شافت فيه ملبكة أول مرة طلع معاها القشعريرة، مدات يديه وشداتها فيه يديها رطيطبين مع الخشونة ديالو، صبيعات نقادين وطوال تمعن فتفاصيل ديالهم كيحماق على البنت لي كتهلا فراسها بحال هاكا، طلعات عويناتها كترمش فيه ثقييل زادت طيحاتو بشوفة : عطيني مهلة نفكر .
ماجد : خودي راحتك .
تبسمات ليه برقي وناضو شافتو جبد خلص بالمارت كيشي علم الله شحال وتحركو خرجو بغا يوصلها مي رفضات طلبات طاكسي ومشات وصلات للدار قلبها كيضرب دخلات بشوية كانت غير جميلة لي فايقة وهي تنقز عليها بالاسئلة تاطيبات ليها الراس، بزربة فتحو البواط ديال شانيل باش اتحل معاها تا فمهم كسوة انيقة كتحمق فالاحمر مع بوشيط ديالها، عضات على شفايفو عرفاتها جابها خصيصا على الحفل لي غايدير باش تمشي معاه لابساها، عاودات لجميلة على الليلة حيت عارفاها ماغاديش تفرق عليها، ومشات بدلات متحس براسها مسخسخة ولكن احاسيسها مخربقين، كانت ليلة ميثالة خلاو حناكها يحمارو بقوة الاندرينالين لي طلع ليها، تكات كتلعب بتيليفونها تاسيفط ليها ميساج .
ماجد : وصلتي ؟
زادت عضات على شفايفها ضاحكة ولات غير تشوف سميتو قلبها كيتخطف، وجاوباتو مع ايموجي .
ماجد : كانتمنى يكون عجبك الكادو ديالي .
نهى : ماكيهمش الكادو قد ماكيهمني الجيست .
وختماتها بقليب عاد تبعاتها : ولكن الذوق الراقي عند ماليه .
فهم بلي معنات عليه تاهو عجباتو وجاتو على الكانة وكذوبها جايبليه فيها شك وكخليها تلعب على خاطرها تاوكان ايشوف باش غايختمها .
ناضت فالصباح صايبات الروتين سكين كار تاصيح عليها بلي ميساج مرة مرة يرمي شي كليمة معسلة تفرحليها المود، مابغاتش تسيفطليه الموافقة حتا عاود اكد عليها وهي داكشي لي كان خسها تبسمات جنب وعلماتو بلي كاتسناه .
مشات جمعات واحد الڤاليز كتحي صغيرة غير ديال لبيسة، دارت فيها بيجامة حفيفة صيفية ديال ڤيكتوريا كتجي فالغوز، وبانطوف دريش زادت المستحضرات تجميل وواحد اللبيسة سبور مارك عاد لبسات هي سروال دجين ستايل هوت كيجي واسع مع بودي مزير سماطي فالابيض وطريبيش من كوتشي، جات قتالة، خلات الشعر مطلوق طويل ولوات البلاك داتو مهم جمعات كاع ماتحتاج تاكيوصلها ميساج من عندو باش طلقاه، وماكانش بعيد غير فالشاريع الكبير لي مور الدار .
هبطات جارا الڤاليز خرجات عندو تاكاتشوف البورش فالكحل كدوب العقيل فاتح الزاجة وكيخربق فتيليفونو طلع عينيه شافها وهو يغمزها هبط طلاقاها وسلم عليها بلابيز وهي عينيها باقين على البورش تأكدات بلي السيد راه نيت ملعق