.formatted-text { text-align: center; font-weight: bold; white-space: pre-wrap; margin: 20px auto; } تتمة البارت const text = `حركات راسها بأه و ردات ، قوت القلب : لآ لأ منكدبش باش مايعلقنيش سيدي ربي من شفيراتي ... دادا ميمونة: مزيان .... يالاه قوليلي فين كنتي و معامن كنتي ؟ سرطات قوت القلب ريقها خايفة لاتمشي داداها تخاصم عليها ولمن وخا هاكاك جاوبات ، قوت القلب: دبا انا ... دبا حنا كنا فسطح كنصبنو وانا بغيت نلعب و و مسيت نلعب يااك . دادا ميمونة: فين مشيتي تلعبي ؟ قوت القلب: فزنان [جنان] لي ورا دار .... دادا ميمونة: اهاه و معامن ؟ قوت القلب: فلول كنت بوحدي يااك مكان معايا حد .... سوية [ شوية ] و زا [جا] واحد الدري كبير سوية ....، دادا ميمونة: اهاه و ملي جا شنو درتو ... فين لعبتو ... ، قوت القلب: مسينا لزنان [ جنان] نوار و زبت [جبت ] ليك نوار و لعبت تماك و زريت[ جريت] و مسينا كلينا و عاودت لعبت تاني و بزاف عاد زيت [ جيت] ، دادا ميمونة: كتعرفي هاد الولد شنو سميتو ...؟ قوت القلب: اه ، اه كنعرفو سميتو الغالي ... إثر نطقها لهاد الإسم تسمعات ضحكة ملغمة من عند خادمات و هي ضور عندهم دادا ميمونة بوجه مكايبشرش ابدا بالخير ، و بدات عليهم بالمعيار غا من المنقي خيارو و هي كتعاير و تعاود الحاصول غدايد شي رداتو فشي و كية لي جات فيه ، دادا ميمونة: تهجروه الفنيانات المسخات ، تهجروه على أيامكم لي بقات ليكم ، تضحكو وضحك راه فيكم ، كون كانت فيكم الفايدة و منكم الكاينة كاعما تغبر نهار كامل و حنت نقلبو عليها و نتوما كتمايعو ليا تما سيرو الله يغصبكم المغصوبات ... باقا كتسب فيهم و قوت القلب وقفات و جات من وراها كتحك طراف صبعانها مع بعضهم و ترقص حجبانها عليهم كتقلي ليهم فالسم و تغذذ فيهم ، تا سمعو العبدة وراهم كتعييط لدادا ميمونة تكلم ، عاد سكتات ، وقفات هازة قوت القلب و مداتها لوحدها من البنات تديها تغسل ليها و تحممها ، عاد مشات مع العبدة ، دادا ميمونة: اجي نتي لمن غنتكلم ؟ العبدة : مرسول مولاي الغالي هو لي جا عندك قاليك سيدي كيتسناك فجناحو بغا يتكلم معاك ... هنا ضارت ليها فراس ، عرفات بلي بنتها مكتكدبش ، و مع سيد الغالي قيلات، ولكن لاش طالبها دبا لعندو ، بقات غادة و المرسول سابقها وسط سطاون القصر كيتمشاو كل سطوان غادي بصف ديال القنادل مضوين طريق للغادي و الجاي مابين كل سطوان و سطوانكاين عبد حارس المكان ، الكبص فسقف و الزليج الفاسي فالحيوط و الرخام الأبيض فالأرض، و دادا ميمونة غادة بوقفه مقادة و ضهر واقف كيتسمع صوت شربيلها و تقرقيب دمالجها ، وقفو قدام الجناح و دقو الباب حتى سمعو مولاي الغالي إذن ليهم يدخلو عاد حلات دادا ميمونة الباب و دخلات ، داخلة كضور عينيها كتقلب عليه تا جاها صوتو من وراها عاد تلفتات ليه بعبايتو واقف و داير يديه وراضهرو فوق كتافو سلهام طويل كحل و مطروز بالصقلي ، الغالي : مرحبا بدادا ميمونة عندي . حدرات دادا ميمونة راسها احتراما لمكانو و شانو ، دادا ميمونة: ترحب بيك جنة و نعايمها امولاي الغالي ... الغالي: ليوم رسلت ليك باش نتكلم معاك فواحد القضية مهمة . حركات ليه دادا ميمونة راسها بالإيجاب كتأكد هضرتو ، دادا ميمونة: خبار الخير اسيدي ، الغالي: منهضروش واقفين [ نعت ليها بيديه على الكليسة لي عندو فشرفة جناحو] نمشيو لشرفة و نهضرو ... سبقها جار سلهامو نخوة و الهيبة كتقطر منو رغم صغر سنو ، و وقف تسناها تا جات حداه و حتة اذن ليها باش تكلس عاد كلسات ، الغالي: تعقلي ادادا ميمونة على العام لي سافرت فيه للبلاد شام ، فليلة لي غنسافر فيها كانت ليلة النص فرمضان ، نفسها ليلة الخدامة لي كانت حاملة و ماتت وهي كتولد الله يرحمها ... عقلتي ياك ... دادا ميمونة: اييه عقلت الله يفكرنا بشهادة و كيفاش نسى اسيدي وهي كبدتها من كبدتي و بنتها ولات بنتي ... هز الغالي حاجبو فيها و حنحن عاد نطق كيعد ليها فلي شافت عينو و لي سمعات ودنه من عند قوت القلب ، الغالي : و هادشي كاع مباين فيها ، البنت حوايجها ماشي قد عمرها على قلة الشراوط ، و ما شادة كاع فصحتها، غير اليوم ادادا ميمونة قيلات غابرة ولا شي حد سول ولا سقسا فيها ، واش عرفتي فين لقيتها؟ ، شافت فيه و حركات راسها ب "لا" حشمانة و مقادراش دوي من بعد هادشي لي قال ولي مزال ناوي يزيد ، الغالي: ايوا ادادا لقيتها دالعة وسط جنان ، فوق شجر مشبطة كون طاحت و تهرسات فين كنتي اتولي و زايدون خليو البنت تلعب اشبكم تزيدها لشي شقا واش هي كد شقا !؟ شقا قدو بيه حتى العيالات صحاحات بقات غير هي لي باقا صغيرة هاهي ولات تهرب باش تلعب [ ضحك مفقوص من هادشي لي كيقول ] ههه مزيان على قلة الخدم و العبيد كتزيدو صبيان لشغل الكبار ، وراني عارفك ادادا ميمونة على يديك كبرت و تربيت ماشي ديالك هادشي ، عضات على قنوفتها ، ويلها سيدها غسلها و نشرها و حطهم ليها فوجهها و بسباب من بسباب لالة البنات زين و التبات ، دوحات راسها و قلبها علمها بلي هاد المحبة ماشي دالله الله، سكتات و قرمات و شنو عندها ماتزيد من غير عندك الحق اسيدي كيما بان ليك امولاي ، مور ماسالا هضرتو و مخلا ما سمع ليها على ودنيها زاد غلغلها على البنات و المعلمة لي كانت شاداهم هاد صبحية ليوم ليلهم قطران و حنظل ايلا ماولاو يهتهتو بقوت القلب ماتسماش هي ميمونة ، هز فيها عينو و نطق ، الغالي: تهلاو فيها راه يتيمة و ما عندها حد و اليتيم وصا عليه الله سبحانه وتعالى عاد زيد عليها بنت القصر ، فحال بنتنا و ايلا بغات شي حاجة وصليها للجناح و عطيها تيساع راه منبغي نسمع بلي شي حاجة قلقاتها و خسرات خاطرها ، راه فيها الأجر [ سكت كيشوف فيها مدة عاد وقف مودعها تمشي فحالها ] نبغي هضرتي تنفد و ماشي دخل من ودن و تخرج من الأخرى ، تصبحي على خير ادادا ميمونة. وقفات تاهي كتقاد قفطانها لي تكمش بالكلسة عاد نطقات حادرة راسها ، دادا ميمونة: تبات فراحة الله اسيدي ، مع ضارت ناوية تمشي وقفها صوته ، الغالي : تسناي نعطيك شي حاجة ، وقفات كتسناه وهو مشا لصندوق كبير حلو و جبد منو صنيديقة صغيورة وقف و مدها ليها و تبسيمة منورة وجهو كيف القمر الا كمل، الغالي : هادي عطيها لقوت القلب و تهلاي فيها ، دادا ميمونة: هي لولة اسيدي من عويناتي ، خليت ليك الراحة ، خداتها من عندو و خرجات من الجناح عاد حلاتها و لمعو عويناتها و هي كتشوف شنو فيهم و يا ما شاء الله شحال زوينين .... كيف القمر لامعين كانو حوالق لويز مذهبين و معاهم قلادة الجوهر الأبيض الحر نازلين منها لويزات ضايرين ، خباتهم و مشات مبسمة ، لجناح الخدم دخلات لبيتها و بانت ليها قوت ناعسة غاسلة و مبدلة ، حدرات لعندها كتشوف فيها و مدات يديها لودنين قوت القلب زوجات طوانك نقرة و حطات طوانك ذهب ، طولات شوفو فيها و فحروف وجهها و تبسمات ، دادا ميمونة: لالة بنتي لالة البنات مولات العقل و التبات ، زينة و كابرة فالخنات و لالة اش بغات، [ باستها من جبينها مستنشقة رويحة دراري صغار لي فيها رويحة من جنة جاية ، ] الذهب كيلبس ذهب مزال تضحك ليد ليام و مزال يزين ليك سعد اقوت قلبي.... باستها مرة وحدة آخرة و مشات تنعس مخلية اللويز فودنيها كيبرق ناشر زينو و ضوءه ، .... نفس اللويز كانت ضاربة فين شمس السما ، مخلياه يضوي و يلمع ، زايد لي لابساه زين على زين و بها على بها ، لالة البنات لي كانت لابساه كبرات و زادت عمرات ، و زينها بان و ولا واضح كبف شمس القايلة ، لابسة قفطان طويل و عليها مرسوم و دايرة شمارها حادرة عينيها على طبسيل البروص لي فيه زنجلان كتنقي و تسوس ، سمعات للغى و هزات عويناتها للفوق ، عوينات ريم و الغزال ، شوفة فيهم وحدها تسلب و تفتن نسا و رجال ، واخدين لونهم من الشجر و التراب و لمعتهم من القمر و الذهب ، و كل عين مكحلة بسرب من شفار طوال ، عيون كتحاكي روح نقية ماشافت ماتشوفات ، شافت شكون هضر و تبسمات تا بانت حفرة زين فطرف خدها ، حروف عربية جميلة ، غير شوفة فيها تنعس و تفاجي، هزات حاجبها و نطقات ب حروف تناغمت مع صوتها كي فحال العود و الناي ، قوت القلب: الله يا دادا الله ما تقول غير رحلتو سوق كامل للقصر ههه، كلسات دادا ميمونة تستاراح من جهد لي جهدات فسوق و مدات ليها قوت القلب من الخابية تشرب ، عاد هضرات ، دادا ميمونة: اييوا لالة الياقوت كتهز غير ما حبات خاطرها ، فصلنا و خيطنا سوق كامل وهي مكاين غير شري شري ... ضحكات قوت القلب وهي حادرة على الخناشي لي جابت داداها كتبحت و تقلب ، قوت القلب: هههه ايوا يا دادا لا عطاك العاطي لا تحرث لا تواطي ، هي لي جات معاها على ماشي هي مرات سيدي الوزير القديم ولالة ام الوزير الجديد بصحتها سيدي ربي لي عطاها ، دادا ميمونة بحنان امومي: ايوا لي عطاها يعطيك الحبيبة ديالي .... تبسمات و رجعات كتجبد و تستف كلشي ، عاد هزات الطبسيل د زنجلان كملاتو بتنقية و دخلات للكشينة تحط ، الكشينة كانت بلاصة كبيرة و عامرة بالعيالات لي فالشقا حارات ، كل وحدة فشغلها ملهية و فشقاها مبلية، مايتسمع غير صوت العواشق و المغارف كيضربو فالطناجر النحاس و الفخار ، و ما تشم غير ريحة الزعفران و القرفة البصلة لي كتشحر و السمن الحار ، شوفة فعينيها ضببات بسباب بخار الماكلة و تفوار ، دازت و حطات طبسيل فوق ميدة كبيرة جات وسط الكشينة و ضارت خارجة ، ما تسمع غير صوت من أنكر الأصوات عندها ماتحمل فيه شعرة ، كينادي عليها بـ " لالة مولاتي الالة مولاتي ، فين غادة سارحة و هاد شغال شكون غايفكهم جنون؟ " غمضات عينيها و حلاتهم كتبرد فراسها ، و ضارت عندها ، كانت مرة ضاربة فزمان ماكبيراش و ما صغيراش ، ولكن باينة فيها سم من عينيها لي غير طالقين شرهم و يعيبو فهادي و ديك ، حروفها غابرة و وجها صفر مسقطر من د م تقول غير تزادت فعام جوع اولا عاضينها الحناش ، ساطت قوت القلب وعلى هضرتها جاوبات ، قوت القلب: اعويشة راه زنجلان لي قلتي لي عليه نقيتو كامل تاتقسم لي ضهر ايوا شخاصك مني عاود ؟ ضحكات عايشة طانزة عليها و جاوبات ، عويشة : ههههه ضحكتييني ، علاه سلو كنديرو فيه غا زنجلان و القوام لأخر شكون يقوم بيه و ينقيه ، ولا حنا منا كلشي باش لالة قوت القلب تكلس و تبند ليا هادا ما واتاك، هانتي عطا الله مايدار ، العوين مع النصارا و لا الكلاس خسارة ، [ شافتها واقفة كتشوف فيها ] ايييوا تحركي واقفة كتشوف فيا تقول عمرك شفتي زيين .... ميقاتها قوت القلب و عوجات فمها ، قاتلك زين منين جاها وهي تقول كتاكل سم ماشي الماكلة ، شمرات كمايم قفطانها و مشات كتكمل شقاها ساكتة مكتجمع مع حد ، داخلة سوق راسها ولكن شكون خلاك نكون درويش و دخل سوق راسك غا غادة و تنكر ليها فوق راسها " مال هادي عوجة " " مالها مامنقياش مزيان" سقمي يديك و طلقي راسك اتباتي تماك" .... صبرات و صبرها تقادة و نفذ ، سكتات حتى عيات و الواحد ما حدك ساكت ليه وهو فوق راسك كيزيد يطلع ، مع آخر جملة نطقات عويشة، هزات قوت القلب صينية عامرة بلوز و ضرباتها مع الأرض بجهد تا سكت كلشي و وقف كيتسنى الفراجة تبدى ، عويشة وسعات فيها عينيها و ندبات ، عويشة : ويلي ويلي على بنت الحرااام شنو عملات ، يعطيك دقة و يعطيك الكرض يا الفنيانة فدوك اليدين ، اشنو درتي واش حماقيتي ولا تقاسيتي فعقلك ؟ قوت القلب بتبسيمة واسعة و مهدنة : شنو درت علاه انا درت انا عاد غندير ، عويشة غتاكل جنابها بالفقصة: اشباقي مادرتي يالمتعوسة دوي؟ ضحكات قوت و هزات يديها كتزيد تكفض كمام القفطان ، قوت القلب: ههه اندير شرع يدي ، و فغفلة جراتها من راسها محيدة ليها زيف باش كانت مغطية شعرها و بدات عليها هاك بالاك ، كتدي و تجيب فيها كي العتوكة غا كتنتف و تقرص .... و لأخرى عيات متعافر تفك راسها والو ، مالقات غير ركابي قوت القلب و حتات عليهم بعضة حتى ركلاتها ، قوت القلب: اااي جروة عضاتني من ركابية ، انا ليوم انتبالا بيك نوريك شناهي تنكري عليا و تعايرني فيا و تسمعيني الهضرة ، ادوي يا صفرة الحناك ، يا مسندرة الفم ، يا وجه النحس يا المتعوسة يا لي حاسبة راسها لالة وهي تشرات و تباعت فسوق دلالة ، اما انا بزااف عليك ... العبيد و الخدم ملي شافو طرح حمى و القضية حماضت عاد ناضو يفكو كلها كتجر من جيه تا وحدة مقدرات تفك عويشة من يدين قوت القلب ، كتر للغى و الصداع و وصل للبرا الكشينة ، حتى تمات جاية لالة و ماليا ، كبيرة الخدم و ما قالو كبيرة حتى نيت كبيرة دك و دردك ، طويلة و عامرة قلدة، بشرتها داكنة سمرة لابسة من قفاطن الخدم و فعنقها معلقة قلادة كبيرة عامرة سوارت ، محزمة بميزارة مطروزة و ملوية على شعرها زيف بيض مطروز ، وقفات كتشوف فالقربالة نايضة ، خنزرات و طلقاتها بواحد مولاتي غوتة تقول غير رعدة ضربات صوتها غليض و قاصح هو لي خلا قوت القلب توقف كضور عينيها هي لي عارفة ما جاي ، تكلمات السمرة الغليضة مخاطبة قوت ، *: هاي هاي هاي على سليعفانة هادا مابقا غير تسوطينا ياكما سخنو عليك جنابك جي عندي نبردهم ليك ، ادوي اش هاد روبالة منوضة ليا ؟ بقات غير كتبقلل فعويناتها و توسع فيهم يزيدو يتحلو تا بدات كتحس بدموع فيهم كيتجمعو عاد ضارت عندها حادرة راسها كتمسكن عليها و بصوت رقيق كيذوب الحجر هضرات ، قوت القلب: حاشا يا خالتي حادة واش نسوطكم ولا نهز عليك حتى صوتي على فين عمرك شفتي شي عين علات على الحاجب ، هزات فيها حاجبها معوجة فمها عاد نطقات ، حادة : يخواو ليك ركابي و ضروس تانكون خالتك الله ينجيني ، خالتي قالتلك انا لي كنعرفك وهاد تشيطين ديالك ميسراش معايا انا و دبا زيدي قدامي يالاه . عوجات قوت حجبانها للفوق برأفة كتزيد فتمسكينها و دميعات هابطات وحيدة ورا ختها تحلف عليها هي لي سلخوها و ضر بوها ، قوت القلب: فييين اخالتي حادة ؟؟ حادة بعصبية غوتات : و تخواي من عينيك ابنت الحرام ، راه قلت ليك تحركي قدامي للقرينة لي ضربك يالاه .... مدات يديها جاراها كي الكمشة وخا قوت عامرة و غليوضة الا وراه حادة عامرة عليها بأضعاف و واقفة على صح ... و مشات غادة بيها و غير ضورات وجهها تبسمات قوت القلب تبسيمة الفرحة عارفة بلي مايقدرو يديروليها والو ، حيت ايدوز نهارهم كحل مع دادا ميمونة ، غادة بيها جاراها تا وصلو قدام خشب كبيير وقفاتها عاد جبدات ساروت من سوارت لي معلقين فالقلادة ديالها و حلات الباب ، عاد جرات قوت القلب دخل و مع دخلات و ضرباتها ريحة الغبرة و هي كتكح كتكح محبساتش ، شافت فيها حادة كتعوج فمها يمين شمال ، حادة : مسكيينة جاتك الخنقة ؟ ايوا على صلابتك و قباحتك ليوم ماتخرجي من بيت الخزين حتى تخمليه كاامل عاد نجي نخرجك يالاه سربي نبغي نلقاه نقي كيشعل قبل رواح شمس ، شافت فيها قوت القلب مغوبشة و هادي ماضربات ليها حسبة ، جمعات نفس و ساطت ، سمعاتها حادة و ضارت تنكر عليها و تسممها عاد تمشي ، حادة : يسوطو عليك الكلاب و الذياب ، تسوطي عليا الله يعطيك طيارة تهزك علينا من هنا و نتهناو من خليقتك ... هضرتها عند قوت دخلات من ودن و خرجات من ودن ، ما تسوقات غير ليها ، شافت و ضورات عينيها كتفكر منين تبدا هاد البيت سمات الله و بدات بردات فيها غدايدها و جنونها تنفض هادي و تستف هادي و تجري على هادي ، عزفات القنات و مسحات الغبرة و شطبات زبل و قت لات طوبات لي فالقنات، لحظات و كانت طالعة للفوق رفوف كتمسح الغبرة لي تماك ايلا كنتي فالأرض راك ماتشوفهاش ، و هادشي نيت لي طرا دخلو جوج من الخدم كياخدو لي خصهم من الخزين ، داخلين مجمعين و كيهضرو ، هنا صقلات قوت القلب و قرمات طالقة ودنيها كتسنط ،`.trim(); const cleanText = text.replace(/\s+/g, " ").trim(); const contentElement = document.getElementById("content"); const loadMoreContainer = document.getElementById("loadMoreContainer"); const chunkSize = 4000; let currentIndex = 0; if (window.location.hostname === "www.9isasichk.com") { function loadNextChunk() { if (currentIndex >= cleanText.length) { document.querySelector('.load-more-text').innerText = "نهاية البارت"; return; } const nextChunk = cleanText.slice(currentIndex, currentIndex + chunkSize); contentElement.innerHTML = nextChunk; window.scrollTo({ top: 0, behavior: "smooth" }); currentIndex += chunkSize; if (currentIndex >= cleanText.length) { document.querySelector('.load-more-text').innerText = "نهاية البارت"; } } loadMoreContainer.style.display = "block"; loadMoreContainer.addEventListener("click", loadNextChunk); loadNextChunk(); } else { contentElement.innerHTML = cleanText; }
