله نمشيو ( شافت فإياد ) ونتا الهدرة معاك من بعد
مشاو لبنات بعدو عليها شافت شيماء فمرام و نطقات
شيماء : شكون هادا وعلاش كيدوي معاك هاكا
مرام ( ابتاسمات ابتسامة شريرة ) :هادا خو العريس غير خليه ليوم غنفرجك فيه غنحيد منو هاد التكبر كامل
شيماء : انا مشفتش العريس مزيان حتا نرجعو
مرام : اوييلي ياختي اشمنك يا طولة و اشمنك ياازين و زيدها كوميسير ماشي بحال داك المݣرد ديال خوه
شيماء : هههه زيدي زيدي قدامي
خرجو و تامر غير تابعهم مفاهم اش واقع بيناتهم غير كيشوف
مرام : شيماء ختي نموووت و نعرفف شكون هاد زين لي جبتي معاك
شيماء : قصة طويلة من بعد و نعاود ليك
مرام : وشنو سميتو
وقفات شيماء و قف حداها تامر شافت فمرام ونطات
شيماء : مرام هاددا تامر صديق ديالي ف فرنسا تامر هادي مرام ختي
تامر ( مد ليها يدو ) : متشرفين
مرام ( مدات ليه يدها ) : شراف ليا
شيماء : نمشيو دبا ههه اولا راه وصلنا
وقفو قدام لوطو كحلة كبيرة زاجها كحل و نقية كانهم يالله شراوها
حلها تامر و دخلات شيماء كتجبد كادوات و كتعطي لمرات و تامر مشا للكوفر جبد واحد الكارطونة كبييرة حطها فوق كروسة صغيرة عندها عجلات وسد لوطو
رجعو للقاعة ولكن هاد لمرة غير لواحد لبيت صغير فيها فين كيحطو حوايجهم
حطو ديك الكرطونة الكبيرة و الكادوات و رجعو للعرس لقاوهم كيتسناوهم باش يتصورو
غير دخلو وهيا تنطق عيشة
عيشة : سيرو حدا ختكم باش تصورو
هارون : إياد اجي حتا نتا و سمار
شيماء : تامر اجي حدايا نتصورو
كلسات شيماء حدا اسمهان و حداها تامر و مرام جلس حداها إياد و سمار جلسات فوق كرسي قدامهم