الجزء 2 - عَــشِــقْــتُــكِــ إلــى حَــدّ الــهَــوَسْ

الصدمة بانت على وجهو و غشاء من الدموع تكون عليهم الهضرة مبقاتش باغة تخرج ليه..

رقية: زهور! 

زهور: فاش نوصل نصوني ليك تهلاي، 

قطعات عليها الشي لي زاد الطين بلة عندو مبقاش قادر يجلس كتر ناض خرج من الدار طافج تا وقف قبالة طموبيلتو تحنا بيديه بجوج كيطلع النفس لي تحبسات فيه تا حس بيدين رطبين كيدوزو على دراعو..

طامو: (بالشلحة) الوقت اولدي الوقت، 

نوفل: (صوتو مرعود) فيين مشات امي؟

طامو: مشات فين ترتاح خليلها للوقت صعييب لي دوزتي عليها صعيب، 

ضرباتو ضربات على كتفو و رجعات داخلة للدار تا لحقات عليه نهيلة و دورات يديها على كرشو و عنقاتو..

نهيلة: دابا ترجع تدوي معاك خليلها الوقت احبيبي و كلشي ايتصلح، 

نوفل: صعيييب! 

طبطب عليها و جرها ركبات بلاصتها و مشا بلاصتو مقلع من تما مخلي كولشي من موراه بحال ختو..

ربعة السوايع بالتمام و الكمال دوزاتهم فالتران غي ساهية و كتشوف فسرجه مرة الجبال مرة الخضورة مرة غي التراب عينيها أبدا واش تهزو فشي واحد..

عقلها مسافر بعييد كتفكر فحياتها من هنا القدام شنو غادي دير و كيفاش غادي تعيش لاكن الاول لي طاح على بالها هي <<القراية>>..

توقف التران معلن عن وصولو للمحمدية وقفات هازة شكيكرتها معنقاها و تابعة الناس منين غاديين هزات تيلي نوكيا قاضي غاراض ف ألو دوزات للنمرة ديال رميساء: ألو رورو، 

رميساء: احبي فينك؟ 

زهور: انا وصلت خارجة من المحطة.. فينك نتي؟ 

رميساء: خرجي انا فباب لاگار،

قطعات عليها رادة تيلي للشكارة و خرجات كتضور عينيها تا بانت ليها واقفة متكية على طوموبيل فياط صغيرة طارت عندها عنقاتها و رميساء كتبوسها..

رميساء: يا ختي يا ختي على الشهبة، 

زهور: صدقتي تيتيزة ارورو، 

رميساء: هههههه مالي كنت خويبة؟ ياكي ازهور ياكي، 

زهور: (بعفوية) تا ضحيكتك فنة يا ختي، 

رميساء: كون تشوفي نتي! زيدي زيدي قبل ميوقف علينا البوليس بلاصة مخصنيش نوقف فيها، 

ركبات زهور بلاصتها و مشات رميساء بلاصة السياقة..

رميساء: نمشيو نتغذاو؟ 

زهور: (بامتناع) لا لا زيدي نطيبو فالدار، 

رميساء: اوالله حتى نمشيو ناكلو.. صباري صباري، (جبدات تيلي عطاتو ليها) صوني لديك اللفعة آبيل ڤيديو، 

ابتاسمات زهور و صونات ليها مدازش بزاف تا جاوباتهم مبسمة: المصدية انا وصلت قوليها لحنا، 

رقية: هاكي اختي قوليها ليها راه بقات معانا خلات الحسن كيبرح فالدار، 

زهور: وايلي دار شي فضيحة؟ 

رقية: وااايه هههههه تخافيش (ضربات على صدرها كضحك) ختك في الذمة عطيتهم علاش كيقلبو، 

زهور: ههههه عالام نتي.. و مي؟ 

رقية: بكات بردات و هبطات لدارها، 

زهور: اممم واخا دوزيلي حنا، 

خرجات رقية كضحك لعندهم لقات باها و مها و طامو جالسين على كاس داتاي مجمعين.. مشات حدا طامو و دارت ليها تيليفون فوجهها..

رقية: <الحوار بالشلحة>  هاكي وريدتك بغات تدوي معاك، 

طامو: (كتصغر عينيها فتيليفون) واااا الورييدة ديااالي وا الحبيبة وصلتي؟ 

زهور: وصلت احناا غي رتاحي، 

طامو: و فيين راكي معامن؟ 

دورات ليها زهور جيهة رميساء لي كانت مبتاسمة ابتسامة ساحرة بجمالها و برائتها كتخلي بنادم يرتاح ليها..

رميساء: هاهي اخالتي معايا معندك مناش تخافي عليها راها ختي نديرها فعيني، 

رجعات زهور كتشرح لجداتها بالشلحة شنو قالت رميساء..

طامو: بااينة فيك بنت الأصل الله يرضي علييك، 

زهور: صافي احنا متقلقي ماديري فبالك والو انبقا نصوني و نهضر معاك، 

طامو: انا غي منين خويتي هاد الجايحة هاداك هو السعد عندي سيري الوريدة ديالي الله يفرشك بالرضى و يغطيك برضى، 

التيليفون داز عليهم كاملين دوات معاهم كاملين بالتوصيات لي ميخطاوهاش و الرضى لي خداتو منهم كاملين قطعات و هي مرتاحة..

وصلو لوجهتهم فين غياكلو و هبطو دخلو لصناك جلسو مقابلين مع بعضهم رميساء كتشوف شنو تاكل و زهور عينيها كيدورو فالبلاصة أول مرة تشوفها..

رميساء: زين شنو تاكلي؟ 

زهور: لي خديتيه خوديه ليا معاك، 

خداو طلبيتهم و زهور باقين عينيها كيضورو على الناس و البلاصة و غي كتشوف..

رميساء: زهور هيهو!! 

زهور: ااا هانا، 

رميساء: الوغ دابا نهضرو فالمعقول مغديريش ليا داك الزابور ديال جيتي لهنا تخدمي (حركات راسها بلا) غادي نسولو ليك على الامتحان ديال الاعدادي فوقاش يمكن ليك دوزيه باش تخدمي ليه و تكملي قرايتك فليسي عادي!! 

زهور: (عينيها لمعو) بصح يمكن ليا ندوز و نكمل؟

رميساء: بيان سيغ يمكن مي لي معارفاش انا هو فوقاش كيدوزو هادي انسول ليك عليها بابا هو يعرف ليا كلشي بالتفصيل، 

زهور: شكراااا بزااااف والله معرفت كيفاش نشكرك، 

رميساء: زيديها فراسك (هزات راسها فسيرڤور شكراتو) كولي كولي، 

داخلين لدرب عادي ما هو بشعبي ما هو راقي.. الحي كامل ديورو مكونين من جوج طوابق وقفات لوطو حدا وحدة منهم و هبطو و رميساء عينيها غي كيضورو من بلاصة لبلاصة حوايج جداد عليها كتشوف على المباشر من غير تيليفون ديال رقية..

دخلات تابعة رميساء لي سابقاها طالعة فالدروج حلات الباب و خلاتو مترع تا دخلات من موراها زهور كتشوف فالدار عجباتها بزاااف..

دار ما هي صغيرة ما هي كبيرة مع الدخلة كاينة جليسة بفوطويات و الوسط طبيلة الزاج و الحيوطة كاملين بالبيض.. قبالتها صالة فيها سدادر كلاص ملمطين بالبيج مع وسيداتهم و صالون مغربي بازرق ملكي..

جوج بيوت واحد مصبوغ نصو بيض و نصو أسود متوسطو ناموسية بكوڤير كحل و بيرو تا هو كحل و مراية مع ليزيطاجير ديالها كوحل فوق منهم مكياج روايح كريمات كولشي مقاد و متول و قبالتهم بلاكار ديال الحوايج.. وتاني مصبوغ بالبيج متوسطاه ناموسية ديال واحد و حداه مكتب و بيض و بلاكار مراية مع لي ديطاجير ديالها كولهم خاويين..

كانو عينيها كيضورو على البيت عجبها بلونو مفتوح و هي روحها كتميل للألوان الفاتحة بقات كترمش فيه بزاف طربها.. تا سمعات صوتها من موراها..

رميساء: عجبك؟ 

زهور: ااه زوين بزاف، 

رميساء: (بصوت حزين) كتشبهي لختي الله يرحمها (تنهدات) كان بيتها مبدلت فيه حتى حاجة عرفتو غيعجبك حيت كانت بحالك كالم و كتهضر غي بشوية متغوت متهز فيك الراس، 

زهور: الله يرحمها يا ربي، 

رميساء: (بحقد) الله يااخد الحق فلي كان سباب، 

زهور: خلي دعوتك عند الله يمهل و لا يهمل رخفي فيك النفس ارورو دعي معاها بالرحمة و المغفرة، 

رميساء: الله يرحمها و يوسع عليها و يجعلها من أهل الجنة، 

زهور: آميييين، 

رميساء: (ضحكات متناسية الموضوع) الي الي دخلي بدلي عليك و دوشي ترتاحي ستفي حوايجك باش نخرجو، 

زهور: احي فيين؟ 

رميساء: نكسيوك و نجلسو قبالة البحر تشمي الهوااااااااء، 

زهور: (الضحكة بدات كتوسع على شفايفها) انمشيو البحر!! ياااي عمرني شفتو غيو فڤيديويات،

رميساء: اييه انمشيو و شوفيه تا تشبعي غدا عندي روبو نمشيو نعومو ياله دابا سيري قضي غاراض انا نشعل ليك الشوفو، 

نص نهارها داز ما بين التدواش و ترتيب حوايجها و الراحة.. خلات رميساء مشات زربات على خدمتها و جلسات هي متكية كتبلاني فراسها و تخطط محاساش بلي ضاير بيها تا رميساء لي واقفة فالباب كتعيط ليها گاع مردات ليها البال تا..

رميساء: وااااااا العماااااالة و الربااااااط، 

زهور: (قفزات شافت فيها) هيييه منين خرجتي، 

رميساء: ساعة و انا زهور وا زهور زهور.. ختي غارقين ليك البابر، 

زهور: هههههه هاربة ليا الحلوفة، 

رميساء: هههههه وا نوضي نقلبو عليها، 

زهور: انخرجو دابا؟ 

رميساء: اه اجي ختاري شي حاجة تلبسيها، 

زهور: بصح نختار لي بغيت لي بغيت؟ 

رميساء: لا مالي غنعز فيك  شي شرويطة دوزي دوزي، 

دخلات معاها لبيتها كتضحك من قلبها.. اللباس الخروج و النشاط من ديما كان عندها طموح انها تجرب هادشي تلبس تا هي كي بغات كي البنات فسنها تعيش و متحسش بالنقص! لاكن كان العكس لي كانت عايشاه فالدوار.. القمع! الحگرة! التسلط! 

قربات لبلاكار رميساء و مدات يديها كتبقش ليها فالكساوي و سروال لبوديات فالتالي شافت فرميساء..

زهور: جبديلي من خاطرك، 

رميساء: و بدون اعتراض؟ 

زهور: غيي نوضي، 

ناضت متحمسة كتقلب ليها مبغاتش تحكر عليها من اللول تجبد ليها القصير و فنفس الوقت مبغاش تخنقها.. عارفاها صغيرة و عارفاها غتبغي تلبس و لكن دقة دقة تا تعرف شخصيتها عن قرب أكثر..

كدور من هنا و هنا تا استقرات على سروال زيتي طاي هوت مع سميطة ديالو و بيل سماطي گرونة و مدات ليها صنيديلة فنفس لون البيل..

رميساء: تراااا ياله نوضي لبسي، 

زهور: شنو داكشي؟ 

رميساء: خوخو بلع تنوضي لا! 

زهور: هانا اراي، 

عطاتها ديك ساعة مشات لبيتها كتشوف فالحوايج و كتحيد حوايجها..

كتشوف راسها فالمراية طالقة شعرها مبوكلي شوية و عينيها فيهم لمعان الفرحة عجبها راسها فستيل عمرها لبساتو ولا جرباتو.. صح رقية كانو عندها الحوايج لاكن زهور كانت كتمتانع...علاش غادي نلبس محدي جالسة غي فالدوار...علاش نشوف راسي فشي حاجة غالبا غادي تعجبني و نفقص راسي...مكاين لاش هادي حياتي و انا متقبلاها... 

عمرها كانت كظن انه يجي النهار لي غادي تكون عندها الجرأة أنها تكون "أنانية" كيما كتحسبها هي و تهرب.. تهرب بعييد على الحفرة لي تزادت فيها و عاشت فيها و كبرات فيها و كانت غادي تزوج فيها..

عمرها شافت <تازوطة> كمكان انها تقدر تصبر عليه كان غيجي وقت و صبرها ينفذ من ديك العيشة..

خصوصا أن شخصيتها صعيب تنصاع لشي حاجة بزز..الزواج كان ماشي بزز..

كانت نسبيا قابلة تزوج.. غير أن الهضرة لي تقالت من مها و باها و خوها لي مقال والو و معارضش و رقية لي علماتها بالراجل حاشة واش يكون.. بشنو كان دار.. كانت غدير اي حاجة باش الزواج يحبس و كان الخيار الأول لي محطوط قدامها هو [الهروب]..

تنهدات و هي باقة كطلع فراسها و تهبط.. دوزات يديها على شعرها مرورا بجسدها كامل..

بابتسامة هزات عينيها فرميساء لي كتشوف فيها بحنان ضحكات ليها تا بانو سنانها و ضارت على راسها فرحانة..

زهور: كيي جيييت؟ 

رميساء: فنة ماشاءالله فنة، 

زهور: ههههه حسيت براسي فشكل معرفتش، 

رميساء: (بابتسامة هادية) حيت اول مرة تلبسي هكا، 

زهور: امممم عجبني راسي، 

رميساء: يخليلي زين.. اجي ندير ليك ميك اب، 

زهور: لا لا لا بلاش! 

رميساء: هييي شوية شوية والله تم والله منكتر، 

حدرات كتيفاتها و الابتسامة مفارقاتهاش قربات منها و رميساء درعاتها بيديها من كتفها..

دخلو لبيت رميساء و جلسات فوق الناموسية كتشوفيها كتختار من المكياج تا ضارت عندها و جرات كرسي جلسات قبالتها..

زهور: مديريش ليا بزاف! 

رميساء: تت نبين ليك بعدا دوك الشفار زوعر تما مكيبانوش و نديرو ليك السر فالحناك و گلوز صافي، 

زهور: صافي ياكي غي هادشي؟

رميساء: كوني هانية ياله شوووش، 

رخات ليها راسها و الابتسامة متخفاتش من على وجهها خلاتها كدير لي بغات و طلقاتها فيد الله..

سالات ليها رميساء و بعدات خلاتها كتشوف فراسها فالمراية واخا مدارتش بزاف الا انه بان ليها التغيير خرجات ليها ضحكة بريئة و ضحكة فرحة مبغاتش تجمع ليها.. 

وقفات قبالة المرايا كتبوزا و كتفلي راسها من جميع القنات.. 

رميساء: شنو عجبك راسك؟ 

زهور: بزاااف يا ختي والله ناري، 

رميساء: ههههه ياله زيدي نتحركو بحرا نوصلو و نقضيو غراض، 

هزات صاكها و جراتها من يديها خارجين من الدار كيضحكو فرحانين خصوصا زهور فرحة أول مرة كتحس بيها اجتاحت قلبها..

خارجين من البحر زياد و مُصعب كيتناگرو و هو سابقهم نظرتو هادية متعرفو مكالمي و لا معصب، فرحان و لا مقلق..

وقف قبالة لوطو ديالو حل الباب و طلع كيشوف فيهم من السرجم باقيين مناگرين و مُصعب عروق جبهتو خرجو و زياد مهدن كيشوف فيه.. 

حَيْدر: (كيهضر بهدوء) طلعوو دغيا!! 

مُصعب: علاه راك تجيب معانا هاد القاصر، 

زياد: (حل الباب ركب حدا حَيْدر) قاصر و عمر بيها فمك ياله تخشا اللور، 

حل عليه مُصعب الباب و جبدو و تيشيرت حليه الباب اللور و لاحو و سد عليه الباب.. عاد ركب هو القدام.. 

مُصعب: لبزوز كيريحو لور، 

زياد: كتجيني كبر مني و صافي، 

حَيْدر: هنييونااا، 

سكتو مولاوش هضرو طلقو موسيقى خفيفة و توجهو لدار حَيْدر.. 

باقين على جلستهم زهور مسخاتش بالجو تنوض و رميساء مخلياها على خاطرها.. 

زهور: شحال ساعة ارورو؟ 

رميساء: 10 الشهبة، 

زهور: هيييه مشا الحال، 

رميساء: الصيف هادا باقي الحال الزين ديالي هي جلسي على راحتك، 

زهور: نقولك واحد الحاجة! 

رميساء: آتينا مرحبا، 

زهور: احم دابا نتي خدامة يااك؟ (حركات ليها راسها باه) و انا غنبقا غي فالدار حتى القراية قلتي تا اللول دلعام! 

رميساء: اوا شنو المعمول؟ 

زهور: احم بغيت نخدم! 

رميساء: فااش؟ 

زهور: نعاون شي وحدة فالدار و لا مهم فاشما كان غي منتقلش عليك و حتى حنا متبقاش تسيفط فلوس كل مرة، 

رميساء: زهور راه صعيب عليك تهنيتي من تمارة و بغيتي تمشي لاخرى، 

زهور: راه منقدش نبقا هي جالسة ديريلي خاطري عافاك، 

رميساء: فففف (حكات جبهتها) واخا دابا نشوف ليك، 

زهور: كنحبااك انا، 

رميساء: كون تشوفي انا الشهيبة، 

زهور: ااه و واحد الحاجة.. دابا خاي ساكن فكازا، 

رميساء: (خرجات فيها عينيها) و عاد كتقوليها، 

زهور: (ابتاسمات بشوية) واا عاد عاد تفكرت تبقايش تعيطيلي زهور فالزنقة و منعرفش شكون كي عرف كيقوليك الوقاية خير من العلاج.. مثلا فالخدمة نقولو ليهم كنعاون واليديا على الزمان، 

رميساء: اااه كتباني بريئة.. اممم و السمية؟ 

زهور: معرفتش شنو يجي معايا، 

رميساء: (بقات كتشوف فيها مطولة) حور، 

زهور: (بحنان) سمية المرحومة.. زوينة واخا، 

تبسمات ليها رميساء بحب و ضورات عينيها للبحر كتشوف فيه و كترمش بتتقال و باقة على نفس الضحكة.. 

نظرات زهور كانو متبعينها و هي الوحيدة لي كتشوف كمية الحزن لي فعينيها واخا تحاول تخبي.. 

مدات يديتها ليد رميساء لي كانت فوق الطبلة و زيرات عليها تا تلفتات ليها رميساء.. 

لمسات على يديها بصبعها و خدات نفس.. 

زهور: خوي قلبك، 

رميساء: غيزيد يعمر كتر الا هضرت، 

زهور: ربما ينقص الوجع لي كتحسي بيه، 

رميساء: اولا يقدر يزيد بالذكريات لي غتجبد، 

زهور: الذكريات لي عندك أصلا فبالك و مكيتحيدوش؟ 

رميساء: الهضرة ماشي هي يجيو لقطات لبالك و يمشيو.. الهضرة كتحط الملحة على الجرح و تخليه يزيد يحرق (هزات فيها عينيها بنظرة حزن) الهضرة بالنسبة ليا كضر كتر مكداوي، 

زهور: انا معاك، 

رميساء: عارفة الشهبة عارفة خوي بالك (تنهدات) مشينا، 

حركات ليها زهور راسها و وقفو تا قربات منها رميساء درعاتها بيد مع قصيرة عليها و بقاو غاديين كيضحكو كيتناساو الموضوع لي عاد تجبد و يضمضو الجروح..

واقفين قبالة الدار زهور كتجبد عضيماتها و رميساء مصغرة عينيها فلوطو لي قبالتها.. 

شافتها زهور فين مركزة و ضارت حتى هي بقات كتشوف.. 

زهور: سس ماالك؟ 

رميساء: جا عاود غتنوض لفضيحة فالدرب (حكات شعرها) بففف ليلة مكاين نعاس! 

زهور: (باستغراب) علاش؟ شنو كاين؟ و شكون جا؟ 

رميساء: صبري على رزقك هانتي غتشوفي على عينيك اودي، 

هزات زهور كتافها بلامبالاة و تبعاتها طالعين لدار.. كل وحدة مشات لبيتها بدلو عليهم و جلسو فالسالة شاعلين تلفازة كيتفرجو و سقاطة قبالتهم متلفين بيها.. 

تا فالحظة تسمعات تصفيرة مجهدة تبعاتها اوخرى.. زهور مادات مجابت و متسوقاتش عكس رميساء لي هبطات كتافها بتذمر.. 

رميساء: بدينا عاود، 

زهور: اممم شنو قلتي؟ 

رميساء: وااا هااا هوووماااا غيبداو (بدات كتغبن)  كيغبر تا كيغبر و كيجي بعجاجتو تفو، 

زهور: واا شكون هادا احي، 

رميساء: هادا واحد ولد الجارة هنايا يا صاحبتي كيغبر بشهر بشهرين و گاع كيطول نهار كيجي كيجمع ولاد الدرب و يديرو قصارة حدا دارهم ها الموسيقى الگارو الضحك منعرف اش كيخليو النص فالدرب بلا نعاس، 

زهور: العجب و مكيهضر معاهم حد؟ 

رميساء: تا يقد شي حد داااااك بنادم بالخصوص مكيتفاهمس بيديه.. نهار ما**تت ختي الله يواليها برحمة الله كان عندي هنا ولاد عمي و كدا و تصادفو معاه هو جا اوا ولد عمي بغا يدير فيها كاين هبط عندو غوت عليه فرشخو وصلو بيه لسبيطارات و منعرف اش، 

زهور: بابلو اسكوبار هو، 

رميساء: هاي هاي هاي على العفريتة كتعرفي بابلو اسكوبار، 

زهور: هههه كانو كيقولوه الدراري فلمدرسة لهيه و مشيت قلبت عليه عند رقية، 

رميساء: اوا الزين هادا لي كندوي ليك عليه هو لي سولتيه قبيلة فالبحر على سمية الأغنية، 

هزات فيها عينيها بصدمة مخرجاهم.. هادا لي عاودات ليها عليه لا علاقة مع هاداك لي هضرات معاه.. تت لاخور عاطي الخاطر و مهدن هادا لي كدوي عليه كيما قالت بابلو اسكوبار.. 

زهور: الا ميمكنش! 

رميساء: (حركات راسها) هو يا ختي هو، 

زهور: واا لاخور مهدن اصاحبتي على هادا لي كتعاودي عليه! 

رميساء: لاش انا قلت ليك مامهدنش لي جبد عيبو كيخشيه فالحيط و يديه سابقاه للعيب، 

زهور: دنجوان زمانو (عوجات فمها) تيبقي الستر، 

رميساء: وليني تيتييييييز اختييي طيااااااح و الوشام شعر و السنان اييي كولنييي و يا سبع، 

زهور: ويييلييي ويييلللييي على البنت تحلات گاع، 

رميساء: (كتنش بيديها على راسها) و سميييتوو يااا ختي بوحدها كتزرع فيك الهيبة منووو (نطقاتها بصوت خااتر تقيل) حَيْدر، 

بقات كتشوف فيها زهور كيفاش كتعاود عليه بتناقض معرفات شنو تدي و شنو تخلي.. 

لاكن وذنيها التاقطو سمية تارت انتباهها و كيما قالت ليها رميساء سمية مهيبة و مولاها كتر.. 

سكتات ساهية فالتلفازة كتفكّر فاش طلبات منو سمية الأغنية كيفاش كان قليل الكلام و بلا ميطول معاها فالهضرة عطاها السمية نيشان اذن ماشي من النوع لي ضاسر و ماشي من النوع لي خفيف.. 

قاطع حبل أفكارها الأغنية لي تطلقات مجهدة شوية.. الأغنية لي دخلات لقلبها بشكل غريب و كتخليها تنسا لي ضاير بيها و تركز عليها فقط.. 

شافت فيها رميساء كيفاش مغمضة عينيها و مبسمة عرفاتها كتسمع الأغنية.. نقصات التلفازة و خلاتها كتسمع ليها بخاطرها.. 

مع انتهاء الأغنية مع تفتحو عيونها كتشوف فالتلفازة و باقة على ابتسامتها.. 

رميساء: عجباتك بزاف الأغنية؟ 

زهور: بزاااف فشكل هادية فنة، 

رميساء: عندك الذوق، 

زهور: ههههه ياكي بعدا، 

رميساء: امممم كاينة (وقفات كتجبد و تفوه) انا انمشي نعس اااخخخخخ صباح نفيقك نمشيو لبحر نعومو اوكي؟ 

حركات ليها زهور راسها و هبطات عندها باستها من حنكها و مشات لبيتها..

بقات زهور كتشوف فالتلفازة تا ملات و ناضت طفاتها و دخلات لبيتها تجبدات فوق ناموسية مغمضة عينيها كتستعد للنوم تا.. 

......: وااااا حَيْدر جااااا عشيييرييي جااااا (بالغوات) وااااا العاااااااز، 

حلات عينيها فالضلام كتسمع لشنو كيقولو.. الموسيقى حبسات بقا غي صواتهم لي مسموعين مرة تسمع تخصار الهضرة مرة تسمعهم مدابزين على كارطة.. 

بقات هكك ساعة ساعتين و هي كتقول ها هوما غادي يسكتو ها هوما غادي يساليو.. عينيها تعسلو بالنعاس و لكن مولفة تنعس فالكالم بحال هكا متقدرش تنعس.. 

نفخات النفس و جلسات فوق الناموسية كتحك فعينيها و بدات كتهضر مع راسها بصوت نعسااان.. 

زهور: نهبط نهضر معاه.. اممم باش يخشيني فشي حيط.. ولكن ولد عمها غوت انا ماغاديش نغوت.. غادي نهضر معاه غي بشوية و نفهمو و صافي.. هنننن هو ضريف هضرت معاه ضريف.. انديرها فيد الله حياتي كاملة و انا دايراها فيد الله اش معنى هادي لا.. 

وقفات خارجة من البيت ببيجامتها شورط مبين گاع فخاضها و طوب ديالو ديباردور.. دارت كلاكيطة فرجليها و هزات السوارت ديال الدار و هبطات مع الدروج.. 

مع خرجات مع الباب كتصدم بالمنظر لي قبالتها.. ترينگة ديال الدراري مجمعين شي واقف شي جالس شي كيكمي شي كيهضر فتيليفون المهم ريگاطة واقعة.. 

قربات بخطوات صغار ليهم وقفات فنص الطريق و هضرات بشوية.. 

زهور: احم عافاكم شكون فيكم حَيْدر؟

تا واحد ما سمعها و تا واحد ماشاف فيها.. عقدات حواجبها و رجعات قربات منهم كتر و نغزات واحد فيهم من ظهرو تا ضار عندها.. 

.....: (طلعها و هبطها) نعام اختي؟ 

زهور: عافاك فين هو حَيْدر؟ 

.....: اشنو بغيتيه! 

زهور: (بابتسامة) ممكن تكلمو ليا، 

......: اييه مرحبا (غوت بشوية) حَيْدر تكلم، 

هزات عينيها كضورهم و تقلب عليه يبان ليها فين هو فيهم.. تا تلاقاو عيونهم للمرة التانية.. هز فيها حاجب مستغرب من هاد المخلوقة.. أولا منين عرفات سميتو و تانيا اشنو كدير هنا.. 

توجه ناحيتها داير يديه فجياب سروال الكيطمة و كيجر كلاكيطة فرجليه و عينيه كيطلعوها و يهبطوها من صباع رجليها لزغب راسها.. 

بقات كتشوف فيه و دوك النظرات ديالو وتروها خلاوها تحيد عينيها من عليه بلهلا يطريه ليها.. 

وصل قبالتها مدرقها بجسدو كامل و كيشوف فعينيها لي مولاتش هزاتهم فيه.. عطرو الرجولي مخلط بلگارو زادوه رجولة على رجولة.. الريحة لي خلاتها تستنشقها بإعجاب و ترخي النفس و هي مساخياش بيها..

حَيْدر: شنو حب الخاطر؟ 

زهور: (حدرات راسها كتر و كتلعب فصبعان يديها) عافاك واخا نهضر معاك؟ 

حَيْدر: مرحبا! 

زهور: (كتشير موراها) نبعدو غي شوية، 

حرك راسو خلاها سبقاتو كتمشا و هو موراها و باقين عينيه على نفس النظرات كيفليوها من الفوق لتحت.. 

زهور: احم عارفة برزطتك فهاد الوقيتة مديرهاش مني قلة الصواب ولكن والله مقدرت نعس بالصداع فوقما كنغمض عيني كنقفز عاود (شافتو غمض عينيه و نفخ من نيفو و هي تزرب عليه) ربي ربي و نتا تعصب و لا تقلق غي غي (سرطات ريقها) غي عافاك نقصو غي شوية غي شوية (كتعبر ليه بصباعها) غيي شويش بينما نعست و ديك ساعة ديرو لي بغيتو منفيقش گاع الله يرحم ليك الواليدين، 

بقا كيشوف فيها هاز حاجب و مهبط لاخور و عينيه هاد المرة تركزو مع عينيها.. شعرها لي كيديه الريح.. شفايفها لي كتغزز فيهم بتوتر.. 

حَيْدر: هناي.. سيري لداركم، 

زهور: بصح شكرا شكرا بزااف، 

قربات منو و هو غي كيشوف فيها اش غادي دير.. تعلات على صباع رجليها شدات فكتفو و الكتف التاني طبعات قبلة عليه و رجعات للور غادة للدار.. 

بقا مبلوكي كيشوف فيها تا دخلات و سدات الباب و هو باقي على حالتو.. ديك القبلة لي عطاتو و كيفاش ببرائة باستو فكتفو و مشات بحالها.. هز يدو بتتقال دوزها على البلاصة فين باستو و بقاو عينيه معلقين فالباب منين دخلات..

توگض على راسو فاش سمع الدراري كيتغاوتو قلب الدورة مشا لعندهم وقف عليهم.. 

حَيْدر: (غوت) فرقو عليا هاد المجمع ياله، 

مُصعب: (كيخاطب زياد) واش صرالو هادا؟ 

زياد: متكونش ديك الفيرة قالت ليه شي حاجة؟ 

مُصعب: بلع، 

زياد: هاهو مبلع، 

حَيْدر: (شاف فيهم) دخلو انمي واش انبقا نهضر مع كل واحد بوحدو، 

زياد: (وقف داخل و هاز كرسي فيديه) خالتي باهية شدي ولدك عليا، 

مُصعب: (شير عليه بكرسي جاه فظهرو) حاسب روحك فداركم ولا؟ 

زياد: داري دار خويا دار ميمتي نتا اش مشا ليك!!! يااااه، 

حَيْدر: هنيييونا اصاحبي طلعو للفوق الواليدة ناعسة لتحت و تناگرو كي بغيتو، 

دخلات لبيتها و تكات كتسمع سهااات و الدنيا تكالمات تبسمات بفرح و خشات راسها فالوسادة كتمخشش تنعس.. 

عكسو هو لي من مور مسيفط الدراري لفوق دخل لبيت ماماه.. لقاها ناعسة مكايناش فهاد العالم.. قرب منها و تحنا باس ليها راسها و جلس على ركابيه هز يديها حلهم كيبوس فكفها بوسات متتالية.. و مبين وحدة وحدة كيشمهم بعمق.. 

حط حنكو وسط كفها تا حس بيها كتكمش على لحيتو و طلق تبسم بحب.. 

حَيْدر: (بصوت هادئ خاتر) حنانتي، 

باهية: حبيبي.. مالك بيك شي حاجة؟ 

حَيْدر: توحشتك احنانتي، 

باهية: هانا معاك الحبيب ديالي.. (تگعدات شوية و هو تگعد جلس على الناموسية و تكا على فخاضها و هزات يديها كتلعب ليه فشعرو) مال راحتي؟ 

حَيْدر: راحتك باغي حنانتك، 

باهية: حنانتي ديما معطية ليك.. بكري و وحيدي حبيب حنانتو، 

حَيْدر: (عينيه كيتغمضو) خليك هك احنانتي خليك، 

تبسمات كتشوف فيه و كدوز يديها على شعرو فرحانة بيه و كترضي عليه و تعاود فخاطرها.. تنهدات تنهيدة مسموعة تا هز فيها راسو عاقدهم على ديك التنهيدة لي خرجات.. 

حَيْدر: (هز حاجب فيها) حنانتي، 

باهية: راحتي، 

حَيْدر: راحتك حداك و بين يديك صحيح فصيح.. (ضور عينيه فبيتها) ماراكي فزنقة ماراكي فغربة ما هازة فوق كتافك حمل، ( المعنى؛  قالها راحتك زعما هو راه حداها و فحضنها و صحيح زعما ما بيه حتى حاجة و ماراهاش فزنقة و لا مغربة عليه و على حبابها و لا مخلي عليها الحمل ديال شي حاجة لي تنهد ديك التنهيدة) 

باهية: مااا كرهت راحتي يبقا بين يدي ديما، 

حَيْدر: (هز يديها باسها) حنانتيي.. فاش كنكون انتعطل عليك كنجيبك حتى لعندي فاش كنعرف راسي مامطولش راه كنرجع لعندك (قرب باس ليها راسها) ريحي راسك و خلي راحتك يهنا بالو عليك، 

باهية: الله يرضي عليك احبيبي، 

حَيْدر: آميين احنانتي (رجع باس ليها راسها و يديها و عنقها) رتاحي، 

باهية: تبات فراحة الله الحبيب الغالي، 

حَيْدر: تصبحي على خير احنانتي، 

طفا عليها الضو و رد الباب شوية و خرج كيجيد فعضامو تا طاحت فبالو.. غمض عينيه كيطرد صورتها من بالو و خربق على شعرو كيسوط و توجه للدار الفوق لعند الدراري.. 

لقاهم مناگرين عاود منوضينها غي بيناتهم.. صغر فيهم عينيه و مشا لكوزينة جبد من البلاكارات كيسدهم بساروت قراعي الشراب و الكيسان و هز الثلج و مشا حدا الدراري حط كولشي فوق الطبلة و هز الباف طلق أغنيتو المفضلة {شهلة العياني}..

كب لراسو و رجع للور كيشوف فالدراري منوضينها غي بيناتهم.. مولف بيهم كيتناگرو هك على مواضيع تافهة اما الجد كيحضرو عقلهم.. 

زياد: سكت اخويا تق//ود وااش نتاا مرييض و لا؟ 

مُصعب: راااك تحوس عليا از//بي، 

زياد: الوجدي متحمقنيش خليك بعقلك.. (شاف ف حَيْدر) قااالك اسيدييي غادي يطلع لوجدة يجلس فيها شهراين، 

شاف فيه حَيْدر عاقد حواجبو و صغر عينيه: شتما؟ 

مُصعب: نريح مع الحنانة شوي، 

زياد: نسييفطو للخالة لي يجيبها حتى لعندك و تجلس معاك اصاحبي طلع لوجدة شهراين مالك هترتي، 

حَيْدر: مُصعب جيب الحنانة توانس مع الواليدة مرحبا بيها مشيتك لتم مكاين لاش، 

مُصعب: وايليي؟ 

زياد: قال الشاف لي كاين تجمع قالك وجدة هاي هاي هاي (هز كاس هبط عليه دقة وحدة تا كمش ملامح وجهو) على ودك نسكر الوجدي نضرب عليك القرعة، 

رجع مُصعب للور كيضحك تا تبعو زياد تا هو كيضحك مخليين حَيْدر مبتاسم ابتسامة طفيفة كيشوف فيهم.. 

علاقتهم ماشي صحبة فقط.. هوما خوت باليام.. واحد ميخطا لاخر و ميقدوش يتفرقو.. واخا يقيلو يتناگرو و يدابزو.. و محبتهم واضحة من مُصعب لي مخلاوهش يطلع لوجدة شهراين تقيلة.. 

فاقت كتمخشش على اثر لمسات على شعرها.. حلات عينيها فرميساء لي كتشوف فيها بابتسامها.. ضحكات و مدات يديها كتجبد.. تحنات عندها رميساء باستها فحناكها.. 

رميساء: نوضي نوضي ياله نفطرو باش نمشييو نعوومووو، 

زهور: ااححح باش نعوم؟ 

رميساء: دو بياس (هزهزات ليها حجبانها) تخليني نعوم بيهم بوحدي، 

زهور: لا لا لا اختي منقدرش، 

رميساء: غي نوضي موجدة ليك مايو تا انا انلبسو عي تگعدي، 

زهور: واا شنو الفرق؟ 

رميساء: تگعدي لا؟ 

معاوداتهاش معاها طارت من بلاصتها دخلات للطواليط قضات غراضها غسلات وجها و خرجات حداها للطابلة جلسات عنقاتها كتمخشش فيها.. دورات عليها رميساء يديها و خلاتها بخاطرها هكك معناقاها.. 

زهور: رورو، 

رميساء: الشهبة، 

زهور: صوني للمصدية توحشتها، 

رميساء هي اللولة الله يا ودي، 

صوناو ليها آبيل ڤيديو و حطات رميساء تيلي مكالي مع قرعة الماء و جلسو كيساينوها تجاوب.. مدازش بزاف تا تفتح الخط.. بانت ليهم جالسة و مكالية تيلي و قدامها قوة الوراق و الستيلويات و هي حازمة راسها بزيف.. 

رميساء: ههههههه مااالكيي!! 

زهور: احي مالكي حازمة راسك؟ 

مصبراتش ليهم طرطقات كتبكي و تنخصص و تمسح فعينيها و يرجعو دموعها كيهبطو و هوما مخليينها تا تسالي و غتهضر مظغطوش عليها.. 

رقية: اهئ عييت بهاد الحفاظة و اهئ لي لي كانت كتصبرني ها هي مشات و بقيت بوحدي كي الحنش مقطوع ليه الراس، 

زهور: (عزات عليها بزااف بالخصوص عارفاها وقيتة الامتحانات كتستريسا كتر من القياس) رقية اا المصدية ما عهديش بيك دغيا كتملي هاك.. ياك باغة ديري الطب؟ 

رقية: وااا بغيييت ندييير والديييه هاد الطب ولكن هادشي عياني، 

رميساء: (بجدية) سمعي رقية البكا و الستريس ما عندو باااش ينفعك بمرة عطي وقتك و حليي دماغك و كلشي غادي يكون هو هاداك.. متغرقيييش راسك فقوة الحفاظة و فنفس الوقت مترخفييش بزااف.. عطي لعقلك فترة الراحة باش تقدري تكملي حاجة اخرى، 

رقية: (كتمسح دموعها و باقة تنخصيصة كطلع ليها) واخا، 

زهور: بكاااية ما صحابنييش نتي هك، 

رقية: هههه انا ماشي بكاية ياله تلاحو خليوني نحفظ، 

قطعو معاها كيتبسمو و شافت زهور فرميساء.. 

زهور: ماشي باقي البرد شوية على البحر؟ 

رميساء: شهر خمسة هادا اش بغيتي العومة فهاد الوقيتة كتكون فنة، 

زهور: مكنعرفش نعوم، 

رميساء: انا نعلمك غي فطري، 

زهور: و الا غرقت؟ 

رميساء: زهووور خشي فوجهك، 

حنات راسها زهور كضحك.. بدات فطورها مرة مرة كيهضرو.. تا ناضو جمعو طبلة بجوج و غسلات زهور الماعن و تبعات رميساء للبيت.. 

زهور:(كتشوف فالمايو فوق الناموسية) رميساء، 

رميساء: بربي حتى تلبسييييه وايلي، 

زهور: هههه واراه مرگت نبين مكاشفي، 

رميساء: (كتعيبها) مكاشفي نننن دوزي اختي تلبسي نمشيو نعومو هاااا العاااار، 

زهور: تغوتيش عليا، 

رميساء: دوزي و كان دوزي، 

قربات هزات المايو و حيدات حوايجها و تبعات رميساء كي كتلبسو و لبساتو حتى هي.. كحزات للمرايا تشوف راسها تا خرجو عينيها.. 

زهور: ويلي ويلي ويلي (ضارت كتشوف ظهرها و ترجع تشوف لقدام و تحط يديها على صدرها لي كان باين شوية) وييلييي شنو هادشي؟ 

رميساء: (صفراات) تيتيز ختي منتصاحبوش، 

زهور: اوييليي نمشي بهادشي، 

رميساء: (كحزاتها من حدا المرايا كتصوب ايكغو دشمس) حيدي من حداي بقيت دايرة فيك راسي مغنساليوش، 

زهور: (كتغبن) نحيدوو العاار، 

رميساء: (دارت راسها تقلقات) ااه واخا شوفي لي عجبك لبسيه، 

بقات كتشوف فيها كيفاش قلبات شفايفها مقلقة.. و هبطات عينيها فراسها و ولات هزاتهم فيها.. قربات منها و طبعات قبلة على كتفها.. 

زهور: صافي انبقا بيها، 

رميساء: و مكاين لاش طلبي السماحة، 

زهور: (هبطات راسها) قلقتك و نتي درتي معايا غي المزيان، 

رميساء: يااا الهبيلة (عنقاتها عندها) مامقلقاش منك كاين لي كيتقلق من هاد الزين.. (مدات ليها ليكخون) دوزي دوزي طلي كمارتك، 

شدات من عندها مدير لوجها و كتشوف فيها جبدات كساوي صيفيين طويلين حطاتهم فوق الناموسية.. تلفتات ليها و عطاتها تلبس.. هزات صاك البحر و خرجو من الدار.. 

فكازاا.. و بالظبط فوسط واحد من أكبر لي ريسطو الموجودين فالمدينة.. متكي على طوموبيلتو كيكمي و كيسمع للهضرة صحابو واقفين قبالتو.. 

زياد: غي تيسرو انا هنا، 

مُصعب: على بالك هادي خدمة؟ 

زياد: (سف من الگارو و عفس عليه) سير جيبليا الخالة حجيبة و جي دغيا نعطيييك يووماااين الوجدي تكون عندي هنا، 

حَيْدر: متعطلش و خلاص، 

مُصعب: (خنزر فيهم بجوج و عطاهم بالظهر غادي للوطو ديالو) قا..ودو، 

ركب فطوموبيلتو و كسيرا شاد الطرييق لوجدة.. 

شاف حَيْدر فزياد و ابتاسم: القاصر، 

زياد: الشاف، 

حَيْدر: مغتمشيش تشوف باك؟ 

زياد: (تلف عينيه) تت ماشي دابا باقي عليها الحال، 

حَيْدر: (صغر فيه عينيه و ميل راسو) كاينة شي حاجة مقلتيهاش ليا! 

شاف فيه زياد مبتاسم بالجنب.. أكيد غادي يكون عارف مكيقولوش ليه الشاف غي هكك.. عارفو مكتخفى عليه حتى حاجة و بالخصوص عليه هو..  

حول نظرو لبعيد و ولا ضور عينيه لحَيْدر و سرح يديه باستسلام: شنو نقول؟ 

حَيْدر: (هز لگارو كيهد عليه) نطفيه لعدو ربك فعينيك.. جييي هضااار معايا عااود ليا لاش انا هنا، 

زياد: همي فوق همك لاش اخاي نزيدك، 

حَيْدر: معاااش لي يحگر خووياا و انا فالحياة، 

زياد: (حنااا راسو لتحت و يديه كيتزيرو) لي وقع وقع، 

حَيْدر: عند بالك دايزة؟ (رما لگارو فالأرض و مد يديه لزياد حنا ليه راسو لأرض كيشوف جيهة لگارو و هز رجليه عفس عليه حتى تفرتت) هكاا يوقع لي يمسك بكلمة.. لي ضرك ضرنيي.. نتاا خووياا مااشي صااحبي سمعتييي.. 

زياد: (شاف فيه مطول) درتي ليهم شي حاجة؟ 

حَيْدر: دابا توصلك الخبار.. (خنزر فيه) المرة جاية خبي، 

زياد: (ابتاسم و تلاح عليه عنقو) خوياا، 

حَيْدر: (طبطب عليه بالجهد) نوض القاصر حضي الخدمة تگعد، 

تحرك زياد كيحك راسو و يفرنس داخل لريسطو ديالهم بتلاتة.. خلا حَيْدر متبع ليه العين تا شتت انتباهو تيلي لي صونا.. جبدو من جيبو و غي لمح السمية عض على شفايفو و دوز الخط.. 

تسمع صوت أنثوي حنون نطق اسمو بمياعة: حَيْدر، 

حَيْدر: سميتي بهاد الطريقة.. عوالة على خزيت اندى، 

ندى: امممم توحشتك احبيبي.. يوماين و نتا غايب مغتجيش عندي خلاص، 

حَيْدر: جاي، 

قطع معاها ديك ساعة ركب فطوموبيلتو خارج من تمايا.. 

مسافة الطريق كان واقف فحي راقي.. بلاصة طموبيلتو و تمشا للموبل ركب فسانسور و طلع لآخر ايطاج.. توقف قبالة وحدة من الشقق لي تما و جبد الساروت كيحل الباب.. 

مع الدخلة حس بجسدها ارتطم بييه و ضورات يديها على خصرو مخشية فيه.. دوز يديه على ظهرها العاري و اليد التانية كتسد الباب.. 

حَيْدر: گااع؟ 

ندى: توحشتك توحشتك احبيبي، 

حَيْدر: (هز ليها راسها طبع قبلة على شفايفها) فطرتي؟ 

ندى: لاء بغيت نفطرو بزوج.. (مدات يديها جاراه لداخل) وجدتو ناقصني غي نتا، 

حَيْدر: (كيعبرها من اللور لابسة شورط بارز مؤخرتها و سوتيامات هوما باش جالسة شعرها الأسود الطويل فازگ كيلعب فظهرها) نفطر بيك و نشوفو الماكلة، 

بلا ميخلي ليها الوقت فين تستوعب هزها بين يديه متوجه بيها للغرفة.. دخلها حطها فوق الناموسية و بعد عليها كيحيد التيشيرت.. و هي عينيها كيتساراو على جسدو المنحوت و الوشام لي عندو فصدرو و يديه.. عينيها كيخرجو القلوبة و هي كطلع فيه و تنزل.. 

كان تا هو نفس حالتها.. عينيه مترقبين عينيها في كيشوفو و كيفاش عاضة على شنافتها و هي كتشوف فيه.. تبسم بجنب و قرب منها تا ولا فوق منها كامل مغطي جسدها بضخامة جسدو.. 

هز يديه كيلعب فشعرها و كيشوف فعينيها: ششش شتما؟ 

ندى: (كتلعب فلحيتو) كتحمقني، 

حَيْدر: (باقين يديه على شعرها كيلعب فيه بحنان) الحمااق گاع، 

ندى: اممم نتا زويين بزاف، 

حَيْدر: (هبط راسو لعنقها كيبوسها بحناان) شنو آخر؟ 

ندى: (كتلعب فظهرو مستمتعة بقبلاتو) و حنيين فيا.. و امممم حَيْدر، 

حَيْدر: كملييي، 

ندى: و كنرتاح معاك.. و بزاااف، 

حَيْدر: (باقي راسو فعنقها كيبوس) ندىى شنو بغيتي؟ 

ندى: (خرجات ليها ضحيكة من القلب) كي كادير تعرفني؟ 

حَيْدر: نطقي نطقي شنو؟ 

ندى: بغيت نخرج مع صحاباتي، 

هز فيها راسو داير تخنزيرة ديال العاداو.. غي شافتها سرطات ريقها و عينيها ولاو كيدورو على ملامحو بخوف.. 

حَيْدر: عاودي! 

ندى: (بنبرة مرعدة و عينيها ممركزينش فعينيه مباغاش تشوف ديك التخنزيرة ديالو) غ غي نخرج مع البنات، 

حَيْدر: عينيك، 

معاوداتش معاه الهضرة هزات فيه عينيها الكوحل بخوف.. 

حَيْدر: لفيين هاد الخروج؟ 

ندى: غي لمول و لا البحر، 

حَيْدر: (هز فيها حاجب و صغر عينيه كيگدد شفايفو) لمول و لا البحر؟ (هز يديه ضربها لفخضها تا طارت و نزلت) علامن كتكذبي ابنتي! 

ندى: (عينيها غرغرو) والله ما ما شي حاجة، 

حَيْدر: (رجع ضربها و جهد صوتو مخرج فيها عينيه) الحلووووف، 

ندى: صافي صافي.. مبقيتش بغيت نخرج، 

هزهز واسو برضى و رخا ملامحو مرجع راسو لعنقها.. 

هزهز واسو برضى و رخا ملامحو مرجع راسو لعنقها.. بدا كيقبلها قبل حنينة متتالية.. و هي دايبة معاه و دايبة فيه.. هز راسو لشفايفها.. قبلها قبلة سطحية و هضر شفايفها على شفايفو.. 

حَيْدر: الخروج مع غيري مكاينش (عضها بشوية و جبد شفتها لعندو) سمعتي،

ندى: غي مكنبغيش نبرزطك ديما، 

حَيْدر: ندىىىى، 

ندى: الخروج بلا بيك مكاينش، 

تگعد و گعدها من يديها تا جلسات كتشوف فيه و هو مخنزر فيها.. 

حَيْدر: نهااار اللول لي بديينا اشنو قلنا؟ 

ندى: (تزيرات و حنات راسها) مندير تا حاجة بلا شوارك و... 

قاطعها مازال على نفس النظرة و كيدير بصبعو تعاود: عاودي تسمع، 

ندى: مندير تا حاجة بلا شوارك و هضرتك تسمع، 

حَيْدر: مزياااان و مالكي فهاد الصباح ناوية طيريه لجد بونا على هاد الجلسة، 

هزات فيه عينيها كتحرك راسها بلا و دميعة هبطات على خذها: لا لا لا صافي لي قلتيها هي لي غتكون غي متغبرش عليا عافاك، 

وقف مخليها جالسة متبعاه بعويناتها تا خرج من البيت.. بقات مدة و هي متكية فبلاصتها و عينيها كيقطرو بالدموع.. تا تهدنات و وقفات كتمشى بشوية خارجة من الغرفة كتفلب عليه.. 

لقاتو واقف فالبالكون كيكمي قربات منو و عنقاتو من ظهرو و يديها على صدرو.. هضرات بصوت مغنغن بالبكا : سمحلي منوييتش نقلقك غي كنت باغة نفوج شوية و صافي، 

مهضرش متكلمش مخليها غي معنقاه و ساكت تا كمل گاروه على خاطرو.. طفاه فطفاية و شد يديها لي كانت على صدرو هزها لفمو قبلها من كفها بحنان.. حيد ليها يديها و ضورها عندو محاوطها بيديه كيشوف عويناتها حومر بالبكا.. 

حَيْدر: بكيتي؟ 

ندى: (عينيها رجعو غرغرو) لاا احم مبكيتش، 

حَيْدر: (زير على خصرها بيديه تا غمضات عينيها متألمة) الكذوب اندى الكذوووووب، 

ندى: (حنات راسها و دموعها هبطو و بدات كتشهق) اهئ حا حابسني هنايا اهئ بو بوحدي ا حَيْدر.. و اهئ اهئ كتمشي ك كتغبر مكتقوليش تا في فين اهئ غادي.. حس بيا تا انا ما ما كنبغيش نبقا بوحدي اهئ اهئ على الأقل خليني نخرج، 

ميل راسو فيها و صغر عينيه خلاها تا تفشااات و سالات بكاها عاد نطق كلمة خلاها تخرج عينيها من الصدمة: ماشي هضرتك هادي! 

هزات فيه عينيها كترمش بالزربة و كتسرط ريقها.. حرك ليها راسو مأكد كلامو و كيگدد شفايفو.. هز بديه مسح ليها بقايا الدموع على وجهها و باقي على نفس شوفاتو مخليها موترة بين يديه.. 

حَيْدر: شكون قالك هاد الهضرة؟ اممم معااامن اندى رجعتي كتجمعي؟ (هز حاجب فيها باقي ملامحو هادئين) آتي معندك ابنتي، 

عينيها باقين خارجين فيه واخا عارفاه كيعيق بيها فاي حاجة ولكن مضناتش تا فهادي.. مدخلاتش ليه الهضرة فاص باش يعيق بيها.. سرطات ريقها كتشوف فيه كيساين جوابها.. 

ندى: حَيْدر، 

حَيْدر: طوالت معاك الهضرة لا؟ 

ندى: (غمضات عينيها و بدات كتسرسب ليه كولشي) أميمة أميمة رجعات كتدوي معايا و فاش هضرت معاها عاود ليها اشنو كاين و قالت ليا نقوليك هاد الهضرة الا مخليتينش نخرج معاهم، 

كيحك شفايفو بسنانو و زير على خصرها باش تكمل هضرتها.. 

ندى: (قفزات من التزييرة و رجعو دموعها كيهبطو) لبار لبار، 

ماا حسات براسها تا كاان شعرها مزير فقبضة يديه و وجها فوجهو عينيه خارجييين فيها.. صدرو كيطلع و يهبط بالأعصاب موازاتا مع صدرها لي كيطلع و يهبط بالخوف.. 

حَيْدر: البااار... و بااغااا تمشييي (غوت تا غمضات عينيها كتشهق بالبكا) شماااااتة اناااااا قداااامك!! 

حركات راسها بهستييرية بلا و شدات ليه فيديه لي شادة فشعرها: والله والله ماااا كنت باغة ندير شي حاجة اهئ اهئ غي نشط، 

هز يديه تا هزها و عطاها ليها لوجها تا دارت و رجع هزها من شعرها.. 

حَيْدر: الباااار ابنت القح//بةةة عاااماااين و اناااا حااابس عليك الحزاااق كاااامل (سكت كينهج رافض يجبد ليها الماضي و يجرحها) تيييلييفونك، 

ندى: اهئ فالبييت، 

نترها من يدو تا شدات فقنت الباب كتبكي و ترد لراسها.. دخل للبيت كيضور راسو كيقلب على تيليفون.. تا شافو طار عليه هزو و من طبيعة الحال بلا كود.. دخل نيشان لواتساب محتاجش يقلب بزاف لقاها هي لولة مسيفطة ليها ميساج.. دخل بلوكاها و مكفاتوش.. 

حل تيلي و جبد ليها لبيس هرسها بصباعو و لاحها و ردخ تيلي فوق الناموسية و خرج عندها ناوي يكمل عليها.. لقا روحها بغات تخرج بالبكا.. وجهها ولا حمر و الدموع كيطيحو حجر من عينيها.. 

خرج عينيه فحالتها و طار عندها شدها من كتافها عنقها عندو و زير عليها.. و يديه كيدوزو على شعرها كيحاول يكالميها.. عرف راسو قصح معاها و هي مولفة غي الجانب الحنين فيه قليل فين كتشوفو هكا.. 

هبط لوذنيها باسها بوسة خفيفة و بدا كيهمس ليها فمحاولة منو باش تكالمة و تنقص من البكا: شششش ابنتي موقع والو سكتي، 

حطات راسها كتحكر مع صدرو و يديها مزيرين على دراعو كتحبس البكية.. 

حَيْدر: (باسها فراسها بوسة تقيلة) صافي ابنتي تهدني ،

هزها بين يديه حطات راسها على كتفو و دخل للدوش وقف تحت الرشاشة و طلق الما بارد عليهم تا قفزات بين يديه.. و رجعات خشات راسها فعنقو و هو كيلعب فشعرها الطوييل و كيبوس فكتافها..