الجزء 1 - الزعيم3 -ادمنتها وبنار الهوى احرقتها

                        ..👑الـــــزعــــيم.3.👑..

          ..🍷أَدمـــنتــها وبــنــار الـهــوى أُحْـرقُهـــا🍷.. 

              

             ❣️ الفصل1:هدوء ما قبل العاصفة❣️

                 👑👑👑👑👑👑👑👑👑

كان بوحدو وسط الصحراء ماكاين تاحد من غيرو الشمس كتحرق ورملة كتر.ريقو ناشف بالعطش عرقان بالشمس.سلاح فيديه وهو كيتمشا شحال حتى كتبان ليه باب كبيرة تبسم وهو كيشوف ناصر جدو واقف تماك هو وشي واحد هاز فيديه وسام ديال الترقية

كاع داك التعب مشا وهو كيشوف انه حلمو تحقق وانه صافي قرب يوصل …قرب لعندهم حتى كيوقف من صوت لقرطاس تبلوكة وهو كيحس بالدم نازل من راسوو تا غطا عينيه وحريق مجهد.. كانو تيراو ليه فراسوو 

سمع صوت ناصر كيغوت:هاروووووووون زيييد دغيا راك قربتي زييد

بغا يزيد خطوة ولكن رجليه فشلو طاح على ركابيه وهو كيشوف ناصر كيختافي ولباب كتسد ومشا داك النوور 

كابووس خلاه يحل عينيه عاقد حواجبو كلو عرقان ودمو كيغلي دقات قلبو متصارعين ووجع قاصح فدماغووو خلاه يزيد يقوص حواجبوو وناض جالس كيشوف غا الضلام تواني وتشعل الضو دلفيوزات وحس بشي يدين جاين لجيهتو قبل يوصلو لييه شد داك ليديين وزير شوية ويهرسهم شقلبها وجابها قداموو خلا قلبها يمشي ويجي من نضراتو الحادين وعينيه حومر جمرة ونطق بحدة:شكون نتي

تلف ليها لكلام :انا ..انا

رجع نطق وهو كيطلع يديه لعنقها وبدا كيخنقها:هضريي

نزلو دموعها مقصحها فيديها وكيخنقها من عنقها لمووت هادي:جبتيني لبارح معاك دوزت معاك الليلة 

قوص حواجبو كيشوفها عريانة عاد تفكر الكابوس خلاه ينسا كلشي زاد زير عليها ونزل من الناموسية منزلها معاه :مانشوفش وجهك قداميي

هزات حوايجها وهي كتكح وتسترجع انفاسها وخرجات كطير مخلوعة شادة فيديها كدرها بزاف لبارح كان سكران كان ضريف ماكانش هكاا كان فشكل اما دابة بحال شي قباض رواح

اما هو كيحس براسو ايطرطق عليه حل المجر وجبد دوة ديالو شرب تلاتة فدقة شوية ويضرب راسو مع الحيط ناض دخل للحمام كيدوش بما باارد وتكا على الحيط  ماكايحس بوالو لا بداك لما بارد لي ثلج ليه داتو ولا بريقو الناشف كيحس غير بداك الحريق لي فراسو بحال شي مطرقة كضرب فراسوو دقايق وبدا كيخفاف لوجع شوية بشوية تا جسمو ترخا رجع لما دافي ودوش وخرج لاوي عليه فوطة وقف حدا لمراية كيشوف فراسو كيف عروقو بارزين ديال جبينو عينيه حومر ماكرهش يخشي يديه فراسو ويجبد داك القرطاسة لي لداخل لي ماقدروش يجبدوها الاطبة..هاد الحريق لي حس بيه دابة غير الدرجة الاولى ديال الحريق…كيجيه حريق ماكتر منو بجوج درجات ماكايفيد معاه لا دوة لا ما بارد …تنهد كيشوف فالساعة الوحدة دلعشية…هز قرعة دلما هبط عليها فدقة

طلع الريدوات وقوص حواجبو من ضو الشمس وصوت الصداع ديال الشاريع ستنشق داك الهوة ومشا بخطوات تقال لبيت تبدال جبد حوايجو لبس بالخف هز سلاحو تأكد منو وخشاه مور ضهرو وهز طليفونو وشعلو تواني وبداو يوصلوه الميساجات ميل راسو 100 ابل من عائشة الام ديالو 20ابل من يوسف باه 40 ابل من الطاهرة جداتو ميساج واحد من ناصر الزعيم وعاد ابيلات وميساجات من الخدمة صحابو دلبوليس لي خدامين معاه

دخل اول حاجة للميساج دناصر قراه مكتوب فيه:تشعل الطليفون اجي..

ودوز ابل للخدمة عرف اخر المستجدات وشنو كاين ..خشا الطليفون فجيبو نسا شنو اليوم تنهد وخرج من الاباغطوم ركب فالبورش كحلة ديالو قبل يديماري جبد باكيتو دالسيجار خدا واحد بزقو شوية بلسانو عاد دارو ففمو وشعلو نتر نترة طويلة وساطها داك الساع وديمرا نيشان لقصر الزعيم…مخدم موسيقى كلاسيكية على عزف لكيتار ….

مسافة الطريق وكان تماك …

نزل من الطموبيل كيشوف فالطموبيلات لي مستفين تماك عرف انه كلشي مجموع..هز راسو لباب محلولة وصوت القرآن مسموع الدار عامرة ..مورالو مزفت باش يقابل عباد الله..رجع باللور ودار على الجيهة لوخرا من القصر…شاف لفوق وطلع من شرجم لشرجم بكل خفة واحترافية مولف هدشي فالتدريبات فالمدرسة العسكرية لي دوز..كانو الحرس غير كيشوفو فيه بلا تا كلمة ..

وصل للبالكون هبط ليه كينفض فيديه ويقاد فحوايجو وحل لباب ودخل نيشان لعندو للمكتب سد لباب وهو كيشوفو جالس فالمكتب وكيشوف اونفاص معاه فواحد الحيط عامر بالتصاور..قرب لعندو بهدوء وتحنا لعندو باحترام وباس يديه..الوحيد لي كيخليه يبوس يديه هو هارون..عارف باش كيحس دابة وعارف انه لا دوة وقال شي حاجة ماغايفيدو بوالو ..الحاجة لي ايدير هي يكون معاه وصافي ويسمع ليه لا بغة يدوي..

تواني وسمع صوتو :هادو كاملين حضرت لموتهم ودفنتهم ..

رجع تنهد  ونطق سمياتهم:ياسين..لارا.كمال(راجل روبي).أحمد …الواليدة(طاهرة الام) ..كلهم ماتو قدام عيني وانا عايش ..

سكت وكمل:ليوم دكرى موت أحمد ..كون ماهو عمر ناصر كان ايكون..هادو كاملين لي كتشوف دابة عشت معاهم يام من عمري فاتو ولكن محفورين فدماغي..

سكت تاني شحال ورجع نطق:مابغيتش نزيد نجلس على هاد الكرسي ونشوف فهاد الحيط ونلقة صورة خرا ديال شي واحد غالي عليا معلقة هنا وانا حي وهو ميت..هاد المرة صورتي لي بغيتها تكون تم

هارون شاف فيه وحط يديه على كتافو:الله يرحمهم كاملين ونت مازال اتعيش اناصر ..

ناصر تبسم بهدوء وشاف فيه:فين كنتي

هارون :فالدار

ناصر وقف وتقابل معاه كيشوف فيه :شفتي مك وباك

هارون :لا جيت عندك ديريكت

ناصر كيشوف فيه كاع حفادو عزاز كيبقة هارون الاقرب ليه كيحس بيه نسخة منو واخة ماشي تماما كيف ناصر لقديم .حيت القصص ديالهم بجوج كيتختالفو ولكن كيشوف راسو فيه..غير يمكن هارون زايد فشي حوايج ..زايد فأنه مستحيل تعرف شنو متحت راسو وشكون هو بالضبط..وزايد عليه فالمكر والخبث فشي مواقيف..

تبسم :نهبطو؟

هارون:نت لاباس؟

ناصر:الحمد لله

هارون:صافي نهبطو

لتحت..

جالسة وعينيها على لباب ..صوت القرآن مسموع وريحة لبخور عاطية فالدار الخدامات غادين جاين بالصواني ديال الضيافة..

عائشة كتسنا ولدها يدخل مع لباب..حتى كتنطق وحدة من الضياف:عائشة مشاء الله عليك العمر ما دا منك والو لي يشوفك ما يقولش والدة ربعة ولكبير 29عام

عائشة شافت فيها بابتسامة متصنعة غا دايرة صواب ..واش هي فهاد الهضرة وهوما فذكرى وفاة احمد:شكرا ربي يخليك

نفس المرة:هارون مابقاش كيتشاف اصلا فين عمرنا شناه تا الصحافة ما كيتجرؤو يصوروه ولا يكتبو عليه بعيد على كلشي احم تبارك الله عليه بعقلو ماشي بحال شي وحدين فالسمانة كيديرو من جوج تا لتلاتة دالمؤتمرات صحافية يبينو مشاريعهم وأملاكم..

عائشة كتمتم:قل اعود بربي الفلق ..العمى الله يحفض ليا ولدي..

المرة:اش قلتي

عائشة:لا والو ..شكرا تانتي الله يخلي ليك بنتك 

المرة تحمسات:امين..ملاك اتفتح مشروعها الجديد قريب 

وجبدات كتوريها فتصاورها:شحال ماشتيها واقلة ..

عائشة كتشوف فالبنت:شحال فعمرها

المرة:26عام 

عائشة عجباتها زوينة بزاف:مشاء الله ولات غزالة 

ايوا تا دوزي نتي وياها عندنا نشربو شي قهيوة

المرة اطير بالفرحة:ان شاء الله فهاد السيمانة واخة؟

عائشة:اه مرحبا بيكم

سمعات صوتها كتعيط ليها ستأدنات وناضت عندها:اجي شكانت كتقولك هديك

عائشة:فكرتيني عندها بنت غزالة عجباتني صراحة وعندها 26عام اتكون بعقلها جبنا ليه بنات سطاش وبنات عشرين وفوق العشرين ماعجباتو تا وحدة

طاهرة:واش من نيتك هدي بنتها راه كطير كل سيمانة فبلاد وكتلبس المعري كتر من لمغطي والنص دصحابها رجال..هارون والله لا داها ..هو كيقولك تكون كيفما بغات تكون غير تكون بعقلها وداخلة سوق راسها واخة تكون مطلقة ماعندوش مشكل..راه هارون كيوزنهم وكيطيرهم من الطيارة

عائشة:بصاح ماحسابليش دايرة هكا شحال ماشتها لا هي لا مها

طاهرة:ايوا كتكون فالجمعية 

عائشة:اوف بغيت نلقة ليه البنت لي باغي ماحدو باغي يتزوج 

طاهرة:دابة تبان مايكون غا الخير..

حتى كيسكتو ملي كيشوفوهم هابطين من الدروج

عائشة:هاهو معاه

طاهرة:هدا منين دخل وكاع لبيبان حاضينهم

عائشة تبسمات بفخر وهي كتشوفو جنب ناصر وكتسمع همس لعيالات عليه ماكايشوفوهش بزاف مخلي كلشي يجيه لفضول فين هو..

نزلو من الدروج هنا بان يوسف لي دخل من الباب مشا نيشان عند باه وولدو حوار بسيط بينهم ووقف من جيهة لوخرا جنب ناصر..خرج من الصالة امين ومعاه عماد وقربو لعندهم كيتسالمو ووقفو حداه وناصر قدامهم كيشوف فالضيوف لي جاو وكيهز راسو زعمة مرحبا بيكم

طاهرة:الله يحفضهم ياربي ويطول فعمرهم ويخلينا ديما مجموعين

عائشة:أمييييين ياربي

دخلو للصالة الرجال مجموعين وكلشي وقف احتراما ليهم لعائلة الزعيم فقط هاد اللقب كتجي منو هبة ورتوها هدي سنين ..كاملين كيتعتابرو من عائلة الزعيييم…ناصر الزعيم لي جامعهم …

..ز الوقت وطاحت الضلمة..

دازت صداقة ولوليمة لي دارو على خير…

كلشي ترحم على المرحوم أحمد..رغم الماضي ديالو انه كان زعيم مـ افيا فكانو اخر ايامو زوينين..حج شحال من مرة هو والطاهرة الام شد طريق الله وتاب وكان كيطلب المغفرة بزاف من الله من داكشي لي كان كيدير..

كان فلاتيراس واقف وكيشوف الناس كيركبو فالطوموبيلات غادين بحالهم نضراتو الحادين رغم كبر سنو مازال ماتبدلوش وسامتو زادت بداك الشيب لمعمر لحيتو وراسو..ودوك التجاعيد ولعروق لبارزين زادوه رجولة..بنيتو لجسمانية مزال محتافص بيها حفايدو وولادو مامقصرينش من جهتهم باش يقابلوه ويتبعو معاه الصبور وفحص طبي كل اربع اشهر لصحتو..والطاهرة ديما فجنبو ومسانداه….

تبسم ملي حس بيها وقفات حداه جرها لعندو محاوط خصرها وهي تبسمات ليه تاهي حاطة راسها على كتافو:غبرتي عليا هاد النهار

شاف فيها:هنا دابة معاك وراك ديما هناا..

وحط يديه على قلبو زادت تبسمات:الله يخليك ليا

كتافة باش يحضنها بحضن دافيي حبهم مازال كبير وكل نهار كيزيد عشرتهم طويلة وقصتهم طويلة..

ناصر:نوبتي دابة واقلة (كيقد المـ وت)

حطات يديها على فمو:الله يطول فعمرك اخر مرة تقولها

ناصر باس صبعها لي على فمو:كتخافي عليا

ميلات واسها:انا حياتي هو نت نمشيو بجوج ونبقاو بجوج

باس راسها ورجع حضنها…

نهبطو للتحت..

جالسة فالصالة من بعد ما ضيوف مشاو وهارك لاجوندا فيديها من بعد ما دوزات اخر ابل..

هبطات طاهرة وجلسات حداها:عيطتي ليهم

عائشة:اه صافي غدا ايتجمعو

نرجس قربات وجلسات حداهم:شكون ايتجمع

عائشة:تافقت انا وطاهرة على واحد لبلان

نرجس:وشنو هو

عائشة شافت يمين وشمال ماكاين حد عاد دوات:ياك هارون باغي يتزوج والحد الان مازال مالقة لبنت لي تعجبو

نرجس:اها ومن بعد

عائشة:اوا وانا خفتو يبدل رأيو كل مرة كنشوف ليه شي وحدة كيرجع ويقولي لا 

نرجس:ايوا كملي

عائشة:درت عراضة لغدا لشي عيالات معانا فالجمعية وبناتهم..ختارينا غير لي بعقلهم ولي كنعرفو مزيان وصمعتهم سابقاهم ..ماحد هارون هنا معانا قلت يشوف لا عجباتو شي وحدة 

نرجس:وهارون ايعجبو هدشي

طاهرة:حنا ما انقولولو والو تانحطوه فالامر الواقع

نرجس ضحكات:وناري فاش كتجمعو بجوج..درتو ليه كي قدية سندرلا

عائشة:ايوا على الله نلقاو ليه سندرلا ديالو…

عائشة غير شافتو داخل تبسمات كان يوسف

نرجس همسات ليها:هدا كلو حب راك كبرتو على هدشي

عائشة:مازال كنحماق عليه

قرب لعندهم تحنا باس راس الطاهرة:مازال فايقة فين الوليد

طاهرة:لفوق فلاتيراس..

شاف فعائشة ومد ليها يديه:نعسو؟

شبكات يديها فيديه وناضت عندو :نعسو

وتمو غادين وطاهرة كتشوف فيهم:الله يخليهم لبعضياتهم

نرجس:امين

طاهرة صونا ليها الطليفون كان ناصر جاوبات:الو..واخة هنا طالعة

وناضت:زوجي كيتسناني

ضحكات نرجس:سيري اخالتي نتسنا تانا زوجي..

وطلعات عند ناصر…

شوية ونرجس جا موراها راجلها ومشات…

فجيهة خوا فالقصر

كان فالجناح ديالو لي غادرو هدي سنين حيت دابة ولا عايش بوحدو استاقل مع. راسو بعد من كلشي وعائلة كيجي مرة مرة يطل عليهم وفبحال هاد المناسبات كيبات معاهم باش يبقة قريب من ناصر ..حيت ناصر كيبغي عائلتو تكون مجموعة ملي تكون شي ذكرى دوفات شي واحد من الناس لقراب ليه..

كان قدامو لبيسي عندو قضية محاولة قـ تل لواحد السياسي  قرا ااضوصي شنو فيه والدلائل واقوال الشهود وتصاور ومركز ..هكا هو اي قضية كيبغي يتخلوا براسو ويدرسها مزيان حيت الدليل كيكون قدامو خاصو غا التركيز…

قطع عليه صوت الطليفون طل على المتصل ورجع شاف فلبسي مابغاش يحبس من الصوني..وقف وجاوب بجمود:شنو

جاوباتو بصوت انثوي محروقة وغاضبة:العافية شاعلة ليا فقلبي اهارون

شعل كارو على كلامها ساط منو ونتر ودوك بنفس الجمود:اش بغيتي

عضات على سنانها:لبارح طفيتي الطليفون خليتيني كي شي حمقة..وقلتي ليهم مايخليونيش نخرج من الدار..باش فتالي نعرفك بايت مع قحـ بة ماكاتسوة والو

دوة كيسوط الدخان ويشوف فلبحر لي قدامو:علاش نتي ماشي قحـ  بة؟…

عضات على سنانها من كلامو لجارح قبل تدوي نطق:انقطع اتعاودي تصوني انكره دلمك فحياتك كتر من هكا

نطقات بترجي:ماتخلينيش عفاك انموت اهارون صافي مانعاودش نقنطها بيك ما انبقاش نعيط ليك تاتبغيني نت .ما انبقة نقول والو ..ياك لي قلتيها كنديرها

يلاه ايقطع وهو يسمع لغوات دشي وحدة:عتقونييي

نطق مقوص حواجبو:شكون هادي

نطقات وهي كتشوف فلبنت مربوطة قدامها:سبق وقلت لك اي وحدة اتقرب ليك انقـ تلها

قطع عليها ماعندوش مع سوق لعيالات وعيط لواحد من رجالو غير جاوبو دوة:اتلقة ليا سارة دابة لبنت لي عندها صيفطها لدارهم وسارة سد عليها فدار ..

وقطع ورجع شاف فجيهة لبحر كيستنشق داك لهوة والريح لي كيضرب فيه تفكيرو مشا لبعييد ..عميق فتفكيرو..رمى لبونتة دلكارو ودخل حيد تيشيرت بقة بصدرو عاري قرب خدا الدوة ديالو حيت حس براسو بدا يضرو ماخاصوش كاع يتعصب ويبقا بعيد على الاعصاب وقرب للبيسي كيشوف فيه فتالي طفاه وتلاح نعس..

نهار جديد…

عائشة كانت لفوق كتقاد راسها دخلات عندها الخدامة:مدام عائشة صافي كاع الضيفات وصلو بقيتي غير نتي

عائشة كتقاد فشعرها وكتشوف فلمراية:صافي هنا هابطة

رشات عطرها وخرجات من الجناح وهبطات لعندهم للتحت لقات الطاهرة مجمعة معاهم دورات وجها على لبنات لي كانو تم شي ستة بيهم كتفليهم بعينيها كلهم زوينات ها الزعرة ها الخمرية ها السمرة..كل وحدة مختالفة على لوخرا حتى من ناحية الطبقات الاجتماعية ماشي كلهم لاباس عليهم ..ماعندهمش مشكل هوما فهدشي المهم تعجب ولدها وصافي اما راه تا عائشة بنت حي شعبي وطاهرة كدالك…مانساوش اصلهم..

سلمات عليهم ورحبات بيهم وجاو الخدامات بالضيافة ودخلو كيتحتتو فالمواضيع

عائشة همسات لطاهرة:شنو بان لك

طاهرة:كلهم زوينات وكيبانو بعقلهم..بقات فهارون فين هو 

عائشة:خرج ماولاش رجع 

طاهرة:هي لا قلب علينا الدنيا

عائشة:ايوا نجربو شغا نخسرو

وشافت فالضياف:مرحبا بيكم

وشافت فالخدامة:ديري لنا شي موسيقى ينشطو لبنات شوية ويشطحو

مشات الخدامة تقاد الموسيقى

وحدة من الامهات دوات مع بنتها:شطحي بالتاويل وداك الابتسامة على وجهك راه لا حكم فينا الزهر انوليو حنا هوما نساب عائلة الزعيم

البنت هزات راسها باه

والامهات لوخرين كل وحدة كتنغز فبنتها وتوصيها 

تسمع صوت الموسيقى بالشعبي:وانوضو البنات تشطحو اما حنا صافي شرفنا

بقاو كيضحكو وناضو لبنات يشطحو كل وحدة وكتبين مهاراتها فالشطيح وغير بالتاويل 

وعائشة والطاهرة كيشوفو ويتمنضرو فيهم

عائشة عيات صابرة وهي تنوض معاهم تشطح:غيرت رأيي مازال صغار لي بغات نشطح تنوض تشطح 

ضحكو على هبالها ولبنات داروها فالوسط وهي كتشطح وتحير بشعرها تقول مازال بنت 16 لعام يامات الرياض وفاش كانت مها شيخة ومرة مرة تنوض تشطح معاهم الزمان مابدل فيها والو من غير زادها جمال على جمال ماتقولش راها فالربعينات ..مهتمة براسهلا وبجمالها وصحتها….

حتى كيصوني طليفونها خلاتهم كيشطحو ومشات جلسات وعينيها على لبنات مازال كتشوف فيهم حتى ستاقرات على وحدة عجباتها جاوبات كان واحد من الرجال :وي…خرج..صافي مزيان

وقطعات وتبسمات:لبنات اجيو تجلسو تشربو اتاي

رجعو جلسو وتطفات الموسيقى

عائشة همسات لطاهرة:خالتي شنو بانلك فداك الشهبة مولات السالف والعوينات خضرين

طاهرة:هي نيت لي عجباتني وهي المتبتة والمرزنة فيهم وتا مها ضريفة ومن عائلة على قد الحال بحالنا فياماتنا

عائشة تبسمات فرحانة:ومتواتين ياك..

طاهرة:ايوا على الله مايخرجلناش بشي بلان ماتماش

عائشة:عندي احساس ايحبها شوفي شحال فنة..

كملو الحديت وعائشة وطاهرة عاطين لصيفاتهم صوتبهم وكل شوية يرحبو بيهم..

من بعد وقع الصمت شي بقا كيشوف فشي

نطقات وحدة من لعيالات:ايوا شكرا على الاستضافة مشا علينا الحال نعاودوها مرة خرا

نغزات بنتها تسلم..ناضو تا لوخرين مع يناتهم وطاهرة وعائشة كيودعوهم تا وصلو عند لبنت الشهبة ومها

نطقات عائشة:خليكم مزال شوية

البنت ومها كون صابو الجنحين يطيرو بيهم..اما الامهات لخرين مشات داك الابتسامة من وجهم وخرجو وبناتهم كياكلو جنابهم ماتختاروش هوما

..

رجعو جلسو فالصالة وعائشة كتفلي فالبنت وتسول فيها على كلشي فاش كتقراي وشكا ديري وفين كدوزي وقتك وكلشيي..طبعا بطريقة زوينة ومرحة خالقة معاها الجو والبنت كتجاوب وهي فرحانة..وطاهرة مجمعة مع مها كتدي وتجيب معاها فالهضرة

صونا تاني طليفون عائشة جاوبات:الو…حدا لباب..صافي واخة

شافت فالبنت وتبسمات ورجعات شافت فلباب وهي كتشوفو داخل كيدوي فطليفون…البنت هزات عينيها كتشوف فيه قلبها كيضرب فلمية اول مرة اتشوفو هكا مباشرة…كتشوف فوسامتو لي طاغية عليها الرجولة كتفوح منو..من مشيتو التقيلة ونضرتو الجدية الحادة..تعابير وجهو الصارمة…والخشونة لي كتبان فيه..طولتو وعرض كتافو…بلعات. ريقها فاش نغزاتها مها تنزل عينيها

لمح غير عائشة وطاهرة وشي جوج معاهم ماكملش الشوفة وتم غادي جهة الدروج يهز شي غراض ويرجع لخدمتو حتى كيوقفو صوت عائشة:ولدي هارون اجي عفاك بغيتك واحد دقيقة

ميل راسو فمو ونطق:تلقايني لفوق الواليدة

عرفات انه ايمشي ويخليها وقفات:غير دقيقة من وقتك

رجع باللور وقرب للصالة عندهم…

عائشة:البنت دفعات تصيب لاكارط ومشات تجيبها من لكوميسارية وماعطاوهاش ليها قلت تعاونها نت 

شاف فلبنت لي منزلة راسها ورجع شاف فعائشة حافض قوالبها:شنو سميتها

عائشة تبسمات:حفصة الوزاني…فعمرها 25 عام خدامة فواحد الشركة كونطابل..شركة سميتها(..)…و..

قاطعها:الوليدة قلت سميتها ماشي سي في في ديالها

بلعات ريقها والطاهرة كتنغز فيها

شاف فالبنت:شمن كوميسارية تابعة

هزات راسها فيه بعويناتها زورق:بحالكم 

هز راسو باه :نشوفو..

دوز ابل سمعوه كيقول سميتها جاه الجواب وقطع:غدا فصباح دوزي موراها تلقايها وجدات

حفصة:شكرا بزاف..

وكمل طريقو وطلع الفوق كانو كاملين كيرجفو…جلسات وهي كتشوب كاس دلما ..كملو الجلسة من بعد مشاو..

عائشة شافتو خارج تبعاتو كتجري بحال شي بنية صغيرة وتشبطات فيه تقول صاحبها ماشي ولدها:كي جاتك

هارون:الوليدة خطينا من هاد لبلانات

شدات فدراعو:البنت زوينة وداخلة سوق راسها وضريفة وشاربة عقلها اش بغيتي مازال واصلا عجباتني انا راضية عليك ماديها شو كنرضي عليك

شاف فيها مامتيقش انه هدي مو لقدامو:دخلي بحالك اعائشة

تمرحاتلو على باب الطموبيل:وغا شوف وكان

جرها من خصرها وبعدها وباس راسها:سيري دابة عندي الخدمة

وركب وهي كضرب فزاج:عويناتها زورق والشعر طويل حرير رطب وزعر…لفصالة حوتة وابووومبة اولدي اش بغيتي

شاف فيها:هنا مشيت

وديمارا ومشا..تبسمات ودخلات:المهم ماقالش لا..

ودخلات للدار..

نهار جديد..

كان فغرفة التحقيق ..راجع اللور منكي على الحيط ولكارو فيديه مرة مرة كيطفي فلارض..عينيه على هداك لي كيحققو معاه اول ولكد من لبوليس سولو ميات مرة وداك المتهم ففمو كلمة وحدة:لي عندي قلتو..

كيتصنت ويشوف بهدوء..شافهم طولو وهو فاهم لبلان نطق:بعد شوية لهيه

ليوليسي رجع اللور وخلاه منو ليه

هارون قرب ليه وتحنا لعندة ودوة ودخان خارج من فمو:من تتاي داك خونا ماشي هو لي تيرا فلوزير..اه لا

يلاه ايدوي قاطعو بصوت زعزعو:اه لا

بلع ريقو كيشوف داك الشرارة فعينيه وصوتو ركب فيه الرعب سامع بيه وعارف انه ماكايتعاتقش بدا كيعراق ما باغي ينطق تا كلمة يندم عليها..

هارون كيكره شي حاجة سميتها الانتضار تاهو ماعطلوش نزل داك لكارو ليديه حرقو بيها وداك خونا غوت

هارون :هاد طفية دلكارو كيف والو قدام لعافية لي غنشعل فدلمك لما هضرتيش…وهضر بااصحيح

نطق بخوف:لا ماشي هو

هارون جلس:وشكون..

داك خونا شوية ويبكي:كنقسم ليك ماعارف شكون عطاوني لفلوس باش نشهد انه هو لي تيرا ولكن ماشي هو

هارون جمع الوقفة كان عارفها من لول بغة غير اعتراف منطوق باش يكمل خدمتو:هبطو يتبرد واحد تلتيام مع خوتو تا نرجع نطل عليه…

وخرج من لمكتب والمساعد ديالو تابعو 

هارون:الوزير فاينا كلينيك

المساعد:(كلينيك..)

كمل طريقو على صوت الطليفون جاوب كان واحد من رجالو سميتو توفيق:ااسي الزعيم انا قدام الكوميسارية لي قلتي ليا..والبنت لي سميتها حفصة هاهي خارجة..

هارون:كيف لعادة..

نطق باحترام:هي اللولة اسي الزعيم

نطق باحترام:هي اللولة اسي الزعيم..

خلا لخط مطلوق…هارون ركب فالطموبيل كيتصنت

اما توفيق ديمارا الميرسيديس اخر ماكاين لابس لباس مقاد كوستيم بستيل عصري مقاد لحيتو مكانة غالية نضادر ماركة ريحة باغفان معروفة..كان زوين بزاف من اجمل خلق الله....طول وعرض..

حفصة غادة فجنب الطريق كلاكسونا ليها:سمحيلي عفاك واحد الدقيقة

شافت فيه وبلعات ريقها من زينو والهيئة ديالو والطموبيل كي الصاروخ…البنت داخت…

وقفات ونطقات:مرحبا

وقف الطموبيل ونزل عندها وحيد النضادر ونطق بجنتلمانية:معاك توفيق..ماشي من عوايدي نوقف شي وحدة ولكن شفتك من بعيد تا لقيت راسي تابعك بلا مانحس

زادت دابت قدام. راجل كامل مكمول توردو خدودها

توفيق تبسم:واخة نتعرف عليك

نطقات:انا حفصة

زاد تبسم:تشرفت بيك احفصة سميتك زوينة بحالك

حفصة:شكرا 

توفيق شاف فالسما:الجو سخون ركبي نوصلك

حفصة بلعات ريقها:لا غير سمحلي مانقدش

توفيق:عادي نديروها معرفة والتاكسيات ماكاينينش ركبي

شافت تاعيات ونطقات:واخة

حل ليها باب الطموبيل وركبات وهي مبتاسمة وهو بقة واقف كيتسنا هارون شغا يقول ليه فلكيت بلوتوت لي داير فودنيه

هارون سمع كلشي ديمارا الطموبيل:وصلها لدارهم..

وقطع وحيد لكيت من ودنيه هدشي عادي ولف بهاد الديكور…هاد الاختبار الحد الان تا وحدة مانجحات فيه كلهم تغرو بالزين والطموبيل وركبو مع توفيق لي اصلا هو ش.اد ج.نسي🔥كان اختبار صعيب للنسا وكانو ضعاف قدام واحد راس مالو زينو وبعيد على الرجولة ختار توفيق الشاد جنسي متعمد باش يزيد يتأكد انه النسا نتقصات عقل على قولتو هكا حاسبها فبالو…وهو باغي وحدة لي مايغرهاش هدشي لي تكون نفسها وشبابها غالين عليها لي ماساهلش الطيح بكرامتها ولي فبالها لي بغاها يقصد بابها..تكون كيف ما بغات تكون مطلقة كاع ولا ارملة زينها على قد الحال غير ماتكنش من الريح لي جا يديها…هارون الزعيم صعيب دوقو فالنسا وماكايتيقش 

كمل طريقو للكلينيك تماك ايكمل خدمتو…

.

فالطبيب…

كانت لابسة لباس الممرضات فلبيض ولغوز  جاياها ملبوسة مع فورمتها كتجدب وصابو فرجليها بيض..جامعة شعرها اللور سفنجة مجبدة كتحماق عى هاد التسريحة…مكتافية بماسكارا فلعوينات وعكار غوز مفتوح بارد جا مع بشرتها السمرا مبرونزية..وغادة جاية فلكولوار كدور على المرضى والابتسامة على وجها ..سمعات سميتها :الممرضة عبلة متوكل تتفضل لغرفة المريض(..)الدكتور صالح محتاجها

قلبات الدورة دخلات لواحد الغرفة دارت لكمامة على وجها وعقمات يديها ودارت ليكات ودخلات للغرفة الطبية الخاصة بلمريض لقات الطبيب عندو:وي دكتور

الطبيب:سجلي هدشي لي انقولك

بدا كيضهر وهي كتسجل ودير داكشي لي كيقلها

المريض حل عينيه

عبلة تبسمات ليه:رتاح بحالك

رمش ليها بعينيه..

شافت فالطبيب:محتاجني مازال فشي حاجة

هز راسو باه:تبعيني

خرجو للكولوار حتى كتقفز فاش حط يديه على خصرها رجعات اللور:شكا دير

الطبيب شدها من يديها:عييت نلمح عييت ندق مافهمتيش شحال كتعجبيني..

عبلة دفعاتو:جمع يديك ادكتور راحنا فبلاصة الخدمة شمن اعجاب وشمن زمر اخر مرة تحط يديك عليا

الطبيب:صافي بشوية اتشوهينا

عبلة:ايوا جمع راسك ادكتور خلينا نحتارموك 

الطبيب ولا باغي غا لفكاك:صافي رجعي لخدمتك

حمحم وهي رجعات اللور كتشوفو غادي…

نطقات:هدشي لي بقة شبع تعباز فكاع لفرمليات بقيت ليه غا انا بزاف على مك اولد القـ حـ بة..

كان واقف فواحد لكوان شاف كلشي وسمع كلشي…جا بغة يشوف لمريض هو لوزير لي مدام على قضيتو بغة يسمع منو شي حاجة وقالولو حتى يخرج الطبيب من عندو..داير لكمامة الطبية لي عطاوه..ميل. راسو كيشوف فيها عاطاه بالضهر..وكتلعب فالطليفون…

هارون كيشوف فهادي لي مرمدات طبيب على قدو وماخلاتوش يتمادا ويقلل العفة عليها..من صوتها باينة ماشي شي وحدة ساهلة....

شاف فالساعة مشا لحال خاصو يشوف لمريض ..قرب لعندها وهي واقفة حدا لباب وهو باغي يدخل..ماعياش هنا..مد يديه للبواني مور ضهرها وهي تقفز دورات يديها باغة تجمع معاه عند بالها الطبيب وقبل توصل ليه يديها شدها وورك عليها وهي شهقات كتشوف شكون هدا جات عينيه فعينيها وقوصات حواجبها مقصحها فيديها جرها لعندو ونطق بهمس:ماتعاوديهاش

بلعات ريقها من صوتو فيه واحد لبحة فشكل وكمل كلامو:ساخية بيديك

جمعات يديها عندها:سمحلي غير يحسابلي..

وسكتات كتشوفو دخل لداخل ماخلاهاش تاتكمل كلامها..بقات غير واقفة صوتو وكلامو مزال فودنيها وداك لعنين بدوك الشوفات النايمين وحادين فنفس الوقت..بلعات ريقها وشافت جيهة لباب:شكون هدا واش انس ولا جن..اويلي مالي

ومشات ملي سمعات سميتها كتجري فلكولوار…

دقايق دازو وخرج من عند المريض ماقدر ياخد منو والو حيت ماكتيقدش يهضر..تم خارج..وهو يلمحها عاطاه بالضهر كتدوي مع شي فرملية حتى كتعيط لها وحدة:عبلة  متوكل تكلمي للطبيبة كتسناك..

هزات راسها باه ومشات تشوف الطبيبة..كمل طريقو وخرج…ركب فالطموبيل دوز النمرة ديال توفيق وديمارا غادي للخدمة:فكلينيك(..)ممرضة سميتها عبلة متوكل…اتقلب عليها وادير معاها نفس لبلان

وقطع…زاد فالسرعة:ها حنا انشوفو اعبلة واش اتربحي الاختبار..

قبيلة سمع كلامها فاش قالت على الطبيب انه شابع فلفرمليات تعباز يعني يقد تكون خايفة غا من الشوهة وكتلعب بعيد….

دازو ساعتاين..

كان فطوموبيلتو مرجع راسو اللور جبد كارو بسنانو من البكية ..بزقو بلسانو ودارو بين شفايفو وشعلو وهو كينتر منوو وسااط الدخان مد يديه خدم موسيقى كلاسيكية هادئة ديال لبيانو مدموجة بالكيتار ..ترخا … كان معاه فالخط توفيق

توفيق:السي الزعيم هاهي خرجات لابسة عباية كحلة

هارون:تبعها..

خلا لابل دايزة كيف لعادة ورجع تاني راسو اللور مستمتع بانغام الموسيقى كيتصنت لهاد المشهد بحال شي فيلم ولف يشوفو ومستمتع بيه عارف النهاية ديالو كيف اتكون ولكن ماكاينش الملل..

فجيهة لوخرا..

خارجة مع لباب وساكها فيديها لابسة عباية وكتمضغ فالمسكة وطرطقها مرة مرة…وكتشوف فالطريق وفلس غادي ولي جاي وفالطموبيلات

توفيق ديمارا الطموبيل وتبعها.