رتاعشات من اللمسة لي دارليها ودارت كترعد عويناتها كيلمعو بدميعات خفاف مامصدقاش كتهضر مرتاعشة : واش نتا لي درتي هادشي . قرب وجرها لعندو من ضهرها وحط راسو على جبهتها : شكون من غيري غانقبل يدللك بحال هاكا يا اميرة القلوب . مدليها بوكيت دالورد الحمر وباسها عند راسها تا عضات على شفايفها وكطلق ضحكة شوية بشوية وكولشي كيسفق وكاين لي ناض كيسلم عليها كاع عند بالهوم شي وحدة لي ارشي ميليارديرا كخخ، وكيسلمو عليها هي مامتيقاش هادشي وهي فين وشكون هي اصلا، واش هادي نهى بنت كازا لي خدامة فguess كتسربي الكليان، ولات دابا فقلب الماكونيا وسميتها معلقة فبرج خليفة فالايمارات . دارت رجعات كتشوف فيه هو دار يديه فجيبو وبقا غير كيتفرج عليها طالق تبسيمة خفيفة تحت اللحية ديالو وفرحان بالفرحة ديالها، جات عنقاتها تاجميلة وسلم عليها حاتم . نهى : حرام عليك ماتقوليهاش ليا جميلة : لو قلتها ليك ماغاديش تبغي انا متأكدة يالاه تلاحي ( غمزاتها ) انا مشيت مع حوبي نتساراو فمراكش ونتي ( عاودت غمزاتها ) بروفيطي . عضات على شفايفها كتشوفها غادا وجا هو قرب ليها من اللور : تبغي تقطعي طارط ديالك ؟ دارت طلعات فيه عينيها مباشرة : الى جات من عندك اكيد غانوافق مافيهاش شك . جرها لعند واحد الطبلة كانت موجدة فيها طارط صغيرة على شكل قلب ومرسوم فيها تصويرتها فوقاش هز هاد الفوطو ودارها ماعارفاش، جرليها الكرسي بجنتلمانية كلسات ومشا كلس مقابل معاها غير كيشوف فيها تاطلع يدو للخادم جاب واحد الشمعة وحطهاليه وشعلها عاد مشا . ماجد : تمناي شي حاجة ؟ نهى : ( بحماس وعويناتها لامعين ) ماعرفتش شنو غانتمنا ههه ماجد : اي حاجة شنو مشهي خاطرك يتحقق نهى : زعما غاتقدر تحققو ؟ ماجد : الى كانت شي حاجة فالقدرة ديالي اكيد مايكونش عندك كرام شك ابتاسمات ليه وغمضات عينيها بهدوء ولوهلة فخاطرها ماعرفاتش علاش تمنات يرجع بيها الوقت وماتكونش كذبات عليه حيت فجميع الاحوال لحد الساعة باقا كتسما كاذبة عليه واخا تسمحليه، ذبلات ابتساماتها وفتحات عينيها شافت فعينو نيشان، هو شاف فيها بحالي حس عليها ولكن فبالو على اخر مرة وقع داكشي فطنجة شد على يديها . ماجد : كنعتاذر على سوء الفهم لي وقع آخر مرة ( شاف فشمعة ) طفي بعدا الشمعة ديالك . طفاتها ورجعات شافت فيه وشافت فاليد ديالو لي شادا فيديها . ماجد : شوفي انهى أنا دوزت بزاف دالبنات فحياتي نقدر نقوليك على قد شعر لي فراسك ولكن عمر شي وحدة رتاحيت معاها وجاتني على كانتي وراحتي قدك، لو بغيت منك النعاس علاش غادي ندي فيك ونجيبك وانا عررف البلايص لي فيهوم البنات من داك النوع مزيان !! نهى : أنا ماعجبنيش نشوف داكشي عندك فداك البيت اماجد وداك صاحبك كيفاش كان كيشو( زير على يديها تاتأوهات عرفات بلي مرضو داك سيجي ) ماجد : ماتعاوديش تجيبديليا داك ولد ال**** ماتخلينيش نخسر الهضرة قدامك انهى . سرطات ريقها وسلتات بشوية يديها شي لي خلا تاهو يجيب عندو يدو ويشبكها ورجع شاف فيها بجدية . ماجد : خلاصة القول انا دابا كنكشف ليك على نيتي ماباغي منك والو انهى خاطري رتاح ليك وعجبتيني بنت الله اعمرليها الدار وماشي كيف موالف نشوف البنات قبل منك، بغيت دابا نبداو صفحة جديدة ونعطيك فرصة تعرفي عليا كثر من هاكا وتانا نزيد نتعرف عليك . بقات كتشوف فيه وفنفس الوقت فخاطرها كتفكر فداكشي لي كاذبة هي حياتها كاملة كاذبة فيها عليه . ماجد : ( بقا كيــشوف فيها ) غادي نتقبل الى مابغيتيش كاتبقا حريتك، ( شاف فعينيها ) بغيت نبداو صفحة جديدة انهى، ماشي بصفتي داك المليونير لي فالانسطا ولا فالخليج بصفتي ماجد لي تعجب ببنت عادية سميتها نهى . x
