الجزء 30 - جنون الغيرة

اورطيغا: (خرج من المحال كان قالو يوسف غيكملو الدوران ويجلسو فماݣدو مشا جهة طموبيلتو حلها حط الوراق تماك حيت غيصيفطوه ليه للدار ولكن مدارس بحال يوسف للي زاد 50 درهم باش يجيبوه دغيا.. بقا كيشوف جهة ماݣدو واش يبانو واالو الدنيا عامرة بزااف سد طموبيلتو صونا عليه شي صاحبو جاوبو وبقا كيهضر معاه وهو كيقرب حتى شافهم بقا واقف حتى كمل عاد مشا جيهتهم كانو لخوتات جالسين حدا بعضياتهم ويوسف اونفاص معاهم جلس حداه)
يوسف: عاد كملت!!
اورطيغا: (حط التيليفون) اه (مسح على وجهو بتعب)
يوسف: بانلي تقديتي مزيااان هه
اورطيغا: (فهم قصدو) نتا عارفني متنزݣلش الهوتة
ملاك: (معجبهاش الحال بقات غير صااقرة كدعي فيه فخاطرها)
يوسف: نوضو خودو شنو بغيتو
خديجة: (شافت فملاك بجوجهم عمرهم جاو ليه)
ملاك: ياله نوضي
خديجة: شنو تبغيو نتوما
يوسف: للي جبتو
اورطيغا: معنديش مشكل
يوسف: ( عطاها كارت ݣيشي ديالو مشات ملاك دافعة الجبهة وخديجة لحقاتها)
قالي شريف ادم رجع غيجلس مدة هنا
اورطيغا: (بتعابير وجهو زعما ماشي شغلو)
يوسف: فشكل داكشي للي وقع مع سي محمد (باقي عاطيه داك التعبير وان هاد الموضوع مكيهمووش يعني غير سدو..) حقا تقادات طموبيل ديال ملاك
اورطيغا: مزال
يوسف: خديتيها لداك خونا
اورطيغا: اممم..
يوسف: شنو بانلك فشريف حتى هو يتوكل على الله ويخطب ملاك
اورطيغا: (مخسر وجهو) واش هاد ملاك متقلة عليك؟!
يوسف: هه عادي بحال ختي
اورطيغا: وااا غيثة اولى!! ولا هي ماشي ختك؟
يوسف: زعما!! شريف وغيثة؟!
اورطيغا: وبانلك غير ملاك وشريف اصلا ملايقينش لبعضيااتهم تااكلو وهو تيشوف
يوسف: ههه اممم هادي عندك شريف دروييش ولكن لا لا حتى ملاك درويشة
اورطيغا: (بعياء) سد هاد الموضوع الله يرحم ليك الواليدين والله اصاحبي عيقتي فيه متتقولش ديك البنت كفاش تتحس براسها بحال شي شارفة فاتها الوقت ونتا تتقلب ليها على شي عريس هنيينا اصاحبي
يوسف: واش قالت ليك شي حاجة!!
اورطيغا: لا (عاود هضر) بينتها، شووو شريف راه بعقلو وبعينيه الا بغا شي حاجة هو يقصدها ويمشي عندها متحتاجش تزين ليه شي حاجة وبالعربية والتاعرباات خرج سوق هاد تخربيق ونتا باغي تقلبها حرفة وتبقا تزوج الناس
يوسف: (شاف عندو الحق يمكن ملاك ميعجبهاش الحال) اوا ونتا؟
اورطيغا: ههه واش انا تنهرب من الوالدة ولقااك نتا اسيدي تزطمتي بصحتك القاالب خلينا حنا عليك فالتيساع باغيين نبقاو معذبين فهاد الأرض غير خلينا
يوسف: ههه (صونا تيليفونو كانت مو جاوب كانت هي وغيثة قراب) اجييو.. لا لا اش هاد الهضرة تتقولي غير اجييو.. (قطع حتى لاخر كان جاوب فتيليفونو...) غتجي الوالدة، الوالدة وغيثة
اورطيغا: (حرك راسو باه طل كتبانلو ملاك شادة فختها وواحد خدام فماكدو كيشرح ليهم وباينة غير من ديك الشوفة وتكية للي دايرة على ختها عاجبها داك خونا للي كيشرح.. هز حواجبو بجوج وعاطياها للظحك عض شنافتو التحتانية ورجع شاف فيوسف)
ماشي تعطلو؟!!! نووض شووفهم!!
الغالية: (مكانوش خارجين هي بلعاني بغات تجي حيت عارفااه غيتقدا بيت نعاس من محال استقبال حيت شحال وهو كيسول عليه والناس كيشكرووه، وبغات تكون معاهم وصلو هي وغيثة لماݣدو لقاو غير اورطيغا للي جالس غيثة تبسمت شدتها قبل ميوصلو عندو) شوفي اديك القزقازة من هنا نقولهالك
غيثة: ماااماااااا
الغالية: نطلق عليك غير يوسف يبهدلك قدامهم هانا تنقول ليك جمعي راسك لالياااتك تيقلبو على رجال ونتي لاسقة فشمكاار دلخلا اسمعي اوالله متحلمي بداك نهار لي تجمعي معاه نموووت ومنعطيكش لييه
غيثة: غتبقاي هاكا غرجع فحالي
الغالية: ياك؟!
غيثة: ااه حيت عييت بهاد الهضرة شمكار شمكار!! بزااف!! اورطيغا عزيز عليا وصافي متنسايش راه كبرنا كولنا مجموعين
الغالية: باسم الله عليك!! اش كبرك معاه زيدي زيدي خلاص علية قالك كبرتي معاه اش جاب لجااب
(شافو يوسف خارج هو خديجة هازين بلاطويات فيهم ݣلاص وموراهم ملاك هازة حتى هي بلاطو حيت دارو بحساب حتى الغالية وغيثة، تبسمت كتسالم معاهم غيثة جلست حدا اورطيغا لسقت فيه وملاك جات اونفاص معاه معندهاش الخاطر وهي كتشوفهم كيضحكو ولوخرين كيصدمو فالغالية انهم ختارو شحال من حاجة ومعاهم نسيبة من الفوق كانت بغات تسخف ويوسف تحط بين نارين وكيشوف الفوار كيخرجو من نيوف مو..
اما هي حانية راسها على لݣلاص كتاكل فيه حتى زطم عليها هربت رجلها وشافت فيه لقاتو كيشوف فيها هز حاجبو فيها حتى كتجبدو من كتفو غيثة مليوح عليها)
غيثة: (بهمس) شوف حضي راسك من ديك ليلى
اورطيغا: (ضار عندها)
غيثة: ليلى بنت داك محمد للي جاو من فرنسا
اورطيغا: مالها؟!
غيثة: سمعتها تتقلب عليك، هاكا تتقلب فين تتكون والخدمة ديالك والدار للي ساكن فيها من غير السعادة.. حقا فين ساكن؟!
اورطيغا: منين جبتي هاد الهضرة
غيثة: كانت تتسول مرت سعد وهي عاودات لبنتها وبنتها عاودات لية حيت مفهموش علاش تتسول عليك
اورطيغا: (حرك راسو باه ساهي)
غيثة: علاش تتسول فيك
اورطيغا: (لوا شنايفو بمعرفت بعد راسو ورجعت جبداتو) امم
ملاك: (كتعيا تهرب عينها وتلقا راسها كتشوف فيهم)
غيثة: قولي بالصح فين سااكن
اورطيغا: كل مرة فاوطيل.. (تعجبت ممتيقاش) يوسف هو هدا انا مشييت (وقف شاف فملاك للي هازة تيليفونها كتخرب فيه، هز تيليفونو وتم ماشي فحالو متبعالو العين ومتبعالو دعاوي)
يوسف: (واخا عيات متبينش ولكن بانت فيها وتقرساات خديجة بقات كتوري لملاك شي تفاصل صوراتهم ليها الغالية باش تختار) الوالدة!!!
الغالية: ام ولدي!!
يوسف: (بهمس) راه واخا كانت معانا نسيبة ولكن مسكينة بقات مبعدة يعني ختارينا انا وخديجة هي مابغاتش دخل
الغالية: معليش
يوسف: (حرك راسو باه) خديجة ختاريتي شي حاجة
خديجة: انا غنشوف ذوق ملووكة حيت صراحة مكاينش بحال ذووقها، اممم عجبوني هادو وهي اممم بغيت ليها هدا وحتى غيثة نختار ليها هدا، هادو كادو من عندي هه
غيثة: ميغسي حبيبة
ملاك: (تبسمت فوق خاطرها باغية تريش غيثة والسلام)
الغالية: (شدت فمها ومتحكمتش فنظرااتها للي كانو قرطااس...
ملاك: (طارت ليها بلمزيااان واش هو للي يفرحها وهو للي يقلقها) لا لا لا انا مموالفاش هاد زعلووك
خديجة: شنو؟! زعلوك؟!
ملاك: ماشي نتي..
الغالية: ياكما تتوحم ؟!
خديجة: كفاش؟!
يوسف: مالكم؟!
ملاك: بفف مزال منمشيو؟!
خديجة: شحال وليتي تحماقي تجلسي فالدار
ملاك: (مجاوبتش بقات غير صااقرة شافت فغيثة للي كتلعب فتيليفونها اول حاجة جاتها فبالها كفاش هي كتهضر مع اورطيغا واش تكون بيناتهم شي حاجة!! راه باينة منين جلسو وهوما وش وش وش.. فنفسها كتعاودها "مخاصش يطلع لية الدم ماشي غير ظحكنا شوية صافي راه بفففف"
وقفت)
انا نمشي ندور لهيه
غيثة: صبري نمشي معاك (ملاك مكرهتش تجمع معاها بشي تصرفيقة وتقولها ها العار اختي الا ما بعدي مني... مشاو لجهة LC Waikiki كيتجمعو)
الغالية: ولدي جيبلي شي صلاد متغديتش مزيان..
يوسف: اهاااه (وقف كيشوف فيهم بزوج وخايف من مو تقول شي حاجة خايبة لخديجة)
خديجة: (عرفاتها صدرااتو قلبت نظراتها من ابتسامة لنظرات جامدة فيها حيت عاطياه بظهر وقلبت وجهها كتسنى القرطاس والمعياار وكتخدم المناعة)
الغالية: جالسة تتشتتي ففلوس ولدي على قبيلتك!! حسابلك غنخليك ضربي ݣاع داكشي للي بناه وضيعييه عليهم قالك تتختار فتفااصل حمدي الله غير على راسك للي غلبسووك
خديجة: (زيرت على تيليفونها متيقاش فيها) مفهمتش اخالتي
الغالية: يخوي ليك ضرااس قدي قدك وتتقوليلي خالتي
خديجة: مفهمتش شنو بغيتي نقولك؟!
الغالية: تقاال ليك ابنت لحراام
خديجة: (منين عرفتها كتسب وخرجت ليها يعني مكتسجلهاش) أسمعي اديك العقروشة انا والله حتى نخرج فيك والله يا مك حتى نحمقك الا مبعدتيش علية
الغالية: باني على حقيقتك
خديجة: ماشي حقيقتي هدا التعامل للي كيليق ليك.. نتي مبغياش للي تحتارمك وتعامل معاك مزيان وتوقرك وهدا التعامل للي يجي معاك وحدة شارفة مرضيااش تكون عندها كنتها حسن منها
الغالية: ههه هاكاااوا على حسن مني باااش!!
خديجة: (هزت حاجبها) باشما بغيتي (كتفقسها) صغيرة وزوينة وجههي ممكمش شعري مشاايبش ماشي بحالك شي الشيبة العاصية
الغالية: (طاحتلها فالنقطة.. بعصيية) الشيبة العاصية هي مك
خديجة: ههه ويلي ويلي يا ربي توصلي لظفرها واش شفتي راسك وشفتيها هي كفاش داايرة!! تحشمي قداامها ههه انا كنقولهالك من دابا فالعرس متبانيش قداامها ولا عرفتي مزيان غير باني بحرا تحاايدي العين على ميمتي الحبيبة اااا اخااالتشي
الغالية: (بقات صااقرة مخنزرة حتى طلقت ظحكة صفرا) اوا الايام بيناتنا الشلحة الخانزة
خديجة: (من ظحكتها عرفت راه يوسف جاي) كوني هانية اخالتي ولدك فعيني والله متخاافي واخا زعما امم.. ولكن حتى أنا راه قارية وكنت حبست فلفااك زعما عندي مستوى...
الغالية: (بقات غير كتشوف حط ليها يوسف العصير وجلس حدا خديجة بهدوء مدرعها والغالية حيت براسها تقوولبت..) مقلت والو على قرايتك ابنتي
خديجة: اه بالصح انا غير قلت وصافي (كتموه انها كتجمع الموضوع، تبسمت وشافت فيوسف) تعطلتي
يوسف: (معاجبوش الحال) كان عامر لداخل
خديجة: اممم (شافت فالغالية تبسمت وغمزتها)
الغالية: (قربت تنتفس راسها)
يوسف: (عرف مو غطيح بخديجة بخصوص قرايتها واخا منبهها انها مدخلش وعلم الله شنو قالت وللي عجبو هدوء خديجة ومافيهاش مك قالتلي ودارتلي بلعكس بقات ساكتة حتى رجعو لبنات) صافي نتحركو؟!؟
الغالية: انا مزال ندخل المرجان نقضي شي غراض
يوسف: صافي انا نمشي نوصل لبنات
الغالية: بقاو معانا
يوسف: غيكونو عيااو
خديجة: معليش الا بغات خالتي نبقاو ماشي مشكل
ملاك: عييت انا والله منعست مزيان لبارح وفقت بكري بقاو نتوما انا ناخد تاكسي ونمشي
يوسف: صافي نمشيو نخاف تسخفي وتجيبي سبتك علينا
ملاك: ها ها ها
الغالية: اوا معليش ديها ترتاح غير هي ماشي عندها طموبيلتها؟!!
يوسف: (سلم على مو مجاوبهاش بقات هي وغيثة وهوما مشاو ملاك متلية من موراهم مخلياهم على خاطرهم) شنو قالت ليك على لقرايا
خديجة: مقالت والو
يوسف: خدييييجة..
خديجة: وصافي ايوسف،، قولي داكشي للي ختارينا عجبك وإمتى غيجيوه للدار؟! ناااري شحال متحمسة حتى داك الكوفر غزااال
يوسف: المهم هو يعجبك نتي عرفتي الا بغيتي نمشيو لواحد المحال ديال لمااعن
خديجة: نمشيو (بفرحة) كننموووت على لمااعن
يوسف: هه علاش؟!
خديجة: معرفت اي وحدة كتبغي تشري لماعن وفاش كنت للهييه معمرني شريت حتى كاس كان كيبقى فية الحال
يوسف: دابا الآلة غتشري للي حبات خااطرك
خديجة: (تبسمت فرحانة) خاصني نكتب كلشي فورقة باش منضهشرش هاكا كتقولي ملاك باش منين نوصل للمحال منبقاش غير كرون ونتلف
يوسف: صراحة فكرة ههه عندها شي أفكار
خديجة: ههه
يوسف: تبغي نمشيو دابا بانتلي ملاك عيانة
خديجة: اممم لا حتى لغدا سير نتا خرج مع صحابك شوية من لبارح وهوما مبرزطينك باش تخرج حتى لغدا ونخرجو بدل الجو معاهم
يوسف: (تبسم بحب طلعو للطموبيل ملاك ركبات اللور مكرهاااا دارو موسيقى عايشين معاها وصلات الحومة مكيناش طموبيلتو لامت راسها مخاصهاش تبقى تقلب علييه صافي تخوي راسها منو اصلا غير فضوول لي كان فيها عليه مكاين حتى حاجة اخرى....)
ملاك: (طلعت للدار تابعاها خديجة مسخسخة مع دروج وصلو للدار) خديجة غنصبن عندك شي حوايج يتصبنو
خديجة: خلي عليك انا نصبن ياك غير الماكينة
ملاك: اممم (جابتلها حوايج مشات كتنفض وتشطب بيتها حتى جات عندها خديجة)
خديجة: شفتك قبيلة كتختاري مع مراد بيت نعاس
ملاك: (بعصبية) مختاريتش
خديجة: وشنو كنتو واقفين كتهاضرو تماك يوسف كيقول هادو مكانوش كيتحاملو ودابا كيظحكو
ملاك: راه عندو الصح مكنتحتملوش غير جابتها هضرة وصاافي (شافت فيها ديك الشوفة ديال مغنهضرش)
خديجة: وعاوديلي راه باين غير من عينو مكيحايدهاش عليك كنشوفو كفاش كيشوف فيك
ملاك: هه (بعصبية) هاكا كنتي كتقوليلي على يوسف
خديجة: (جمعت الضحكة)
ملاك: (بغات تصلحها حيت ماشي وقت هاد الهضرة وعاد مجاتش تخوي فيها غضبها) شتي ماشي ضروري غير الا شاف فيك شي واحد راه مزعوط فيك يمكن سها ونتي غير تنويتي وأصلا لا انا لا هو نتلقاو شي نهار غير خوي راسك من هاد تخربييق
خديجة: بالصح، قوليلي الصراحة خاتمي دزواج خايب؟!
ملاك: اه حالتو
خديجة: تفووو غيقول علية غير معربنة بففف انا مع شفتو كبير وديك الغبينة للي كنت فيها مشيت لكبير
ملاك: حتى دابا باقي الوقت قولو بغيت نبدلو داك نهار منتابهتش مزيان ولا كنا مزروبين وغير ختاريت وصافي، ومتبقايش تشوفي للي فيه الحجر بزاف راه كاين شكيلات زوينين
خديجة: ملاك خاصك تبقاي تخرجي معايا راه ختك زرقة فهادشي وشحال هادي مشريت معرفت شنو للي خارج دابا فالموضة والغالية حااااطني فراسها وليت كنخاف نختار شي حاجة
ملاك: شوفي الغالية دواها هو النخال متجاوبيها مووالو صافي خليها تقول شنو بغات دخليها من ودن وخرجيها من ودن نتي للي يهمك هو يوسف وأصلا كولها غتكون فدارها عطيها صوابها والتيقار
خديجة: داكشي للي دايرة حتى انا.. (بقاو كيجمعو الدار حتى صونات مهم للي بداو كيوجدو تماك للعرس، قطعو معاها) شنو ندير لعشا
ملاك: للي بانلك اختي (مشات تكات فالسداري طلقت شعرها يرتاح وكتدخل صباعها وتحسس فروة شعرها) ديري للي تشهيتي
خديجة: اممم بغيت بيتزا شفت كاينين فلفريݣو
ملاك: صافي واخا أنا نهبط نجيب من الحانوت فرماج زيديه عليهم باش تعلك مزيان..
اورطيغا: (كمل الخدمة ديالو من بعد منقاو الدنيا حيت الدري خدا إذن عندو شي غراض يعني هو للي غسل داكشي وسيق المحال.. مشا لاصال ترينا غير شي نص ساعة حيت عيا داز لدارهم دوش لبس حوايجو كلا ماكلتو كان شرا صلاد كبيرة، نص دجاجة مشوية مع الروز كلا غير بشوية عليه كمل ناض دار عصير تمر مع اللوز والݣرݣاع وزبيب زاد عليهم megamass وهبط عليه دقة وحدة، جمع الدنيا غسل الماعن للي تماك جمع زبل فميكة مابغاش يخليه تماك واخا حاس براسو عيا ومافيه ميصوݣ هز داك زبل لاحو ومشا شاد طريق للحومة للي نورمال موالف كينعس فدار مو ولكن مبقاش!! صونا عليه يوسف)
يوسف: فين اورطيغا!!
اورطيغا: فلفيليبين.. راك فالحومة؟!
يوسف: حنا فالاطلس انا وشريف و.. (جاوب شي دري كان معاهم وغادي فحاالو)
عبد الرزاق مشيت!! واخا تهلا خويا...
بقينا غير انا وشريف
اورطيغا: فين؟!
يوسف: ف**** (قطع وبقا مكمل مع شريف) حرت والله حتى تنقول تقادات بيناتهم تلقى الوالدة دارت شي حاجة
شريف: عطيها شوية دالوقت أهم حاجة مرتك موسعة خاطرها
يوسف: ايييه دايرة الخاطر ولكن هادشي غيرجع علية انا بالخاايب، بنادم غيبقى يصبر يصبر حتى يتفرݣع شي نهار على شي سبب بسييط وانا مباغيش المشاكيل
شريف: مكاينش شي حل هاد الساعة من غير تكبرو عقلكم ومنين غتزوجو غتبعدو شوية
يوسف: داكشي للي داير حتى انا.. (جابو لشريف شيشة ديالو بقا كيشيش ويهضرو حتى خلط اورطيغا) غبرتي هاد لعشية
شريف: فين اخويا متتسول موالو
اورطيغا: (جلس بعيااء) كانت عندي شي خدمة
شريف: وصلاتك الأمانة خدمتك كما ديما متقوونة (حرك لاخر راسو باه)
يوسف: حقا دوك للي كانو كاريين حداك باقيين؟! للي دخلنا عندهم داك نهار
اورطيغا: لا خرج من شحال هاديك الدار ديال الكرا بنهار قليل فين تتمرا شهر كاملة، بانلك تجي تكري هاد ليامات تماك
يوسف: ههه والله مكرهت
اورطيغا: محن امسكين
يوسف: ومكاينش عزارا تماك
اورطيغا: يمكن كاين شي طلبة فلبروميير علاش؟! زعما على ود لبنات؟!
يوسف: اه
اورطيغا: شحال وانا ساكن فداك الموبل كولشي داخل سوق ك** وكاين حتى بنات لفوق حداهم وبنات
يوسف: يعني كولشي طلبة
اورطيغا: لا لبنات للي حداهم وحدة يمكن فرملية سطاج، والتانية فرملية فالقشلة
يوسف: مزيان واش الدار مولاها واحد
اورطيغا: صراحة معرفتش يمكن كل واحد عندو برطمة وكاريها السمسار للي مكلف
يوسف: ديور رخاس تماك شوية؟!
اورطيغا: كاين شوية رخا اكترية لداخل للي مجايينش على الشاريع نتا كملتي كريدي ديالك؟!
يوسف: مزاااااال باقي (شاف فشريف) ونتا؟!
شريف: كانت بقات شي حاجة عطيتها كاش
اورطيغا: (غمزو) الناس دالكاش اخاي يوسف
يوسف: ههه من أين لك
اورطيغا: من أبي الغالي ههه
شريف: هههه وابييعني سعد غير تيحفر باغي يعرف واش كملت ولا مزال
اورطيغا: هه بيناتكم، مهم انا عيان باغي نمشي
يوسف: متعرضناش نمشيو نكملو معاك
اورطيغا: اش تكمل معايا عينك تمشي عند مرتك ودايرني قنطرة؟!
شريف: حتى انا نمشي نشوف مرتي المستقبلية
اورطيغا: تبت اخاااي شريف واش عارف شنو تتقول 10 دالليل هادي حسابلك دوك لبنات سايباات لليي.. للي كاريين تما... مهم هو هدا الله يعاون.. (خرج من تماك واخا كيعيطو ليه ركب فطموبيلتو وزاد فطريق معاجبوش الحال ولا كيدور فشريف وفيوسف على حسابها ولكن كيعصبووووووه، مع وقف بطموبيلتو فلباركينغ كتبان ليه فالحانوت... هز حواجبو بجوج عمرها شافها خارجة الحانوت ولا للحومة وفهاد الوقت!! وخرج منها بهدووء...)
اورطيغا: (بقا واقف حدا طموبيلتو كيشوفها كتختار شي حاجة من الثلاجة هزات ساشيات ديال الفرماج ولتر كوكا ودخلت كتجر فرجليها عينيه كيدورو كيشوف جوج طلبة كيتوشوشو ويشوفو فيها، بقا غير كيشوف من بعيد حدا طموبيلتو حتى تمات خارجة هازة بلاستيكية وكترد الصرف لبزطامها رجعت فخطوة وهي توقف كتشوف فدوك الجوج هازة راسها فيهم بقا غير بلاصتو كيشوفها شنو غتصنع دارت يدها على خصرها شي 3 الثواني هزت ديك الساشية على جهدها وهبطت على واحد لصدرو تما فين وصلو يديها هز حواجبو بجوج مصدوم حيت كانت كتبان هادئة وهوما واحد متكي على لاخر وكانو كيظحكو لاخر للي مجاتش فيه الضربة بغا يشدها رجعت شادة داك الساشية بغات تنزل على التاني مشا كيجري يفك)
ملاك: ياكما حسابلكم غتخلعووني والله منتفاااك معاكم اولاد الكلاب
اورطيغا: (وقف فوسطهم عاطيهم بظهر) سيري طلعي (هو يدفعو واحد فيهم)
ملاك: ههه حماار معرفتيش شكون دفعتي (بتلاتة شافو فيها) ياله تفاك دابا معاه نوريك كفاش انا طالبة كنضبر على راسي والله يا مكم حتى يݣزكركم هاد الليلة
اورطيغا: (حسابلو غتقولو بعد من صدااع وتخاف عليه تجرو مهم شي حركة.. ضار عند لاخر) كفاش بلانك نتا؟! (تجمعو ولاد الحومة)
....: (جاي مخضضضضر خاصو غا معامن) شي حاجة خاي اورطيغا
اورطيغا: (شاف فدوك الجوج للي بان فيهم خافو مابغاش يحݣرهم ولا يتحݣر عليهم وباين عليهم طلبة. الا بدا بواحد لوخرين خاصهم غير علاش ومغيتفاكو حتى يديرو فيهم شي جريمة)
سيرو بدلو سااعة بأخرى وترجلو شوية ماشي للي سخن عليه *** يمشي لشي طالبة يحݣرها هاد المرة خرجت سلامات المرة جاية!!!
ملاك؛ بزاااف عليه للي يحݣرني نحݣر ألف واحد بحالهم
اورطيغا: (ضار عندها) باقية هنا
ملاك: (خرجت عينها) نبدل المونادا راه تمخضات مبقا فيها ݣاز ونتوما للي غتخلصووها نتوما للي ضيعتوهالي
اورطيغا: (كيرمش عينو محرك راسو بلا حولة)
تحركو من هنا منعاودهاش مرة أخرى هاد الكوان مافيهش الحݣرة لبنات داكشي باش محݣرتكمش هاد المرة
(مشاو دوك الطلبة تفرقت الجوقة وهو مشا جيهتها)
علاش كدابزي مع الناس؟!
ملاك: راه هوما لل
اورطيغا: بشوية هضري انا حداك
ملاك: بفففف، انا كنت كنشري خرجت بقاو كيزمرو لواه الطالبات مكيشريوش هادشي وباينة الفلوس منين كيجيو وشوية قالولي شرينا حتى حنا باينة راك ضبرتي على راسك مزيان هاد نهار ننن..نننن.. وبغيتني نسكت ليهم؟!!!
اورطيغا: (لعب بلسانو فوسط فمو قالب وجهو متبع لدوك الطلبة فين ماشييين شاف فواحد عشيرو بإشارة بعينو فهمو شنو بغا، شد لبلاستيكة من عندها)
سيري طلعي انا جاي من موراك
ملاك: لا خاصني نطلع هادشي كتسناني خديجة
اورطيغا: (حل الساشية كيشوف باكية فرماج متزريلا مبشور ولوكوس ومونادا) انا نبدلك هادشي ونجيبو ليك
ملاك: انا نتسناك هنا
اورطيغا: (تخضر عليها) وا سيري طلعي ابنت العبد أنااا جاي من مورااك شحال متتسمعيش الهضرة (طلعت وهبطت فيه مخنزرة زايدة معصبااه وطلعت كتنݣر هو دخل الحانوت)
ملاك: خ** كداير وهو شغلو اصلا؟!! تفوووو... تفوو...
اورطيغا: (دخل الحانوت ديك المونادا عطاها لداك المخضر، وشرا وحدة أخرى وشي لعبات طلع دق عليهم حلاتلو خديجة حيت لوخرا تنفخاات ومرضااتش يغوت عليها مد ليها الساشي) فين ديك شنيولة
خديجة: ههه لداخل كتوجد لعشا
اورطيغا: (حرك راسو باه حتى كان بغا يمشي ورجع مكمش عينيه بفضول) شنو تطيب؟!!
خديجة: ههه بيتزا
اورطيغا: اممم نمشي نجيب ليك عشاك اختي واقلة غتباتي هاكا
خديجة: هههه
اورطيغا: (متبسم) بالصحة والراحة ختي (تم هابط وهي سدت لباب كظحك دخلت عندها للكوزينة للي رجعت دغيا كانت كتصنت عليهم)
خديجة: يا ختي ضريف علاش كتقولي عليه قبيح
ملاك: شنو بغا؟! (شدت الساشي تبسمت فيها 2 ميلكا 2 سنيكرز وباكية فيريرو هزتهم وعطات لختها تقدية لوخرا)
خديجة: هو للي جابهم؟!
ملاك: ديالي، انا للي خلصتهم (خرجت من الكوزينة كتفرنس) ولكن علاش مضربش دوك الجوج تأ راه هاكا كتكون الغيرة خاصو يشنظلهم ويكون الدم ونقولو لاااا ونخافي عليه.. اودي مكاينش معامن، وااقلة غير أنا للي كنحلم مكاين لا غيرة لا صطا حمص...
(شعلت التلفازة ودارت موسيقى كتبت بلهدا.. خودني غير بلحيلة بلهداا
بقات كتاكل الشكلاط وتبسم غير كتجي خديجة كتجمعها)
خديجة: غدا خاص نمشي لطبيبة
ملاك: صافي مزيان انا خديتلك رونديڤو صباح ومنين نكون ماشية للخدمة تمشي معايا نتي دخليلها وانا ندخل للخدمة كملي واجي عندي
خديجة: والتحاليل؟!
ملاك: لابوراطوار تحتها غير تكملي هبطي ديري التحاليل واجي عندي أغلبية 12 غنكون مسالية ومنها نطلع لفاك نجيب شي بوليكوبات
خديجة: متقوليهاش ليوسف
ملاك: وعلاش نقولهالو؟!
خديجة: مبغيتوش يعرف يااا ربي متكونش فية شي حاجة خاايبة
ملاك: متخافيش ان شاء الله مايكون غير الخير.. (بقاو كيتسناو مدة حتى وجدو لبيتزات حطات خديجة كل وحدة ديالها وكيسان بقاو كياكلو وهو لباب يتدق خديجة ديجا علمها يوسف راه جاي) واش يوسف؟!
خديجة: اه ديري شالك (مسحت يدها ودارت شالها كانت ديجا لابسة كيطمة واسعة جلست كتاكل حتى دخل تسالمو بالوجه) اهلين وساهلييين
ملاك: حماااتك بتحبك
يوسف: (تبسم) بالصحة والراحة
ملاك: (تبسمت معاه جلس عيات خديجة معاه ياكل خدا غير طريف صغيير حيت كان ياله معشي لاحظ ان خديجة مقالت ليه لا بغيت تجيبلي عشا لا علاش مجبتيليش ماشي بحال لوخرا كان خاصها غير امتى تفتخو.. بقاو مجمعين) انا نطلع لسطح
يوسف: لبرد عليك
ملاك: لا لا بلعكس الجو زوين (هزت كاب وداك الشكلاط وللي بقا من الموناضة وطلعت لسطح مخلياهم على خاطرهم بقات كتشووف الدنيا خاوية شوية صونا تيليفونها كانت بريڤي عارفة شكون غيكوون)
سير تخ** نتا عاود (بقا كيبرد الحال وهي كتكمش وفنفس الوقت مابغاتش تهبط غير باش تخليهم على خاطرهم طلت كتشوف فطموبيل ديال اورطيغا مبانلها غير تقلب على حجرات صغار ضرب بيهم ولكن الا عرفها هي جمعت يدها ضورت عينها فسطح وزفرت) وكان غير يطلع لسطح زعما ميحسش بية طلعت ويطلع خاصني ندير شي قانون جدب ولا جذب ولا شنووو كيقولو ليه...
اورطيغا: (بقا فالدار غير كيدوور مكاين ميدار باغي ينعس ولكن مقادرش، شعل ضواو كاملين كيشوف فالدار هي زوينة مصلوحة ولكن ما فيها واالو معرفش واش يفرشها ولا لا حيت عارف راسو مغيجلسش فيها ديما، وفنفس الوقت محدو فيها خاص يكون شوية ديال لفراش ها هو دابا بغا يرتاح ولا يتفرج كرسي ما فيهاش خاص تلفازة ضرووري، وحتى الكوزينة ممجهزاش بداكشي للي كيبغي باش يطيب بحال دار مو للي فالسعادة شاري فيها كل مكيحتاج فالطبخ.. بقا كيخمم جبد ݣارو كيكمي فالدار ويدور فيها طل من البالكو كتبان ليه طموبيل ديال يوسف كاينة اذا هو هنا قندش كيدور عينيه!! صونا عليه مجاوبوش حط التيليفون مموالفش كيتلسق على بنادم ولكن بغا يشوفها.. تفكر بلان دوك الطلبة للي صيفط للي يعطيهم جوج سقلات ولكن بعيد على بنادم باش يحرمو يدورو بشي طالبة او بالخصوص يدورو بيها..
رجع البالكو كيطل قنط واخا نهار كامل مع الناس رجع تيليفونو صونا كان يوسف جاوبو)
فين
يوسف: انا لفوق واش نتا فدارك
اورطيغا: اممم
يوسف: انا شوية ونطلع عندك لسطح نكملو هضرتنا على قبيلة حيت بالي معجبكش الحال
اورطيغا: لاا مكاين والو
يوسف: صافي انا منين نكون طالع نصوني عليك (قالتلو خديجة ملاك تماك حرك راسو باه غيعلمها تهبط وعاد هوما يطلعو) ياله تهلا
اورطيغا: (قطع مباشرة مشا لبس جاكيط ديالو بغا يطلع وهو يحبس كيتسائل شنو كيدير!!! وعلاش غيطلع منين عارفها تماك وبوحدها!!!
رجع البالكو واقف وكيشغل تفكيرو بمطاارق اخرين عندو فالراس باش ميطلعش شتا بدات كطييح باينة غتهرب من سطح.. حتى صونا عليه يوسف)
فين
يوسف: اجي طلع عندي شتا بدات تطيح برا
اورطيغا: هبط نتا خلي لبنات ياخدو راحتهم
يوسف: هوما للي قالولي يطلع متبقاش بووحدك طلع طلع عندنا
اورطيغا: (بقا ساكت) واخ (طلع عندهم حلو لباب هو جلسو كيسمعو صوت الرعد مجهد وهي تخرج ملاك من لبيت كدور عينها بحال مجري عليها شي واحد)
ملاك: (مكانتش بغات تخرج واخا باغية تشوفو ولكن صوت الرعد خلاها تهرب واكترية كتخاف منو) نااري سمعتو؟!
يوسف: ههه بسم الله عليك
ملاك: الرعد، (شافت فاورطيغا للي كيدير فيها دوك الشوفات مكتقدرش تقاومهم اكترية فاش كيطول الشوفة فيها) حم فينها خديجة؟!
يوسف: فالكوزيينة (مشات عندها ضارت لقاتو مزال متبع ليها العين كانت فدخل فالحيط غير ردات البال...
ضار عندو) قبيلة تقلقتي من شريف؟! منين جبد حس..
اورطيغا: ماشي بلاصة هاد الهضرة
يوسف: هو كان غير تيظحك نتا عارفو معينوش فشي زواج دابا راه ياله تيتوݣض من داكشي للي وقعلو
اورطيغا: انا متقلقت موالو غير جابتها الهضرة وانا كنت ديجا معصب وصافي جا فطريق وصافي، مهم ياله نهبطو عندي للدار خلي لبنات ياخدو راحتهم
يوسف: زعما نكونو صدعناهم راه حنا دابا كولنا عائلة وحدة
اورطيغا: وااا شحال الساعة، بنادم باغي يرتاح يجلسو على خاطرهم مجااتش جوج عزارة يجلسو معاهم فهاد الوقت بالظبط فهمتي يبغيوك غير يطلقو شعورهم يلبسو بيجامات على خاطرهم
يوسف: عندك الصح.. (وقفو) خدييجة (خرجو لبنات) ياله تصبحو على خير انا غنمشي
اورطيغا: تصبحو على خير
خديجة: تصبح على خير اخويا (مشات عند يوسف باش توادع معاه)
يوسف: حتى لغدا نجي بكري شوية باش نمشيو اورطيغا عارضنا على شي طنجية
اورطيغا: اهاااه مرحباااا
يوسف: نمشيو لداري (غمز خديجة) دارنا
اورطيغا: اهااه (شاف فملاك للي غير كتصنت للرعد وباينة مخلوعة) مالكي البنت؟!
ملاك: واالو
اورطيغا: سيري قراي شوية ديال الدعاء وتكمشي فبلاصتك
ملاك: (غير كتشوف فيه هي عارفة الدعاء ولكن راه فوبيا)
اورطيغا: اجي نقرا عليك شوية باش يزول الخوف
ملاك: ها هاها
اورطيغا: (حرك راسو بلا حولة وهبط عاد تبعو يوسف للي جلس معاه شي 10 دقايق ومشا فحاالو..)
ادم: (كيخمم هو وباه وكان حتى سعد معاهم فالجلسة للي دايرين) اخر واحد وقع بينك وبين شي حاجة
اب ليلى: اولدي راه قلت ليك معندي عداوة حتى مع شي واحد
سعد: كنتي قلتيلي داك الشمكار ديال اورطيغا تيدور بنتك
اب ليلى: (تفكر هو للي عطاه سلخة ولكن ميمكنش هو!! ميمكنش تكون عندو هاد الجرأة ويدير هادشي!! مبيناش فيه نهائيا داكشي باش عقلو متقبلهاش) ميقدرش
ادم: مع ليلى!! (شاف فسعد) خوك زعما؟!
سعد: ماشي خويا هدااك غير ولد مرات الواليد ولا لقاوه مهم معندوو أصل
ادم: (شاف فباه بكل هدووووء) مالو؟!
اب ليلى: ماشي هو وأصلا داك نهار فلت من الموت غير بشوية
ادم: (كيعاود هضرتو بحال كيفكر) فلت من الموت؟! علاش شنو وقع؟!
اب ليلى: تبسل على ختك وكلاها فصحتو
ادم: (شاف فسعد) زعما يديرها؟!
سعد: هو اصلا شمكار ولكن باك قال مشافوش داك نهار فالمطار وبالصح خوااف ميقدرش
ادم: كفاش ضربتيه حتى الموت؟!
اب ليلى: خلينا من هاد الهضرة دابا شنو دار المحامي انا ممستاعدش ندخل الحبس على شي حاجة مديرهااش
ادم: والوراق للي غيمشيو ليك؟!
اب ليلى: يمشيو مهم الحبس مندخلووش انا عندي رزقي هنا نعيش بيه مخير الحمد لله
ادم: (هاااادئ) الا كان هدا قرارك صافي ولكن خاص تناقش مع ماما اما حتى ليلى تنظن غتبغي ترجع
اب ليلى: غدا وغنهضر معاهم ونتا؟!!
ادم: انا نشوف مع الخدمة عطاوني 6 شهور نجرب هنا، وانا من بعد غنشوف شنو يسلكني... غير هو الا كنتو غتجلسو معناتها حتى ليلى خاصها تجلس
اب ليلى: يكون خير...
~~~~~~~~~~~~~
ملاك: (فخدمتها كتفكر غير فاورطيغا واش غتكون شي حاجة بيناتهم ولكن مبادئها والشروط والمواصفات للي كانت باغية!!! وعاد يمكن هادشي كتحسو غير هي راه شافت فينما كان شي جنس لطيف كيتعامل معاه مزيان وحتى غيثة كيتعامل معاها مزيان تلفاات يمكن غير كيتهيئ ليها واخا هي حاسة بيه باغي يهضر معاها وعاد كاين اهتمام.. كملت الخدمة وخرجت كتصدم فللي واقف فلباب)
شنو كدير نتا هنا؟!!
حمزة: شنو كان خاص ندير من شحال هادي (شدها من ذراعها وتنترت) خاص نهضرو املاك ومديرة النقط على الحرووف
ملاك: فاش غنهضرو؟!
حمزة: نتي عارفة فاش؟!
ملاك: معرفتش فكرني
حمزة: فينا انا وياك
ملاك: شنو بيناتنا انا وياك اخويا؟!
حمزة: انا ماشي خوك
ملاك: اه نتا غير ولد الجيران (بغات تدوز ووقف عليها) بعد من طريقي احمزة
حمزة: لا
ملاك: سير فحاالك هادي راه بلاصة خدمتي ماشي بلاصة تفليا وتخربيق ديالك انا كنشوف هاد الوقفة غير تبرهيش منك
حمزة: (كيحاول يترجاها بعينيه وهي مكتشوفش فيه) ملاك عفاااك
ملاك: واحاااايد الخ** (مشات من الجنب ووقفات فطريق كتسنى تاكسي جا يشدها وهي دفعو) واش حمار!! شكون نتا باش كل مرة باغي تشدني؟!!!!