أنــــت كـــلّ شـَـــيء
مــغــربــي بــنــكــهــة الــخــلــيــج 💰🫦
هابطة كتجري فالدروج والدمعة على عينيها، مسحاتها بالعصب، تابعاها بنت عمتها كتغوت : اويلي نهيلة اصاحبتي رجعي اديري غير الشوهة
ماكاتسمعش العبايا موراها طايرا مخلياها مفتوحة على البيجامة الصيفية لي لابسة والشعر مجموع كعكة مهملة، فيديها اليتيلفون مفتوح على تصويرتو مع هاديك لي خانها معاها، مامتيقاش انها تخانت مور ماتاقت فيه .
خرجات لبرا على الحومة كان درب شعبي ومشات كتجري تاخرجات على الشارع الكبير كان تجاري وعامر بالقهاوي والمحلات دوليكس، فعينيها نيشان دارهوم تاوقفات عليها كان مبنية زوين ومقادة،
خلطات على الباب كدق بجهد تاطلات عليها واحد البنت من الفوق : شكـــون
علات عينيها وهي تغوت : عيطيليا على ديك ختك الصلكوطة قبل ماندير شرع يدي .
نورة : وصلاتك سخونة الكلبة سيري شوفيليك مايتقدا البنت ولات براجلها
نهى : ( كتزيد تجعرها ) قتلييييك قوولييهااا تفتحلييااا البـاب
نورة : راه لامامشيتيش غادي نهبط نوريك بنات الاصل شكايسواو
جميلة : ( بشوية ) نهى، اصاحبتي تشوهنا زيدي نمشيو منهنا بنادم كيشوف
وفعلا كان شي غادي شي داخل والرجال لي فالقهوة المقابلة معاهوم كولشي وقف كيتفرج كان شارع مروج وتجاري عامر بالقهاوي والمحلات والعمارات كولشي كيطل .
نهى : ( عينيها فنورة ) الى مزغرتة عليك مك هبطي
كيكملات تفتح الباب فوجها كان خو نورة الكبير صعقهم : اش كاين اختي شهاد الصداع ؟
نهى : ( نهى طلعات فيه وهبطات وجميلة تخشات من موراها ماحاملاهش اشوفها ) قول لختك تهبط ( جبهة سنطيحة فعينيه )
خالد : علاش بسلامة اش كاين ؟ ( شاف من موراها جميلة ) شكاديري نتي هنا ؟
جميلة : خالد دير بحالي ماكاين والو ( دارت كتجرها ) نهى يالاه بحالنا
نهى : ماغاديش نبععععددد واللله مااااتبقااااف فييهاااا خطاااافت الرجااالة المعفونة كتحط عينيها على رجــالة عمرها غادي طفرو
خالد بقا كيطلع ويهبط فيها دار يديه فشورط لي لابس زين زينة ولكن مالها على هاد الحال، عرف عندها شي موشكيل مع خواتاتو : سيري اختي الله اعفو عليك ..
داتها جميلة كتجر فيها تاوصلاتها لدرب وهي تكلس عند الباب دموع فعينيها ولكن ماراضياش تهبطهوم : تبتي راسك اصاحبتي صافي نسايه من راسك نسايه
نهى : ( نهضات فيها ) ماكانبغيهش فهميني ولكن علاش ادير فيا هاكا علاش ؟ الشمتة لاش اجي لعندي يخطبني انا ويسمح فيا ويمشي يتزوج علاش انا اش درتليه، هاديك مسمومة من زمان ماحاملانيش
جميلة : ( تنهدات ) شنو كنتي باغا ديري واش غادي تريشيها شنو غاديري
نهى : ( تحصرو فيها الدموع وصوتها تخسر ) كنت بغيت نسبها، نسممها بكلامي، ماتكملش فرحتها على خير كيفما خسرات فرحتي
جميلة : كون هاداك لي تزوج بيها راجل اصلا مايخليكش من اللول كون كان فيه الخير يصرفو فيك نتي اللولة .
نهى : ماتجبديش ليا داك الشماتة، الله اياخد فيه الحق غانبقا ندعي فيه طول ماهاد الروح كطلع وتهود فيا، لا وزايدها رديليا دهازي نعطيه الصبع يطلعو مع نصو، والله لا شمو داكشي لي جابليا انبعيو ونعاود المشرا منو
جميلة : دوزي زيدي يالاه تشوهنا هاد النهار
نهى : هي لي تشوهات اما انا بزاف عليها
جميلة : لا غير خالد ايوصلها سخونة لحاتم دابا شوية وتشوفيه تاني معيط كيرعرع
نهى : دلا عليا لهيه تاهاداك بنادم كيتصاحبو معاه الناس
جميلة : جمل شايف غا كرة خوه نتي مطفراها
مزادتش جاوباتها طلعات لفوق فين كاينة بيت جميلة ودخلات رمات العبايا بجهد وتلاحت فالناموسية وطلقات دموعها، بكات حتا بردات روحها ماشي حيت كتبغيه ولكن مارضاتش هي لي شحال من واحد كيتمنى غا شوفة فيها قبلات بيه هو بصح لاباس عليه ولكن ثاقت فيه وقررات تكمل حياتها حتا كتصدم بلي خانها مع خت نورة سميتها يسرى، والموشكيلة كتعرفهوم مزيان هوما كليكات شي كيعرف شي، جميلة بنت حومتهم واخا هوما على الشارع وهي فوسط الدرب وعاد مصاحبة مع حاتم صاحب خالد خوهوم الكبير، ولي هو عينو على نهى وماكرهش شي نهار يتصاحب معاها .
قرطاسة وطايتها خادمة عليها مزيان السبور والماكلة فلوسها كاملين كطبهوم على راسها وزيدها كانت كتصاحب مع لي لاباس عليهوم وضبر من عندهوم الفلوس، هي هاكا بالنسبة ليها الراجل بلا فلوس موتو حسن من حياتو، تخورات مرة وحدة فالحب وتم كانت باقا مراهقة، بغات واحد ولد حومتهوم سيكليس، وجا خطبها تاكيصدمها باش سمح فيها ومشا للخاريج تزوج كاورية، من تم كرهات شي حاجة سميتها الحب والعقل الطايش وقررات تبدل ودير عقلها، وبدلات حياتها كاملة طلعات لكازا وخدمات فمروكو مول فالمحل ديال GUESS، المهم مضبرة على راسها ومن تم كضبر مرة مرة على شي رجال وهاكا هاهي عايشة الحياة ومبرعة راسها حتا طلاقات مع أسامة، وشافتو شاد معاها الخط ونيت عيات من هاد الحياة وهي فعمرها 26 قررات تزوج باش دير دارها، دازت خطوبتها فاحسن ماكاين وداكشي لي شعل غيرة البنات كيفاش هي زوينة وواعرة وخدامة وضبرات على راجل زين ومضبر على راسو فالفلوس، دخلو بيناتهوم بخيط كحل وتما باش حصلاتو كيخونها مع يسرى فرتكات كولشي وشداتها الصدمة كرهات الزواج ومايجي منو صافي وزاد كرها دابا باش تزوج بالاخرى من الفوق ..