ي جماعة تازوطة قرب مدينة صفرو.. فإحدى الدواوير بالجماعة "آيت يحيى".. وسط الطريق للعين منين كيسقيو و فين كيصبنو كتمشى ببيجامة طويلة تحتها سروال و زيف حياتي فوق راسها شعرها الذهبي القصير كيبان كيبري مع خيوط الشمس الذهبية عينيها العسليين كيضورو على أنحاء الطريق شنيفاتها المنفوخين كتغززهم بسنانها من حر الشمس لي ضاربة فيها يديها الصغار جارين بهيمة من موراها..
وصلات بعد وقت ماشي بالقصير دخلات من باب العين خاشية رجيلاتها البويض وسط الماء كتبردهم زيدات البهيمة لداخل الماء و وقفاتو كتهز البوادة من البردعة و كتحني تعمرها من فم السقاية و ترجع تهز آخور بقات هكك مدة طويلة تا عمرات جهد 10 دلبيدوزات و جلسات فدريجة كتشوف فرجيلاتها و كتلعب فالما و كل شوية كطلل على باب العوينة..
تا بانت ليها جاية كتجر رجليها بصاكادو فظهرها و دايرة يديها على عينيها..
تعرضات ليها فالطريق سلمات عليها بالوجه و قالت بصوت خافت: تعطلتي ارقية من الصباح و انا كنساينك،
رقية: والله الحبيبة ديالي منكذب عليك من ليسي لعندك (باستها فحنكها) اجي دابا درس دليوم ساهل دغيا نقراوه ولكن فتحي دماغك معايا ازهرة باش نرجعو للدار دغيا،
زهور: (بعوينات كيبريو) نركز معاك غي اجي دغيا،
جراتها من يديها بلهفة دخلو لدريجة ديالهم ديال ديما جبدات رقية دفاترها ووراق خاويين و بدات كتشرح ليها الشي لي قراتو فاليسي و زهور كل كلمة متبعة معاها مامخلية تا حاجة تخفى عليها.. عطاتها تمرين تخرجو و من الدقة اللولة خرجاتو صحيح..
رقية: يااه اصاحيبة كون غي خلاك باك تكملي قرايتك كون راكي نتي اللولة دماغك خفيف،
زهور: (بحزن) تا انا كنت باغة نقرا و حرمني منها مامسامحاش ليه لا هو لا خويا (سكتات كتنهد) صاف ايلي نوضي نمشيو للدار (شدات ليها فيديها و زيرات عليهم) شكرا بزاف ارقية،
رقية: راك ختي نوضي لا تخرج ليا حناك من شي قنت نوضي،
ضحكات و ناضت جرات البهيمة و غاديين كيخلفو تا تفارقو حدا الدار بحكم جورتهم توجهات كل وحدة لدارها..
حطات لبادا فباب الدار و جرات البهيمة ورداتو و ربطاتو و دخلات مع الدار كتسوس فيديها تا تلاقات ليها مها..
فاطنة: افييين كنتي ادواحة،
زهور: عمرت لبيدوات و جيت،
فاطنة: الله يجعلني نتيق.. يااه دوزي عجني شي طرح المسمن خوك جاي اليوم مع مرتو طلقي راسك،
زهور: (ببرود) فوقاش جايين؟
فاطنة: ياا شوي تلقاهم دخلو هاااه و هااا ودني منك تشدي الزكاير عااود رااه نكوييك بالقطيب هانا كنقوليك،
زهور: (ابتاسمات ابتسامة صفرة) واخا امي،
عطاتها بالظهر و مشات الكوزينة غسلات يديها مزيان و جبدات الگصعة فين اتعجن و جبدات اي حاجة تحتاجها قدامها نزلات على ركابيها فالأرض و عجناتو تا سالات و سرحات رجليها و يديها باقين فيهم العجينة و سرحات بتفكيرها لبعيد و كتشوف بدوك العوينات ديالها و كتغزز فشنايفها..
فلحظة هزات راسها فالجسد لي دخل عليها و تبسمات بحنية وقفات و قربات ليها هزات يديها باستهم..
زهور: (بالشلحة بحكم جداها كتفهمش بزاف العربية)لاش احنا جاية لكوزينة سيري ترتاحي،
ضرباتها جداتها بخفة لظهرها: ياا شحال كنقوليك تقوليش ليا حنا،
زهور: (كضحك) كتجي معاك احنا،
طامو: عجنتي ابنتي المسمن رغاه مكيعجبني غير من يديك،
زهور: عجنتو احنا بغيتي شي حاجة نصوبها ليك،
طامو: ايييه فاليل صوبيلنا هاديك لي كديري فيها مطيشة طويلة دايرة بحال الحناش،
زهور: (كضحك و كتلمس فيد جداها) واخا احنا دابا نمشي الحانوت نجيبها،
طامو: يرضي عليك ايلينو،
رجعات باست ليها يديها و خلاتها مشات ترتاح رجعات هي كتكمل شغالها و غي ساكتة تا سمعات الهراج عرفاتهم جاو غمضات عينيها و تنهدات كتحيد آخر مسمنة من المقلة و دارت كتعمر أتاي مبغاتش تخرج و مكتفكرش أصلا تخرج تجلس معاهم و عارفة مغاديش يعيطو ليها ديكشي لاش لقات راحتها فالكوزينة..
وجدات صينية و كولشي على حقو و طريقو و خرجات كتحط كولشي فالطبلة و كتسمع الهضرة لي ضايرة و عينيها أبدا واش تهزو لا فخوها لا فمرتو لا فباها بقات غي حانياهم و كتحط..
غادة راجعة الكوزينة تا سمعات صوتو الجوهري لي توحشاتو ولكن ماشي هي لي تحگر و دوزها كأن شيئا لم يكن..
ضارت جيهتو بلا متهز عينيها: نعام انوفل بغيتي شي حاجة،
نوفل: تسلميش على خوك،
بلا حتى ردة فعل و بلا متهز فيه عينيها: على سلامتك انوفل (مخاطبة مرتو) على سلامتك اختي،
رجعات أدراجها لكوزينة خلاتو متبع خيالها كيتنهد تا نطق باه..
الحسن: خليها تفرگع تما لاش دير راسك فيها،
نوفل: ظلمناها الواليد من حقها،
الحسن: يااا تا شكون الكبير نتا و لا هي الفشوش لخاوي،
نوفل: صافي ابا نسا،
طامو: (بالشلحة) لا كنتو كتهضرو على زهور غي تجمعو معندكم متقولو (خنزرات فالحسن ولدها) و نتا هاه كتشوف ولدك كتزاد فيك ضلعة،
الحسن: (بالشلحة) ما قلت والو امي،
طامو: (بالشلحة) لا غيي قول،
رجعات الكوزينة دارت كورسي و جلسات فيه كترتاح باش تنوض تنصب العشا و تغسل الماعن تا دخلات عليها مرت خوها..
شافت فيها زهور بابتسامة و قالت: بغيتي شي حاجة؟
نهيلة: نعذبك معايا مكنشربش اتاي بغيت نفيض الحليب،
وقفات زهور بالزربة لتلاجة كتجبد الحليب و كتهضر: سمحيليا نسيت والله خرجات ليا من بالي،
نهيلة: مكاين مشكل احبيبتي غي اراي عليك رتاحي،
زهور: غي سيري جلسي انا نجيبو ليك اختي،
نهيلة: (جلسات حداها فكرسي) انا معاك تا يفيض،
حدها حركات ليها راسها و جبدات كسرونة كتفيض ليها و نهيلة حاضياها تقاسيم وجهها و ديك الزعورية لي فيها و بيوضيتها كتعجبها بزاف و كتبقا فيها فنفس الوقت..
نهيلة: مرجعتيش للقراية ازهور،
عوجات زهور فمها للجنب: لا مرجعتش،
نهيلة: و علاش؟ ياك تصلح المشكل،
زهور: با مبغاش،
نهيلة: نهضر مع نوفل يهضر معاه،
زهور: بلاش اختي شكرا،
سكتات ناهية الموضوع فهاد النقطة.. فاض الحليب دارتو ليها فبريق فبلاطو مع طاس ديالو قهوة و سكار و مداتو ليها بابتسامة خلاتها خرجات و دارت لشغالها كتنصب العشا..
سمعات مها كتعيط ليها و خرجات عندهم عينيها على مها،
زهور: نعام امي،
فاطنة: سيري عند زهرة قوليلها تجي هي و العزيز و رقية يتعشاو معانا،
زهور: واخة امي (مشات عند جداها حنات لوذنيها و هضرات بالشلحة) خلي احنا تا لغدا و ندير ليك لي بغيتي،
حركات ليها جداها راسها و خرجات متوجهة لدار رقية دقات فالباب و رجعات لور مفاتش بزاف تا حلاتو أم رقية.. غي شافت زهور جراتها عندها كتبوس و تعنق..
زهرة: واا فين غبرتي عليا ابنتي فيين،
زهور: هانا اخالتي غي فالدار.. قالت ليك مي اجيو تعشاو معانا نتي و عمي و رقية،
زهرة: جا نوفل و مرتو،
زهور: جاو اخالتي مهم انا نمشي عندي ميدار،
زهرة: اوقفي وقفي (غوتات من الباب بالجهد) رقيييية وااااا رقيييييية،
جات عندها الأخيرة كتجري و قالت: نعام اماما،
زهرة: سير ابنتي الله يرضي عليك عاون صاحبتك تلقاها واحلة،
رقية: جااا داك طوالة دخوك،
زهور: ههه جا تمشي معايا و لا تبقاي؟
خرجات زادحة من وراها الباب و جرات زهور من يديها لدار..
دخلات زهور نيشان لكوزينة عكس رقية لي سلمات عليهم من باب الصواب و مشات لحقات عليها لقاتها خايدة كتنصب و باين عليها العياء..
رقية: فكرتيني سولات فيك رميساء،
زهور: بصح اتكون تشوشات مهضرتش معاها هادا شحال،
رقية: (مدات ليها تيلي ديالها) هاكي هضري معاها انا نكمل عليك،
باستها زهور من حنكها و شدات تيلي دخلات لوتساب نيشان لسمية رميساء سيفطات ليها ميساج و جلسات كتساينها تجاوب فتواني ردات عليها باوديو حلاتو زهور كتفرنس..
"اوا شغانقوليك اختي الله يعطيني وجهك فييين غبرتي الحم"ارة شحال و انا كنسول فيك صحابني غا غبرو ليك الشقف"
خدمات زهور اوديو و بدات كدوي بهمس و بصوتها الخافت كي ديما صوتها مكيعلاش..
"واراه غي فالدار اختي والله هاد اليامات ملقيت كيندير نمشي عند رقية غي سمحي ليا توحشك ازميرة شنو كتعودي كي غادة مع الخدمة كولشي مزيان؟"
شدوها جميع كيتعاودو على الحال و الأحوال و رقية كانت نصبات و حطاتو فوق البوطة و جرات كرسي حدا زهور كيتعاودو جميع..
علاقة زهور برميساء علاقة فقط فمواقع التواصل الاجتماعي، رميساء بنت عندها 23 عام تعرفو على بعضهم فگروب طورات علاقتهم ولاو كيهضرو ديما وحدة تشكي على لوخرا لقاو راحتهم مع بعض..
وقفات على صوت مها لي كتعيط ليها خرجات عندهم مكتشوف فتا واحد حنات هزات الطبلة و رقية معاوناها تا سالات عاد هزات كتسخن اتاي و المسمن هي و رقية..
رقية: اححح اختي مسمنك شحال واعر،
زهور: بصحتك كولي،
رقية: يديك بنينة والله سعدات جوجك المستقبلي،
زهور: ديكشي لي بقا ليا نيت غي الزواج،
فهاد الوقيتة نيت دخل عندها باها و خوها شافت فيهم و رجعات حنات عينيها لماكلتها متسوقاتش ليهم تا واش كاينين هنا..
الحسن: زهوور ااه سمعي شغانقوليك خوك مادار والو قالو ليه و جا دار شرع يديه (بدا كيشير بيديه) ااش غاديري بشي لقراية ااش؟
هزات فيه زهور عينيها ببرود و ولات هبطاتهم أبدا واش أثر فيها و لا شي حاجة باها و عارفاه ميقد عليه غي لي خلقو..
الحسن: عاطاني مشي (بدا كيغوت) الله يقلل حياك الكل٠بة (قرب بغا يضربها و شدو نوفل) انا سااخط عليك المسخوطة ولكن هاه مسبتي مزوجك نتهنا من كمارتك (دفل فالأرض) مسخوطة،
حانية راسها كتاكل بحال الا مكيهضرش احترامها لباها فقداتو هادي شحال مبقا كيهمها أبدا لا شنو كيقول و لا شنو كيدير و فكرة زواج عارفاه يديرها و يفوتها لهيه و عارفة هادي هي تليتها فهاد الدار مكاينش لي كيحن فيها من غير جداها..
خرجو نوفل كيغوت و يسبط على التنخيلة لي منخلاه و هي ولا على بالها مامسوقاش ليه و رقية كتشوف فيها..
رقية: وااش سمعتيه شقال؟
زهور: امم السخط و لا زواج؟
رقية: بجوج،
زهور: الا سخط واخداه واخداه درت و لا مدرت الا الزواج شنو كيصحاب ليك ايهزني و يلالي بيا راه حاجة باينة ايزوجني،
رقية: (عينيها غرغرو) مديالكش اختي،
زهور: جمعي عليا خناينك ا رقية هادشي كنت عارفاه،
رقية: والا اختي ميزوجكش،
زهور: (ضربات فالطبلة تا تهزو الكيسان) تجمعي ارقية متخنخنيش عليا عافاك،
خرجات من الكوزينة زاعفة خلات رقية كتمسح دموعها و كطل على العشا.. دخلات لبيتها لي كتنعس فيه مع حناها و تكمشات على راسها فجنب و طلقات العنان لدموعها كيهبطو حجر من عينيها لاكن صوتها مكيخرجش فقط الجرة ديال نيفها لي كتسمع خطرة خطرة..
كتفكر كلام باها لي كينزل عليها كيف السم مسخوطة و زايدهالا بزواج الهم دموع الحرقة كيهبطو من عينيها دموع طفلة تغصبات فصغر سنها تحرمات من أبسط حقوقها و دابا!! داباا غيزوجها!! و بدم بارد قالها أنا ساخط عليك!! دغيا هانت عليه يسخط عليها!!
دخلات عندها جداها لقاتها مكورة بحال هكك عزات عليها قربات عندها و جلسات قبالتها و جراتها عندها لصدرها كتبوس فيها و تعنق و تلالي بيها..
طامو: (بالشحلة كي العادة) واااا الورييدة ديالي و بغاو يذبلوها ليا وااا الا مشيتي شكون يحن فيااا وااا مي مي على بنتي وااااا الوريدة ديالي بغااو يبعدوها عليااا و بنيتي شهاد المكتوب عندك،
زهور: صافيي احناا صافي (هزات فيها راسها كتمسح عينيها) شكون هادا امي؟
طامو: (كتمسح دميعاتها بطريف الدرة لي دايرة فراسها) ولد بادني،
زهور: داك البرهوش احناا واااش تا راجل مجايبينو كي الناس،
طامو: شهاااد المكتوب عندك احنااا لا تبكيش و نوضي نوضي لا تغبنيش راسك الوريدة ديالي نوضي،
ناضت زهور كتنش على عينيها باست على راس حناها و خرجات راجعة للكوزينة مكرهة تا خرجات فيه كيشوف فيها بحنين..
نوفل: كنتي كتبكي؟
هبطات عينيها من عليه كتشوف فالأرض و حركات راسها بلا..
نوفل: مغتهضريش مع خوك اممم مكفاتكش عاماين ديال قطيع الهضرة،
زهور: (بصوتها المهدن الخافت عكس داخلها) خليني انوفل نكمل طريقي لعشى ايتحرق نزيد نتسخط كتر ماراني،
تجاوزاتو و مشات دخلات لكوزينة خلاتو متبعها بعينيه و تنهد على ديك كلمة خويا لي مبقاتش كتخرج من فمها.. رجع لبيتو مخليها على خاطرها واخا هو بلا خاطر..
دخلات لكوزينة لقات رقيه كتصوب الشلاضة مشات عنقاتها و باستها فكتفها قاعدة فيها من صغرها الا بغات تطلب السماحة مكتقولهاش حدها كتبوسك فكتفك..
تلفتات عندها رقية و عنقاتها باستها فحنكها: ماشي مشكل عارفاك مضغوطة،
زهور: الله يخليك ليا (حيدات ليها شنو كتقطع من يديها) سيري ترتاحي انا نكمل،
جلسات رقية حداها كتعاود معاها و شادة تيلي ديالها كتبقشش فيه تا،
رقية: عاودت لرميساء شنو وقع،
زهور: خف من رزقك ابنتي شنو قالت،
رقية: أول حاجة راني كبر منك بعاماين.. تانيا سمعي لاوديو،
"اويييليييي على الزواااج راه ياله عندها 16 اشمن زوااااج نااارييي داك باها لهلا يطيحو فياااا تفو تفو قولها تهرب عندي تخليه يبرز بوحدو"
زهور: هههه هبيلة قالك نهرب،
رقية: و مالك مبعيدة غي تازة،
زهور: واش انا صفرو عمرني وصلتو و كتقوليلي نهرب،
رقية: نعاونك،
زهور: بقششي فتيلي ديالك و عطيني تيساع باراكة سخط با منزيد حتى دمي،
فجأة قفزو من الصوت لي سمعو من موراهم و من الهضرة لي سمعو: باغة تهربي ازهور؟
ضارت زهور بالعرض البطيئ كتشوف فيها عينيها خارجين و القفقافة شداتها هي و رقية...
<الحوار بالشلحة>
طامو: يا تي قولي قولي واش باغة تهربي،
زهور: (كتقفقف) اا حنا،
طامو: واااا دوي بغيتي تهربي نعطيك شي ذهب و شي رزيق و سيري ابنتي سيري الوريدة ديالي بعيد من هاد الحفرة،
تصدمو فيها بجوج معرفو ميقولو بقاو غي كيبلقو فعينيهم تا كملات كلامها: سيري ابنتي انا مبغيت ليك هاد التزويجة غير ايكسروك بيها،
زهور: حنا لي فيها الخير الله يآتينا بيها الهروب دابا مغنهربش،
رقية: عافاك اختي الا ديريلي خاطري،
طامو: الله يرضي عليك سيري،
زهور: (خنزرات فرقية) لا لا احنا ماغاديش نهرب صافي احنا سيري ترتاحي،
عطاتهم بالظهر كتكمل شغالها و كتحط العشا فوق الطبسيل خلاتهم كيتنهدو على حالتها و كل وحدة خرجات منها تنهيدة من الأعماق
كيما العادة هي اللولة فايقة مخشية فالكوزينة كتصوب الحرشة و مقابلة اتاي فنفس الوقت كدير كلشي بالسكات معندهاش مع الهضرة و لا الغنى وسط شقاها و لا قوة التقرقيب كلشي كديرو بالحس..
كملات كولشي و حطاتو فوق الطبلة ضرقاتو بزويف من مور منقبات من الفطور و خرجات لبيت حدا دارهم على برا حلات لدجاج خرجاتو و جرات البهيمة داتها لمور الدار ربطاتها وسط الربيع و رجعات كتعمر الما من البير تا حسات بيدين على كتافها قفزات طالقة السطل رجع للبير و دارت موراها..
نوفل: تخافيش غي انا اجي تفطري،
رجعات عطاتو بالظهر و قربات للبير كتجبد الما: فطرت غي بالصحة،
نوفل: شنو بان ليك فهاد الزواج؟
زهور: (قلبات عينيها نافرة الهضرة معاه) لي هرب للزواج هرب للطاعة،
جوج كلمات مولاتش زادت من فوقهم شي حاجة خلاتو هكك كيشوف فيها كتجبد الما من البير..
نوفل: عطيني نغسل وجهي،
زهور: راه الما فالكابينة،
نوفل: الما بارد غيوگضني و الصهد هادا،
هزات كتافها و دارت كتكب ليه الما على يدو و هو كيغسل غي سالا هزات السطل لي كانت كتعمر فيه و بانيو كان تحت الدروج ديال السطح و مشات باتجاه البهيمة ورداتها و رجعات للدار..
مع الدخلة عيطو ليها قربات ليهم مكتهز الراس فحد ماشي خوف و ماشي احترام انما هي هكا الا تقلقات من شي حد النظرة هي تالية مكتبقاش تهزها فيه و متشبعك هضرة..
الحسن: سمعي المسخوطة ليوما جايين الناس اتقراو الفاتحة ديري ليلة من بعد و دگي عليا من هنا،
حركات راسها و رجعات للكوزينة حابسة دموعها بالسيف كتكابر و تكابر باش ميهبطوش فهاد الوقيتة معند البكا باش ينفعها..
دوزات نهارها نصو فالكوزينة متلفة الوقت باشما تفكرش و متبكيش و مديرش شي حاجة تندم عليها.. دخلات عندها مها كتشوفها موجدة كولشي و كتغسل الماعن..
فاطنة: سمعي ابنيتي نتي راك كبدتي اا وليني هادا وقت زواجك ربي جابليك مكتابك بين يديك هاه سمعي ليه و ديريه فوق راسك مانسمعك جبدتي صداع بقاي هوكا دارك ديما نقية لي قالتو ليك عگوزتك ديريه،
هزات فيها زهور عينيها ببرود حركات ليها راسها و رجعات كتغسل لماعن..
فاطنة: سيري هزي حوايجك سيري غسلي عند رقية،
رخات كولشي من يديها و مشات لبيتها كتهز بيجامة و سليب بلا سوتيامات حيت بكل بساطة معندهاش و مشطة ديالها.. تحل عليها الباب و دورات راسها لقات نهيلة..
زهور: دخلي اختي بغيتي شي حاجة؟
نهيلة: فينما تشوفيني تقوليلي بغيتي شي حاجة،
زهور: (ببرائة) لاسقة ليا ففمي و صافي،
نهيلة: (مدات ليها شاصية) هادا كادو ديالك شريتو ليك من المدينة حلي شوفي واش يعجبك،
زهور: كادو؟؟ ليا انا؟
نهيلة: لا ليا انا.. حليه،
خداتو زهور من عندها عينيها كيبرقو بالفرحة كتحلو بهدوء و كتعض على شفايفها.. هزات بين يديها بيجامة بسروالها و بينوار ديالها فالبيض و الذهبي فمها ترع بضحيكة من القلب و مشات عنقاتها بشوية عاد بعدات..
زهور: شكرا بزاف زوينة،
نهيلة: كملي راه باقي،
حنات زهور لساشية لقات فيها دو بياس جداد على مقاسها و ضحكات و حنيكاتها تزنگو و نطقات بحشمة: مكانش تعذبي راسك والله،
نهيلة: تستاهلي احبيبة تلبسيهم بالهنى،
شكراتها مرة اخرى و بقات كتشوف فديكشي لي جابت ليها هزات دوبياس من الجداد و هزات البيجامة دارتها فصاشي و حيدات القدام و خرجات من البيت نيشان للعند رقية..
جالسة فوق ناموسية رقية ملوية فوسط فوطة و شعرها كيقطر طالقاه ينشف ساهية كتفكر فهاد التزويجة و فداك لي جايبين ليها تزوج بيه تا دخلات عليها زهرة..
زهرة: لاا تفكريش ابنتي بزااف كلشي بالمكتاب،
زهور: ديكشي لي كاين اخالتي،
زهرة: نوض ابنتي لبسي ياله ياله تلحگي الوقت،
زهور: واخا اخالتي،
وقفات كتنشف راسها و لبسات عليها بززبة دارت زيف حياتي لراسها حازماه و خرجات من البيت لقات رقية جالسة شادة حنكها..
زهور: م"ات ليك الراجل،
رقية: زواج لهم هادا واااش تا رشيد يتزوجو بيه ناس ولد بادني ازهور،
زهور: (ببرود) مكيهمنيش،
رقية: راه تا شوية ترجلة مافيه،
زهور: رقية اتهبطي معاي و لا ندردب مع الطريق،
جمعات رقيه الوقفة كتشوف فيها و عويناتها الزورق كيبريو يالدموع لي لاحظاتهم زهور و جراتها عنقاتها عندها تا بدات رقية كتشهق بالبكا..
زهور: راني غي حداك مغادي نمشي فيه،
رقية: وااا اهئ مبغيتش ليك داك ايخان وااا لااا،
زهور: (كطبطب على ظهرها و هي براسها خاصها لي يطبطب عليها) ششششت كولشي بيد الله خليها على الله ارقية،
رقية: الله يدير لي فيها الخير،
رخات منها مسحات ليها دموعها و جراتها من يديها خرجو نيشان لدار زهور دنيا مرونة شي كيقاد من هنا و شي من هنا نگير الحسن كيتسمع منين و منين قلبات عينيها بضجر و ديريكت لبيتها هي و رقية مشافو فحتى واحد شدو تيلي كيهضرو مع رميساء متلفين بينما وصل الوقت..
الوقت وصل و كولشي مجمع فصالون غيرها هي و رقية جالسين فبيت واحد..
هي شادة تيلي ديال رقية متكية فبلاصتها و كتهضر مع رميساء و لا كتسارا ففايسبوك مهم متلفة.. لاكن رقية متكية على الباب و طالقة وذنيها تسمع اشنو كيتقال على برا..
فصالون.. جالسين لعيالات فجيهة و الرجال فجيهة فارقة بيناتهم طبلة.. طامو دور و دور و طلع و تنزل فرشيد مكتحملو مكتقبلو و دابا زادت فاش بغا يديلها الوريدة ديالها محملاهش بمرة..
فاطنة: اوا انجية نهار كبير كبير هدا،
نجية (أم رشيد): الله يكبر بيك افاطنة يانهار هادا لي جينا نخطبو فيه زهور.. فينهي بعدا؟
فاطنة: راها فالبيت مقداتشاي تخرج راكي عارفاها كتحشم،
نجية: لا لا تبارك الله عارفة يا فاطنة سمعيني فقهي بنتك تعرف اش عليها فاش تعگب لدار راجلها.. انا راني عييت مقادة نهز حمل دار ولا طياب هادشي راه ايولي عليها طيب لراجلها و شيخها و عگوزتها و تصبن و تجمع نبغيها تكون حارة ماشي مرخونة،
فاطنة: يااا تي لا راها محكوكة تهزك نتي و بادني و رشيد فوق راسها غيي مديريش فبالك (ضربات على صدرها) ضربيها على حسابي غا هو اختي نجية غيي تهلاو فيها ديريها كي بنيتك ما تضرونيش فيها،
طامو: (بالشلحة) لي يعطي بنتو كي الخدامة و صحة عگوزتها كي البغل بقا شي تهلو،
نجية: (ماداتهاش فهضرة طامو) كوني هانية راه بنتي،
هادشي كامل على عينين نهيلة لي كتحصر على حالة زهور لكن ما باليد حيلة.. و فنفس الوقت داز على وذنين رقية حيت كانت قريبة لجيهة لي فيها العيالات تنهدات و شافت فزهور و رجعات كتحاول تسمع للرجال و قلبها واكلها على صاحبة عمرها..
جالسين رجال بادني و ولدو رشيد وولدو واحد آخر و نوفل و الحسن..
كولهم كيهضرو و يشركو مواضيع و مزال مدخلو فالمسگي و نوفل غي كيشوف فهاد رشيد لي باغيين يزوجوه لختو.. مرتاحش ليه و مرتاحش لا لخوه لا لباه احساسو الأخوي بدا كيتحرك و خاطرو ما هناه يزوجها هاد تزويجة البلا معجبوش الحال بمرة..
الحسن: ياا بادني شتك عجبك الجميع يا جيتي تهضرو فالدرية تا طلقنا،
بادني: خهههه يااا سيدي نتا عارف و حنا عارفين نتوما دياولنا مكين لاش دوك الرسميات،
الحسن: (كيضحك) ما فيها باس.. شحال اتعطيني فالصداق،
بادني: 2000 درهم منزيدك عليها الريال،
الحسن: بادني يا قلنا 2500 درهم شهادشي،
هنا كانت الصدمة عند نوفل ختو كتباع و كتشرا فقبالتو، عينيه وساعو على الجهد و تزير محملش گاع البلان وقف خرج من تما و خلاهم يتفاوضو فبيع طفلة لي أصلا ماليها رأي فهاد الزواج..
عندهم فالبيت..
حيدات من الباب كتمسح دميعاتها بكم البيجامة لي كانت لابسة و جلسات حدا زهور هاد الأخيرة لي شافت فيها باستغراب..
زهور: احي مالك كتبكي؟
رقية: عافاك لا تزوجيش بيه راه غي كيبيعو و يشريو فيك،
عاودات ليها شنو سمعات من طاق طاق حتى السلام و عليكم خلاتها غي كتشوف فيها ما عرفات ما تقدم ولا توخر هي عارفة اه تزويجة الهم ولكن ماجاتش فبالها بصح واليديها يدفعوها لهاد التزويجة بحال هكا بحالا باغيين غي يتهناو منها.. كتبقا بنتهم على الأقل يعطيوها قيمة..
عينيها دمعو و هي كتشوف فرقية لي كتمسح عينيها حتى هي تا كملات كلامها لي زادها صدمة على صدمة..
رقية: و اهئ مبغيتوش ليك حيت اهئ حيت هو لي كان شدني ديك النهار بغا يتعدا عليا و قلت ليك مشفتش شكون اهئ كان هو،
جوج شهقات تسمعو فالبيت اللولة لزهور لي عينيها تحلو على وسعهم و عقلها مبقاش كيستوعب.. دماغها حبس..
و الشهقة تانية ديال طامو لي كانت داخلة تواسي وريدتها تا سمعات لي ميعجب.. قربات كتعفط عند زهور و حيدات شالها لاحتو ليها على فخاضها..
طامو: ها السخط ها الرضى الا ما هزي حوايجك و هربي من هاد الجايحة،
شافت فيها زهور و ميلات راسها فيها و دميعاتها بداو كيهبطو و قالت بصوت خافت كيقطع فالقلب: شتي احنا فين باغيين يلاوحوني،
طامو: (هبطات على ركابيها عندها و عنقاتها) يمشيو و غنمشي معاك نباتو عند رقية و هربي فصباح بكري ميكون حد،
زهور: ولكن...
طامو: مكاين بوو ولكن باغة سخطي ايلي باغا سخطي،
حركات زهور راسها بلا بزربة و بداو شهقاتها كيعلاو و رقية زادو دموعها كيهبطو على صاحبتها و قلبها كيتقطع عليها هي لي عمر صوتها على تا فدموعها عمر بكاها متسمع ولكن دابا كيسمعو لشهقاتها كيعلاو ضراتهم فخاطرهم بالجهد..
حيداتها طامو من حضنها و مسحات ليها دموعها و ردات درتها و هي كتهضر: نوضي جمعي حوايجك فشي شاكوش انا راجعة،
خرجات و زهور ترخات مقدات دير والو غي كتشوف، رقية غي شافتها هكك عرفاتها مغدير والو وقفات هي فعوطها و هزات ليها صاك ديال المدرسة لي كانت كتقرا فيه و دارت ليها فيه حوايجها و حطاتو و جلسات حداها شادة فيديها..
مادازش وقت بزاف رجعات طامو سدات الباب بساروت و مشات لصنديقة تما جبدات ساروت من صدرها و حلات بيه الصنديق و هزات منو دريرة كانت معقودة تما..
هزاتها و مشات جلسات فالأرض قبالة زهور و رقية.. فرشات ديك الدرة تما كانت فيها دميلجات بزاف و سنسلة غليضة و حداها فلوس كتار.. هزات الفلوس كاملين زادتهم على وحدين كانو فيديها و حطاتهم فيد رقية..
طامو: ديريهم ليها فصاك تما،
دارت رقية كي قالت ليها و هي كتبسم بعدا غتهنا على صاحبتها من داك حكل العفطة.. ياله بغات طامو تهز دمالجها ديرهم ليها فصاك حبساتها زهور بيديها..
زهور: خليهم ليك احنا،
طامو: دييهم بعيهم بااش تعيشي و انا نبقا نسيفط ليك،
زهور: (حيدات ليها دميليج واحد و دارتو فيديها و باستو) خليلي غي هادا نتفكرك بيه احنا،
طامو: الوريدة ديالي بعدي من هاد الحفرة معندك مديري بيها (وقفات و باستها فراسها) الله يرضي عليك،
خرجات طامو باش ميشكوش بلي شي حاجة كاينة رجعات حداهم و هي مرتاحة..
بقات كتشوف فيها رقية مبتاسمة و زهور شداتها الضحكة بديك الشوفات لي كدير فيها..
زهور: فرحانة المصدية ياك،
عنقاتها رقية من جنب: فرحانة غتهناي من داك ايخان و من باك و من مك حتى هي،
زهور: هههه اري تيلي ديالك اري،
رقية: علاش؟
زهور: نسول وميساء واش نمشي عندها فين بغيتوني نهرب لزنقية،
رقية: هييه نسيتها فخبارك،
هزات تيلي عطلتو ليها فيساع دوزات ليها الخط و بقاو كيساينوها تجاوب..
رميساء: وي العزية،
زهور: هههه هادي انا ماشي رقية،
رميساء: ههههه صحابني ديك البهلة فينك كيداز داك زواج الغفلة،
زهور: رميساء ختي نقوليك سي حاجة،
رميساء: اتيني الله يسمعنا خير،
زهور: احم غادي نهرب و معندي فين نمشي واخا نجي عندك،
رميساء: اااااا حلفي حلفي.. اااه اجي والله فينك واش خرجتي،
زهور: وحدة وحدة ارميساء لا باقي بغيت نعلمك،
رميساء: اجييي اختيي اجيي على راسي و عيني،
زهور: لهلا يخطيك اختي الله يحفظك انا غدا الصباح انخرج،
رميساء: شوفي ضبري على شي تيليفون باش نعرفك فين وصلتي،
زهور: صافي كوني هانية شكرا اختي بزاف،
رميساء: سيري غانسبك ردي البال فالطريق واخا،
زهور: واخة بسلامة ازين ديالي،
قطعات عليها و تنهدات كتفكر فهاد الخطوة لي غادي دير عقلها و قلبها بجوج باغين يخرجو من هاد الجايحة معندهاش تا شوية الندم على هادشي لي غادي دير..
الساعة تشير للخمسة دصباح.. الضو بدا كيبان شوية الرجل بدات كترخا فالدوار و كل واحد غادي مقصد الجامع يصلي الفجر..
فهاد الوقيتة كانت هي جالسة فسرجم كتشم لهوى و كتشوف فدارهم لي قبالتها و كتفكر ذكريات طفولتها و ذكرياتها مع خوها فاش كانو مصالحين و مع مها مع صاحبتها جداتها لاكن ملقات تا ذكرى تفرح مع باها..
تنهدات و وقفات مشات لبيت لي فيه جداها و رقية هزات كسوة طويلة لبساتها و جلسات كتشوف فرقية و جداها لي غي قال الله أكبر قفزات كتدور راسها تقلب عليها تا لقاتها جالسة مبسمة كتشوف فيها..
طامو: فايقة.. نوضي نوضي سيري انا نفيق رقية محد بنادم كيصلي الفجر،
حركات راسها و مشات للحمام غسلات وجهها باش توگض و خرجات لقات العزيز و رقية واقفين كيساينوها حدا الباب و رادين البال لا يدوز شي حد و جداها جالسة مع زهرة كيشوفو فيها.. قربات لزهرة عنقاتها و باست ليها راسها و كتفها..
زهرة: سيري ابنتي الله ينقي طريقك من الشوك (عينيها دمعو) و توصلي صوني ليا،
عنقات جداتها مزيرة عليها باستها فراسها و يديها و باستها على كتفها قبلات متتالية..
طامو: مسامحاك الوريدة ديالي مسامحاك ايلي سيري الله يرضي عليك سيري،
عطاتهم بالظهر موجهة ليهم هونا لي فالباب حلات ليها رقية الباب لوراني و تكات مسرحة مخبية ميشوفها حد حتى يقوتو لابيست..
شدو الطريق و زهور كضور فعينيها و كتفكر كي غتكون حالتهم من مور هادشي لي دارت.. مها شنو غادير فغيابها واش غتسخط عليها و لا غتقول انا لي ضريت بنتي.. و باها ايكمل على سخطو و لا غيقول انا لي طججت بنتي.. و خوها شنو غيدير أفكار زارو بالها تا سمعات صوت العزيز مخرجها من سهوتها..
العزيز: صافي ازهور نوضي،
تگعدات كترد شعرها من مور ودنيها و دارت السمطة لور..
رقية: ياك ابا فاس؟
العزيز: لاش هبيل انا نخلي بنتي تمشي بوحدها حتى لفاس و هي صفرو عمرها فاتو (شاف فيها من المراية) ياك ازهور،
زهور: (تبسمات ليه) لهلا يخطيك اعمي،
العزيز: حيد ابنتي ديك السمطة و قرب لهنا عندنا،
ديكشي لي دارت حيداتها و جلسات الوسط..
العزيز: شتي كون كنتي بنتي كون راني دايرك أميرة فدارك ااا وليني ديك الحسن الله يخليها سلعة،
رقية: لا زعما نوفل الربح،
العزيز: ما علينا ردي ابنتي البال لرااسك و حضي راسك المدينة زيينة اوليني صعيبة متيقيش،
زهور: كون هاني اعمي،
العزيز: عارفك مرضية و بعقلك الهبيلة هي لي عندي،
رقية: ياااك ابا،
العزيز: سكتيي اهيا يا شكون كانت تلوح ليا الدجاج فالبير،
زهور: هههههه باقي عاقل اعمي،
العزيز: لاااش انا نسا،
رقية: راني كليت قتلة عليها،
العزيز: (هز يديه على لڤولون) ماشي انا لي قستك مك،
زهور: هههههه مازالة عاقلة ديك النهار اعمي هربات تخبات عندي،
رقية: ايييه كتعقلي غي على لي بغيتي،
زهور: ههههه عاقلة على كلشي اختي،
العزيز: نعسي ابنتي بينما وصلنا لصفرو نفطرو و نكملو لفاس،
حركات راسها و رجعات لور توسدات صاكها و غمضات عينيها عاد رتاحت و نعساات..
دازت ساعتين كانو وسط لاگار دفاس..قطعات ورقة لمحمدية مع التمنية و جلسات وسط لاگار حداها رقية حاطة راسها على كتفها و العزيز حداهم كيشوف فالدنيا.. دازت نصف ساعة بيناتهم غي السكات.. تا تكسر من طرف العزيز لي كيشوف فالشاشة..
العزيز: نوض ابنتي التران وصل،
نغصة شداتها فقلبها منين خطر على بالها شنو خلات من موراها للحظة كانت اتراجع لاكن شي حاجة كتخليها تكمل فقرارها.. تنهدات مغمضة عينيها كتطرد هاد الأفكار من بالها..
ووقفات معنقة العزيز من كرشو و هو كيطبطب عليها و يوصي و يعاود.. حاسبها بنتو تربات مع رقية و كبرات قدام عينيه لو كان بيدو ميخليهاش.. طلقات منو و تهزات باستو من كتفو..
العزيز: الله يرضي عليك ابنتي.. (شد يديها مد ليها الفلوس و كمش على يديها) رديي البال لرااسك و لا تغريش كملي قرايتك و لي حتاجيتيها صوني لرقية كولشي يكون عندك،
عينيها غرغرو و هي كتسمع لهضرتو هزات يديه باستها بحب تا رضى عليها..
تلفتات عند صاحبتها و عنقاتها بكل حب مزيرة عليها.. العناق طوااال علاش لا! و هي غاتفارق عشرة سنين منين حلات عينيها و منين عقلات على راسها و هي مكيفارقهم غير النعاس..
بعدات عليها كتمسح دموعها و بصوت خافت حنين قالت: ردي البال لراااسك و تهلاي فراسك سولوك خرجي سوقي مشفتيني مشفتك قراااي مزيان اختي انبقا ديما نسول فيك (شدات فيدين رقية ديرات عليهم) عافاك ارقية ردي معاك البال لحناا بقاي طلي عليها مرة مرة و تبقاي تعطيني ندوي معاها،
رقية: (كتحاول تحبس دموعها) كوني هانية تا نتي ردي البال لرااسك و عنداك تنسايني (دموعها طاحو) انتوحشك،
زهور: (عنقاتها) تا انا المصدية،
رخات منها كتبعد لباب منين غدخل لجيهة التران و عينيها غي عليهم كتشوف فيهم مقاداش على فراقهم و مقاداش تخلي كولشي مور ظهرها بهاد السرعة.. لكن للضرورة أحكام!
عنقات صاكادو ديالها كتنهد بحزن توجهات للقطار كتقلب على بلاصتها.. جلسات كتشوف فسرجم فطريق فالناس و بالها غي فشنو غيوقع فالدوار من مور ميعرفوها هربات..
داخلين للدوار و موضوعهم هو زهور.. كي غادي تدير تعيش بعيدة عليهم؟ أو بالأحرى هوما لي كي غادي يديرو يعيشو بلا بيها؟ بلا ضحكها؟ بلا روحها المرحة فاش كتكون فرحانة؟ بلا رزانتها؟
سارحة كتشوف فالخضورية على جناب الطريق و عقلها مشا فذكرياتها مع صاحبتها.. دابا لمن غتبقا تشرح؟ شكون غيبقا يرد ليها عقلها؟ شكون يفكرها فحفاظتها و قرايتها؟ شكون يفاجي عليها و يفهمها؟ شكون يطيب ليها وقيتة الامتحانات و يسهر معاها تا تسالي؟ شكون يفرح لفرحتها و يبكي لحزنها؟
سرعان ما أفكارها تلاشاو على صوت الصداع و الغوات لي تسمع فوذنيهم بجوج.. تلفتات عند باها عاقدة حواجبها و هو نفس الشي كيشوفو الروينة نايضة قبالة باب دارهم سكت الطوموبيل وسط الطريق و خرج بزربة و موراه رقية و هوما بجوج عارفين اشنو غادي يكون واقع..
الحسن: وااااا فيناااهيي المسخووطة ادويي ا زهرة خليييت عندكم البنت فيييناهي؟
زهرة: اخاي الحسن راااه فقنا كاملين ملقيناهااش هانتا على عينيك دخل قلب الدار،
نوفل: اخالتي حاشا لله واش نكذبوك ولكن فيين غتكون زادت،
العزيز: اااش وااقع هناا مالنا على هاد الغوااات؟
الحسن: هااااا جيتي فييين هي المسخوووطة فييين هي؟؟ (شاف رقية هابطة من الطموبيل كتشوف فيهم ببرود) هربتوررهااا ادويييو هربتوووها؟
رقية: نهربوها مالها مومو راها كبيرة كون بغات تهرب كون هربات نهار خرجتوها من القراية،
الحسن: (كيشالي بيديه) ايييوااااا فييينااااهي فيييين تشقااات الأرض و بلعاتها،
رقية: سيير قلب عليها فالدوار من عذرها تكون طججتيها،
نوفل: واش عارفاها غي فين هي؟
رقية: (طلعاتو و هبطاتو) شكون نتا لي كتسول عليها؟
الحسن: اااا رقييية تجمعييي،
رقية: ياك ساخط عليها اش خصك مازال بيها،
خلاتهم و دخلات للدار حيدات سبيرديلتها و تلاحت فوق السداري كتسيفط ليها ميساج عادي كتسولها فين وصلات و غي توصل تصوني ليها.. تا حسات بمها و فاطنة لي كتبكي جلسو حداها..
زهرة: (كتغمزها بالريط) قوليلي ابنتي واش عارفاها فين مشات؟
فاطنة: (كتبكيهم حجر كيطيحو) غيي قوليلي عافا بنتي غي اهئ نعرفها فين كاينة و ترجع لعندي راه كبدتي مشوية عليها،
رقية: اسمحاس اخالتي ولكن معارفاها فين كاينة،
فاطنة: نتي صاحبتها امن الصغر اقوليلي ابنتي،
رقية: تا انا بحالي بحالك فقت الصباح نمشي مع بابا نشوف قرايتي من مور الباك ملقيتهاش صحابني رجعات للدار،
فاطنة: (ضربات فخاضها) واااا مييي على بنتي واااا مي مي و فييين بنتييي واااا رجعي الحبيبة رااه كبدتي كتحرق وااا بنتي،
رقية: (عرق واحد دالصبر لي بقا كيضرب ليها) فاش كانت حداكم كنتو دايرين ليها كي الخدامة منها الدار منها برا غصبتوها فشبابها و هي باقة صغيرة خرجتوها من قرايتها لي كانت كتجي فيها هي اللولة و عمرك دافعتي عليها عطاها داك نوفل يا حسرة خوها قتلة ديال الكلاب و مدافعتيش عليها هرسها من رجلها علاش؟ غي حيت وصلو ليه هضرة مكاينة گاع و زدتي كملتي عليها تا نتي و داك راجلك كون مكانت حنااا اااا كانت مشات ليها رجلها فيين هاد الكبدة لي كتدوي عليها تقيل مخشية فالكوزينة و تقيل تجمع و تصبن و تنقي و تا واحد عمرو داها فيها تا ببيجامة د ستمية و كتدوي على الكبدة هههه لا و زوينة كنتو اتلوحوها لولد بادني رشييييد واااش هاداك يلوحو ليه الناس ولادهم.. كنتي تصيفطي بنتك تراسة ترس على راجلها لي فالأصل شماتة مكيجي للرجلة تا حاجة سمعتو سابقاه فالدوار و على بادني ياكلو 10 الخبزات فالنهار ها هي مشات ديرو موراها البصلة (وقفات كتهز تيلي ديالها و الكيت) سمحاس ولكن ما تما كبدة غي نوض اخالتي ديري الفرح،
خلاتها كتقلا بهضرتها و دخلات لبيتها كتبدل حوايجها و تلاحت تكات بلاصتها كتهضر مع رميساء و تعاود ليها..
بقات برا أم كتشوف راسها ضيعات من بين يديها كبدتها و بنتها نوارة هربات ليهم من بين يديهم ندمات بكات نتفات شعرها و ندبات و لكن مشا الحال مشات و بقا من موراها السراب
عكس البركان لي كان شاعل برا.. قلبو الدوار سفاه على علاه والو ملقاوهاش.. الحسن شداتو الرعدة من صبعو الصغير لاكن ماشي على بنتو ماشي على كبدتو لي مشات.. على شوهتو وسط الدوار بنتو هربات و عرسها قرب..
الحسن: (شاد فراسو غادي جاي وسط دارو) اويلي اويلي علو المسخوطة و مرغاتلي وجهي فالتراب،
العزيز: (كيطلع فيه و يهبط باشمئزاز) فعوط متقول فين بنتي و فين ردات الراس شو شكاتقول،
الحسن: (بجهالة) اناااااا سااااااخط عليييهااا عمر رضااااتييي متدييييها سااااااخط عليييها الى يوم الدين،
نوفل: (وقف مواجهو صاعر كتر منو) الواااااليييد زدتيييي فييييه رااااه بنتك هااااديييك لي معرفناااااهاااا فين مشاااات بسباااااب قصوووحية رااااسك و نتااااا غييي مزااايد فيه،
الحسن: كترااااااد معاااايااااا (بجكارة) امااااعنديييش البنااات انا ماااعنديييش الله يعطييييها موووصيبة المسخوووطة شوهاتني وسط الدوار،
نوفل: نهاااايلةةةة جمعيييي القل//اااااوي نتقاااا//ودووو فحااالنااا.. داااابااااااا!!
الحسن: سيييير الله يعطييكم غبااارة لا نتا لا هي،
العزيز خرج مخليه كيتهز بوحدو و نوفل دخل هز حوايجو هو و مرتو دارهم فطموبيلتو داز سلم على مو و دخل كيدق على رقية..
حلات ليه باب بيتها كتشوف فيه هازة حاجب و موراه نهيلة..
رقية: نعام اخويا؟
نوفل: (بحرقة) نهضرو اختي رقية الله يحفظك!
ترعات الباب و خلات ليهم الطريق منين يدوزو..
دخل جلس فوق الناموسية كتافو هابطين و على وجهر باينة محروق على ختو و نهيلة جلسات فالجنب فكرسي عينيها مغرغرين على حالة راجلها و كتفرك فصباع يديها.. جابت رقية كرسي و جلسات بعيدة عليه شوية قبالتو كتشوف فيه..
رقية: شنو انوفل؟
نوفل: عارفاها فين راها؟
رقية: لا،
نوفل: انا عارفك غتكوني عارفة حيت هاد برودة الدم لي جالسة بيها يا اما عارفة يا اما مكتهمكش ديك البنت لي معرفناها فين زادت،
رقية: ديك البنت كتهمني كتر من المخير فييكم،
نوفل: (ضرب على صدرو) راااه حرقتها هنا قوليلي غي فينهيا غي نبرد واش راها بيخير فين مشات عندمن مشات،
رقية: (كتشوف فيه) حرقتها علاياش بالظبط؟ (هزات يديها كتحسب ليه) على المدرسة لي خرجات منها بسبابك و لا على الضرب لي كلاتو منك ولا على تهريسة لي هرستيها من رجليها و لا على سيمانة لي دوزتيها ليها فينما تبانلك تحشي ليها سقلة ااممم علاياش اخويا بالظبط مرحمتوها مخليتو رحمة ربي تنزل،
نهيلة: (دموعها شلال على خدها) اهئ غالط و الغلط راكبو من ساسو لراسو ولكن راه ندم عافاك غي عطينا شي حاجة نهضرو معاها فيها،
نوقل: غيي نسمع غي صوتها نطمن عليها و نمشي فحالي ارقية حسي بيا،
بقات كتشوف فيهم بقاو فيها و معرفات مدير النمرة مغتقدرش تعطيها ليهم.. تنهدات و هزات تيلي دوزات نمرتها و دارت سبيكر مادازش بزاف جاوباتها بصوتها الخافت المهدن..
زهور: آلو،
رقية: فينك فين وصلتي؟
زهور: وااش اتبقاي كولا دقيقة تقوليلي فين وصلتي فاش نوصل نصوني ليك،
رقية: نوفل بغا يدوي معاك،
تسمع غي السكات من طرفها و تنفسها لي بدا كيهلا شوية بشوية تا ولات نطقات بنفس النبرة و بنفس الهدووء: شكون نوفل؟