دارت ومشات شدات الطاكسي اللول لي جا فطريقها، ركبات كتبكي وعينيها تلبطو بدموع، كل مرة تمسح مامتيقاش، واش هي لي غالطة حيت ضنات فيه الخير، وهي اصلا علاش كتبكي ياك هي غير ناوية تزهي بيه الوقت وصافي، هي اصلا كاذبة عليه هي اصلا مامتوقعة منو والو ( مسحات دموعها ورجعو عمرو ) ولكن هي كيحسابها هو مختالف هو ماغاديش ابغيها على لحمها، جات معاه طريق كاملة ولا حط يدو عليها ولا باسها ..
ضربات على جبهتها : افف اففف منك انهى اففف ..
زادو تجمعو عليها ماواجيعها كتفكر كيفاش لي ثاقت بيه عمية كيخورها ويمشي، علاش لي تعلقات بيه واش لهاد الدرجة زهرها مع الحب مكوز، خرجات من الطاكسي تشوف حالتها ماتقولش هادي لي خرجات، رجعات بحال سندريلا ديال نص الليل، طلعات نيشان للشومبر كتجمع فحوايجها وتبكي لبسات دجين وتيشرت وسبادري باش جات ردات شعرها اللور وبدات تمسح الماكياج شافت فراسها فالمرايا وهوما يزيدو يطيحو دموعها، خلات داك الكسوة والبوشيط تما والورد شتتاتو كامل فالارض وجمعات الفاليز ديالها هابطة مع الاوطيل مع ركبات فطاكسي مشات مع هو وقف البوش وهبط بزربة طلع كيجري فالاسانسور تاكيوصل للبيت مع ديك الروينة، دخل كيشوف كولشي مخلياه مشتت ومدات معاها تاحاجة من لي جابليها، هز تيليفونو بزربة كيعيط والو متقطع عاود عيط وعاود عيط نفس الشي وهو هابط بزربة، تاكيطلاقا مع داك صاحبو لي هو السباب فهادشي مع شافو مع عطاه ضربة وحدة جمعو وطواه ردو اللور راعف، رجع جبدو من الكرافط وكيسب فيه تخلطو ليه اللغات الخليجية والمغربية والانجليزية، عاود عطاه ضربة للعين كون ماتكالاش كون تعما، تاجاو سيكريتي كيفرقو فيهوم، اما كون راه قتلو بين يديه .
وصلها الطاكسي لاكار ديال التران هبطات بداك الحالة عينيها منفوخين وحومر وقلبها دارها قطعات تيكي ديال تران باقيليه ربع ساعة ويقلع مشات وكلسات حدا السكا كاتسنا، وفنفس الوقت عقلها مرفوع، عقلها مدابز بين المنطق وبين احاسيسها، كولشي مخلط فيها، فتحات تيليفونها كتشوفو باقي كيصوني دون ملل، قطعات وهي دخل بلوكاتو من كولشي كتبلوكي والدمعة فعينيها، تاناضت ركبات فتران وقلع نيشان لكازا ..
شاد طوموبيل وغير كيقلب ناعارفش فين غايقلب وفين غاتكون سكت طموبيل حيت خرج على السيطرة، حاول اقاد افكارو، اكيد غاتكون رجعات لكازا ماكانش شك خور، تنهد عرف بلي تجرحات ولكن فنفس الوقت مانتاضرش هاد ردة الفعل كاملة، دخل باش اسيفطليها تاكيشوف الكونط ديالها ماطالعش بدل مشا لواتساب والو الانسطا والو تنهد بهدوء، سدات عليه طرقان خلات كولشي يسالي قبل مايبدا .
ماجد : نــهــيـلـة ..