دوشات داك العشية وجمعات حويجاتها والمايو دالبيسين وداكشي دوجها الخاص بالشمس، حيت عارفة مدام مشاو للاوطيل اذن غايكون بيسين وشلا بلانات، طرفات كولشي وجمعاتو ومشات تكات كتقلب فالسوشل ميديا لوهلة حاها تعاود تشوف كونطو، وداكشي لي دارت غير دخلات من فوكونط وبقات كطل عليه كتشوفو غبر وماحاط حتاشي حاجة، زعما يكون ندم علاش دار معاها داك الجيست، تنهدات وولات مشات حاولات تبدل الموضوع فراسها حيت مابقاتش بغات تفكر فيه .
صباح جديد ناضو فيه بكريــ ولبسو عليهوم كيف هبطو لقو حاتم كيتسناهون فراس الدرب مشاو لاكار وشدو تران ديريكت لمراكش، وصلو مع الحداش، مشاو لسونطر كيليس فطرو عاد شدو طاكسي كيسولو حاتم شمن اوطيل مابغاش اقوليهوم تاوقفو فالمامونيا .
نهى : ( مصدومة ) لا قوليا كتكذب .
حاتم : هههه لا نزلو .
جميلة هابطة كتفرنس اما نهى غير مصدومة حيت المامونيا اغلى اوطيل فالمغرب كيدار هاد حاتم ضبر عليها وهو حازق، طلعات معاها تبوريشة بالفرحة حيت باش تصور فيه صافي بداو كيبانو ليها البوسطات لي غاتحط فالانسطا قدام عينيها جاب ربي حايبة مزيان ماتلبس .
جا طلاقاهوم الخدام شد منهوم الحوايج معاونهوم تفكرات اوطيل فرح وحاولات تنفض افكارها مشات تابعاهوم ومع الدخلة داكشي هاي كلاص وكيطلاقاوك باتاي وغريبة، جبدات تيليفونها كتسطوري مامتيقاش راسها بحالي راها فحلمة، تادخلو لداخل كيشوفو حاتم كيدوي فريسيبشن وهي دور نهى عند جميلة : منين ضبر صحيبك هادشي ؟؟
جميلة : بحالي بحالك ماعرفتش قاليك شي خدمة ما خدمة
نهى : واش كطنزي عليا هنا راه غا ليلة وحدة ب 7 دالمليون تي شهاد الخدمة لي غاتخلص عليه هادشي كامل مالو ولا وزير
جميلة : ربي راه طيبتيليا راسي زيدي وهنينا .
دار عندهوم عطاهوم لي كارت هي وجميلة فشومبر وهو دا شومبر ومشاو معاهوم الخدم وصلوهوم حتا لي شومبر ديالهوم كل شومبر كطل على بيسين بحال الرياض .
نهى : الله يا ربي نكون غا كنحلم
جميلة : الللله شحال غزال والله ماكذبو باش قالو الفلوس نعمة طرمتي كتزغرت
نهى : انا هاد الساعة ترمتي مصدعاني غا بحاتم كيدار ضبر على هادشي
جميلة : سكتينا العار .
دخلو لشومبر دايرا بحال شي قصر ديال الملوك فقديم زمان داكشي مغربي مئة فالمئة والفتايل محطوطين فالارض فجناب وتصاور ديال الارت معلقين داكشي ملاعق، هبطوليهوم الريوك تالقاع تلاحت جميلة كتفركل ونهى بقات كتصور .
نهى : ناري نوضي تكعدي صورني هنا شربي خاس نحط بوسط قبل مانفيق ونلقا راسي فكازا فدب المحمدي .
جميلة : اري لهنا .
مشات كلسات ودارت بوزيسيون كيالعادة مخلية شعرها على خاطرو وصوراتها كاتبان بحال شي بورجوازية مع ضاربة الاديداس الفغي وسبادري مقادة جات واعرة .
نهى : جاب ربي جبت مانلبس بعدا .