فوسط قاعة كبييرة فالمحكمة الابتدائية دالرباط وفديك القاعة الواااسعة كانت واقفة الوسط بكل ثقة وعينيها مصوبين مباشرة لعنين القاضي وبصوتها لي رزيين كادوي ودافع بكل ماعندها بواحد الثقة لايعلى عليها لدرجة خلات كاع الحضور يحلو فمهم فيها وحتى الطرف المنافس ماقدرش حتى يعتارض سالات كلامها وبقات كتتشوف فالقاضي لي دار كايستاشر مع لي حداه وكايهضرو فالودنين سالا وضرب بالمطرقة 2 مرات ودار قال : دفاع الضنين عندك ماضيف
المحامي المنافس : لا سيدي القاضي
القاضي: دفاع الضحية عندك ماضيفي؟
هي: لا سيدي القاضي لي عندي قلتوو ونترقب منك واسع النظر
سكت القاضي لعدة ثواني ونطق بعد ماضرب المطرقة
القاضي: مداولة
بعد مرور ساعتين خارج قاعة المحاكمة
الضحية: أستاذة شنو وقع
هي: 10 سنوات نافذة مع غرامة مالية بقيمة 3 مليون درهم للضحية تبعا للحالة النفسية والجسدية لي وصلات ليها انتهت المحاكمة وهادشي لي قال القاضي هههه
طارت بالفرحة وبدات كضحك اما عاودات ليها شنو طرا: المحامي كيحاول يقنع القاضي ولكن بلا فايدة ماتخافيش هه الضحية ضحكات وعنقاتها وقالت: شكرا شكرا بزاااف الالة المحامية بلا بيك ماكنتش غانعرف شنو ندير (زيرات عليها وطاحو 2 دمعات من عويناتها الكوحل ) فينما كنت كانمشي لعند شي محامي كايرفض قضيتي ومكايبغيوش يوقفو معايا ولكن نتي الله يجازيك بالخير عمري نسا خيرك
هي: لا استغفرالله اش كتقولي الحمدلله بعدا قدرنا نرجعو ليك ولو شوية من حقك المهم انا معطلة خاص نمشي ردي البال لراسك وكوني قوية نتي تستاهلي تعيشي عيشة زوينة
تسالمات معاها وجات خارجة ولكن وقفها واحد الصوت
المحامي: انسة شوق العلوي
السملالي: كايحساب ليك صافي غلبتيني انرفع دعوة استئناف وغانقضي عليك غاتسناي غاندمك
شوق: اووه سي السملالي واش محامي قدك حشومة يكون مكلخ ويشد قضية عقييمة
السملالي لي كان رجل فالاربعينات من عمرو وعندو شي شعيرات قلال شاييبين تعصب وعروقو بانوو: جيتيني مراة اما كون ندمتك
شوق: كون كنتي راجل كون خفت منك (ابتسامات ليه باستفزاز ومشات)
ركبات فسيارتها لي كانت من نوع ميرسيديس القديمة وبقات غادة وهي فرحانة وعلاش لا وهي من شحاال وهي كتحلم وتعبات قرات وبذلات جهد كبير تاوصلات للي هي فيه دابا ومازال كاتشوف بلي خاصها تخدم ولكن فرحانة بالنتيجة لي دارت لحد الان هادي القضية 3 لي كاتشد وحتى هي ربحاتها
هادي هي البطلة ديالنا شوق العلوي 25 سنة فتاة عندها طاقة وحيوية ونشاط ضحوكية ومحبوبة عند الكل ورغم انها ماشي من شي عائلة لي غنية فالبلاد الا انها تقاتلات باش توصل وهاهي دابا شوية بشوية كتحقق احلامها ....
وصلات للدار وبدات كاتنادي على اعز شخص عندها فالكون الشخص الوحيد لي كتقدر تشارك معاه لحظاتها وفرحتها بلاما تخاف
شوق : ماما الحنيينة وااا الواليييدة
ماماه: بنت على سلامتك كي دازت المحاكمة
شوق حنات راسها التحت وصطانعات الحزن: حاولت اماما ولكن
ماماها لي قربات عندها ورتبات على كتفها ودوات بصوت حنين : ماشي مشكل احبيبتي خيرها فغيرها غاماتقلقيش مامكتابش
شوق: مكتاب اماما مكتاب واابنتك ربحااات القضية
غوتات الام وضحكات هزات يدي بقات كضربها : طيرتيها مني خلعة يالمزغووبة زييدي تغداي زييدي الله يعطيك السم
شوق عنقات ماماها من اللور وهي كضحك وقالت: وااانبع الحنان غاكنضحك معاك شتي نتي هي الكل فالكل كانحبك انا اااح اري بوسة
الام : زيدي وكان زيدي ياهاد الهبيلة لي عطاني الله اه فكرتيني ليلى جات سولات فيك وقالت بلي توحشاتك دوزي عندها ملي تسالي ونتي داك الطيلي عندك ماصالح لوالو ....
شوق: اااه سولات فيا صافي دابا نهضر معاها اماما عارفاني فاش كانكون فشي محاكمة مستحيل نجاوب
ماما: واخا ابنتي الله يرضي عليك وازيدي بعدا تغداي
شوق باست ليها يديها : هااح الله يخليك ليا انبع الحنان راه تهنيينا من ديك بنتك كانت مشاركاني فيك الله بقيتي ليا بووحدي احوبي
الام نجاة: ههههه الله يعطيك شي عقل ياهاد البنت حشومة مادويش على ختك هاكا ..
وهاكا دوزات بطلتنا نهارها مع ماماها فالدار وهنا اجييو معايا افتياتش نوصف ليكم بطلتنا حمقة بمعنى الكلمة مكاتسوقش وشخصيتها قوية ونشييطة ومحبوبة عند الكل بعفويتها ولكن واش هادي هي شخصيتها الحقيقة نعرفو من بعد ..
شوق : هاااح عليا شكرا شكرا بلاما تصفقوا
فبلاصة اخرى
كان جالس فكرسي فبيت مظلم شاد سلاح بين يديه كيفككو ويعاود يجمعو وفنفس الوقت كايهضر ابيل
....: كولشي مزيان دابا متخافش نتا غاكمل وحنا معاك
......: نخاف (ضحك باستهزاء وتكلم بنبرة رجولية كدل على قوة مولاها) هوما لي خاص يخافو ونتا كتعرفني مزيان ايلا قلت الحاجة تقضات يعني تقضات
.....: واخا صافي خلينا من الخدمة دابا وقول ليا الواليدة كي بقات
......(تنهد من قلبو هاز على كتافو جبال دالهموم لي معارفش ايمتى غايسالييو): الحمدلله دابا شوية ان شاء الله غاتولي بيخير مهم نتا تهلا فراسك ومتخممش
.....: كيان عفاك رد البال لراسك وللعائلة راه نتا لي عندهم دابا وحياتك مهمة بزاف متبقاش تعرض راسك للخطر
كيان(بصوت كيزعزع الجبال):صافي فهمنا فهمنا مهم شدرتي قلبتي على شي محامي يفك علينا هاد القضية نتا عارف مابغيتش العائلة تعرف داكشي علاش موكلتش بيها المنصوري احسن حاجة يكون شي محامي جديد ويكون متمرس وعمرو خسر شي قضية مافيا مايتدخل بيدي وراك عارف العواقب
.......: (بلع ريقو عاد كمل)اه انا كنقلب ولقيت 3 دالمحاميين صاعدين وكلهم محترفين انسيفط ليك المعلومات ونتا ختار لي غايجيك مناسب احم ياله نخليك خاصني نمشي تهلا
كيان: تهلا العود
ناض وقف وبانت بنيتو الضخمة وجسمو الرياضي بامتياز عينيه حادين وملاميحوو كثر كاتوحي على رجل شرقي بامتياز كيخلق الرعب غير بنظرة منو كلمتو مكاتعاودش 2 مرات ماعندوش مع قوة الهضرة وجاد لابعد الحدود وهادشي ناتج على ماضيه المظلم لي كيكرهوو وكيكره يتفكرو وصل لهاد المرتبة من بعد بزاااف وبزاااف ديال التعب والاجتهاد ...
دازت سيمانة على ابطالنا كان فيها كولشي روتيني بحاال ديما الخدمة الدار الدار للخدمة مكاينش جديد ولكن اليوم غيير اليوم ماشي بحال كاع الايام اليوم بالضبط ابطالنا غايتلاقاوو وغايشوفو بعضياتهم ولكن كيفاش غايكون لقائهم ؟ وعلاش ابطالنا غايتلاقاو وهوما فمجالات مختالفة وبعيدة كل البعد على شخصية كل واحد فيهم
عند شوق لي كانت فالمكتب كاتخدم على شي وراق ومنغامسة فيه وحداها كاس ديال القهوة ديالها بحال ديما متقدرش تخدم بلا بيها حتى كايصوني الفيكس لي حداها
شوق: نعام انرجس ؟
نرجس: انسة شوق عندك موعد دابا مع السيد لي عندو ديك الدعوة دالاسهم
شوق: ااه نسييت . معاش بالضبط؟
نرجس: مع 12 انسة وخاصك تمشي دابا باش متعطليش على الموكل ديالك
شوق(شافت فالساعة ديالها لقاتها 11:15 دقيقة) اه بصح شكرا بزاف انرجس انا غانخرج دابا
ناضت كتجري حتى قربات تعكل وهي توقف قدام باب المكتب ديالها شوية وهي ترجع كتجري للداخل هزات سوارت الطموبيل لي كانت نساتهم ورجعات خرجت
شوق: ويييليي وييليي ديما نفس الحاجة هاد المرة نساي راسك
كانت كتهضر مع راسها بحال شي حمقة لي كايشوفيها كيقول الله يستر هادي وحدة من عاداتها الكثيرة البطلة راه مجنونة مزاال تشوفو
وصلات للبلاصة المعلومة كانت كافي وفنفس الوقت ريسطو راااقي بزاف وزويين بدات كتدور عينيها شوية كتفكر بلي مكتعرفش الشخص لي غاتلاقاه ومعارفاش تا سميتو ضربات راسها بيديها وهي غادا كتهضر تاني مع راسها حتى..
شوق: عوتاني عوتاني مالكي على هاد الكلاااا...
تزدحات مع حيط اه اوبس كنقصد صدر فولاذي واسع هزات راسها ياله بغات تسب وهي تسكت وبقات كتقول فالداخل (الله واقيلة انا فالجنة الحمدلله ياسيدي ربي واش هذا هو حور العين) وهي مغييبة كتشوف فيه كيف البهلة نطق هو بصوتوو الجوهري وقال: سمحي ليا ا مدام ماشفتكش
شوق لي عاد فاقت من القلبة: اه لا اه زعما انا ماشي مدام انسة انسة اخويا
رفع الطرف لاخر حجبانوو ومشا بلاما يجاوبها
فبلاصة اخررى.....
.......: واش نتا مكاتنفع لوااالو لاش مخدمك انا لاااش كنخلصك؟
......: س سيدي سمح ليا ولكن راه هو هو فينما كانديرو شي خطة كايتخطاها دغيا اسيدي ولكن ماتخافش انا ا (بدا كيتفتف) غان نعاود نشوف شي خطة اخرا وهاد المرة انقتلوه كاع (ضحك) اه اه ا
قاطعو الشخص لاخر: الحمااار اش غاتقتل واش مكاتعرفش كيان زنيبر واخا يوقف عليه ملك الموت غايرجعوو منين جا انا بغيتو يتدمر ماتبقا عندو حتى حاجة (وشاف لبعييبد بحقد) حتى عائلتو حتى حوايجو لي فوق ضهروو بغيت يبقى يدور فالزنقة عريان بلا حتى حاجة (غوت بجهد) واااااش سمعتييينييي
......: اه اه اسيدي مايكون غا خاطرك غانساليو معاه فاقرب وقت كون هاني
ضحك الطرف الثاني : هكااك يالاه تحرك عليا من هنا
مشا لاخر كايجري بلاما يتلفت وراه
خرج وهو يدير اتصااال
....: الو اه اه عندك الحق ولكن ضروري نلقاو شي حل راه من قبيلة وهو كايغوت عليا الزا** لاخر شبعني هضرة
.....:ولكن. نتا عارف مزيان بلي كنلعبو بالعافية كيان زنييبر غير كايسمع شي حد سميتو كايبدا يترعد كيفاش غاتلقى لي يعاونك
....: مالك اصاحبي خواف ضروري نلقاو شي حد من اعداؤو لا ؟
......:(ضحك بجهد حتى لاخر قال مال هذا واش حماق وهو ينطق) من نيتك زنيبر الصغير حتى اعداؤو كايخافو منو اسي الكوبرا ياكما يحساب ليك بحال كيما درتو لباه غاديرو ليه لا لا لا هذا حاجة اخرى هذا راه حتى الارض فاش كيتمشى عليها كاتشدها البولة
الكوبرا: ك ك كيفاش ههه كيفاش باه نتا اش كتخربق؟ ا رايس
رايس: واش كنبان ليك عندي الودنين راني عارف اش كاين كولنا فنفس الباطو بلاما تبقى تفتف عليا المهم خلي ليا شوية دالوقت وقول لداك الكلب لي مخدمك يصبر ولا يضبر لك.رو فداكشي لي غايدير هادشي راه كايتخدم بالعقل وغابشوية حنا راه كنهضرو على كيان زنيبر اكبر مافيوزي فالمغرب وعندو علاقات وطيدة مع روسيا والطاليان
نرجعو عند موصيبتنا
شوق: يخ على انسان كي داير (سكتات شوية) ولكن بوكووص ههه. هااء ويييلي وييلي الموكل نسييييتو اووف كيفاش غنعرفوا وانا سميتو هي اللخرة ماقريتهاااش تفو تفو كنبغي بعض المرات نهز راسي وندفل عليا ونخلي الدفلة تهبط (هزات طيلي ديالها عيطات لنرجس باش تسيفط ليها تصويرتو والمعلومات عليه وهنا فين كانت الصدمة) ويلي والله تاهو ويييلي صدق ولد زنيبر ويلييي ويييلي ولكن سميتو واااعرة احم احم نمشيو نشوفو شغلنا (بدات كدوي مع راسها تاني) شوق ركزي فالخدمة ركزي فالخدمة سمعتي؟ ياااس الخدمة
تمشات شوية الداخل كتقلب عليه حتى لمحاتو شاد قنت vip بعييد على البشر وجالس بواحد الهبة والتخنزييرة لي راسم على وجهو باين فيه محاملش يتسنى ضحكات شوية وقالت تخليه يزيد يتسنى شوية على التكبر لي فيه نيييت بتااسمات بشر بدات كتخربق فطيلي ديالها تادازت شي 5 دقايق عاد مشات عندو وقفات عليه كي ملك الموت
شوق: موسيو زنيبر ؟
نطق بلاما يعلي عينيه وهو زافر النفس بغضب: على سلامتنا كون غا... وسكت بصدمة نتي؟؟
شوق: اه انا كي جيتك مهم سمح ليا ماعرفتكش وبقيت كنقلب بزز باش لقيت سيادتكم حيت شاد هاد القنت واش مالقيتي فين تجلس؟
كيان شاف فالسما بقلة صبر غمض عينيه وحلها كيحاول يهدن اعصابو : فيك بزاف دالهضرة ا انسة ممكن ندخلو فصلب الموضوع ؟ نتي واش هي السكريتيرة دالمحامية؟؟
شوق شافت فيه بصدمة وتصنعات الدموع ؛ واش كتبان فيا سيكخيطيغ حشومة عليك اسي جنيبر احم انا هي المحامية شوق العلوي بشحمها ولحمها وجمالها (وهزات حجبانها زعما اه)
كيان بنفاذ صبر متغاضي علي ديك الكنية لي عندها قرون وجات ف2 دقايق وخوراتها : وا انسة الزعتر خلينا ندخلو دغيا فالموضوع راني ماعنديش الوقت
شوق حسات بيه تعصب وهي تنطق: اوك اوك ولكن ممكن نسولك
غمض عينيه قرب ياكل جنابو بالفقصة لي فقصاتو
شوق قربات منو بهمس ونطقات وهي مصغرة عينيها: واش نتا من عائلة زنيبر نيت لي كنعرفو؟ (ودارت حركة بيديها كتعني الشراب 🍾) ولا غاتشابه فالالقاب
هنا صااافي قداتهم ليييه اول مرة فحياتو يشوف شي انسانة مقطعة تال هاد الدرجة تخلطات عليه الضحكة والفقصة والاعصاب فنفس الوقت عض على حنكو من الداخل ونطق بصوت قاصح : انسة واش غانخدمو ولا نمشي نقلب على شي محامي اخر حسن ليا ؟؟
شوق: نخدمو نخدمو واخا مجاوبتينيش المهم عاود ليا على القضية من الاول باش نفهم
كيان تكى على الكرسي وقال: علاش ماقريتيش الدوسي؟
شوق: لا قريتو ولكن خاص نسمع من الاطراف الدوسي بوحدو مكافيش اموسيو
كيان: واخا وبدا كيعاود ليها وكيتناقشو حول القضية ولي صدمو انها ذكية ودغيا كتلقى الأجوبة والخرجات وهو لي حساب لي فيها غا كثرة الهضرة
(اودي ماشفتي والو اوليدي يا كيان غا تسنى )
بقاو عاقلين على هاد البارت ولي قبل مزيان البنات عندو دور كبير ()
من بعد ما دازت مدة وهو كايشرح ليها وكايعطيها المعلومات على القضية
شوق : صافي فهمت اموسيو زنيير
كيان(لي كان الوقت كولو وهو كيشوف فيها كيفاش كتهضر وكيفاش كتشرح ليه سها فيها للحظة ولكن دغيا فيق راسو): مزيان امتى غاترفعي الدعوة؟
شوق: احم وبما انه انا الخبيرة هنا ونظرا لانني امراة كتمتاز بالاخلاق والجمال شتك ماطلبتي ليا والو (ورجعات شعرها لور بتكبر رافعة حجبانها كتراقصهم)
كيان لي طلعها وهبطها وهو ينطق: واهو فيك كولشي صراحة الا الاخلاق والجمال ( ظهرات عليه ضحكة جانبية بينما هي جمعات تبسيمتها ) ولكن طلبي شي حاجة على حسابي هانا مشيت تاتعلميني بموعد العمليات
حط 200 درهم فالطبلة ياله كان غادي وهي تشدو من يديه وهي غافلة على التصلب ديالها وعروقو لي بانو زير على يديه لاخرة وحنحن كينظف حلقو هز حاجبو بمعنى شنو من بعد ما بعد يديه من بين يديها
شوق لي شيرات ليه بيديها زعما قرب مابغاش فالاول ولكن اصرات عليه فوكل امرو لله وقرب لعندها شويية وهي بلا حشمة زاد قرباتو لعندها بعفوية وهمسات ليه : واش نت من المافيا؟؟
هنا صااافي سالاات معاه بلع ريقو وتزير ياله غايجاوبها وهي تكمل : حيت شخصيتك بحال رجال المافيا بارد وغامض وزايدها بالقميع كون كانت المافيا فالمغرب كنت غانرشحك كاول مافيوزي (وضحكات ببلاهة )
كيان لي قرب يتفركع ودوى بصوت كفحيح الافعى وهوما مزال على نفس الوضعية: اه تماما نقدر نشدك ونقطعك طراف طراف وف2 ثواني غاتكون الجثة دياالك تمحات من الكرة الارضية وخصوصا راك خليتيني كنتسنا ودايرة فيها زعما ماشفتينيش (وغمزها زعما راك فاهمة)
قال هاد الهضرة وبعد كايتسنا منها تخلع ولا تبكي هي فعالم موازي
شوق (وسعات عينيها وحلات فمها كضحك وتصفق بيديها)اووه اوووه بحاال المافيا الايطالية ياك لا لا الروسية كانسمع عليها حسن كاع
كيان بقا كيشووف فيها بتعابير ممحية من بعد دار ومشا بحالو وغي عطاها بالضهر بانت ابتسامة مخفية على محياه
شوق: اووه خلعني بزااف(سكتات وعضات على لسانها ) ولكن مااالو على هاد الزيين كولو
عندو هو لي ركب فطموبيلتو بقا واقف ماتحركش وجه عينيه للمرايا وهو يبتسم بهوس ونطق بنبرة غامضة : مابقااا والو قريييب.......
ضحك بخفة وديمارا بجهد مبعد من تما من مورا ماسيفط ميساج (من بعد وغاتفهمو اه البنات هاد البارت بالضبط عندو دور فالقصة عقلووو عليه مزيان)
وصل للوجهة لي بغا كان قدام واحد ااااش غانقول ليكم دار لا لا فيلا فين تبان الفيلا قصر؟ لا هادي را قلعة كان باب كبيييير بزاااف من الحديد فالذهبي وفيه بحال شكل الخناجر فالحدود ديالو.
موراه 2 رجال طوال وعراض غير تعرفو على الطموبيل حلو الباب كامل وحناو راسهم احتراما ليه اومأ ليهم براسو ودخل حتاال الداخل كانت جردة كبيرة فيها اشجار عاليين و فالجناب ورد بالاشكال والالوان وفكل قنت فديك الحديقة كاينة فاكهة مزروعة بدقة كاتشهيك دار على واحد النافورة ودخل الداخل فين كانو 9 دالسيارات فاخرة من الطراز الأول اششمنك يا g classe اشمنك يا رولز رويس وبورش وزيد وزيد هبط من بعد ما حل ليه الحارس الخاص وحنا ليه راسو وهزو فاش نطق كيان
كيان: شكون جا؟ (وهو كايدور عينيه على السيارات لي تما )
الحارس: العائلة كلها مجموعة اسيدي وكاين حتى سي برادة وعائلتو
كيان لي رفع حجبانو بتساؤل : وايلي اش جاو يدرو هناا ؟
الحارس: ماعرفتش اسيدي
كيان: واخا سير
دخل للدار مورا ما حلات ليه الخدامة وبدا كيسمع صوت الهضرة كتيرة بقى تابعها حتى وصل للصالون الكبيير لي كان اقل مايقال عنه انه روعة بفراشو التقليدي وديكورو كان كبير بزاف يجري فيه الخيل دور عينيه مزيان وعرف كاع لي تما أما الحضور وحتى عائلتو غير شافوه كلهم سكتو ووجهو نزراتهم الا شخص واحد لي ناض كيجري وهو فرحان
الام صوفيا : ولدي حبيبي جييتي
كيان تحنا باس لمو يديها وراسها وهو مبتاسم: عيوني لباس عليك
الام: ملي شفتك اولدي عاد وليت حسن واخييرا جيتي توحشتك اكبيدتي
كيان: حتى انا الميمة تا انا توحشتك
الام شافت فيه بحنية ونطقات بتدارك: اه حبيبي هادو عائلة برادة جاو يخطبو بنت عمك شهد لولدهم صفوان دخل متبقاش واقف.....
هادو عائلة برادة جاو يخطبو بنت عمك شهد لولدهم صفوان دخل متبقاش واقف.....
هو حتى بغا يدور يطلع لبيتو يرتاح كايقوليه واحد العقل دخل سوق راسك ولكن من ناحية اخرى تفكر واحد الذكرى خلاتو يرجع ادراجو ويدخل مع مو للصالون فالاخير كتبقى بنت عمو وبحال ختو الصغيرة
كيان: السلام عليكم
الكل رد عليه السلام من غير واحد لي غير شافو شداتو الرعدة وبلع ريقو حيت عاارف اش تابعو من مور هاد الجلسة مكانش متوقعو غايجي حيت علاما كيسمع بلي كيان زنيبر ماعندوش مع الاجتماعات العائلية ولكن هادشي لي طرا دابا من سوء حظو وهانتوما غاتعرفو علاش ......
توجه كيان نيشان عند جدو باس ليه يديه وجلس حداه فالبلاصة لي من المفروض تكون ديال باه الله يرحمو . واومأ لعمامو باحترام وبدون سابق انذار وجه شوفاتو للمعني بالامر ولي هو صفوان برادة
لي هاد الاخير شد فيد مو بدون وعي منو وهادشي لي كان داز على عنين الجد وكيان لي دار ابتسامة جانبية ونطق بكل استهزاء
كيان: ايوا اسي صفوان سمعت بلي جيتي تخطب بنت عمي
نقزات مامات صفوان وجاوبات فبلاصتو : اه اولدي ولكن حنا هضرتنا مع كبار العائلة
شاف فيها كيان بقسوة وعاود رد عليها: انا هنا هو الكل فالكل فهاد العائلة واصلا كنهضر مع الرجال طلقي يد الرويجل ديالك وخليه يجاوبني كي الناس
شافت ام صفوان فراجلها لي ماقد يقول والو وعاودات شافت فجد كيان وقالت بعصبية : اس هادسي اسي عبدالجبار حنا مازيناس هنا باس نتهانو ئدامك ولدي سيد الرجال مغاتئول والو؟(اللهجة المكناسية راكم عارفين ههه)
حمحم الجد عبدالجبار وقال بصوتو الرزين لي كيدل على كبر سنو: الشوار لكيان والهدرة الاولى واللخرة ديال حفيدي
كيان بصوتو الجوهري القوي: مابقا زواج ماعندنا بنت نعطيوها ليكم
كاع انظار عائلة زنيبر توجهات للجد ومنها توجهات لكيان بحقد وغل
ناضت لالة عائشة (ام صفوان) ونطقات: ايوا مابئا لينا لا نسوبية لا والو السيبة هادي اس هاد ئلة الترابي والاحترام قاطعها صوت ولدها صفوان لي جرها من يديها بالشوية: ولكن اماما انا
عاودات قاطعاتو : سكت يسكت لك الحس هاي هاي كاتراض معايا زييد ئودامي لا نتا لا باك ماتنفع ماضر كتسوف كيفاس هانوك وئالو عليك ماسيي راجل وبائي باغي تجلس (شافت فراجلها) سيدي عبدالبائي ياله فحالنا ناضو كلهم وخرجو كيتعترو فجلايلهم وصفوان كايتلفت يشوف فشهد لي كان باين من عينيها الحزن على القرار لي خدات عائلتها بدون ماتشاورها
من بعد مامشات عائلة برادة فحالهم
نطق الاخ الكبير لشهد ولي كان سميتو شاغر : كيان ماعندكش الحق تقرر فحياة ختي الشخصية هي كتبغيه وموافقة عليه
كيان طلعو وهبطو وبقا ساكت ماقال والو
شاغر لي لاحظ كيفاش شافيه وهو ينطق بعصبية: بابا جدي مالكم ساكتين مغاتقولو والو شكون هو فملك الله ؟؟
قبل ينطق الجد ناضت شهد ودموعها فعينيها وقبل ماطلع لبيتها شافت فكيان شوفة لوم وعتاب غمض هاد الاخير عينيه ها لي مابغاش مكانش خاص يتدخل ولي بغا يموت يموت ولكن لي عطا الله عطاه خاص يصلح الوضع ويشرح لبنت عمو علاش رفض اما حتى شاغر ماشي شغلو فيه كايعرفو عزيز عليه يتعاند معاه وديما كيوقف ضد القرارات ديالو فمبقاش كايديها فيه
كان كولشي ساكت كايتسنا رد من كيان ولا من الجد ولكن لي هدر هاد المرة هو الام ديال شهد: حشومة عليك اولدي كيان ماشفتيش دابا كي بكيتي بنت عمك راها بحال ختك زعما علاش وقفتي ليها فرزقها؟ صوفيا دوي مع ولدك اختي
كيان: سمعي امرات عمي هداك ماشي رزق هداك غانص رويجل تابع مو من اللور غايولي فاش يبغي ي. (عاق على راس وعض على لسانو من الداخل وهو يسكت ) احم سمعي امرات عمي انا ماشي سوقي هداك غايولي راجلها ولكن حيت شهد بنت عمي وعزيزة عليا مابغيتهاش تعاني وتيقيني مايغروكش المظاهر ديال عائلة برادة لي كتبان مثالية فالاخبار والقنوات راهم عائلة عامرة عقد وعامرة شيكي وعياقة غايمرضو ليك بنتك فصحتها وغايخرجو عليها واول واحد مغايعطلش بنتك هو ديك لالاهم عائشة حيت ولدها مكايتسنط لحد من غير موو غايولي ايلا غطا شهد غايوصلها لمو كانضن هضرت بزاف وشرحت ليكم وبررا فوق القياس وماشي من عادتي هادشي كنعرف ملي نقرر هضرتي متعاودش 2 مرات (طلع عينيه فشاغر لي كان ماراضيش على كيفاش كيان كيتحكم فالعائلة كاملة)ودابا ديرو لي بغيتو سيري هزي بنتك ولوحيها لداك الرويجل دمو
سالا هضرتو وناض غادي فحالو حتى خرجات مو كتجري موراهx
Tags:
قصة تحت وهم العدالة