فإحد الاحياء الشعبية صوت الصداع و الموسيقى و الغناء و دردشات الرجال و النساء و صوت الدراري الصغااار و ضحكاتهم مالي المكان دليل على انه كاين فرح فديك الحومة .. وحدة من ديك الديووور كتكون من جوج طبقات ،. .
....: مّامّااا اجييييي تشووووف اجيييييي كتجررر فودنين ولد صغييير تكون فعمرو خمس سنيين و خارجة بيه من البيت للصالون فين كاينة ماماه و الناس د العائلة مجمعبييين ..شافت فيههم كاملين حتى قشعااات ماماه داك الولد : هييييز اختتتتي ولدك هاااء الحلوى د العرررس كاملة كان ماشي يرزينا فييييها كامعشوق فالحلوى اهيييا المنكر ...
ما طلقات من ديك الولد حتى طيبات ليه ودنو مسكين ندم علاش فكر يدخل لديك البيت اصلا .. الولد (كيبكي و يشهق بالدمامع هابطين ليه مع وجهو ):حبيبو ياسين لقالي مشي تسخرلي و اجي نعطيك الحلوى و انا ملي جيت مجبرتوش قلت غنجبرو تمااا ..
( كيهدر و يتفتف خايف تجيه شي دقة منها) الام د الولد : الله يرضى عليك ابنتي سمر لما تديهاشي منا قلة الصوات راه غا ولد ماعندو عقل... بقات كتساوي معاها و طبطب عليها حتى تفشات
سمر : (معلية حاجبها و معاجبها حال : و صافي حتى نتينا اهانية الخيييير موووجود الحمد للله شباش نعمل فبالي انا غي خفت يشوفوه البراهش اخريين و يجيو كاملين يتبعوه و تشبرني رشيدة توريلي الشغل ...
الام د الولد بتفهم داياها على قد عقلها عارفاه على نقشة تنوض تسعر ليهم تما : الله يكمل بعقلك حتى نتينا و نفرحو معاك ان شاء الله كيف مافرحاننين مع ليلى ..
ضحكات سمر و حشمات زعما: ان شاء الله اخالتي.. لعبات فشعر الولد فصبعانها غي بالضحك كتلعب معاه و دايرة راسها كببيييرة و مسؤوولة و معرفت شنو و شافت فالام : و ووكلو وكلوو مسكين فالحلوى عندو يبقى فين مامشيتي مشوهك.....
خلاتهم و مشات هازة داك القندورة حتى للركاب, مبينة الرجيلات بيضين مافيهش حتى زغبة كتبين ليهم زعما شوفوني مافيا حتى زغبة وهي غا مسكينة جربات لاصيغ اول مرة في حياتها و بززز وخا مكانش فيها الزغب المهم ديرها لدارتها ختها ليلى العروسة ديرها حتى هي .. و جامعة شعررها لكيوصل ليها تقريبا حتى للمؤخرة بأمر من ماماها لالة رشيدة غي تشوفها طلقاتو قدام مجمع د النساء تشوهها و تبقى تندب و تحلف فيها....
شدات داك البيت بالسارووت و تاكد و تعاود و مشات تقلب على ماماها توصل ليها ديكشي لدار ولد حبيبة علاه هي تنسى متقولها ليها نيشان لعند ماماها للسطح كانت هي و خوها الكبير ياسين و جارتهم لالة فاطمة ....
طالعة كتلهت فالدروج : و ماما عرفتي داك المسخوط د العايل د حبيبة الصغير حصلتو بحال الفوييير كيسرق الحلوى ..و ملي قلتا ليماه قاليك لا مالو واش عمرو شاف الحلوى فحياتو و بقات كتبلبل عليا تما و ملي سقساتو قاليك ...
.شافت فخوها ياسين لكيشوف فيها شنو كتخبز : قاليك ياسين قالو طلع الفوق كيفرقو الحلوى فالبيت ..
كانت كتهدر و تشكي لماماها زعما ل اصلا كااع ماسامعاها شنو كتقول مع الروينة ..... غي شافت ياسين تحرك ماجي ليها و هي طير هابطة فديك الدروووج ... مهم هو السلاك حتى كتزبلها عاد كتفطن على راسها ... حتى تضربات مع ولد جيرانهم خليل فالدروج دازت فيه و زادت مشافتش حتى فكمارتو.....
خلاتو غي كييشوف من دايما كتعجبو و لكن مكيزعمش يهدر معاها حيت كيبقى صاحب خوها و عارف خوها كي داير كااحتراما ليه غي كيشوف و كيتحسر خايف يطيروها ليه من قدام عينو. . . .
فالسطح مع لالة رشيدة الام د العروسة و الحاجة فاطمة جارتهم، كيهدرو و يتحتحو وهوما كيديرو شغلهم ،. لالة رشيدة مراة ديال الزمااان قاست عليعا الحياااة و تعدبااات بزاااف حتى جمعات وليدااتها و دارت دويرتها و قاصحة بزاااف : ياربي يرزقا العقل ياربي العاقلة دالدار هي ليلى و ها هي غتمشي و دير دار ديالا غنبقى انا مع الحمق عند خاه فهاذ الدارر... لالة فاطمة ام خليل مرأة بشوشة مسرارة على وجهها : و تنا نتي اختي رشيدة بنات فعمرها كاملين هكا غي السلاك و صافي حتى تهدن وخا تشوفيها كطير هكاك راهها واحد شيطانة مديرهاش بيها....
هزات راسها راشدة و شافت فيها : احياني يالحبيبة هاذيك فيها غي الحلووووق و ديك اللسان اما شي حاجة اخرى والو لجى يكوزا فيها (يديرها بيها زعما ) .
ضحكاااات لالة فاطمة بالتقالة وض ربات على كتاف رشيدة بالضحك : و صافي حتى نتي راه داك اللسان لكيشد رجال .. و ان شاء سمر غي تكبر شوية نزوجها لولدي عادل و لا خليل لوحدة فيهم ....
نغزات رشيدة الحاحة فاطمة برجليها و دوات بشوية : سكووت عندو يسمعك خااها يبدى يزنزن عليا بغيتي تشعلو جبد لو حس زواج سمر تما يمشي يزرق (يشد ) عليها فالبيت ميطلقى غا الله يستر مع هاذ العيال و صافي... ..
غا الله يستر مع هاذ العيال و صافي فاطمة : لا احبيبتي حتى لهنا لا سمر بنتي ملي كانت صغيرة و غنزوجها لولدي معشوق فبنتك يااختي و خوها راه بعقلو واش غيوقف للبنت فرزقها بزاف على الغيرة بزاف باز لمراتو!!! رشيدة( ساطت بتعب) : هانتينا الحبيبة معرفتشي حتى شنو عندو معاها نهار و ليل حاضي غا معاها .. ليلى لا مايهدر مايقولا فاين ماشى ماوالو هاذي شي نهار يقتلا لي غا بالخلعة و يشوطني فيها ...
فاطمة (بتفهم ): اوى الله يهديهم ياربي هذا الدخلة و الخرجة سمر فاين ماشى فوقاش مشاات علاش خرجااات باها و مكيزيراشي هيدا بالعكس مفششها كثار من نرجس ...
. . . فمكان آخر 🌺
في بيت العروسة جالسة ليلى العرووس لابسة قفطان جوهرة فالابيض و زيف حياتي مغطي شعرها الاشقر مكحلة عويناتها و محنية يديعا و رجلييها بنت مسرارة كتشبه لباباها العينين قهويين و عامرة شوية و طوييلة جالسة كتشوف فالمراية و تهدر مع راجلها و تبتاسم بفرحة لقليل فين كتبان عليها تحت نظرات سمر لجالسة وسط ناموسبة مربعة رجليها كتلعب مع نرجس الطفلة الصغيرة د الاسرة... كدور عويناتها الكحلين ملامحها طفولية بشرتها بيضاء و شعرها كحل و طويل ....ت كتحرك شفايفها لي بحال حبات الكرز و تعضهوم و هي كتشوف فليلى من راسها لرجليها و كتفقص على قفطان الجوهرة لحتى هي بغات تلبسو و كالعادة ماماها حلفات عليها بحكم عندهم الجوهرة كيتلبس غي للنساء مزوجات ماشي. العزبات، كتشوف و تفقص و تسمع لكلام ليلى كيفاش كدوي و تحلون و كتقيد فعقلها...
و تعووج فمهاا حتى كتشوفها طلقات ضحكة عالية .. فتحات سمر عينيها بفضول ملي سمعات ضحكاتها نيشان عرفات انه قاليها شي كلمة حلوة، قلشات الردار د ودينيها منيتها كتحاول تسمع و لا تلقط راس الخيط علاش كيهدرو كتشوف ختها رجعات حمراء و عنينيها مدمعين حابسة الضحكة و سمر مسكينة عينيها مدمعين بالفضول، لي فيها خصها تعرف شنو كيقولو ؟شنو لمحشمها؟ شنو لضحكها؟ بغات تعرف هي بغات تعرف ...
و عارفة اذا سولاتها مغتقوليهاش حيت علاقتهم ماشي كاي اخوة عاديين ؛خوااتاات لكن بعاد على بعضهم مكيعاودوش اسرار لبعضهم .
دايما سمر كتبغي تقلد ليلى و كتعجبها كيفاش كتلبس و كيفاش كدوي و كتحرك، و كلشي داير ليها حساب و كيخاف منها و هي كلشي كيحسبها برهوشة و ماعندها عقل و غي كطير كل مرة كتقول صافي غتبدل و تبت و دير عقلها ،مي دوز جوج ساعات هي الكثيرة كترجع شخصية سمر و الاقاويل لكتقولهم فراسها كاملين كيمشييو هباء منتورا...
دايرة يديها على حنكها كتشوف فختها كيفاش فرحانة حيت اخيرا تجمعات مع راجل لكتبغي سنين د الانتظار و هي كتستناه لكيجي يخطبها كترفض ؛فالاخير هاهيا دابا مزوجة بيه و غطيير بالفرحة ؛ تنهدات و سهاات فالارض كتقول فعقلها حتى انا شي مرة نبغي شي واحد و يبغيني و نتزوجو و نولدو ضحكات و هي كتخايل راسها كتبغي شي واحد؛ يقتلها ياسيين قبل ماتفكر فيها ...
علات راسها فليلى بعد ما سلات مكالمة ديالها و مع الفرحة كتبان منورة شافت فيها و هدرات ليلى : سمر تسخري ليا .....! شافت فيها سمر و عوجات فمها و نعسات مكمشة فوق نانوسية : لا مافيا عيييت... .
ليلى : سمر حشومة مشي تسخرلي مع شنو عملتي باش عيتي بالسلامة .. . .
ناضت بالزعفة شافت فيها : شنو خصك عاااود انا عامليني هنا غي سخارة ديالكم😒
ليلى هزات تليفونها كتكونيكطا فالواتساب .. ليلى : جيب لي اولويز دغيا متعطلشي....
متعطلشي دغيا باش تعدل وجهك الكوافورة ماجة دابا باش تعدلكم على بكري ..
غوتات سمر بالصدمة و نقزات من ناموسية كتهدر سمر: شننو عاااود شنو قلتي نتينا وقيلة حماقتي لا بغيتي تشوهني مع مول الحانوت و كيتجمعو داراري د الحومة كامليين نمشي انا تريك تريك تريك عطيني اولويزز!!!!! و الله مانمشي و ديك البكية لشريتي ديك المرة، و الله مانمشي وخا تجي رشيدة تجرني منمشي و يلاه انا حلفت ...
بقات ليلى غي كتشوف فيها كيفاش كتخلف و تعاود سكتتات حتى كملات عاد هدرات ليلى : و ديك ساعة اختي ديالي قولي نهز معاك الشمع و ندير معاك فال د الحناء اذا السخرة مابغيتي تسخرلي هذا رجايا فيك شكرا وبزااف. .
سمر شافت حتى عييااات و قوسات حجبانها و علامات الاستفهام ضاهرة على وجها سمر : و اجي نقوليك ليلى : شنو عاود قولي شنو تحت راسك ديك الفهامات ديالك كنعرفا .
سمر ( كتشوف فيها و تشير ليها للتليفون) : و قولي شنو قالك محمد فالتليفون و بديتي كضحك و حشمتي... .
شهقات ليلى و طلعات مع سمر بتقرفيسة من الفخض و فتحات الباب كتعيط على ماماها ليلى : و ماااما اجي اجي و رشيييييدة اجي تسممع...
نقزات سمر كتشد ليها ففمها.. و ليلى ممفاكاش سمر: اواعدي سكت غتشوهنا و الناس كاملين هنايا ارحم باباك سكت دخلاتها و شدات الباب كترغب فيها و ليلى باقا كتغوت،..
ليلى : خليني نقولا بنتا شنو خصا تسمع (غوتات) و اجييي ارشيدة تسمع بنتك اجي زوجي بنتك صافي... شداتها سمر كتسكت فيها : صافي صافي غنمشي نتسخر لك صافي غي سكتت يرحم باباك....
بقات معاها سكتاتها و عطاتها الفلوس تسخر ليها ... خرجات سمر مخنزرة فليلى كون صابت تقتلها و تخشيها تحت ناموسية ... مشات صوبات حالتها فالمراية و هزات شعرها و هبطات القصة و مشات كتنكر و تسب ..
خرجات للزنقة و معرفات اينا حانوت تعطي الراس؛ مشات لاقرب حانوت للدار و هي تلاقا مع داك الولد لجرجراتو على قبل الحلوى ،شافتو و هي تكمش فمها و عيطات ليه سمر: اسامة الزين ديالي اجي نقوليك ...
شاف فيها اسامة غي قشعها هي وهو يهرب خاف على وديناتو...
خلاها كتندب على زهرها و بقات كتقلب على شي برهوش و لا يتسخر ليها حتى شافت برهوشة د الحومة كطييير و فريفرة عيطات ليها و جات بواحد شعكوكة..
سمر(بصوت حنين) : ربي على زين د الحومة شحال زياان زيانيتي القردة تمشي تسخرلي السكرة ...
اكرام : شكرا .. شنو نجيبليك اري فلوس ..
ضحكات و عطاتها فلوس : هاك جيبلي اولويز ياك عرفتيه.. اكرام (هزات راس باه ): عرفتو ..
سمر( ضحكات و بقات كدوز على شعكاكتها) : ربي على شعكوكة شحال مزيوونة ..
ضحمات اكرام حشمانة مشات للحانوت ،و بقات سمر واقفة قريبة من الحانوت كتستناها حاضية عليها حتى كتشوفها واقفة قدام مول الحانوت على برى و معاه واحد الولد ....اكرام كتدوي معاه و تشير عليها، حتى شهقات بالحشمة و مشات كتنكر مابقا همها لا فلوس لا سخرة ؛خلات باباها تما و مشات كتجري للدار حتى كتسمع لاكرام كتعيط ليها ...
اكرام : و سمر و السخرة ديالك... ااسمر دارت هزات السخرة بالزعفة و مشات.. و هي ترجع هزات صرفها و شافت فيها و خنزرات سمر : مشي مشط شعكوكة ديالك خلاتها و دخلات للدار كتسرط الشوهة ديالها
دخلات للدار معصبة قريبة تنفاجر، تلاقات مع بنات خالتها كبار عليها شوية سلمات عليهم غي بالزربة و النفاق خدام حيت مكيتحاملوش......
سمر: كيف نتوما لباس عليكم بخيير.. نجوى : لباس الحمد لله ازين ديالي ربي يخليك ...
نجلاء : كتشوف فيها و تقلب عينيها فرحانة بليميش لدايرة لشعرها: نخليواك دابا الغزالة ديالنا غنمشييو نبدلو دغيا باش نهزو الشمع مع العروسة ..
قالت هاذ الهدرة و مشااو مخليين سمر ودنيها مسمكين بالصدمة و الشمتة حسات بختها شمتاتها هي لخصها تهز الشمع ماشي بنات خالتها؛ و دايما كانت كتقوليها نتي لغتهزي ليا الشمع فعرسي دابا جاو هاذ جوج معواجات خداو بلاصتها ...
..دخلات لبيت د ماماها كتبكي و تشهق حسات براسها مشموتة و بلي ختها ماراضياش بيها كتبكي و دمعات كبار هابطين من عينيها شدات عليها فالبيت و عطاتها للبكاء....
حتى داك العرس مغنحضرش ليه يفرحو و ينشطو بوحدهم ..انا كاع ممحسوبة عليهم هادشي لكانت كتقول فخاطرها.... شي ساعة وهي تما و ماماها كتقلب عليها حتى لقاتها ناعسة و مكمشة كتشهق و عينيها حمريين بالبكاء.. تخلعات رشيدة و تهزات من بلاصتها رشيدة : الله ياربي قلبي غيسكت مالك ابنتي كتبكي شكون ضربك.. واش شي حد عمل ليك شي حاجة ...هدر اسمر...
هزات سمر راسها كتبكي و تشهق : نتوما مكتحملونيش خليتو بنات ختك يهزو شمع و انا لا علاش زعما باش هوما حسن مني...
عاد رتاحت رشيدة و خنزرات فيها : و الله يمسخك يابنتي هادشي لغنقوليك واش نتينا غتفهم حسن منهم ياك قالو هوما جاو قد بعضهم فالطول غيجيو قد بعضهم؛ و نتينا ابنتي اسمر قصيرة عليهم مغتجيش ..
نتيينا صغيرة على شي هزان الشمع الله يرضى عليك الكبدة ديالي غي سكت الله يرضى عليك و خرج جلس معاهم برى و نتينا لغتعدل معاهم فال د الحناء غي خرح ابنتي الله يرضى عليك..
بقات كتهدن و تسايس معاها حتى سكتات و غسلات وجهها ،وخرجو من البيت.. تلاقاو مع باها محمد غي شاف بنتو عينيها حمرين تخلع..
محمد : مالك ابا كتبكي (شاف فرشيدة و درع سمر و كيطبطب عليها ) مالا كتبكي شكون ضربا ياك مانتينا لضربتيها ؟؟! رشيدة : و فشش الزمر فشش كتبكي على الفشوش الخاوي قولا تعمل عقلا ..
تخبات سمر فصدر د باها و هي مزالة كتبكي : حكروني ابا خلاوهم مع العروسة و انا لختا رماوني برى انا غنمشي معاك لاسبانيا منبقاش معاهم وخا يحماقو..
بقى محمد كيطبطب عليها و يسكتها و مشات رشيدة كتنكر على فشوش بنتها و مداتهاش فهدرتها حيت دايما فين مايديرو ليها شي حاجة كتبقى تبكي و تهدد يجي با من اسبانيا نمشي معاه والله مانبقى معاكم ،حتى كتبرد و تنسى بحال عمرها قالت شي حاجة .... .
. . . . . . . . . وصل الليل و بداو الناس يدخلو للقاعة كل وحدة و يارسول الله و كل وحدة فرحانة بشعرها و بتكشيطتها ها لي بدمالجها كتشالي... مهم الحالة محيحة كل واحدة باغة تبان على الاخرى و لالة رشيدة لابسة تكشيطة فالشيبي و زيف نقري و تكحيلة للعينين و حروفها فنيين كأنها ماشي ام العروسة واقفة قدام القاعة كتستاقبل الناس و ترحب بيهم بابتسامة بشوشة و عينيها على سمر لجالسة مركنة مع الضياف تقول وحدة منهم جالسة متبتة و دايرة رجل على رجل بتكشيطة فالغوز بيبي و شعرها دايرة ليه سبولة للجنب ،و تاج خفيف فوق راسها هازة خنافرها للسماء ماقدها حد ،و مخنزرة...
فين سمر لي موالفين عليها غي الضحك و الطيران و مكتجلس فبلاصة وحدة جالسة تقول هاد العرس ماشي ديال ختها ... هازة فقلبها بزااف من حيهتها و متنساهاش ليها...
هازة فقلبها بزااف من جيهتها و متنساهاش ليها .. ..طالقة ودنيها و حانية راسها كتشوف فرجليها عحبوها مع الصباط جاوها كيحمقو ،حتى سمعات الهدرة د ثلات د النساء جالسين معاها فالطبلة كينممو..
سمية : ياختي واش هذيك فوزية ولا كتشبهالا صافي؟؟.
سلوى (هزات راسها كتشوف فين شيرات سمية ): اه ولاهيلا لا فوزية اواعدي المسخوطة حاملة عاااود شهقااات بالصدمة... علياء: علاه مفخباركومشي دابا راه قريبة تولد .!!!
سلوى : ياختي مالا مزروبة ياك عندا حوج د العيال بنت وولد لاين ماشية تولد عاود ....
هكذا بقات الهدرة خدامة بيناتهم و مرحموهاش غي كيهدرو فناس حتى حد ما سلم من لسانهوم، حتى قلبو الهدرة على الرجال تاني ،و سمر كالعادة غي ساكتة و طالقة ودنيها كتسمع حتى نطقات وحدة فيهوم ..
. سلوى (بافتخار) : انا ياختي مكيقولي لا ضعاف لا غلاض كيقولي بقى هيدا كنحمقو هيدا ..
سمية: سعداتك الرجال ولا فيهم البلوة قاليك خصو نضعاف بحال النساء د الموضة و انا ماقادة على ريجيم .. .
علياء : انا بعدى والله منديها فشنو كيقولي هو كنشوف فاش مرتاحة انا و نتينا اصلا اسمية معندكش الكرش عاود غي مزوينة صافي ...شافت فيها سمية و ضربات على حنكها حطات الكاس من يديها و هزات بزازلها ووراتتها سمية :ا شوف انا هاذو عقدوني الكرش بلا منهدرو عليها دابا ..
سلوى : ضحكات صافي صافي اسمية غي نزل رزق راجلك ههه...
عوتاني قلبو الهدرة على العينين كيهدرو كل وحدة كتقول انا عيني زوينن لا ديالك عادييين الخضرين حسن حتى دوات سمر نقزات من بلاصتها لفيها ما هناها ...
سمر : مكاينشي ماحسن من العينين كحلين الصراحة هي هاذي ضحكات....
سلوى : و الله يرضى عليك ها لقلتلكم شفتو .....
شوية جات جلسات واحد البنت و نضمات ليهم فالجماعة مكيعرفوش سمر و معارفنيش بلي هي خت العروسة ....
سلوى : خيلاه اسهام قولنا شكون حسن فينا بثلاثة ضحكات سهام و شافت فيهم بثلاثة: و الصراحة سلوى جات مفتوحة عليكم نتوما جيتو ...!!
مخلاوهاش تكمل هدرتها طاحو على بعضهم بالضحك... نطقات علياء: والله ماكذبتي هي مفتوحة فيما خرجو منا جوج ريوس انا و سمية باقين جدادين ....و قلبوها ضحك تاني بقاو مهاودينن ....
بعد مدة هزات سمر عينيها فيهم على غفلة و حمارو ملي شافتهم كيهدرو تاني و الهدرة عليهااا..
سلوى: واش هاذيك لواقفة مع رشيدة هي بنتها سمر ياك ؟؟؟علياء : وقيلة لا سمر شعرها حكل هاذيك زعرة شوية ...
سمية : ياختي كيقولو ديك البنت عندهم شوية ماشي نوغمال بحال حمقة و طاير ليها فريخ ...
سلوى : اواعدي يانا علاش ياكما مشيرة بسم الله رحمان الرحيم !!!
علياء : بسم الله رحيم ياختي...
سمية: ويييه قاليك ملي ماتت توأم ديالا فالصغر و هي مشيرة هيداك و غي كتعررعر و معصبة و شوية حمقة .
علياء: انا سمعت هدرة اخرى عاود....
سمية : شنو شنو قول العايلة غي قول...
علياء: قاليك عندوم ديك العايلة زوهرية ..
سهام : بصح انا عمرني شفتا صراحة و لكن كيقولو عليها مزوينة و فنة ..و هي حتى زين ماخطاتو لولا قولي العايلة حمقة .. اجي كيفاش ديك زوهرية..
سلوى : الله اعلم عاود شدو الموضوع هادشي كيخلعني !!
سهام : سكت نتينا اذا كتخاف خلينا نشطو .. سمية اجي احبيبتي قولي شنو عاود ..
سمية: اكبدي كيقولو بزاف و السكات حسن ... ماشي قاليك حمقة و غي شادين عليها فالداار ..
حيت زوهرية يشدوها سحارة يقطعو لا يدييها و كيكونو عينيهم كيبررريو بوحدهم و مكتشدش فيهم العيين و خط د ييديهم طوييل ياختي شكون غيتزوج بهاذي غي قولي حمقة و فيها غا المشاكيل و الله يشافيها ....
شافت فيهم سمر و قلبها يكبكي دم علم الله شنو كيقولو فضهرها من غير هادشي شافت حتى عيييات و ناضت خارجة من القاعة فمها كيترعد ...
x