الجزء 21 - أنــــت كـــلّ شـَـــيء

وية بعد وشاف فيها : نخليك تمشي ترتاحي .
عاد حسات على راسها ونيت عرفاتو تاهو تزير وطبعا كاي راجل تقرب لبنت وعاد فهاد الجو راه لاباس منين ماغتاصبهاش تما، جات تبعد وهي تقيس شي حاجة قاصحة سرطات ريقها ودارت بزربة كتعض على شفايفها عرفات راسها قاست المعلم مشات دغيا خارجة وهو رجع غطس فلابسين كيبرد على راسو قبل ماغايخرج اكمل عليها .
مشات كتقطر هاكاك طلعات لشومبر جاب ربي لقات واحد الفوطة لواتها عليها ووفتحات بالكارت لقات تاديك جميلة باقا ماجاتش معركاها مع حب قلبها، دخلات نيشان لدوش دوشات وخرجاتب البينوار تلاحت هاكاك فناموسية محيدة دوك الكادوات كاملين وكتفكر غير فماجد وفشنو دارليها اليوم مامتيقة والو وواش بصح هي رجعات معاه .
صباح جديد صبحات مسيفط ليها ميساج بنمرة خرا تبسمات ودخلات عاد حيداتليه البلوك من كولشي ورجعات كتدوي معاه دارو بروكرام ايمشيو كاملين لاكادير وداكشي لي كان .
مشات كالسة قدامو وحاتم وجميلة اللور، فديكابورطابل طالق ليها الموسيقى لي باغا وهي فسطوريات وتصاور العشق ديالها، ومرة مرة تصور معاه وتخلي تصاور للذكرى، تاوصلو لاكادير، تما فين دوزو نهار كامل، نقدرو نقولو عليه من احسن الايام ديال نهى الضحك لي ضحكات مادازش عليها قبل، كتمشي شادا فيديو وهو عاطيها الخاطر ومنين مادازت غير تحط العين اشريه ليها موسعليها خاطرو بزاف وهي استحلاتها ومرة مرة حتا كتعنقو، وقلبها كيزيد اطيح فيه كثر وكثر، وصلو فليل لمراكش وتعشاو فلوطيل وكلها تفرق ينعس وغدليه ثاني دوزوه فمراكش بتسركيل، شمنك يا تصاور خدات وشمنك يا سطوريات ذارت وبنادم غامصدوم فالانسطا، ولكن مامبيناش وجهو مابغاش توريه لشي حد حتا فكرة انها تحط تصويرتها معاه باش تفقص يسرى لغاتها خايفة لاتجبد ليها الصداع ولا تفرشها وهي مزال كتفكر فشي طريقة كيفاش غاتصارحو بلاما يتضررو، وفالجانب الثاني تاهو كيتسنا نفس الشي . دازت خمسيام ولا في الاحلام فمراكش وتمو راجعين لكازا ماساخياش ولكن الاهم هي راجعة مع ماجد شي لي ماخلاش الضيم اطيح عليها بزاف مدام حبيبها معاها ماكاين خوف، وصلو لكازا مسخسخين دوزو نهار وهوما غا ناعسين وينوضو يتعاودو ويعاودو يرجعو ينعسو، فاقت الغدليه حتا كتوصل بميساج من الجيرون ديال guess باش ترجع للمحال تخدم، حمعات شعرها وبقات كتفكر كيغدير ترجع دابا للخدمة وماجد باقي هنا خايفة لايمشي يكشفها ولا يعيق بيها، دخلات كتبركك منو واش زعما غايرجع ولا والو لقاتو باقي مشغول مع مشروع طنجة مزيانة نيت بحرا هي تبقا تمشي وترجع بلاما يعيق بيها .
وداكشي لي كان رجعات للخدمة ديالها ولكن هاد المرة اكثر نشاط حب ماجد مسيطر على عقلها وقلبها وكولشي، كدور وضحك وتجاوبو ولكن فنفس الوقت كتفكر فالكذوب خايفة يتفرق عليها وديك الساعة تقدر تحطم بزاف حيت تعلقات بيه وخصوصا لاكانت هي السبب اتجيها ندامة خايبة .
دوزو سيمانة مفارقين هي فكازا خدامة وهو فطنجة، ولكن بيناتهوم الميساجات واكثر من ذلك فينما تجي لدار تلقا شي كادو معاه بوكيت دالورد هالحمر هالتوليب هالبيض هالصفر منوع ليها، وكل مرة تصورو وتحطو وتكتب عليه شي حاجة وطاكيه فالخفاء، كيدخل هو عيان للاوطيل كيقرا داكشي تم نيت كيعيطليها ابيل فيديو وكيدويو بسوايع تاكاتنعس ليه فالابيل وكيصور فيها سكرين شوت باش تبقا عندو حمقاتو ببرائتها والعفوية لي كيلمسها فالروح ديالها ولكن بدا كيبرزطو الكذوب ديالها بزاف خصوصا منين كيعيطليها ابيل فيديو فالخدمة وكاتبقا تخبا باش تبان بلي ماكايناش فالمول، وكيسولها كتزيد تكذب عليه بالنسبة ليه علاقة بحال هاكا شحال مابقات نهايتها ماكاتبشرش بالخير وهو عيا صابر كيحس بيها بدات طيح ليه من عينو شوية بشوية
دازت خمسطاشر يوم مرة يطلاقاو فيها فريسطوات مرة يمشي هو لطنجة وتبقا، وهضرتهوم بدات تقلال شي لي خلع نهى وعيات كتحاول تسول راسها مناش السبب، حتا لنهار لي خلا ليها ميساج .
ماجد : أنا غانرجع بحالي لدبي
توكضات كانت فالخدمة دغيا شافت الميساج ديالو : فوقاش اتمشي ؟
ماجد : عيطولي على واحد البروجي خاسني ضاروري نكون فيه
نهى : واش اليوم ؟
ماجد : اه
نهى : اتمشي دابا بلاما تشوفني ! ( سيفطات ايموجي كيبكي )
ماجد : غانجي لعندك للخدمة ديالك نشوفك
نهى : ( خرجات عينيها بدات كترعد ) لا لا بلاتي
ماجد : مافهمتش علاش ؟
نهى : انا دابا مشغولة بزاف ماغايبغيش الباطرون نخرج
ماجد : ماشي موشكيل انا غاندوي مع معارفي وتخرجي
نهى : ( زادت سرطات ريقها ) لا عرفتي شنو غادي نتلاقاك فالقهوة
ماجد : علاش مابغيتينيش نجي للخدمة ديالك
نهى : وصافي اماجد بلاما تضغطني مابغيتش وصافي .
شافتو خلا ليها vu تعصبات وهي تعيط لجميلة : الو شوفي راه مابقيتش قادا نزيد نصبر اصاحبتي كنحس براسي غانتفرش فاي لحضة خاسني نقوليه الحقيقة .
جميلة : قلتهاليك النهار اللول وماكاتسمعيش لهضرتي
نهى : وباش كنت غانعرف بلي غانطيح فيه ( بصوت حنين ) بغيتو اجميلة وخايفة نخسرو .
جميلة : مهم جبدي الموضوع بطريقة ذكية بلاما نوصيك .
يالاه غاتجاوبها عيطليها جيرون من اللور : نهى اجي دغيا خدمي للكليان ديالنا مهم شوفي شنو بغا .
قطعات بزربة وقادات الكونبلي ديالها وشوميز مع مشات دايرة باش تشوفو تاكانت غاطيح منين شافتو واقف قبالتها داير يديه فجيبو والكارد موراه والجيرون كيتفتف ويرحب بيه