..
كانت جالسة فالصالة هي وفخيثة لي كتشرح ليها على السفر ديال اليوم وانه هشام معاها تمشي تبدل الجو وتشوف دبي وعبلة كتتصنت ليها
فخيثة شدات ليها فيديها: بنتي لا بغيتي ماتمشيش هانية هو غير بغاك تمشي معاه تشوفي الأجواء وكلشي..
عبلة بتفكير تبسمات: لا عادي خليني نمشي نشوف دبي هشام ماشي شي واحد غريب عليا مانخافش معاه
فخيثة بلعات ريقها كتتفكر لبارح كون تعرف اش كان ناوي يدير ليها: صافي ابنتي واخة لي بغيتتي غير ردي لبال وفوجي..
عبلة : كوني هانية..
فخيثة: ايوا نوضي بحرا توجدي راسك بقات ساعتاين وتمشيو
عبلة: ناري مشا الوقت
جمعات الوقفة تحنات باستها على خدها وطلعات للفوق وهي كتفكر فهشام لي باغيها تمشي معاه وهو قليل فين كتجمعها معاه الطريق لاحراك السفر تبسمات كتتفكر التقالة ديالو ولهدوء وكلامو الرزين وكيف كيحتارمها وكيف كيدير لفخيثة بحال شي اميرة ماتنكرش انه شخصيتو عاجباها بزاف
طلعات للفوق وكتتفكر لبارح الدوخة لي شداتها كانت فخيثة صافي اتجيب الطبيب وهي تمنعها عارفة اش عندها حيت هاد ليام بغات تقطع الدوة دالمعيدة ولكن هاشنو وقع ليها يعني مازال خاص ترجع تشربو بداو يجيوها نفس الحالات دشحال هادي فاش كانت فالقصر اليوناني
تمتمات وهي كتشوف فحوايجها فبيت تبذال مستفين غا بماركات لكبار وكتختار اش تاخد معاها : خاص نرجع ناخد الدوة من الدوخة والردان..
حطات يديها على كرشها: ليغيكل عاد مشات لاش مازال كنحس بهاد لوجع لخفيف ..اووف تانعاود نشوف الطبيب
تبسمات وهي كتتفكر لبارح فاش دخل بحاليلا ربي جابو باش يعتقها من داك الطيحة لي كانت اطيح
تبسمات: شكون كان يقول يا عبلة اتعيشي فراحة وسلام ومن دولة لدولة هانتي دابة غادة لدبي
تنهدات: ربي كبيييير كلشي تبدل وولا زوين
تفكرات عثمان: الله يرحمك كو ماكنتيش نت كون راني ..
وسكتات فاش جا فبالها هارون بلعات ريقها وهزات كسوة قلبها ولا يضرب تمتمات: ياك تافقنا اعبلة عمرك تجبديه ولا حتى فخيالك صافييي عمرو اينوض من داك الغيبوبة وعمرك اتعاودي تشوفيه
تبسمات وهي كتضحك: انمشيييي لدباااااااااااااااااي يا ناااس…
..
فجيهة خرا ..
جالسة كتتصنت لكلامهم وقلبها مزير كتبلع فريقها
حتى كستمع صوت ناصر: عائشة طلعي علميها انه لاكط فهاد السيمانة باش تخرجي نتي وياها توجدو
يوسف نطق بتحذير: ممنوع لخروج بحدها
عائشة شافت فالطاهرة لي كتقلها بعينيها ديري هدشي بلا صداع
تنهدات ووقفات طلعات لعندها كتشوفها فلبالكون ..
قربات ليها: سمعينيي لاكط فهاد السيمانة ديري شي حل لراسك وهضري قولي شكون الباه
جوهرة بلا ماتشوف فيها: ديرو لي عجبكم ماسوقيش فلفضيحة لي اتجي والباه راه ما انقولش شكون
عائشة كتتفكر الزاكي: جوهرة بنتي راني المك لي كتبغيك ديري بوجهي وخلينا نلقاو حل
جوهرة: الحل هو تخليني نمشي نحيد هدشي وديري شي حاجة باش مايزوجونيش
عائشة تنهدات كتبلع فريقها كتحس بقلبها كيضرها والدوخة رجعات اللور دمها كيغلي بالفقصة
خرجات من عندها ماعارفاش اش دير. راه بنتها لا ساقو ليها لخبار يقتـ لوها …وايلا كان ماشي الزاكي..وايلا كان الزاكي هو الاب وينكرها …قلبها زاد التزمت
يلاه اتركب فالمصعد وهي تشوف فهد وعمران داخلين لواحد الصالة كاينة لفوق مسدودة شبابية كيدخلو ليها غا هوما
تبعاتهم بخطوات تقال ودخلات ووقفات كتشوفهم كيبرمو فالجوان ويضحكو ويشعلو والدخان خارج وتخسار الهضرة لا قراية لا والو طايشين بزاف..غادين فالهاوية
نطقات بصوت باكي: الله ياربي اش بغيتوو عندي شافو فيها مخلوعين رماو داكشي من الشرجم
فهد بتوتر: الولليدة مالك
عمران: الولليدة عفاك..
قربو ليها وهي تنتر منهم: بعدوووو عليا بعدووو اتخرجولي لعقل الله ياربي شنو درت باش نشوف ولادي فهاد الحالة
خرجات وهوما تابعينها
هابطة فالدروج كتبكي: يووووسف
عائشة كتبكي: ولدييي لي تحرمت منو سنين وسنين طايح كومة فالصبيطار وقر طاسة فراسوو حياتو تدمرات كنشوفو غير عايش بلا روح قلبي كيتقطع عليه وبنتي لي عطاني الله مريضة فمخهاا وكدمر راسها براسها معقدة مالقيت ليها جهد وولادي لوخريين مامسوقييينش كااااع…لمن نرد الراس لمن..مبقيتش قادرة نستحمل هدشي كامل بزااف علياا ماقادراش نسيطر على ولادي اللي كيضيعو قدامييي…جوهرة بنتي ايوووسف بنتي لي ولدتها فوقت كنت مدمرة ورجعاتني للحياة كنشوفها قدامي كضييع
حطات يديها على قلبها كيضرها وبدات تخنق كانت اطيح وهو يشدها معنقها وكيغوت: عيييط لطبيب عييط
مشا فهد كيجري اما هو هزها حطها فوق لفوطوي كلها كترجف باس يديها كيمسح على شعرها: تنفسي اعائشة هدشي كلو ايدوز صافي انا انصلح كلشي عارف راسي ضغطت عليك هاد الايام صافي سمحي ليا
نزلو دموعها وحطات راسها على صدرو كتبكي: مابغيتش ولادي يضيعو مابغيت هارون يمـ وت ليا ولا توقع ليه شي حاجة بغيت بنتي ترجع لدماغها وولادي نشوفهم كاملين مزيانين اشنو فايدت الفلوس والمال والجاه وولادي كيضيعووو ايووسف
داز الوقت فجيهة خراا..
عندو بيت فداك لاباغطومو كيبقة فيه ماكايدخلو حد وقتو كلو فالدار غير ساكت ولا جالس مع ولدو ..كيفكر ويفكر ويخطط ويعاود حساباتو من الاول كل مرة كيجيه خبار فشكل ..باغي يرجع قوتو وطاقتوو وغادي يرجع للساحة ولكن تايكون واجد
تمتم وتصاورهم كاملين قدامو فلبيسي : مبقاش بزاف وهنا معاكم
برى كانت جامعة الشانطة ومقادة كلشي شافت فولدها: ناصر حبيبي سير دير داكشي لي قلت ليك..
ناصر هز راسو باه دخل للمكتب: بابا
هارون سد لبسي: اجي
قرب ليه وهزو بين يديه حطو فوق المكتب: أمر اش بغا ولدي يحضر دابة
ناصر تبسم: بغيتك تجي معايا للصالة ابابا
هارون: هي اللولة
نزلو وشد ليه فيديه وخرج هو وياه كانت فالصالة كتسد الشانطة شافت فيه: كلشي واجد
وحنات راسها
ناصر: بابا انا مابغيتش ماما تمشي خاص تبقة معانا
قرب عندها وشد ليها فيديها وقربها لحدا هارون ولاصق يديهم بجوج (يد اسيل وهارون)بغيتكم بجوج معيا ابابا ما انقدش نبقة بعيد عليكم بجوج
سكت وكمل: لا مشيتي نت انمرض ويلا مشات هي انمرض
شاف فهارون: تبغيني نمرض ابابا؟
هارون كيشوف فولدو وجهو شاحب تحت عينيه زورق كيرمش بعويناتو الزورق بريئ بزاف الشوفة فيه هكا كتخليه يضعاف كتخلي داك الجليد لي فلداخل ديالو يدوب كتخلي قلبو لقاصح يرطاب يطلب روحو يعطيها ليه هدا هو احسن ماعطاه ربي فهاد الدنيا
نطق وهو كيشوف فأسيل: ردي لحوايج لبلاصتهم
تبسمات فرحانة: بصاح؟
هز راسو باه وهو كيشوف ناصر متبسم وفرحان
طارت عليه عنقاتو : هارووون ربي يخليك لينا
ناصر تبسم وحضنهم بجوج واصل لخصرهم طوال عليه
هارون مسح على راس وجرها لعندو كتر بحاليلا حاضنها ونطق: يحساب ليك ماعايقش؟ زيدي راتي كنجمع ليك
تبسمات وهمسات ليه تاهي:هدشي كامل بنية حسنة كنبغيك اهارون وبغيت نبقاو مجموعين بتلاتة…
..
داز الوقت ..
فجيهة خرا..
كانت لابسة ومقادة جا فبالها هاد المرة تلبس كلشي حمر اونصوبل حمرة لكريشة عريانة ولبيرسينغ عكار حمر وماسكارا فالرموش ..ولفورمة ..نازلة فالدروج والخدامات جارين جوج شانطات ..
سلمات على فخيثة
فخيثة لي خايفة عليها بزاف
خلاتها كتسلم على ادريس وخرجات عند هشام لي كان واقف قربات ليه: واعدني ماغاديش تأديها
هشام : الواليدة دخلي بحالك
وهز راسو كيشوفها جاية لجيهتو طلعها وهبطها فداك الحمر لي كيفتن عليها والضحكة لي على وجها ..باينة فرحانة
خلا فخيثة تدخل وميل راسو كيشوف فيها واقفة والخدامات كيديرو الشوانط فالطموبيل
قرب ليها واخدة ليه لعقل: صافي مشينا
تبسمات: اه مشينا
حل ليها الطموبيل ركبات وركب تاهو وديمارا
عبلة بحماس: فرحانة انشوف دبي شحال هادي كان جا فبالي نمشي نخدم تماك ولكن جاتني صعيبة وخويا مابغاش
شاف فيها: هانتي اتشوفيها دابة معايا
تبسمات
مسافة الطريق وكانو قدام الطيارة الخاصة نزلو وهي كتشوف هاد الاجواء ديال الناس لي لاباس عليهم كانت تشوفهم غير فالتلفازة
سمعات صوتو: طلعي
فتح ليها الطريق طلعات وهو موراها تباعها عينيه على جسمها من اللور كيف كتتحرك بلع ريقو حاس بلحرارة طالعة معاه ..
ركبو فبلايصهم وهو اونفاص ليها كيشوف فيها كيف كطل من الشرجم..نزل عينيه وهز طابليط خدام عليها ماباغيش يبقة يشوف فيها ويتحركو ليه مشاعيرو
نطقات: هشام شحال انبقاو تماك
نطق بلا مايشوف فيها: غير شي يامات علامن نسالي الخدمة
عبلة: واخة
شافتو مشغول تاكلامو بارد مابغاتش تزيد تدوي تبسمات وهي ماعارفاش انه كيحاول يلاهي راسو عليها
دازو ساعات..
وصلو لدبي نزلات وهي اطير بالفرحة مامتيقاش هدشي لي كتعيشو ركبو فالطموبيل لي اتديهم للاوطيل منزلة الشرجم وكتشوف فالمدينة وتشوف فدوك الابراج واصلين للسما الطموبيلات اخر ماكاين وحدة كتحنت فلوخرا علام اخور…
وصلو لاوطيل من افخم الفنادق واغلاهم كيجيو ليه غير الامراء ورجال الاعمال لكبار
ديجا حاجزين كلشي خداو لكارط باش يتحل الجناح
عبلة: بلا مانعدبك باين عيان خليهم يقولولي فين الشمبر ديالي ..
نطق فاتح ليها الطريق تدخل للمصعد: جناح واحد انسكنو فيه بجوج
بلعات ريقها
كمل: عارفة طبيعة خدمتي صعيب نخليك بوحدك اتبقاي تحت عيني فنفس الجناح مانقدرش نغامر بيك ونبعدك عليا…
حسات بالتوتر من فكرة جناح واحد الراس فالراس …ماعرفات باش تجاوب
وهو كيشوف فيها بهدوء ميات فكرة وفكرة كدور فراسو..حتى كيوصلو للجناح دخلو وتسد عليهم لباب بقاو بجوج فقط
فجيهة خرا..
جالس مرجع. راسو اللور وسط الضلمة صونا الطليفون جاوب وهو مغمض عينيه زير على عينيه كيسمغ لداك لكلام كامل لي كيتقال..
نطق:قلتي دبي…
وقطع كيشوف التصاور لي وصلوه ..كتعرفو داك لبركان لهايج نارو كتلهب وتحرق اه هو نفسو لي شاعل فالداخل ديالوو فهاد اللحضة
..
في دبي..
دخلو لداك الجناح الملكي حسات براسها ملكة فجناح الملك…كتتحرك وتشوف هنا وهنا ودور فيه نسات راسها حاسة براسها كتحلم اما هو جلس معمر كاس مراقبها ومراقب تحركاتها
لقات جوج بيوت عرفات انه واحد ليها وواحد ليه..خرجات لواحد لاطيراس وهي كتشوف فيه لابيسين جا من لفوق كيطل على لتحت حيت جاو فالقمة…هدشي كانت كتشوفو غير فلأفلام
خرجات لعندو : هدشي زوين بزااف
نطق كيشوف داك الفرحة فعويناتها: لاناقصة شي حاجة ولا ماعجباتكش شي حاجة كلشي يتبدل دابة
هزات راسها بلا: لا بالعكس كلشي زوين
جمع الوقفة: من دابة ساعة دالمكانة عندي اجتماع وجدي راسك تحضري معايا
عبلة: زعمة نحضر معاك لاجتماع دالخدمة
هز راسو باه: علاش مابغيتيش؟
عبلة: لا بالعكس غير ..ماعرفتش
ميل راسو: وجدي راسك
ودخل للبيت تماك يدوش ويوجد راسو وتاهي دخلات للبيت توجد راسها..
داز الوقت
كان بكامل اناقتو بداك الكوستيم الأسود كيجي معاه هاد اللون تسريحة رجالية الشعر اللور ساعة فليد غالية وريحة عطرو من بعيد فايحة كمية الرجولة هايلة..
وواقف كيجغم من كاسو اونفاص مع باب بيتها كيتسناها..دقايق وتفتحان لباب وخرجات بخطوات تقال مسموعين ديال الطالون طلعها من صباطها لرجيلتتها لمعرين فاخضها النص فيهم باين تا لداك لكسوة لكحلة لي لابسة عبارة عن سوميج مفتوحة من الصدر وبلكمام جاتها زوينة مع فورمتها وبشرتها لمبرونزية جامعة شعرها للفوق وكيفاش جاي معاها ..خدات ليه لعقل كتر من لي واخداه
تبسمات كتشوف فعينيه الإعجاب: انا واجدة
حط لكاس على جنب وقرب ليها وعينيه عليها مد ليها دراعو: جيتي زوينة
تبسمات اول مرة يقولها ليها وتسمعها منو خشات يديها فدراعو: شكرا ايك
وخرج هو وياها من الجناح كيعجبها تعاملو كانت فرحانة بزاف نزلو للتحت والانضار عليهم شحال متواتين بجوج ..كلشي كيشوف فيهم تا دخلو لقاعة الاجتماعات تماك كانو مجمعين اجتماع خاص بالشركة ديالهم بعيدة على المـا ف يا فتح ليها لكرسي جلسات وجلس حداها حسات بالاحراج من النضرات الموجودين ليها
بداو الاجتماع وهي جالسة ..كان كيهضر وهي مراقباه راجل لي تحلم بيه اي وحدة كيفاش كيتصنتو ليه وكلامو مسموع تايق فراسو وفارض الوجود ديالو..هزات لما تشرب لقاتو خوى..خلاتو من بعد حتى كتفاجئ قطع الاجتماع وعمر ليها كاس دلما ومدو ليها: تفضلي
خداتو : شكرا
عاد رجع كمل الاجتماع..حسات بقيمتها عالية قدامهم يكفي جابها لاجتماع ومجلسها حداه ومهتم بيها تعامل زوين…
رجع جلس حداها وحط يديه على فخادها ونطق: صافا
هزات اسها با
..
نمشيو لجيهة خرا..
قبل ساعات..
ولات كتقرا من الدار من اخر ليلة ماولاتش مشات لافاك…انهارت كليا وفقدات الشغف دلقراية والحياة كلها ..كلما تتفكر اش وقع فداك الليلة كيبغي يخرج ليها لعقل
جالسة فالصالة سارحة لبعيد ودموعها نازلين ماقادراش تسامح راسها على فعلتها كلما تفكرات داكشي لي اصلا ماكايمشيش من بالها كتبغي تحماق حاسة بيه بحاليلا يلاه لبارح
تمتمات: خصرت شرفي ياسيدي ربيي شنو انقولو وشنو اندير ..
رجعات شعرها اللور كتمسح فدموعها وهي كتسمع للباب كتتحل شافتو داخل بلعات ريقها
ونزلات عينيها كتشوف فطليفونها وتخربق فيه ماحدها كتحس بيه كيقرب ليها وقلبها كيضرب فلمية
حتى كيوقف عليها: هدى
هزات راسها فيه: نعام
ميل راسو: واجدة؟
بلعات ريقها هاد الشهور كاملين وهو كيحاول يتقرب منها وكتتهرب منو اعتادر ليها بكاع الطرق وهي منخلاه وهاربة منو بقدر كون ماوقعش لي وقع كانت اتسمح ليه
ولكن دابة ماتقدرش فكرة يعرف انه دارت داك الموصيبة كتشعل فيها لعافية
تفكرات كلامو فالصباح انه باغي يديها لشي بلاصة
نطقات: عندي امتحانات خلي لمن بعد
ووقفات يلاه اتخطي خطوة وهو يوقفها شادها من دراعها: ماشي زدتي فيه لا
بعدات يديه من يديها: هدشي نتيجة افعالك ولفتي ديما نسمح ليك وديما تابعاك ..جاتك قاصحة ياك؟
بقة كيشوف فيها
وهي ترجع تنطق: لا لقيتي ما حسن لاش مازال شادني معاك
قوص حواجبو: كيفاش؟
تنهدات: المهم خليني عليك
ودخلات لبيتها وسدات عليها وصلها ميساج غير شافت اسمو بلعات ريقها كان مهدي: راك ايلا ماجاوبتينيش اهدى انجي عندك تا للدار
ديما كتبلوكيه ويرجع يصيفط ليها من نمرة اخرا بلوكاتو تاني ونزلو دموعها : الله ياربييي مانقدش على هدشي
..
داز الوقت سالة الاجتماع
لقات راسها ركزات معاهم فشحال من حاجة وفهمات شحال من حاجة
وقفات فجنبو وهو كيعرفها عليهم كصديقة مقربة للعائلة وكلهم كيرحبو بيها …حسات بالفخر وهي كتتعرف على ناس بحال هاكة كلاس ولاباس عليهم..
شاف فيها: مشينا
تبسمات: يلاه
خرجو اينزلو للمطعم يتعشاو
جلسو
عبلة: عرفتي اول مرة انعيش هدشي لي عشتو معاك فتلاتة دسوايع
هشام: تستاهلي ..ديري فبالك انه عندك قيمة كبيرة ماتتنازليش عليها
عبلة :ماعرفتش علاش كاع الرجال ماشي بحالك لا نت لا عثمان الله يرحمو..لفلوس ولجاه ولمال هدشي كامل مامخليكمش تنساو انسانيتكم واحترامكم للمرأة وتقديرها نت شخصيتك مرزنة ومتبتة وكالم
ميل راسو: ماشي مع كلشي اعبلة..اه كنحتارمو ونقدرو ولكن مع لي يستاهل
تنهدات: كاين لي ماعندوش الربع دهادشي
هشام : مايمهكش لوخرين ولي داز يهمك لي معاك دابة
عبلة: داكشي لي كاين
جابو لعشا بداو كيتعشاو بصمت
حتى كتنطق: عمرك حبيتي ولا فكرتي فالزواج..راجل بحالك كتجيني غريبة وحداني
هز راسو فيها: حيت كنت باقي مالاقي لي باغي
عبلة : ودابة
بقة كيشوف فيها شحال وهو هز كاسو وجغم منو: نوضو نمشيو نرتاحو مشا لحال
عرفاتو كيتهرب من السؤال وقفو وزادت قدامو وهو موراها عندها واحد المشية سبيسيال خاصة بيها غا هي ..مسح على راسو تا وصلو للمصعد ودخلو للجناح ديالهم هي دخلات لبيتها وهو دخل لبيتو نيشان دوش بما بارد يبرد عليه داك السخونية لي كتشعل فيه وهو كيشوفها
اما هي دخلات فرحانة من النهار كيف داز..مشات عمرات لبانيو وخدمات ضواو خافتين وتخشات وسطو وخدات التليكوموند طلعات ريدو دلحيط لي كلو زاج كيطل على السحاب والضواو ديال ناطحات السحاب لي قدامها منضر زوين بزاف وخدمات موسيقى هادئة جا فبالها هشام وتبسمات: شحال غزال عاد الراجل..
داز الوقت..
فوسط احلامو كيشوف راسو معاها فلفراش كيم ارس معاها حس بسخونية جسمها وكيبوس فجسمها وصوت انفاسها مسموع مستمتع وهي بين يديه مرفوع لعالم تانيي..فلحضة فاق من النعاس على غفلة بلا مايكمل الحلمة ويوصل للنشوة لي كان قريب يجيبها لقا راسو كلو عرقان..ناض بصدرو لعاري خرج من البيت كيقلب على لما بارد شربو ودور عينيه كيشوف فبيتها باغيها كيحس براسو ماصابرش كاع عليها..الحلمة كتعاود فدماغو ومازال الرغبة حاكماه لقا راسو غادي لعندها للبيت وقف مزير على فكو عارف راسو لا دخل عندها مستحيل يفلتها ومايدير معاها والو ..رجع باللور في صراع مع راسو
باغي يخرج يمشي يشوف فين يبرد باس ميأديهاش..
حتى كيهز راسو من الحلة ديال لباب وشافها خارجة بداك لبيجامة لقصيرة كل جسمها باين ومفروز قدامو ..بلع ريقو ها لي مابغاش علاش خرجات
عبلة ميلات راسها كتشوف فيه كيف عرقان ووجهو حمر عروق جبينو باينين قربات ليه: مالك؟
زادت قربات: مريض؟
زادت قربات متر وتعلات على ريوس صبعانها حاطة يديها على جبينو تقيص حرارتو: باش كتحس
ماعارفاش انه زادت كملات عليه وهو يلاه حلم راسو كيمارس معاها ودابة كيشوفها قدامو..
عبلة: واش مريض..باش كتحس
يلاه اترجع اللور وهو يجرها لعندو من خسرها قربها ليه كتر ملصقها معاه ونطق بهمس: بلعافية شعلتيها فيا..
بلعات ريقها من قربو وكلامو وتمتمات: كيفااش؟
نزل راسو ماقادرش يصبر كيستنشق ريحتها من عنقها ويدوي: كتسولي شي اسئلة جوابها عندك..
كتحس بداك القرب ولحرارة لي فعنقها دأنفاسو مصدومة منو قفزات كتر فاش رجع شعرها اللور وهز راسها لعندو كيتحسس فضهرها من اللور عينيه نايمين عسلين بغات تبعد وهو يتبتها مقربها كتر نازل لشفايفها: شنو مازال باغة ديري فيا..هممم…ماقادرش نصبر اعبلة
وحط شفايفو على شفايفها
